ಸ್ವರತಜನೆದ ಶಾರದೆ – ಚೈತ್ರ ಕಲ್ಲಡ್ಕ
ಮಾತೆರ್ದ್ ಮಲ್ಲ ಮೋಕೆ ಅಪ್ಪೆ ಮೋಕೆಗೆ.ತನ್ಕು ಏತ್ ಬಂಗ ಇತ್ತುಂಡಲ ಎನ್ನ ಜೋಕುಲು ಖುಷಿಟ್ ಕೊಂಡಾಟೊಡು ಇಪ್ಪೊಡು.ಅಕುಲು ಒಂಜಿ ಮಲ್ಲ ಜನ ಆವೊಡುಂದು ಬಯಕುನ ಅಪ್ಪೇ ಪನ್ಪಿ ರಡ್ಚರದ ಮೋಕೆದ ಗಂಟು. ಅಪ್ಪೆ ಮೋಕೆಗ್,ಅಪ್ಪೆನ ಬಂಗ ತೂದ್ ಯಾನುಲಾ ಮಲ್ಲ ಆಯಿ ಬೊಕ್ಕ ಅಪ್ಪೆನ್ ಸುಖೊಟ್ ಕುಲ್ಲಾದ್ ಮಾನವೊಡು ಪಂದು ಬಂಗ ಬತ್ತಿ ಜೋಕುಲು ಒಂಜಿ ಮರ್ಗಿಲುಡು. ಎರ್ತೆ ಸೊರೊಟು ತುಳುವೆರೆನ ಕೆಬಿಕ್ ಸಂಪುದ ತಮ್ಮನ ಮಲ್ತುದ್ ಬಂಗದಾಟುಂದು ನನಲಾ ಸಾದನೆ ಪನ್ಪಿ ಮೂಜಚ್ಚರಡು ಬೆನ್ನಿ ಬೆನೋಡು ಪನ್ಪಿ ಪೊಣ್ಣು ಮಗಲ್ ಸ್ವರತಜನೆದ ಶಾರದೆನ ಸಾಧನೆದ ತಾದಿದ ಕತೆ ಉಂದು.
ಚೈತ್ರ ಕಲ್ಲಡ್ಕ ,ಅವೇತೋ ಪುದರ್ ಪುಗಾರ್ತೆದ ಪದಕು ಸ್ವರೋ ಕೊರ್ತಿನ ಪೆರ್ಮೆದ ಮಗಳ್. ಯಕ್ಷಗಾನ,ನಾಟಕಡ್ ಅಭಿನಯ ಮಲ್ತಿ ರಂಗ ಕಲಾವಿದೆನ ಬದ್ಕುನ ನೆಲೆನ್ ತೆರಿಯೊನುಗ ಬಲೇ.
ದಿ. ಆನಂದ ಸಪಲ್ಯ ಬೊಕ್ಕ ಕವಿತ ಅಮ್ಮನ ಪೇರ ಸಂಸಾರದ ಕುರ್ಲೆ ಆದ್ ಇಲ್ಲದ ತೊಟ್ಟಿಲ್ದ ಜೋಕು ಉಯ್ಯಾಲೆಡ್ ತೆಲಿಕೆದ ಸ್ವರೋ ಬರ್ಪಾವೊಂದು ಕಲ್ಲಡ್ಕದೂರುಡು ಪುಟ್ಟಿನಾರ್.
ಎಲ್ಯ ಪ್ರಾಯೋಡೆ ಇಲ್ಲಗ್ ದಿಕ್ಕಾದಿತ್ತಿನ ಅಮ್ಮೆರೆನ್ ಕಲೆಯೊಂದೆರುಡಲಾ. ಕವಿತ ಅಮ್ಮ ತನ್ನ ರಡ್ಡ್ ಪೊಣ್ಣು ಜೊಕುಲೆನ್ ಅಂಗೈದಾತ್ ಮಲ್ಲ ಜಕ್ಕೆಲುಡ್ ಮಂಚಾವುದಾತ್ ಮಲ್ಲ ಜನ ಮಲ್ಪೊಡುಂದು ಕನ ಕಟೊಂದು, ರಾತ್ರೆ ಪಗೇಲುಂದು ತೂವಂದೇ ಬಡವೆರೆನ ಕಣ್ಣನೀರು ಒಚ್ಚುನ ಬೀಡಿ ಕಟ್ಟೊಂದು ಸಾಂಕಿನಾರ್.
ಚೈತ್ರ ತನ್ನ ಬರವುದ ಕೊಟ್ಯದ ಸುರುತ ಪಜ್ಜೆ ದಿತಿನೇ ಶ್ರೀ ರಾಮ ಹಿರಿಯ ಪ್ರಾಥಮಿಕ ಶಾಲೆ ಪರಂಗಿಪೇಟೆಡ್ 7 ನೇ ತರಗತಿ ಮುಟ್ಟ ಕಲ್ತುದ್ 8ರ್ದ್ 10 ಮುಟ್ಟ ನಿತ್ಯ ಸಹಾಯಮಾತ ಪ್ರೌಢಶಾಲೆ ಮೇರಮಜಲ್ಡ್ , ಪಿಯುಸಿನ್ ಮಹಿಳಾ ಕಾಲೇಜು ಬಲ್ಮಠಡು ಕಲ್ತುದು.ಕೆ.ಪಿ.ಟಿ ಕುಡ್ಲಡು ಡಿಪ್ಲೊಮಾ ಕಲ್ತಿನಾರ್.
ತನ್ನ 6ತರಗತಿರ್ದಿಂಚ ಯಕ್ಷಗಾನದ ಕಲ್ಪಾರ್ತಿಯಾದ್ ಸೂರ್ಯನಾರಾಯಣ ಭಟ್ ಪದಕಣ್ಣಾಯ ಬಾಯರ್ ಮೆರೆನ್ ಗುರು ಆದ್ ಸ್ವೀಕಾರ ಮಲ್ತೊಂದು ನರಕಾಸುರ ಮೋಕ್ಷಡ್ ಕೃಷ್ಣೆ ಆದ್ ಯಕ್ಷರಂಗಗ್ ಕಾರುದೀಯೆರ್. ಆಯಿರ್ದ್ ಬೊಕ್ಕ ಅಂಧಕಾಸುರ ವಧೆಟ್ ಅಂಧಕಾಸುರೆಯಾದ್,ಮೀಣಾಕ್ಷಿ ಕಲ್ಯಾಣಡ್ ಮೀಣಾಕ್ಷಿಯಾದ್,ಅವ್ವೇತೋ ಯಕ್ಷಕೂಟಡ್ ಪಾಲು ಪಡೆಯೊನಿಯೆರ್.
ವಿದ್ಯೆ ಕಲ್ಪರೆ ಗುರು ಇಜ್ಜಿಂಡುಲಾ ನಮಡ ಛಲ ಬೋಡುಗೆ, ಎಲ್ಯ ಪ್ರಾಯೋಡೆ ಭಜನೆ ಪನ್ಪಿ ವಿಭಜನೆ ಇಜ್ಜಂದಿ ದೇಬೆರೆ ಸುಗಿಪುಡ್ ಸ್ವರತಜನೆದ ಪಾಡಿಪಾಯದ ನೆಲೆ ತೆರಿದು ಪದಸ್ವರೊಟ್ ಪುದರ್ ಕನತ್ ಇನೀಕ್ ಪೆರ್ಮೆದ ಸಂಗೀತಗಾರ್ತಿ ಚೈತ್ರ.
ಉಂದು ಈತೇ ಅತ್ತಂದೇ ರಂಗಕಲಾವಿದೆಯಾದ್ ಅವ್ವೇತೋ ನಾಟಕಡ್ ನಟನೆ ಮಲ್ತಿನಾರ್.ಮಾನಸ ಕಲಾವಿದೆರ್ ಪರಂಗಿಪೇಟೆದ ನಾಟಕ ಕೂಟದ ಪುದರ್ ಪುಗಾರ್ತೆದ ಕಲಾವಿದೆ.
ಸತೀಶ್ ಕುಳಾಯಿ ಮೆರ್ನ ಸ್ವರೊತ ಕೂಟಗ್ ಕಾರ್ ದೀಯಿನಾರ್,ಇಂಚರ ಮೇಲೊಡಿಸ್ ಸುಂಕದಕಟ್ಟೆ,ಪ್ರಶಾಂತ್ ಕಂಕನಾಡಿ ಮೆರೆನ ಕೂಟ,ಲಹರಿ ಮ್ಯೂಸಿಕಲ್ ಪೆರ್ಲ,ಶ್ರೀ ದುರ್ಗಾ ಮೇಲೊಡಿಸ್ ಪೆರ್ಲ,ಡಮರುಗ ಮ್ಯಾಜಿಕಲ್ ಸೌಂಡ್ಸ್ ದ ಸಂಗೀತಗಾರ್ತಿ.
ಮೆರ್ನ ಸ್ವರೋ ಚಾತುರ್ಪೊಗು ಕೆಬಿ ಕೊರ್ನ ಜಿ ಎಸ್ ಗುರುಪುರ, ಗಾಣಿಗ ಸಂಭ್ರಮ ಪನ್ಪಿನ ಅಲ್ಬಮ್ ಪದಕು ಸ್ವರ ಕೊರ್ಪವೇರ್ ಅವೇರ್ದ್ ಬೊಕ್ಕ ಸುಮಾರ್ 70 ಅಲ್ಬಮ್ ಪದಕು ಸ್ವರ ಕೊರಿನಾರ್ ಚೈತ್ರ. ಇಂಚಿಪ್ಪ ಬುಡುಗಡೆಯಾಯಿನ ಕರಿಯಜ್ಜೆ ಪದಟ್ ಸ್ವರ ಕೊರ್ದು ಜನಕುಲೆನ ಮೋಕೆ ಗೆಂದಿನಾರ್ ಟಿ ವಿ ಚಾನೆಲ್ಡ್ ಲಾ ಪುದರ್ ಪುಗಾರ್ತೆ ಕನತಿನಾರ್.
ಅವ್ವೇತೊ ಪದಕು ರಾಗ ಸಂಯೋಜನೆ ಮಲ್ತೊಂದು,ತನ್ನನೇ ಆಯಿನ ಶಿಷ್ಯ ಬಳಗನು ಕಟ್ಟೊಂದು ಬುಲೆಯೊಂದಿಪ್ಪುನ ಜೋಕುಲೆಗ್ ಸಂಗೀತದ ಗುರುಲಾ ಆವೊಂದುಲ್ಲೆರ್.
ಪಂಡಿನಾತ್ ಮುಗಿಯಂದ್ ಪನ್ಪಿ ಪಾತೆರದಲೆಕ ಚೈತ್ರನ ಬಂಗದ ತಾದಿ,ಸಾಧನೆದ ಪಜ್ಜೆಲಾ ನಮಕ್ ತೆರಿಯಂದು. ಭಜನೆರ್ದ್ ಯಾನ್ ಈ ಮಟ್ಟುಗು ಬುಲೆಯೇ,ಎನ್ನ ಅಮ್ಮ ಎನನ್ ಬೊಕ್ಕ ಎನ್ನ ತಂಗಡಿನ್ ಬೀಡಿ ಕಟ್ಟುದು ಸಾಂಕುದೆರ್. ಇತ್ತೇ ಪದ ಪನೊಂದು,ಸಂಗೀತನ್ ಎನ್ನ ಉಸುಲು ಮಲ್ತೊಂದು ಇಲ್ಲನ್ ನಡಪಾವುನ ಪೊಣ್ಣು ಮಗಳು ಯಾನ್ . ನನಲಾ ಮಸ್ತ್ ಕಲ್ಪರೆ ಉಂಡು ಪ್ಲೇ ಬ್ಯಾಕ್ ಸಿಂಗರ್ ಆದ್ ,ಎನ್ನ ಅಮ್ಮ ಬೊಕ್ಕ ಮೆಗ್ದಿನ್ ಪೊರ್ಲುಡು ತೂವೊಡು. ನಾಲು ಜನತ ಬಾಯಿಡ್ ಎಡ್ಡೆ ಪಾತೆರ ಕೇನೊಡುಂದು ಪನ್ಪೆರ್ ಚೈತ್ರ.
ಒಂಜಿ ಕಲಾವಿದೆ ನಡುರಾತ್ರೆ ಇಲ್ಲಗ್ ಬತ್ತಲು ಪಂಡ ಅಲೆನ್ ಸಂಶಯದ ದೃಷ್ಟಿಡ್ ತೂವೊರ್ಚಿ. ಆಲ್ ಕಲಾವಿದೆ ,ಆಲ್ ನಮ್ಮೂರ್ದ ಪೊಣ್ಣು ,ನಮ್ಮ ಇಲ್ಲದ ಪೊಣ್ಣು ಪಂದ್ ಅಲ್ನ ಸಾಧನೆಗ್ ಬೆರಿತಾಂಗ್ ಕೊರ್ಲೆ. ನಮಡ ಪ್ರತಿಯೊರಿಡಲಾ ಒಂಜೊಂಜಿ ಕಲೆ ಉಂಡು. ಅವ್ ದೈವ ದೇಬೆರ್ ಕೊರ್ನ ಗೇನದ ಶಕ್ತಿ. ಅವೇನು ಎಡ್ಡೆಡೆ ಉಪಯೋಗ ಮಲ್ಪುಲೇ. ನಮ್ಮ ಬೇಲೆದ ಮಿತ್ತ್ ಮೋಕೆ ,ಗೌರವ ಇಪ್ಪೊಡುಂದು ಪನ್ಪೆರ್ ಚೈತ್ರ.
ಬಂಗದ ಕಲ್ಲು ಮುಳ್ಳುದ ತಾದಿಡ್, ಮನಸ್ಸುಡ್ ಬೇನೆ ನಿಂಗೊಂದು ಪತ್ತರೆ ಬಾಯಿಡ್ ,ನೂದು ಮುತ್ತದ ಪಾತೆರ ಕೇನೊಡು,ಯಾನೊಂಜಿ ಪುದರ್ ಪುಗಾರ್ತೆದ ಪದಪನ್ಪುನಾಲು ಆದ್ ಇಲ್ಲ ತೂಪುನ ಪೆರ್ಮೆದ ಪೊಣ್ಣು ಮಗಳಾವೊಡು ಪಂದು ಪೊರ್ಬುನ ಎಲ್ಯ ಪ್ರಾಯದ ಪೊಣ್ಣನ ಬದುಕದ ಕನ ಪೂರ ಆ ದೈವ ದೇವೆರ್ ಕೈಗೂಡದ್ ಕೊರಡ್ ಪನ್ಪಿ ಆಶಯ ಎನ್ನ.
ಕಲಾವಿದೆರ್ ಪಲ್ಲಡ್ ಉಂತಿನ ನೀರತ್ತ್. ದಿಂಜಿ ಕಡಲುದ ಎರ್ತೆಲುದ ಸೆರೆಕುಲು .
