September 2023

ಪಿಎಂ ವಿಶ್ವಕರ್ಮ ಯೋಜನೆರ್ದ್ ಮಲ್ಲ ಬದಲಾವಣೆ: ಶಾಸಕೆರ್ ವೇದವ್ಯಾಸ ಕಾಮತ್

ಈ ಸರ್ತಿದ ಸ್ವಾತಂತ್ರ್ಯೋತ್ಸವದ ಭಾಷಣಡ್ ಪ್ರಧಾನಿ ನರೇಂದ್ರ ಮೋದಿ ಮೇರ್ ದೇಶದ ಕರಕುಶಲ ಬೊಕ್ಕ ಕುಶಲಕರ್ಮಿಲೆಗ್ ವರದಾನ ಆಪುನ ದಿಟ್ಟಿಡ್ ಘೋಷಣೆ ಮಲ್ತಿನ “ಪಿಎಂ ವಿಶ್ವಕರ್ಮ” ಯೋಜನೆ ಉಂದುವೇ ಸೆ.17 ಕ್ಕ್ ವಿಶ್ವಕರ್ಮ ಜಯಂತಿಗ್ ಜಾರಿ ಆಪುನವು ವಿಶ್ವಕರ್ಮ ಸಮುದಾಯದ ಬುಲೆವಣಿಗೆಗ್ ಮಸ್ತ್ ಮಹತ್ವ ಆಯಿನವು ಪಂದ್ ಶಾಸಕೆರ್ ವೇದವ್ಯಾಸ್ ಕಾಮತ್ ಪಂಡೆರ್.

ನನದ 5 ವರ್ಷೊದ ಅವಧಿಗ್ (2023-2028) ಅನ್ವಯ ಆಪುಲೆಕ್ಕ 13 ಸಾರ ಕೋಟಿ ರೂಪಾಯಿ ಕಾಸ್ ದ ಕರ್ಚಿಡ್ ಜಾರಿ ಆಪುನ ಈ ಯೋಜನೆ ದೇಶ ಸ್ವಾತಂತ್ರ್ಯ ಪಡೆಯಿನ ಬೊಕ್ಕ ಕರಕುಶಲ ಬೊಕ್ಕ ಕುಶಲಕರ್ಮಿಲೆಗ್ ಘೋಷಣೆ ಆಯಿನ ಮಲ್ಲ ಯೋಜನೆ ಆತ್ಂಡ್.

ಸ್ವಾತಂತ್ರ್ಯದ ಅಮೃತ ಮಹೋತ್ಸವ ಕಾಲಡ್ ವಿಶ್ವಕರ್ಮ ಸಮುದಾಯದ ಮೂಲ ಕಸುಬುಲೆನ ಪುನರುತ್ಥಾನಗ್ ಮೈಲಿಗಲ್ಲಾಯಿನ ಯೋಜನೆನ್ ಕೇಂದ್ರಸರ್ಕಾರ ಜಾರಿ ಮಲ್ಪುನೆನ್ ಮೆಚ್ಚೊಡಾಯಿನವು . ಆಧುನಿಕ ಜಗತ್ತ್ ಡ್ ಸಾಂಪ್ರದಾಯಿಕ ವೃತ್ತಿಲು ಆತಂಕಗ್ ತಿಕ್ ದ್ಂಡ್, ಈ ಯೋಜನೆರ್ದ್ ಕುಡ ಕುಲಕಸುಬುಲೆನ ಗತವೈಭವಗ್ ಪೋಯೆರೆ ಈ ಯೋಜನೆ ಸಹಕಾರಿ ಆತ್ಂಡ್.

ಪೇಂಟೆ ಬೊಕ್ಕ ಹಳ್ಳಿ ಪ್ರದೇಶಲೆನ 18 ಸಾಂಪ್ರದಾಯಿಕ ಕುಲಕಸುಬುಲು ಇಪ್ಪುನ ಈ ಯೋಜನೆದಡಿಟ್ಟ್ ಉಪಕರಣ ಸಾಧನಲೆನ ಕಿಟ್ ಪಡೆಯೆರೆ ರೂ. 15 ಸಾರ ಸಹಾಯಧನ, ಕೌಶಲ್ಯವರ್ಧನೆ ತರಬೇತಿ ಪಡೆಪುನಕ್ಲೆಗ್ ಪ್ರತಿ ದಿನೊಲ 500/- ರೂ ಶಿಷ್ಯವೇತನ, ಬೊಕ್ಕ 5 ವರ್ಷೊದ ಮುಟ್ಟ ಒಟ್ಟು 30 ಲಕ್ಷ ಕುಟುಂಬಗ್ ತರಬೇತಿ ಕೊರ್ಪುನ ಯೋಜನೆ ಉಂಡು. ಪಿಎಂ ವಿಶ್ವಕರ್ಮ ಪ್ರಮಾಣ ಪತ್ರ ಬೊಕ್ಕ ಗುರುತುದ ಚೀಟಿ ಕೊರ್ಪೆರ್.

ಬೇತೆ ಬೇತೆ ಹಂತಡ್ ಕೇವಲ ಶೇ. 5 ದಾತ್ ಬಡ್ಡಿ ದರಟ್ಟ್ ಸಬ್ಸಿಡಿದೊಟ್ಟಿಗೆ 1 ಲಕ್ಷ ರೂ. ಬೊಕ್ಕ 2 ಲಕ್ಷ ರೂ. ಮುಟ್ಟ ಸಾಲ ಸೌಲಭ್ಯ ಕೊರ್ಪುನೆತ್ತೊಟ್ಟಿಗೆ ಡಿಜಿಟಲ್ ವೈವಾಟ್ ಗ್ ಉತ್ತೇಜನ ಬೊಕ್ಕ ಮಾರ್ಕೆಟ್ ಗ್ ಬೆಂಬಲದಂಚಿನ ಸಕಾಯನ್ ಕೊರ್ಪುಂಡು.

ವಿಶ್ವ ಕರ್ಮ ಸಮುದಾಯದ ಔದ್ಯೋಗಿಕ ಬೊಕ್ಕ ಆರ್ಥಿಕ ಬುಲೆವಣಿಗೆಗ್ ಪೂರಕ ಆಯೆರೆ ಇಪ್ಪುನ ಈ ಯೋಜನೆ ಬಯೋಮೆಟ್ರಿಕ್ ಮುಖೇನ ನೋಂದಣಿ ಮಲ್ಪುನೆತ್ತೊಟ್ಟಿಗೆ ಅರ್ಹ ಫಲಾನುಭವಿಲು CSC ಕೇಂದ್ರಗ್ ಭೇಟಿ ಕೊರ್ಪುನ ಮುಖೇನ ಯೋಜನೆದ ಸದುಪಯೋಗ ಪಡೆಲೆ ಪಂದ್ ಕಾಮತ್ ಪಂಡೆರ್.

ಸುಬ್ರಹ್ಮಣ್ಯ: ಉಂತಾದಿತ್ತಿನ ಕಾರ್ ಡ್ ತೂ

ಸುಬ್ರಹ್ಮಣ್ಯ: ಕುಕ್ಕೆ ಸುಬ್ರಮಣ್ಯದ ಆದಿಸುಬ್ರಮಣ್ಯ ಸರ್ಪಸಂಸ್ಕಾರ ಯಾಗ ಶಾಲೆದ ಕೈತಲ್ ಉಂತಾದಿತ್ತಿನ ಕಾರ್ ಡ್ ತೂ ಪೊತ್ತಿನ ಘಟನೆ ಇನಿ ಬೊಲ್ಪುಗು ನಡತ್ಂಡ್.

ಬೆಂಗ್ಲೂರ್ ರ್ದ್ ಸರ್ಪಸಂಸ್ಕಾರಗ್ ಪಂದ್ ಕುಕ್ಕೆ ಸುಬ್ರಮಣ್ಯಗ್ ಬತ್ತಿನ ಒಂಜಿ ಕುಟುಂಬದಕ್ಲೆನ ಕಾರ್ ಉಂದಾತ್ಂಡ್.‌ ಈ ಕಾರ್ ಪೊತ್ತ್ ನೆನ್ ತೂಯಿನ ಸುಬ್ರಮಣ್ಯದ ಗಣೇಶ್ ಭಟ್ ಬೊಕ್ಕ ಕೈತಲ್ ದಕುಲು ಕೂಡ್ಲೆ ತನ್ನ ಸಮಯ ಪ್ರಜ್ಞೆರ್ದ್ fire extinguisher ನ್ ಗಲಸ್ ದ್ ತೂ ತೆಕ್ಕಾದೆರ್. ಅತ್ತಂದೆ ಈ ಕಾರ್ ದ ಪಿರವು ಸಾಲಾದ್ ಉಂತುದು ಇತ್ತಿನ ಸುಮಾರ್ 30 ರ್ದ್ ಎಚ್ಚ ಗಾಡಿಲು ತೂಟ್ಟ್ ಪೊತ್ತುನೆನ್ ತಪ್ಪಾದೆರ್.

ವರದಿ: ಗೋಪಿಚಂದನ್ ಕೆಎಸ್

ಮನುಷ್ಯತ್ವದ ಬಿಲೆನ್ ಬದ್ ಕ್ ಡ್ ತೋಜಾವರೆ ಕಲಾ ವಿಭಾಗದ ವಿಷಯಲೆನ ಅಧ್ಯಯನ ಮುಖ್ಯ: ಡಾ.ನಿಂಗಯ್ಯ

ಸುಬ್ರಹ್ಮಣ್ಯ: ಕಲಾ ವಿಭಾಗಡ್ ಓದಿನ ಎಚ್ಚಿನಕುಲು ಅಧಿಕಾರಿಲಾದಿಪ್ಪುನೆನ್ ಸಮಾಜಡ್ ನಮ ತೂಪುನ ಸತ್ಯ ಆತ್ಂಡ್. ನೈತಿಕ ಬೊಕ್ಕ ಮಾನವೀಯ ಮೌಲ್ಯನ್ ಬದುಕ್ ಡ್ ಅಳವಡಿಸಾಯೆರೆ ಕಲಾ ವಿಭಾಗದ ವಿಷಯಲೆನ ಅಧ್ಯಾಯನ ಮುಖ್ಯ. ಐಎಎಸ್ ಬೊಕ್ಕ ಐಪಿಎಸ್ ಮಲ್ತಿನ ಸುಮಾರ್ ಅಧಿಕಾರಿಲು ಕಲಾ ಕಲಾ ವಿಭಾಗಡ್ ಅಧ್ಯಯನ ಮಲ್ದೆರ್. ಅಂಚ ಇತ್ತ್ಂಡಲ ಕಲಾ ವಿಭಾಗದ ವಿಚಾರಲೆನ್ ಅಧ್ಯಯನ ಮಲ್ಪರೆ ನಮ್ಮ ಜೋಕುಲು ಜ್ಞಾನವಂತೆರಾತಿಜೆರ್ ಪನ್ಪುನ ತಪ್ಪು ತಿಳುವಳಿಕೆ ಇಪ್ಪುನವು ಬೇಜಾರ್ ದ ಸಂಗತಿ. ಇಂಚಿನ ವಿಚಾರನ್ ಬುಡ್ದು ಸರಕಾರಿ ಉದ್ಯೋಗ ಪಡೆಯೆರೆ ಕಲಾ ವಿಭಾಗದ ವಿಷಯನ್ ಅಧ್ಯಯನ ಮಲ್ಪುನವು ಎಡ್ಡೆ ಪಂದ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಕಾರ್ಯನಿರ್ವಹಣಾಧಿಕಾರಿ ಡಾ.ನಿಂಗಯ್ಯ ಪಂಡೆರ್.

ದ.ಕ.ಜಿಲ್ಲಾ ಸಮಾಜಶಾಸ್ತ್ರ ಉಪನ್ಯಾಸಕೆರೆನ ಸಂಘ ಕುಡ್ಲ, ದ.ಕ.ಜಿಲ್ಲಾ ಪದವಿಪೂರ್ವ ಕಾಲೇಜ್ ಲೆನ ಪ್ರಾಂಶುಪಾಲೆರೆನ ಸಂಘ ಕುಡ್ಲ ನೆತ್ತ ಒಟ್ಟುಸೇರಿಗೆಡ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಆಡಳಿತ ಸೇರಿನ ಎಸ್‌ಎಸ್‌ಪಿಯು ಕಾಲೇಜ್ ಡ್ ಬುಧಾರ ನಡೆತಿನ ಸಮಾಜಶಾಸ್ತ್ರ ಶೈಕ್ಷಣಿಕ ಕಾರ್ಯಾಗಾರ ಉದಿಪನ ಮಲ್ತ್ ದ್ ಪಾತೆರಿಯೆರ್.

ಪಿಯುಸಿ ವಾರ್ಷಿಕ ಪರೀಕ್ಷೆದ ಸಮಾಜಶಾಸ್ತ್ರ ವಿಷಯಡ್ 100 ಕ್ಕ್ 100 ಮಾರ್ಕ್ ಪಡೆಯಿನ ಜಿಲ್ಲೆದ ಬೇತೆ ಬೇತೆ ಕಾಲೇಜ್ ಲೆನ ಕಲ್ಪಾರ್ಥಿಲೆನ್ ಬೊಕ್ಕ ನಿವೃತ್ತ ಪ್ರಾಂಶುಪಾಲೆರ್ ಯೂಸುಫ್ ಮೆರೆಗ್ ಸನ್ಮಾನ ಮಲ್ತೆರ್.

ದ.ಕ ಜಿಲ್ಲಾ ಪ್ರಾಂಶುಪಾಲೆರ್ ಸಂಘದ ಅಧ್ಯಕ್ಷೆರ್ ವಿಠಲ್ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದಿತ್ತೆರ್. ಈ ಲೇಸ್ ಗ್ ಮಲ್ಲ ಬಿನ್ನೆರಾದ್ ಸಂಪನ್ಮೂಲ ವ್ಯಕ್ತಿ ಕುಡ್ಲ ವಿ.ವಿದ ನಿವೃತ್ತ ಇಂಗ್ಲೀಷ್ ಪ್ರಾಧ್ಯಾಪಕೆರ್ ಡಾ.ರವಿಶಂಕರ್ ಭಟ್, ಕುಡ್ಲ ವಿ.ವಿದ ಮಹಿಳಾ ಅಧ್ಯಯನ ಕೇಂದ್ರದ ನಿರ್ದೇಶಕಿ ಡಾ.ಅನಿತಾ ರವಿಶಂಕರ್, ಸುಬ್ರಹ್ಮಣ್ಯದ ಎಸ್‌ಎಸ್‌ಪಿಯು ಕಾಲೇಜ್ ದ ಪ್ರಾಂಶುಪಾಲೆರ್ ಸೋಮಶೇಖರ ನಾಯಕ್ ಪಾಲ್ ಪಡೆದಿತ್ತೆರ್.

ಈ ಪೊರ್ತುಡು ದ.ಕ.ಜಿಲ್ಲಾ ಸಮಾಜಶಾಸ್ತ್ರ ಉಪನ್ಯಾಸಕರೆನ ಸಂಘದ ಅಧ್ಯಕ್ಷೆರ್ ವಸಂತ ಕುಮಾರ್.ಡಿ, ಕಾರ್ಯದರ್ಶಿ ಮಧು.ಡಿ, ಉಪಾಧ್ಯಕ್ಷೆರ್ ಲಕ್ಷ್ಮೀಶ ಕೆ.ಪಿ, ಕೋಶಾಧಿಕಾರಿ ಸುಬ್ರಹ್ಮಣ್ಯ ಭಟ್.ವಿ, ಎಸ್‌ಎಸ್‌ಪಿಯು ಕಾಲೇಜ್ ದ ಸಮಾಜಶಾಸ್ತ್ರ ಉಪನ್ಯಾಸಕಿ ಸುಧಾ ಇತ್ತೆರ್.

ವರದಿ: ಗೋಪಿಚಂದನ್ ಕೆಎಸ್

ಬೊಣ್ಯಕುಕ್ಕು ಅಂಗನವಾಡಿ ಕೇಂದ್ರಡ್ ಎರೆಹುಳ ಘಟಕ ಉದಿಪನ ಲೇಸ್

ವೀರಕಂಭ ಗ್ರಾಮ ಪಂಚಾಯತ್, ಶಿಶು ಅಭಿವೃದ್ಧಿ ಯೋಜನೆ ವಿಟ್ಲ, ಅಂಗನವಾಡಿ ಕೇಂದ್ರ ಬೊಣ್ಯಕುಕ್ಕು ಬೊಕ್ಕ ಸ್ತ್ರೀ ಶಕ್ತಿ ಗುಂಪು ಬೊಣ್ಯಕುಕ್ಕು ನೆತ್ತ ಒಟ್ಟುಸೇರಿಗೆಡ್, ಬೊಣ್ಯಕುಕ್ಕು ಅಂಗನವಾಡಿ ಕೇಂದ್ರಡ್ ಎರೆಹುಳ ಘಟಕ ಉದಿಪನ ಲೇಸ್, ಪೋಷಣ್ ಮಾಸಾಚರಣೆ, ಪೌಷ್ಟಿಕ ಆಹಾರ ಶಿಬಿರ ಬೊಕ್ಕ ಪ್ರಾತ್ಯಕ್ಷಿಕೆ ಲೇಸ್ ನಡತ್ಂಡ್.

ಈ ಲೇಸ್ ವೀರಕಂಭ ಗ್ರಾಮ‌ಪಂಚಾಯತ್ ದ ಗುರ್ಕಾರ್ದಿ ಲಲಿತಾ ಮೆರೆನ ಗುರ್ಕಾರ್ಮೆಡ್ ನಡತ್ಂಡ್. ಈ ಪೊರ್ತುಡು ವೀರಕಂಭ ಗ್ರಾಮ‌ಪಂಚಾಯತ್ ದ ಉಪಾಧ್ಯಕ್ಷೆರ್ ಜನಾರ್ಧನ ಪೂಜಾರಿ, ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ನಿಶಾಂತ್, ನಿಕಟಪೂರ್ವ ಅಧ್ಯಕ್ಷೆರ್ ದಿನೇಶ್, ನಿಕಟಪೂರ್ವ ಉಪಾಧ್ಯಕ್ಷೆರ್ ಶೀಲಾ ನಿರ್ಮಲಾ ವೇಗಸ್ , ಪಂಚಾಯತ್ ಸದಸ್ಯೆರ್ ಸಂದೀಪ್ ಪಾಲ್ ಪಡೆದಿತ್ತೆರ್.

ಎರೆಹುಳ ಗೊಬ್ಬರ ಮಲ್ಪುನ ಪ್ರಗತಿಪರ ಕೃಷಿಕೆ, ಮಾಜಿ ಸೈನಿಕೆ ರಮೇಶ್ ನೂಜಿಪ್ಪಾಡಿ ಮಂಚಿ ಮೇರ್ ಸಂಪೂರ್ಣ ಪೊಲಬು ಕೊರಿಯೆರ್. ಸಾಂತ್ವನಾ ಕೇಂದ್ರ ಬಂಟ್ವಾಳದ ಆಪ್ತ ಸಮಾಲೋಚಕೆರ್ ವಿದ್ಯಾ ಮೇರ್ ಸಾಂತ್ವನ ಕೇಂದ್ರದ ಬಗೆಟ್ಟ್ ಪೊಲಬು ಕೊರಿಯೆರ್. ಹಿರಿಯ ಮೇಲ್ವಿಚಾರಕಿ ರೂಪಕಲಾ ಮೇರ್ ಪೋಷಣ್ ಮಾಸಾಚರಣೆ, ಪೌಷ್ಟಿಕ ಆಹಾರದ ಮಹತ್ವದ ಬಗೆಟ್ಟ್ ಸಂಪೂರ್ಣ ಪೊಲಬು ಕೊರಿಯೆರ್.

ಬಾಲ ವಿಕಾಸ ಸಮಿತಿದ ಅಧ್ಯಕ್ಷೆರ್ ಕಮರುನ್ನೀಸ, ಸಮಿತಿದ ಸದಸ್ಯೆರ್, ಸಂಜೀವಿನಿ ಒಕ್ಕೂಟದ MBK ಮಲ್ಲಿಕಾ, LCRP ಜಯಂತಿ, ಆಶಾ ಕಾರ್ಯಕರ್ತೆ ಮೋಹಿನಿ, ಸ್ತ್ರೀ ಶಕ್ತಿ ಗುಂಪುದ ಸದಸ್ಯೆರ್, ಅಂಗನವಾಡಿ ಸಹಾಯಕಿ ಸವಿತ ಬೊಕ್ಕ ಸಾರ್ವಜನಿಕೆರ್ ಇತ್ತೆರ್. ಅಂಗನವಾಡಿ ಕಾರ್ಯಕರ್ತೆ ಶಶಿಕಲಾ ಲೇಸ್ ದ ಸುಧಾರಿಕೆ ಮಲ್ತೆರ್.