ತುಳು ಸುದ್ದಿ

ಎ.20: ಸುರತ್ಕಲ್ ಅಮೃತೇಶ್ವರ ನಾಟ್ಯಾಲಯ (ರಿ.)ದ “ಶಿವಾರ್ಪಣಂ” ನೃತ್ಯ ನಮನ

ಕುಡ್ಲ: ಸುರತ್ಕಲ್ ಅಮೃತೇಶ್ವರ ನಾಟ್ಯಾಲಯ (ರಿ.) ದಕ್ಲೆರ್ದ್ ಶಿವಾರ್ಪಣಂ ನೃತ್ಯ ನಮನ ಲೇಸ್ ಎ.20 ಸುರತ್ಕಲ್ ಬಂಟರ ಭವನಡ್ ನಡಪರೆ ಉಂಡು.

ಬಯ್ಯಗ್ ತುಡರ್ ಅರ್ಲಾದ್ ಲೇಸ್ ಉದಿಪನ ಆವರೆ ಉಂಡು. ಭರತನಾಟ್ಯ, ಶಕ್ತಿಪೀಠ ನೃತ್ಯರೂಪಕ, ಸಭಾ ಲೇಸ್, ಜಾನಪದ ನೃತ್ಯಲು, ಶಿವ ನಮನ ನಡಪರೆ ಉಂಡು.

ಸಭಾ ಕಾರ್ಯಕ್ರಮನ್ ಕರ್ನಾಟಕ ಕಲಾ ತಿಲಕ ಗುರು ಉಳ್ಳಾಲ್ ಮೋಹನ್ ಕುಮಾರ್ ತುಡರ್ ಅರ್ಲಾದ್ ಉದಿಪನ ಮಲ್ಪುವೆರ್. ಸಸಿಹಿತ್ಲು ಭಗವತೀ ಕ್ಷೇತ್ರದ ಅನುವಂಶಿಕ ಮೊಕ್ತೇಸರೆರ್ ಶ್ರೀನಿವಾಸ ಯಾನೆ ಅಪ್ಪು ಪೂಜಾರಿ ಆಶೀರ್ವಚನ ಕೊರಿಯೆರೆ ಉಲ್ಲೆರ್.

ಈ ಲೇಸ್ ದ ಗುರ್ಕಾರ್ಮೆನ್ ಸುರತ್ಕಲ್ ಬಂಟರ ಸಂಘದ ಅಧ್ಯಕ್ಷೆರ್ ಲೋಕಯ್ಯ ಶೆಟ್ಟಿ ಒಯಿಸೊನ್ವೆರ್. ಗೌರವ ಉಪಸ್ಥಿತಿಡ್ ಸಸಿಹಿತ್ಲು ರಂಗ ಸುದರ್ಶನದ ನಿರ್ದೇಶಕೆರ್ ಪರಮಾನಂದ ಸಾಲ್ಯಾನ್ ಪಾಲ್ ಪಡೆಯೆರೆ ಉಲ್ಲೆರ್.

ಹೊಸಬೆಟ್ಟು ಕುಳಾಯಿ ಶ್ರೀ ಶಾರದಾ ನಾಟ್ಯಾಲಯದ ವಿದುಷಿ ಭಾರತೀ ಸುರೇಶ್ ಶುಭನುಡಿ ಕೊರಿಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಜನಪದ ವಿದ್ವಾಂಸೆರ್ ಕೆ.ಕೆ ಪೇಜಾವರ, ವಾಮಂಜೂರು ಶ್ರೀದುರ್ಗಾ ಕನ್ಸ್ ಟ್ರಕ್ಷನ್ ದ ಸತೀಶ್ ಶೆಟ್ಟಿ ಮೂಡುಜಪ್ಪು ಗುತ್ತು ಪಾಲ್ ಪಡೆಯೆರೆ ಉಲ್ಲೆರ್.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಅಮೃತೇಶ್ವರ ನಾಟ್ಯಾಲಯದ ನಿರ್ದೇಶಕಿ ವಿದುಷಿ ಚಿತ್ರಾಕ್ಷಿ ಅಜಿತ್ ಕುಮಾರ್, ಅಧ್ಯಕ್ಷೆರ್, ವಿದ್ಯಾರ್ಥಿಲು, ಪೋಷಕೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಎ.18,19: ಭಾರೀ ಬರ್ಸದ ಅಂದಾಜಿ: ಯೆಲ್ಲೊ ಅಲರ್ಟ್‌ ಘೋಷಣೆ

ಚಿಕ್ಕಮಗಳೂರು: ರಾಜ್ಯದ ಮಾತ ಜಿಲ್ಲೆಡ್ ಎ.18 ಬೊಕ್ಕ 19 ಕ್ಕ್ ಭಾರೀ ಬರ್ಸ ಬರ್ಪಿನ ಅಂದಾಜಿ ಉಂಡು ಪಂದ್ ಹವಾಮಾನ ಇಲಾಖೆ ಮುನ್ಸೂಚನೆ ಕೊರ್ತುಂಡು.

ಈ ರಡ್ಡ್ ದಿನ ಮಾತ 31 ಜಿಲ್ಲೆಲೆಗ್ ಐಎಂಡಿ ಯೆಲ್ಲೋ ಅಲರ್ಟ್ ಘೋಷಣೆ ಮಲ್ದ್ಂಡ್.

ಪ್ರತಿ ಗಂಟೆಗ್ 30-40 ಕಿ.ಮೀ. ದೂರಡ್ ಗಾಳಿ ಬೀಜುನ ಅಂದಾಜಿ ಉಂಡು ಪಂದ್ ಹವಾಮಾನ ಇಲಾಖೆರ್ದ್ ಮುನ್ನೆಚ್ಚರಿಕೆ ಕೊರ್ತುಂಡು.

ಬಳ್ಳಾರಿ, ಚಿಕ್ಕಮಗಳೂರು, ಹಾಸನ, ಕೊಡಗು ಬೊಕ್ಕ ಮೈಸೂರ್ ಜಿಲ್ಲೆದ ಕೆಲವು ಭಾಗಡ್ ಅಂಗಾರೆ ಒಂತೆ ಬರ್ಸ ಬರ್ಪುನ ಅಂದಾಜಿ ಉಂಡು ಪಂದ್ ತೆರಿದ್ ಬೈದ್ಂಡ್.

ಉತ್ತರ ಒಳನಾಡು ಬೊಕ್ಕ ಮಲೆನಾಡು ಭಾಗದ ಕೆಲವು ಪ್ರದೇಶಲೆಡ್ ಬುದಾರ ಬರ್ಸ ಬರ್ಪುಂಡು ಪಂದ್ ಪೊಲಬು ಕೊರ್ತುಂಡು ಪಂದ್ ತೆರಿದ್ ಬೈದ್ಂಡ್.

ಚುನಾವಣಾ ಉಸ್ತುವಾರಿಯಾದ್ ಮಹಮ್ಮದ್ ಹನೀಫ್ ಉಜಿರೆ ನೇಮಕ

ಬೊಲ್ತೇರ್ ವಿಧಾನ ಸಭಾ ಕ್ಷೇತ್ರದ ಗ್ರಾಮೀಣ ಬ್ಲಾಕ್ ಗ್ ಜಿಲ್ಲಾ ಅಲ್ಪಸಂಖ್ಯಾತ ಘಟಕರ್ದ್ ಚುನಾವಣಾ ಉಸ್ತುವಾರಿಯಾದ್ ಮಹಮ್ಮದ್ ಹನೀಫ್ ಉಜಿರೆ ನೇಮಕ ಆತೆರ್.

ಮೆರೆನ್ ಜಿಲ್ಲಾಧ್ಯಕ್ಷೆರ್ ಶಾಹುಲ್ ಹಮೀದ್ ಕೆ.ಕೆ ನೇಮಕ ಮಲ್ದೆರ್. ಮೇರ್ ದ.ಕ ಜಿಲ್ಲಾ ವಕ್ಫ್ ಸಲಹಾ ಸಮಿತಿದ ಮಾಜಿ ಸದಸ್ಯೆರಾದ್, ಜಿಲ್ಲಾ ಅಲ್ಪಸಂಖ್ಯಾತ ಘಟಕದ ಉಪಾಧ್ಯಕ್ಷೆರಾದ್ ಕೆಲಸ ಮಲ್ತೊಂದು ಉಲ್ಲೆರ್.

ಎ.22-30: ತಿಬಾರ್ ಶ್ರೀ ಕೊಡಮಣಿತ್ತಾಯ ದೈವಸ್ಥಾನಡ್ ಬ್ರಹ್ಮಕುಂಭಾಭಿಷೇಕ, ನಾಗಮಂಡಲ, ವಿಶೇಷ ಜಾತ್ರೆ

ಸುರತ್ಕಲ್: 1976 ನೇ ಇಸ್ವಿಡ್ ಶಿಬರೂರುಗುತ್ತು ಮುದ್ದಣ್ಣ ಶೆಟ್ರೆನ ಮುತುವರ್ಜಿಡ್ ಶಿಬರೂರು ಶ್ರೀ ಕೊಡಮಣಿತ್ತಾಯ ಕ್ಷೇತ್ರ ಸಂಪೂರ್ಣ ನವೀಕರಣ ಆದ್ 2010ನೇ ಇಸ್ವಿಡ್ ಕೊಂಜಾಲಗುತ್ತು ಪ್ರಭಾಕರ ಶೆಟ್ರೆನ ನೇತೃತ್ವಡ್ ಊರು- ಪರವೂರುದಕ್ಲೆನ ಸಹಕಾರಡ್ ನವೀಕರಣ ಆದಿತ್ತ್ ದ್, 2024 ನೇ ಇಸ್ವಿಡ್ ಕುಡೊರ ಸುಮಾರ್ 9 ಕೋಟಿ ರೂ. ಕರ್ಚಿಡ್ ಸಂಪೂರ್ಣ ಜೀರ್ಣೋದ್ಧಾರ ಆದ್ ಉಂದುವೇ ಎ.22 ಸೋಮಾರರ್ದ್ ಎ.30 ಅಂಗಾರೆ ಮುಟ್ಟ ಬ್ರಹ್ಮಕುಂಭಾಭಿಷೇಕ ಅಂಚೆನೆ ಅಷ್ಟಪವಿತ್ರ ನಾಗಮಂಡಲ ಸೇವೆ ಬೊಕ್ಕ ವಿಶೇಷ ಜಾತ್ರಾ ಮಹೋತ್ಸವ ನಡಪರೆ ಉಂಡು ಪಂದ್ ತಿಬಾರ್ ಗುತ್ತಿನಾರ್ ಶಿಬರೂರುಗುತ್ತು ಉಮೇಶ್ ಎನ್. ಶೆಟ್ರ್ ತೆರಿಪಾಯೆರ್.

ಆರ್ ಶ್ರೀ ಕ್ಷೇತ್ರದ ಅಂಗಣೊಡು ಅಂಗಾರೆ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರ್ದ್, ಬ್ರಹ್ಮಕಲಶ ಬೊಕ್ಕ ನಾಗಮಂಡಲ ಒಟ್ಟುಗೆ ಆಪಿನವು ಈ ಜಾಗೆದ ವಿಶೇಷ.ಇದಮುಟ್ಟ ನಾಲ್ ಸರ್ತಿ ನಾಗಮಂಡಲ ಆತ್ಂಡ್. ಈ ಸರ್ತಿ 5 ನೇ ನಾಗಮಂಡಲ. ನೆಕ್ಕ್ ಬೋಡಾದ್ ಭಾರಿ ಮಲ್ಲ ಮಟ್ಟ್ ಡ್ ತಯಾರಿ ನಡತೊಂದಿತ್ತ್ ದ್ ಈ ದಿನೊಕ್ಲೆಡ್ 3-4 ಭಕ್ತೆರ್ ಪಾಲ್ ಪಡೆಯುನ ನಿರೀಕ್ಷೆ ಉಂಡು ಪಂದ್ ಪಂಡೆರ್.

ಕ್ಷೇತ್ರದ ತಂತ್ರಿಲಾಯಿನ ವೇದವ್ಯಾಸ ತಂತ್ರಿಲು ಪಾತೆರ್ದ್, ಕ್ಷೇತ್ರಡ್ ಪೊಸ ಧ್ವಜಸ್ತಂಭ, ಪೊಸ ಸಾನ, ಪೊಸ ಗೋಪುರ, ಸುತ್ತುಪೌಳಿ ನಿರ್ಮಾಣ ಇಂಚ ಸಮಗ್ರ ಜೀರ್ಣೋದ್ಧಾರ ಆದ್ ಎ.22ರ್ದ್ ಪೂಜಾ ವಿಧಿಕ್ಕುಲು ಸುರುವಾಪುಂಡು. ಎ. 26 ಕ್ಕ್ ಬ್ರಹ್ಮಕಲಶ ಬೊಕ್ಕ ನಾಗಮಂಡಲದ ವೈದಿಕ ವಿಧಿ ನಡಪರೆ ಉಂಡು ಪಂದ್ ತೆರಿಪಾಯೆರ್.

ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಕೋಂಜಾಲಗುತ್ತು ಪ್ರಭಾಕರ ಎಸ್ ಶೆಟ್ರ್ ಪಾತೆರ್ದ್, 2010 ನೇ ಇಸ್ವಿದ ಬ್ರಹ್ಮಕಲಶ ಸಮಿತಿದ ಅಧ್ಯಕ್ಷೆ ಆದಿತ್ತಿನ ಎನನ್ 2024 ನೇ ಇಸ್ವಿದ ಬ್ರಹ್ಮಕಲಶ ಸಮಿತಿದ ಅಧ್ಯಕ್ಷೆಯಾದ್ ಆಯ್ಕೆ ಮಲ್ದಿನ ನಿಕ್ಲೆನ ಪ್ರೀತಿ, ಮೋಕ್ಯೆ ಮಲ್ಲೆ. ಆ ಕೊಡಮಂದಾಯೆನೇ ಆ ಯೋಗ್ಯತೆನ್ ಎಂಕ್ ಕೊರ್ಪಾದಿನಿಂದ್ ಎನ್ನುವೆ ಪಂದ್ ಪಂಡೆರ್.

ಮೊಕ್ತೇಸರೆರ್ ಬೊಕ್ಕ ಬ್ರಹ್ಮಕಲಶೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ ಎಂ.ಮಧುಕರ ಅಮೀನ್ ಪಾತೆರ್ದ್, ಅಂದಾಜಿ 9 ಕೋಟಿ ರೂ. ಕರ್ಚಿಡ್ ಈ ಕ್ಷೇತ್ರ ಜೀರ್ಣೋದ್ಧಾರ ಆವೊಂದುಂಡು. ಸುಮಾರ್ 8 ತಿಂಗೊಲುರ್ದಿಂಚಿ
3.5 ಕೋಟಿ ರೂ.ದ ಸಿವಿಲ್ ಕಾಮಗಾರಿ ಅಂಚೆನೆ 5 ಕೋಟಿ ರೂ.ದ ನಿರ್ಮಾಣ ಕಾಮಗಾರಿ ಆತ್ಂಡ್. ಹೆಬ್ರಿರ್ದ್ ಮರ ಕನತ್ ದ್ 50 ಲಕ್ಷ ರೂ.ಡ್ ಕೊಡಿಮರ ನಿರ್ಮಾಣ ಆತ್ಂಡ್. ಬೇಲೆದಕುಲು, ಊರುದಕುಲು ರಾತ್ರೆ ಪಗೆಲ್ ಬೇಲೆ ಮಲ್ತೊಂದುಲ್ಲೆರ್. ಪ್ರತಿಯೊರಿಯಗ್ಲ ಶ್ರೀ ಕ್ಷೇತ್ರದ ಅನುಗ್ರಹ ತಿಕ್ಕುಲೆಕ ಮಾತೆರ್ಲ ಬೇಲೆ ಮಲ್ತೊಂದುಲ್ಲ ಪಂದ್ ಪಂಡೆರ್.

ಎ.25 : ಬೊಳ್ಳಿದ ಕಲಶ ಸಮರ್ಪಣೆ

ಬಾಲಿವುಡ್ ನಟಿ, ಉದ್ಯಮಿ ಶಿಲ್ಪಾ ಶೆಟ್ಟಿ ಮೇರ್ ಬ್ರಹ್ಮಕಲಶೊಗು ಕೊರ್ತಿನ ಬೊಳ್ಳಿದ ಕಲಶ ಸಮರ್ಪಣೆ ಲೇಸ್ ಎ.25 ಕ್ಕ್ ನಡಪರೆ ಉಂಡು. ಎ.27 ಕ್ಕ್ 1000 ಜೋಕುಲೆರ್ದ್ ಕುಣಿತ ಭಜನೆ ನಡಪರೆ ಉಂಡು. ಆನಂದ ಗುರೂಜಿ ಭಜನೆಗ್ ಚಾಲನೆ ಕೊರಿಯರೆ ಉಲ್ಲೆರ್. ಎ.22-24 ಮುಟ್ಟ ಮಾತಾ ಕಡೆರ್ದ್ ಲ ಹೊರೆ ಕಾಣಿಕೆ ಬರಿಯರೆ ಉಂಡು ಪಂದ್ ಮಧುಕರ ಅಮೀನ್ ಪಂಡೆರ್.

ಎ.19 ಕಟೀಲ್ ರ್ದ್ ಬಂಗಾರ್ ದ ಪಲ್ಲಕ್ಕಿ ಮೆರವಣಿಗೆ

ತಿಬಾರ ಕೊಡಮಣಿತ್ತಾಯಗ್ ಬಂಗಾರ್ ದ ಪಲ್ಲಕ್ಕಿ ಸಮರ್ಪಣೆ ಮಲ್ಪುನ ಭಕ್ತೆರೆನ ಸಂಕಲ್ಪ ಸಾಕಾರ ಆವೊಂದುಂಡು. ಎ.19ಗು ಬಯ್ಯಡ್ 5 ಗಂಟೆಗ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರಿನ ನಡೆರ್ದ್ ಬಂಗಾರ್ ದ ಪಲ್ಲಕ್ಕಿ ಮೆರವಣಿಗೆಗ್ ಪಲಿಮಾರು ಮಠಾಧೀಶೆರ್ ವಿದ್ಯಾಧೀಶ ಸ್ವಾಮೀಜಿ ಚಾಲನೆ ಕೊರಿಯರೆ ಉಲ್ಲೆರ್. ಓಟುದ ನೀತಿ ಸಂಹಿತೆ ಜಾರಿ ಆಯಿನೆರ್ದಾವರ ಕ್ಷೇತ್ರಡ್ ಇತ್ತಿನ ಬಂಗಾರ್ ನ್ ಗಲಸರೆ ಅವಕಾಶ ಇಜ್ಜಾಂದಿನ ಪೊರ್ತುಡು ಮಾತ ಭಕ್ತೆರ್ ಲ ಸೇರ್ದ್ ಅಕ್ಲೆಕ್ಲೆನ ಬಂಗಾರ್ ನ್ ಪಲ್ಲಕ್ಕಿ ಮಲ್ಪರೆ ಕೊರ್ತೆರ್. ಅಂಚ ಪಲ್ಲಕ್ಕಿಗ್ ಬೋಡಿತ್ತಿನ ಸುಮಾರ್ 2 ಕೆಜಿ ದಾತ್ ಬಂಗಾರ್ ಸಂಗ್ರಹ ಆತ್ಂಡ್.

ಅವ್ವೇ ದಿನ ಉಲ್ಲಂಜೆ ಕ್ರಾಸ್ ಡ್ ಕುಡ್ಲದ ಉದ್ಯಮಿ ಕಟ್ಟಾದಿನ ಸ್ವಾಗತ ಗೋಪುರ ಉದಿಪನ ಆವರೆ ಉಂಡು. ಪ್ರತಿದಿನಲ ಭಕ್ತೆರೆಗ್ ಉಪಾಹಾರ, ಅನ್ನಸಂತರ್ಪಣೆ,ಬಯ್ಯಡ್ ಧರ್ಮಸಭೆ, ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಉಂಡು.ಧರ್ಮ ಸಭೆಟ್ಟ್ ಸ್ವಾಮೀಜಿನಕುಲು, ಧಾರ್ಮಿಕ ಮುಖಂಡೆರ್, ಗಣ್ಯೆರ್ ಪಾಲ್ ಪಡೆಯರೆ ಉಲ್ಲೆರ್ ಪಂದ್ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶೋತ್ಸವ ಸಮಿತಿದ ಕಾರ್ಯಾಧ್ಯಕ್ಷೆರ್ ಪ್ರದ್ಯುಮ್ನರಾವ್ ಕೈಯೂರುಗುತ್ತು ತೆರಿಪಾಯೆರ್.

ಪತ್ರಿಕಾಗೋಷ್ಠಿಡ್ ಜೀರ್ಣೋದ್ಧಾರ ಸಮಿತಿ ಬೊಕ್ಕ ಬ್ರಹ್ಮಕಲಶೋತ್ಸವ ಸಮಿತಿದ ಪ್ರಧಾನ ಸಂಚಾಲಕೆರ್
ಸುಬ್ರಮಣ್ಯ ಪ್ರಸಾದ್ ಕೋರ್ಯಾರು, ತುಕಾರಾಮ ಶೆಟ್ಟಿ ಪರ್ಲಬೈಲುಗುತ್ತು, ಶಿವಾನಂದ ಶೆಟ್ಟಿ ಪಡುಮನೆ, ಮಾಧ್ಯಮ ವಿಭಾಗದ ಮುಖ್ಯಸ್ಥೆರ್ ಜಗನ್ನಾಥ ಶೆಟ್ಟಿ ಬಾಳ, ಸುರೇಂದ್ರ ಶೆಟ್ಟಿ ಇತ್ತೆರ್.

ಗೋರೆಗಾಂವ್ ಕರ್ನಾಟಕ ಸಂಘದ ತುಳು ಪರ್ಬ ದತ್ತಿ ನಿಧಿ ಲೇಸ್

ಬೊಂಬೈ: ಬಿಸು ಪರ್ಬನ್ ಇತ್ತೆದ ಕಾಲಡ್ ದೇಶ ಇಡೀ ಆಚರಣೆ ಮಲ್ಪುವೆರ್. ಉಂದು ಪ್ರಕೃತಿದ ಆಚರಣೆ. ದೇಶದ ಬೇತೆ ಬೇತೆ ರಾಜ್ಯಲೆಡ್ ಬೇತೆ ಬೇತೆ ಪುದರ್ ಡ್ ಈ ಪರ್ಬನ್ ಆಚರಣೆ ಮಲ್ಪುವೆರ್. ಈ ಪರ್ಬ ತುಳುನಾಡ್ ದ ಸಂಸ್ಕ್ರತಿನ್ ಒರಿಪಾದ್ ಬುಲೆಪಾವುನ ಲೇಸ್ ಪಂದ್ ಮಲಾಡ್ ಶ್ರೀ ವರಮಹಾಲಕ್ಷ್ಮಿ ಪೂಜಾ ಸಮಿತಿದ ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್, ಕುಲಾಲ ಸಂಘ ಬೊಂಬೈದ ಚರ್ಚ್ ಗೇಟ್ – ದಹಿಸರ್ ಕೈತಲ್ದ ಸಮಿತಿದ ಉಪಕಾರ್ಯಾಧ್ಯಕ್ಷೆರ್ ರತ್ನಾ ಡಿ. ಕುಲಾಲ್ ಪಂಡೆರ್.

ಗೋರೆಗಾಂವ್ ಕರ್ನಾಟಕ ಸಂಘ ಬೊಕ್ಕ ಸಂಘದ ಯುವ ವಿಭಾಗದ ಒಟ್ಟುಸೇರಿಗೆಡ್ ಎ.14 ಕ್ಕ್ ಬಿಸು ಪರ್ಬದ ಲೆಕ್ಕೊಡು ನಿಟ್ಟೆ ಸುಧಾಕರ ಶೆಟ್ಟಿ ಬೊಕ್ಕ ಎಸ್. ಜೆ. ಶೆಟ್ಟಿ ನೆಂಪುಗಾದ್ ಜಯಕರ ದೇಜಪ್ಪ ಪೂಜಾರಿ ವೇದಿಕೆಡ್ ತುಳು ಪರ್ಬ ದತ್ತಿನಿಧಿ ಲೇಸ್ ಗೋರೆಗಾಂವ್ ಪಶ್ಚಿಮದ ಆರೇ ರೋಡ್‌ ಡ್ ಇಪ್ಪುನ ಕೇಶವ ಗೋರೆ ಸ್ಮಾರಕ ಟ್ರಸ್ಟ್ ದ ರಡ್ಡನೇ ಮಾಳಿಗೆದ ಸಭಾಗೃಹಡ್ ಸಂಘದ ಅಧ್ಯಕ್ಷೆರ್ ನಿತ್ಯಾನಂದ ಕೋಟ್ಯಾನ್ ಮೆರೆನ ಅಧ್ಯಕ್ಷತೆಡ್ ನಡತ್ಂಡ್.

ಮಲ್ಲ ಬಿನ್ನೆರಾದ್ ಬತ್ತಿನ ರತ್ನಾ ಡಿ. ಕುಲಾಲ್ ಮೇರ್ ಪಾತೆರ್ದ್, ಬಿಸು ಪರ್ಬ ತುಳು ಪರ್ಬ ಆತ್ಂಡ್. ನೆತ್ತ ಆಚರಣೆ ಕಮ್ಮಿ ಆದಿತ್ತ್ಂಡಲ ಇಂಚಿನ ಸಂಘಟನೆಲೆನ ಮುಕೇನ ಗೌಜಿಡ್ ಆಚರಣೆ ಆವೊಂದುಂಡು. ಯುಗದ ಸುರುನೇ ಯುಗಾದಿ. ಕರಿದ್ ಪೋಯಿನೆನ್ ಮರತ್ ದ್ ಪೊಸತ್ ನ್ ಸ್ವಾಗತಿಸಾವುನ ಪರ್ಬನೇ ಯುಗಾದಿ. ಗೋರೆಗಾಂವ್ ಕರ್ನಾಟಕ ಸಂಘ ಬಿಸು ಪರ್ಬದ ಪೊರ್ತುಡು ತುಳು ಪರ್ಬದ ಮುಕೇನ ತುಳು ಕನ್ನಡಿಗೆರೆನ್ ಒಂಜಿ ಕಡೆ ಸೇರ್ಸಾದ್ ನಮ್ಮ ಭಾಷೆ ಸಂಸ್ಕೃತಿನ್ ಎಚ್ಚ ಮಲ್ತೊಂದು ಉಂಡು. ನನ ಸಂಘದ ಪೊಸ ವಿಶಾಲವಾಯಿನ ಸಭಾಗೃಹಡ್ ಸಂಘದ ಇಂಚಿನ ಲೇಸ್ ನಡಪುಲೆಕ್ಕ ಅವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.

ಚಾವಡಿಡ್ ಇತ್ತಿನ ಸಂಘದ ಟ್ರಸ್ಟಿಲು ದೇವಲ್ಕುಂದ ಭಾಸ್ಕರ ಶೆಟ್ಟಿ ತುಡರ್ ಅರ್ಲಾದ್ ಲೇಸ್ ಗ್ ಚಾಲನೆ ಕೊರಿಯೆರ್.

ಅಧ್ಯಕ್ಷತೆನ್ ಒಯಿಸೊಂದು ಸಂಘದ ಅಧ್ಯಕ್ಷೆರ್ ನಿತ್ಯಾನಂದ ಕೋಟ್ಯಾನ್ ಪಾತೆರ್ದ್, ಇನಿ ಮಲ್ಲ ಬಿನ್ನೆರ್ ರತ್ನ ಕುಲಾಲ್ ಮೇರ್ ತನ್ನ ಮುತ್ತುದಂಚಿನ ಪಾತೆರರ್ದ್ ನಮಕ್ ಎಡ್ಡೆ ಬಯಕಿಯೆರ್. ತುಳು ಪರ್ಬ ಲೇಸ್ ದ ಮುಕೇನ ನಮ ಮಾತೆರ್ಲಾ ಇನಿ ಒಗ್ಗಟ್ಟಾತ, ಪೊಸ ಪ್ರತಿಭೆಲೆಗ್ ಅವಕಾಶ ಕೊರ್ಪುಲೆಕ್ಕ ಆವಡ್, ಗೋರೆಗಾಂವ್ ಪೂರ್ವದ ತುಳು ಕನ್ನಡಿಗೆರ್ ಸಂಘಡ್ ಕ್ರಿಯಾಶೀಲತೆರ್. ಅಭಿವೃದ್ಧಿದಂಚಿ ಪೋವೊಂದು ಇಪ್ಪುನ ಸಂಘದ ಕಟ್ವಾನದ ಪುನರ್ ನಿರ್ಮಾಣ ಆವೊಂದುಂಡು. ಸಂಘದ ಕಾರ್ಯಾಲಯದ ಕೊರತೆರ್ದ್ ಸದಸ್ಯೆರ್ ದೂರ ಅಯೆರೆ ಬಲ್ಲಿ ಪಂದ್ ಇನಿ ಬೊಲ್ಪುಗು ತಾತ್ಕಾಲಿಕವಾದ್ ಗೋರೆಗಾಂವ್ ಪಶ್ಚಿಮ, ಜವಾಹರ್ ನಗರದ ಎಸ್ ವಿ ರೋಡ್ ಲಕ್ಷಿ ನಿವಾಸಡ್ ಸಂಘಗ್ ಪೊಸ ಕಾರ್ಯಾಲಯನ್ ಉದಿಪನ ಮಲ್ತ್ಂದ ಪಂದ್ ಮಾತೆರೆಗ್ಲಾ ಬಿಸು ಪರ್ಬದ ಎಡ್ಡೆಪ್ಪು ಸಂದಾಯೆರ್.

ಚಾವಡಿಡ್ ಪ್ರಧಾನ ಕಾರ್ಯದರ್ಶಿ ಸರಿತಾ ಸುರೇಶ್ ನಾಯಕ್, ಉಪಾಧ್ಯಕ್ಷೆರ್ ವಿಶ್ವನಾಥ ಕೆ. ಶೆಟ್ಟಿ ಬೊಕ್ಕ ಯುವ ವಿಭಾಗದ ಕಾರ್ಯಾಧ್ಯಕ್ಷೆರ್ ಶಿವಾನಿ ಎಚ್. ಆಚಾರ್ಯ ಇತ್ತೆರ್.

ಸಂಘದ ಸದಸ್ಯೆರ್ದ್, ಸಂಘದ ಗ್ರಂಥಾಲಯದ ಸದಸ್ಯೆರ್ದ್ ಬೊಕ್ಕ ಯುವ ವಿಭಾಗದ ಸದಸ್ಯೆರ್ದ್ ಬೇತೆ ಬೇತೆ ಲೇಸ್ ನಡತ್ಂಡ್. ಗೌರವ ಪ್ರಧಾನ ಕಾರ್ಯದರ್ಶಿ ಸರಿತಾ ಸುರೇಶ್ ನಾಯಕ್ ಬೊಕ್ಕ ಪ್ರಮೀಳಾ ಆಚಾರ್ಯ ಲೇಸ್ ನ್ ಸುಧಾರಿಕೆ ಮಲ್ತೆರ್. ಜತೆ ಕಾರ್ಯದರ್ಶಿ ಶಾಂತ ಎನ್ ಶೆಟ್ಟಿ ಸಂಘದ ಚಟುವಟಿಕೆಲೆನ ಬಗೆಟ್ಟ್ ಪೊಲಬು ಕೊರಿಯೆರ್.

ಯುವ ವಿಭಾಗದ ಶಕುಂತಲಾ ಆಚಾರ್ಯ ಮೇರ್ ತುಳುನಾಡ್ ದ ಬಗೆಟ್ಟ್ ಸಂಕ್ಷಿಪ್ತವಾದ್ ಪಾತೆರಿಯೆರ್. ಸಂಘದ ಯುವ ವಿಭಾಗದ ಮಾಜಿ ಕಾರ್ಯಾಧ್ಯಕ್ಷೆರ್ ಸುಚಲತಾ ಪೂಜಾರಿ, ವಿದ್ಯಾ ಆಚಾರ್ಯ, ಹರಿಣಾಕ್ಷಿ ಶೆಟ್ಟಿ, ಸುಗುಣಾ ಎಸ್. ಬಂಗೇರ ಲೇಸ್ ದ ಯಶಸ್ಸ್ ಗ್ ಸಹಕಾರ ಕೊರಿಯೆರ್. ಮಾನ್ವಿ ಶೆಟ್ಟಿ ಸೊಲ್ಮೆ ಸಂದಾಯೆರ್. ಸಂಘದ ಸದಸ್ಯೆರ್ ಪರಿಸರದ ತುಳು ಕನ್ನಡಿಗೆರ್ ಬೊಕ್ಕ ಮಲಾಡ್ ಶ್ರೀ ವರಮಹಾಲಕ್ಷ್ಮಿ ಪೂಜಾ ಸಮಿತಿದ ಮಹಿಳಾ ವಿಭಾಗದ ಸದಸ್ಯೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದಿತ್ತೆರ್.

ರೋಟರಿ ವಲಯ ಅಧಿಕಾರಿಯಾದ್ ವಿಶ್ವನಾಥ ನಡುತೋಟ ನೇಮಕ

ರೋಟರಿ ಜಿಲ್ಲೆ 31,81 ವಲಯ 5 ತ್ತ 2024-25 ನೇ ಸಾಲ್ ಗ್ ಜೋನಲ್ ಲೆಫ್ಟಿನೆಂಟ್ ಆದ್ ಸುಬ್ರಹ್ಮಣ್ಯ ರೋಟರಿ ಕ್ಲಬ್ ದ ಪೂರ್ವಾಧ್ಯಕ್ಷೆರ್ ರೊ.ವಿಶ್ವನಾಥ ನಡುತೋಟ ಮೇರ್ ನೇಮಕ ಆತೆರ್.

ಮೆರೆನ ಅಧ್ಯಕ್ಷ ಅವಧಿಡ್ ಸುಬ್ರಹ್ಮಣ್ಯ ರೋಟರಿ ಕ್ಲಬ್ ಗ್ ಸುರುತ್ತ ಸರ್ತಿ ಅಂತರರಾಷ್ಟ್ರೀಯ ಸೈಟೇಶನ್ ಅವಾರ್ಡ್ ಬೈದ್ಂಡ್. ಮೇರ್ ಜೆಸಿಐ ಸುಬ್ರಹ್ಮಣ್ಯ ಕುಕ್ಕೆ ಸ್ಥಾಪಕ ಅಧ್ಯಕ್ಷೆರ್ ಸೀನಿಯರ್ ಚೇಂಬರ್ ಇಂಟರ್ ನ್ಯಾಷನಲ್ ಸುಬ್ರಹ್ಮಣ್ಯ ಲಿಜೆನ್ ದ ಸ್ಥಾಪಕ ಅಧ್ಯಕ್ಷೆರ್ ಬೊಕ್ಕ ಸುಬ್ರಹ್ಮಣ್ಯ ಪ್ರೆಸ್ ಕ್ಲಬ್ ದ ಸ್ಥಾಪಕ ಅಧ್ಯಕ್ಷೆರ್ ಆತೆರ್.

ಹಿರಿಯ ನಟೆ ದ್ವಾರಕೀಶ್ ನನ ನೆಂಪು ಮಾತ್ರ

ಕನ್ನಡದ ಹಿರಿಯ ನಟೆ ದ್ವಾರಕೀಶ್ (81) ಮೇರ್ ಇನಿ ತಿಗಲೆ ಬೇನೆಡ್ ದೇವೆರೆ ಪಾದೊ ಸೇರಿಯೆರ್.

ನಿರ್ದೇಶಕೆರಾದ್, ನಿರ್ಮಾಪಕೆರಾದ್ ಚಿತ್ರರಂಗಡ್ ಸೇವೆ ಸಂದಾದೆರ್. ಹುಷಾರ್ ಇಜ್ಜಂದೆ ಆಯಿನ ಮೇರ್, ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋತೆರ್.

ಕನ್ನಡದ ಕುಳ್ಳೆ ಪನ್ಪುನ ಪುಗರ್ತೆ ಪಡೆಯಿನ ಮೆರೆನ ಸಾವುದ ಬಗೆಟ್ಟ್ ಕುಟುಂಬಸ್ಥೆರ್ ತೆರಿಪಾದೆರ್.

ಸುರತ್ಕಲ್ ಪಟ್ಲ ಫೌಂಡೇಶನ್ ಘಟಕದ 4ನೇ ವರ್ಷದ ಉಚ್ಚಯ

ಸುರತ್ಕಲ್: ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ (ರಿ.) ಸುರತ್ಕಲ್ ಘಟಕದ 4ನೇ ವರ್ಷದ ಉಚ್ಚಯ ಸುರತ್ಕಲ್ ಬಂಟರ ಭವನಡ್ ನಡತ್ಂಡ್.

ಲೇಸ್ ನ್ ತುಡರ್ ಅರ್ಲಾದ್ ಉದಿಪನ ಮಲ್ತಿನ ಯಕ್ಷಧ್ರುವ ಯಕ್ಷ ಶಿಕ್ಷಣ ಪ್ರಧಾನ ಸಂಚಾಲಕೆರ್ ವಾಸುದೇವ ಐತಾಳ್ ಯುಎಸ್ ಎ ಪಾತೆರ್ದ್, “ಅಮೇರಿಕಡ್ ಯಕ್ಷಗಾನ ಮಲ್ಪಾವುನ ಮುಕೇನ ಅಲ್ಪದ ಜನಕ್ಲೆಗ್ ನಮ್ಮ ತುಳುನಾಡ್ ದ ಸಂಸ್ಕೃತಿಯ ಪರಿಚಯ ಮಲ್ತಿನ ಕೀರ್ತಿ ಪಟ್ಲ ಸತೀಶ್ ಶೆಟ್ಟಿ ಮೆರೆಗ್ ಸಂದೊಡು. ಯಕ್ಷಧ್ರುವ ಟ್ರಸ್ಟ್ ಈ ಮುಕೇನ ಕಡಲಾಯೆರೆಡ್ ಲ ಯಕ್ಷಪ್ರೇಮಿಲೆನ ಬಾಂಧವ್ಯಡ್ ಉಂಡು. ಯುರೋಪ್ ರಾಷ್ಟ್ರಲೆಡ್ ಪಟ್ಲ ಕೂಟದೊಟ್ಟಿಗೆ ಸಂಚಾರ ನಡಪಾಯಿನವು ಎನ್ನ ಜೀವನದ ಮರಪರೆ ಅವಂದಿನ ದಿನಕುಲು, ನನಲ ಅಮೇರಿಕಡ್ ಪಟ್ಲೆರೆನ ಲೇಸ್ ಗ್ ಸಹಕಾರ ಕೊರ್ಪೆ” ಪಂದ್ ಪಂಡೆರ್.

ಯಕ್ಷಧ್ರುವ ಪಟ್ಲ ಫೌಂಡೇಶನ್ ದ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ಟಿ ಪಾತೆರ್ದ್, “ಎನನ್ ಅಪ್ಪೆ ಕಟೀಲ್ ದುರ್ಗೆ ಯಕ್ಷಗಾನ ಕಲಾವಿದೆರೆನ ಸೇವೆ ಮಲ್ಪುಲೆಕ್ಕ ಅನುಗ್ರಹ ಕೊರ್ತಲ್, ಆಲೆನ ಆಣತಿದಂಚೆನೆ ಯಾನ್ ಇನಿ ಯಕ್ಷಗಾನ ಕಲಾವಿದೆರೆಗ್ ಸಕಾಯ ಮಲ್ತೊಂದು ಉಲ್ಲೆ. ಸುರತ್ಕಲ್ ಡ್ ಸಂಘಟನೆದ ಘಟಕ ಮಸ್ತ್ ಪೊರ್ಲು ಕೆಲಸ ಮಲ್ತೊಂದು ಉಂಡು. ಉಂದುವೇ ರೀತಿ ನನಾತ್ ಎಡ್ಡೆ ಕೆಲಸನ್ ಸುರತ್ಕಲ್ ಘಟಕ ಮಲ್ಪಡ್” ಪಂದ್ ಎಡ್ಡೆಪ್ಪು ಬಯಕಿಯೆರ್.

ಚಾವಡಿಡ್ ಪಟ್ಲ ಫೌಂಡೇಶನ್ ಸುರತ್ಕಲ್ ಘಟಕದ ಗೌರವಾಧ್ಯಕ್ಷೆರ್ ಮಹಾಬಲ ಪೂಜಾರಿ ಕಡಂಬೋಡಿ, ಅಧ್ಯಕ್ಷೆರ್ ಸುಧಾಕರ ಎಸ್. ಪೂಂಜ, ನಿಕಟಪೂರ್ವ ಅಧ್ಯಕ್ಷೆರ್ ಸಂತೋಷ್ ಶೆಟ್ಟಿ, ಉಪಾಧ್ಯಕ್ಷೆರ್ ಎಂ.ಜಿ. ರಾಮಚಂದ್ರ ರಾವ್, ಲೀಲಾಧರ ಶೆಟ್ಟಿ ಕಟ್ಲ, ಪಿ.ಕೃಷ್ಣಮೂರ್ತಿ ಸುರತ್ಕಲ್, ಚಂದ್ರಶೇಖರ ಮಾಡ ಕುದ್ರಾಡಿಗುತ್ತು, ಮಹಿಳಾ ಘಟಕದ ಗೌರವಾಧ್ಯಕ್ಷೆರ್ ಆರತಿ ಆಳ್ವ, ಗೋವಿಂದ ದಾಸ ಕಾಲೇಜ್ ನಿವೃತ್ತ ಉಪ ಪ್ರಾಂಶುಪಾಲೆರ್ ಪ್ರೊ. ರಮೇಶ್ ಭಟ್ ಯಸ್.ಜಿ., ಸಂಚಾಲಕೆರ್ ವಿನಯ ಆಚಾರ್, ಕೋಶಾಧಿಕಾರಿ ಟಿ ಎನ್ ರಮೇಶ್, ಟ್ರಸ್ಟಿಲು ಕೃಷ್ಣ ಶೆಟ್ಟಿ ಶ್ರೀ ದ್ವಾರ, ಸಹನಾ ರಾಜೇಶ್ ರೈ, ದೇವೇಂದ್ರ ಕೆ ಶೆಟ್ಟಿ, ನಾರಾಯಣ ಶೆಟ್ಟಿ ಕಟ್ಲ ಪಾಲ್ ಪಡೆದಿತ್ತೆರ್.

ಈ ಪೊರ್ತುಡು ಹಿರಿಯ ಯಕ್ಷಗಾನ ಕಲಾವಿದೆರ್ ನೆಲ್ಲಿಕಟ್ಟೆ ನಾರಾಯಣ ಹಾಸ್ಯಗಾರ್ ಮೆರೆಗ್ ಮಾನಾದಿಗೆ ಮಲ್ತೆರ್. ಹಿರಿಯ ತಾಳಮದ್ದಳೆ ಕಲಾವಿದೆರ್ ಮಹಾಬಲ ಶೆಟ್ಟಿ ಜೋಕಟ್ಟೆ, ಹಿರಿಯ ತಾಳಮದ್ದಳೆ ಕಲಾವಿದೆ ಜಯಂತಿ ಹೊಳ್ಳ ಕೃಷ್ಣಾಪುರ, ಹಿರಿಯ ತಾಳಮದ್ದಳೆ ಕಲಾವಿದೆರ್ ವಾಸುದೇವ ಆಚಾರ್ಯ ಕುಳಾಯಿ, ಯಕ್ಷಗಾನ ಕಲಾವಿದೆರ್ ಕರುಣಾಕರ ಪೂಜಾರಿ ಮಧ್ಯ, ಯಕ್ಷಗಾನ ಸೇವಾಕರ್ತೆರ್ ಲಿಂಗಪ್ಪ ಶೆಟ್ಟಿ ಕೃಷ್ಣಾಪುರ ಮೊಕ್ಲೆಗ್ ಸನ್ಮಾನ ನಡತ್ಂಡ್.

ಸಂಘಟನೆದ ಮುತಾಲಿಕೆಡ್ ಇಂಚಿಪ್ಪ ದುರ್ಮರಣ ಆಯಿನ ಯಕ್ಷ ಸಿರಿ ತರಗತಿದ ವಿದ್ಯಾರ್ಥಿ ದಿ| ಯಶ್ವಿತ್ ಅಗರಮೇಲು ಮೆರೆನ ಪೋಷಕೆರೆಗ್ ಆರ್ಥಿಕ ಸಕಾಯ ಮಲ್ತೆರ್.

ಪಟ್ಲ ಫೌಂಡೇಶನ್ ಟ್ರಸ್ಟ್ ಗ್ ಪೊಸ ಟ್ರಸ್ಟಿಲಾದ್ ಚರಣ್ ಜೆ ಶೆಟ್ಟಿ ಕುಳಾಯಿಗುತ್ತು, ರವಿ ಶೆಟ್ಟಿ ಸುರತ್ಕಲ್, ಧನಪಾಲ್ ಶೆಟ್ಟಿಗಾರ್ ತಡಂಬೈಲ್, ಸವಿತಾ ಭವಾನಿಶಂಕರ್ ಶೆಟ್ಟಿ ಬಾಳ ಸೇರ್ಪಡೆ ಆಯೆರ್.

ಯಕ್ಷಧ್ರುವ ಪಟ್ಲ ಫೌಂಡೇಶನ್ ಕೇಂದ್ರ ಸಮಿತಿ ಸಂಘಟನಾ ಕಾರ್ಯದರ್ಶಿ ಜಗನ್ನಾಥ ಶೆಟ್ಟಿ ಬಾಳ ವರದಿ ಓದಿಯೆರ್. ಅಧ್ಯಕ್ಷೆರ್ ಸುಧಾಕರ್ ಎಸ್. ಪೂಂಜಾ ಎದ್ಕೊನಿಯೆರ್.ಪ್ರಧಾನ ಕಾರ್ಯದರ್ಶಿ ಬಾಳ ಗಂಗಾಧರ ಪೂಜಾರಿ ಚೇಳಾಯರು ಸೊಲ್ಮೆ ಸಂದಾಯೆರ್. ಸುಧಾ ಶೆಟ್ಟಿ ಲೇಸ್ ನ್ ಸುಧಾರಿಕೆ ಮಲ್ತೆರ್. ಬೊಕ್ಕ ಪಾವಂಜೆ ಮೇಳದಕ್ಲೆರ್ದ್ ಅಯೋಧ್ಯಾ ದೀಪಾ ಯಕ್ಷಗಾನ ಪ್ರದರ್ಶನ ಆಂಡ್.

ಪಟ್ಲ ಸಂಭ್ರಮದ ಲೆಪ್ಪೋಲೆ ಬುಡುಗಡೆ:

ಈ ಪೊರ್ತುಡು ಮೇ 26 ಐತಾರ ಅಡ್ಯಾರ್ ಗಾರ್ಡನ್ ಡ್ ನಡಪುನ “ಪಟ್ಲ ಸಂಭ್ರಮ” ಲೇಸ್ ದ ಲೆಪ್ಪೋಲೆನ್ ಲೇಸ್ ಡ್ ಬುಡುಗಡೆ ಮಲ್ತೆರ್.

ಮುಂಗೆ ಬೈದಿನ ಬಟಾಟೆ ತಿನಿಯೆರೆ ಬಲ್ಲಿ!

ಮುಂಗೆ ಬೈದಿನ ಬಟಾಟೆ ತಿಂದ್ಂಡ ಜೀರ್ಣಕಾರಿ ಸಮಸ್ಯೆ ಸುರು ಆಪುಂಡು.

ನರಮಂಡಲದ ಮಿತ್ತ್ ದುಷ್ಪರಿಣಾಮ ಬೂರುಂಡು.‌ ನೆತ್ತೆರ್ ದ ಒತ್ತಡ ಜಾಸ್ತಿ ಆಪುಂಡು. ಇಂಚಿನ ಬಟಾಟೆನ್ ಮಧುಮೇಹಿಲು ತಿಂದ್ಂಡ, ನನಾತ್ ಎಚ್ಚದ ಸಮಸ್ಯೆ ಸುರು ಆಪುಂಡು.

ನೆರ್ದ್ ಜ್ವರಲ ಬರ್ಪುಂಡು. ಬಂಜಿನಕುಲು ತಿಂದ್ಂಡ ಗಂಭೀರ ಆರೋಗ್ಯ ಸಮಸ್ಯೆನ್ ಎದುರಿಸಾವೊಡಾಪುಂಡು. ಪಚ್ಚೆ ಬಟಾಟೆಲ ಆರೋಗ್ಯಗ್ ಎಡ್ಡೆ ಅತ್ತ್.‌ ಮುಂಗೆ ಬೈದಿನ ಬಟಾಟೆಡ್ ‌ವಿಷತ್ವ ಅಂಶ ಇಪ್ಪುಂಡು ಪಂದ್ ತಜ್ಞೆರ್ ಪಂತೆರ್.