ಒಡಿಪು

ಒಡಿಪುಡು ಜೈ ತುಲುನಾಡ್ (ರಿ ) ಒಡಿಪು ಎಗ್ಗೆದ ವತಿರ್ದ್ “ತುಲುವೆರೆ ದಂಡ್

ಪುತ್ತಿಗೆ ಮಠ ದ್ ಸ್ವಾಮಿಲು ಶ್ರೀ ಶ್ರೀ ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮಿಲೆನ ಆಶೀರ್ವಾದ ಡ್ ಒಡಿಪು ಶ್ರೀಕೃಷ್ಣ ಮಠಕ್ ತುಳು ಲಿಪಿಟ್ ಬರೆಯಿನ ಕೋಟಿಗೀತಾ ಲೇಖನ ಯಜ್ಞ ದ ಸಮರ್ಪಣಾ ಲೇಸ್

ಒಡಿಪು: ಒಡಿಪು ಶ್ರೀಕೃಷ್ಣ ಮಠಟ್ ಪುತ್ತಿಗೆ ಮಠ ದ್ ಸ್ವಾಮಿಲು ಶ್ರೀ ಶ್ರೀ ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮಿಲೆನ ಆಶಯದಂಚ ಕೋಟಿಗೀತಾ ಲೇಖನ ಯಜ್ಞನ್ ಜೈ ತುಲುನಾಡ್(ರಿ) ವತಿರ್ದ್ ತುಳು ಲಿಪಿಟ್ ಬರೆಯಿನ ಕೋಟಿಗೀತಾ ಲೇಖನದ ಸಮರ್ಪಣಾ ಅಂಗವಾದ್ ತುಲುನಾಡ್(ರಿ) ಒಡಿಪು ಎಗ್ಗೆದ ವತಿರ್ದ್ ಅಟ್ಟನೆ ಮಲ್ದಿನ “ತುಲುವೆರೆ ದಂಡ್ ಒಡಿಪುದ ಕೃಷ್ಣ ಗ್” ಪನ್ಪಿನ ಲೇಸ್ ನ 16 ಐತಾರದಾನಿ ಜೋಡುಕಟ್ಟೆ ರ್ದ್ ಒಡಿಪು ಕೃಷ್ಣ ಮಠ ಮುಟ್ಟ ಬಾರಿ ಗರ್ದ್ ಬಿರ್ದ್ ದ ಮೆರವಣಿಗೆ ನಡತ್ಂಡ್.
ತುಲುವೆರೆ ದಂಡ್ ದಿಬ್ಬಣನ್ ಉಡುಪಿ ಪರ್ಯಾಯ ಪುತ್ತಿಗೆ ಶ್ರೀ ಕೃಷ್ಣ ಮಠದ ದಿವಾನೆರ್ ನಾಗರಾಜ್ ಆಚಾರ್ಯೆರ್ ಉದಿಪನ ಮಲ್ತೆರ್. ಒಡಿಪುದ ಶಾಸಕೆರ್ ಯಶ್ ಪಾಲ್ ಸುವರ್ಣರವರು ತುಳುವಪ್ಪೆಗ್ ಪುರ್ಪ ಸಂದೈತ ಮಲ್ತ್ ದ್ ತುಳು ಕೊಡಿ ರಾಪಾದ್ ದಿಬ್ಬಣಗ್ ಚಾಲನೆ ಕೊರಿಯೆರ್.
ಒಡಿಪುದ ಕೃಷ್ಣ ಮಠಕ್ ಬತ್ತ್ ದ್ ಪುತ್ತಿಗೆ ಮಠದ ಮಠಾಧೀಶೆರ್ ಶ್ರೀ ಶ್ರೀ ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮಿಲೆಗ್ ಕೊರ್ದು ಆರೆನ ದಿವ್ಯ ಹಸ್ತಡ್ ಪೂಜೆ ಮಲ್ತ್ ಅಕ್ಷತೆ ಮಲ್ತೆರ್. ಈ ಪೊರ್ತುಡು ಪಾತೆರಿನ ಸ್ವಾಮಿಲು ಆಶೀರ್ವಚನ ಕೊರ್ದು
ಜೈ ತುಳುನಾಡ್ (ರಿ) ಸಂಘಟನೆದ ಕಜ್ಜನ್ ಪುತ್ತಿಗೆ ಶ್ರೀಗಳು ಪುಗರಿಯೆರ್. ತುಳು ಭಾಷೆ ಬೊಕ್ಕ ಲಿಪಿತ ಬುಲೆಚ್ಚಿಲ್ ಗ್ ಸಂಸ್ಥೆದ ನಿಸ್ವಾರ್ಥ ಸೇವೆಗ್ ಎಡ್ಡೆಪ್ಪು ಪಂಡೆರ್ .

ಈ ಪೊರ್ತುಡು ಅವೆತೋ ಜೋಕುಲೆಗ್ ತುಳು ಲಿಪಿ ಕಲ್ಪಾಯಿನ ಪುಷ್ಪ ಶೆಟ್ಟಿ ಗ್ ಮಾನಾದಿಗೆ ಮಲ್ತೆರ್ ಅಂಚೆನೆ ತುಳು ಲಿಪಿ ಟ್ ಕೋಟಿ ಗೀತೆ ಲೇಖನನ್ ಬರೆಯರೆ ಸಾಕಾರ ಕೊರಿನ ಒಡಿಪು ಕೃಷ್ಣ ಮಠದ ಕೋಟಿ ಗೀತಾ ಲೇಖನ ಯಜ್ಞ ದ ಪ್ರವರ್ತಕೆರ್ ರಮಣಾಚಾರ್ಯೆರೆಗ್, ಅಂಚೆನೆ ಬೊಂಬಾಯಿಡ್ ಇತ್ತ್ ದ್ ತುಳು ಲಿಪಿ ಟ್ ಕೋಟಿ ಗೀತೆ ಲೇಖನ ಬರೆಯರೆ ಉಮೇದ್ ದಿಂಜಾಯಿನ ಜೈ ತುಳುನಾಡ್ ಸಂಘಟನೆ ದ ಸುರೇಖಾ ಶೆಟ್ಟಿ ಮೊಕ್ಲೆಗ್ ಗೌರವ ಮಲ್ತೆರ್.

ಲೇಸ್ ದ ಗುರ್ಕಾರ್ಮೆನ್ ಜೈ ತುಲುನಾಡ್ (ರಿ) ಒಡಿಪು ಎಗ್ಗೆದ ಯ ಗುರ್ಕಾರ್ಲು ಸುಶೀಲ ಜಯಕರ್ ವೈಸೊಂದಿತ್ತೆರ್.

ಈ ಪೊರ್ಲ ಲೇಸ್ ಡ್ ಸಚಿವೆರ್ ಕೋಟ ಶ್ರೀನಿವಾಸ್ ಪೂಜಾರಿ, ಮಾಜಿ ಸಚಿವೆರ್ ಪ್ರಮೋದ್ ಮಧ್ವರಾಜ್, ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಪದುಕೆರ್ ಡಾ! ಆಕಾಶ್ ರಾಜ್ ಜೈನ್, , ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಪದುಕೆರ್ ತಾರಾ ಆಚಾರ್ಯ, ಜೈ ತುಳುನಾಡ್ (ರಿ ) ಕೇಂದ್ರ ಸಮಿತಿ ಗುರ್ಕಾರ್ಲು ಉದಯ ಪೂಂಜಾ ತಾರಿಪಾಡಿ ಗುತ್ತು, ಕಾರ್ಯಂತೆರ್ ಪೂರ್ಣಿಮ ಬಂಟ್ವಾಳ, ಸಂಘಟನಾ ಕಾರ್ಯಂತೆರ್ ಸಂತೋಷ್ ಕಟಪಾಡಿ, ಒತ್ತು ಕಾರ್ಯಂತೆರ್ ಪ್ರಜ್ಞಶ್ರೀ, ಸ್ಥಾಪಕ ಸಮಿತಿ ಪದುಕೆರ್ ಶರತ್ ಕೊಡವೂರು, ಕಾಸ್ರೋಡು ಎಗ್ಗೆದ ಗುರ್ಕಾರ್ಲು ಪ್ರವೀಶ್ ಕುಲಾಲ್, ಮಾಜಿ ಗುರ್ಕಾರ್ಲು ಕುಶಲಾಕ್ಷಿ ಕಣ್ವತೀರ್ಥ, ಬೆಂಗಳೂರು ಎಗ್ಗೆದ ಗುರ್ಕಾರ್ಲು ನಿಧೀಶ್ ಶೆಟ್ಟಿ ಶಿರೂರು, ಬಂಟ್ವಾಳ ಎಗ್ಗೆದ ಗುರ್ಕಾರ್ಲು ಕಿಶೋರ್ ಪೂಜಾರಿ, ಕೇಂದ್ರ ಸಮಿತಿ ಪದುಕೆರ್ ಒಡಿಪು ಎಗ್ಗೆದ ಸಮಿತಿ ಪದುಕೆರ್ ಅಂಚೆನೆ ಕುಡ್ಲ, ಕಾಸ್ರೋಡು, ಬೆಂಗಳೂರು, ಒಡಿಪು, ಬಂಟ್ವಾಳ, ಕಾರ್ಲ ಎಗ್ಗೆದ ಪದುಕೆರ್ ಅಂಚೆನೆ ಜೈ ತುಳುನಾಡ್ ಸಂಘಟನೆದ ಪದುಕೆರ್ ಬೊಕ್ಕ ಕೆಲವೆರ್ ಪಾಲ್ ಪಡೆದಿತ್ತೆರ್.

ಸಂಭ್ರಮದ ತುಲುವೆರೆ ದಂಡ್ ದಿಬ್ಬಣ

ತುಳುವಪ್ಪೆನ ಭಾವಚಿತ್ರ ತುಳು ಲಿಪಿತ ಮಸ್ತಿರೆ, ತುಲುಪರ ಬರವು, ತುಳು ಕೊಡಿ, ವಿಶೇಷವಾದ್ ಭಜನಾ ತಂಡಲು ಭಕ್ತಿ, ಕೊಂಬು ವಾದ್ಯದ ಸೊರ, ದುಂಬುಡು ಕಲಶ ಪತ್ತಿನ ಪೊಂಜೊವುಲು ತುಲುನಾಡ್ ಅವೆತೋ ಜನ ಈ ಪೊರ್ಲ ಲೇಸ್ ಡ್ ಪಾಲ್ ಪಡೆಯೆರ್.
ಈ ಪೊರ್ತುಡು ಈ ದಿಬ್ಬಣಗ್ ಸಾಕಾರ ಕೊರ್ನಿ ಒಡಿಪು ಪೋಲೀಸ್. ಅಕ್ಲೆನ ಭದ್ರತೆದ ಬೆರಿತಾಂಗ್ ಉಂದೆಕ್ ಸಾಕರ ಕೊರುಂಡು.

ತುಲು ಭಾಷೆದ ತುಲು ಲಿಪಿತ ಭಗವದ್ಗೀತೆ ಸಮರ್ಪಣೆ

ತುಲು ಭಾಷೆದ ತುಲು ಲಿಪಿಟ್ ಬರೆಯಿನ ಕೋಟಿ ಗೀತಾ ಲೇಖನ್ ಸಾದಾರಣ ನೂತ ಐವ ರ್ದ್ ಜಾಸ್ತಿ ಜನ ಬರೆಯಿನ ಬೂಕುನು ತುಳುವೆರೆ ದಂಡ್ ದ ದಿಬ್ಬಣ ಡ್ ಕನತ್ ದ್ ಭಗವದ್ಗೀತೆಗ್ ಒಡಿಪುದ ಶ್ರೀಕೃಷ್ಣ ದೇವೆರೆನ ಮಟ್ಟೆಲ್ ಅರ್ಪಣೆ ಮಲ್ತೆರ್. ,

ತುಳು ಅಭಿಮಾನದ ಪೊರ್ತುಗು ಸಾಕ್ಷಿಯಾಂಡ್ ಒಡಿಪು:

ಒಡಿಪುಡು ಈ ಲೇಸ್ ದ ಒರುಟು ತುಳು ಸಂಸ್ಕೃತಿದ ಉಮೇದ್ ಬೊಕ್ಕ ಶ್ರದ್ಧೆಗ್ ಸಾಕ್ಷಿಯಾಂಡ್. ತುಳು ಪರವಾದ್ ನಡತಿನ ಸುರುತ ದಿಬ್ಬಣಡ್ ಭಕ್ತೆರ್, ಸಂಸ್ಕೃತಿ ಮೋಕೆ ಮಲ್ಪುನಕುಲು, ಜೋಕುಲು ಬೊಕ್ಕ ಬೇತೆ ಬೇತೆ ಸಂಘಟನೆಲು ಬೆರಿತಾಂಗ್ ಕೊರ್ದು ಈ ಪೊರ್ಲ ದಿಬ್ಬಣ ಗ್ ಬೆರಿತಾಂಗ್ ಕೊರ್ದು ಒಡಿಪುದ ತುಳು ಅಭಿಮಾನಗ್ ಸಾಕ್ಷಿಯಾಯೆರ್.

“ತುಳು ಮಧ್ವಾಚಾರ್ಯರ ಭಾಷೆ ಆಯಿನಾತ್ ಬೇಗ ತುಳು ರಾಜ್ಯ ಆವೊಡು — ಪುತ್ತಿಗೆ ಶ್ರೀ ಸ್ವಾಮಿ :

ಆಶೀರ್ವಚನ ಕೊರಿನ ಪುತ್ತಿಗೆ ಶ್ರೀ ಲು ತುಳು ಭಾಷೆದ ಮಹತ್ವನ್ ತೆರಿಪಾಯೆರ್. ತುಳು ಪ್ರಾಚೀನ ಬೊಕ ಘನಭಾಷೆ. ಮಧ್ವಾಚಾರ್ಯೆರ್ ತನ್ನ ಕಾಲಡ್ಲಾ ತುಳುಟೆ ಪಾತೆರೊಂದು ಇತ್ತೆರ್. ನಮ್ಮ ಮಠದ ದಾಖಲೆಲು, ಪರಂಪರೆ, ಬೊಕ್ಕ ಅವೆತೋ ಗ್ರಂಥಲು ತುಳು ಲಿಪಿಟೇ ಇತ್ತ್ಂಡ್. ಇತ್ತೆಲ ನಮ್ಮ ಮಠಾಧೀಶೆರ್ ತುಳು ಲಿಪಿಟ್ ಸಹಿ ಪಾಡುನ ಪರಂಪರೆನ್ ದುಂಬರಿತೊಂದುಲ್ಲೆರ್. ತುಳು ಕು ಲಿಪಿ ಇಜ್ಜಿ ಪನ್ಪಿನವು ಸುಳ್ಳು. ವಾಸ್ತವಡ್ ತುಳು ಲಿಪಿನೆ ಮಲಯಾಳದಕುಲು ಕೊನೊತೆರ್. ಮಲಯಾಳಗ್ ಪ್ರತ್ಯೇಕ ಮೂಲ ಲಿಪಿ ಇಜ್ಜಿ. ತುಳು ಶ್ರೀಮಂತ ಸಂಸ್ಕೃತಿ, ಶ್ರೀಮಂತ ಪರಂಪರೆ ಬೊಕ್ಕ ತನ್ನನೆ ಆಯಿನ ಲಿಪಿ ಇಪ್ಪುನ ಭಾಷೆ ಪನ್ಪುನ ಸತ್ಯನ್ ಜಗತ್ತ್ ತೆರಿಯೋನೊಡು. ತುಳು ಭಾಷೆ ಗ್ ಮಸ್ತ್ ಕಡೆಟ್ ದೊಂಕುನ ಕೆಲಸ ಆವೊಂದುಂಡು. ಆಯಿನಾತ್ ಬೇಗ ತುಳು ಭಾಸೆ ಅಧಿಕೃತ ಆವೊಡು ಈತ್ ಮಾತಾ ಸಂಸ್ಕೃತಿ ಇಪ್ಪುನ ಈತ್ ಪಿರಾಕ್ ಪರತಿರಿ ಇಪ್ಪುನ ತುಳುನಾಡ್ ಆಯಿನಾತ್ ಬೇಗ ತುಳು ರಾಜ್ಯ ಆವೊಡು. ಉಂದೆಕ್ ಮಾತಾ ತುಳುವೆರ್ ಒಟ್ಟಾವೊಡು ಪಂಡೆರ್.