September 2023

ಗೃಹಲಕ್ಷ್ಮೀ ಯೋಜನೆ: ರೇಷನ್ ಕಾರ್ಡ್ ತಿದ್ದುಪಡಿ ಮಲ್ಪೊಲಿ

ಗೃಹಲಕ್ಷ್ಮೀ ಯೋಜನೆದಡಿಟ್ಟ್ 2 ಸಾರ ರೂ. ಕಾಸ್ ತಿಕ್ಕಂದಿನ ಪೊಂಜೋವ್ ನಕುಲು ರೇಷನ್ ಕಾರ್ಡ್ ಡ್ ಇಲ್ಲದ ಯಜಮಾನಿ ಪುದರ್ ನ್ ಇನಿರ್ದೆ ತಿದ್ದುಪಡಿ ಮಲ್ಪೊಲಿ.

ತಿದ್ದುಪಡಿ ಮಲ್ಪುನಕ್ಲೆಗ್ ಸೆಪ್ಟೆಂಬರ್ 10 ಮುಟ್ಟ ಕಾಲಾವಕಾಶ ಉಂಡು. ಆನ್ ಲೈನ್, ಆಫ್ ಲೈನ್ ಮುಖೇನ ನಿಕುಲು ತಿದ್ದುಪಡಿ ಮಲ್ಪೊಲಿ. ಪಡಿತರ ಚೀಟಿಡ್ ಆಂಜೋವ್ ಲೆನ ಪುದರ್ ಯಜಮಾನಿಡ್ ಇತ್ತ್ಂಡ ಕಾಸ್ ತಿಕ್ಕುಜಿ. ಅಂಚಾದ್ ಸೆ.10 ತ್ತ ಉಲಯಿ ಇಲ್ಲದ ಯಜಮಾನಿನ ಪುದರ್ ನ್ ತಿದ್ದುಪಡಿ ಮಲ್ಪೊಲಿ.

ಪಾಕಿಸ್ತಾನಡ್ ಪೆಟ್ರೋಲ್ ರೇಟ್ 300 ರೂ. ಎಚ್ಚ

ಇಸ್ಲಾಮಾಬಾದ್: ಪಾಕಿಸ್ತಾನಡ್ ಪೆಟ್ರೋಲ್ ಬೊಕ್ಕ ಡೀಸೆಲ್‌ದ ರೇಟ್ ಇತಿಹಾಸಡೇ ಸುರುತ್ತ ಸರ್ತಿ ಲೀಟರ್‌ಗ್ 300 ರೂ. ಗ್ ಬೈದ್ಂಡ್.

ಪ್ರಧಾನಮಂತ್ರಿ ಅನ್ವಾರುಲ್ ಹಕ್ ಕಾಕರ್ ಮುತಾಲಿಕೆದ ಉಸ್ತುವಾರಿ ಸರ್ಕಾರ ಗುರುವಾರ ಪೆಟ್ರೋಲ್ ನ್ ಲೀಟರ್‌ಗ್ 14.91 ರೂ. ಬೊಕ್ಕ ಹೈಸ್ಪೀಡ್ ಡೀಸೆಲ್ ರೇಟ್ ನ್ 18.55 ರೂ. ದಾತ್ ಎಚ್ಚ ಮಲ್ದ್ಂಡ್.

ಇತ್ತೆ ಪಾಕಿಸ್ತಾನಡ್ ಪೆಟ್ರೋಲ್ ರೇಟ್ 305.36 ರೂ., ಡೀಸೆಲ್ ರೇಟ್ 311 ರೂ. ಆತ್ಂಡ್.

ಸೆ.3: ಕನ್ಯಾಡಿ ಸ್ವಾಮೀಜಿಗ್ ಪಟ್ಟಾಭಿಷೇಕದ ವರ್ಧಂತ್ಯುತ್ಸವ

ಕನ್ಯಾಡಿ ಶ್ರೀ ರಾಮ ಕ್ಷೇತ್ರ ಮಹಾಸಂಸ್ಥಾನ ಜಗದ್ಗುರು ಪೀಠದ ಸದ್ಗುರು ಶ್ರೀ ಬ್ರಹ್ಮಾನಂದ ಸರಸ್ವತಿ ಸ್ವಾಮೀಜಿ ಮೆರೆನ ಪಟ್ಟಾಭಿಷೇಕದ 15 ನೇ ವರ್ಧಂತ್ಯುತ್ಸವ ಸೆ.3 ಕ್ಕ್ ಬೊಲ್ಪುಗು 11 ಗಂಟೆಗ್ ಕಲ್ಮಂಜ ಗ್ರಾಮದ ದೇವರಗುಡ್ಡೆ ಶ್ರೀ ಗುರುದೇವ ಮಠಟ್ಟ್ ನಡಪರೆ ಉಂಡು.

ಧಾರ್ಮಿಕ ಸಭೆನ್ ಮೀನುಗಾರಿಕೆ ಸಚಿವೆರ್ ಮಾಂಕಾಳ ಎಸ್‌. ವೈದ್ಯ ಉದಿಪನ ಮಲ್ಪುವೆರ್. ಶಾಸಕೆರ್ ಹರೀಶ್‌ ಪೂಂಜ ಗುರ್ಕಾರ್ಮೆ ಒಯಿಸೊನ್ವೆರ್. ಉಭಯ ಜಿಲ್ಲೆದ ಮಾತ ಶಾಸಕೆರ್, ಮಾಜಿ ಸಚಿವೆರ್, ಮಾಜಿ ಶಾಸಕೆರ್ ಬೊಕ್ಕ ಬೇತೆ ಬೇತೆ ಸಂಘ-ಸಂಸ್ಥೆ ಅಧ್ಯಕ್ಷೆರ್ ಪಾಲ್ ಪಡೆಯೆರೆ ಉಲ್ಲೆರ್.

ಬೊಲ್ಪುಗು ಶ್ರೀ ರಾಮತಾರಕ ಯಜ್ಞ, ಭಜನೆ ಬೊಕ್ಕ ಬೇತೆ ಬೇತೆ ವೈದಿಕ ಲೇಸ್, ಗುರುಕುಲೆನ ಪೀಠಾರೋಹಣ, ಪಾದುಕಾ ಪೂಜೆ, ಧಾರ್ಮಿಕ ಸಭೆ, ಆಶೀರ್ವಚನ ಲೇಸ್ ನಡಪರೆ ಉಂಡು. ಮಧ್ಯಾಹ್ನ ಗುರುಕುಲೆರ್ದ್ ಫಲ ಪಟ್ಟುನ ಲೇಸ್ ನಡಪುಂಡು. ‌

ತೋಕೂರು ರಾಮಣ್ಣ ಶೆಟ್ಟಿ ಶಾಲೆಡ್ ಯಕ್ಷ ಶಿಕ್ಷಣ ಉದಿಪನ

ಯಕ್ಷಧ್ರುವ ಪಟ್ಲ ಫೌಂಡೇಶನ್ ದ ಮುತಾಲಿಕೆಡ್ ತೋಕೂರು ರಾಮಣ್ಣ ಶೆಟ್ಟಿ ಮೆಮೋರಿಯಲ್ ಶಾಲೆಡ್ ಯಕ್ಷಧ್ರುವ ಯಕ್ಷ ಶಿಕ್ಷಣ ಲೇಸ್ ದ ಉದಿಪನ ನಡತ್ಂಡ್.

ಈ ಪೊರ್ತುಡು ಶಾಲೆದ ಪ್ರಾಂಶುಪಾಲೆರೆನ್ ಪಟ್ಲ ಫೌಂಡೇಶನ್ ದ ಮುತಾಲಿಕೆಡ್ ಮಾನಾದಿಗೆ ಮಲ್ತೆರ್. ಈ ಲೇಸ್ ಡ್ ಯಕ್ಷಧ್ರುವ ಯಕ್ಷ ಶಿಕ್ಷಣದ ಪ್ರಧಾನ ಸಂಚಾಲಕೆರ್ ವಾಸುದೇವ ಐತಾಳ್, ಮೀನಾಕ್ಷಿ ಐತಾಳ್, ಶಿಕ್ಷಕೆರ್ ರಕ್ಷಕ ಸಂಘದ ಅಧ್ಯಕ್ಷೆರ್ ಸ್ವರಾಜ್ ಶೆಟ್ಟಿ, ಶಾಲೆದ ಪ್ರಾಂಶುಪಾಲೆರ್ ಶ್ರೀಲತಾ ರಾವ್, ಸತೀಶ್ ಶೆಟ್ಟಿ ಎಕ್ಕಾರು ಪಾಲ್ ಪಡೆದಿತ್ತೆರ್. ಶಿಕ್ಷಕೆರ್ ಅಜಿತ್ ಕೆರೆಕಾಡು ಎದ್ಕೊನಿಯೆರ್. ಶಿಕ್ಷಕಿ ವಾಣಿ ಸೊಲ್ಮೆ ಸಂದಾಯೆರ್. ಶಿಕ್ಷಕಿ ಸುರೇಖ ಲೇಸ್ ದ ಸುಧಾರಿಕೆ ಮಲ್ತೆರ್.

ಸನತ್ ಕುಮಾರ್ ಶೆಟ್ಟಿ ಕೊಡೆತ್ತೂರು ಗುತ್ತುದಾರ್ ಅತ್ತ್, ಆರೆಗ್ ಕಟೀಲ್ ಮೊಕ್ತೇಸರೆರ್ ಆಪುನ ಅರ್ಹತೆ ಇಜ್ಜಿ: ಸಿವಿಲ್ ಕೋರ್ಟ್ ತೀರ್ಪು

ಕುಡ್ಲ: ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯದ ಆನುವಂಶಿಕ ಮೊಕ್ತೇಸೆರಾಯಿನ ಸನತ್ ಕುಮಾರ್ ಶೆಟ್ಟಿ ಕೊಡೆತ್ತೂರು ಗುತ್ತುಗು ಸಂಬಂಧಪಟ್ಟಿನಾರ್ ಅತ್ತ್, ಮೇರ್ ಪುತ್ತಿಗೆ ಗುತ್ತುದಾರ್ . ಆರ್ ಕೊಡೆತ್ತೂರು ಗುತ್ತುದಾರ್ ಪಂಡ್ಂದ್ ಕಟೀಲ್ ದೇವಲ್ಯಡ್ ಮೊಕ್ತೇಸರೆರೆನ ಬೇಲೆನ್ ಪಡೆತೆರ್. ಅಳಿಯ ಸಂತಾನ ಪದ್ಧತಿದಂಚೆನೆ ಕೊಡೆತ್ತೂರು ಗುತ್ತುಗು ಸಂಬಂಧ ಪಟ್ಟಿನಕ್ಲೆ ಮೊಕ್ತೇಸೆರೆನ ಬೇಲೆನ್ ಪಡೆವೊಡು ಪಂದ್ ಕುಡ್ಲದ ಪ್ರಧಾನ ಸಿವಿಲ್ ನ್ಯಾಯಾಲಯ ತೀರ್ಪು ಕೊರ್ತುಂಡು.

ಈ ಬಗೆಟ್ಟ್ ಕೊಡೆತ್ತೂರು ಗುತ್ತುಗು ಸಂಬಂಧಪಟ್ಟಿನ ಪ್ರಮುಖೆರ್ ಸುದ್ದಿಗೋಷ್ಟಿಡ್ ಪೊಲಬು ಕೊರ್ತೆರ್. ಕೊಡೆತ್ತೂರು ಗುತ್ತುದ ಕುಟುಂಬದ ಹಿರಿಯೆರೆಗ್ ಕಟೀಲ್ ದೇವಲ್ಯದ ಆನುವಂಶಿಕ ಮೊಕ್ತೇಸೆರೆಗ್ ಆಡಳಿತ ಟ್ರಸ್ಟಿ ಆಪುನ ಹಕ್ಕು ಇಪ್ಪುಂಡು ಪಂದ್ ತೆರಿಪಾದೆರ್.

ಅರುಣ್ ಕುಮಾರ್ ಶೆಟ್ಟಿ ಪಾತೆರ್ದ್, ನೆರ್ದ್ ದುಂಬು ನಮ್ಮ ಗುತ್ತುದ ಹಿರಿಯೆರಾಯಿನ ದಿ. ಕೊಡೆತ್ತೂರು ಗುತ್ತು ಪಟೇಲ್ ಕುಂಜಪ್ಪ ಶೆಟ್ಟಿ ಮೊಕ್ತೇಸೆರ್ ಆದಿತ್ತೆರ್. ಬೊಕ್ಕ ಮೆರೆನ ಬೊಡೆದಿ ಪುತ್ತಿಗೆ ಗುತ್ತುದ ಪೂವಕ್ಕ ಶೆಡ್ತಿ ಇತ್ತೆರ್. ಮೆರೆನ ಜೋಕುಲೆನೆಟ್ಟ್ ಅಂತ ಪನ್ಪುನಾರ್ ಎಲ್ಯ ಮಗಲ್. ಮೆರೆನ ಮಗಲ್ ಲಕ್ಷ್ಮಣಿನ ಮಗೆ ಇತ್ತೆದ ಮೊಕ್ತೇಸರ್ ಸನತ್ ಕುಮಾರ್ ಶೆಟ್ಟಿ ಆತೆರ್.‌ ಬಂಟ ಸಮುದಾಯಡ್ ದುಂಬುರ್ದೆ ಮಾತೃ ಪ್ರಧಾನ ವ್ಯವಸ್ಥೆ ಉಂಡು. ಅಮ್ಮೆರೆರ್ದ್ ಮಗಕ್ಕ್ ಅಧಿಕಾರ ತಿಕುನ ಬದಲ್ ಮರ್ಮಯಗ್ ತಿಕ್ಕುಂಡು. ಮಾತೃ ಪ್ರಧಾನ ವ್ಯವಸ್ಥೆಡ್ ಗುತ್ತುದ ಕುಟುಂಬದ ಆಂಜೋವ್ ನ ಬೊಡೆದಿ, ಜೋಕುಲೆಗ್ ಅಲ್ಪದ ಅಧಿಕಾರದ ಹಕ್ಕ್ ಇಪ್ಪುಜಿ. ಆಂಡ ಸನತ್ ಕುಮಾರ್ ಶೆಟ್ಟಿ ಕಾಸ್ ದ ಬಲರ್ದ್ ಅಧಿಕಾರ ಪಡೆತೆರ್. ಸನತ್ ಕುಮಾರ್ ಶೆಟ್ಟಿ ಬೊಕ್ಕ ಆರೆನ ಕುಟುಂಬಸ್ಥೆರ್ ಪುತ್ತಿಗೆ ಗುತ್ತುದಕುಲು ಕಟೀಲ್ ದೇವಲ್ಯದ ಟ್ರಸ್ಟಿ ಆಯೆರೆ ಆರೆಗ್ ಹಕ್ಕ್ ಇಜ್ಜಿ. ಕೊಡೆತ್ತೂರು ಗುತ್ತುದ ಕುಟುಂಬಗ್ ಸೇರಿನಕುಲು ಮಾತ್ರ ಕಟೀಲ್ ದೇವಲ್ಯದ ಟ್ರಸ್ಟಿ ಆವೊಲಿ ಪಂದ್ ಸಿವಿಲ್ ಕೋರ್ಟ್ ನ್ಯಾಯಾಧೀಶೆ ಪ್ರತಿಭಾ ಡಿ.ಎಸ್. ತೀರ್ಪು ಕೊರ್ತೆರ್ ಪಂದ್ ಪಂಡೆರ್. ಈ ಸುದ್ದಿಗೋಷ್ಠಿಡ್ ಹರಿಶ್ಚಂದ್ರ ಆಳ್ವ, ಬಿ.ಆರ್. ಪ್ರಸಾದ್ ಪಾಲ್ ಪಡೆದಿತ್ತೆರ್.

ಫುಟ್ ಬೋರ್ಡ್ ಡ್ ನೇಲೊಂದು ಪ್ರಯಾಣ: 123 ಕೇಸ್ ದಾಖಲ್

ಕುಡ್ಲ: ಬಸ್‌ಲೆನ ಮಿತ್ತ್ ಇಸೇಸ ಅಭಿಯಾನ ನಡಪಾದ್, ಪೊಲೀಸ್ ದಕುಲು ಫುಟ್‌ಬೋರ್ಡ್ ನೇಲೊಂದು ಪೋಪಿನಕ್ಲೆನ ಮಿತ್ತ್  ಇತ್ತ್ ನೆಟ್ಟ 123 ಕೇಸ್ ನ್ ಪಾಡ್ದೆರ್.

ಕಂಡಕ್ಟೆರ್ ಮಾರ್ಗೊಗು ಬುರ್ದು ಸೈತಿ ಬೊಕ್ಕ ಕುಡ್ಲ ಪೊಲೀಸ್ ದಕುಲು ಬಸ್ ಕ್ಕ್ ಬಾಕಿಲ್ ಕಡ್ಡಾಯ ಮಲ್ದೆರ್. ಅತ್ತಂದೆ ಈ ಬಗೆಟ್ಟ್ ಕಾರ್ಯಾಚರಣೆ ನಡಪಾವೊಂದು ಉಲ್ಲೆರ್. ಅಂಚೆನೆ ಫುಟ್‌ಬೋರ್ಡ್‌ಡ್ ಉಂತಿನಕ್ಲೆನ ಮಿತ್ತ್  ಕೇಸ್ ಪಾಡುನೆ ಅತ್ತಂದೆ, ಬಸ್ ನ್ ದುಂಬು ಕೊನೊಯೆರೆ ಬುಡ್ಪುಜ ಪಂದ್ ಪೊಲೀಸ್ ದಕುಲು ಎಚ್ಚರಿಕೆ ಕೊರ್ತೆರ್.

ಬಾಕಿಲ್ ಇಪ್ಪುನ ಬಸ್‌ ಈ ನಿಯಮನ್ ಪಾಲಿಸವೊಡು ಬೊಕ್ಕ ಬಾಕಿಲ್ ನ್ ಸಂಚಾರದ ಪೊರ್ತುಡು ಮುಚ್ಚಿದ್ ಇಪ್ಪೊಡು ಪಂದ್  ಪೊಲೀಸೆರ್ ತೆರಿಪಾದೆರ್.