ತುಳು ಸುದ್ದಿ

ಸೂಪರ್ ಹಿಟ್ ನಾಟಕ “ಕಥೆ ಎಡ್ಡೆಂಡು” 100ನೇ ಪ್ರದರ್ಶನ

ಮಂಜೇಶ್ವರ ಶಾರದಾ ಆರ್ಟ್ಸ್ ಕಲಾವಿದೆರ್ (ರಿ.) ತುಳು ರಂಗಭೂಮಿಡ್ ಸಂಚಲನ ಪುಟ್ಟಾವೊಂದಿಪ್ಪುನ ಕೂಟ.

ಸಾಮಾಜಿಕ ಹಾಸ್ಯ ನಾಟಕದ ಮುಖೇನ ಕರಿನ 24 ವರ್ಷೊರ್ದಿಂಚಿ ರಂಗಭೂಮಿಡ್ ಕಲಾ ಸೇವೆ ಮಲ್ಪುನ ಈ ಕೂಟ ಈ ವರ್ಷ 25ನೇ ವರ್ಷದ ಬೊಳ್ಳಿ ಪರ್ಬದ ಅಟ್ಟಣೆಡುಂಡು. ರಂಗಭೂಮಿಡ್ ಇತಿಹಾಸ ಬರೆಯೆರೆ ಪಿದಾಡ್ದಿನ ಈ ವರ್ಷದ ಸೂಪರ್ ಹಿಟ್ ನಾಟಕ “ಕಥೆ ಎಡ್ಡೆಂಡು” ಕಿನ್ಯ ಅವಧಿಡ್ ನೂದು ಪ್ರದರ್ಶನ ಕೊರಿನ ಸುರುತ್ತ ತುಳು ಸಾಮಾಜಿಕ ನಾಟಕ ಪಂಡ ತಪ್ಪಾವಂದ್. ಎಪ್ರಿಲ್ 16ನೇ ತಾರೀಕ್ ದಾನಿ ಅಲಂಕಾರ್ ಡ್ 100ನೇ ಪ್ರದರ್ಶನ ಕೊರ್ಪಿನ ಈ ನಾಟಕ ಎಪ್ರಿಲ್ 20ನೇ ತಾರೀಕ್ ದಾನಿ ಕದಿರೆದ ಮಂಜುನಾಥನ ಪುಣ್ಯ ಮಣ್ಣ್ ಡ್ ಶತ ಸಂಭ್ರಮ ಕಾರ್ಯಕ್ರಮಡೊಟ್ಟು ವಿಶೇಷ ಪ್ರದರ್ಶನ ಕೊರಿಯೆರೆ ಉಲ್ಲೆರ್.

ಈ ಕಾರ್ಯಕ್ರಮೊಟು ತುಳುನಾಡ್ದ ಮಾತಾ ದಿಗ್ಗಜ ರಂಗ ಕಲಾವಿದೆರ್, ನಿರ್ದೇಶಕೆರ್, ನಾಟಕ ರಚನಾಕಾರೆರ್ ಪಾಲ್ ಪಡೆಯೆರೆ ಉಲ್ಲೆರ್. ಶಾರದಾ ಆರ್ಟ್ಸ್ ಕೂಟದ ಗುರ್ಕಾರೆ ಗಡಿನಾಡ ಕಲಾನಿಧಿ ಕೃಷ್ಣ ಜಿ ಮಂಜೇಶ್ವರ ಮೆರೆನ ಮುತಾಲಿಕೆಡ್ ಜೆ ಪಿ ತುಮಿನಾಡ್ ರೆನ ಬರವು ಬೊಕ್ಕ ದಕ್ಷ ನಿರ್ದೇಶನೊಡು ಮೂಡ್ದ್ ಬೈದಿನ ಸೂಪರ್ ಹಿಟ್ ನಾಟಕ ಕಥೆ ಎಡ್ಡೆಂಡು ಒಂಜಿ ಸಾರ್ವಕಾಲಿಕ ದಾಖಲೆ ಬರೆಪಿನೆಟ್ ಸಂಶಯ ಇಜ್ಜಿ.

ತುಳುವ ಸೌರಭ ಪ್ರಕಾಶ್ ಕೆ ತುಮಿನಾಡ್ ಬೊಕ್ಕ ನಮಿತಾ ಕಿರಣ್ ಮುಖ್ಯ ಪಾತ್ರಧಾರಿಲಾದ್ ಅಭಿನಯ ಮಲ್ತಿನ ಈ ನಾಟಕೊಡು
ಪ್ರಭಾಕರ್ ಕೊಲ್ಯ, ಅಶ್ವಥ್ ಬಗಂಬಿಲ, ವಿಜಯ್ ಮಯ್ಯ ಐಲ, ಸೂರಜ್ ಸಾಲ್ಯಾನ್, ನಯನ ಸಾಲ್ಯಾನ್, ಪ್ರಶಾಂತ್ ಅಂಚನ್, ರಾಜೇಶ್ ಮುಗುಳಿ, ಉತ್ಸವ್ ವಾಮಂಜೂರು, ಸುರೇಶ್ ವಿಟ್ಲ, ರವಿ ರೈ ಕುಂಬ್ರ, ವೇಣು ಶೆಟ್ಟಿ ಮುಲ್ಕಿ, ದಯಾನಂದ್ ಸಿದ್ಧಕಟ್ಟೆ ಪೊರ್ಲುಡೆ ತನ್ಕುಲೆನ ಪಾತ್ರಗ್ ಜೀವ ಕೊರ್ತೆರ್.

ಕಥೆಕ್ ಬೋಡಾಪಿನ ಪೊರ್ಲುದ ಸಾಹಿತ್ಯನ್ ರಾಜೇಶ್ ಮುಗುಳಿ ಬೊಕ್ಕ ಹಿನ್ನೆಲೆ ಸಂಗೀತನ್ ಗಣೇಶ್ ಕೊಡಕ್ಕಲ್ ಪ್ರೇಕ್ಷಕೆರೆನ ಮನಸ್ಸ್ ಗ್ ನಾಟುಲೆಕ ಕೊರ್ತೆರ್. ಸಮಾಜದ ವಾಸ್ತವಿಕತೆಗ್ ಕೈತಲಾಪಿನ ನನಾತ್ ಕಥೆಕುಲು ಜೆ ಪಿ ತುಮಿನಾಡ್ ರೆನ ಬರವುದ ಮುಖೇನ ನಾಟಕ ರೂಪೊಡು ತುಳುನಾಡೊರ್ಮೆ ಶತಕ ಬಾರಿಸಾವಡ್.

✍️ ಸಂದೇಶ್ ಕರ್ಕೇರ

ಬೊಂಬೈ ಶ್ರೀ ಸಸಿಹಿತ್ಲು ಭಗವತೀ ತೀಯಾ ಸಂಘ, ಶ್ರೀ ಭಗವತೀ ಕೃಪಾ ಭಾಂಡೂಪ್ ದ ಮುತಾಲಿಕೆಡ್ 69ನೇ ವರ್ಷದ ಮಹಾಪೂಜೆ

ಬೊಂಬೈ: ಭಾಂಡೂಪ್ ಪಶ್ಚಿಮದ ಸರ್ವೋದಯ ನಗರದ ಬೊಂಬೈ ಶ್ರೀ ಸಸಿಹಿತ್ಲು ಭಗವತೀ ತೀಯಾ ಸಂಘ (ರಿ.) ದ 69ನೇ ವರ್ಷದ ಮಹಾಪೂಜೆ ಎ.13 ಸನಿಯಾರದಾನಿ ತ್ರಿಮೂರ್ತಿ ನಾಟ್ಯ ಮಂದಿರ, ಸರ್ದಾರ್ ಪ್ರತಾಪ್ ಸಿಂಗ್ ಇಂಡಸ್ಟ್ರೀಯಲ್ ಎಸ್ಟೇಟ್ ಭಾಂಡೂಪ್ (ಪ.) ಡ್ ಗೌಜಿಡ್ ನಡತ್ಂಡ್.

ಬೊಲ್ಪುಗು ಗಣಹೋಮ, ಬಯ್ಯಗ್ ಕಲಶ ಪ್ರತಿಷ್ಠೆ, ಅಲಂಕಾರ ಪೂಜೆ, ಪೊಂಜೋವುಲೆರ್ದ್ ಹಳದಿ ಕುಂಕುಮ, ಸ್ವಾಮಿ ನಿತ್ಯಾನಂದ ಶ್ರೀ ಕೃಷ್ಣ ಭಜನಾ ಮಂಡಳಿ ಭಾಂಡೂಪ್ ದಕ್ಲೆರ್ದ್ ಭಜನೆ ನಡತ್ಂಡ್.

ಈ ಪೊರ್ತುಡು ಸಂಸ್ಥೆದ ಅಧ್ಯಕ್ಷೆರ್ ಸಿಎ ಚಂದ್ರಹಾಸ‌ ಪಾಲನ್ ಅಧ್ಯಕ್ಷತೆಡ್ ನಡತಿನ ಧಾರ್ಮಿಕ ಸಭಾ ಲೇಸ್ ಡ್ ಸಂಘದ ಮಹಿಳಾ ವಿಭಾಗದ ಮಾಜಿ ಅಧ್ಯಕ್ಷೆರ್ ಶಶಿಕಲಾ ಜಿ. ಬಂಗೇರ, ಸಂಘದ ಅಭಿವೃದ್ಧಿಗ್ ಸಹಕಾರ ಮಲ್ತೊಂದು ಬತ್ತಿನ ಹಿರಿಯ ಗೌರವಾಧ್ಯಕ್ಷೆರ್ ಲಾಜರ್ ಟಿ.ಎಮ್ ಕೋಟ್ಯಾನ್ ಮೆರೆಗ್ ಸನ್ಮಾನ ನಡತ್ಂಡ್.

ಲೇಸ್ ನ್ ಪ್ರೋಗ್ರಾಮ್ ಬೊಕ್ಕ ಪಬ್ಲಿಕ್ ರಿಲೇಶನ್ ಸಮಿತಿದ ರಾಜಾ ಆರ್ ತುಂಬೆ, ಪ್ರಿಯಾಂಕ ಕೋಟ್ಯಾನ್ ಬೊಕ್ಕ ಕಾರ್ತಿಕೇಯ ರಾಜ ತುಂಬೆ ಸುಧಾರಿಕೆ ಮಲ್ತೆರ್.

ಧಾರ್ಮಿಕ ಸಭೆತ್ತ ಬೊಕ್ಕ ಪ್ರಧಾನ ಅರ್ಚಕೆರ್ ಸದಾಶಿವ ಡಿ.‌ಕುಂದರೆರ್ದ್ ಬಲಿ ಉಚ್ಚಯ ನಡತ್ಂಡ್. ಅವೆರ್ದ್ ಬೊಕ್ಕ ಮಹಾಮಂಗಳಾರತಿ, ತೀರ್ಥ ಪ್ರಸಾದ, ಅನ್ನ ಪ್ರಸಾದ ಸೇವೆ ನಡತ್ಂಡ್. ಸಾರರ್ದ್ ಎಚ್ಚ ಭಕ್ತೆರ್, ಉದ್ಯಮಿಲು, ತೀಯಾ ಸಮಾಜದ ಬಾಂಧವೆರ್, ಶ್ರೀ ಸಸಿಹಿತ್ಲು ಶ್ರೀ ಭಗವತೀ ಕ್ಷೇತ್ರದ ಭಕ್ತೆರ್ ಮಹಾಪೂಜೆ ಬೊಕ್ಕ ಅನ್ನ‌ ಪ್ರಸಾದ ಸೇವೆಡ್ ಪಾಲ್ ಪಡೆದಿತ್ತೆರ್. ನಾಗಸ್ವರ ವಾದನಡ್ ದಿನೇಶ್ ಕೋಟ್ಯಾನ್ ಬಳಗ ಸೇವೆನ್ ಸಂದಾಯೆರ್.

69ನೇ ವರ್ಷದ ಮಹಾಪೂಜೆದ ಯಶಸ್ವಿಗ್ ಬೊಂಬೈ ಶ್ರೀ ಸಸಿಹಿತ್ಲು ಭಗವತೀ ತೀಯಾ ಸಂಘದ ಗೌರವಾಧ್ಯಕ್ಷೆರ್ ಲಾಝರ್ ಟಿ. ಎಮ್ ಕೋಟ್ಯಾನ್, ಅಧ್ಯಕ್ಷೆರ್ ಚಂದ್ರಹಾಸ್ ಕೆ.ಪಾಲನ್, ಉಪಾಧ್ಯಕ್ಷೆರ್ ಆನಂದ್ ಜೆ ಬಂಗೇರ, ಗೌ.ಪ್ರ ಕಾರ್ಯದರ್ಶಿ ಸುಧಾಕರ್ ಟಿ ಬೆಳ್ಚಡ, ಗೌ.ಕೋಶಾಧಿಕಾರಿ ಮೃತ್ಯುಂಜಯ ಎಮ್ ಬೆಳ್ಚಡ, ಪೂಜಾ ಕಮಿಟಿ ಅಧ್ಯಕ್ಷೆರ್ ವಸಂತ್ ಬಿ. ಕರ್ಕೇರ, ಮಹಿಳಾ ವಿಭಾಗದ ಅಧ್ಯಕ್ಷೆರ್ ರೋಹಿಣಿ ಎಸ್ ಬಂಗೇರ, ಪ್ರಧಾನ ಅರ್ಚಕೆರ್ ಸದಾಶಿವ್ ಡಿ ಕುಂದರ್, ಸಹಾಯಕ ಅರ್ಚಕೆರ್ ಶಂಕರ್ ಎಸ್ ಪಾಲನ್, ಪದ್ಮನಾಭ ಟಿ ಬಂಗೇರ, ಲಕ್ಷ್ಮಣ್ ಪಾಲನ್, ಸುಧಾಕರ್ ಎಮ್ ಕೋಟ್ಯಾನ್, ಸಲಹೆಗಾರೆ ಪ್ರಕಾಶ್ ಕೆ ಅಮೀನ್, ಸದಸ್ಯತ್ವ ಸಮಿತಿದ ಟಿ ಆರ್ ಸಾಲ್ಯಾನ್, ಶೈಕ್ಷಣಿಕ ಸಮಿತಿದ ಪ್ರವೀಣ್ ಎಲ್ ಕೋಟ್ಯಾನ್, ಆಡಳಿತ ಸಮಿತಿದ ಕವಿತಾ ಪಿ ಕೋಟ್ಯಾನ್, ಸದಸ್ಯೆರಾಯಿನ ಎಚ್ ಶ್ರೀಧರ್, ಜಯ ಎಮ್ ಕೋಟ್ಯಾನ್, ಅಚ್ಚುತ ಎ ಕೋಟ್ಯಾನ್, ಯಜ್ಞೇಶ್ವರ್ ಕೆ ಕೋಟ್ಯಾನ್, ಸದಾಶಿವ್ ಬಿ ಕೋಟ್ಯಾನ್, ಮೋಹನ್ ಬಿ ಕೋಟ್ಯಾನ್, ಬಾಲಕೃಷ್ಣ ಎಮ್ ಬಂಗೇರ, ಪುರಂದರ ಸಾಲ್ಯಾನ್, ಶಶಿಕಲಾ ಜಿ ಬಂಗೇರ, ಲೀಲಾವತಿ ಯು ಬೋಳಾರ್, ಪ್ರೀತಿ ಹೆಚ್ ಮಂಜೇಶ್ವರ, ಶಶಿಕಲಾ ಎಸ್ ಪಾಲನ್, ಆಶಾ ಎಸ್ ಸಾಲ್ಯಾನ್, ಸವಿತಾ ಪುತ್ರನ್, ನಯನಾ ಬಂಗೇರ, ಅನುಸೂಯ ಆರ್ ತುಂಬೆ, ತುಳಸಿ ಕೋಟ್ಯಾನ್, ಜೀವನ್ ಎಸ್ ಉಚ್ಚಿಲ್ ಸಹಕಾರ ಕೊರಿಯೆರ್.

ಬೆಹರಿನ್ ಡ್ ಕರ್ನಾಟಕ ಅನಿವಾಸಿ ಭಾರತೀಯೆರೆನ ವೇದಿಕೆ ಉದಿಪನ

ಬೆಹರಿನ್ ಡ್ ಪೊಸತಾದ್ ಕರ್ನಾಟಕ ಅನಿವಾಸಿ ಭಾರತೀಯೆರೆನ ವೇದಿಕೆ (ಕೆಎನ್‌ಆರ್‌ಐ) ಸ್ಥಾಪನೆ ಆತ್ಂಡ್.

ನೆತ್ತ ಅಧ್ಯಕ್ಷೆರಾದ್ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಗೆಂದಿನ ರಾಜ್ ಕುಮಾರ್ ಭಾಸ್ಕರ್ ಆಯ್ಕೆ ಆತೆರ್. ಉಪಾಧ್ಯಕ್ಷೆರಾದ್ ವಿಜಯ ನಾಯ್ಕ್, ಪ್ರಧಾನ ಕಾರ್ಯದರ್ಶಿಯಾದ್ ರೋಶನ್ ಲೂಯಿಸ್, ಖಜಾಂಚಿಯಾದ್ ಮಂಗೇಶ ದೇಸಾಯಿ, ಸಹಾಯಕ ಕಾರ್ಯದರ್ಶಿಯಾದ್ ಜಮಾಲುದ್ದೀನ್ ವಿಟ್ಲ, ಕಾರ್ಯಕಾರಿ ಸಮಿತಿದ ಸದಸ್ಯೆರಾದ್ ಮಲ್ಲಿಕಾರ್ಜುನ್ ಪಾಟೀಲ್, ರಾಘವೇಂದ್ರ ಪ್ರಸಾದ್, ಗಣೇಶ್ ಮಾಣಿಲ ಅಜತ್ ಬೈದೆರ್.

ಹಿರಿಯ ಸಲಹೆಗಾರೆರಾದ್ ಉದ್ಯಮಿ ಬೊಕ್ಕ ಬೆಹರಿನ್ ಕ್ರಿಕೆಟ್ ಫೆಡರೇಷನ್ ದ ಸಲಹಾ ಸಮಿತಿದ ಅಧ್ಯಕ್ಷೆರ್ ಮಹಮ್ಮದ್ ಮನ್ಸೂರ್, ಕನ್ನಡ ಸಂಘದ ಮಾಜಿ ಅಧ್ಯಕ್ಷೆರ್ ಆಸ್ಟಿನ್ ಸಂತೋಷ್ ಬೊಕ್ಕ ರಾಜೇಶ್ ಶೆಟ್ಟಿ ನಿಯುಕ್ತಿ ಆತೆರ್.

ಸಮಿತಿದಕುಲು ಬೆಹರಿನ್ ರಾಯಭಾರಿಲಾಯಿನ ವಿನೋದ್ ಕೆ. ಜೇಕಬ್ ಮೆರೆನ್ ಭೇಟಿಯಾದ್ ಕರ್ನಾಟಕ ಸರಕಾರದ ಸಹಕಾರದೊಟ್ಟಿಗೆ ನನದ ದಿನಟ್ಟ್ ನಡಪಾಯೆರೆ ಇಪ್ಪುನ ಲೇಸ್ ದ ಬಗೆಟ್ಟ್ ತೆರಿಪಾಯೆರ್.

ಅನಿವಾಸಿ ಕನ್ನಡಿಗ ವೇದಿಕೆದ ನಿಯೋಗನ್ ಭೇಟಿ ಆಯಿನ ರಾಯಭಾರಿಲು, ಬೆಹರಿನ್ ಡ್ ಕರಿನ ನಾಲ್ ದಶಕರ್ದಿಂಚ ಸಾಮಾಜಿಕ ಸೇವೆಡ್ ಇತ್ತ್ ದ್, ಕರ್ನಾಟಕದ ಬೇತೆ ಬೇತೆ ಜಿಲ್ಲೆಲೆರ್ದ್ ಬತ್ತಿನ ಕನ್ನಡಿಗೆರ್ ಸಮಿತಿಡ್ ಗುರುತಿಸಾಯಿನ ಬಗೆಟ್ಟ್ ತೆರಿದ್ ಕುಸಿ ಪಡೆಯೆರ್. ರಾಯಭಾರಿ ಕಚೇರಿರ್ದ್ ಸಾಧ್ಯವಾಯಿನ ಮಾತ ಸಹಕಾರನ್ ಕೊರ್ಪ ಪಂದ್ ಪಂಡೆರ್.

ರೇಡಿಯೊ ಮಣಿಪಾಲಡ್ ಯೋಗ ಸುಯೋಗ ಲೇಸ್

ಲಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಸಮುದಾಯ ಬಾನುಲಿಡ್ ಯೋಗ ಸುಯೋಗ ಸರಣಿ ಲೇಸ್ ದ 55ನೇ ಸಂಚಿಕೆ ಎ.15 ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಂಡ್.

ಈ ಲೇಸ್ ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನಡ್ ಯೋಗ ಶಿಕ್ಷಕೆರಾಯಿನ ಆರ್ ಶಿವಕುಮಾರ್ ಪಾಲ್ ಪಡೆಯೆರ್. ಎ.16 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಫ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಬೊಲ್ತೇರ್ ಡ್ ಭಾರೀ ಗಾಳಿ ಬರ್ಸಗ್ ಬೂರಿನ 7 ಕರೆಂಟ್ ಕಂಬ

ಕೊಕ್ಕಡ: ಬೊಲ್ತೇರ್ ದ ಕೊಕ್ಕಡ ಹೋಬಳಿದ ಶಿಬಾಜೆ ಪರಿಸರಡ್ ಬತ್ತಿನ ಭಾರೀ ಗಾಳಿ ಬರ್ಸಗ್ 7 ಕರೆಂಟ್ ಕಂಬಲು ಬೂರ್ದುಂಡು.

ಶಿಬಾಜೆದ ಮೊಂಟೆತಡ್ಕ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದಲ್ಪ ಈ ಘಟನೆ ನಡತ್ ದ್ಂಡ್. ಮೆಸ್ಕಾಂ ಸಿಬ್ಬಂದಿಲು ಜಾಗೆಗ್ ಬತ್ತ್ ದ್ ಬೂರ್ದಿನ ಕಂಬನ್ ದೈದೆರ್.

ಬಂಟ್ವಾಳಡ್ ಹಿಂದೂ ಯುವಸೇನೆ ಮುಖಂಡಗ್ ಬಿಸತ್ತಿ ಪಾಡಿನ ದೋಸ್ತಿ

ಬಂಟ್ವಾಳ: ಹಿಂದೂ ಸಂಘಟನೆದ ಮುಖಂಡೆ ಒರಿಯಗ್ ಆರೆನ ದೋಸ್ತಿನೇ ಬಿಸತ್ತಿ ಪಾಡಿನ ಘಟನೆ ಬಂಟ್ವಾಳಡ್ ಐತಾರ ರಾತ್ರೆ ನಡತ್ಂಡ್.

ಹಿಂದೂ ಯುವಸೇನೆದ ಮುಖಂಡೆ, ಉದ್ಯಮಿ ಪುಷ್ಪರಾಜ್ ಗ್ ಆರೆನ ದೋಸ್ತಿ ರವಿ ಬಿಸತ್ತಿ ಪಾಡ್ದ್ ಬಲಿತ್ ದೆ.

ಪುಷ್ಪರಾಜ್ ನ ನಾಲಿಗ್ ಮಸ್ತ್ ಪೆಟ್ಟಾತ್ಂಡ್. ಮೆರೆನ್ ಕುಡ್ಲದ ಖಾಸಗಿ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಈ ಬಗೆಟ್ಟ್ ಬಂಟ್ವಾಳ ನಗರ ಠಾಣೆ ಪೊಲೀಸೆರ್ ಕೇಸ್ ಮಲ್ದೆರ್. ಬೊಕ್ಕ ಜಾಗೆಗ್ ಭೇಟಿ ಕೊರ್ದು ಪರಿಶೀಲನೆ ನಡಪಾದೆರ್.

ನಾರಾಯಣ ಗುರುಕ್ಲೆನ ಟ್ಯಾಬ್ಲೊಗ್ ಅಪಮಾನ ಮಲ್ದಿನ ಬಿಜೆಪಿದಕುಲು ಇತ್ತೆ ಮಾಲೆ ಪಾಡರೆ ಬೈದೆರ್: ಸತ್ಯಜಿತ್ ಸುರತ್ಕಲ್

ಕುಡ್ಲ : ಲೋಕಸಭೆತ್ತ ಓಟುದ ಪೊರ್ತುಡು ಬಿಜೆಪಿದಕಲೆಗ್ ಬ್ರಹ್ಮಶ್ರೀ ನಾರಾಯಣ ಗುರುಕುಲು ಬೊಕ್ಕ ಕೋಟಿ ಚೆನ್ನಯೆರೆನ ನೆಂಪಾಪುಂಡು. ಈ ನೆವಟ್ಟ್ ಬಿಲ್ಲವ ಸಮುದಾಯನ್ ಸಾದಿ ತಪ್ಪಾವೊಂದುಲ್ಲೆರ್. ಬಿಜೆಪಿದಕ್ಲೆನ ನಾಟಕ ಇತ್ತೆ ಇಡೀ ಸಮಾಜಗ್ ಗೊತ್ತಾತ್ಂಡ್. ಲೋಕಸಭೆತ್ತ ಓಟುಡು ಬಿಜೆಪಿದಕ್ಲೆಗ್ ಸರಿಯಾಯಿನ ಬುದ್ಧಿ ಕಲ್ಪಾವುನ ಪೊರ್ತು ಬೈದ್ಂಡ್ ಪಂದ್ ಶ್ರೀ ನಾರಾಯಣ ಗುರು ವಿಚಾರ ವೇದಿಕೆದ ಅಧ್ಯಕ್ಷೆರ್ ಸತ್ಯಜಿತ್ ಸುರತ್ಕಲ್ ತೆರಿಪಾಯೆರ್.

ಹೋಟೆಲ್ ದೀಪಾ ಕಂಫರ್ಟ್ಸ್ ದ ಚಾವಡಿಡ್ ಶನಿವಾರ ಸುದ್ದಿಗೋಷ್ಠಿಡ್ ಪಾತೆರ್ನ ಆರ್, ಕೇರಳ ಸರಕಾರ ಗಣರಾಜ್ಯೋತ್ಸವಗ್ ಕಡಪುಡ್ದು ಕೊರ್ತಿನ ನಾರಾಯಣ ಗುರುಕ್ಲೆನ ಟ್ಯಾಬ್ಲೊನು ಬೇತೆ ಬೇತೆ ಕಾರಣ ಕೊರ್ದು ಕೇಂದ್ರದ ಬಿಜೆಪಿ ಸರಕಾರ ರದ್ದ್ ಮಲ್ತ್ ದ್ ಗುರುಕುಲೆಗ್ ಅವಮಾನ ಮಲ್ತ್ ದೆರ್. ರಾಜ್ಯೊಡು ಪಾಠ ಪುಸ್ತಕೊಡು ಗುರುಕ್ಲೆನ ಪಾಠೊನು ದೆಪ್ಪಾದೆರ್. ಬಿಲ್ಲವ ನಿಗಮ ಮಲ್ತ್ ದ್ ಅನುದಾನ ಕೊರ್ತುಜೆರ್. ಅಪಗ ಬಿಜೆಪಿದಕ್ಲೆಗ್ ಉಪ್ಪಂದಿನ ಮೋಕೆ ಇತ್ತೆ ಓಟು ಬನ್ನಗ ಬೈದ್ಂಡ್. ಪ್ರಧಾನಿ ಇತ್ತೆ ರೋಡ್ ಶೋಗ್ ಬನ್ನಗ ನಾರಾಯಣ ಗುರುಕ್ಲೆನ ಮೂರ್ತಿಗ್ ಮಾಲೆ ಪಾಡರೆ ತಯಾರಾತೆರ್. ಬಿಜೆಪಿದಕುಲು ಈ ನಾಟಕೊನು ಉಂತಾವೊಡು. ಪ್ರಚಾರದ ಪೊರ್ತುಡು ಗುರುಕುಲು ಅಂಚೆನೆ ಕೋಟಿಚೆನ್ನಯೆರೆನ ಪುದರ್ ಪಾಡ್ದ್ ಬಿಲ್ಲವ ಸಮಾಜನ್ ಮಂಗೆ ಮಲ್ತೊಂದುಲ್ಲೆರ್. ಉಂದೆನ್ ಬಿಲ್ಲವ ಸಮಾಜ ಖಂಡಿಸಾವುಂಡು ಪಂದ್ ಪಂಡೆರ್.
ಪತ್ರಿಕಾಗೋಷ್ಠಿಡ್ ಬೆಂಗಳೂರು ಬಿಲ್ಲವ ಅಸೋಸಿಯೇಶನ್ ಅಧ್ಯಕ್ಷೆರ್ ವೇದಕುಮಾರ್, ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರ ಅಭಿವೃದ್ಧಿ ಸಮಿತಿ ಅಧ್ಯಕ್ಷೆರ್ ದೇವೇಂದ್ರ ಪೂಜಾರಿ, ಶ್ರೀ ಕ್ಷೇತ್ರ ಗೆಜ್ಜೆಗಿರಿ ಮಾಧ್ಯಮ ವಕ್ತಾರೆರ್ ರಾಜೇಂದ್ರ ಚಿಲಿಂಬಿ ಇತ್ತೆರ್.

ಎಲ್ಲೆ ಮೋದಿ ರೋಡ್ ಶೋ: ಸಂಚಾರಡ್ ಬದಲಾವಣೆ

ಎಲ್ಲೆ ಕುಡ್ಲಡ್ ಮೋದಿ ರೋಡ್ ಶೋ ಮಲ್ಪುರ್ನೆದಾವರ ಗಾಡಿಲೆನ ಸಂಚಾರ ಬದಲಾವಣೆಗ್ ಆದೇಶ ಮಲ್ದೆರ್.

ಪಂಪ್ ವೆಲ್ ರ್ದ್ ಕುಡ್ಲ ಪೇಂಟೆಗ್ ಬರ್ಪಿನ ಗಾಡಿಲು ಕರಾವಳಿ ಜಂಕ್ಷನ್, ಕಂಕನಾಡಿ ಜಂಕ್ಷನ್, ಮಿಲಾಗ್ರಿಸ್ ಜಂಕ್ಷನ್, ಹಂಪನಕಟ್ಟೆ, ಕ್ಲಾಕ್ ಟವರ್ ಮುಕೇನ ಪೋವೊಡು.

ಸ್ಟೇಟ್ ಬ್ಯಾಂಕ್ ರ್ದ್ ಪಂಪ್ ವೆಲ್ ದಂಚಿ ಪೋಪುನ ಗಾಡಿಲು ಲೇಡಿಗೋಷನ್, ಕ್ಲಾಕ್ ಟವರ್, ರೈಲ್ವೇ ಸ್ಟೇಷನ್ ಜಂಕ್ಷನ್, ನಂದಿಗುಡ್ಡೆ, ಕೋಟಿಚೆನ್ನಯ ಸರ್ಕಲ್, ಕಂಕನಾಡಿ ಜಂಕ್ಷನ್ ಮುಕೇನ ಸಂಚಾರ ಮಲ್ಪೊಡು.

ಕಾರ್ ಸ್ಟ್ರೀಟ್‌, ಕುದ್ರೋಳಿ ಕಡೆರ್ದ್ ಬರ್ಪುನ ಗಾಡಿಲು ಮಣ್ಣಗುಡ್ಡೆ, ಉರ್ವಾ ಮಾರ್ಕೆಟ್, ಅಶೋಕನಗರ ಕೋಡಿಕಲ್ ಕ್ರಾಸ್ ಮುಕೇನ ಸಂಚಾರ ಮಲ್ಪುಂಡು.

ಬಿಜೈ ಚರ್ಚ್ ಕಡೆರ್ದ್ ಬರ್ಪುನ ಗಾಡಿಲು ಕೆಎಸ್ ಆರ್ ಟಿ ಜಂಕ್ಷನ್ ಮುಕೇನ ಸಂಚಾರ ಮಲ್ಪುಂಡು.

ಅಂಚೆನೆ ಒಡಿಪುರ್ದ್ ಕುಡ್ಲಗ್ ಬರ್ಪುನ ಮತ ಗಾಡಿಲು ಕೊಟ್ಟಾರ ಚೌಕಿ ಜಂಕ್ಷನ್, ಕೆಪಿಟಿ ಜಂಕ್ಷನ್, ನಂತೂರು ಜಂಕ್ಷನ್, ಶಿವಭಾಗ್ ಜಂಕ್ಷನ್, ಸೆಂಟ್ ಆಗ್ನೇಸ್, ಕಂಕನಾಡಿ ಜಂಕ್ಷನ್, ಅವೇರಿ ಜಂಕ್ಷನ್, ಮಿಲಾಗ್ರಿಸ್ ಜಂಕ್ಷನ್, ಹಂಪನಕಟ್ಟೆ ಜಂಕ್ಷನ್, ಕ್ಲಾಕ್ ಟವರ್ ಮುಕೇನ ಸಂಚಾರ ಮಲ್ಪೊಡು.

ಅವ್ವೇ ರೀತಿ ಸ್ಟೇಟ್ ಬ್ಯಾಂಕ್ ಕಡೆರ್ದ್ ಒಡಿಪುದಂಚಿ ಪೋಪುನ ಗಾಡಿಲು ಲೇಡಿ ಗೋಷನ್, ಕ್ಲಾಕ್ ಟವರ್, ರೈಲ್ವೆ ಸ್ಟೇಷನ್ ಜಂಕ್ಷನ್, ನಂದಿಗುಡ್ಡೆ ರೋಡ್, ಕೋಟಿ ಚೆನ್ನಯ್ಯ ಸರ್ಕಲ್, ಕಂಕನಾಡಿ ಜಂಕ್ಷನ್ ಮುಕೇನ ಮಾರ್ಗ ಬದಲಾವಣೆ ಮಲ್ದ್ಂಡ್.

ಇನಿ ಆಳ್ವಾಸ್‌ ತುಳು ರಂಗ್‌ -2024

ಬೆದ್ರ: ಆಳ್ವಾಸ್‌ ತುಳು ಸಂಸ್ಕೃತಿ ಅಧ್ಯಯನ ಕೇಂದ್ರಡ್ ಇನಿ ಕುವೆಂಪು ಸಭಾಂಗಣ ಆಳ್ವಾಸ್‌ ಕಾಲೇಜ್ ಡ್ ತುಳು ರಂಗ್‌ 2024 ಲೇಸ್ ನಡಪರೆ ಉಂಡು.

ಈ ಲೇಸ್ ದ ಉದಿಪನನ್ ತಾರಾನಾಥ್‌ ಗಟ್ಟಿ ಕಾಪಿಕಾಡ್‌ ಮಲ್ಪೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಬಿಗ್ ಬಾಸ್ ಪುಗರ್ತೆದ ಅರವಿಂದ್‌ ಕೆ.ಪಿ, ದಿವ್ಯಾ ಉರುಡುಗ ಬರಿಯೆರೆ ಉಲ್ಲೆರ್. ಅಧ್ಯಕ್ಷೆರಾದ್ ವಿವೇಕ್‌ ಆಳ್ವ, ಡಾ. ಕುರಿಯನ್‌, ಬಾಲಕೃಷ್ಣ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್.