ಬೆಂಗ್ಲೂರುಡ್ ರಾಜಾನುಕುಂಟೆ ಪೊಲೀಸ್ ಠಾಣೆ ಡ್ ರಡ್ಡ್ ಜನ ವಕೀಲೆರೆನ್ ಲಾಕ್ ಅಪ್ ಡ್ ಪಾಡ್ದ್ ಚಿತ್ರಹಿಂಸೆ ಕೊರ್ನ ರಡ್ಡ್ ಜನ ಕಾನ್ಸ್ಟೇಬಲ್ ನ್ ಸಸ್ಪೆಂಡ್ ಮಲ್ತ್ ದೆರ್.
ಅಕ್ಲೆನ ಕಕ್ಷಿದಾರೆರ್ನ ಪರವಾದ್ ವಕೀಲೆರ್ ರಾಜಾನುಕುಂಟೆ ಪೊಲೀಸ್ ಠಾಣೆ ಗ್ ಪೋದಿತ್ತೆರ್. ಈ ಪೊರ್ತುಡು ವಕೀಲೆರ್ನ ಒಟ್ಟಿಗೆ ಅನುಚಿತವಾದ್ ವರ್ತನೆ ಮಲ್ತಿನ ಪೊಲೀಸೆರ್ ಅಕ್ಲೆನ್ ಲಾಕ್ ಅಪ್ ಗ್ ಪಾಡ್ದ್ ದೌರ್ಜನ್ಯ ಮಲ್ತಿನ ದೃಶ್ಯಲು ವಾಟ್ಸಾಪ್ ಡ್ ವೈರಲ್ ಅತ್ಂಡ್.
ಈ ಬಗೆಟ್ ಹಿರಿಯ ಅಧಿಕಾರಿಲು ಆರೋಪಿತ ಪೊಲೀಸ್ ಸಿಬ್ಬಂದಿಲೆನ್ ಅಮಾನತ್ ಮಲ್ತ್ ದೆರ್ ಪಂದ್ ತೆರಿದ್ ಬೈದ್ಂಡ್.
ಭಾರತ ಡ್ ಸುರುತ UPIಎಟಿಎಂ (UPI ATM) ಸುರು ಆತ್ಂಡ್. ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (NPCI) ಸಹಯೋಗ ಡ್ ಪಾವತಿ ಸೇವೆದ ಸುರುತ UPI ಉಂದು ಆತ್ಂ ಡ್.
ಎಟಿಎಂ ಸುರು ಮಲ್ತಿನಕುಲ್ ಮುಂಬೈ ಡ್ ನಡತ್ತಿನ ಗ್ಲೋಬಲ್ ಫಿನ್ಟೆಕ್ ಫೆಸ್ಟ್ ಡ್ ಉಂದೆನ್ ಸುರು ಮಲ್ತೆರ್.
ಈ ಎಟಿಎಂ ಡ್ ಕಾರ್ಡ್ ದ ಅಗತ್ಯ ಇಜ್ಜಂದೆ ಕಾಸ್ ದೆಪ್ಪೊಲಿ. ಈ ಎಟಿಎಂ ಕಾರ್ಡ್ಲೆಸ್ ಕಾಸ್ ದೆಪ್ಪುಲಕ ವಿನ್ಯಾಸ ಮಲ್ತ್ ದೆರ್.
UPI ATM ಪಂಡ ದಾದ…?
UPI ATM ಒಂಜಿ ಬೊಲ್ದು ಲೇಬಲ್ ATM ಆತ್ಂ ಡ್. ಬೊಲ್ದು ಲೇಬಲ್ ಎಟಿಎಂ ಪಂಡ ಈ ಎಟಿಎಂ ನ್ ಬ್ಯಾಂಕ್ ರ್ದ್ ಬ್ಯಾಂಕಿಂಗ್ ಅತ್ತಂದಿನ ಸಂಸ್ಥೆಲು ನಿರ್ವಹಣೆ ಮಲ್ಪುಂಡು. ಈ ಎಟಿಎಂ ಗ್ರಾಹಕೆರ್ ಡೆಬಿಟ್ ಕಾರ್ಡ್ ಅತ್ತ್ಂ ಡ ಎಟಿಎಂ ಕಾರ್ಡ್ದ ಅಗತ್ಯ ಇಜ್ಜಂದೆ ಕಾಸ್ ನ್ ಪಿರ ದೆಪ್ಪೊಲಿ.
UPI ATM ಎಂಚ ಕೆಲಸ ಮಲ್ಪುಂಡು..??
ಈ ಎಟಿಎಂ ಡ್ ಯುಪಿಐ ಕಾಸ್ ಪಿರ ದೆಪ್ಪುನ ಆಯ್ಕೆ ಉಂಡು. ಈ ಆಯ್ಕೆನ್ ಕ್ಲಿಕ್ ಮಲ್ತ್ ಬೊಕ್ಕ UPI ಅಪ್ಲಿಕೇಶನ್ ಮುಖೆನ ಪರದೆ ದ ಮಿತ್ತ್ ತೋಜುನ QR ಕೋಡ್ ನ್ ಸ್ಕ್ಯಾನ್ ಮಲ್ತ್ ದ್ QR ಕೋಡ್ ನ್ ಒವ್ವೆ UPI ಅಪ್ಲಿಕೇಶನ್ ರ್ದ್ ಸ್ಕ್ಯಾನ್ ಮಲ್ತ್ ದ್ ಕೋಡ್ ನ್ ಸ್ಕ್ಯಾನ್ ಮಲ್ತ್, ಕಾಸ್ ಏತ್ ಪಂದ್ ಪಾರ್ದ್, ಪಿನ್ ನಂಬರ್ ಪಾಡುಂಡ ಕಾಸ್ ಡ್ರಾ ಮಲ್ಪೊಲಿ.
ಮಧ್ಯ ಮೊರೊಕ್ಕಾಡ್ ಬಿರ್ಸ್ ದ ಭೂಕಂಪ ಆದ್ 300 ಕ್ಕ್ ಎಚ್ಚ ಜನ ತೀರ್ ಪೋತೆರ್ ಪಂದ್ ವರದಿ ಆತ್ಂಡ್.
ರಿಕ್ಟರ್ ಮಾಪಕಡ್ ಭೂಕಂಪದ ತೀವ್ರತೆ 6.8 ದಾಖಲಾದ್, ಸಾವುದ ಸಂಖ್ಯೆ ಜಾಸ್ತಿ ಆಪುನ ಸಾಧ್ಯತೆ ಉಂಡು. ಸ್ಥಳೀಯ ಕಾಲಮಾನದ ಪ್ರಕಾರ ಸುಕ್ರವಾರ ರಾತ್ರೆ 11 ಗಂಟೆರ್ದ್ ಬೊಕ್ಕ ಮರಕೇಶನ್ ನೈಋತ್ಯಗ್ 72 ಕಿ.ಮೀ ಅಂಚನೆ ಅಟ್ಲಾಸ್ ಪರ್ವತದ ಪಟ್ಟಣಡ್ ಒಕೈಮೆಡ್ ರ್ದ್ 56 ಕಿಮೀ ಪಶ್ಚಿಮಗ್ ತೀವ್ರ ಸ್ವರೂಪದ ಭೂಕಂಪ ಆತ್ಂಡ್.
ತುಳುನಾಡ ಜವನೆರ್ ಬೆಂಗ್ಲೂರ್ (ರಿ.) ಮುತಾಲಿಕೆಡ್ ರಾಜಬೂಡುಡು ಕುಡೊರ ಗರ್ದ್ ಗಮ್ಮತ್ತ್ ದ ಪರ್ಬ “ಅಸ್ಟೆಮಿದ ಐಸಿರ” ಲೇಸ್ ಸೆ.24 ಐತಾರ ವಿಜಯನಗರದಬಂಟರ ಸಂಘದ ಚಾವಡಿಡ್ ನಡಪರೆ ಉಂಡು.
ಈ ಲೇಸ್ ದ ಕಲೊಟ್ಟು ಸುಗಿಪು ನಲಿಪು, ಚೆಂಡೆ ನಲಿಕೆ, ಕೊಂಡಾಟದ ಬಾಲೆ ಕೃಷ್ಣೆ, ತುಳು ಪದರಂಗಿತ, ವಿಠಲ ನಾಯ್ಕ್ ಗೀತಾ ಸಾಹಿತ್ಯ ಸಂಭ್ರಮ, ಗೊಬ್ಬುದ ಕಲ, ಲೆಪ್ಪುಗೆದ ಬಲ್ಲ್ ದ ಗೊಬ್ಬು, ಪಿಲಿಏಸ, ತಾಲೀಮು ಗೊಬ್ಬು, ತುಳು ಐಸಿರ ತುತ್ತೈತ ದೇಕಿ, ತುಳುನಾಡ್ದ ಅಟಿಲ್ದ ಅರಗನೆ, ತುಳುವ ಪಟ್ಟಾಂಗ ಕಟ್ಟೆ, ಅಟ್ಟಿ ಕಟ್ಟ್ ದ್ ಕಬತ್ ಗೊಬ್ಬು, ಅಟ್ಟೆಮಿದ ಉಚ್ಚಯ, ತುಳುವ ಬಿರ್ಸೆರೆಗ್ ತಮ್ಮನ ಬಲ್ಮನ, ಬಿರ್ದ್ ಗರ್ದ್ ದ ತುಳು ಯಕ್ಷಗಾನ ನಡಪರೆ ಉಂಡು ಪಂದ್ ಸಂಘಟಕೆರ್ ತೆರಿಪಾದೆರ್.
ಬೆದ್ರದ ಮೊಸರು ಕುಡಿಕೆ ಉಚ್ಚಯದ ಲೆಕ್ಕೊಡು ಜವನೆರ್ ಬೆದ್ರ ಅರ್ಪಣೆ ಮಲ್ಪುನ ಕೃಷ್ಣೋತ್ಸವ ಯಕ್ಷ ಸಂಭ್ರಮ 2023 ಲೇಸ್ ಡ್ ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ಕೂಟದ ಸಮಾಜ ಸೇವೆನ್ ಗುರುತಿಸಾದ್ ಈ ಸಂಸ್ಥೆಗ್ ಕೃಷ್ಣೋತ್ಸವ ಪ್ರಶಸ್ತಿನ್ ಕೊರಿಯೆರ್.
ಈ ಲೇಸ್ (ಸೆ.7) ಕೋಡೆ ಬಯ್ಯಗ್ ಬೆದ್ರ ಅಮರನಾಥ ಶೆಟ್ಟಿ ವೃತ್ತದ ಕೈತಲ್ ದ ಭಾಗವತ ಬಲಿಪ ನಾರಾಯಣ ವೇದಿಕೆಡ್ ನಡತ್ಂಡ್.
ಒಡಿಪು: ಬೊಂಬೈರ್ದ್ ರಾತ್ರೆದ ಪೊರ್ತು ಊರುಗು ಬತ್ತಿನ ಒಂಜಿ ಜನ ಇಲ್ಲದ ಪಿದಯಿ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊನ್ನ ಘಟನೆ ಗುರುವಾರ ಅಂಬಾಗಿಲು ಪೇರಂಪಲ್ಲಿದ ಕಕ್ಕಿಂಜೆ ದೇವಿನಗರಡ್ ನಡತ್ಂಡ್.
ತೀರ್ ಪೋಯಿನಾರ್ ದೇವಿನಗರದ ಸುಕೇಶ್ ಶೆಟ್ಟಿ(51) ಪಂದ್ ತೆರಿದ್ ಬೈದ್ಂಡ್. ಮೇರ್ ಬೊಂಬೈಡ್ ಹೋಟೆಲ್ ಒಂಜೆಟ್ ಕೆಲಸ ಮಲ್ತೊಂದು ಇತ್ತೆರ್. ಮೆರೆನ ಆತ್ಮಹತ್ಯೆಗ್ ಕಾರಣ ನನ ಗೊತ್ತಾವೊಡಾತೆ.
ಮೆರೆನ ಪುನನ್ ಮಣಿಪಾಲ ಶವಾಗಾರಗ್ ಕೊನೊಯೆರೆ ಸಮಾಜ ಸೇವಕೆ ನಿತ್ಯಾನಂದ ಒಳಕಾಡು ಸಹಕಾರ ಕೊರಿಯೆರ್. ಈ ಘಟನೆದ ಜಾಗೆಗ್ ಮಣಿಪಾಲ ಪೊಲೀಸೆರ್ ಬತ್ತ್ ದ್ ಪರಿಶೀಲನೆ ನಡಪಾದೆರ್.
ಕುಡ್ಲ: ಕುಡ್ಲ ಮಹಾನಗರ ಪಾಲಿಕೆದ 24ನೇ ಅವಧಿದ ಮೇಯರ್ ಆದ್ ಸುಧೀರ್ ಶೆಟ್ಟಿ ಕಣ್ಣೂರು ಬೊಕ್ಕ ಉಪಮೇಯರಾದ್ ಸುನೀತಾ ಸಾಲಿಯಾನ್ ಆಯ್ಕೆ ಆತೆರ್.
ಮೇಯರ್ ಬೊಕ್ಕ ಉಪ ಮೇಯರ್ ತಾನಗ್ ಇನಿ ನಡತಿನ ವೋಟುಡು ಆಡಳಿತರೂಢ ಬಿಜೆಪಿರ್ದ್ ಮೇಯರ್ ತಾನಗ್ ಸುಧೀರ್ ಶೆಟ್ಟಿ ಬೊಕ್ಕ ಉಪ ಮೇಯರ್ ತಾನಗ್ ಸುನೀತಾ ಸಾಲಿಯಾನ್ ನಾಮಪತ್ರ ಸಂದಾದಿತ್ತೆರ್. ಅಂಚೆನೆ ಪ್ರತಿಪಕ್ಷ ಕಾಂಗ್ರೆಸ್ ರ್ದ್ ಮೇಯರ್ ಬೊಕ್ಕ ಉಪ ಮೇಯರ್ ತಾನಗ್ ಅಭ್ಯರ್ಥಿಲೆನ್ ವೋಟುಗು ಉಂತಾದಿತ್ತೆರ್. ಅವೆರ್ದ್ ಬೊಕ್ಕ ನಡತಿನ ವೋಟುಡು ಸುಧೀರ್ ಶೆಟ್ಟಿ ಬೊಕ್ಕ ಸುನೀತಾ ಸಾಲಿಯಾನ್ ಆಯ್ಕೆ ಆಯೆರ್.
ಮೈಸೂರ್ ವಿಭಾಗದ ಪ್ರಾದೇಶಿಕ ಆಯುಕ್ತೆರ್ ವೋಟು ನಡಪಾದ್ ಕೊರಿಯೆರ್. ಪಾಲಿಕೆದ ಮಂಗಳಾ ಸಭಾಂಗಣಡ್ ಈ ವೋಟು ನಡತ್ಂಡ್.
ಕ್ಯಾನ್ಸರ್ ಡ್ ನರೆಲೊಂದಿತ್ತಿನ ಬಾಲೆದ ಚಿಕಿತ್ಸೆಗಾದ್ ಸಾಯಿ ಪರಿವಾರ್ ದ ಆತ್ಮೀಯ ಸಂಸ್ಥೆ ಡಿಜೆ ಬಾಯ್ಸ್ ಧರ್ಮನಗರ ನೆತ್ತ ಸೇವಾ ನಿಧಿ ಸಂಗ್ರಹಗ್ ತೊಕ್ಕೊಟ್ಟುದ ಮೊಸರು ಕುಡಿಕೆ ಉಚ್ಚಯಡ್ ಸಾಯಿ ಪರಿವಾರ್ ಪಾಡ್ದಿನ ಬಾಬಾ ಮೆರೆನ ಪ್ರತಿಕೃತಿದ ಎದುರುಡು ತುಡರ್ ಅರ್ಲಾದ್ ಚಾಲನೆ ಕೊರಿಯೆರ್.
ಈ ಪೊರ್ತುಡು ಸಾಯಿ ಪರಿವಾರ್ ದ ಮಾರ್ಗದರ್ಶಕೆರ್ ಪ್ರವೀಣ್ ಶೆಟ್ಟಿ ಪಿಲಾರ್ ಮೇಗಿನ ಮನೆ, ಸಾಯಿ ಪರಿವಾರ್ ದ ಗೌರವ ಸದಸ್ಯೆರ್ ಸುರೇಶ್ ಭಟ್ನಗರ, ಚಂದ್ರಹಾಸ್ ಪಂಡಿತ್ ಹೌಸ್, ಸಾಯಿ ಪರಿವಾರ್ ದ ಪ್ರಮುಖೆರ್ ಗಣೇಶ್ ಅಂಚನ್, ಪುರುಷೋತ್ತಮ ಕಲ್ಲಾಪು, ಪ್ರವೀಣ್ ಎಸ್ ಕುಂಪಲ, ಅಶೋಕ್ ಉಚ್ಚಿಲ್, ರಾಜೇಶ್ ಕಾಪಿಕಾಡ್, ಹಿತೇಶ್ ಉಳ್ಳಾಲ ಬೈಲ್, ಸಂಪತ್ ಪಿಲಾರ್, ಧೀರಜ್ ಗಟ್ಟಿ ಕೊಲ್ಯ, ಗಣೇಶ್ ಪಂಡಿತ್ ಮುಳಿಹಿತ್ಲು, ಮಾಧವ ಉಳ್ಳಾಲ್, ಶವಿತ್ ಉಚ್ಚಿಲ್, ದಯಾನಂದ ತೊಕ್ಕೊಟ್ಟು, ಜಯಣ್ಣ ಉಳ್ಳಾಲ, ಸಂತೋಷ್ ಅಂಬ್ಲಮೊಗರು, ಜೀವನ್ ಧರ್ಮನಗರ, ಪ್ರಜ್ವಲ್ ಭವಿಶ್ ಸಂತೋಷ್ ನಗರ, ದೀಕ್ಷಿತ್ ಕಾಪಿಕಾಡ್, ಪ್ರವೀಣ್ ಕೊಲ್ಯ ಪಾಲ್ ಪಡೆದಿತ್ತೆರ್.
ಬೋಲ್ತೆರ್; ಉಜಿರೆ ಎಸ್.ಡಿ.ಎಂ ಕಾಲೇಜ್ ದ ಕಲ್ಪಾರ್ಥಿ ಸೌಜನ್ಯನ ಕೇಸ್ ನ್ ಪಿರ ತನಿಖೆಗಾದ್ ಸರಕಾರಗ್ ನಿರ್ದೇಶನ ಕೊರ್ಪುನಂಚ ಸಾರ್ವಜನಿಕ ಹಿತಾಸಕ್ತಿ ಅರ್ಜಿನ್ ಹೈಕೋರ್ಟ್ ವಿಲೇವಾರಿ ಮಲ್ತ್ ದುಂಡು.
ಈ ಕೇಸ್ ಗ್ ಸಂಬoಧಪಟ್ಟಿನoಚ ಪೊಲೀಸ್ ಇಲಾಖೆ, ಸಿಐಡಿ ಬೊಕ್ಕ ಸಿಬಿಐ ತನಿಖೆ ಆದ್, ಪ್ರಕರಣಗ್ ಸಂಬoಧಿಸಾದ್ ಅರೆಸ್ಟ್ ಆದ್ ಇತ್ತಿನ ಸಂತೋಷ್ ರಾವ್ ನಿರಪರಾಧಿ ಪಂದ್ ಸಿಬಿಐ ವಿಶೇಷ ನ್ಯಾಯಲಯ ತೀರ್ಪು ಕೊರ್ದು ಇತ್ತ್ಂಡ್. ಈ ತನಿಖೆಡ್ ಲೋಪ ಆತ್ಂಡ್ ಪಂದ್ ತನಿಖಾಧಿಕಾರಿ ಬೊಕ್ಕ ವೈದ್ಯಾಧಿಕಾರಿಲೆನ ವಿರುದ್ದ ಕ್ರಮ ದೆತೊನೊಡು ಪಂದ್ ಇಚ್ಚಿಂಪಗ್ ನಡತ್ತಿನ ಕೆಲವು ಪ್ರತಿಭಟನೆಡ್ ಆಗ್ರಹ ಆದ್ ಇತ್ತ್ಂಡ್.
ಸೌಜನ್ಯನ ಕೇಸ್ ನ್ ಪಿರ ತನಿಖೆ ಮಲ್ಪೊಡು ಪಂದ್ ಗಿರೀಶ್ ಭಾರಧ್ವಾಜ್, ನವೀನ್ ಕುಮಾರ್ ನೆರಿಯ, ಬೋಲ್ತೆರ್ ಬೊಕ್ಕ ವಿನಾಯಕ ಪ್ರೆಂಡ್ಸ್ ಟ್ರಸ್ಟ್ ಬಲ್ನಾಡ್ ಪುತ್ತೂರು ಮೊಕುಲು ಒಟ್ಟಾದ್ ಸಲ್ಲಿಕೆ ಮಲ್ತಿನ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಸೆ.8 ದಾನಿ ಉಚ್ಚ ನ್ಯಾಯಾಲಯಡ್ ವಿಚಾರಣೆಗ್ ಬತ್ತ್ ದ್ ಇತ್ತ್ಂಡ್. ಅರ್ಜಿದಾರನ ಪರ ನ್ಯಾಯವಾದಿ ಶ್ಯಾಮ್ ವಾದ ಮಲ್ತ್ ಇತ್ತೆರ್. ಸರಕಾರ ಅತ್ತ್ಂಡ ಮೂಲ ದೂರುದಾರೆರ್, ಸಂತ್ರಸ್ತ ಕುಟುಂಬ ಮಾತ್ರ ಆರೋಪಿನ್ ದೋಷಮುಕ್ತ ಮಲ್ತಿನ ಆದೇಶದ ಮಿತ್ತ್ ಮೇಲ್ಮನವಿ ಸಲ್ಲಿಸಾಯೆರೆ ಕಾನೂನುಡು ಅವಕಾಶ ಉಂಡು ಪಂದ್ ಜರ್ಜ್ ಈ ಪೊರ್ತುಡು ಪಂತೆರ್.
ಅರ್ಜಿದಾರನ ಉದ್ದೇಶ ಎಡ್ಡೆ ಇತ್ತ್ಂಡಲ ಕಾನೂನುದ ಮಿತ್ತಿತ ಉಲಾಯಿ ವ್ಯವಹಾರ ಮಲ್ಪೊಡು ಪಂದ್ ಅಭಿಪ್ರಾಯ ತೆರಿಪಾಯಿನ ವಿಭಾಗೀಯ ನ್ಯಾಯಪೀಠ ಸಂತ್ರಸ್ತ ಕುಟುಂಬಗ್ ಮೇಲ್ಮನವಿ ಸಲ್ಲಿಸಾಯೆರೆ ಸಹಾಯ ಮಲ್ಪುಲೆ ಪಂದ್ ಸಲಹೆ ಕೊರ್ಪುನೆತ್ತ ಒಟ್ಟಿಗೆ ಸಾರ್ವಜನಿಕ ಹಿತಾಸಕ್ತಿದ ಅರ್ಜಿನ್ ವಿಲೇವಾರಿ ಮಲ್ತ್ ದುಂಡು.
ಸುಬ್ರಹ್ಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಆಡಳಿತಗ್ ಸೇರಿನ ಎಸ್ ಎಸ್ ಪಿಯು ಕಾಲೇಜ್ ಗ್ ಗುರುವಾರ ಮಧ್ಯಾಹ್ನ ರಾಜ್ಯ ಮುಜರಾಯಿ ಆಯುಕ್ತೆರ್ ಎಚ್.ಬಸವರಾಜೇಂದ್ರ ಮೇರ್ ಭೇಟಿ ಕೊರ್ದಿತ್ತೆರ್. ಈ ಪೊರ್ತುಡು ಕಾಲೇಜ್ ದ ಕಲ್ಪಾರ್ಥಿಲು ಮೆರೆನ್ ಎದ್ಕೊನಿಯೆರ್.
ಈ ಕಾಲೇಜ್ ಡ್ ಕಲ್ಪುನ ಸುಮಾರ್ 1100 ಕಲ್ಪಾರ್ಥಿಲೆಗ್ ನೆರ್ದ್ ದುಂಬು ಇತ್ತಿನ ಅಭಿವೃದ್ಧಿ ಫೀಸ್ ನ್ ಕ್ಯಾನ್ಸಲ್ ಮಲ್ತ್ ದ್ ಗ್ರಾಮೀಣ ಬಡಪತ್ತ್ ಕಲ್ಪಾರ್ಥಿಲೆನ ವಿದ್ಯೆಗ್ ಬೆರಿತಾಂಗಾದ್ ಉಂತುದು ಇತ್ತೆರ್.
ಬೊಕ್ಕ ಸುಮಾರ್ 1110 ಕಲ್ಪಾರ್ಥಿಲು ಕಾಲೇಜ್ ದ ಗೇಟ್ ರ್ದ್ ಕಾಲೇಜ್ ಮುಟ್ಟ ಸೈಡ್ ಡ್ ಪೋದು ಉಂತುಂದು ಆಯುಕ್ತೆರೆಗ್ ಪುಷ್ಪಾರ್ಚನೆ ಮಲ್ತೆರ್. ಈ ಪೊರ್ತುಡು ಆಯುಕ್ತೆರ್ ಆರೆಗ್ ಪಾಡಿನ್ ಪೂವುನ್ ಕೈಟ್ಟ್ ಪತ್ತ್ ದ್ ಕುಡ ಕಲ್ಪಾರ್ಥಿಲೆನ ಮಿತ್ತ್ ಪಾಡಿಯೆರ್.
ಕಾಲೇಜ್ ದ ವಿದ್ಯಾರ್ಥಿ ಸಂಘದ ಅಧ್ಯಕ್ಷೆರ್, ಪದಾಧಿಕಾರಿಲು, ಅಭಿವೃದ್ಧಿ ಫೀಸ್ ಕ್ಯಾನ್ಸಲ್ ಮಲ್ತ್ ದ್, ಕಾಲೇಜ್ ದ ಫೀಸ್ ಮಸ್ತ್ ಕಮ್ಮಿ ಮಲ್ತ್ ದ್ ಸಹಕಾರ ಕೊರಿನ ಆಯುಕ್ತೆರೆಗ್ ಸೊಲ್ಮೆ ಸಂದಾಯೆರ್. ಈ ಪೊರ್ತುಡು ಆಯುಕ್ತೆರ್ ಕಲ್ಪಾರ್ಥಿಲೆನ ಪುಗೆಲ್ ದ ಮಿತ್ತ್ ಕೈ ದೀದ್ ಎಡ್ಡೆ ಅಧ್ಯಯನ ಮಲ್ತ್ ದ್ ಭವಿಷ್ಯಡ್ ಪ್ರಗತಿ ಸಾಧಿಸಾಲೆ ಪಂದ್ ಪಂಡೆರ್.
ಅವೆರ್ದ್ ಬೊಕ್ಕ ಆಯುಕ್ತೆರ್ ಪಾತೆರ್ದ್, ಅಭಿವೃದ್ಧಿ ಫೀಸ್ ನ್ ಕ್ಯಾನ್ಸಲ್ ಮಲ್ತಿನೆರ್ದಾವರ ಗ್ರಾಮೀಣ ಪ್ರದೇಶವಾಯಿನ ಈ ಭಾಗದ ಜೋಕುಲೆಗ್ ಎಚ್ಚದ ಅನುಕೂಲತೆ ಆತ್ಂಡ್. ನನದ ಅಕೇರಿದ ಪರೀಕ್ಷೆಡ್ 100℅ ಫಲಿತಾಂಶ ಕೊನ್ಪುನವೇ ಎಂಕ್ ಕೊರೊಡಾಯಿನ ನಿಕ್ಲೆನ ಗಿಫ್ಟ್ ಪಂದ್ ಪಂಡೆರ್.
ಕಾಲೇಜ್ ದ ಕಲ್ಪಾರ್ಥಿಲೆಗ್ ಅನುಕೂಲತೆ ಒದಗಿಸಾಯಿನ ಬೊಕ್ಕ ಉಪನ್ಯಾಸಕೆರೆಗ್ ದೇವಲ್ಯರ್ದ್ ವೇತನ ಒದಗಿಸಾಯಿನ ಆಯುಕ್ತೆರೆಗ್ ಕಾಲೇಜ್ ದ ಮುತಾಲಿಕೆಡ್ ಮಾನಾದಿಗೆ ನಡತ್ಂಡ್.
ಈ ಪೊರ್ತುಡು ದೇವಳದ ಕಾರ್ಯನಿರ್ವಹಣಾಧಿಕಾರಿ ಡಾ.ನಿಂಗಯ್ಯ, ಎಇಒ ರಾಜಣ್ಣ, ಕಾಲೇಜ್ ದ ಪ್ರಾಂಶುಪಾಲೆರ್ ಸೋಮಶೇಖರ್ ನಾಯಕ್, ಮುಖ್ಯಗುರು ಕೆ.ಯಶವಂತ ರೈ ಸೇರಿನಂಚೆನೆ ದೇವಲ್ಯದ ಸಿಬ್ಬಂದಿಲು, ಉಪನ್ಯಾಸಕೆರ್, ಶಿಕ್ಷಕೆರ್, ಕಲ್ಪಾರ್ಥಿಲು ಪಾಲ್ ಪಡೆದಿತ್ತೆರ್.
ವರದಿ: ಗೋಪಿಚಂದನ್ ಕೆಎಸ್
