September 2023

Uncategorized ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಸುಬ್ರಹ್ಮಣ್ಯ ಹಾಲು ಉತ್ಪಾದಕ ಮಹಿಳಾ ಸಹಕಾರಿ ಸಂಘದ ಸಾಮಾನ್ಯ ಸಭೆ, ಬೋನಸ್ ಘೋಷಣೆ

Sep 21, 2023

ಸುಬ್ರಹ್ಮಣ್ಯ ಹಾಲು ಉತ್ಪಾದಕ ಮಹಿಳಾ ಸಹಕಾರಿ ಸಂಘದ 2020-23 ನೇ ಸಾಲ್ ದ ಸಾಮಾನ್ಯ ಸಭೆ ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಸಭಾಂಗಣಡ್ ಸೋಮಾರ ನಡತ್ಂಡ್.

ಈ ಸಭೆತ್ತ ಗುರ್ಕಾರ್ಮೆನ್ ಹಾಲು ಉತ್ಪಾದಕರ ಮಹಿಳಾ ಸಹಕಾರಿ ಸಂಘದ ಗುರ್ಕಾರ್ದಿ ಶೋಭಾ ನಲ್ಲೂರಾಯ ಒಯಿಸೊಂದಿತ್ತೆರ್.

ಈ ವರ್ಷ ಮಹಿಳಾ ಸಹಕಾರಿ ಸಂಘಗ್ 202606.17 ರೂ. ಲಾಭಾಂಶ ಬೈದ್ಂಡ್. ಅಂಚೆನೆ ಪ್ರತಿ ಲೀಟರ್ ಗ್ 1.32 ರೂ.ದಲೆಕ್ಕ ಬೋನಸ್ ನ್ ಘೋಷಣೆ ಮಲ್ತೆರ್. ಅತ್ತಂದೆ ಸಂಘದ ಪ್ರತಿ ಸದಸ್ಯೆರೆಗ್ 10 ಶೇಕಡ ಡಿವಿಡೆಂಡ್ ನ್ ಈ ಪೊರ್ತುಡು ಕೊರ್ಪು ಪಂದ್ ಘೋಷಣೆ ಮಲ್ತೆರ್. ಸಂಘಗ್ ಪೇರ್ ಪಾಡುನ ಸದಸ್ಯೆರೆನ ಜೋಕುಲೆಗ್ ಎಸ್. ಎಸ್. ಎಲ್. ಸಿ., ಪಿ.ಯು.ಸಿ.ಡ್ ಎಚ್ಚ ಮಾರ್ಕ್ ಪಡೆಯಿನಕ್ಲೆಗ್ ಮಾನಾದಿಗೆ ಮಲ್ತೆರ್.

ಚಾವಡಿಡ್ ಇತ್ತಿನ ವಿಸ್ತರಣಾಧಿಕಾರಿ ಹರೀಶ್ ಕುಮಾರ್ ಸದಸ್ಯೆರೆಗ್ ತಿಕುನ ಸವಲತ್ತುಲೆನ ಬಗೆಟ್ಟ್ ಪೊಲಬು ಕೊರಿಯೆರ್. ಅಂಚೆನೆ ಶುದ್ಧ ಪೇರ್ ಉತ್ಪಾದನೆ, ಪಶು ಸಾಕಾಣಿಕೆ, ಸಮಸ್ಯೆಲೆನ ಬಗೆಟ್ಟ್ ಪೊಲಬು ಕೊರಿಯೆರ್. ಸುಬ್ರಹ್ಮಣ್ಯ ಮಹಿಳಾ ಸಹಕಾರಿ ಸಂಘ ಪೊರ್ಲುಡೇ ಬೇಲೆ ಮಲ್ಪುನ ಬಗೆಟ್ಟ್ ತೆರಿಪಾಯೆರ್. ಕಾರ್ಯದರ್ಶಿ ಪುಷ್ಪ ವರದಿ ಬೊಕ್ಕ ಲೆಕ್ಕಪರಿಶೋಧನಾ ವರದಿನ್ ಓದಿಯೆರ್.

ಈ ಪೊರ್ತುಡು ಸಂಘದ ಉಪಾಧ್ಯಕ್ಷೆರ್ ಪ್ರೇಮ ಎನ್ ಬಿ, ನಿರ್ದೇಶಕೆರ್ ಲಲಿತ, ಸುಮಿತ್ರ, ಅಮಣ್ಣಿ, ಕಮಲ, ಲತಾ ಪಿ, ಲಲಿತ ಎನ್, ಭವ್ಯ, ಹರಿಣಾಕ್ಷಿ, ಸೀತಮ್ಮ ಪಾಲ್ ಪಡೆದಿತ್ತೆರ್. ಸವಿತಾ ಭಟ್ ಪ್ರಾರ್ತನೆ ಮಲ್ತೆರ್. ಶೋಭಾ ನಲ್ಲೂರಾಯ ಎದ್ಕೊನಿಯೆರ್. ಹೇಮಾವತಿ ಸೊಲ್ಮೆ ಸಂದಾಯೆರ್.

ವರದಿ: ಗೋಪಿಚಂದನ್ ಕೆಎಸ್

ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಮೋಜು ಮಸ್ತಿದ ತಾಣವಾಯಿನ ಗುಜ್ಜರಕೆರೆ: ಪ್ರಧಾನಿ ಕಚೇರಿರ್ದ್ ಸರಿಯಾಯಿನ ಕ್ರಮ ದೆತೊನಿಯೆರೆ ಸಂಬಂಧಪಟ್ಟಿನ ಇಲಾಖೆಗ್ ಸೂಚನೆ

Sep 21, 2023

ಕುಡ್ಲ: ಜಿಲ್ಲೆದ ಸುಮಾರಾತ್ ಕೆರೆಕ್ಲ್ ನೆಟ್ಟ್ ಒಂಜಾಯಿನ ಕುಡ್ಲ ಪೇಂಟೆದ ಗುಜ್ಜರಕೆರೆತ್ತ ರಕ್ಷಣೆಗ್ ಪ್ರಧಾನಿ ಕಚೇರಿಗ್ ಬಿನ್ನಾಪು ಮಲ್ತಿನ ಬಗೆಟ್ಟ್ ಸರಿಯಾಯಿನ ಕ್ರಮ ದೆತೊನಿಯೆರೆ ಸಂಬಂಧಪಟ್ಟಿನ ಇಲಾಖೆಗ್ ಪ್ರಧಾನಿ ಕಚೇರಿ ಸೂಚನೆ ಕೊರ್ತುಂಡು.

ಗುಜ್ಜರಕೆರೆ ತೀರ್ಥ ಸಂರಕ್ಷಣಾ ವೇದಿಕೆ ಸಂದಾಯಿನ ಬಿನ್ನಾಪುನ್ ಸ್ವೀಕಾರಿಸಾಯಿನ ಪ್ರಧಾನಿ ಕಚೇರಿ ಸರಿಯಾಯಿನ ಕ್ರಮಕ್ಕ್ ಕುಡ್ಲ ತಹಶಿಲ್ದಾರ್ ಗ್ ಪತ್ರ ಬರೆತ್ಂಡ್.‌ ಆಯಿನಂಚೆನೆ ತಹಶಿಲ್ದಾರೆರ್ ಕುಡ್ಲ ಸ್ಮಾರ್ಟ್ ಸಿಟಿ ವ್ಯವಸ್ಥಾಪಕ ನಿರ್ದೇಶಕೆರೆಗ್ ಪತ್ರ ಬರೆದ್ ದೂರುದಾರೆರೆಗ್ ಪ್ರತಿಕ್ರಿಯೆ ಕೊರೊಡು ಪಂದ್ ಕೇನೊಂದೆರ್.‌

ಈ ಕೆರೆಕ್ಕ್ ಐತಿಹಾಸಿಕ ಬೊಕ್ಕ ಧಾರ್ಮಿಕ ಮಹತ್ವ ಉಂಡು. ಕೈತಲ್ ದ ಅಂತರ್ಜಲ ಸಂಕ್ಷರಣೆದ ಅಗರ ಆತ್ಂಡ್. ಕೆಲವು ವರ್ಷೊಲೆನ ದುಂಬು ಈ ಕೆರೆತ್ತ ಅಭಿವೃದ್ಧಿ ಕಾರ್ಯಲು ಸ್ಮಾರ್ಟ್ ಸಿಟಿ ಯೋಜನೆದಡಿಟ್ಟ್ ನಡತ್ ದ್ಂಡ್. ಆಂಡ ಕೈತಲ್ ದಕ್ಲೆನ ಬೊಕ್ಕ ಗುಜ್ಜರಕೆರೆ ತೀರ್ಥ ಸಂರಕ್ಷಣಾ ವೇದಿಕೆದ ಆಶಯಗ್ ಪೂರಕವಾದ್ ಅಭಿವೃದ್ಧಿ ಕಾರ್ಯಲು ನಡತಿಜಿ. ಕೆರೆತ್ತ ಪರಿಸರ ಇತ್ತೆ ಮೋಜು ಮಸ್ತಿದ ತಾಣವಾದ್ ಬದಲಾತ್ಂಡ್ ಪಂದ್ ವೇದಿಕೆದ ಕಾರ್ಯದರ್ಶಿ ನೇಮು ಕೊಟ್ಟಾರಿ ಪ್ರಧಾನಿ ಕಚೇರಿಗ್ ಬರೆಯಿನ ಪತ್ರಡ್ ಆರೋಪ ಮಲ್ದೆರ್.

ಸ್ಮಾರ್ಟ್ ಸಿಟಿ ಯೋಜನೆದಡಿಟ್ಟ್ ಕೆರೆ ಅಭಿವೃದ್ಧಿ ಇಂಚ ತೂನಗ ಪ್ರವಾಸಿ ತಾಣದಲೆಕ್ಕ ತೂಜಿಂಡಲ ಕೆರೆತ್ತ ಧಾರ್ಮಿಕ, ಐತಿಹಾಸಿಕ ಮಹತ್ವಗ್ ಪೂರಕವಾದ್ ಅಭಿವೃದ್ಧಿ ಕಾರ್ಯಲು ನಡತಿಜಿ. ನೀರ್ ನ್ ಶುದ್ದ ಮಲ್ಪುನ ಬಗೆಟ್ಟ್ ಕ್ರಮ ದೆತೊಂದಿಜೆರ್. ನೀರ್ ಡ್ ವಿಷಕಾರಿ ಅಂಶಲು ಇಪ್ಪುನವು ಬೊಕ್ಕ ಈ ನೀರ್ ಪರಿಯೆರೆ ಸರಿ ಆಯಿನವು ಅತ್ತ್ ಪಂದ್ ಪ್ರಯೋಗಾಲಯ ವರದಿ ಬೈದ್ಂಡ್ ಪಂದ್ ಪತ್ರಡ್ ತೆರಿಪಾದೆರ್.

ಎಂಕುಲು ಪ್ರಧಾನಿ ಕಚೇರಿಗ್ ಸಂದಾಯಿನ ದೂರು ಸ್ವೀಕಾರಿಸಾದೆರ್. ಅತ್ತಂದೆ ಸ್ಮಾರ್ಟ್ ಸಿಟಿ ವ್ಯವಸ್ಥಾಪಕ ನಿರ್ದೇಶಕೆರ್ ಸರಿಯಾಯಿನ ಕ್ರಮ ದೆತೊನಿಯೆರೆ ಉಲ್ಲೇಖ ಇಪ್ಪುನ ಅರ್ಜಿನ್ ವರ್ಗಾಯಿಸಾದೆರ್. ಅಂಚಾದ್ ಈ ಸರ್ತಿ ಆಂಡಲ ಸಂಬಂಧಪಟ್ಟಿನ ಇಲಾಖೆರ್ದ್ ಪೂರಕ ಸ್ವಂದನ ತಿಕ್ಕುನ ಭರವಸೆ ಉಂಡು ಪಂದ್ ನೇಮು ಕೊಟ್ಟಾರಿ ಪ್ರತಿಕ್ರಿಯೆ ಕೊರ್ತೆರ್.

ಇತ್ತೆದ ಮೋಜು ಮಸ್ತಿದ ತಾಣವಾಯಿನ ನಾಥ ಪಂಥದ ಯೋಗಿ ಗೋರಕ್ಷನಾಥೆರ್ದ್ ನಿರ್ಮಾಣ ಆಯಿನ ಈ ಕೆರೆತ್ತ ಪೊರ್ಲುನ್ ಪಿರ ಕನಯೆರೆ ಬೊಕ್ಕ ತೀರ್ಥದ ಪಾವಿತ್ರ್ಯತೆನ್ ಕಾಪಾಡಿಯೆರೆ ಸಂಬಂಧಪಟ್ಟಿನ ಇಲಾಖೆದ ಅಧಿಕಾರಿಲು ದುಂಬು ಬರೊಡು ಪಂದ್ ಪಂಡೆರ್.

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಮಹಿಳಾ ಮೀಸಲಾತಿ ಮಸೂದೆ ಮಂಡನೆ ಐತಿಹಾಸಿಕ ನಿರ್ಣಯ: ಶಾಸಕೆರ್ ಕಾಮತ್

Sep 21, 2023

ಸುಮಾರ್ ವರ್ಷದ ಬೇಡಿಕೆ ಆದಿತ್ತಿನ ಮಹಿಳಾ ಮೀಸಲಾತಿ ಮಸೂದೆ ಪೊಸ ಸಂಸತ್ ಭವನಡ್ ಮಂಡನೆ ಆತ್ಂಡ್. ಉಂದೊಂಜಿ ಐತಿಹಾಸಿಕ ನಿರ್ಣಯ ಪಂದ್ ಶಾಸಕೆರ್ ವೇದವ್ಯಾಸ್ ಕಾಮತ್ ಪಂಡೆರ್.

ಲೋಕಸಭೆ ಬೊಕ್ಕ ರಾಜ್ಯ ವಿಧಾನಸಭೆಟ್ಟ್ ಶೇಕಡಾ 33 ದಾತ್ ಸ್ಥಾನನ್ ಪೊಂಜೋವ್ ನಕ್ಲೆಗ್ ಮೀಸಲ್ ದೀವೊಡು ಪನ್ಪುನ ಉದ್ದೇಶ ಇಪ್ಪುನ ಈ ಐತಿಹಾಸಿಕ ಮಸೂದೆನ್ ಲೋಕಸಭೆಟ್ಟ್ ಮಂಡಿಸಾದೆರ್. ಉಂದು ಕಾಯ್ದೆಯಾದ್ ಜಾರಿ ಆಂಡ ರಾಜ್ಯ ಬೊಕ್ಕ ರಾಷ್ಟ್ರ ಮಟ್ಟದ ನೀತಿ ನಿರೂಪಣೆಡ್ ಪೊಂಜೋವ್ ಲು ಮಲ್ಲ ಮಟ್ಟಡ್ ಪಾಲ್ ಪಡೆಯೆರೆ ಸಹಕಾರಿ ಆಪುಂಡು.

ಸುಮಾರ್ ವರ್ಷೊಲೆನ ಬೇಡಿಕೆ ಆದಿತ್ತಿನ ಈ ಮಸೂದೆದ ಅಂಗೀಕಾರಗ್ ರಾಜಕೀಯ ಪಕ್ಷಲೆನ ಇಚ್ಛಾಶಕ್ತಿದ ಕೊರತೆ ಕಾರಣ ಆದಿತ್ತ್ಂಡ್. ಇತ್ತೆ ಮಹಿಳಾ ಮೀಸಲಾತಿದ ಬೇಡಿಕೆನ್ ಈಡೇರಿಸಾಯೆರೆ ಮೋದಿ ಸರ್ಕಾರನೇ ಬರೊಡಾಂಡ್. ದೇಶದ ಮತ ಅಪ್ಪೆನಕುಲು ಬೊಕ್ಕ ಸಹೋದರಿಯೆರೆನ ಪರವಾದ್ ನರೇಂದ್ರ ಮೋದಿಜೀ ಮುತಾಲಿಕೆದ ಕೇಂದ್ರ ಸರ್ಕಾರಗ್ ಉಡಲ್ ದಿಂಜಿನ ಸೊಲ್ಮೆಲು ಪಂದ್ ಶಾಸಕೆರ್ ಪಂಡೆರ್.

ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಸೆ.22: “ಯಾನ್ ಸೂಪರ್ ಸ್ಟಾರ್” ತುಳು ಪಿಕ್ಚರ್ ತುಳುನಾಡ್ ಡ್ ಬುಡುಗಡೆ

Sep 21, 2023

ಕುಡ್ಲ: “ಆನಂದ ಫಿಲಂಸ್ ಬೊಕ್ಕ ದಿ ಮಂಗಳೂರಿಯನ್ಸ್ ಲಾಂಛನಡ್ ರಾಮ್ ಶೆಟ್ಟಿ ಅರ್ಪಣೆ ಮಲ್ಪುನ, ದಯಾನಂದ ಶೆಟ್ಟಿ ನಿರ್ಮಾಣದ, ಸಂತೋಷ್ ಶೆಟ್ಟಿ ನಿರ್ದೇಶನಡ್ ತಯಾರಾಯಿನ “ಯಾನ್ ಸೂಪರ್ ಸ್ಟಾರ್” ತುಳು ಪಿಕ್ಚರ್ ಸೆ.22 ಕ್ಕ್ ತುಳುನಾಡ್ ಡ್ ಬುಡುಗಡೆ ಆಯೆರೆ ಉಂಡು” ಪಂದ್ ರಾಮ್ ಶೆಟ್ಟಿ ಪತ್ರಿಕಾಗೋಷ್ಠಿಡ್ ಪೊಲಬು ಕೊರ್ತೆರ್.

ಸಿಐಡಿ ದಯಾ ಖ್ಯಾತಿದ ದಯಾನಂದ ಶೆಟ್ರ್ ಪಾತೆರ್ದ್, “ಹಿಂದಿ ಪಿಕ್ಚರ್ ಬೊಕ್ಕ ಧಾರಾವಾಹಿ ಕ್ಷೇತ್ರಡ್ ಯಾನ್ ಕರಿನ 25 ವರ್ಷೊದಿಂಚ ಬೆನೊಂದು ಉಲ್ಲೆ. ಯಾನ್ ಒಡೇ ಪೊಂಡಲ ತುಳು ಪಿಕ್ಚರ್ ಯಾಪ ಮಲ್ಪುವರ್ ಪಂದ್ ಕೇನೊಂದು ಇತ್ತೆರ್. ಇತ್ತೆ ಯಾನ್ ನಟನೆ ಮಲ್ತಿನ ಯಾನ್ ಸೂಪರ್ ಸ್ಟಾರ್ ತುಳು ಪಿಕ್ಚರ್ ರಿಲೀಸ್ ಗ್ ತಯಾರಾತ್ಂಡ್. ಸುಕ್ರಾರ ಬುಡುಗಡೆ ಆಪುಂಡು. ಮೇಕಿಂಗ್, ನಿರ್ದೇಶನ ಮಾತೆಟ್ಲಾ ಗ್ರ್ಯಾಂಡ್ ಆಯಿನ ಪಿಕ್ಚರ್ ನ್ ಖಂಡಿತಾ ತುಳುವೆರ್ ಇಷ್ಟಪಡೆಪ್ಪೆರ್ ಪನ್ಪುನ ವಿಶ್ವಾಸ ಉಂಡು” ಪಂದ್ ಪಂಡೆರ್.

ನಟೆ ಹರೀಶ್ ವಾಸು ಶೆಟ್ಟಿ ಪಾತೆರ್ದ್, “ಯಾನ್ ಸೂಪರ್ ಸ್ಟಾರ್ ಪಿಕ್ಚರ್ ಕುಡ್ಲದ ರೂಪವಾಣಿ, ಭಾರತ್ ಸಿನಿಮಾಸ್, ಪಿವಿಆರ್, ಸಿನಿಪೊಲಿಸ್, ಒಡಿಪುಡ್ ಕಲ್ಪನ, ಮಣಿಪಾಲಡ್ ಐನಾಕ್ಸ್, ಭಾರತ್ ಸಿನಿಮಾಸ್, ಪಡ್ಡೆದ್ರಡ್ ಭಾರತ್ ಸಿನಿಮಾಸ್, ಕಾರ್ಲಡ್ ರಾಧಿಕಾ, ಪ್ಲಾನೆಟ್, ಬೊಲ್ತೇರ್ ಡ್ ಭಾರತ್, ಸುರತ್ಕಲ್ ಡ್ ನಟರಾಜ್, ಸಿನಿಗ್ಯಾಲಕ್ಸಿ, ಪುತ್ತೂರುಡ್ ಭಾರತ್ ಸಿನಿಮಾಸ್, ಸುಳ್ಯಡ್ ಸಂತೋಷ್ ಚಿತ್ರಮಂದಿರಡ್ ಪಿಕ್ಚರ್ ಬುಡುಗಡೆ ಆಪುಂಡು. ಸೆನ್ಸಾರ್ ಡ್ ಯು ಎ ಸರ್ಟಿಫಿಕೇಟ್ ಪಡೆಯಿನ ಪಿಕ್ಚರ್ ಸೆನ್ಸಾರ್ ಮಂಡಳಿರ್ದ್ ಮೆಚ್ಚುಗೆ ಪಡೆತ್ಂಡ್. ತುಳು ಸಿನಿಮಾರಂಗಗ್ ಯಾನ್ ಸೂಪರ್ ಸ್ಟಾರ್ ಮುಖೇನ ಒಂಜಿ ಸದಭಿರುಚಿತ್ತ ಪಿಕ್ಚರ್ ತಿಕ್ಕುಂಡು. ಕುಟುಂಬ ಸಮೇತೆರಾದ್ ಈ ಪಿಕ್ಚರ್ ನ್ ತೂವೊಲಿ” ಪಂದ್ ಪಂಡೆರ್.

ಕುಸಲ್ದರಸೆ ನವೀನ್ ಡಿ. ಪಡೀಲ್ ಪಾತೆರ್ದ್, “ಒಂಜಿ ಎಡ್ಡೆ ಕಥೆ, ನಿರ್ದೇಶನ ಇಪ್ಪುನ ಯಾನ್ ಸೂಪರ್ ಸ್ಟಾರ್ ಪಿಕ್ಚರ್ ಸೆ.22 ಕ್ಕ್ ತುಳುನಾಡ್ ದ ಇಡೀ ಜಿಲ್ಲೆಡ್ ಬುಡುಗಡೆ ಆಯೆರೆ ಉಂಡು. ಇತ್ತೆನೇ ಬೊಂಬೈ, ಪೂಣೆ ಬೊಕ್ಕ ಸುಮಾರ್ ಕಡೆಟ್ಟ್ ಪಿಕ್ಚರ್ ದ ಪ್ರೀಮಿಯರ್ ಶೋ ನಡತ್ ದ್ಂಡ್. ಪ್ರೇಕ್ಷಕೆರ್ದ್ ಮೆಚ್ಚುಗೆ ಪಡೆತ್ಂಡ್. ಬೆಂಗ್ಲೂರು ಬೊಕ್ಕ ಗಲ್ಫ್ ದೇಶಡ್ ಪಿಕ್ಚರ್ ಬುಡುಗಡೆಗ್ ತಯಾರಿ ನಡತೊಂದು ಉಂಡು” ಪಂದ್ ಪಂಡೆರ್.

ಒಡಿಪು ಸುತ್ತಮುತ್ತ ಒಂಜೇ ಹಂತಡ್ 25 ದಿನತ್ತ ಕಾಲ ಯಾನ್ ಸೂಪರ್ ಸ್ಟಾರ್ ಪಿಕ್ಚರ್ ದ ಶೂಟಿಂಗ್ ನಡತ್ ದ್ಂಡ್. ಮುಖ್ಯವಾದ್ ಮುಲ್ಪ ಜನಮನ್ನಣೆ ಪಡೆದಿಪ್ಪು‌ನ ಸಿಐಡಿ ಧಾರಾವಾಹಿದ ಬೊಂಬೈ ಕಲಾವಿದೆರ್ ಈ ಸಿನಿಮಾಡ್ ಮುಖ್ಯ ಪಾತ್ರಡ್ ಅಭಿನಯ ಮಲ್ದೆರ್. ದಯಾನಂದ ಶೆಟ್ಟಿ, ಹರೀಶ್ ವಾಸು ಶೆಟ್ಟಿ, ಸಾಯಿ ಬಲ್ಲಾಲ್ ನೊಟ್ಟಿಗೆ, ತುಳುನಾಡ್ ದ ಪುಗರ್ತೆದ ಕಲಾವಿದೆರ್ ಕುಸೇಲ್ದರಸೆ ನವೀನ್ ಡಿ ಪಡೀಲ್, ನವರಸ ರಾಜೆ ಭೋಜರಾಜ ವಾಮಂಜೂರು, ಮಾನಸಿ ಸುಧೀರ್, ಅನು ಷಾ, ಅಶೋಕ್ ಪಕ್ಕಳ, ಮಾಸ್ಟರ್ ಅತಿಶ್ ಶೆಟ್ಟಿ, ಮಾಸ್ಟರ್ ಅರುಷ್ ಯು ಪೂಜಾರಿ, ಕು. ಶ್ರೀಯಾ ಹೆಗ್ಡೆ ಈ ಪಿಕ್ಚರ್ ಡ್ ಉಲ್ಲೆರ್. ಸಂತೋಷ್ ಶೆಟ್ಟಿ ಮೆರೆನ ಕಥೆಕ್ಕ್ ಸಚಿನ್ ಶೆಟ್ಟಿ ಕುಂಬಳೆ ಸಂಭಾಷಣೆ ಬರೆತೆರ್. ಚಿತ್ರಕತೆ: ಅಂಕಣ ಜೋಷಿ, ಸಂತೋಷ್ ಶೆಟ್ಟಿ, ಸಾಹಿತ್ಯ ಪದ್ಯ, ಸಂಗೀತ: ವಿ ಮನೋಹರ್, ಗುರುಕಿರಣ್ ಈ ಪಿಕ್ಚರ್ ಗ್ ಪದ್ಯ ಪಂತೆರ್. ಹಿನ್ನಲೆ ಸಂಗೀತ: ಸಂಜಯ್ ವಾಂದ್ರೇಕರ್, ಕ್ಯಾಮರಾ: ಕೃಷ್ಣರಾಜ್ ಕೋಟ್ಯಾನ್, ಸಾಹಸ: ಆನಂದ ಶೆಟ್ಟಿ, ಸಹ ನಿರ್ದೇಶನ ರಾಮ್ ದಾಸ್ ಸಸಿಹಿತ್ಲು, ಪ್ರೈಡ್ ಸುಬ್ರಹ್ಮಣ್ಯ, ಎಕ್ಸಿಕ್ಯೂಟಿವ್ ಪ್ರೊಡ್ಯುಸರ್ ಸತೀಶ್ ದುಬೆ, ಕ್ರಿಯೇಟಿವ್ ಡೈರಕ್ಟರ್: ಕ್ರಿಸ್ತಬೆಲ್ಲೆ ಡಿ ಸೋಜ, ಪ್ರೊಡಕ್ಷನ್ ಹೆಡ್ಡ್: ಚಂದ್ರಕಾಂತ್ ಭಂಡಾರಿ, ನಿರ್ದೇಶನ: ಸಂತೋಷ್ ಶೆಟ್ಟಿ ಮಲ್ದೆರ್.

ಯಾನ್ ಸೂಪರ್ ಸ್ಟಾರ್ ಪುದರ್ ದಲೆಕ್ಕನೇ ಉಂದು ತುಳುಟ್ಟ್ ಪೊಸ ಬಗೆತ್ತ ಪಿಕ್ಚರ್. ಪ್ರೇಕ್ಷಕೆರೆನ ನಾಡಿ ಮಿಡಿತನ್ ತೆರಿದ್ ನಿರ್ದೇಶಕೆರ್ ಮುಲ್ಪ ಪಿಕ್ಚರ್ ದ ಕತೆನ್ ಕೊನೊಪೆರ್. ಪಿಕ್ಚರ್ ಡ್ ಹಾಸ್ಯಲ ಉಂಡು, ಸಂದೇಶಲ ಉಂಡು.ಪ್ರೇಕ್ಷಕೆರೆಗ್ ಪಿಕ್ಚರ್ ದ ಬಗೆಟ್ಟ್ ಮಸ್ತ್ ಕುತೂಹಲ ಉಂಡು. ಆನಂದ್ ಫಿಲಂಸ್ ಡ್ ಇಪ್ಪುನ ಪಿಕ್ಚರ್ ಲು ಯಶಸ್ವಿ ಪ್ರದರ್ಶನನ್ ಆಯಿರ್ನೆದಾವೆರ ಪ್ರೇಕ್ಷಕೆರ್ ಯಾನ್ ಸೂಪರ್ ಸ್ಟಾರ್ ಸಿನಿಮಾದ ಬಗೆಟ್ಟ್ ಮಸ್ತ್ ನಿರೀಕ್ಷೆ ದೀವೊಂದೆರ್. ಪತ್ರಿಕಾಗೋಷ್ಠಿಡ್ ದಯಾನಂದ ಶೆಟ್ಟಿ, ಹರೀಶ್ ವಾಸು ಶೆಟ್ಟಿ, ನವೀನ್ ಡಿ. ಪಡೀಲ್, ನಿರ್ದೇಶಕೆರ್ ಸಂತೋಷ್ ಶೆಟ್ಟಿ, ರಾಮ್ ಶೆಟ್ಟಿ, ಕಲಾ ನಿರ್ದೇಶಕೆರ್ ತಮ್ಮ ಲಕ್ಷ್ಮಣ ಇತ್ತೆರ್.

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಸೆ.24: 9 ವಂದೇ ವಂದೇ ಭಾರತ್

Sep 21, 2023

ಸೆ‌.24 ಕ್ಕ್ ದೇಶದ ಬೇತೆ ಬೇತೆ ವಿಭಾಗಡ್ ಸಂಚಾರ ಮಲ್ಪುನ ಒಟ್ಟು 9 ವಂದೇ ಭಾರತ್ ರೈಲ್ ಗ್ ಪ್ರಧಾನಿ ನರೇಂದ್ರ ಮೋದಿ ಚಾಲನೆ ಕೊರಿಯೆರೆ ಉಲ್ಲೆರ್.

ಹೈದರಾಬಾದ್-ಬೆಂಗ್ಲೂರ್, ಚೆನ್ನೈ-ತಿರುನಲ್ವೇಲಿ, ವಿಜಯವಾಡ-ಚೆನ್ನೈ, ಪಟ್ನಾ-ಹೌರಾ, ರೌರ್ ಕೆಲಾ-ಪುರಿ, ಕಾಸ್ರೋಡು-ಅಲಪ್ಪುಳ- ತಿರುವನಂತಪುರಂ, ಜೈಪುರ-ಉದಯಪುರ, ರಾಂಚಿ-ಟಾಟಾ ನಗರ- ಕೋಲ್ಕತಾ, ಜಾಮಾನಗರ- ರಾಜ್ ಕೋಟ್- ಅಹಮದಾಬಾದ್ ಮಾರ್ಗಗ್ ಹಸಿರು ನಿಶಾನೆ ತೋಪಾದೆರ್. ಇತ್ತೆ ದೇಶಡ್ 25 ವಂದೇ ಭಾರತ್ ರೈಲ್ ಸಂಚಾರ ಮಲ್ಪುಂಡು.

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಇನಿ ಶಂಕರಾಚಾರ್ಯೆರೆನ ಪ್ರತಿಮೆ ಅನಾವರಣ

Sep 21, 2023

ಮಧ್ಯಪ್ರದೇಶಡ್ 2 ಸಾರ ಕೋಟಿ ರೂ. ಖರ್ಚಿಡ್ 108 ಅಡಿ ಎತ್ತರಡ್ ನಿರ್ಮಾಣ ಆಯಿನ ಆದಿ ಶಂಕರಾಚಾರ್ಯೆರೆನ ಪ್ರತಿಮೆ ಇನಿ ಅನಾವರಣ ಆಪುಂಡು.

ಈ ಪ್ರತಿಮೆ ಭೋಪಾಲ್ ದ ನರ್ಮದಾ ತುದೆತ್ತ ಬರಿಟ್ಟ್ ಇಪ್ಪುನ ಓಂಕಾರೇಶ್ವರ ಪ್ರದೇಶಡ್ ಉಂಡು. ಮುಲ್ಪದ ಸಿಎಂ ಶಿವರಾಜ್ ಸಿಂಗ್ ಚೌಹಾನ್ ಮೇರ್ ಈ ಪ್ರತಿಮೆನ್ ಅನಾವರಣ ಮಲ್ಪುವೆರ್. ಸೆ.18 ಕ್ಕ್ ನಡಪೊಡಾಯಿನ ಅನಾವರಣ ಲೇಸ್ ಭಾರೀ ಬರ್ಸದಾವೆರ ಇನಿ ನಡಪುಂಡು.

ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಬೊಲ್ತೆರ್ ಸುದ್ದಿ | Belthangady News

ಬೋಲ್ತೆರ್ ಡ್ ಎಚ್ಚ ಆಯಿನ ಕಾಡಾನೆ ದಾಳಿ | ಕ್ರಮ ದೆತೊನಿಯೆರೆ ರಕ್ಷಿತ್ ಶಿವರಾಂ ಉಸ್ತುವಾರಿ ಸಚಿವೆರೆಗ್ ಮನವಿ

Sep 21, 2023

ಬೋಲ್ತೆರ್ ತಾಲೂಕು ಡ್ ಕಾಡಾನೆ ಧಾಳಿ ಮಲ್ತ್ ದ್ ಕೃಷಿ ನಾಶ ಮಲ್ತೊಂದು ಉಂಡು, ಈ ಬಗೆಟ್ ಕ್ರಮ ದೆತೊನೊಡು ಪಂದ್ ಒತ್ತಾಯ ಮಲ್ತ್ ಜಿಲ್ಲಾ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್ ಮೆರೆಗ್ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ರಕ್ಷಿತ್ ಶಿವರಾಂ ಸೆ.20 ದಾನಿ ಮನವಿ ಸಲ್ಲಿಸಾಯೆರ್.

ಬೋಲ್ತೆರ್ ತಾಲೂಕುದ ಧರ್ಮಸ್ಥಳ, ಶಿಬಾಜೆ, ಮುಂಡಾಜೆ, ಕಡಿರುದ್ಯಾವರ, ಮಿತ್ತಬಾಗಿಲು, ಮಲವಂತಿಗೆ, ಚಾರ್ಮಾಡಿ, ನೆರಿಯ, ಪುದೆವೆಟ್ಟು ಗ್ರಾಮದ ರೈತೆರ್ ಕಾಡಾನೆ ಧಾಳಿ ರ್ದ್ ಲಕ್ಷಾಂತರ ರೂ ಕೃಷಿ ನಷ್ಟನ್ ಅನುಭವಿಸಾದೆರ್.

ಕಾಡಾನೆನ್ ನಿಯಂತ್ರಣ ಮಲ್ಪೆರೆ ಅರಣ್ಯ ಇಲಾಖೆಗೆ ಸರ್ಕಾರ ನಿರ್ದೇಶನ ಕೊರೊಡು. ಬೊಕ್ಕ ಆ್ಯಂಟಿ ಡಿಪ್ರೆಡೇಷನ್ ಕ್ಯಾಂಪನ್ನು (Anti depredation camp) ರಚಿಸಾದ್ ಸಿಬ್ಬಂದಿನ್ ನೇಮಕ ಮಲ್ತ್ ಗಸ್ತು ತಿರ್ಗೆರೆ ಗಾಡಿದ ವ್ಯವಸ್ಥೆನ್ ಮಲ್ಪೊಡು ಪಂದ್ ಸಚಿವೆರೆಗ್ ರಕ್ಷಿತ್ ಶಿವರಾಂ ವಿವರಣೆ ಕೊರಿಯೆರ್. ಈ ಪೊರ್ತುಡು ಜಿಲ್ಲಾಧಿಕಾರಿ ಮುಲ್ಲೈ ಮುಹಿಲನ್ ಇತ್ತೆರ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಮೊಸರು ಕುಡಿಕೆ ಲೆಕ್ಕಡ್ ಸಾರ್ವಜನಿಕ ಕಾರ್ಯಕ್ರಮ

Sep 21, 2023

ರೋಟರಿ ಸಮುದಾಯದಳ ಬೊಕ್ಕ ಶ್ರೀ ದುರ್ಗಾ ಫ್ರೆಂಡ್ಸ್ ಕ್ಲಬ್ (ರಿ) ಕೆಮ್ಮಣ್ಣು ನಿಟ್ಟೆ ನೆತ್ತ ಒಟ್ಟು ಸೇರಿಗೆಡ್ ಶ್ರೀ ಕೃಷ್ಣ ಜನ್ಮಾಷ್ಟಮಿ ಪ್ರಯುಕ್ತ 35 ನೇ ವರ್ಷದ ಮೊಸರು ಕುಡಿಕೆ ಆಚರಣೆದ ಲೆಕ್ಕಡ್ ಸಾರ್ವಜನಿಕ ಕಾರ್ಯಕ್ರಮ ಕೆಮ್ಮಣ್ಣು ಸರಕಾರಿ ಹಿರಿಯ ಪ್ರಾಥಮಿಕ ಶಾಲಾ ಆವರಣಡ್ ಇಂಚಿಪಗ್ ನಡತ್ಂಡ್.

5 ವರ್ಷರ್ದ್ ತಿರ್ತ್ ದ ಜೋಕ್ಲೆಗ್ ಮುದ್ದು ಕೃಷ್ಣ ಸ್ಪರ್ಧೆ, ಮಲ್ಲ ಜೋಕ್ಲೆಗ್, ಪೊಂಜೊವ್ ನಕ್ಲೆಗ್ ಬೊಕ್ಕ ಅಂಜೊವ್ ನಕ್ಲೆಗ್ ಬೇತೆ ಬೇತೆ ಪಂತೋಲು ನಡತ್ಂಡ್.

ಸಮಾರೋಪ ಸಭಾ ಕಾರ್ಯಕ್ರಮಡ್ SSLC ಬೊಕ್ಕ PUC ಡ್ 90% ಜಾಸ್ತಿ ಮಾರ್ಕ್ ದೆತ್ತಿನಕ್ಲೆಗ್ ಪ್ರತಿಭಾ ಪುರಸ್ಕಾರ ಕಾರ್ಯಕ್ರಮ ನಡತ್ಂಡ್.

ಲೇಸ್ ಡ್ ಜ್ಯೋತಿಷಿ ವೇದಮೂರ್ತಿ ಪ್ರಸನ್ನ ಆಚಾರ್ಯ ಧಾರ್ಮಿಕ ಉಪನ್ಯಾಸ ಮಲ್ತೆರ್. ಮಾತೃಸಂಸ್ಥೆ ರೋಟರಿ ಕ್ಲಬ್ ನಿಟ್ಟೆ ನೆತ್ತ ಗುರ್ಕಾರ್ಲು ರೋ. ಕೃಷ್ಣ ಪ್ರಸಾದ್, ರೋಟರಿ ಸಮುದಾಯದಳದ ಜಿಲ್ಲಾ ಪ್ರತಿನಿಧಿ ರೋ. ಕುಮಾರಸ್ವಾಮಿ ಕಳಸ, Zonal ಲೆಫ್ಟಿಂನೆಂಟ್ ಕಿರಣ್ ಶೆಟ್ಟಿ, ನಿಟ್ಟೆ ಗ್ರಾಮ ಪಂಚಾಯತ್ ಉಪಾಧ್ಯಕ್ಷೆರಾಯಿನ ನಿತಿನ್ ಸಾಲ್ಯಾನ್, ಸಭಾಪತಿ ಕೆ. ಅನಿಲ್ ಕುಮಾರ್, ನಿಟ್ಟೆ ರೈತ ಉತ್ಪಾದಕ ಸಂಸ್ಥೆದ ನಿರ್ದೇಶಕೆರ್ ಬೊಕ್ಕ ಪೂರ್ವ RCC ಜಿಲ್ಲಾ ಪ್ರತಿನಿಧಿ ವೆಂಕಟಕೃಷ್ಣ ಕುಮಾರ್, ಶಾಲಾಭಿವೃದ್ಧಿ ಸಮಿತಿದ ಗುರ್ಕಾರ್ಲು ಶ್ರೀಧರ ಆಚಾರ್ಯ ತೆಂಕುಮನೆ, ಸ್ಥಳೀಯ ಜನಪ್ರತಿನಿಧಿ ಬೊಕ್ಕ ಸಂಸ್ಥೆಯ ಕ್ರೀಡಾ ಕಾರ್ಯದರ್ಶಿ ಸಂತೋಷ ಶೆಟ್ಟಿ, ದುರ್ಗಾ ಫ್ರೆಂಡ್ಸ್ ಕ್ಲಬ್(ರಿ.) ಕೆಮ್ಮಣ್ಣು ನೆತ್ತ ಗುರ್ಕಾರ್ಲು ಸುರೇಶ ಆಚಾರ್ಯ, ಕಾರ್ಯದರ್ಶಿ ಸುಧಾಕರ ಮಡಿವಾಳ ಇತ್ತೆರ್.

ರೋಟರಿ ಜಿಲ್ಲೆ 3182 ಇದರ ನಿಕಟಪೂರ್ವ ಸಹಾಯಕ ರಾಜ್ಯಪಾಲೆರ್, ನಿಟ್ಟೆ ತಾಂತ್ರಿಕ ಸಂಸ್ಥೆದ ಪ್ರೊಫೆಸರ್ ರೋ. ಡಾ ಶಶಿಕಾಂತ ಕರಿಂಕ, ನಿವೃತ್ತ ಮುಖ್ಯ ಶಿಕ್ಷಕೆರ್ ರೋ. ಶ್ರೀ ಕೆ. ವಿಷ್ಣುಮೂರ್ತಿ ರಾವ್ ಬೊಕ್ಕ ಹಿರಿಯ ಕೃಷಿಕೆರ್, ಹೈನುಗಾರೆರ್ ಆಯಿನ ತೆಂಕುಮನೆ ವಾಸು ಆಚಾರ್ಯ ಮೊಕ್ಲೆಗ್ ಮನಾದಿಗೆ ನಡತ್ಂಡ್.

ಡಾ. ದಿಲೀಪ್ ಕುಮಾರ್, ಶ್ರೀ ಕೃಷ್ಣಾನಂದ ರಾವ್, ಡಾ. ರಘುನಂದನ್ ರಾವ್ ಬೊಕ್ಕ ಪ್ರಶಾಂತ್ ಕುಮಾರ್ ಹೊಳ್ಳ ಬತ್ತಿ ಬಿನ್ನೆರ್ ಬೊಕ್ಕ ಸಾಧಕೆರ್ನ ಪರಿಚಯ ಮಲ್ತೆರ್.

ಗುರ್ಕಾರೆರ್ ಪ್ರದೀಪ್ ಸುವರ್ಣ ಎದ್ಕೊಂದು, ಕಾರ್ಯದರ್ಶಿ ಪ್ರಕಾಶ್ ಸಾಲ್ಯಾನ್ ಸೊಲ್ಮೆ ಸಾಂದಾಯ ಮಲ್ತೆರ್. ಪೂರ್ವಾಧ್ಯಕ್ಷ ಸತೀಶ್ ಶೆಟ್ಟಿ ಲೇಸ್ ದ ಸುಧಾರಿಕೆ ಮಲ್ತೆರ್

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಅ.5: ಸಾರಿಗೆ ನೌಕರೆರೆನ ಪ್ರತಿಭಟನೆ

Sep 21, 2023

ಸುಮಾರ್ ಬೇಡಿಕೆನ್ ಈಡೇರಿಸಾಯೆರೆ ಒತ್ತಾಯ ಮಲ್ತ್ ದ್ ಕೆಎಸ್ ಆರ್ ಟಿಸಿ ನೌಕರೆರ್ ಅ.5 ಕ್ಕ್ ಬೆಂಗ್ಲೂರ್ ಡ್ ಪ್ರತಿಭಟನೆ ಮಲ್ಪರೆ ನಿರ್ಧಾರ ಮಲ್ದೆರ್.

ಸಂಬಳ ಎಚ್ಚದ ಪರಿಷ್ಕೃತ ಬಾಕಿನ್ ಕೊರೊಡು ಪಂದ್ ಎಲೆಕ್ಟ್ರಿಕ್ ಬಸ್ ನ್ ಸರ್ಕಾರಿ ನೌಕರೆರೆನ ನೇಮಕ ಮಲ್ಪುನ ಬಗೆಟ್ಟ್ ಸೇರಿನಂಚೆನೆ ಸುಮಾರ್ ಬೇಡಿಕೆನ್ ಮೊಕುಲು ಸರ್ಕಾರ ದುಂಬು ದೀತೆರ್. ಅತ್ತಂದೆ ಸಂಸ್ಥೆದ ಮಾತ ನೌಕರೆರ್ ಪ್ರತಿಭಟನೆಡ್ ಪಾಲ್ ಪಡೆಪುನೆರ್ದಾವೆರ ಅನಿ ಕೆಎಸ್ ಆರ್ ಟಿಸಿ ಬಸ್ ಸಂಚಾರ ಸಾಧ್ಯ ಇಜ್ಜಿ ಪಂದ್ ವರದಿ ಆತ್ಂಡ್.

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ