February 2021

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಜೈತುಳುನಾಡು(ರಿ) ವತಿರ್ದ್ ಎಕ್ಕಾರು ನೀರುಡೆಡ್ ತುಳುಲಿಪಿ ಪರೀಕ್ಷೇಡ್ ಉತ್ತೀರ್ಣರಾಯಿನಕ್ಲೆಗ್ ಪ್ರಮಾಣಪತ್ರ ಪಟ್ಟುನ ಲೇಸ್

ಇಂಚೋಗು ತುಳುನಾಡ್ ದ ಪ್ರತಿಯೊಂಜಿ ಗ್ರಾಮಡ್ಲಾ ಉಚಿತ ತುಳುಲಿಪಿ ಶಿಕ್ಷಣ ಕೊರ್ಪಿನೆತ್ತ ಒಟ್ಟುಗು ಅವ್ವೆತೋ ಕಡೆ ತುಳುಲಿಪಿ ನಾಮಫ಼ಲಕನ್ ಪಾರ್ದ್ ,ತುಳು ಭಾಷೆದ ಒರಿಪುಗಾದ್ ಪಗೆಲ್ಇಡೀ ಬೆನೊಂದು ಉಪ್ಪುನ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಜೈ ತುಳುನಾಡ್ ಪನ್ಪಿನ ಸಂಘಟನೆ.

ತುಳುನಾಡ್ ದ ಜನತೆಗ್ ಒಂಜಿ ಮಾದರಿ ಸಂಘಟನೆ ಪಂದ್ ಬಾರಿ ಪೆರ್ಮೆಡ್ ಪನೊಲಿ. ತನ್ಕುಲೆನ ಬೇಲೆ ವೈಹಿವಾಟ್ಡ ನಡುಟು ತಿಕ್ಕುನ ಒಂತೆ ಪೊರ್ತುನು ತುಳು ಭಾಷೆದ ಒರಿಪುಗಾದ್ ಕೊರೊಂದು ,ತುಳುನಾಡೊರ್ಮೆ ಪ್ರಸಿದ್ದ ಸಂಘಟನೆ ಪನ್ಪಿನ ಪುಗಾರ್ತೆ ನೆಕ್ಕ್ ಉಂಡು. ಪ್ರತಿಯೊಂಜಿ ಹಳ್ಳಿ ಹಳ್ಳಿಗ್ ಭೇಟಿ ಕೊರ್ದು ತುಳುಲಿಪಿ ಶಿಕ್ಷಣ ಕೊರ್ದು ಪರೀಕ್ಷೆಡ್ ಉತ್ತೀರ್ಣರಾಯಿನಕ್ಲೆಗ್ ಪ್ರಮಾಣ ಪತ್ರ ಕೊರ್ದು ಮಾನದಿಗೆ ಮಲ್ಪುನ ಲೇಸ್ ನ್ ನಡಪಾವೊಂದು ಉಲ್ಲೆರ್.

ತಾರೀಖ್ 31-1-2021 ನೇ ಐತಾರ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿ ಎಕ್ಕಾರು, ನೀರುಡೆ ಬೊಕ್ಕ ನವಚೇತನ ಫ಼್ರೆಂಡ್ಸ್ ಎಕ್ಕಾರು,ನೀರುಡೆ ಮೆಕ್ಲೆನ ಒಟ್ಟು ಸೇರಿಗೆಡ್ ನಡತಿನ *ಬಲೇ ತುಳುಲಿಪಿ ಕಲ್ಪುಗ* ತರಗತಿಡ್ ಪರೀಕ್ಷೆ ಬರೆದ್ ಉತ್ತೀರ್ಣರಾಯಿನ ಜೋಕ್ಲೆಗ್ ಪ್ರಮಾಣ ಪತ್ರ ಕೊರ್ದು ಮನಾದಿಗೆ ಮಲ್ತೆರ್.ಈ ಲೇಸ್ ಡ್ ಮಲ್ಲ ಬಿನ್ನೆರ್ ಆದ್ ಶ್ರೀಮತಿ ಕಸ್ತೂರಿ ಪಂಜ
(ಉಪಾಧ್ಯಕ್ಷೆ- ದ.ಕ.ಜಿಲ್ಲಾ ಪಂಚಾಯತ್)
ಶ್ರೀ ಸುದರ್ಶನ್ ಸುರತ್ಕಲ್ (ಗುರ್ಕಾರ್ಲು – ಜೈತುಳುನಾಡ್(ರಿ) ಶ್ರೀ ಹರಿಪ್ರಕಾಶ್ ನೆಲ್ಲಿತೀರ್ಥ
(ಗುರ್ಕಾರ್ಲು -ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿ‌.ಎಕ್ಕಾರು ನೀರುಡೆ) ಶ್ರೀ ಉದಯ್ ಪೂಂಜಾ (ಉಪಾಧ್ಯಕ್ಷೆರ್ ಜೈತುಳುನಾಡ್(ರಿ)
ಶ್ರೀ ಜರ್ನಾಧನ ಗೌಡ(ಸದಸ್ಯೆರ್ ದ.ಕ .ಜಿಲ್ಲಾ ಪಂಚಾಯತ್)ಶ್ರೀ, ಸತೀಶ್ ಶೆಟ್ಟಿಎಕ್ಕಾರ್,ಶ್ರೀ ಪ್ರಕಾಶ್ ಕುಕ್ಯಾನ್ ಎಕ್ಕಾರ್,ಶ್ರೀ ಪ್ರತೀಕ್ ಶೆಟ್ಟಿ ಎಕ್ಕಾರ್, ಶ್ರೀ ಜೊಯ್ಸನ್ ಡಿಸೋಜಾ ಪಾಲ್ ಪಡೆದಿತ್ತೆರ್. ತುಳು ಲಿಪಿ ಶಿಕ್ಷಕರಾಯಿನ ಕಿರಣ್ ತುಳುವೆ,ದೀಕ್ಷಿತಾ ಮಧ್ಯ ಮೆಕ್ಲೆಗ್ ಗಣ್ಯೇರ್ನ ಉಪಸ್ಥಿತಿಡ್ ಶಾಲ್ ಪಾರ್ದ್ ಮಾನಾದಿಗೆ ಮಲ್ತೆರ್.

ನಿತೇಶ್ ಶೆಟ್ಟಿ ಎಕ್ಕಾರ್ ಲೇಸ್ ನಡಪಾದ್ ಕೊರಿಯೆರ್.ರಾಜೇಶ್ ಪೂಜಾರಿ ಎಕ್ಕಾರ್ ಮೇರ್ ಬತ್ತಿ ಬಿನ್ನೆರೆಗ್ ಸೊಲ್ಮೆಲು ಸಂದಯಿತಾ ಮಲ್ತೆರ್.

ಚಿತ್ರಕೃಪೆ -ರಾಜೇಶ್ ಪೂಜಾರಿ ಎಕ್ಕಾರ್

“ಬಲೆ ತುಲು ಲಿಪಿ ಕಲ್ಪುಗ” ಧರ್ಮಾರ್ಥ ತುಲು ಲಿಪಿ ಕಲ್ಪುನ ಕಜ್ಜಕೊಟ್ಯದ ಉದಿಪನ ಲೇಸ್

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ಜೈ ತುಲುನಾಡ್ (ರಿ.), ಯುವಜನ ವ್ಯಾಯಾಮ ಶಾಲೆ ಭಂಡಾರಿಬೆಟ್ಟು ಮುಕ್ಲೆನ ಒಟ್ಟು ಸೇರಿಗೆಡ್ ಬಂಟ್ವಾಳ ತಾಲೂಕ್‌ದ ಯುವಜನ ವ್ಯಾಯಾಮ ಶಾಲೆ ಭಂಡಾರಿಬೆಟ್ಟು ಸಭಾಭವನೊಡ್ ತೇದಿ ಪೊನ್ನಿ 17 ಪೋಪುನಾನಿ 31-01-2021 ಐತಾರ ಬೊಲ್ಪು 10:00 ಗಂಟೆಗ್ ಸರಿಯಾದ್ “ಬಲೆ ತುಲು ಲಿಪಿ ಕಲ್ಪುಗ” ಧರ್ಮಾರ್ಥ ತುಲು ಲಿಪಿ ಕಲ್ಪುನ ಕಜ್ಜಕೊಟ್ಯದ ಉದಿಪನ ಲೇಸ್ ನಡತ್ಂಡ್. ಈ ಲೇಸ್‌ನ್ ಬಂಟ್ವಾಳ ಪುರಸಭೆತ ಪದುಕೆರಾಯಿನ ಹರಿಪ್ರಸಾದ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್. ಅವೆರ್ದ್ ಬೊಕ್ಕ ಪಾತೆರ್ನ ಆರ್ ಅವರು “ತುಲು ಲಿಪಿನ್ ತುಲುನಾಡ್‌ಡ್ ನನೊರ ಗಲಸೆರ ಸುರು ಮಲ್ಪೊಡು ಅಯಿಕ್ಕಾತ್ ಇಂಚಿನ ಲೇಸ್‌ಲ್ ಮಾತ ಊರುಡ್ ನಡಪೊಡು, ಈ ಇಸಯೊಡ್ ಮಾಂತ ಕಡೆಟ್ ಜನಜಾಗೃತಿ ಆವೊಡು” ಪಂಡೆರ್.

ತುಲು ಲಿಪಿ ಕಲ್ಪಾದಿಲಾಯಿನ(ಶಿಕ್ಷಕೆರ್) ಜಗದೀಶ ಗೌಡ ಕಲ್ಕಳ ಮೇರ್ ತುಲು ಲಿಪಿಟ್ ಓಂ ಬರೆದ್ ಕಜ್ಜಕೊಟ್ಯಗ್ ಚಾಲನೆ ಕೊರಿಯೆರ್. ಅವೆರ್ದ್ ಬೊಕ್ಕ ಜೈ ತುಲುನಾಡ್ (ರಿ.) ಬೊಕ್ಕ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿಯ ಒಟ್ಟು ಸೇರಿಗೆಡ್ ನಡತ್‌ನ ಆನ್‌ಲೈನ್ ತುಲು ಲಿಪಿ ಕಜ್ಜ ಕೊಟ್ಯಡ್ ಕಲ್ತ್‌ದ್‌ ಪರೀಕ್ಷೆ ಬರೆದ್ ಉತ್ತೀರ್ಣೆರಾಯಿನ ಕಲ್ಪಾರ್ತಿಲೆಗ್ ಆಜೋಲೆ ಪಟ್ಟುನ ಲೇಸ್ ನಡತ್ಂಡ್.ಲೇಸ್‌ಡ್ ಮಲ್ಲ ಬಿನ್ನೆರಾದ್ ಯುವಜನ ವ್ಯಾಯಾಮ ಶಾಲೆ ಭಂಡಾರಿಬೆಟ್ಟು ಉಂದೆತ ಕಾರ್ಯಂತೆರ್ ಜಗದೀಶ್ ಬಿ, ತುಲು ಲಿಪಿ ಕಲ್ಪಾದಿಲಾಯಿನ ಪೂರ್ಣಿಮಾ ಬಂಟ್ವಾಳ ಬೊಕ್ಕ ಭವಿತಾ ಗೌಡ ಒತ್ತುಪಾಲ್‌ಡಿತ್ತೆರ್. ಇನಿ ಸುರುವಾಯಿನ ತುಲು ಲಿಪಿ ಕಜ್ಜಕೊಟ್ಯ ದುಂಬುದ 4 ಐತಾರ ನಡತ್‌ದ್, ಬೊಕ್ಕ ಪರೀಕ್ಷೆ ನಡಪ್ಯಾರ ಉಂಡು ಪಂದ್ ಸಂಘಟಕೆರ್ ತೆರಿಪಾದೆರ್. ತುಲು ಲಿಪಿ ಕಲ್ಪಾದಿ ಪೂರ್ಣಿಮಾ ಬಂಟ್ವಾಳ ಮಾತೆರೆನ್ಲಾ ಎದ್‌ಕೊಂದು ಲೇಸ್‌ನ್ ನಡಪಾದ್ ಕೊರ್ಯೆರ್. ಜಗದೀಶ ಗೌಡ ಕಲ್ಕಳ ಮಾತೆರೆಗ್ಲಾ ಸೊಲ್ಮೆ ಸಂದಾಯ್ತ ಮಲ್ತೆರ್.

“ಬಲೇ ತುಳು ಲಿಪಿಟ್ ಪುದರ್ ಬರಲೆ ಇನಾಮು ಗೆಂದ್ಲೆ” ಪಂಥೋ ದ ಇನಾಮು ಪಟ್ಟುನ ಲೇಸ್

ಶ್ರೀ ಶಂಕರನಾರಾಯಣ ದೇವಸ್ಥಾನ ಕೊಡವೂರು ಜೈ ತುಳುನಾಡ್(ರಿ) ಸಂಘಟನೆ ಉಡುಪಿ ಘಟಕ ಬೊಕ್ಕ ಕೊಡವೂರು ಹಳೆವಿದ್ಯಾರ್ಥಿ ಸಂಘ ಅಂಚನೇ ಯುವಕ ಸಂಘದ ಒಟ್ಟು ಸೇರಿಗೆಡ್ ಜನವರಿ 30 ತಾರೀಖ್ ಗ್ ಕಾಂಡೆ 11ಗಂಟೆರ್ದ್ 6:30 ಮುಟ ಶ್ರೀ ದೇಗುಲದ ವಠಾರಡ್ “ಬಲೇ ತುಳು ಲಿಪಿಟ್ ಪುದರ್ ಬರಲೆ ಇನಾಮು ಗೆಂದ್ ಲೆ “ತುಳು ಲಿಪಿಟ್ ಪುದರ್ ಬರೆಪಿನ ಪಂಥ ನಡತುಂಡು. ಈ ಪಂಥ ಡ್ 400 ರ್ದ್ ಲಾ ಜಾಸ್ತಿ ಜನ ಪಾಲ್ ಪಡೆದಿತ್ತೆರ್. ನೆಟ್ಟ್ ಗೆಂದಿನ ಮೂಜಿ ಅದೃಷ್ಟಶಾಲಿಲೆಗ್ ” ಬಲೇ ತುಳು ಲಿಪಿ ಕಲ್ಪುಗ” ಲೇಸ್ ಡ್ ತುಳು ಲಿಪಿ ಕಲ್ತ್ ದ್ ಉತ್ತೀರ್ಣರಾಯಿನ ಜೋಕ್ಲೆಗ್ ಸರ್ಟಿಫಿಕೇಟ್ ಪಟ್ಟುನ ಲೇಸ್ ನಡಪರೆ ಉಂಡು ಈ ಲೇಸ್ದೊಟ್ಟುಗು  ಗೆಂದಿನಕ್ಲೆಗ್ ಇನಾಮು ಕೊರ್ಪ ಪಂದ್ ಜೈ ತುಳುನಾಡು ಸಂಘಟನೆದ ತುಳು ಲಿಪಿ ಕಮಿಟಿದ ಸದಸ್ಯರಾಯಿನ ಶರತ್ ಕೊಡವೂರು ಪ್ರಕಟಣೆಡ್ ತೆರಿಪಾಯೆರ್.

ಈ ಲೇಸ್ ಡ್ ಶಂಕರ ನಾರಾಯಣ ದೇವಸ್ಥಾನ ದ ವ್ಯವಸ್ಥಾಪನ ಸಮಿತಿ ಗುರ್ಕಾರ್ಲು ಪ್ರಕಾಶ್ ಜಿ ಕೊಡವೂರು, ರಾಮ ಸೇರಿಗಾರ್ ಅಯ್ಯಪ್ಪ ಭಕ್ತವೃಂದ, ಮಧುಕರ ಪೂಜಾರಿ, ಸತೀಶ್ ಕೊಡವೂರು, ಪ್ರಭಾತ್ ಕೊಡವೂರು, ತುಳು ಲಿಪಿ ಶಿಕ್ಷಕರಾಯಿನ ರಾಜೇಶ್ ತುಳುವೆ, ಅಕ್ಷತಾ ಕುಲಾಲ್, ಸ್ವಾತಿ ಸುವರ್ಣ ಬೊಕ್ಕ ಸುಪ್ರಿಯ ಅಖಿಲೇಶ್ ಪಾಲ್ ಪಡೆದಿತ್ತೆರ್ .