ಭಾರತೀಯ ರಿಸರ್ವ್ ಬ್ಯಾಂಕ್ ಡ್ (RBI) 450 ಸಹಾಯಕ ಬೇಲೆ ಖಾಲಿ ಉಂಡು.
ಆಸಕ್ತ ಬೊಕ್ಕ ಅರ್ಹ ಅಭ್ಯರ್ಥಿಲು ಆನ್ ಲೈನ್ ಮುಖೇನ ಅ.4 ತ್ತ ಉಲಯಿ ಅರ್ಜಿ ಸಂದಾವೊಲಿ. ಅ.21 ಬೊಕ್ಕ 23 ಕ್ಕ್ ಆನ್ ಲೈನ್ ಡ್ ಪೂರ್ವಭಾವಿ ಪರೀಕ್ಷೆನ್ ನಿಗದಿ ಮಲ್ಪರೆ ಉಂಡು. ಡಿ.2 ಕ್ಕ್ ಮುಖ್ಯ ಪರೀಕ್ಷೆ ಉಂಡು ಪಂದ್ ಅಧಿಸೂಚನೆಡ್ ತೆರಿಪಾದೆರ್.
ಕೋಲ್ ಇಂಡಿಯಾ ಲಿಮಿಟೆಡ್ (CIL) ದ ಬೇತೆ ಬೇತೆ ವಿಭಾಗಡ್ 560 ಮ್ಯಾನೇಜ್ಮೆಂಟ್ ಟ್ರೈನಿ ಬೇಲೆ ಖಾಲಿ ಉಂಡು.
ಅರ್ಹ ಅಭ್ಯರ್ಥಿಲು ವೆಬ್ ಸೈಟ್ www.coalindia.in ಆನ್ ಲೈನ್ ಮುಖೇನ ಅರ್ಜಿ ಸಂದಾವೊಲಿ. GATE-2023 ಸ್ಕೋರ್, ದಾಖಲೆ ಪರಿಶೀಲನೆ, ವೈದ್ಯಕೀಯ ಪರೀಕ್ಷೆದ ಆಧಾರದ ಮಿತ್ತ್ ಅಭ್ಯರ್ಥಿಲೆನ್ ಆಯ್ಕೆ ಮಲ್ಪರೆ ಆಪುಂಡು. ಸೆ.13 ರ್ದ್ ಅ.12 ಮುಟ್ಟ ಅರ್ಜಿ ಸಂದಾವೊಲಿ.
ತಾಲಿಬಾನ್ ಅಧಿಕಾರನ್ ವಶಕ್ಕ್ ಪಡೆಯಿನ ಬೊಕ್ಕ ಅಫ್ಘಾನಿಸ್ತಾನಗ್ ರಾಯಭಾರಿನ್ ನೇಮಕ ಮಲ್ತಿನ ಸುರುತ್ತ ದೇಶ ಪನ್ಪುನ ಪುದರ್ ನ್ ಚೀನಾ ಪಡೆತ್ಂಡ್.
ಚೀನಾದ ರಾಯಭಾರಿ ಝಾವೋ ಶೆಂಗ್ ಮೆರೆನ್ ತಾಲಿಬಾನ್ ಪ್ರಧಾನಿ ಮೊಹಮ್ಮದ್ ಹಸನ್ ಬೊಕ್ಕ ಬೇತೆ ಸಚಿವೆರೆನಕುಲು ಎದ್ಕೊನಿಯೆರ್. ತಾಲಿಬಾನ್ ಬೇತೆ ದೇಶದೊಟ್ಟಿಗೆ ಎಡ್ಡೆ ಸಂಬಂಧನ್ ಬಯಸರೆ ಝಾವೊ ಮೆರೆನ ನೇಮಕ ಪ್ರಮುಖ ಆತ್ಂಡ್ ಪಂದ್ ವರದಿ ಆತ್ಂಡ್.
ಬೋಲ್ತೆರ್: ಬೋಲ್ತೆರ್ ತಾಲೂಕುದ ಮುಂಡಾಜೆ ನಿವಾಸಿ ಪ್ರಮೋದ್ ವಿ ಭಿಡೆ ಮೆರ್ ನ ಇಲ್ಲಲ್ ಇತ್ತಿನ ಬಂಗಾರ್ ನ್ ಕಂಡುದ್ ಪರಾರಿ ಆತಿನ ಘಟನೆ ನಡತ್ಂಡ್.
ಮೆರ್ ನ ಇಲ್ಲಡ್ ಸಾರ್ಣೆ ಬೊಕ್ಕ ಪೈಟಿಂಗ್ ದ ಬೇಲೆ ಇತ್ತಿನ ಕಾರಣ ಮಿತ್ತಮಾಳಿಗೆಡ್ ಇತ್ತಿನ ಬಂಗಾರ್ ನ್ ನೆಲಮಾಳಿಗೆಡ್ ದೀದ್ ಇತ್ತೆರ್. ಇಲ್ಲದ ಬೇಲೆಗ್ ಸುಮಾರ್ 10 ರ್ದ್ 13 ಜನ ಬತ್ತ್ ದ್ ಬೇಲೆ ಮುಗಿತ್ ದ್ ಜು 19 ದಾನಿ ಪೋಪೆರ್. ಸೆ.12 ದಾನಿ ಬೊಲ್ಪುಗು ಪ್ರಮೋದ್ ಭಿಡೆ ಬೊಕ್ಕ ಅರೆನ ಬುಡೆದಿ ಕಾರ್ಯಕ್ರಮಗ್ ಪಿದಡ್ ನಗ ಅಲ್ಪ ದೀತ್ ನ ಬಂಗಾರ್ ಕಂಡಿನ ವಿಷಯ ಗೊತ್ತಾತ್ಂಡ್. ಸುಮಾರ್ 122 ಗ್ರಾಂ ಬಂಗಾರ್ ಒಟ್ಟು 5 ಲಕ್ಷ ರೂ ಪಂದ್ ಅಕುಲ್ ಕೊರ್ನ ದೂರುದಂಚ ಧರ್ಮಸ್ಥಳ ಪೊಲೀಸ್ ಸ್ಟೇಷನ್ ಡ್ ಕೇಸ್ ದಾಖಲಾತ್ಂಡ್
ಪ್ರಧಾನಿ ನರೇಂದ್ರ ಮೋದಿ ಅರೆನ ಕನ “ಮೇಕ್ ಇನ್ ಇಂಡಿಯಾ” ಯೋಜನೆದ ಬಗ್ಗೆ ರಷ್ಯಾದ ಗುರ್ಕಾರೆರ್ ವ್ಲಾದಿಮಿರ್ ಪುಟಿನ್ ಮೆಚ್ಚುಗೆ ವ್ಯಕ್ತಪಡಿಸಾದೆರ್.
ರಷ್ಯಾದ ಅಧಿಕಾರಿಲು ಕೂಡ ಭಾರತದಂಚ ಸ್ಪದೇಶಿ ಕಾರ್ ನ್ ಬಳಕೆ ಮಲ್ಪೊಡು ಪಂದ್ ಪಂತೆರ್. ಪುಟಿನ್ ಮೆರ್ ವ್ಲಾಡಿವೋಸ್ಟಾಕ್ ಡ್ ನಡತ್ತಿನ ೮ನೇ ಈಸ್ಟರ್ನ್ ಎಕನಾಮಿಕ್ ಪೋರಂದ ಪೂರ್ಣಾಧಿವೇಶನಡ್ ಪಾತೆರ್ದ್ ಈ ಸಲಹೆನ್ ಕೊರ್ತೆರ್.
ಪ್ರಧಾನಿ ನರೇಂದ್ರ ಮೋದಿ ಅರೆನ ಮೇಕ್ ಇನ್ ಇಂಡಿಯಾ ಯೋಜನೆ ಸಮರ್ಪಕವಾಯಿನ ಆಲೋಚನೆ ಆತ್ಂಡ್. ಈ ನಿಟ್ಟ್ ಡ್ ರಷ್ಯಾದ ಅಧಿಕಾರಿಲು ವಿದೇಶಿ ಬ್ರಾö್ಯಂಡ್ ಗಾಡಿಲೆದ ವ್ಯಾಮೋಹನ್ ಬುರ್ದು ದೇಶೀಯ ರಷ್ಯಾದ ಕಾರ್ ಲೆನೆ ಬಳಕೆ ಮಲ್ಪೊಡು ಪಂದ್ ಪಂತೆರ್.
ತುಳುನಾಡ್ ದ ಜಿಲ್ಲೆ ಸೇರಿನಂಚ ಬೇತೆ ಬೇತೆ ಜಿಲ್ಲೆಡ್ ಚೌತಿ ಸೆ.19 ದಾನಿ ಆಚರಣೆ ಮಲ್ಪುನೆಟ್ ಅವ್ವೆ ದಿನ ಸರಕಾರಿ ರಜೆ ಘೋಷಣೆ ಮಲ್ಪೊಡು ಪಂದ್ ಸಚಿವೆರ್ ಮನವಿ ಕೊರ್ತೆರ್.
ಈ ಹಿನ್ನಲೆಡ್ ದ.ಕ. ಜಿಲ್ಲೆಡ್ ಸರಕಾರಿ ರಜೆನ್ ಸೆ.18 ದ ಬದಲ್ 19 ದಾನಿ ಕೊರಿಯೆರೆ ಅಗತ್ಯ ಕ್ರಮ ದೆತೊನೊಡು ಪಂದ್ ದ.ಕ. ಜಿಲ್ಲಾ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್ ಮೆರ್ ಸರಕಾರದ ಮುಖ್ಯ ಕಾರ್ಯದರ್ಶಿ ಬೊಕ್ಕ ದ.ಕ. ಜಿಲ್ಲಾಧಿಕಾರಿಗ್ ಸೂಚಿನೆ ಕೊರ್ತೆರ್.
ಸ್ಪೀಕರ್ ಖಾದರ್ ಮನವಿ:
ದ.ಕ. ಬೊಕ್ಕ ಒಡಿಪು ಜಿಲ್ಲೆಡ್ ಚೌತಿ ನ್ ಸೆ.19 ದಾನಿ ಆಚರಣೆ ಮಲ್ಪುನ ಹಿನ್ನಲೆಡ್ ಸಾರ್ವತ್ರಿಕ ರಜೆನ್ ಸೆ.19 ದಾನಿ ಕೊರ್ಪುನಂಚ ಸ್ಪೀಕರ್ ಖಾದರ್ ಡ ಮನವಿ ಮಲ್ತಿನ ಹಿನ್ನಲೆ ಡ್ ಕೂಡ್ಲೆ ಸ್ಪಂದಿಸಾಯಿನ್ ಆರ್ ಸಿಎಂ ಸಿದ್ದರಾಮಯ್ಯಡ ಪಾತೆರ್ವೆ ಪಂದ್ ಪಂತೆರ್. ಸೆ.19 ದಾನಿ ರಜೆ ಕೊರ್ಪುನ ಭರವಸೆನ್ ಕೊರ್ತೆರ್ ಪಂದ್ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಪದ್ಮರಾಜ್ ಆರ್ ತೆರಿಪಾದೆರ್.
ಒಡಿಪು ಜಿಲ್ಲೆ ಡ್ ರಜೆ ಬದಲಾವಣೆದ ಬಗೆಟ್ ನಿರ್ಧಾರ ನನಲ ಆತಿಜಿ.
ಬೆದ್ರ: ದಕ್ಷಿಣ ಕನ್ನಡ, ಒಡಿಪು ಬೊಕ್ಕ ಕಾಸರಗೋಡು ಜಿಲ್ಲಾ ವ್ಯಾಪ್ತಿದ ಜಿಲ್ಲಾ ಕಂಬಳ ಸಮಿತಿದ ಪೊಸ ಪದಾಧಿಕಾರಿಲೆನ ಪದಗ್ರಹಣ ಬೊಕ್ಕ ಕಂಬಳ ಸಮಿತಿದ ಸುರುತ ಸಭೆನ್ ಸೆ. 18 ಮದ್ಯಾಹ್ನ 3 ಗಂಟೆಗ್ ಬೆದ್ರದ ಕೋಟಿ ಚೆನ್ನಯ ಕಂಬುಲ ಕರೆತ ಕೈತಲ್ ಸೃಷ್ಟಿ ಗಾರ್ಡನ್ ಡ್ ಕಂಬುಲ ಸಮಿತಿದ ಪೊಸ ಗುರ್ಕಾರೆರ್ ಐಕಳಬಾವ ದೇವಿಪ್ರಸಾದ್ ಶೆಟ್ಟಿ ಬೆಳಪು ಮೆರ್ ನ ಗುರ್ಕಾಮೆಡ್ ನಡಪೆರೆ ಉಂಡು ಪಂದ್ ಸಮಿತಿ ಪ್ರಕಟನೆಡ್ ತೆರಿಪಾದೆರ್.
ಸಭೆಟ್ ಕಂಬುಲದ ದಿನನ್ ಪಟ್ಟಿ ಮಲ್ತ್ ದ್ ಕಡೆಕ್ ಬೆಂಗಳೂರ್ ಡ್ ನಡಪುನ ಕಂಬಳದ ಬಗೆಟ್ ಚರ್ಚೆ ಮಲ್ಪೆರೆ ಉಂಡು. ಕಂಬಳದ ವ್ಯವಸ್ಥಾಪಕರ್ , ಎರುಕ್ಲೆನ ಧಣಿಕುಲು, ಪೋಷಕೆರ್, ಕಂಬಳದ ತೀರ್ಪುಗಾರೆರ್, ಎರು ಗಿಡಪುನಕುಲು, ಎರುಕುಲೆನ ಚಾಕಿರಿ ಮಲ್ಪುನಕುಲು, ಜನಪ್ರತಿನಿಧಿಲು, ಅಭಿಮಾನಿಲು ಈ ಸಭೆಟ್ ಪಾಲ್ ಪಡೆದ್ ಸಲಹೆ ಕೊರೊಡು ಪಂದ್ ಸಮಿತಿ ಪತ್ರಿಕಾ ಪ್ರಕಟನೆಡ್ ತೆರಿಪಾದೆರ್.
ಕೋಟೆಕಾರ್ ಕೆ.ಸುಬ್ಬಣ್ಣಯ್ಯ ಸ್ಮಾರಕ ವಿದ್ಯಾವರ್ಧಕ ಸಂಘ (ರಿ.) ದ ಮುತಾಲಿಕೆಡ್ 3ನೇ ವರ್ಷೊದ ಶ್ರೀ ವಿದ್ಯಾಗಣೇಶೋತ್ಸವ ಲೇಸ್ ಸೆ.19 ಅಂಗಾರೆ ಕೋಟೆಕಾರ್ ಶಾಲೆಡ್ ನಡಪರೆ ಉಂಡು.
ಬೊಲ್ಪುಗು ಗಣಪತಿ ಹೋಮ, ವಿಗ್ರಹ ಪ್ರತಿಷ್ಠೆ, ಪೂತ್ತ ಪೂಜೆ, ಭಜನೆ, ನಡಪರೆ ಉಂಡು. ಮಧ್ಯಾಹ್ನ ಮಹಾಪೂಜೆ, ಪ್ರಸಾದ ಪಟ್ಟಿಯೆರ್. ಬಯ್ಯಗ್ ರಂಗಪೂಜೆ, ಮನೋರಂಜನಾ ಲೇಸ್, ಸಭಾ ಲೇಸ್, ರಾತ್ರೆ ಮಹಾಗಣಪತಿ ದೇವೆರೆನ ವೈಭವದ ಶೋಭಾಯಾತ್ರೆ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ಗಣೇಶನ ಕೃಪೆಗ್ ಪಾತ್ರರಾವೊಡು ಪಂದ್ ಕೋಟೆಗಾರ್ ಶ್ರೀ ವಿದ್ಯಾ ಗಣೇಶೋತ್ಸವ ಸಮಿತಿದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬಿಲ್ಲವ ಫ್ಯಾಮಿಲಿ ದುಬೈದ ಮುತಾಲಿಕೆಡ್ 169ನೇ ವರ್ಷೊದ ಬ್ರಹ್ಮಶ್ರೀ ನಾರಾಯಣಗುರು ಜಯಂತಿ ಸೆ.17 ಐತಾರ ಬಯ್ಯಗ್ ಜೆಸಿಸಿ ಪ್ರೈವೇಟ್ ಶಾಲೆ ಅಲಾ ಸಫಾ ದುಬೈಡ್ ನಡಪರೆ ಉಂಡು.
ಈ ಲೇಸ್ ಕನ್ಯಾಡಿ ಶ್ರೀರಾಮ ಕ್ಷೇತ್ರದ ಶ್ರೀ ಬ್ರಹ್ಮಾನಂದ ಸರಸ್ವತಿ ಸ್ವಾಮೀಜಿನ ಆಶೀರ್ವಾದದೊಟ್ಟಿಗೆ ನಡಪರೆ ಉಂಡು. ಅಂಚೆನೆ ಈ ಲೇಸ್ ಡ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಸೆ.18 ಕ್ಕ್ ಸಂಸತ್ತ್ ದ ಇಸೇಸ ಅಧಿವೇಶನ ಸುರು ಆಪುಂಡು. ಅಂಚಾದ್ ಸೆ.17 ಕ್ಕ್ ಸರ್ವಪಕ್ಷ ಸಭೆ ನಡಪರೆ ಉಂಡು ಪಂದ್ ಕೇಂದ್ರ ಸಚಿವೆರ್ ಪ್ರಹ್ಲಾದ್ ಜೋಶಿ ಪಂಡೆರ್.
ಈ ಸಭೆಕ್ಕ್ ಮಾತ ನಾಯಕೆರೆನ್ ಲೈದೆರ್. ಈ ಸಭೆಟ್ಟ್ ಇಸೇಸ ಅಧಿವೇಶನದ ಅಜೆಂಡಾಲೆನ ಬಗೆಟ್ಟ್ ಚರ್ಚೆ ನಡಪುನ ಅಂದಾಜಿ ಉಂಡು ಪಂದ್ ತೆರಿದ್ ಬೈದ್ಂಡ್.
