ಉದಿಪನ

ಉರ್ವ ಪರ್ಪಿನ ನೀರ್ ದ ಘಟಕ ಉದಿಪನ

ಕುಡ್ಲ : ದಕ್ಷಿಣ ಕನ್ನಡ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಕುಡ್ಲದ ಉರ್ವ ಹೊಯ್ಗೆಬೈಲ್ ದ ಜೈಭಾರತಿ ತರುಣ ವೃಂದದ ವತಿರ್ದ್ ಕರ್ಣಾಟಕ ಬ್ಯಾಂಕ್ ಒಟ್ಟು ಸೇರಿಗೆಡ್ ಉರ್ವ ಮೈದಾನದ ಕೈತಲ್ ಕಟ್ಟಿನ ಪರ್ಪಿನ ನೀರ್ ದ ಪೊಸ ಘಟಕನ್ ಕೋಡೆ ಉದಿಪನ ಮಲ್ತೆರ್.

ಪೊಸ ಘಟಕ ಉದಿಪನ ಮಲ್ತಿನ ಕರ್ಣಾಟಕ ಬ್ಯಾಂಕ್‌ದ ಸಹಾಯಕ ಮಹಾಪ್ರಬಂಧಕ ಪಸಂದನ್ ತೇನಿಸ್ಸೆರಿ ಪಾತೆರ್ದ್ ಸಮಾಜಮುಖಿ ಸೇವೆ ಮಲ್ತೊಂದು ಉಪ್ಪುನ ಜೈಭಾರತಿ ತರುಣ ವೃಂದದ ಕಾರ್ಯಗ್ ಎಡ್ಡೆಪ್ಪುದ ನುಡಿ ಪಂಡೆರ್.

ಈ ಪೊರ್ತುಡು ಕಾರ್ಪೊರೇಟರ್ ಗಣೇಶ್ ಕುಲಾಲ್ ಮೆರೆಗ್ ಮಾನಾದಿಗೆ ಮಲ್ತೆರ್ . ಮಲ್ಲ ಬಿನ್ನೆರ್ ಆದ್ ‘ನಮ್ಮ ಕುಡ್ಗ’ವಾಹಿನಿದ ನಿರ್ದೇಶಕೆರಾಯಿನ ಲೀಲಾಕ್ಷ ಕರ್ಕೇರ, ಪತ್ರಿಕಾ ಭವನ ಟ್ರಸ್ಟ್‌ದ ಗುರ್ಕಾರ್ಲಾಯಿನ ರಾಮಕೃಷ್ಣ ಆರ್,
ಮನಪಾ ಸ್ಥಾಯಿ ಸಮಿತಿ ಗುರ್ಕಾರ್ಲಾಯಿನ ಲೀಲಾವತಿ ಪ್ರಕಾಶ್, ಕಾರ್ಪೊರೇಟರ್ ಜಗದೀಶ್ ಶೆಟ್ಟಿ ಪಾಲ್ ಪಡೆದಿತ್ತೆರ್ .
ಜೈಭಾರತಿ ತರುಣ ವೃಂದದ ಗೌರವ ಗುರ್ಕಾರ್ಲಾಯಿನ ಕೇಶವ ಕರ್ಕೇರ, ಗುರ್ಕಾರ್ಲಾಯಿನ ರಾಜೇಶ್ ಸಾಲ್ಯಾನ್, ಕಾರ್ಯದರ್ಶಿ ವಿಕ್ರಮ್, ಕೋಶಾಧಿಕಾರಿ ವರದರಾಜ್‌ ಶ್ರೀಯಾನ್,ಮಾಜಿ ಗುರ್ಕಾರ್ಲಾಯಿನ ಸದಾಶಿವ ಶೆಟ್ಟಿ, ದಾವನ್ ಕುಮಾರ್, ಮಹಿಳಾ ವೃಂದದ
ಮಾಜಿ ಗುರ್ಕಾರ್ಲಾಯಿನ ಸವಿತಾ ವರದರಾಜ್ ಪಾಲ್ ಪಡೆದಿತ್ತೆರ್.

ಬಿರುವೆರ್ ಕಾಪು ಸೇವಾ ಸಮಿತಿ ಉದಿಪನ, ಸಾಧಕೆರೆಗ್‌ತಮ್ಮನ

ಕಾಪು: ಬಿರುವೆರ್ ಕಾಪು ಸೇವಾ ಸಮಿತಿದ ಸಮಾಜ ಸೇವೆ ನಿರಂತರವಾದ್ ನಡತೊಂದುಪ್ಪಡ್. ಅಂಚೆನೆ ಬಾರಿ ಪುಗರ್ತೆದ ಸಂಘಟನೆ ಪಂದ್ ಪ್ರಸಿದ್ಧಿ ಪಡೆವಡ್ ಪಂದ್ ಕೇರಳ ಶಿವಗಿರಿ ಮಠತ್ತ ಶ್ರೀ ಸತ್ಯಾನಂದ ತೀರ್ಥ ಸ್ವಾಮಿಲು ಪಂಡೆರ್.
ಆರ್, ಮೂಳೂರು ಬಿಲ್ಲವರ ಸಂಘೊಡು ಜ.೨೮ ತಾರೀಕ್‌ದಾನಿ ನಡತಿನ ಬಿರುವೆರ್ ಕಾಪು ಸೇವಾ ಸಮಿತಿ ಉದಿಪನ, ಸಾಧಕೆರೆಗ್ ಮಾನಾದಿಗೆ, ಬಡಪತ್ತ್‌ದಕ್ಲೆಗ್ ಪಣವುದ ಸಕಾಯ ಪಟ್ಟುನ ಲೇಸ್‌ಡ್ ಪಾಲ್ ಪಡೆದ್ ಆಶೀರ್ವಚನ ಮಲ್ತೆರ್.
ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ ಆಶೀರ್ವಾದ, ಕೋಟಿ ಚೆನ್ನಯೆರ್, ಕಾಂತಾಬಾರೆ ಬೂದಾಬಾರೆರ್‍ನ ಅನುಗ್ರಹ, ಕುದ್ರೋಳಿ ಶ್ರೀ ಗೋಕರ್ಣನಾಥೇಶ್ವರ ಅಂಚೆನೆ ಕಟಪಾಡಿ ಶ್ರೀ ವಿಶ್ವನಾಥ ದೇವೆರ್‍ನ ಅನುಗ್ರಹದ ಮುಕೇನ ಬಿರುವೆರ್ ಕಾಪು ಸೇವಾ ಸಮಿತಿ ಎತ್ತರದ ಸಾಧನೆ ಮಲ್ಪಡ್ ಪಂಡೆರ್.
ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪಡೆದಿನ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಮೇರ್ ಪಾತೆರ್‍ದ್, ಬಿರುವೆರ್ ಸೇವಾ ಸಮಿತಿ ಕರಿನ ಮೂಜಿ ವರ್ಷೊರ್ದಿಂಚಿ ಮಲ್ತೊಂದು ಬೈದಿನ ಸಾಂತ್ವನ ಯೋಜನೆಲು ಮಾತೆರ್ನಲ ಕಣ್ಣ್ ಬುಲಪಾದ್ಂಡ್. ಈ ಸೇವೆ ಬುಡಂದೆ ನಡಪೊಡು ಪಂಡೆರ್.
ಬಿರುವೆರ್ ಕಾಪು ಸೇವಾ ಸಮಿತಿದ ಉಪಾಧ್ಯಕ್ಷೆರ್ ಗಣೇಶ್ ಕೋಟ್ಯಾನ್ ಲೇಸ್‌ದ ಗುರ್ಕಾರ್ಮೆದ ಮಣೆಟ್ಟ್ ಕುಲ್ದಿತ್ತಿರ್. ಮೂಳೂರು ಬ್ರಹ್ಮಶ್ರೀ ನಾರಾಯಣ ಗುರು ಸೇವಾ ಸಂಘದ ಅಧ್ಯಕ್ಷೆರ್ ಸುಭಾಶ್ಚಂದ್ರ ರಾಜಮನೆ ಲೇಸ್ ಉದಿಪನ ಮಲ್ತೆರ್.

ಕಾಪು ಬಿಲ್ಲವರ ಸಹಾಯಕ ಸಂಘದ ಗೌರವಾಧ್ಯಕ್ಷೆರ್ ಪ್ರಭಾಕರ ಪೂಜಾರಿ, ಮೂಳೂರು ಬ್ರಹ್ಮಶ್ರೀ ನಾರಾಯಣಗುರು ಸಮಾಜ ಸೇವಾ ಸಂಘದ ಬೊಂಬಾಯಿ ಸಮಿತಿದ ಗುರ್ಕಾರ್ಲು ಎನ್.ಜಿ.ಪೂಜಾರಿ ಇತ್ತೆರ್.
ಉಂದುವೇ ಪೊರ್ತುಡು ರಾಜ್ಯೋತ್ಸವ ಪ್ರಶಸ್ತಿ ಪಡೆದಿನ ಬನ್ನಂಜೆ ಬಾಬು ಅಮೀನ್,ನ್ಯಾಯವಾದಿ ಸಂಕಪ್ಪ ಅಮೀನ್, ಸರ್ಕಲ್ ಇನ್ಸ್‌ಪೆಕ್ಟರ್ ಪ್ರಕಾಶ್ ಮೊಕ್ಲೆಗ್ ಮಾನಾದಿಗೆ ಮಲ್ತೆರ್. ಸಮಿತಿದ ವತಿರ್ದ್ ಅಮಣಿ ಪೂಜಾರ್ತಿ ಮೇರೆಗ್ ೩೦,೦೦೦, ಸುಧಾಕರ ಜಿ.ಅಮೀನ್ (೨೦,೦೦೦) ಗಿರಿಜಾ ಪೂಜಾರ್ತಿ(೧೦,೦೦೦ ರೂ.)ಮೆರೆಗ್ ಪಣವುದ ಸಕಾಯ ಕೊರಿಯೆರ್.
ಸಮಿತಿದ ಕಾರ್ಯಕಾರಿ ಸಮಿತಿ ಸದಸ್ಯೆರಾಯಿನ ಪುರುಷೋತ್ತಮ ಸಾಲ್ಯಾನ್ ಬಿನ್ನೆರೆನ್ ಎದುಕೊಂಡೆರ್. ರಾಕೇಶ್ ಕುಂಜೂರು ಸುರೂತ್ತ ಮದಿಪು ಮದಿತೆರ್. ಕಾರ್ಯಂತೆರ್ ವಿಕ್ಕಿ ಪೂಜಾರಿ ಮಡುಂಬು ಸೊಲ್ಮೆ ಸಂದಾಯೆರ್. ಒತ್ತು ಕಾರ್ಯಂತೆರ್ ಅತಿಥ್ ಸುವರ್ಣ ಪಾಲಮೆ ಲೇಸ್ ನಡಪಾದ್ ಕೊರಿಯೆರ್.