ತುಳು ಸುದ್ದಿ

ಅಂತರಿಕ್ಷಗ್ ಪಾರಿನ ರಾಕೆಟ್ ಬೊಕ್ಕ ಗಗನಯಾತ್ರಿಲು ಎಂಚ ಪಿರ ಬರ್ಪೆರ್ ಗೊತ್ತುಂಡೇ…?

ಗಗನನೌಕೆದ ಬಗ್ಗೆ ನಿಕುಲೆಗ್ ಮಾತ ತೆರಿದುಂಡು. ಸಾಮಾನ್ಯ ಭಾಷೆಡ್ ಪನೊಡಾಂಡ ಈ ಗಗನನೌಕೆನ್ ರಾಕೆಟ್ ಪಂದೇ ಲೆಪ್ಪೊಲಿ. ಈ ಗಗನನೌಕೆಲು ಪಿರ ಭೂಮಿಗ್ ಎಂಚ ವಾಪಸ್ ಬರ್ಪುಂಡು…? ನಿಕ್ಲೆನ ಈ ಪ್ರಶ್ನೆಗ್ ನಮ ಉತ್ತರ ಕೊರ್ಪ ತೂಲೆ…!

ಗಗನನೌಕೆನೇ ಬೇತೆ ರಾಕೆಟ್ಟೇ ಬೇತೆ.. ರಾಕೆಟ್ ಉಪಗ್ರಹನ್ ಪತ್ತ್ ದ್, ಅಂತರಿಕ್ಷಗ್ ಲಾಗ್ಯುಂಡ್. ಗಗನನೌಕೆ ನರಮಾನಿನ್ ಪತ್ತ್ ದ್ ಅಂತರಿಕ್ಷಗ್ ಪೋಪುಂಡ್. ಮುಲ್ಪ ತೆರಿಯರೆ ಇಪ್ಪುನ ವಿಷ್ಯ ದಾದ ಪಂಡಾ…? ಅಂತರಿಕ್ಷಗ್ ಪೋಯಿನ ರಾಕೆಟ್ ಬೊಕ್ಕ ಏಪಲಾ ಭೂಮಿಗ್ ಪಿರ ಬರ್ಪುಜಿ. ಆಂಡ ಗಗನನೌಕೆ ಪಿರ ಬರ್ಪುಂಡ್. ಅವ್ ಎಂಚ ಪಂದ್ ತೆರಿಪಾವ.. ಆಯಿಕ್ಕ್ ಲ ದುಂಬು ಈ ರಾಕೆಟ್ ಎಂಚ ಅಂತರಿಕ್ಷಗ್ ಲಾಗ್ಯುಂಡ್ ಬೊಕ್ಕ ಅವ್ ದಾದಾಪುಂಡ್ ಪನ್ಪಿನೆನ್ ತೋಜಪಾವ ತೂಲೆ..!

ರಾಕೆಟ್ ನ್ ಸೂಕ್ಷ್ಮವಾದ್ ತೂನಗ ಅಲ್ಪ ನಾಲ್ ಎಲ್ಯ ಗಾತ್ರದ ರಾಕೆಟ್ಟ್ ಲೆನ್ ನಿಕುಲ್ ಗಮನಿಸಾದಿಪ್ಪು. ನೆಕ್ಕ್ ಬೂಸ್ಟರ್ ರಾಕೆಟ್ ಪಂದ್ ಲೆಪ್ಪುವೆರ್. ಉಂದು ಭೂಮಿರ್ದ್ ಅಂತರಿಕ್ಷಗ್ ರಾಕೆಟ್ ಲೆನ್ ಲೆತ್ತೊಂದ್ ಪೋಯರೆ ಅವಶ್ಯಕವಾದಿಪುಂಡ್. ಬೊಕ್ಕೊಂಜಿ ವಿಷ್ಯ ಪಂಡ ರಾಕೆಟ್ ಭೂಮಿನ್ ಗುರುತ್ವಾಕರ್ಷಣ ಬಲ ವ್ಯಾಪ್ತಿರ್ದ್ ಪಿದಯ್ ಪೋಯಿ ಬೊಕ್ಕ ಈ ಬೂಸ್ಟರ್ ರಾಕೆಟ್ ಲು ಒಂಜೊಂಜಾದ್ ಬುಡೊಂದು ಪೋಪುಂಡು. ಮೈನ್ ರಾಕೆಟ್ ಲು ಈ ಬೂಸ್ಟರ್ ನ್ ಬೇತೆ ಬೇತೆ ಮಲ್ಪುಂಡ್. ಎಂಚ ಬೇತೆ ಬೇತೆ ಆದ್ ಕಡೆಕ್ಕಾದ್ ಒರಿಯುನ ಉಪಗ್ರಹ ಮಾತ್ರ. ಬೊಕ್ಕ ಈ ಉಪಗ್ರಹಲು ತನ್ನ ಕಕ್ಷೆಡ್ ಪೋದ್ ತಮ್ಮ ಬೇಲೆನ್ ಮಲ್ತೊಂದ್ ಇಪ್ಪುಂಡ್. ಅಲ್ಪರ್ದ್ ಭೂಮಿಗ್ ಮಾಹಿತಿನ್ ಕೊರ್ಪುಂಡ್ ಬುಂಡ ಏಪಲಾ ಭೂಮಿಗ್ ಪಿರ ಬರ್ಪುಜಿ.

ಇತ್ತೆ ನಿಕ್ಲೆನ ಮನಸ್ಸ್ ಡ್ ಬೊಕ್ಕೊಂಜಿ ಪ್ರಶ್ನೆ ಮೂಡ್ ದ್ ಇಪ್ಪು. ಈ ಉಪಗ್ರಹಲು ತಮ್ಮ ಬೇಲೆ ಮುಗ್ಗಿ ಬೊಕ್ಕ ದಾದ ಆಪುಂಡ್ ಪಂದ್.. ಆಯಿಕ್ಕ್ ಲ ಉತ್ತರ ಉಂಡು. ಅವ್ ದಾದ ಪಂಡ ಈ ಉಪಗ್ರಹ ತನ್ನ ಬೇಲೆ ಮುಗ್ಗಿ ಬೊಕ್ಕ ಅಂತರಿಕ್ಷಡ್ ರಾವೊಂದು ಇಪ್ಪುಂಡ್. ಇಂಚ ಬ್ಯಾಹಾಕಾಶಡ್ ಉಪಗ್ರಹದ ಸಂಖ್ಯೆ ದುಂಬು ಬತ್ತ್ಂಡಾ ಅಂತರಿಕ್ಷಲ ಕಜವ್ ದ ತೊಟ್ಟಿ ಆಪಿನೆಟ್ಟ್ ಸಂದೇಹನೇ ಇಜ್ಜಿ.

ನನ ನರಮಾನಿನ್ ಪತೊಂದು ಪೋಯಿನ ಗಗನನೌಕೆ ಭೂಮಿಗ್ ಎಂಚ ಪಿರ ಬರ್ಪುಂಡ್ ಪನ್ಪಿನೆನ್ ತೂಪಿನಾಂಡ… ನಿಕ್ಲೆಗ್ ಗೊತ್ತಿಪ್ಪಡ್ ಈ ಗಗನನೌಕೆಲ ಅಂತರಿಕ್ಷಗ್ ಉಡಾವಣೆಯಾಪಿನವ್ ರಾಕೆಟ್ಟ್ ಡೇ. ಆ ರಾಕೆಟ್ ದ ಉಲಾಯಿ ವಿಮಾನದಂಚಿನ ಒಂಜಿ ಗಗನನೌಕೆ ಇಪ್ಪುಂಡ್. ಆ ಗಗನನೌಕೆದ ಉಲಾಯಿ ಗಗನಯಾನಿಲು ಇಪ್ಪೆರ್. ಈ ಗಗನನೌಕೆ ರಾಕೆಟ್ ಗ್ ರಡ್ಡ್ ಬೂಸ್ಟರ್ ರಾಕೆಟ್ ಬೊಕ್ಕ ಒಂಜಿ ಮೈನ್ ಇಂಜಿನ್ ರಾಕೆಟ್ ಇಪ್ಪುಂಡ್. ಬೂಸ್ಟರ್ ರಾಕೆಟ್ ಲು ಭೂಮಿರ್ದ್ ಅಂತರಿಕ್ಷಗ್ ಲಾಗಿಯರೇ ಸಾಕಾಯ ಮಲ್ಪುಂಡ್. ಬೊಕ್ಕ ಉಂದೆತ್ತ ಇಂಧನ ಖಾಲಿಯಾಯಿ ಬೊಕ್ಕ ಮೈನ್ ರಾಕೆರ್ಟ್ ದ್ ಈ ಬೂಸ್ಟರ್ ಲು ಬೇತೆ ಬೇತೆ ಆಪುಂಡ್. ನನ ಮೈನ್ ಇಂಜಿನ್ ರಾಕೆಟ್, ಗಗನನೌಕೆನ್ ಅಂತರಿಕ್ಷಗ್ ಕೊನಪಿನ ಸಂಪೂರ್ಣ ಜವಾಬ್ದಾರಿನ್ ದೆತೊಂದಿಪ್ಪುಂಡ್. ಅಂತರಿಕ್ಷಗ್ ಗಗನನೌಕೆ ಪೋಯಿಬೊಕ್ಕ ಈ ಮೈನ್ ಇಂಜಿನ್ ರಾಕೆಟ್ ಲ ಗಗನನೌಕೆರ್ದ್ ಬೇತೆ ಬೇತೆ ಆಪುಂಡ್. ಅಲ್ಪರ್ದ್ ಸುರು ಆಪಿನವ್ವೇ ಗಗನನೌಕೆದ ಪಯಣ.

ಈ ಗಗನನೌಕೆನ್ ಗಗನಯಾತ್ರಿಲು ಒಂಜಿ ವಿಮಾನದೆಲಕ ಗಳಸೊಂನ್ವೆರ್. ಆಯಿಕ್ ಬೋಡಾಯಿನ ಸೆನ್ಸರ್ ಲು ತಂತ್ರಜ್ಞಾನ ಈ ಗಗನನೌಕೆಡ್ ಇಪ್ಪುಂಡ್. ಬೊಕ್ಕ ಗಗನಯಾತ್ರಿಲು ಅಂತರಿಕ್ಷಡ್ ಅಕ್ಲೆನ ಸಂಶೋಧನೆನ್ ಮಲ್ಪುವೆರ್. ಸಂಶೋಧನೆ ಮುಗ್ಗಿ ಬೊಕ್ಕ ಭೂಮಿಗ್ ಗಗನನೌಕೆ ಎಂಚ ವಾಪಸ್ ಆಪುಂಡ್ ಪನ್ಪಿನವ್ ಕುತೂಹಲ. ಗಗನನೌಕೆ ಭೂಮಿಗ್ ವಾಪಸ್ ಬರೊಡಾಂಡ ಭೂಮಿದ ಕಕ್ಷೆಗ್ ಸುತ್ತು ಬರೋಡ್. ಕಕ್ಷೆಡ್ ಸುತ್ತು ಬತ್ತಿ ಬೊಕ್ಕ ಈ ಗಗನನೌಕೆ ಭೂಮಿದ ವಾತಾವರಣಗ್ ಬರ್ಪುಂಡ್. ಈ ಪೊರ್ತುಡ್ ಈ ಗಗನನೌಕೆ ಭೂಮಿಗ್ ಸಮಾಂತರವಾದ್ ಮೋನೆ ಪಾಡ್ ದ್ ಇಪ್ಪುಜಿ. ಮೋನೆ ಒಂತೆ ಮಿತ್ತ್ ಪೋಯಿಲೆಕ್ಕ ಇಪ್ಪುಂಡ್. ಆಯಿಕ್ಕ್ ಲ ಒಂಜಿ ಕಾರಣ ಉಂಡು. ಒಂಜಿ ವೇಳೆ ಸಮಾಂತರವಾದ್ ಬತ್ತ್ಂಡ ಭೂಮಿದ ವಾತಾವರಣದ ಗಾಳಿ ಅಂಚನೆ ಈ ಗಗನನೌಕೆದ ನಡುಟ್ ಘರ್ಷಣೆ ಆಪುಂಡ್. ಈ ಘರ್ಷಣೆರ್ದ್ ಗಗನನೌಕೆ ಸುಟ್ಟ್ ದ್ ಪೋಯೆರಲ ಇಪ್ಪು. ಇಂಚಾದ್ ಗಗನನೌಕೆಡ್ ಒಂಜಿ ಕವಚಲ ಇಪ್ಪುಂಡ್. ಭೂಮಿದ ಕೈತಲ್ ಬನ್ನಗ ಈ ಗಗನನೌಕೆ ಸಮಾಂತರವಾದಿಪ್ಪುಂಡು. ಬೊಕ್ಕ ವಿಮಾನದೆಲಕ ರನ್ವೆಡ್ ಈ ಗಗನನೌಕೆ ಲ್ಯಾಂಡ್ ಆಪುಂಡ್. ಈ ಗಗನನೌಕೆ ಭೂಮಿಗ್ ಲ್ಯಾಂಡ್ ಆಪಿನ ಪೊರ್ತುಡ್ ಒಂಜಿ ಪ್ಯಾರಾಚೂಟ್ ಲ ಇಪ್ಪುಂಡ್. ಇಂದು ಲ್ಯಾಂಡಿಂಗ್ ಆಯರೆ ಸಕಾಯ ಮಲ್ಪುಂಡು. ನನ ಈ ಗಗನನೌಕೆನ್ ಮರುಬಳಕೆ ಮಲ್ಪೊಲಿ.

ಬರವು: ಶ್ರುತಿದಾಸ್