May 2022

ತಲಪಾಡಿ: ತರವಾಡು ಇಲ್ಲದ ಇಲ್ಲ್ ಒಕ್ಕೆಲ್, ಶ್ರೀ ನಾಗದೇವೆರ್ನ ಪುನರ್ ಪ್ರತಿಷ್ಠೆ ಬೊಕ್ಕ ಕಲಶಾಭಿಷೇಕ, ಶ್ರೀ ದೈವಲೆನ ನೇಮ ಅಂಚನೆ ಕೋಲೋಚ್ಚಯ

ಕುಡ್ಲದ ತಲಪಾಡಿ ಮಹಿಷಂದಾಯ, ಧೂಮಾವತಿ ಬೊಕ್ಕ ಬಂಟ ದೈವಲೆನ ದೈವಸ್ಥಾನ ಕಲ್ಲುರ್ಟಿ-ಪಂಜುರ್ಲಿ, ಕೊರತಿ, ಗುಳಿಗ ದೈವಲೆನ ಸಾನಿಧ್ಯ ತರವಾಡು ಇಲ್ಲದ ಇಲ್ಲ್ ಒಕ್ಕೆಲ್, ಶ್ರೀ ನಾಗದೇವೆರ್ನ ಪುನರ್ ಪ್ರತಿಷ್ಠೆ ಬೊಕ್ಕ ಕಲಶಾಭಿಷೇಕ ಬೊಕ್ಕ ಶ್ರೀ ದೈವಲೆನ ನೇಮ ಅಂಚನೆ ಕೋಲೋಚ್ಚಯ ಮೇ 11 ಕ್ಕ್ ಸುರು ಆದಿತ್ತ್ ದ್, ಮೇ 13 ಮುಟ್ಟ ನಡಪರೆ ಉಂಡು.

ಕ್ಷೇತ್ರ ತಂತ್ರಿಲಾಯಿನ ಶ್ರೀ ಜೇಂಕಳ ಹರಿಹರ ಭಟ್ ಮೇರ್ ನ ಮುತಾಲಿಕೆಡ್ ಬೊಕ್ಕ ಶ್ರೀ ಜಯಂತ್ ಭಟ್ ಪಾವಂಜೆ ಮೇರ್ ನ ಪೌರೋಹಿತ್ಯಡ್ ಬೇತೆ ಬೇತೆ ಧಾರ್ಮಿಕ ಕಾರ್ಯಕ್ರಮದ ಒರೊಟ್ಟು ನಡಪರೆ ಉಂಡು.

ಮೇ 13 ತಾರೀಕ್ ಸುಕ್ರಾರದಾನಿ ನಾಗನ ಕಟ್ಟೆಡ್ ಕಾಂಡೆ 7.10 ತ್ತ ವೃಷಭ ಲಗ್ನಡ್ ಶ್ರೀ ನಾಗದೇವೆರ್ನ ಪ್ರತಿಷ್ಠೆ, ಕಲಶಾಭಿಷೇಕ, ಆಶ್ಲೇಷಾ ಬಲಿ, ಪವಮಾನ ಹೋಮ, 12 ಗಂಟೆಗ್ ಮಹಾಪೂಜೆ ನಡಪರೆ ಉಂಡು. ದೈವಸ್ಥಾನಡ್ ಕಾಂಡೆ 9.32 ತ್ತ ಮಿಥುನ ಲಗ್ನಡ್ ಶ್ರೀ ದೈವಲೆನ ಪ್ರತಿಷ್ಠೆ, 108 ಕಲಶಾಭಿಷೇಕ, ಪರ್ವ, ಪೂಜೆ, ತರವಾಡು ಇಲ್ಲಡ್ ಕಲ್ಲುರ್ಟಿ, ಪಂಜುರ್ಲಿ ಅಂಚನೆ ಬೇತೆ ದೈವಲೆನ ಪ್ರತಿಷ್ಠಾ ಕಲಶಾಭಿಷೇಕ, ಪರ್ವ ಪೂಜೆ, ಬಯ್ಯಗ್ 5 ಗಂಟೆಗ್ ದೈವಸ್ಥಾನಡ್ ಮಹಿಷಂದಾಯ ನೇಮ, ಧೂಮಾವತಿ, ಬಂಟ ದೈವಲೆನ ನೇಮ ರಾತ್ರಿ 11 ಗಂಟೆಗ್ ಕೊರತಿ, ಕಲ್ಲುರ್ಟಿ-ಪಂಜುರ್ಲಿ, ಗುಳಿಗ ದೈವಲೆನ ಕೋಲ ನಡಪರೆ ಉಂಡು. ಈ ಪುಣ್ಯ ಕಾರ್ಯಗ್ ಮಾತ ಜನಕುಲು ಕುಟುಂಬ ಸಮೇತರಾದ್ ಬತ್ತ್ ದ್, ತನು-ಮನ-ಧನತ್ತ ಸಾಕಾಯನ್ ಕೊರ್ದ್, ಶ್ರೀ ಕ್ಷೇತ್ರದ ದೈವ ದೇವೆರ್ನ ಕೃಪೆಗ್ ಪಾತ್ರರಾವೊಡ್ ಪಂದ್ ಸುಂದರ ಪೂಜಾರಿ ಬೊಕ್ಕ ಸರ್ವ ಸದಸ್ಯೆರ್ ಬಿನ್ನಾಪುನ್ ಮಲ್ತೊಂದೆರ್.