ಒಡಿಪು: ಮಾರ್ಗ ಕಡಪರೆ ಉಂತುದಿತ್ತಿನ ಪೊಂಜೋವ್ ಒರ್ತಿಗ್ ಬುಲೆರೋ ಗುದ್ದುದು ತೀರ್ ಪೋಯಿನ ಘಟನೆ ಇನಿ ಉಪ್ಪೂರು ಗ್ರಾಮದ ಕೆ.ಜಿ.ರೋಡ್ದಲ್ಲ ನಡತ್ಂಡ್.
ಈ ಘಟನೆಡ್ ಜಯಲಕ್ಷ್ಮೀ ಭಟ್ ತೀರ್ ಪೋಯೆರ್. ಗಾಡಿ ಗುದ್ದುದು ಪೆಟ್ಟಾಯಿನ ಮೆರೆನ್ ಮಣಿಪಾಲ ಆಸ್ಪತ್ರೆಡ್ ದಾಖಲ್ ಮಲ್ದೆರ್. ಅಲ್ಪ ಮೇರ್ ಮಧ್ಯಾಹ್ನ 12:45ತ ಸುಮಾರ್ ಗ್ ತೀರ್ ಪೋತೆರ್ ಪಂದ್ ಪೊಲೀಸೆರ್ ತೆರಿಪಾದೆರ್. ಈ ಬಗೆಟ್ ಬ್ರಹ್ಮಾವರ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಭಾರತ್ ಜೋಡೋ ಯಾತ್ರೆಡ್ ಪಾಲ್ ಪಡೆಯಿನ ಕಾಂಗ್ರೆಸ್ ಸಂಸದೆರ್ ಚೌಧರಿ ಸಂತೋಕ್ ಸಿಂಗ್ ಮೇರ್ ಹುಷಾರ್ದಾಂತೆ ತೀರ್ ಪೋಯಿನ ಘಟನೆ ಪಂಜಾಬ್ದ ಲೂಧಿಯಾನಡ್ ನಡತ್ಂಡ್.
ಕಾಂಗ್ರೆಸ್ ನಾಯಕೆರ್ ರಾಹುಲ್ ಗಾಂಧಿ ಕನ್ಯಾಕುಮಾರಿರ್ದ್ ಕಾಶ್ಮೀರ ಮುಟ್ಟ ಅಟ್ಟನೆ ಮಲ್ತಿನ “ಭಾರತ್ ಜೋಡೋ” ಯಾತ್ರೆಡ್ ಪಾಲ್ ಪಡೆಯಿನ ಸಂಸದೆರ್ ಚೌಧರಿ ಯಾತ್ರೆದ ಪೊರ್ತುಡು ಹುಷಾರ್ದಾಂತೆ ಆದಿತ್ತೆರ್. ಆಸ್ಪತ್ರೆಗ್ ಕೊನಂಡಲ ಚಿಕಿತ್ಸೆ ಸಮ ಆವಾಂದೆ ತೀರ್ ಪೋಯೆರ್.
ದಕ್ಷಿಣ ಅಮೆರಿಕಾದ ಅಲಬಾಮಾ ಬೊಕ್ಕ ಜಾರ್ಜಿಯಾ ರಾಜ್ಯಡ್ ಸುಂಟರಗಾಳಿ ಬತ್ತ್ದ್ ಭಾರೀ ನಷ್ಟ ಆತ್ಂಡ್.
ಗಾಳಿದ ಬಿರ್ಸ್ಗ್ ಕಟ್ವಾನೊಲು ಬೊಕ್ಕ ಮರಕ್ಕುಲು ಬೂರ್ದ್ಂಡ್. ಅತ್ತಂದೆ 9 ಜನ ತೀರ್ ಪೋದಿತ್ತ್ದ್, ನೂದೆಡ್ದ್ ಎಚ್ಚದ ಜನಕ್ಲೆಗ್ ಪೆಟ್ಟಾತ್ಂಡ್. ಮಸ್ತ್ ಕಡೆಟ್ಟ್ ಕರೆಂಟ್ ಪೋದಿತ್ತ್ದ್ ಜನಕುಲು ಕತ್ತಲೆಡ್ ಜೀವನ ಮಲ್ತೊಂದುಲ್ಲೆರ್.
ಕುಡ್ಲ: ತುಳು ಪಿಕ್ಚರ್ ದ ಪದ್ಯಗ್ ಪುಗರ್ತೆದ ಗಾಯಕಿ ಮಂಗ್ಲಿ ಸ್ವರ ಕೊರ್ತೆರ್.
ಮೇರ್ ಎ.ಆರ್ ಪ್ರೊಡಕ್ಷನ್ಸ್ ಬ್ಯಾನರ್ದಡಿಟ್ ಅರುಣ್ ರೈ ತೋಡಾರ್ ನಿರ್ಮಾಣದ, ಎಸ್.ವಿ.ಬಾಬು ರಾಜೇಂದ್ರ ಸಿಂಗ್ ನಿರ್ದೇಶನದ ‘ಬಿರ್ದ್ದ ಕಂಬುಲ’ ಬೊಕ್ಕ ‘ಕನ್ನಡದ ವೀರ ಕಂಬುಲ’ ಪಿಕ್ಚರ್ ಗ್ ಪದ ಪಂತೆರ್. ತುಳುತ ಕೆ.ಕೆ.ಪೇಜಾವರ, ಕನ್ನಡದ ರಘು ಶಾಸ್ತ್ರಿ ಮೆರೆನ ಸಾಹಿತ್ಯಗ್ ಕದ್ರಿ ಮಣಿಕಾಂತ್ ಸಂಗೀತ ಕೊರ್ತೆರ್. ತುಳುನಾಡ್ ದ ಪುಗರ್ತೆದ ಜಾನಪದ ಕ್ರೀಡೆ ಕಂಬುಲದ ಬಗೆಟ್ ತುಳು ಬೊಕ್ಕ ಕನ್ನಡಡ್ ಈ ಪಿಕ್ಚರ್ ನಿರ್ಮಾಣ ಆತ್ಂಡ್. ಈ ಪಿಕ್ಚರ್ ಸಂಪೂರ್ಣ ತುಳುನಾಡ್ ದ ಜಾನಪದ ಕಲೆ ಕಂಬುಲದ ಬಗೆಟ್ ಉಂಡು. ಚಿತ್ರೀಕರಣದ ಪೊರ್ತುಡು ಸುಮಾರ್ 20 ಜತೆ ಎರ್ಲು ಬೊಕ್ಕ 500ಕ್ ಎಚ್ಚ ಕಲಾವಿದೆರ್ ಇತ್ತೆರ್.
ಮಕರ ಸಂಕ್ರಾಂದಿದ ಪುಣ್ಯ ದಿನವಾಯಿನ ಇನಿ ಶಬರಿಮಲೆಟ್ಟ್ ಬಯ್ಯ ನಡಪುನ ಮಕರ ಜ್ಯೋತಿ ದರ್ಶನಗ್ ಅಯ್ಯಪ್ಪ ಸನ್ನಿಧಾನಡ್ ಅಂಚನೆ ಸುತ್ತಮುತ್ತ ಭಾರಿ ಸಂಖ್ಯೆಡ್ ಭಕ್ತೆರ್ ದಿಂಜ್ದೆರ್.
ಬಯ್ಯ 6 ಗಂಟೆಗ್ ಮಕರ ಜ್ಯೋತಿ ತೋಜರೆ ಉಂಡು. ಈ ಜ್ಯೋತಿನ್ ಭಕ್ತೆರ್ 10 ಕ್ಕ್ಲ ಎಚ್ಚದ ಜಾಗೆಡ್ ತೂವೊಲಿ. ಭದ್ರತೆಗಾದ್ 2 ಸಾರರ್ದ್ ಎಚ್ಚದ ಪೊಲೀಸೆರೆನ್ ಪಾಡ್ದ ಪಂದ್ ದೇವಲ್ಯದ ಆಡಳಿತ ಮಂಡಳಿ ತೆರಿಪಾದ್ಂಡ್.
ಶಿಮ್ಲಾ: ಹಿಮಾಚಲ ಪ್ರದೇಶ ರಾಜ್ಯನ್ ಗುರ್ತಿಸಾವೊಂದಿತ್ತಿನ 28 ವರ್ಷದ ಕ್ರಿಕೆಟರ್ ಸಿದ್ದಾರ್ಥ್ ಶರ್ಮಾ ಹುಷಾರ್ದಾಂತೆ ತೀರ್ ಪೋಯೆರ್.
ಹಿಮಾಚಲ ಪ್ರದೇಶ ಕೂಟ ಗುಜರಾತ್ ಪರ ರಣಜಿ ಪಂತೊನು ಗೊಬ್ಬರೆ ಪ್ರವಾಸಡ್ ಇತ್ತ್ಂಡ್. ಈ ಪೊರ್ತುಡು ಸಿದ್ದಾರ್ಥ್ ಶರ್ಮಾ ಆರೋಗ್ಯಡ್ ಏರುಪೇರು ತೋಜಿದ್ ಬೈದ್ಂಡ್. ಅಪಗನೆ ಅಲ್ಪದ ಆಸ್ಪತ್ರೆಗ್ ಸೇರ್ಸಾದಿತ್ತೆರ್. 2 ವಾರರ್ದ್ ವೆಂಟಿಲೇಟರ್ಡ್ ಚಿಕಿತ್ಸೆ ಪಡೆಯೊಂದು ಇತ್ತ್ಂಡಲ ಚಿಕಿತ್ಸೆ ಸಮ ಆವಂದೆ ತೀರ್ ಪೋಯೆರ್.
ಚಿಕ್ಕಬಳ್ಳಾಪುರದ ಅವಲಗುರ್ಕಿ ಗ್ರಾಮ ಬೊಕ್ಕ ಪುಗರ್ತೆದ ನಂದಿ ಬೆಟ್ಟದ ಕೈತಲ್ ಇಶಾ ಯೋಗ ಕೇಂದ್ರ ಜನವರಿ 15 ಕ್ಕ್ 112 ಅಡಿ ಎತ್ತರದ ಆದಿಯೋಗಿ ಮೂರ್ತಿ ಉದಿಪನ ಆಯರೆ ಉಂಡು.
ಈ ಲೇಸ್ಗ್ ಉಪರಾಷ್ಟ್ರಪತಿ, ಮುಖ್ಯಮಂತ್ರಿ ಸೇರಿನಂಚನೆ ಮಸ್ತ್ ಬಿನ್ನೆರ್ ಬರ್ಪಿನ ಸಾಧ್ಯತೆ ಉಂಡು.
ದುಂಬು ಬರ್ಪಿನ ಲೋಕಸಭಾ ವೋಟುಗು ಭರ್ಜರಿ ತಯಾರಿ ನಡಪಾದಿತ್ತಿನ ಕಾಂಗ್ರೆಸ್ ನಾಯಕೆರ್ ರಾಹುಲ್ ಗಾಂಧಿ ಭರ್ಜರಿ ಭರವಸೆನ್ ಘೋಷಿಸಾದೆರ್.
ವೋಟುಗು ಗೆಂದ್ದ್ ಕಾಂಗ್ರೆಸ್ ಅಧಿಕಾರಗ್ ಬತ್ತ್ಂಡ 500 ರೂಪಾಯಿಗ್ ಎಲ್ಪಿಜಿ ಗ್ಯಾಸ್, ಪೆಟ್ರೋಲ್-ಡೀಸೆಲ್ ಬಿಲೆ ಕಮ್ಮಿ, ಜವನ್ಯೆರೆಗ್ ಉದ್ಯೋಗ ಕೊರ್ಪ ಪಂದ್ ಜನಕ್ಲೆಗ್ ಬಹಿರಂಗ ಪತ್ರ ಬರೆತ್ತೆರ್.
ಸ್ವಾತಂತ್ರ್ಯ ಪೊರ್ಂಬಾಟಗಾರೆ ಡಾ. ಅಮ್ಮೆಂಬಳ ಬಾಳಪ್ಪ ಜನ್ಮ ಶತಾಬ್ದಿ ಲೇಸ್ ದ ಸಮಿತಿ ಸಭೆ ಬಿ.ಸಿ.ರೋಡ್ ಸಂಚಯಗಿರಿತ ರಾಣಿ ಅಬ್ಬಕ್ಕ ತುಳು ಅಧ್ಯಯನ ಕೇಂದ್ರಡ್ ಜ.15 ಐತಾರ ಬೊಲ್ಪುಗು 10:30 ಕ್ಕ್ ಪ್ರೊ.ತುಕಾರಾಮ ಪೂಜಾರಿ ಮೆರೆನ ಗುರ್ಕಾರ್ಮೆಡ್ ನಡಪರೆ ಉಂಡು.
ಗೌರವಾನ್ವಿತ ಡಾ. ಅಮ್ಮೆಂಬಳ ಬಾಳಪ್ಪ ಮೆರೆನ ಅಭಿಮಾನಿಲು ಮಾತ ಎಚ್ಚದ ಸಂಖ್ಯೆಡ್ ಬತ್ತ್ ದ್, ಸೂಕ್ತ ಸಲಹೆಲೆನ್ ಕೊರ್ದು, ಬೇತೆ ಬೇತೆ ಸಮಿತಿಲೆಡ್ ಪಾಲ್ ಪಡೆದ್ ಲೇಸ್ ದ ಯಶಸ್ವಿಗ್ ಸಕಾಯ ಮಲ್ಪೊಡು ಪಂದ್ ಜನ್ಮ ಶತಾಬ್ದಿ ಲೇಸ್ ಸಮಿತಿದ ಪ್ರಧಾನ ಕಾರ್ಯದರ್ಶಿ ಪುಂಡಾರಿಕ್ಷಾ ಯು. ಪ್ರಕಟಣೆಡ್ ತೆರಿಪಾದೆರ್.
ಸುಬ್ರಹ್ಮಣ್ಯ: ಯುವ ಜನಾಂಗದ ವಿಕಾಸಗ್ ವಿವೇಕ ಬೊಕ್ಕ ಆನಂದಲೆನ್ ತೆರಿವೊಂಡ ಯುವ ಜನಾಂಗದ ವಿಕಾಸ ಸಾಧ್ಯ. ನೆರ್ದ್ ರಾಷ್ಟ್ರದ ಏಳಿಗೆ ಸಾಧ್ಯ ಆಪುಂಡು ಪಂದ್ ಎಸ್ಎಸ್ಪಿಯು ಕಾಲೇಜ್ ದ ಪ್ರಾಂಶುಪಾಲೆರ್ ಸೋಮಶೇಖರ ನಾಯಕ್ ಪಂಡೆರ್.
ಮೇರ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಆಡಳಿತದ ಎಸ್ಎಸ್ಪಿಯು ಕಾಲೇಜ್ ಡ್ ಗುರುವಾರ ನಡತಿನ ವಿವೇಕಾನಂದ ಜಯಂತಿ ಬೊಕ್ಕ ರಾಷ್ಟ್ರೀಯ ಯುವ ದಿನಾಚರಣೆ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದು ಪಾತೆರಿಯೆರ್. ಬೊಕ್ಕ ಸಂಸ್ಕೃತ ಉಪನ್ಯಾಸಕೆರ್ ಡಾ.ಪ್ರಜ್ವಲ್.ಜೆ ಪಾತೆರ್ದ್, ಯುವ ಜನಾಂಗಗ್ ದೇಶ ಪ್ರೇಮದ ಭಾವನೆಲೆನ್ ತೆರಿಪಾಯಿನ ವಿವೇಕಾನಂದೆರೆನ ಕೊಡುಗೆ ಅಪಾರ. ಅರೆನ ಬೋಧನೆಲು ಜವನೆರೆಗ್ ಸ್ಫೂರ್ತಿ ಕೊರ್ಪುಂಡು ಪಂದ್ ಪಂಡೆರ್. ಲೇಸ್ ನ್ ಗ್ರಾ.ಪಂ.ಸದಸ್ಯೆ ಭಾರತಿ ದಿನೇಶ್ ಉದಿಪನ ಮಲ್ತೆರ್. ಬೊಕ್ಕ ಇಂಚಿಪ್ಪ ಡಾಕ್ಟರೇಟ್ ಪದವಿ ಪಡೆಯಿನ ಎಸ್ಎಸ್ಪಿಯು ಕಾಲೇಜ್ ದ ಸಂಸ್ಕೃತ ಉಪನ್ಯಾಸಕೆರ್ ಡಾ.ಪ್ರಜ್ವಲ್.ಜೆ ಮೆರೆಗ್ ತಮ್ಮನ ಮಲ್ತೆರ್. ಈ ಪೊರ್ತುಡು ಸಾಂಸ್ಕೃತಿಕ ಬೊಕ್ಕ ಕ್ರೀಡಾ ಪಂತೊಡು ತಾಲೂಕ್, ಜಿಲ್ಲೆ ಬೊಕ್ಕ ರಾಜ್ಯ ಮಟ್ಟಡ್ ಪ್ರಶಸ್ತಿ ಪಡೆಯಿನ ಪ್ರತಿಭಾನ್ವಿತ ಕಲ್ಪಾರ್ಥಿಲೆಗ್ ಪ್ರಮಾಣ ಪತ್ರ ಬೊಕ್ಕ ಇನಾಮು ಕೊರಿಯೆರ್. ಅಂತರಾಷ್ಟ್ರೀಯ ಸಾಂಸ್ಕೃತಿಕ ಜಾಂಬೂರಿಡ್ ಪಾಲ್ ಪಡೆಯಿನ ಕಾಲೇಜ್ ದ ಉಪನ್ಯಾಸಕೆರೆಗ್ ಬೊಕ್ಕ ಕಲ್ಪಾರ್ಥಿಲೆಗ್ ಪ್ರಮಾಣ ಪತ್ರ ಕೊರಿಯೆರ್. ಕಾಲೇಜ್ ದ ಕಲ್ಪಾರ್ಥಿ ನಾಯಕಿ ಸಂಜನಾ ಲೇಸ್ ದ ಸುಧಾರಿಕೆ ಮಲ್ತೆರ್. ಸಂಖ್ಯಾ ಎದ್ಕೊನಿಯೆರ್.
