ಬೊಲ್ತೆರ್ ಸುದ್ದಿ | Belthangady News

ಬೋಲ್ತೆರ್:‌ ತಾಲೂಕು ಆಡಳಿತ ಸೌಧಡ್ ಕನಕದಾಸ ಜಯಂತಿ ಆಚರಣೆ‌

ಬೋಲ್ತೆರ್:‌ ದಾಸವರೇಣ್ಯ ಕನಕದಾಸ ಜಯಂತಿನ್ ತಾಲೂಕು ಆಡಳಿತ ಸೌಧ ಸಭಾಂಗಣಡ್ ನ.30 ತಾನಿ ಆಚರಣೆ ಮಲ್ತೆರ್. ವಿಧಾನ ಪರಿಷತ್ ಶಾಸಕೆರ್ ಪ್ರತಾಪ್ ಸಿಂಹ ನಾಯಕ್ ಕಾರ್ಯಕ್ರಮದ ಉದಿಪನ ಮಲ್ತ್, ಭಾರತದ ಆತ್ಮವೇ ಆಧ್ಯಾತ್ಮ, ದಾಸ ಸಾಹಿತ್ಯದ ಮೂಲಕ ಸಮಾಜಗ್ ಆಧ್ಯಾತ್ಮದ ಸಂದೇಶ ಕೊರ್ನ ಕನಕದಾಸೆರ್ ದಾಸ ಪರಂಪರೆಡ್ ಶ್ರೇಷ್ಠ ಆತೆರ್‌ ಪಂದ್‌ ಪಂಡೆರ್.

ಕಂದಾಯ ನಿರೀಕ್ಷಕೆರ್ ಪವಾಡಪ್ಪ ಕನಕದಾಸರ ಜೀವನದ ಬಗ್ಗೆ ಪಾತೆರಿಯೆರ್.‌ ತಹಶೀಲ್ದಾರ್ ಪೃಥ್ವಿ ಸಾನಿಕಮ್ ಗುರ್ಕಾರ್ಮೆನ್‌ ವಹಿಸಾದ್‌ ಕನಕದಾಸರ ಸಾಹಿತ್ಯ ಸಮಾಜ ಸುಧಾರಣೆಗ್ ಮಾರ್ಗದರ್ಶನ ಆತ್‌ಂಡ್‌ ಪಂದ್‌ ಪಂಡೆರ್. ತಾ.ಪಂ. ಕಾರ್ಯನಿರ್ವಹಣಾಧಿಕಾರಿ ಕುಸುಮಾಧರ್ ಈ ಪೊರ್ತುಡು ಇತ್ತೆರ್. ತಾಲೂಕು ಪಂಚಾಯತ್ ಸಂಯೋಜಕೆರ್ ಜಯಾನಂದ ಲಾಯಿಲ ಬತ್ತಿನ ಬಿನ್ನೆರೆನ್‌ ಎದ್ಕೊಂದು, ಸೊಲ್ಮೆ ಸಂದಾಯ ಮಲ್ತೆರ್.

ಉಜಿರೆ ಶ್ರೀ ಧ.ಮ ಕಾಲೇಜಿನ ಪತ್ರಿಕೋದ್ಯಮ ವಿಭಾಗದ ಹೈಪರ್ ಲೋಕಲ್ ಮೀಡಿಯಾ ಉದಿಪನ

ಉಜಿರೆ: ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಕಾಲೇಜು ಉಜಿರೆದ ಪತ್ರಿಕೋದ್ಯಮ ವಿಭಾಗದ ಹೈಪರ್ ಲೋಕಲ್ ಮೀಡಿಯಾ ಕಾರ್ಯಕ್ರಮದ ಉದಿಪನ ನ.29 ತಾನಿ ಕಾಲೇಜ್‌ದ ಚಾವಡಿಡ್‌ ನಡತ್‌ಂಡ್. ಸುದ್ದಿ ಬಿಡುಗಡೆ ಪತ್ರಿಕೆದ ಸಂಪಾದಕೆರ್ ಡಾ.ಯು.ಪಿ ಶಿವಾನಂದ ಲೇಸ್‌ದ ಉದಿಪನ ಮಲ್ತೆರ್.‌

ವೇದಿಕೆಡ್ (MAAM) ಗುರ್ಕಾರ್ಲು ನವೀನ್ ಅಮ್ಮೆಂಬಳ , (MAAM) ಗೌರವಾನ್ವಿತ ಗುರ್ಕಾರ್ಲು ವೇಣು ಶರ್ಮ, ಪತ್ರಿಕೋದ್ಯಮ ವಿಭಾಗದ ಮುಖ್ಯಸ್ಥೆರ್ ಭಾಸ್ಕರ್ ಹೆಗ್ಡೆ, ಕಾಲೇಜು ಮುಖ್ಯೋಪಾಧ್ಯಾಯ ಡಾ.ಬಿ.ಎ. ಕುಮಾರ್ ಹೆಗ್ಡೆ ಬೊಕ್ಕ ಪತ್ರಿಕೋದ್ಯಮದ ಕಲ್ಪಾರ್ಥಿಲು ಇತ್ತೆರ್. ಶರತ್ ಹೆಗ್ಡೆ ಸೊಲ್ಮೆ ಸಂದಾಯ ಮಲ್ತೆರ್.

ನೆಲ್ಯಾಡಿಡ್ 12 ಫೀಟ್ ಉದ್ದದ ಕಾಳಿಂಗ ಸರ್ಪ

ಉಬಾರ್: ನೆಲ್ಯಾಡಿದ ಸೈಂಟ್ ಜೋಸೆಫ್ ಮಲಂಕರ ಇಗರ್ಜಿದ ಕೈತಲ್ 12 ಫೀಟ್ ಉದ್ದದ ಕಾಳಿಂಗ ಸರ್ಪ ತೂಯೆರ ತಿಕ್ಕ್‌ದ್ಂಡ್. ಉಚ್ಚುಲೆನ ರಕ್ಷೆಕೆರ್ ಉಬಾರ್ ದ ಕೆ. ಝಕರಿಯಾ ಪನ್ಪಿನಾರ್ ಅವೆನ್ ಪತ್ ದ್ ಸುರಕ್ಷಿತವಾದ್ ಕಾಡ್‌ಗ್ ಬುಡ್ದ್ ಬೈದೆರ್.

ನೆಲ್ಯಾಡಿ ಸೈಂಟ್ ಜೋಸೆಫ್ ಮಲಂಕರ ಇಗರ್ಜಿದೈಟೆ ಕಾಳಿಂಗ ಸರ್ಪೆ ತಿರ್ಗೊಂದಿತ್ತಿನ ಬಗೆಟ್ ಪೊಲಬು ತಿಕ್ಕಿನ ಕೆ.ಝಕರಿಯಾ ಆಡೆಗ್ ಪೋದು ಸುಮಾರ್ ಒಂಜಿ ಗಂಟೆದಾತ್ ಪೊರ್ತು ಕಾರ್ಯಾಚರಣೆ ಮಲ್ತ್‌ದ್ ಅವೆನ್ ಪತ್ತ್‌ದೆರ್.

ಶಿಬರಾಜೆ ಅಂಗನವಾಡಿ ಕೇಂದ್ರಡ್ ಜೋಕ್ಲೆನ ದಿನಾಚರಣೆ

ಕಳೆಂಜ ಮುಲ್ಪದ ಶಿಬರಾಜೆ ಅಂಗನವಾಡಿ ಕೇಂದ್ರಡ್ ನ.27 ತಾನಿ ಜೋಕ್ಲೆನ ದಿನಾಚರಣೆ ಕಾರ್ಯಕ್ರಮ ನಡತ್ಂಡ್. ಕಾರ್ಯಕ್ರಮ ಗ್ರಾಮಾಭ್ಯುದಯ ಅನುಷ್ಠಾನ ಸಮಿತಿ ಶಿಬರಾಜೆ, ಪಾದೆ ಕಚೇರಿದ ಎದುರುಡು ನಡತ್ಂಡ್. ಲೇಸ್ ದ ಗುರ್ಕಾರ್ಮೆನ್ ಅಂಗನವಾಡಿದ ಬಾಲೆ ವೈಷ್ಣವಿ ವಹಿಸ್ ದ್ ಇತ್ತೆರ್. ಜೋಕುಲು ತುಡರ್ ಅರ್ಲಾದ್ ಲೇಸ್ ದ ಉದಿಪನ ಮಲ್ತೆರ್.

ಕಳೆಂಜ ಗ್ರಾ.ಪಂ ಸದಸ್ಯೆರ್ ಟಿ.ಎಸ್ ನಿತ್ಯಾನಂದ ರೈ, ಪ್ರೇಮಾ ಬಿ.ಎಸ್, ಗ್ರಾಮಾಭ್ಯುದಯ ಕಾರ್ಯಕ್ರಮ ಅನುಷ್ಠಾನ ಸಮಿತಿದ ಗುರ್ಕಾರ್ಲು ಪಿ.ಟಿ ಸೆಬಾಸ್ಟಿನ್, ಶಾಲೆತ್ತಡ್ಕ ಶಾಲೆದ ಹೆಚ್.ಎಮ್ ರತ್ನಾ, ನಿಖಿತಾ ಸಿ.ಹೆಚ್.ಓ, ಮಾಜಿ ಅಂಗನವಾಡಿ ಕಾರ್ಯಕರ್ತೆ ಪಿ.ಟಿ ಏಲಿಯಮ್ಮ, ಬಾಲವಿಕಾಸ ಸಮಿತಿದ ಗುರ್ಕಾರ್ದಿ ಪ್ರತಿಮಾ ಈ ಪೊರ್ತುಡು ಇತ್ತೆರ್. ಹರೀಶ್ ಒಳಗುಡ್ಡೆ ಅಂಗನವಾಡಿಗ್ ಪೂತ ದೈ ಕೊಡುಗೆಯಾದ್ ಕೊರಿಯೆರ್. ಜೋಕ್ಲೆನ ಆಟೋಟ, ಸಾಂಸ್ಕೃತಿಕ ಚಟುವಟಿಕೆದ ಇನಾಮುನು ಈ ಪೊರ್ತುಡು ವಿತರಣೆ ಮಲ್ತೆರ್.

ಅಂಗನವಾಡಿ ಜೋಕ್ಲೆರ್ದ್ ಸಾಂಸ್ಕೃತಿಕ ಕಾರ್ಯಕ್ರಮ ನಡತ್ಂಡ್. ಅಂಗನವಾಡಿ ಕಾರ್ಯಕರ್ತೆ ಪ್ರಿಯಾ ಲೇಸ್ ದ ಸುದಾರಿಕೆ ಮಲ್ತೆರ್, ಸಹಾಯಕಿ ಅನ್ಸಿಲ್ಲಾ ಸೊಲ್ಮೆ ಸಂದಾಯ ಮಲ್ತೆರ್.

ಶಿಬರಾಜೆ ಅಂಗನವಾಡಿ ಕೇಂದ್ರಡ್ ಜೋಕ್ಲೆನ ದಿನಾಚರಣೆ

ಕಳೆಂಜ ಮುಲ್ಪದ ಶಿಬರಾಜೆ ಅಂಗನವಾಡಿ ಕೇಂದ್ರಡ್ ನ.27 ತಾನಿ ಜೋಕ್ಲೆನ ದಿನಾಚರಣೆ ಕಾರ್ಯಕ್ರಮ ನಡತ್ಂಡ್. ಕಾರ್ಯಕ್ರಮ ಗ್ರಾಮಾಭ್ಯುದಯ ಅನುಷ್ಠಾನ ಸಮಿತಿ ಶಿಬರಾಜೆ, ಪಾದೆ ಕಚೇರಿದ ಎದುರುಡು ನಡತ್ಂಡ್. ಲೇಸ್ ದ ಗುರ್ಕಾರ್ಮೆನ್ ಅಂಗನವಾಡಿದ ಬಾಲೆ ವೈಷ್ಣವಿ ವಹಿಸ್ ದ್ ಇತ್ತೆರ್.

ಜೋಕುಲು ತುಡರ್ ಅರ್ಲಾದ್ ಲೇಸ್ ದ ಉದಿಪನ ಮಲ್ತೆರ್. ಕಳೆಂಜ ಗ್ರಾ.ಪಂ ಸದಸ್ಯೆರ್ ಟಿ.ಎಸ್ ನಿತ್ಯಾನಂದ ರೈ, ಪ್ರೇಮಾ ಬಿ.ಎಸ್, ಗ್ರಾಮಾಭ್ಯುದಯ ಕಾರ್ಯಕ್ರಮ ಅನುಷ್ಠಾನ ಸಮಿತಿದ ಗುರ್ಕಾರ್ಲು ಪಿ.ಟಿ ಸೆಬಾಸ್ಟಿನ್, ಶಾಲೆತ್ತಡ್ಕ ಶಾಲೆದ ಹೆಚ್.ಎಮ್ ರತ್ನಾ, ನಿಖಿತಾ ಸಿ.ಹೆಚ್.ಓ, ಮಾಜಿ ಅಂಗನವಾಡಿ ಕಾರ್ಯಕರ್ತೆ ಪಿ.ಟಿ ಏಲಿಯಮ್ಮ, ಬಾಲವಿಕಾಸ ಸಮಿತಿದ ಗುರ್ಕಾರ್ದಿ ಪ್ರತಿಮಾ ಈ ಪೊರ್ತುಡು ಇತ್ತೆರ್.

ಹರೀಶ್ ಒಳಗುಡ್ಡೆ ಅಂಗನವಾಡಿಗ್ ಪೂತ ದೈ ಕೊಡುಗೆಯಾದ್ ಕೊರಿಯೆರ್. ಜೋಕ್ಲೆನ ಆಟೋಟ, ಸಾಂಸ್ಕೃತಿಕ ಚಟುವಟಿಕೆದ ಇನಾಮುನು ಈ ಪೊರ್ತುಡು ವಿತರಣೆ ಮಲ್ತೆರ್. ಅಂಗನವಾಡಿ ಜೋಕ್ಲೆರ್ದ್ ಸಾಂಸ್ಕೃತಿಕ ಕಾರ್ಯಕ್ರಮ ನಡತ್ಂಡ್. ಅಂಗನವಾಡಿ ಕಾರ್ಯಕರ್ತೆ ಪ್ರಿಯಾ ಲೇಸ್ ದ ಸುದಾರಿಕೆ ಮಲ್ತೆರ್, ಸಹಾಯಕಿ ಅನ್ಸಿಲ್ಲಾ ಸೊಲ್ಮೆ ಸಂದಾಯ ಮಲ್ತೆರ್.

ಡಿ.3: ಸೌಜನ್ಯ ಕೇಸ್ ಮರು ತನಿಖೆಗಾದ್ ನೆತ್ತೆರ್‌ಡ್ ಸಹಿ ಪಾಡ್ದ್ ಪ್ರಧಾನಿ, ಮುಖ್ಯಮಂತ್ರಿಗ್ ಮನವಿ ಸಲ್ಲಿಕೆ : ಅನಿಲ್ ಅಂತರ‌

ಬೋಲ್ತೆರ್: ಉಜಿರೆ ಎಸ್‌ಡಿಎಂ ಕಾಲೇಜ್ ದ ವಿದ್ಯಾರ್ಥಿನಿ ಕು.ಸೌಜನ್ಯನ್ ಅತ್ಯಾಚಾರಬಮಮಲ್ದಿನ ಬೊಕ್ಕ ಕೆರ್ನ ಕೇಸ್ ದ ಮರು ತನಿಖೆಗೆ ಆಗ್ರಹಿಸಾದ್ ನೆತ್ತೆರ್ ಡ್ ಸಹಿ ಪಾಡ್ದ್ ಪ್ರಧಾನಮಂತ್ರಿ ಬೊಕ್ಕ ಮುಖ್ಯಮಂತ್ರಿಗ್ ಮನವಿ ಸಲ್ಲಿಸಾವುನ ಸಲುವಾದ್ ರಾಷ್ಟ್ರೀಯ ಹಿಂದೂ ಜಾಗರಣ ವೇದಿಕೆ ಬೊಕ್ಕ ಪ್ರಜಾಪ್ರಭುತ್ವ ವೇದಿಕೆ ವತಿರ್ದ್ ಮಹೇಶ್ ಶೆಟ್ಟಿ ತಿಮರೋಡಿ ಮೆರೆನ ಮುತಾಲಿಕೆಡ್ ಉಜಿರೆ ಜಿಲ್ಲಾ ಪಂಚಾಯತ್ ವ್ಯಾಪ್ತಿದ ಜನಾಂದೋಲನ ಸಭೆ ಡಿಸೆಂಬರ್ 3 ತಾನಿ ಮಧ್ಯಾಹ್ನ 2:30ಕ್ಕ್ ಉಜಿರೆ ಚಾರ್ಮಾಡಿ ರೋಡ್ ದ ಅನುಗ್ರಹ ಶಾಲೆದ ಕೈತಲ್ ನಡಪೆರೆ ಉಂಡು ಪಂದ್ ರಾಷ್ಟ್ರೀಯ ಹಿಂದೂ ಜಾಗರಣ ವೇದಿಕೆದ ತಾಲೂಕು ಗುರ್ಕಾರ್ಲು ಅನಿಲ್ ಅಂತರ ಪಂಡೆರ್.

ಸಭೆಕ್ಕ್ ಸುಮಾರು 15 ಸಾರ ಜನ ಸೇರುನ ನೀರಿಕ್ಷೆ ಉಂಡು ಪಂದ್ ಪಂಡೆರ್. ಜನಾಂದೋಲನ ಸಭೆಟ್ ರಾಷ್ಟ್ರೀಯ ಹಿಂದೂ ಜಾಗರಣ ವೇದಿಕೆದ ಸ್ಥಾಪಕೆರ್ ಮಹೇಶ್ ಶೆಟ್ಟಿ ತಿಮರೋಡಿ, ನಿವೃತ್ತ ಪೊಲೀಸ್ ಅಧಿಕಾರಿ ಗಿರೀಶ್ ಮಟ್ಟಣ್ಣನವರ್, ತುಳುನಾಡ ದೈವರಾಧನೆ ವಿಮರ್ಶಕೆರ್ ತಮ್ಮಣ್ಣ ಶೆಟ್ಟಿ, ಸಾಮಾಜಿಕ ಹೋರಾಟಗಾರ್ತಿ ಪ್ರಸನ್ನರವಿ, ಸೌಜನ್ಯನ ಅಪ್ಪೆ ಕುಸುಮಾವತಿ ಚಂದಪ್ಪ ಗೌಡ, ಹೈಕೋರ್ಟ್ ವಕೀಲೆರ್ ಮೋಹಿತ್ ಕುಮಾರ್, ಒಡನಾಡಿ ಸೇವಾ ಸಂಸ್ಥೆದ ಎಂ.ಎಲ್.ಪರಶುರಾಮ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಪಂಡೆರ್. ಪತ್ರಿಕಾಗೋಷ್ಠಿಡ್ ಗೌರವಾಧ್ಯಕ್ಷೆರ್ ಹರೀಶ್ ಕುಮಾರ್ ಬರಮೇಲು, ತಾಲೂಕು ಸಂಚಾಲಕೆರ್ ಮನೋಜ್ ಕುಂಜರ್ಪ ಬೊಕ್ಕ ಪ್ರಜ್ವಲ್ ಇತ್ತೆರ್.

ಡಿ.3: ಸೋಣಂದೂರುಡು ಕಬಡ್ಡಿ ಪಂತೊ

ಪಣಕಜೆ: ಮಹಮ್ಮಾಯಿ ಕಟ್ಟೆ ಫ್ರೆಂಡ್ಸ್‌, ಸೋಣಂದೂರು ಹಳೆ ವಿದ್ಯಾರ್ಥಿ ಸಂಘ, ಸೋಣಂದೂರು-ಪಣಕಜೆ,ದ.ಕ ಜಿಲ್ಲಾ ಅಮೆಚೂರ್ ಕಬಡ್ಡಿ ಅಸೋಸಿಯೇಶನ್ ನೆತ್ತ ಸಹಕಾರದೊಟ್ಟಿಗೆ ಸ.ಹಿ.ಪ್ರಾ.ಶಾಲೆ ಸೋಣಂದೂರು ನೆತ್ತ ಅಭಿವೃದ್ಧಿದ ಲೆಕ್ಕಡ್‌ 55 ಕೆಜಿ ವಿಭಾಗದ ಆಂಜೋಕ್ಲೆನ ಅಂತರ್‌ ಜಿಲ್ಲಾಮಟ್ಟದ ಕಬಡ್ಡಿ ಪಂತೊ ಡಿ.3 ತಾನಿ ಸೋಣಂದೂರು ಸ.ಹಿ.ಪ್ರಾ.ಶಾಲೆದ ಮೈದಾನಡ್ ನಡಪರೆ ಉಂಡು.

ಸುರುತ ಇನಾಮು 6,023 ರೂ. ಪನವು ಬೊಕ್ಕ ಎಮ್.ಎಫ್.ಸಿ ಟ್ರೋಫಿ, ರಡ್ಡನೇ ಇನಾಮು 4,023 ಪನವು ಬೊಕ್ಕ ಎಮ್.ಎಫ್‌.ಸಿ ಟ್ರೋಫಿ, ಮೂಜನೇ ಇನಾಮು 2,023 ಪನವು ಬೊಕ್ಕ ಎಮ್.ಎಫ್.ಸಿ ಟ್ರೋಫಿ, ನಾಲನೇ ಇನಾಮು 2,023 ಪನವು ಬೊಕ್ಕ ಎಮ್.ಎಫ್.ಸಿ ಟ್ರೋಫಿ. ಈ ಪಂತೊಡು ಎಚ್ಚಿನ ಕ್ರೀಡಾಮಾನಿಲು ಪಾಲ್‌ ಪಡೆಯೊಡು ಪಂದ್‌ ಲೆಪ್ಪೋಲೆಡ್‌ ತೆರಿಪಾದೆರ್‌.

ಡಿ.2: ಉಜಿರೆಡ್ ಯಕ್ಷ ಸಂಭ್ರಮ‌, ಸಾಧಕೆರೆಗ್ ಸನ್ಮಾನ

ಬೋಲ್ತೆರ್: ಯಕ್ಷ ಧ್ರುವ ಪಟ್ಲ ಫೌಂಡೇಶನ್ ಬೋಲ್ತೆರ್ ಘಟಕದ ವತಿರ್ದ್ ಯಕ್ಷ ಸಂಭ್ರಮ ಡಿಸೆಂಬರ್ 2 ತಾನಿ ಬಯ್ಯ 6 ಗಂಟೆಗ್ ಉಜಿರೆ ಶ್ರೀ ಜನಾರ್ಧನ ಸ್ವಾಮಿ ದೇವಸ್ಥಾನದ ರಥಬೀದಿಡ್ ನಡಪರೆ ಉಂಡು. ವಿಶೇಷವಾದ್ ಪತ್ತ್ ಮೈಸಾಸುರನ ಬಾಲಲೀಲೆದ ಆಟದೊಟ್ಟಿಗೆ ಸಭಾಪ್ರವೇಶ ಅವರೆ ಉಂಡು.

ಬಂಗಾರ್ದ ಕಿರೀಟಡ್ ಶ್ರೀ ದೇವಿನ ಪ್ರತ್ಯಕ್ಷದ ಸನ್ನಿವೇಶ, ಚಂಡ-ಮುಂಡೆರೆಬ ಅಬ್ಬರದ ಪ್ರವೇಶ, ಇಂಚನೆ ಮಸ್ತ್ ವಿಶೇಷ ವೈಭವದ ಸನ್ನಿವೇಶಲು, ಆಕರ್ಷಣೀಯ ವಿದ್ಯುತ್ ದೀಪಾ ಸಂಯೋಜನೆ, ರಂಗಸ್ಥಳಕ್ಕ್ ಪೂತ್ತ ವಿಶೇಷ ಅಲಂಕಾರ ಉಂಡು ಪಂದ್ ಘಟಕದ ಗುರ್ಕಾರ್ಲು ಸುರೇಶ್ ಶೆಟ್ಟಿ ಲಾಯಿಲ ತೆರಿಪಾದೆರ್. ನ.28 ತಾನಿ ಲಯನ್ಸ್ ಭವನಡ್ ನಡತ್ತಿನ ಪತ್ರಿಕಾಗೋಷ್ಠಿಡ್ ಪಾತೆರಿಯೆರ್.

ವೈಭವದ ಮೆರವಣಿಗೆ-ಪ್ರಶಸ್ತಿ ಪ್ರದಾನ- ಗೌರವ ಸನ್ಮಾನ: ಬಯ್ಯ 5 ಗಂಟೆರ್ದ್ ಉಜಿರೆ ಓಶಿಯನ್ ಪರ್ಲ್ ರ್ದ್ ಶ್ರೀ ಜನಾರ್ಧನ ಸ್ವಾಮಿ ದೇವಸ್ಥಾನ ರಥಬೀದಿ ಮುಟ್ಟ ಭಜನಾ ತಂಡಲು, ಚೆಂಡೆ, ಬ್ಯಾಂಡ್, ಕೊಂಬು, ಸ್ಯಾಕ್ಸೋಫೋನ್, ಆಕರ್ಷಕ ಪಟಾಕಿ, ಬೇತೆ ಬೇತೆ ವೇಷಭೂಷಣದೊಟ್ಟಿಗೆ ವೈಭವದ ಮೆರವಣಿಗೆ ನಡಪೆರೆ ಉಂಡು. ವಿಶೇಷ ಖಾದ್ಯಲೆನ ಭೋಜನ, ಯಕ್ಷಗಾನ ಕ್ಷೇತ್ರದ ಭಾಗವತೆರ್ ಮೋಹನ್ ಬೈಪಡಿತ್ತಾಯ ಬೊಕ್ಕ ಪ್ರಜ್ವಲ್ ಕುಮಾರ್ ಗುರುವಾಯನಕೆರೆ, ಕೃಷಿ ಕ್ಷೇತ್ರದ ಬಿ.ಕೆ.ದೇವರಾವದ ಅಮೈ ಮಿತ್ತಬಾಗಿಲು ಮೊಕ್ಲೆಗ್ ಯಕ್ಷ ಸಂಭ್ರಮ-2023ರ ಪ್ರಶಸ್ತಿ ಪ್ರದಾನ ನಡಪೆರೆ ಉಂಡು. ಶ್ರೀ ಲಕ್ಷ್ಮೀ ಗ್ರೂಪ್ ಉಜಿರೆದ ಮೋಹನ್ ಕುಮಾರ್, ಭರತ್ ಕುಮಾರ್ ಉಜಿರೆ, ಅರ್ಚನಾ ರಾಜೇಶ್ ಪೈ ಉಜಿರೆ ಮೊಕ್ಲೆಗ್ಲ ಈ ಪೊರ್ತುಡು ಮಾನಾದಿಗೆ ನಡಪೆರೆ ಉಂಡು.

ಕಾರ್ಯಕ್ರಮದ ಗುರ್ಕಾರ್ಮೆನ್ ಯಕ್ಷಧ್ರುವ ಪಟ್ಲ ಘಟಕದ ಗೌರವಾಧ್ಯಕ್ಷೆರ್ ಶಶಿಧರ್ ಶೆಟ್ಟಿ ಬರೋಡ ವಹಿಸೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಜಮ್ಮು ಕಾಶ್ಮೀರ ಸರ್ಕಾರದ ಪ್ರಿನ್ಸಿಪಲ್ ಸೆಕ್ರೆಟರಿ ಆಫ್ ಪವರ್ ಡಿಪಾರ್ಟ್ಮೆಂಟ್ ಹಿರಿಯಡ್ಕ ರಾಜೇಶ್ ಪ್ರಸಾದ್, ವಿವೇಕಾನಂದ ವಿದ್ಯಾವರ್ಧಕ ಸಂಘ ಪುತ್ತೂರುದ ಡಾ.ಪ್ರಭಾಕರ್ ಭಟ್ ಕಲ್ಲಡ್ಕ, ಬೆದ್ರ ಆಳ್ವಾಸ್ ಶಿಕ್ಷಣ ಸಂಸ್ಥೆದ ಡಾ.ಎಂ.ಮೋಹನ್ ಆಳ್ವ, ಶ್ರೀ ಜನಾರ್ಧನ ಸ್ವಾಮಿ ದೇವಸ್ಥಾನದ ಆನುವಂಶಿಕ ಆಡಳಿತ ಮೋಕ್ತೇಸರೆರ್ ಶರತ್‌ಕೃಷ್ಣ ಪಡುವೆಟ್ನಾಯ, ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ಟಿ ಬೊಕ್ಕ ಉಜಿರೆ ಗ್ರಾ.ಪಂ. ಅಧ್ಯಕ್ಷೆ ಉಷಾಕಿರಣ್ ಕಾರಂತ್ ಪಾಲ್ ಪಡೆಯೆರೆ ಉಲ್ಲೆರ್. ಪತ್ರಿಕಾಗೋಷ್ಠಿಡ್ ಕೋಶಾಧಿಕಾರಿ ಆದರ್ಶ ಜೈನ್ ಗುರುವಾಯನಕೆರೆ, ಸಂಚಾಲಕೆರ್ ಕಿರಣ್ ಕುಮಾರ್ ಜೈನ್‌ಪೇಟೆ ಬೊಕ್ಕ ಸಹ ಸಂಚಾಲಕೆರ್ ತುಕರಾಮ್ ಬಿ. ಬೋಲ್ತೆರ್ ಇತ್ತೆರ್.

ಡಿ.2: ತೆಂಕಕಾರಂದೂರುಡು ಮ್ಯಾಟ್‌ ಕಬಡ್ಡಿದ ಗೊಬ್ಬು

ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ ಬೊಕ್ಕ ದೋಸ್ತಿಲೆನ ಕೂಟ ಕಾಪಿನಡ್ಕ ತೆಂಕಕಾರಂದೂರು ಗ್ರಾಮ ನೆತ್ತ ರಜತ ಮಹೋತ್ಸವದ ಪ್ರಯುಕ್ತ ಸಾಂಸ್ಕೃತಿಕ ಕಾರ್ಯಕ್ರಮ, ಬೋಲ್ತೆರ್‌ ತಾಲೂಕು ಅಮೆಚೂರು ಕಬಡ್ಡಿ ಅಸೋಸಿಯೇಶನ್‌ ನೆತ್ತ ಒಟ್ಟು ಸೇರಿಗೆಡ್‌ 65 ಕೆಜಿ ವಿಭಾಗದ ರಾತ್ರೆ ಪಗೆಲ್ ಮುಕ್ತ ಮ್ಯಾಟ್‌ ಕಬಡ್ಡಿ ಗೊಬ್ಬು ಡಿ.2 ತಾನಿ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆದ ಅಂಗನೊಡು ನಡಪೆರೆ ಉಂಡು.

ಡಿ.2 ತಾನಿ ಕಾಂಡೆ ಕೊಡಿ ಏರಾದ್, ಲಘು ಉಪಹಾರ, ಸಭಾ ಕಾರ್ಯಕ್ರಮ ನಡಪೆರೆ ಉಂಡು. ಬಯ್ಯ 4 ಗಂಟೆರ್ದ್‌ 6.30 ಮುಟ್ಟ ಊರುದ ಅಂಗನವಾಡಿ ಜೋಕ್ಲೆರ್ದ್‌ ಬೊಕ್ಕ ಶಾಲಾ ಜೋಕ್ಲೆರ್ದ್‌ ಸಾಂಸ್ಕೃತಿಕ ವೈಭವ ನಡಪೆರೆ ಉಂಡು. 6.30 ರ್ದ್‌ 9 ಗಂಟೆ ಮುಟ್ಟ ಸಭಾಕಾರ್ಯಕ್ರಮ, 9 ರ್ದ್‌ 10.30ಮುಟ್ಟ ಕುಶಲ್ದ ಕುರ್ಲರಿ ಹಾಸ್ಯ ಕಾರ್ಯಕ್ರಮ ನಡಪೆರೆ ಉಂಡು. 10.30 ರ್ದ್‌ ಬೊಕ್ಕ ಕಬಡ್ಡಿ ಪಂದ್ಯಾಟ ನಡಪೆರೆ ಉಂಡು.