ಒಡಿಪು, ಚಿಕ್ಕಮಗಳೂರು ಕ್ಷೇತ್ರಡ್ ಪಕ್ಷನ್ ಗೆಂದಾವುನ ಅವಕಾಶನ್ ಎಚ್ಚ ಮಲ್ಪೆರೆ ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಎ.24 ಕ್ಕ್ ಒಡಿಪು ಜಿಲ್ಲೆಗ್ ಭೇಟಿ ಕೊರ್ದು ಅಕೇರಿದ ದಿನತ್ತ ವೋಟುದ ಪ್ರಚಾರ ಸಭೆಟ್ಟ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಬಿಜೆಪಿ ಮಂಗಳೂರು ವಿಭಾಗದ ಪ್ರಭಾರಿ ಉದಯಕುಮಾರ್ ಶೆಟ್ಟಿ ಪಂಡೆರ್.
ಒಡಿಪುಡು ಮೇರ್ ಸುದ್ದಿಗೋಷ್ಠಿಡ್ ಪಾತೆರ್ದ್, ಆದಿತ್ಯನಾಥ್ ಮೆರೆನ ಕಾರ್ಯಕ್ರಮದ ವಿವರ ನನಲ ಅಕೇರಿ ಆತಿಜಿ. ಆಂಡ ಜಿಲ್ಲೆಡ್ ಅರೆನ ಪ್ರವಾಸ ನಿಘಂಟಾತ್ಂಡ್ ಪಂದ್ ಪಂಡೆರ್.
ವಿಟ್ಲ: ಮಾಡತ್ತಾರು ತರವಾಡು ಇಲ್ಲಲ್ ಶ್ರೀ ದೈವೊಲೆನ ಧರ್ಮ ನೇಮ ಏ.21 ಬೊಕ್ಕ 22 ಕ್ಕ್ ನಡಪರೆ ಉಂಡು.
ಏ.21 ಕ್ಕ್ ಬೊಲ್ಪುಗು ಗಣಹೋಮ, ನಾಗ ತಂಬಿಲ, ವೆಂಕಟ್ರಮಣ ಸೇವೆ, ರಾತ್ರೆ ಕಲ್ಲುರ್ಟಿ, ಕೊರತಿ, ರಾಹು ಬೊಕ್ಕ ವರ್ಣರ ಪಂಜುರ್ಲಿ ದೈವೊಲೆಗ್ ಎಣ್ಣೆ ಕೊರಿ ಬೊಕ್ಕ ಅನ್ನ ಪ್ರಸಾದ ಸೇವೆ, ಶ್ರೀ ದೈವೊಲೆನ ನೇಮ, ಗಂಧ ಪ್ರಸಾದ ವಿತರಣೆ ನಡಪರೆ ಉಂಡು.
ಏ.22 ಕ್ಕ್ ಬೊಲ್ಪುಗು ಶ್ರೀ ರಕ್ತೇಶ್ವರಿ ಬೊಕ್ಕ ಗುಳಿಗ ದೈವೊಲೆನ ನೇಮ, ಗಂಧ ಪ್ರಸಾದ ವಿತರಣೆ ಬೊಕ್ಕ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ರಾಜ್ಯದ 16 ಜಿಲ್ಲೆಡ್ ಕೋಡೆ ಭಾರೀ ಬರ್ಸ ಬೈದ್ಂಡ್. 2 ಜನ ತೀರ್ ಪೋತೆರ್.
30 ರ್ದ್ ಎಚ್ಚ ಕೈಕಂಜಿಲು ಸೈದ್ಂಡ್. ಕೊಪ್ಪಳ ಜಿಲ್ಲೆಡ್ ರೈತ ಸಿದ್ದಯ್ಯ ಗುರು (32) ತೆಡಿಲ್ ಹಾಕ್ ದ್ ಸೈತೆರ್, ತೀರ್ಥಹಳ್ಳಿಡ್ ಮೇಲ್ ಗ್ ಮರ ಬೂರ್ದು ಜಯಂತ ಭಟ್ (64) ತೀರ್ ಪೋತೆರ್. ಧಾರವಾಡ, ಹಾವೇರಿ, ಗದಗ, ಉತ್ತರ ಕನ್ನಡ, ದಕ್ಷಿಣ ಕನ್ನಡ, ಕೊಪ್ಪಳ, ವಿಜಯನಗರ, ಚಿಕ್ಕಮಗಳೂರು, ಶಿವಮೊಗ್ಗ, ಚಿಕ್ಕಬಳ್ಳಾಪುರ, ಹಾಸನ, ಮಂಡ್ಯ, ಬೆಂ.ಗ್ರಾಮಾಂತರಡ್ ಎಡ್ಡೆ ಬರ್ಸ ಬರಿಯೆರೆ ಉಂಡು.
ಗುಜರಾತ್ ದ ಕಛ್ ಡ್ ಇಂಚೊ್ಉ ಭಾರಿ ಅಪರೂಪದ ಮಲ್ಲ ಗಾತ್ರದ ಉಚ್ಚುದ ಎಲುಬಲ್ಲೆ (ಪಳಿಯುಳಿಕೆ ) ಪತ್ತೆ ಆತ್ಂಡ್.
ಈ ಪಳಿಯುಳಿಕೆದ ಬಗೆಟ್ಟ್ IIT ರೂರ್ಕಿ ಅಧ್ಯಯನ ತಂಡ ಕುತೂಹಲಕಾರಿ ಮಾಹಿತಿ ಕೊರ್ತುಂಡು.
ಉಂದು ಒಂಜಿ ಕಾಲಡ್ ಪ್ರಪಂಚದ ಮಲ್ಲ ಉಚ್ಚುದ ಬೆರಿತ್ತ ಎಲುತ್ತ ಭಾಗ ಆತ್ಂಡ್. ಅಲಿಯಂತ್ರದ ಪಜ್ಜೆಡ್ ಇಪ್ಪುನ ಮ್ಯಾಡ್ಟ್ಯೊಯಿಡೆ ಜಾತಿಗ್ ಸೇರಿನ ಈ ಉಚ್ಚು 11-15 ಮೀಟರ್ (36-49 ಅಡಿ) ಉದ್ದ ಉಂಡು. ಪೊಸತಾದ್ ಗುರುತಿಸಾಯಿನ ಈ ಉಚ್ಚುಗು ಸಂಶೋಧಕೆರ್ ವಾಸುಕಿ ಇಂಡಿಕಸ್ ಪಂದ್ ಪುದರ್ ದೀತೆರ್.
ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನಡ್ ನಡಪುನ ವರ್ಷದ ಜಾತ್ರೆದ ಲೆಕ್ಕೊಡು ಎ.19 ಬೊಕ್ಕ 20 ಕ್ಕ್ ಸಾರ್ವಜನಿಕ ಹಿತದೃಷ್ಟಿಡ್ ಬೊಕ್ಕ ಗಾಡಿಲೆನ ಸುಗಮ ಸಂಚಾರ ದೃಷ್ಟಿಡ್ ಕಟೀಲ್ ಪರಿಸರಡ್ ಗಾಡಿ ಸಂಚಾರ ವ್ಯವಸ್ಥೆ ಡ್ ತಾತ್ಕಾಲಿಕ ಬದಲಾವಣೆ ಮಲ್ತ್ ದೆರ್.
ಕಟೀಲ್ ಮುಖ್ಯ ರಸ್ತೆ (ರಥ ಬೀದಿ) ಡ್ ಮಲ್ಲಿಗೆ ಅಂಗಡಿ ಕ್ರಾಸ್ ರ್ದ್ ದುರ್ಗಾ ಸಂಜೀವಿನಿ ಆಸ್ಪತ್ರೆ ಜಂಕ್ಷನ್ (ಕಲ್ಲಕುಮೇರು ಕ್ರಾಸ್) ಮುಟ್ಟ ವಾಹನ ಸಂಚಾರ ಉಂತುನೆನ್ ನಿಷೇಧ ಮಲ್ದೆರ್.
ಕುಡ್ಲರ್ದ್ ಕಟೀಲ್ ಗ್ ಬರ್ಪಿನ ಗಾಡಿಲು ಮಲ್ಲಿಗೆ ಅಂಗಡಿ ಕ್ರಾಸ್ ದಲ್ಪ ಎಡಕ್ಕ್ ಬತ್ತ್ ದ್, ಗಿಡಿಗೆರೆ ಮಾರ್ಗದ ಮುಕೇನ ಕಟೀಲ್ ಪಾರ್ಕಿಂಗ್ ಜಾಗಗ್ ಬರ್ಪುಂಡು. ಕಟೀಲ್ ರ್ದ್ ಕುಡ್ಲಗ್ ಬರ್ಪುನ ಗಾಡಿಲು ಕಟೀಲ್ ಪದವಿ ಪೂರ್ವ ಕಾಲೇಜ್ ಮೈದಾನದ ಕೈತಲ್ದ ಮಾರ್ಗದ ಮುಕೇನ ಬ್ಯಾಂಕ್ ಆಫ್ ಬರೋಡಾದ ಎದುರುಡು ಮಾರ್ಗಡ್ ಪೋದು ಬಜಿಪೆ-ಕುಡ್ಲದಂಚಿ ಸಂಚಾರ ಮಲ್ಪುಂಡು.
ಸರ್ವಿಸ್ ಬಸ್, ಟೂರಿಸ್ಟ್ ಬಸ್, ಕಾರ್ ಬೊಕ್ಕ ಬೇತೆ ಗಾಡಿಲೆಗ್ ಬಸ್ ಸ್ಟ್ಯಾಂಡ್ ಪಿರವುಡು ಇಪ್ಪುನ ಸಿತ್ಲಾ ಮೈದಾನ ಬೊಕ್ಕ ಕಟೀಲ್ ಪದವಿ ಪೂರ್ವ ಕಾಲೇಜ್ ಮೈದಾನಡ್ ಪಾರ್ಕಿಂಗ್ ವ್ಯವಸ್ಥೆ ಮಲ್ದ್ಂಡ್ ಪಂದ್ ಪೊಲೀಸ್ ಆಯುಕ್ತೆರ್ ಬೊಕ್ಕ ಅಪರ ದಂಡಾಧಿಕಾರಿಲು ಆಯಿನ ಅನುಪಮ್ ಅಗ್ರವಾಲ್ ಮೇರ್ ಪ್ರಕಟಣೆಡ್ ತೆರಿಪಾದೆರ್.
ಬಾಲಿವುಡ್ ನಟಿ ಶಿಲ್ಪಾ ಶೆಟ್ರೆನ ಒಂಜಿ ಬಂಗಲೆ ಬೊಕ್ಕ ಆರೆನ ಕಂಡನಿ ರಾಜ್ ಕುಂದ್ರಾಗ್ ಸೇರಿನ ಸುಮಾರ್ ಆಸ್ತಿನ್ ಜಾರಿ ನಿರ್ದೇಶನಾಲಯ ಮುಟ್ಟುಗೋಲ್ ಮಲ್ದ್ಂಡ್.
ಸುದ್ದಿ ಮೂಲದ ಪ್ರಕಾರ ಶಿಲ್ಪಾ ಶೆಟ್ಟಿ ಬೊಕ್ಕ ಅರೆನ ಕಂಡನಿನ ಒಟ್ಟು 97.79 ಕೋ. ರೂ. ಬಿಲೆತ್ತ ಆಸ್ತಿನ್ ಜಾರಿ ನಿರ್ದೇಶನಾಲಯ ಜಪ್ತಿ ಮಲ್ದ್ಂಡ್. ಶಿಲ್ಪಾ ಶೆಟ್ಟಿ ಮೆರೆಗ್ ಜುಹೂಡ್ ಐಷಾರಾಮಿ ಬಂಗಲೆ ಉಂಡು. ಉಂದು ಜಪ್ತಿ ಆತ್ಂಡ್.
ಜುಹೂಡ್ ಶಿಲ್ಪಾ ಶೆಟ್ಟಿ ಪುದರ್ ದ ಕುಡೊಂಜಿ ಇಲ್ಲ್, ಪುಣೆಡ್ ಇಪ್ಪುನ ತೋಟದ ಇಲ್ಲ್ ಬೊಕ್ಕ ಬೇತೆ ಸ್ಥಿರ ಬೊಕ್ಕ ಚರ ಸೊತ್ತುಲೆನ ಮುಟ್ಟುಗೋಲ್ ಪಾಡ್ದ್ಂಡ್. ರಾಜ್ಕುಂದ್ರಾ-ಶಿಲ್ಪಾ ಶೆಟ್ಟಿನ ಮಿತ್ತ್ ಅಕ್ರಮ ಹಣ ವರ್ಗಾವಣೆ ಕೇಸ್ ದಾಖಲಾತ್ಂಡ್. ನೆಕ್ಕ್ ಸಂಬಂಧಪಟ್ಟಿನಂಚೆನೆ ಜಾರಿ ನಿರ್ದೇಶನಾಲಯ ಈ ಕ್ರಮ ದೆತೊಂದುಂಡು.
ಬಿರ್ಲಾಗೇಟ್ ಶಹಾಡ್ ಶ್ರೀ ಮೂಕಾಂಬಿಕಾ ದೇವಸ್ಥಾನಡ್ 69ನೇ ವರ್ಷದ ಉಚ್ಚಯ, 9 ನೇ ವರ್ಧಂತಿ ಉಚ್ಚಯದ ಲೆಕ್ಕೊಡು ಭಜನೆ, ಸಾಮೂಹಿಕ ಚಂಡಿಕಾಯಾಗ ಎ.12-21 ಮುಟ್ಟ ನಡಪರೆ ಉಂಡು.
ಡೊಂಬಿವಲಿದ ಶ್ರೀ ಶಂಕರನಾರಾಯಣ ತಂತ್ರಿಲೆನ ಮುತಾಲಿಕೆಡ್ ಈ ಲೇಸ್ ನಡತೊಂದುಂಡು.
ಎ.12 ಸುಕ್ರಾರ ಬೊಲ್ಪುಗು ಸಾಮೂಹಿಕ ಪ್ರಾರ್ತನೆ, ತೋರಣ ಮೂರ್ತ, ಉಗ್ರಾಣ ಮೂರ್ತ, ಮಹಾಗಣಪತಿ ಹೋಮ, ಮಹಾಪೂಜೆ, ಬಯ್ಯಗ್ ಭಜನೆ ನಡತ್ಂಡ್.
ಎ.13-16 ಮುಟ್ಟ ಪ್ರತಿದಿನೊಲ ಬಯ್ಯಗ್ ಭಜನೆ ನಡತ್ಂಡ್.
ಎ.17 ಬೊಲ್ಪುಗು ರಾಮನವಮಿದ ಲೆಕ್ಕೊಡು ಅಖಂಡ 12 ಗಂಟೆದ ಕಾಲ ಭಜನೆ, ಹೋಮ, ಬಯ್ಯಗ್ ಅಭಿಷೇಕ ಪೂಜೆ, ಶ್ರೀ ಗುರು ಪಾದುಕಾ ಪೂಜೆ ನಡತ್ಂಡ್.
ಎ.18 ಬೊಲ್ಪುಗು ಮಹಾಗಣಪತಿ ಹೋಮ, ನವಗ್ರಹ ಶಾಂತಿ ನಡತ್ಂಡ್. ಬಯ್ಯಗ್ ರಾಕ್ಷೋಘ್ನ ಹೋಮ, ವಾಸ್ತುಪೂಜೆ, ವಾಸ್ತುಬಲಿ, ಭಜನೆ ನಡಪರೆ ಉಂಡು.
ಎ.19 ಸುಕ್ರಾರ ಬೊಲ್ಪುಗು 108 ಬೊಂಡದಾಭಿಷೇಕ, ತುಲಾಭಾರ ಸೇವೆ, ನವಗ್ರಹ ಶಾಂತಿ, ಪ್ರಧಾನ ಹೋಮ, ಅನ್ನ ಪ್ರಸಾದ ಸೇವೆ ಬಯ್ಯಗ್ 25 ತ್ತ ಕಲಶಾಭಿಷೇಕ, ಪ್ರಧಾನ ಹೋಮ, ಮಹಾಪೂಜೆ, ಪಲ್ಲಪೂಜೆ, ಅನ್ನ ಪ್ರಸಾದ ಸೇವೆ, ತೇರ್ ಉಚ್ಚಯ ಬಲಿ, ತೇರ್ ಒಯಿಪೆರೆ, ಸಾಮೂಹಿಕ ರಂಗಪೂಜೆ, ಮಹಾಪೂಜೆ ನಡಪರೆ ಉಂಡು.
ಎ.20 ಐತಾರ ಬೊಲ್ಪುಗು ಸಾಮೂಹಿಕ ಚಂಡಿಕಾಯಾಗ, ದಂಪತೀ ಪೂಜೆ, ಮಹಾಪೂಜೆ, ಪಲ್ಲಪೂಜೆ, ಧಾರ್ಮಿಕ ಸಭಾ ಲೇಸ್, ಅನ್ನ ಪ್ರಸಾದ ಸೇವೆ, ಬಯ್ಯಗ್ ಶೋಭಾಯಾತ್ರೆ, ಕಟ್ಟೆಪೂಜೆ, ಶ್ರೀ ಕಟೀಲ್ ಕ್ಷೇತ್ರ ಮಹಾತ್ಮೆ ಯಕ್ಷಗಾನ ನಡಪರೆ ಉಂಡು.
ಎ.21 ಐತಾರ ಬೊಲ್ಪುಗು ಪ್ರಧಾನ ಹೋಮ, ಪಂಚಾಮೃತಾಭಿಷೇಕ, ಕಲಶಾಭಿಷೇಕ, ಮಹಾಪೂಜೆ ನಡಪರೆ ಉಂಡು.
ಬೊಂಬೈ ರಾಮ ರಾಜ ಕ್ಷತ್ರಿಯ ಸಂಘದ ಸದಸ್ಯೆರ್ ಬೊಕ್ಕ ಅತಿಥಿ ಕಲಾವಿದೆರೆನ ಒಟ್ಟುಸೇರಿಗೆಡ್ ಶ್ರೀ ರಾಮ ನವಮಿದ ಲೆಕ್ಕೊಡು ಅಜ್ಜಿ ಸುಕ್ಕಮ್ಮಾ ಕನ್ನಡ ನಾಟಕ ಎ.17 ಬುದಾರ (ಇನಿ) ಅಂಧೇರಿ ಪೂರ್ವ ಕಾಮಗಾರ್ ಭವನಡ್ ನಡಪರೆ ಉಂಡು.
ನಿರ್ದೇಶನ, ನಟನೆ, ರಂಗ ಸಜ್ಜಿಕೆದ ಹಾಸ್ಯ ಚಕ್ರವರ್ತಿ ಬಿರ್ದ್ ಪಡೆಯಿನ, ಧಾರವಾಹಿ ನಟೆ ಅಶೋಕ್ ಕೊಡ್ಯಡ್ಕ, ತುಳು ನಾಟಕ ಬರವುದ ಬೊಳ್ಳಿ ರಾಜೇಶ್ ಆಚಾರ್ಯ, ಕನ್ನಡಗ್ ಅನುವಾದ ಪ್ರಭಾಕರ ನಾಯ್ಕ ಮಲ್ದೆರ್.
Lಪಾವೂರು: ಬಾವಲಿಗುರಿ ಭಗವಾನ್ ಶ್ರೀ ಬಬ್ಬು ಸ್ವಾಮಿ ಸೇವಾ ಸಮಿತಿದ 17ನೇ ವರ್ಷದ ಕೋರ್ದಬ್ಬು ತನ್ನಿಮಾನಿಗ ಪರಿವಾರ ದೈವೊಲೆನ ನೇಮ ಎ.18-21 ಮುಟ್ಟ ನಡಪರೆ ಉಂಡು.
ಎ.18 ಗುರುವಾರ (ಇನಿ) ಬೊಲ್ಪುಗು ಗಣಹೋಮ ನಡತ್ಂಡ್. ಬಯ್ಯಗ್ ಸೀತಾರಾಮ ಆಚಾರ್ಯೆರೆನ ಪೌರೋಹಿತ್ಯಡ್ ಶ್ರೀ ಸತ್ಯನಾರಾಯಣ ಪೂಜೆ, ಅನ್ನ ಪ್ರಸಾದ ಸೇವೆ ರಾತ್ರೆ ಸಾಂಸ್ಕೃತಿಕ ಲೇಸ್, ಕೈತಲ್ದ ಪ್ರತಿಭೆಲೆರ್ದ್ ನೃತ್ಯ ಬೊಕ್ಕ ಧಾರ್ಮಿಕ ಸಭೆ, ಕಲ್ಜಿಗದ ಮಾಯ್ಕಾರೆ ಪಂಜುರ್ಲಿ ತುಳು ನಾಟಕ ನಡಪರೆ ಉಂಡು.
ಎ.19 ಸುಕ್ರಾರ ರಾತ್ರೆ ದೈವೊಲೆನ ಭಂಡಾರ ಏರುಂಡು. ಬೊಕ್ಕ ಜಾಗೆದ ಗುಳಿಗೆ ಬೊಕ್ಕ ಬಬ್ಬುಸ್ವಾಮಿ, ತನ್ನಿಮಾನಿಗ ದೈವೊದ ನೇಮ ನಡಪರೆ ಉಂಡು.
ಎ.20 ಸನಿಯಾರ ರಾತ್ರೆ ಪಂಜುರ್ಲಿ, ಗುಳಿಗ ಬೊಕ್ಕ ಚಾಮುಂಡಿ ಬೊಕ್ಕ ಕತ್ತಲಕಾಣದ ಗುಳಿಗನ ನೇಮ ನಡಪರೆ ಉಂಡು.
ಎ.21 ಐತಾರ ಬೊಲ್ಪುಗು ರಾಹು ಗುಳಿಗ ನೇಮ ನಡಪರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್, ಗಂಧ ಪ್ರಸಾದ ದೆತೊಂದು, ಶ್ರೀ ದೇವೆರೆನ ಬೊಕ್ಕ ದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ಗುರಿಕಾರೆರ್ ಬೊಕ್ಕ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಮಸ್ಕತ್ ದ ರೂವಿ ಅಲ್ ಫಲಾಜ್ ಹೋಟೆಲ್ ದ ಗ್ರ್ಯಾಂಡ್ ಹಾಲ್ ಡ್ ಎ.19 ಕ್ಕ್ ಮಧ್ಯಾಹ್ನ 3:15 ರ್ದ್ ಒಮಾನ್ ಬಿಲ್ಲವಾಸ್ ಕೂಟದ ಮುತಾಲಿಕೆಡ್ ಶ್ರೀ ಗೆಜ್ಜೆಗಿರಿ ಮೇಳದಕ್ಲೆರ್ದ್ ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ಯಕ್ಷಗಾನ ಪ್ರದರ್ಶನ ನಡಪರೆ ಉಂಡು.
ನೆತ್ತ ಸಲುವಾದ್ ಕುಡ್ಲದ ಅಂತರಾಷ್ಟ್ರೀಯ ಇಮಾನ ನಿಲ್ದಾಣರ್ದ್ ಇನಿ ಮಸ್ಕತ್ ಗ್ ಬತ್ತಿನ ಶ್ರೀ ಗೆಜ್ಜೆಗಿರಿ ಮೇಳದ ಕಲಾವಿದೆರೆನ್ ಬೊಕ್ಕ ಊರುದ ಬಿನ್ನೆರೆನ್ ಮಸ್ಕತ್ ದ ಇಮಾನ ನಿಲ್ದಾಣಡ್ ಒಮಾನ್ ಬಿಲ್ಲವಾಸ್ ಕೂಟದ ಅಧ್ಯಕ್ಷೆರ್ ಸುಜಿತ್ ಅಂಚನ್ ಪಾಂಗಾಳ ಬೊಕ್ಕ ಗೆಜ್ಜೆಗಿರಿ ಮೇಳದ ವ್ಯವಸ್ಥಾಪಕೆರ್ ಪ್ರಶಾಂತ್ ಪೂಜಾರಿ ಪಜೀರ್ ಮಸ್ಕತ್ ಮೇರ್ ಎದ್ಕೊನಿಯೆರ್.
ಈ ಪೊರ್ತುಡು ಸುಕುಮಾರ್ ಅಂಚನ್ ಪಾಂಗಾಳ, ಭಾಸ್ಕರ ಕೋಟ್ಯಾನ್, ತಿಲಕ್ ಸುವರ್ಣ, ಜಿತೇಶ್
ಪೂಜಾರಿ ಪಾಲ್ ಪಡೆದಿತ್ತೆರ್.
