ಕಾರ್ಲದ ನ್ಯಾಯವಾದಿ ದಂಪತಿಲಾಯಿನ ವಿಪುಲ್ ತೇಜ್ ಬೊಕ್ಕ ಶ್ವೇತ ದಂಪತಿಲೆನ ಸುರುತ ಮಗಲೆಗ್ ಪುದರ್ ದೀಪುನ ಲೇಸ್ ಡ್ ಪಂಚ ದ್ರಾವಿಡ ಭಾಷೆಲೆಡ್ ಒಂಜಾಯಿನ ತುಳು ಭಾಷೆದ ಲಿಪಿಟ್ ಬಾಲೆದ ಪುದರ್ ನ್ ಬುಡುಗಡೆ ಮಲ್ತೆರ್.
ಇಸೇಸ ಪಂಡ ಅರಿಟ್ ಬಾಲೆದ ಪುದರ್ ನ್ ತುಳು ಲಿಪಿಟ್ ಬರೆತೆರ್. ಲೇಸ್ ಗ್ ಬತ್ತಿನ ಬಿನ್ನೆರೆಗ್ ಉಡುಗೊರೆದೊಟ್ಟಿಗೆ ತುಳು ಲಿಪಿತ ಪ್ರಚಾರಕ್ಕಾದ್ ಪ್ರತಿಯೊರಿಯಾಗ್ಲಾ ತುಳು ಲಿಪಿಟ್ ಬರೆಯಿನ ಬಾಲೆದ ಪುದರ್ ದ ಸ್ವೀಟ್ ಬಾಕ್ಸ್ ದೊಟ್ಟಿಗೆ ತುಳು ಲಿಪಿತ ಅಕ್ಷರಮಾಲೆ ಕೊರಿಯೆರ್.
ಕುಡ್ಲದ ಗಾಂಜಾ ಕೇಸ್ ಡ್ ಮುರಾನಿ ಆತೆ ಕುಡ್ಲ ಪೇಂಟೆದ ಪುಗರ್ತೆದ ರಡ್ಡ್ ವೈದ್ಯಕೀಯ ಕಾಲೇಜ್ ದ ವೈದ್ಯೆರೆನ್ ಅರೆಸ್ಟ್ ಮಲ್ತ್ ದ್ ತನಿಖೆ ಎಚ್ಚ ಮಲ್ತಿನ ಪೊಲೀಸೆರ್ ಇನಿ ಕುಡ ರಡ್ಡ್ ಜನ ವೈದ್ಯೆರೆನ್ ಅರೆಸ್ಟ್ ಮಲ್ದೆರ್.
ಆಂಧ್ರಪ್ರದೇಶದ ರಾಘವ ದತ್ತಾ(28), ಬೆಂಗ್ಲೂರ್ ನಿವಾಸಿ ಬಾಲಾಜಿ (29) ಅರೆಸ್ಟ್ ಆಯಿನ ಆರೋಪಿಲು. ಇತ್ತೆ ಅರೆಸ್ಟ್ ಮಲ್ತಿನಕಲೆನ ಸಂಖ್ಯೆ 15ಕ್ ಏರ್ ದ್ಂಡ್ ಪಂದ್ ನಗರ ಪೊಲೀಸ್ ಆಯುಕ್ತೆರ್ ಎನ್. ಶಶಿಕುಮಾರ್ ತೆರಿಪಾದೆರ್. ಕಾಲಿ 10 ದಿನಟ್ ಕುಡ್ಲ ಕಮಿಷನರೇಟ್ ವ್ಯಾಪ್ತಿಡ್ 6 ಕೇಸ್ ಡ್ 20ಕ್ ಎಚ್ವ ಆರೋಪಿಲೆನ್ ಅರೆಸ್ಟ್ ಮಲ್ತ್ ದ್ 1 ಕ್ವಿಂಟಾಲ್ ಗ್ ಎಚ್ಚ ಗಾಂಜಾನ್ ವಶಕ್ಕ್ ಪಡೆತ ಪಂದ್ ಪಂಡೆರ್.
ಕನ್ನಡ ಪಿಕ್ಚರ್ ದ ಪುಗರ್ತೆದ ನಿರ್ದೇಶಕೆ ಗುರುಪ್ರಸಾದ್ ಮೆರೆನ್ ಬೆಂಗ್ಲೂರ್ ದ ಗಿರಿನಗರ ಠಾಣೆದ ಪೊಲೀಸೆರ್ ಅರೆಸ್ಟ್ ಮಲ್ದೆರ್.
ಮೆರೆನ್ ಚೆಕ್ ಬೌನ್ಸ್ ಕೇಸ್ ದ ಬಗೆಟ್ ಅರೆಸ್ಟ್ ಮಲ್ದೆರ್. ಈ ಬಗೆಟ್ ಎಚ್ಚದ ತನಿಖೆ ನಡತೊಂದು ಉಂಡು.
ಬಾಂದೊಟ್ಟು ಕಾರ್ನಿಕದ ದೈವ ಕೋರ್ದಬ್ಬುನ ದೈವೊಲ್ಯದ ಜೀರ್ಣೋದ್ಧಾರ ಕಜ್ಜೊ ಅಕೇರಿದ ಹಂತಗ್ ಬೈದ್ಂಡ್ ನೆತ್ತ ಕಲಶಾಭಿಷೇಕ ಲೇಸ್ ದೊಟ್ಟಿಗೆ ಈ ದೇವಲ್ಯದ ಉದಿಪನ ಆಪುಂಡು. ಅಂಚಾದ್ ಈ ಲೇಸ್ ಗ್ ಜ.23 ಸೋಮಾರ ಬಯ್ಯಗ್ 5 ಗಂಟೆಗ್ ಪದವಿನಂಗಡಿದ ದುರ್ಗಾಕಟ್ಟೆದಲ್ಪರ್ದ್ ಹೊರೆ ಕಾಣಿಕೆ ಮೆರವಣಿಗೆ ನಡಪರೆ ಉಂಡು.
ಈ ವ್ಯಾಪ್ತಿದ ಮೆರವಣಿಗೆಡ್ ದಕ್ಷಿಣ ಕನ್ನಡ ಜಿಲ್ಲೆದ ಕೆಲವು ಸಾಂಸ್ಕೃತಿಕ ತಂಡಲು ಪಾಲ್ ಪಡೆಯೆರೆ ಉಲ್ಲೆರ್. ಅಂಚನೆ ಬಾಂದೊಟ್ಟು ಕೋರ್ದಬ್ಬು ದೈವೊಲ್ಯದ ವ್ಯಾಪ್ತಿಗ್ ಬರ್ಪುನ ಬೊಕ್ಕ ಹಿಂದೂ ಧರ್ಮದ ಧಾರ್ಮಿಕ ಕ್ಷೇತ್ರಲೆರ್ದ್ ಅನೇಕ ರೀತಿದ ಹೊರೆ ಕಾಣಿಕೆ ಬರಿಯೆರೆ ಉಂಡು. ಈ ಹೊರೆ ಕಾಣಿಕೆಗಾದ್ ಕೊಪ್ಪಳ ಕಾಡ್ ದ ನಾಗ ಬನತಲ್ಪ, ಕೊಂಚಾಡಿ ಹೈಸ್ಕೂಲ್ ದ ಎದುರುಡ್, ಎಲ್ಯಾಡಿ ಪ್ರದೇಶಡ್, ದಂಡೆಕೇರಿ ನಾಗಬಲತಲ್ಪ, ಕುಂಟಲಪಾಡಿದ ಚಾಮುಂಡಿ ದೇವಲ್ಯದಲ್ಪ, ಮಂಜಡ್ಕಡ್, ಶಕ್ತಿನಗರ ಜಂಕ್ಷನ್ ಡ್, ಮುಗುರುಕೋಡಿಡ್, ಗಂಧಕಾಡ್ ಡ್, ಮೇರಿಹಿಲ್ ಗುರುನಗರದಲ್ಪ ಇಪ್ಪುನ ಕೊರಗಜ್ಜನ ಗುಡಿತಲ್ಪ, ಮೇರಿಹಿಲ್ ಜಂಕ್ಷನ್ ಡ್, ಪದವಿನಂಗಡಿ ಜಂಕ್ಷನ್ ಡ್, ಇಂಚಿತ್ತಿನಲ್ಪ ಬೇತೆ ಬೇತೆ ಧಾರ್ಮಿಕ ಕೇಂದ್ರಲೆಡ್ ಒಟ್ಟು ಮಲ್ಪರೆ ಉಲ್ಲೆರ್. ಅಲ್ಪ ಒಟ್ಟು ಮಲ್ತಿನಂಚಿನ ಪೂರ ಸೊತ್ತುಲೆನ್ಲಾ ಹೊರೆ ಕಾಣಿಕೆದ ರೂಪಡ್ ಗೌಜಿಡ್ ದೇವಲ್ಯಗ್ ಕನಯೆರೆ ಉಂಡು. ಬೊಕ್ಕ ಈ ಲೇಸ್ ದ ಸುರುತ ದಿನ ಪೊಸತ್ ಬೊಳ್ಳಿ ಬಂಗಾರ್ ದ ತಲೆಪಟ್ಟ ಬೊಕ್ಕ ಅಣಿ ನೆತ್ತ ಮೆರವಣಿಗೆಲ ನಡಪರೆ ಉಂಡು. ನೆಕ್ಕ್ ಆಂಜೋವ್ ನಕುಲು ಮಾತ ಬೊಲ್ದು ತುತ್ತೈತೊಡು ಬತ್ತ್ ದ್,ಒಂಜಿ ವಾರದ ನಿರಂತರ ಧಾರ್ಮಿಕ ಲೇಸ್ ಡ್ ಎಚ್ಚದ ಸಂಖ್ಯೆಡ್ ಈ ಪುಣ್ಯ ಕಾರ್ಯಡ್ ಪಾಲ್ ಪಡೆದ್ ಯಶಸ್ವಿ ಮಲ್ತ್ ದ್ ಕೊರೊಡು ಪಂದ್ ಕೋರ್ದಬ್ಬು ಸೇವಾ ಸಮಿತಿದ ಅಧ್ಯಕ್ಷೆರ್ ಬಾಲಕೃಷ್ಣ ರೈ ಬಾಂದೊಟ್ಟು ಗುತ್ತು, ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಗಿರಿಧರ ಶೆಟ್ಟಿ, ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್ ತೆರಿಪಾದೆರ್.
ಉಬಾರ್: ಪುರಿಯಾತಿನ ಕೋರಿದ ಮಾಸದ ತೆನಸ್ ನ್ ಗಿರಾಕಿಲೆಗ್ ಕೊರ್ತಿನ ಹೋಟೆಲ್ ಗ್ ತಹಶೀಲ್ದಾರ್ ಮುತಾಲಿಕೆಡ್ ರೈಡ್ ಮಲ್ತ್ ದ್ ಅವೆನ್ ಬಂದ್ ಮಲ್ಪಾದೆರ್.
ಪುರಿಯಾತಿನ ಚಿಕನ್ ಕೊರ್ತಿನ ವಿಚಾರ ಸಾಮಾಜಿಕ ಜಾಲತಾಣಡ್ ವೈರಲ್ ಆವೊಂದು ಉಂಡು. ಈ ಮಾಹಿತಿದಂಚನೆ ಕೇಸ್ ನ್ ಗಂಭೀರವಾದ್ ದೆತೊಂದು ಜಿಲ್ಲಾಡಳಿತ ದ.ಕ. ಜಿಲ್ಲಾಧಿಕಾರಿಲೆನ ನಿರ್ದೇಶನದಂಚನೆ ಪುತ್ತೂರ್ ತಹಶೀಲ್ದಾರ್ ಮುತಾಲಿಕೆಡ್ ದ ತಂಡ ರೈಡ್ ಮಲ್ತ್ ದ್ ಹೊಟೇಲ್ ನ್ ಮುಚ್ಚದ್ಂಡ್. ಈ ಘಟನೆ ಉಬಾರ್ ಡ್ ನಡತ್ಂಡ್.
ಅಪ್ಪೆನ ತರೆ ಹಿಟ್ಟ್ ದ ಮಿಷನ್ ದ ಬೆಲ್ಟ್ ಗ್ ತಿಕೊನ್ನಗ ಮಂಡೆಕರ್ಚಿ ಮಲ್ತ್ ದ್ ಕರೆಂಟ್ ದ ಸ್ವಿಚ್ ತಪ್ಪಾದ್ ಅಪ್ಪೆನ ಪ್ರಾಣ ಕಾತಿನ 9 ವರ್ಷದ ಮಗೆ ದೀಕ್ಷಿತ್ ಈ ಸರ್ತಿದ ರಾಷ್ಟ್ರೀಯ ಶೌರ್ಯ ಪ್ರಶಸ್ತಿಗ್ ಆಯ್ಕೆ ಆತೆರ್.
ಜ.26 ಕ್ ಡೆಲ್ಲಿಡ್ ನಡಪರೆ ಇಪ್ಪುನ ಗಣರಾಜ್ಯೋತ್ಸವ ಲೇಸ್ ಡ್ ಈ ಪ್ರಶಸ್ತಿನ್ ದೆತೊನಿಯೆರೆ ಉಲ್ಲೆರ್. ಮೇರ್ ಕೂಡೂರು ಗ್ರಾಮದ ಸರ್ಕಾರಿ ಕಿರಿಯ ಪ್ರಾಥಮಿಕ ಶಾಲೆಡ್ 3ನೇ ಕ್ಲಾಸ್ ಕಲ್ತೊಂದು ಉಲ್ಲೆರ್.
ಕೊಲ್ಕತ್ತಾಡ್ ನಡತಿನ ಶ್ರೀಲಂಕಾ ವಿರುದ್ಧದ ರಡ್ಡನೇ ಏಕದಿನ ಪಂತೊದ ಪೊರ್ತುಡು ಭಾರತ ಕ್ರಿಕೆಟ್ ತಂಡದ ಕೋಚ್ ರಾಹುಲ್ ದ್ರಾವಿಡ್ ಗ್ ಹುಷಾರ್ ಇಜ್ಜಂದೆ ಆತ್ಂಡ್.
ಮೇರ್ ನೆತ್ತೆರ್ ದ ಒತ್ತಡರ್ದ್ ನರಲೊಂದು ಇತ್ತೆರ್ ಪಂದ್ ವರದಿ ಆತ್ಂಡ್. ಮೆರೆಗ್ ವೈದ್ಯೆರ್ ಕೆಲವು ಮರ್ದ್ ನ್ ಕೊರ್ತೆರ್ ಪಂದ್ ತೆರಿದ್ ಬೈದ್ಂಡ್.
ರಿಯಾದ್: ಸೌದಿ ಅರೇಬಿಯಾಡ್ ಐತಾರ ಮುಟ್ಟ ಬರ್ಸ ಬರ್ಪಿನ ಸಾಧ್ಯತೆ ಉಂಡು ಪಂದ್ ಎಚ್ಚರ್ಗೆ ಕೊರ್ತೆರ್.
ಮಕ್ಕಾ, ಅಸಿರ್, ಅಲ್ ಬಹಾ, ಜಝಾನ್ ಇಂಚಿತ್ತಿನ ಪ್ರದೇಶಲೆಡ್ ಭಾರೀ ಬರ್ಸ ಬರ್ಪಿನ ಸಾಧ್ಯತೆ ಉಂಡು ಪಂದ್ ಹವಾಮಾನ ಇಲಾಖೆ ಎಚ್ಚರ್ಗೆ ಕೊರ್ತೆರ್.
ಕಾಸಿಮ್, ಹೈಲ್, ಉತ್ತರ ಗಡಿ ಪ್ರದೇಶ, ಅಲ್ ಔಫ್, ತಬೂಕ್ ಬೊಕ್ಕ ಮದೀನಾ ಪ್ರದೇಶಲೆಡ್ ಸುಕ್ರಾರರ್ದ್ ಐತಾರ ಮುಟ್ಟ ಬರ್ಸ ಬರ್ಪಿನ ಸಾಧ್ಯತೆ ಉಂಡು.
ಕುಡ್ಲ: ಬಾಂದೊಟ್ಟು ಶ್ರೀ ಕೋರ್ದಬ್ಬು ದೈವೊಲ್ಯಡ್ ಪುನರ್ ಪ್ರತಿಷ್ಠೆ, ಮಹಾಕಲಶಾಭಿಷೇಕ ಬೊಕ್ಕ ವರ್ಷಾಧಿದ ಕೋಲ ದೇರೆಬೈಲು ಶ್ರೀ ವಿಠಲದಾಸ ತಂತ್ರಿಲೆನ ಮುತಾಲಿಕೆಡ್ ಜ.25 ರ್ದ್ 29 ಮುಟ್ಟ ನಡಪರೆ ಉಂಡು.
ಜ.25 ಬುಧಾರ ಪ್ರಾರ್ತನೆ, ವಾಸ್ತು ಶಿಲ್ಪಿಲೆರ್ದ್ ಆಲಯ ಪರಿಗ್ರಹ, ತೋರಣ ಮೂರ್ತ, ದೈವೊಲೆನ ಭಂಡಾರ ಬರಿಯೆರೆ ಉಂಡು. ಬೊಕ್ಕ ವಾಸ್ತು ರಾಕ್ಷೋಘ್ನ ಹೋಮ, ಬಲಿ ನಡಪರೆ ಉಂಡು. ಜ.26 ಗಣಹೋಮ, ಶುದ್ಧಿ, ದೈವ ದರ್ಶನಡ್ ಪರ್ವಸೇವೆ ಆದ್ ಸಾರ್ವಜನಿಕ ಅನ್ನಸಂತರ್ಪಣೆ ನಡಪುಂಡು. ಬೊಕ್ಕ ಬಯ್ಯಗ್ ಕಟೀಲ್ ಮೇಳದಕ್ಲೆರ್ದ್ ಶ್ರೀ ದೇವಿ ಮಹಾತ್ಮೆ ಆಟ ನಡಪರೆ ಉಂಡು. ಜ.27 ಶುಕ್ರಾರ ಚೌತಿ ಪರ್ಬ ಆದ್ ಅನ್ನಸಂತರ್ಪಣೆ ನಡಪುಂಡು. ಜ.28 ಸನಿಯಾರ ಶ್ರೀ ಕೋರ್ದಬ್ಬು ತನ್ನಿಮಾನಿಗ ದೈವೊಲೆನ ಕೋಲ ನಡಪರೆ ಉಂಡು. ಜ.29 ಐತಾರ ಸಭಾ ಲೇಸ್ ಆದ್ ಪೌರಾಣಿಕ ಬೊಕ್ಕ ಸಾಂಸ್ಕೃತಿಕ ಲೇಸ್ ನಡಪುಂಡು. ಬೊಕ್ಕ ರಾತ್ರೆ ರಾಹುಗುಳಿಗ, ಗುಳಿಗ-ಪಂಜುರ್ಲಿ ದೈವೊಲೆನ ಕೋಲ ಬೊಕ್ಕ ಮಾರಿಬಲಿ ಆದ್ ಭಂಡಾರ ಪೋಪುಂಡು. ಈ ಮಾತ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಕೋರ್ದಬ್ಬು ಸೇವಾ ಸಮಿತಿದ ಅಧ್ಯಕ್ಷೆರ್ ಬಾಲಕೃಷ್ಣ ರೈ ಬಾಂದೊಟ್ಟು ಗುತ್ತು, ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಗಿರಿಧರ ಶೆಟ್ಟಿ, ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್, ದೈವೊಲ್ಯದ ಗುರಿಕಾರೆರ್ ಅರುಣ್ ಗುರಿಕಾರ ಲೆಪ್ಪೋಲೆಡ್ ತೆರಿಪಾದೆರ್.
ಮಂಜೇಶ್ವರ: ಶಾಲೆದ ಗಾಡಿಗ್ ಬೈಕ್ ಗುದ್ದುದು ರಡ್ಡ್ ಕಲ್ಪಾರ್ಥಿಲು ಜಾಗೆಡೇ ತೀರ್ ಪೋಯಿನ ಘಟನೆ ಮಂಜೇಶ್ವರ ಕೈತಲ್ ದ ಮೀಂಜ ಬಾಳಿಯೂರುಡ್ ನಡತ್ಂಡ್.
ಈ ಘಟನೆಡ್ ಮೀಯಪದವುದ ಪ್ರೀತೇಶ್ ಶೆಟ್ಟಿ ಬೊಕ್ಕ ಅಭಿ ತೀರ್ ಪೋಯಿನಕುಲು ಪಂದ್ ತೆರಿದ್ ಬೈದ್ಂಡ್.
