2024

ಗುಜ್ಜರಕೆರೆ ನೀರ್ ಡ್ ಇತ್ತೆಲ ಉಂಡು ಅಪಾಯಕಾರಿ ಬ್ಯಾಕ್ಟೀರಿಯಾ!

ಕುಡ್ಲ ಪೇಂಟೆದ ಐತಿಹಾಸಿಕ ಮಹತ್ವ ಇಪ್ಪುನ, ಒಂಜಿ ಕಾಲಡ್ ತೀರ್ಥಕೆರೆ ಆಯಿನ ಗುಜ್ಜರಕೆರೆತ್ತ ನೀರ್ ಕಲುಷಿತ ಆಯಿನವು ಕುಡೊರ ಸಾಬೀತಾತ್ಂಡ್.

ಗುಜ್ಜರಕೆರೆ ತೀರ್ಥ ಸಂರಕ್ಷಣ ಸಮಿತಿ ವೇದಿಕೆದ ಮುತಾಲಿಕೆಡ್ ಕೆರೆತ್ತ ನೀರ್ ನ್ ಪರೀಕ್ಷೆಗ್ ಸೇರ್ಸಾದ್ಂಡ್. ವರದಿಡ್ ನೀರ್ ಕಲುಷಿತ ಆಯಿನ ಬಗೆಟ್ಟ್ ಉಲ್ಲೇಖ ಉಂಡು.

ಕೆರೆತ್ತ ರಡ್ಡ್ ಕಡೆರ್ದ್ ನೀರ್ ದ ಮಾದರಿನ್ ದೆತ್ತ್ ದ್ ಪೇಂಟೆದ ಎಕ್ಕೂರುದ ಮೀನುಗಾರಿಕೆ ಕಾಲೇಜ್ ದ ಆಕ್ವೆಟಿಕ್ ಎನಿಮಲ್ ಹೆಲ್ತ್ ಮ್ಯಾನೇಜ್ ಮೆಂಟ್ ವಿಭಾಗದ ಪ್ರಯೋಗಾಲಯಡ್ ಗುರುವಾರ ನೀರ್ ದ ಪರೀಕ್ಷೆನ್ ಮಲ್ದ್ಂಡ್. ನೆತ್ತ ವರದಿಡ್ ನೀರ್ ಕಲುಷಿತ ಆಯಿನವು ತೆರಿದ್ ಬೈದ್ಂಡ್.

ಕೆರೆತ್ತ ಪಶ್ಚಿಮ ಭಾಗಡ್ ದೆತ್ತ್ ದ್ ಪರೀಕ್ಷೆಗ್ ಸೇರ್ಸಾಯಿನ ನೀರ್ ದ ಪ್ರತಿ 100 ಮಿಲಿ ಲೀಟರ್ ಡ್ ಟೋಟಲ್ ಕಾಲಿಫಾರ್ಮ್ ಸಂಖ್ಯೆ 1600 ದಾತ್ ತೂಜಿದ್ ಬೈದ್ಂಡ್. ಫೀಕಲ್ ಕಾಲಿಫರ್ಮ್ ಸಂಖ್ಯೆ 500 ದಾತ್ ಇತ್ತ್ಂಡ್. 100 ಎಂ.ಎಲ್ ನೀರ್ ಡ್ ಈ ಪ್ರಮಾಣದ ಅಂಶ ತೂಜಿದ್ ಬೈದಿನವು ಅಪಾಯಕಾರಿ ಆತ್ಂಡ್. ಈಶಾನ್ಯ ದಿಕ್ಕ್ ರ್ದ್ ದೆತ್ತ್ ದ್ ಪರೀಕ್ಷೆಗ್ ಸೇರ್ಸಾಯಿನ ನೀರ್ ದ ಪ್ರತಿ 100 ಎಂ.ಎಲ್ ಡ್ ಟೋಟಲ್ ಕಾಲಿಫರ್ಮ್ ಸಂಖ್ಯೆ 1600 ದಾತ್ ಉಂಡು. ಫೀಕಲ್ ಕಾಲಿಫರ್ಮ್ ಸಂಖ್ಯೆ 300 ದಾತ್ ಉಂಡು ಪಂದ್ ವರದಿಡ್ ಉಲ್ಲೇಖ ಆತ್ಂಡ್. ಈ ನೀರ್ ನ್ ಪರ್ಪುನೇ ಅಪಾಯಕಾರಿ ಪಂದ್ ತೆರಿದ್ ಬೈದ್ಂಡ್.

100 ಮಿ.ಮೀ ನೀರ್ ಡ್ ಟೋಟಲ್ ಕಾಲಿಫರ್ಮ್ ಪ್ರಮಾಣ ಶೂನ್ಯ ಇತ್ತ್ಂಡ ಮಾತ್ರ ನೀರ್ ಉತ್ತಮ, ಪರೊಲಿ, ಗಲಸೊಲಿ. 1-3 ಇತ್ತ್ಂಡ ಸಮಾಧಾನಕರ ಬೊಕ್ಕ 4-10 ದಾತ್ ಇತ್ತ್ಂಡ ಅತೊಂಜಿ ಎಡ್ಡೆ ಅತ್ತ್, 10 ರ್ದ್ ಮಿತ್ತ್ ಇತ್ತ್ಂಡ ಪರಿಯೆರೆ ಯೋಗ್ಯ ಅತ್ತ್, ಫೀಕಲ್ ಕಾಲಿಫರ್ಮ್ ಲ ಶೂನ್ಯ ಪ್ರಮಾಣಡ್ ಇತ್ತ್ಂಡ ಮಾತ್ರ ಪರಿಯೆರೆ ಯೋಗ್ಯ ಆತ್ಂಡ್.

ಗುಜ್ಜರಕೆರೆ ನೀರ್ ನ್ ನೆರ್ದ್ ದುಂಬುಲ ಸುಮಾರ್ ಸರ್ತಿ ಪರೀಕ್ಷೆ ಮಲ್ದ್ಂಡ್. ಪ್ರತಿ ಸರ್ತಿಲ ಅಪಾಯಕಾರಿ ಬ್ಯಾಕ್ಟೀರಿಯಾ ಇಪ್ಪುನವು ಪತ್ತೆ ಆತ್ಂಡ್. 2014, 2015, 2016 ಟ್ಟ್ ಪರೀಕ್ಷೆ ಮಲ್ಪುನಗ 1100 ದಾತ್ ಬ್ಯಾಕ್ಟೀರಿಯಾ ಪ್ರಮಾಣ ಇತ್ತ್ಂಡ್. 2019 ಟ್ಟ್ ಕುಡ ಪರೀಕ್ಷೆ ಮಲ್ಪುನಗಲ ಬ್ಯಾಕ್ಟೀರಿಯಾ ಪ್ರಮಾಣ ಎಚ್ಚ ಇತ್ತ್ಂಡ್. ಸಾಮಾನ್ಯವಾದ್ ನೀರ್ ಪರೀಕ್ಷೆ ಮಲ್ಪುನಗ ಅವೆಟ್ಟ್ ಇಪ್ಪುನ ಟೋಟಲ್ ಕಾಲಿಫರ್ಮ್, ಫೀಕಲ್ ಬ್ಯಾಕ್ಟೀರಿಯಾನ್ ಪರೀಕ್ಷೆ ಮಲ್ದ್ಂಡ್.

ಗುಜ್ಜರಕೆರೆ ಪ್ರದೇಶದ ಗುವೆಲ್ ದ ನೀರ್ ಡ್ ಉಂದುವೇ ಪ್ರಮಾಣದ ಬ್ಯಾಕ್ಟೀರಿಯಾ ಅಂಶಲು ಇಪ್ಪುನ ಸಾಧ್ಯತೆ ಉಂಡು ಕೈತಲ್ದಕುಲು ಅಭಿಪ್ರಾಯ ತೆರಿಪಾದೆರ್. ಈ ಪ್ರಮಾಣಡ್ ಬ್ಯಾಕ್ಟೀರಿಯಾ ಇತ್ತ್ಂಡ ಬೆಚ್ಚ ಮಲ್ತ್ ದ್ ಪರಿಯೆರೆ ಯೋಗ್ಯ ಅತ್ತ್, ಕೆರೆಕ್ಕ್ ಏಪಲ ಒಳಚರಂಡಿ ನೀರ್ ಸೇರೊಂದು ಉಂಡು. ಕೆರೆತ್ತ ಒಂಜಿ ಭಾಗಡ್ ಉಂದು ಸ್ವಷ್ಟವಾದ್ ತೋಜಿದ್ ಬರ್ಪುಂಡು. ಕೆರೆಟ್ಟ್ ಆಮ್ಲಜನಕದ ಪ್ರಮಾಣಲ ಕಮ್ಮಿ ಉಂಡು.

ಗುಜ್ಜರಕೆರೆ ನೀರ್ ಕಲುಷಿತ ಆತ್ಂಡ್ ಪಂದ್ ಪ್ರಯೋಗಾಲಯದ ವರದಿಡ್ ಕುಡ ಉಲ್ಲೇಖ ಆತ್ಂಡ್. ಕೆರೆಕ್ಕ್ ಒಳಚರಂಡಿ ನೀರ್ ಸೇರೊಂದು ಉಂಡು ಪನ್ಪುನೆಕ್ಕ್ ಉಂದುವೇ ಸಾಕ್ಷಿ. ಕೋಟಿರ್ದ್ ಎಚ್ಚ ರೂ. ಕರ್ಚಿ ಮಲ್ತ್ ದ್ ಅಭಿವೃದ್ಧಿ ಮಲ್ತ್ಂಡಲ ಪ್ರಯೋಜನ ಇಜ್ಜಿ.‌ ಈ ಬಗೆಟ್ಟ್ ಸುಮಾರ್ ಸರ್ತಿ ಜನಪ್ರತಿನಿಧಿಲೆಗ್ ತೆರಿಪಾಂಡಲ ಒವ್ವೇ ಪ್ರಯೋಜನ ಆತಿಜಿ ಪಂದ್ ಗುಜ್ಜರಕೆರೆ ತೀರ್ಥ ಸಂರಕ್ಷಣಾ ವೇದಿಕೆದ ಕಾರ್ಯದರ್ಶಿ ನೇಮು ಕೊಟ್ಟಾರಿ ಪಂಡೆರ್.

ಇನಿ ಶಿರಸಿ ಮಾರಿಕಾಂಬಾ ತೇರ್ ಉಚ್ಚಯ

ದಕ್ಷಿಣ ಭಾರತದ ಪುಗರ್ತೆದ ಶಿರಸಿ ಮಾರಿಕಾಂಬಾ ದೇವಸ್ಥಾನಡ್ ಇನಿ ತೇರ್ ಉಚ್ಚಯ ನಡಪರೆ ಉಂಡು.

ರಡ್ಡ್ ವರ್ಷಗೊರ ನಡಪರೆ ಇಪ್ಪುನ ಈ ಜಾತ್ರೆನ್ ಜಿಲ್ಲೆ, ಪಿದಯಿ ಜಿಲ್ಲೆಡ್ ಮಾತ್ರ ಅತ್ತಂದೆ, ದೇಶ ವಿದೇಶಲೆರ್ದ್ ಭಕ್ತೆರ್ ಬರ್ಪೆರ್.

ಎಲ್ಲೆ ಬೊಲ್ಪುಗು ಜಾತ್ರೆ ಗದ್ದುಗೆಡ್ ಸೇವಾ ಸ್ವೀಕಾರ ಸುರು ಆಪುಂಡು. ದೇವಿಗ್ ಹಣ್ಣು-ಕಾಯಿ, ಉಡಿ, ಪರಕೆ ಸೇವೆಲು ನಡಪರೆ ಉಂಡು. ಮಾ.27 ಕ್ಕ್ ಜಾತ್ರೆದ ವಿಧಿ ವಿಧಾನಲು ಮುಗಿತಲ ಆಪುಂಡು.

ಯಕ್ಷಗಾನ ಕಲಾವಿದೆರ್ ಸೀತಾರಾಮ ಕುಮಾರ್ ಕಟೀಲ್ ಮೆರೆಗ್ ಗೌರವ ಡಾಕ್ಟರೇಟ್

ಯಕ್ಷರಂಗದ ಅದ್ಬುತ ಹಾಸ್ಯಕಲಾವಿದೆರ್, ಯಕ್ಷ ರಂಗದ “ಚಾರ್ಲಿ ಚಾಪ್ಲಿನ್” ಪಂದೇ ಬಿರ್ದ್ ಪಡೆಯಿನ ಸೀತಾರಾಮ ಕುಮಾರ್ ಕಟೀಲ್ ಮೆರೆಗ್ ಏಷ್ಯಾ ಇಂಟರ್ ನ್ಯಾಷನಲ್ ಕಲ್ಚರಲ್ ಆ್ಯಂಡ್ ಇನ್ ವೆನ್ಷನ್ ಯುನಿವರ್ಸಿಟಿರ್ದ್ ಯಕ್ಷಗಾನ ಬೊಕ್ಕ ಆಧ್ಯಾತ್ಮಿಕ ಸೇವೆ ವಿಭಾಗಡ್ ಗೌರವ ಡಾಕ್ಟರೇಟ್ ತಿಕ್ ದ್ಂಡ್.

ಮೆರೆನ ಕಲಾಸೇವೆಗ್ ನನಾತ್ ಪ್ರಶಸ್ತಿ, ಸನ್ಮಾನಲು ಆವಡ್, ಕಲಾ ಮಾತೆನ ಆಶೀರ್ವಾದ ಇಪ್ಪಡ್ ಪಂದ್ ಟೈಮ್ಸ್ ಆಫ್ ಕುಡ್ಲ ಪತ್ರಿಕಾ ಬಳಗ ಎಡ್ಡೆಪ್ಪು ಬಯಕ್ ದ್ಂಡ್.

ಮಾ.19-27: ಶಿರಸಿ ಮಾರಿಕಾಂಬಾ ದೇವಸ್ಥಾನಡ್ ಜಾತ್ರೆ

ಶಿರಸಿ ಮಾರಿಕಾಂಬಾ ದೇವಸ್ಥಾನಡ್ ಮಾ.19-27 ಜಾತ್ರೆ ಮುಟ್ಟ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಶಿರಸಿ ಮಾರಿಕಾಂಬಾ ದೇವಸ್ಥಾನದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ದಕ್ಷಿಣ ಕನ್ನಡ ಜಿಲ್ಲೆದ ಲೋಕಸಭಾ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿಯಾದ್ ಪದ್ಮರಾಜ್ ರಾಮಯ್ಯ ಆಯ್ಕೆ

ಕುಡ್ಲ: ದಕ್ಷಿಣ ಕನ್ನಡ ಜಿಲ್ಲೆದ ಲೋಕಸಭಾ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿಯಾದ್ ಪದ್ಮರಾಜ್ ರಾಮಯ್ಯ ಆಯ್ಕೆ ಆತೆರ್.

ವೃತ್ತಿಡ್ ವಕೀಲೆರಾಯಿನ ಪದ್ಮರಾಜ್ ಬಿಲ್ಲವ ಸಮುದಾಯದ ಯುವ ನಾಯಕೆ, ಗುರುಬೆಳದಿಂಗಲು ಸೇವಾ ಸಂಸ್ಥೆದ ಅಧ್ಯಕ್ಷೆರಾದ್ ಬೊಕ್ಕ ಕುಡ್ಲ ಕುದ್ರೋಳಿ ಶ್ರೀ ಗೋಕರ್ಣನಾಥೇಶ್ವರ ದೇವಸ್ಥಾನದ ಖಜಾಂಚಿಯಾದ್ ಸೇವಾ ಕಾರ್ಯಡ್ ಕೆಲಸ ಮಲ್ಪುನ ಆರ್‌ ಪದ್ಮರಾಜ್ ಮೇರ್ ತನ್ನ ಸಮಾಜಮುಖಿ ಕೆಲಸರ್ದ್ ಎಚ್ಚ ಜನಪ್ರಿಯರಾತೆರ್.

ಇಂಚಿಪ್ಪ ಕುಡ್ಲ ಪೇಂಟೆದ ದಕ್ಷಿಣ ವಿಧಾನ ಸಭಾ ಕ್ಷೇತ್ರದ ಅಭ್ಯರ್ಥಿಯಾದ್ ಮೇರ್ ವೋಟುಗು ಉಂತಿಯೆರೆ ಉಲ್ಲೆರ್ ಪನ್ಪುನ ಪಾತೆರಲು ಕೇಂದ್ ಬತ್ತಿತ್ತ್ಂಡ್. ಆಂಡ ಪಕ್ಷದ ಪ್ರಾಥಮಿಕ ಸದಸ್ಯತ್ವ ಇಪ್ಪುನ, ಕನಿಷ್ಠ ಟಿಕೆಟ್‌ಗಾದ್ ಅರ್ಜಿನ್ ಸಂದಾಯಿನ ಮೆರೆಗ್ ಟಿಕೆಟ್ ಕೊರ್ಂಡ ಪಕ್ಷದ ಕಾರ್ಯಕರ್ತೆರ್ ಬಂಡಾಯವೇಳ ಆವು ಪನ್ಪುನ ಕಾರಣಗ್ ಮೆರೆಗ್ ಟಿಕೆಟ್ ಕೈ ತಪ್ಪುದುಂಡು ಪಂದ್ ಪನೊಂದು ಇತ್ತೆರ್. ಇತ್ತೆ ವೋಟುದ ಪೊರ್ತುಡು ಆರ್‌ ಪದ್ಮರಾಜ್‌ ಮೆರೆನ್ ಪಕ್ಷ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿಯಾದ್ ನೇಮಕ ಮಲ್ತ್ ದ್ ಆದೇಶ ಮಲ್ದ್ಂಡ್.

ಜನಾರ್ದನ ಪೂಜಾರಿಲೆನ ಪ್ರೀತಿದ ಶಿಷ್ಯೆ ಆಯಿನ ಪದ್ಮರಾಜ್ ಮೇರ್ ವೃತ್ತಿಡ್ ವಕೀಲರಾತೆರ್. ಧಾರ್ಮಿಕ, ಸಾಮಾಜಿಕ, ಶೈಕ್ಷಣಿಕ ಬೊಕ್ಕ ರಾಜಕೀಯ ರಂಗಡ್ ಉಲ್ಲೆರ್.

ಬಳ್ಕುಂಜೆ ಕೋಟ್ನಾಯ ಗುತ್ತು ಕರಿಯ ದೇಸಿಂಗರಾಯ-ಬೊಳಿಯ ದೇಸಿಂಗರಾಯ ಜೊಡುಕರೆ ಕಂಬುಲದ ಲೆಪ್ಪೋಲೆ ಬುಡುಗಡೆ

ಮುಲ್ಕಿ : ಬಳ್ಕುಂಜೆ ಕೋಟ್ನಾಯ ಗುತ್ತುಡು ಎ.6 ಕ್ಕ್ ನಡಪರೆ ಇಪ್ಪುನ ಕರಿಯ ದೆಸಿಂಗರಾಯ-ಬೊಳಿಯ ದೇಸಿಂಗರಾಯ ಜೊಡುಕರೆ ಕಂಬುಲದ ಲೆಪ್ಪೋಲೆ ಬುಡುಗಡೆ ಲೇಸ್ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನಡ್ ಬುಧಾರ ಬೊಲ್ಪುಗು ನಡತ್ಂಡ್.

ಶಿಬರೂರು ವೇದವ್ಯಾಸ ತಂತ್ರಿಲು ಬೊಕ್ಕ ಗೋಪಾಲಕೃಷ್ಣ ಉಪಾಧ್ಯಾಯ ಪ್ರಾರ್ತನೆ ಸಂದಾಯೆರ್. ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ಮನೋಹರ ಶೆಟ್ಟಿ ಲೆಪ್ಪೋಲೆನ್ ಬುಡುಗಡೆ ಮಲ್ತೆರ್.

ಈ ಪೊರ್ತುಡು ಕಂಬುಲ ಸಮಿತಿದ ಅಧ್ಯಕ್ಷೆರ್ ಮಲ್ಲಿಕಾ ಯಶವಂತ ಶೆಟ್ಟಿ ಬಳ್ಕುಂಜೆ ಗುತ್ತು, ಕಾರ್ಯಾಧ್ಯಕ್ಷೆರ್ ಕಿರಣ್ ಕುಮಾರ್ ಶೆಟ್ಟಿ ಕೊಲ್ನಾಡು ಗುತ್ತು, ಭುವನಾಭಿರಾಮ ಉಡುಪ, ಕೊಡೆತ್ತೂರು, ಬಪ್ಪನಾಡ್ ದೇವಸ್ಥಾನದ ಕಾರ್ಯನಿರ್ವಹಣಾಧಿಕಾರಿ ಜಯಮ್ಮ, ರಘುನಾಥ ಶೆಟ್ಟಿ ಬಳ್ಕುಂಜೆ ಗುತ್ತು, ವೀರೇಂದ್ರ ಪೂಂಜ ಕೊಟ್ನಾಯ ಗುತ್ತು, ಬಾಲಕೃಷ್ಣ ಹೆಗ್ಡೆ ಕೊಟ್ನಾಯ ಗುತ್ತು, ಹರಿಶ್ಚಂದ್ರ ಶೆಟ್ಟಿ ಕರ್ನಿರೆಗುತ್ತು, ದಿನಕರ ಶೆಟ್ಟಿ ಬಳ್ಕುಂಜೆ, ಪ್ರಭಾಕರ ಶೆಟ್ಟಿ ಕರ್ನಿರೆ, ರವಿ ಶೆಟ್ಟಿ ಕರ್ನಿರೆ, ರಾಜೇಶ್ ಶೆಟ್ಟಿ ಉಳೆಪಾಡಿ, ಸಂಪತ್ ಶೆಟ್ಟಿ ಕರ್ನಿರೆಗುತ್ತು, ಕೇಶವ ಶೆಟ್ಟಿ,‌ ಕೇಸರಿ ಪಿ ರೈ, ಜಯಂತಿ ಶೆಟ್ಟಿ, ರಾಮದಾಸ್ ಶೆಟ್ಟಿ ಬಾಳಿಕೆ, ಪ್ರಕಾಶ್ ಶೆಟ್ಟಿ ಕರ್ನಿರೆ, ಜಯರಾಮ ಶೆಟ್ಟಿ ಬಳ್ಕುಂಜೆ, ಶಕಿಲಾ ಸುರೇಶ್ ಬಳ್ಕುಂಜೆ, ಸತೀಶ್ ಪೂಜಾರಿ, ಅಜಯ್ ಕುಮಾರ್, ಶರತ್ ಶೆಟ್ಟಿ ಕಿನ್ನಿಗೋಳಿ, ಸುಧಾಕರ ಸಾಲಿಯಾನ್ ಸಂಕಲಕರಿಯ, ನಿತೇಶ್ ಕಾಂತಾವರ ಪಾಲ್ ಪಡೆದಿತ್ತೆರ್.