ಬೊಲ್ತೆರ್ ಸುದ್ದಿ | Belthangady News

ಡಿ.3: ಸೋಣಂದೂರುಡು ಕಬಡ್ಡಿ ಪಂತೊ

ಪಣಕಜೆ: ಮಹಮ್ಮಾಯಿ ಕಟ್ಟೆ ಫ್ರೆಂಡ್ಸ್‌, ಸೋಣಂದೂರು ಹಳೆ ವಿದ್ಯಾರ್ಥಿ ಸಂಘ, ಸೋಣಂದೂರು-ಪಣಕಜೆ,ದ.ಕ ಜಿಲ್ಲಾ ಅಮೆಚೂರ್ ಕಬಡ್ಡಿ ಅಸೋಸಿಯೇಶನ್ ನೆತ್ತ ಸಹಕಾರದೊಟ್ಟಿಗೆ ಸ.ಹಿ.ಪ್ರಾ.ಶಾಲೆ ಸೋಣಂದೂರು ನೆತ್ತ ಅಭಿವೃದ್ಧಿದ ಲೆಕ್ಕಡ್‌ 55 ಕೆಜಿ ವಿಭಾಗದ ಆಂಜೋಕ್ಲೆನ ಅಂತರ್‌ ಜಿಲ್ಲಾಮಟ್ಟದ ಕಬಡ್ಡಿ ಪಂತೊ ಡಿ.3 ತಾನಿ ಸೋಣಂದೂರು ಸ.ಹಿ.ಪ್ರಾ.ಶಾಲೆದ ಮೈದಾನಡ್ ನಡಪರೆ ಉಂಡು.

ಸುರುತ ಇನಾಮು 6,023 ರೂ. ಪನವು ಬೊಕ್ಕ ಎಮ್.ಎಫ್.ಸಿ ಟ್ರೋಫಿ, ರಡ್ಡನೇ ಇನಾಮು 4,023 ಪನವು ಬೊಕ್ಕ ಎಮ್.ಎಫ್‌.ಸಿ ಟ್ರೋಫಿ, ಮೂಜನೇ ಇನಾಮು 2,023 ಪನವು ಬೊಕ್ಕ ಎಮ್.ಎಫ್.ಸಿ ಟ್ರೋಫಿ, ನಾಲನೇ ಇನಾಮು 2,023 ಪನವು ಬೊಕ್ಕ ಎಮ್.ಎಫ್.ಸಿ ಟ್ರೋಫಿ. ಈ ಪಂತೊಡು ಎಚ್ಚಿನ ಕ್ರೀಡಾಮಾನಿಲು ಪಾಲ್‌ ಪಡೆಯೊಡು ಪಂದ್‌ ಲೆಪ್ಪೋಲೆಡ್‌ ತೆರಿಪಾದೆರ್‌.

ಡಿ.2: ಉಜಿರೆಡ್ ಯಕ್ಷ ಸಂಭ್ರಮ‌, ಸಾಧಕೆರೆಗ್ ಸನ್ಮಾನ

ಬೋಲ್ತೆರ್: ಯಕ್ಷ ಧ್ರುವ ಪಟ್ಲ ಫೌಂಡೇಶನ್ ಬೋಲ್ತೆರ್ ಘಟಕದ ವತಿರ್ದ್ ಯಕ್ಷ ಸಂಭ್ರಮ ಡಿಸೆಂಬರ್ 2 ತಾನಿ ಬಯ್ಯ 6 ಗಂಟೆಗ್ ಉಜಿರೆ ಶ್ರೀ ಜನಾರ್ಧನ ಸ್ವಾಮಿ ದೇವಸ್ಥಾನದ ರಥಬೀದಿಡ್ ನಡಪರೆ ಉಂಡು. ವಿಶೇಷವಾದ್ ಪತ್ತ್ ಮೈಸಾಸುರನ ಬಾಲಲೀಲೆದ ಆಟದೊಟ್ಟಿಗೆ ಸಭಾಪ್ರವೇಶ ಅವರೆ ಉಂಡು.

ಬಂಗಾರ್ದ ಕಿರೀಟಡ್ ಶ್ರೀ ದೇವಿನ ಪ್ರತ್ಯಕ್ಷದ ಸನ್ನಿವೇಶ, ಚಂಡ-ಮುಂಡೆರೆಬ ಅಬ್ಬರದ ಪ್ರವೇಶ, ಇಂಚನೆ ಮಸ್ತ್ ವಿಶೇಷ ವೈಭವದ ಸನ್ನಿವೇಶಲು, ಆಕರ್ಷಣೀಯ ವಿದ್ಯುತ್ ದೀಪಾ ಸಂಯೋಜನೆ, ರಂಗಸ್ಥಳಕ್ಕ್ ಪೂತ್ತ ವಿಶೇಷ ಅಲಂಕಾರ ಉಂಡು ಪಂದ್ ಘಟಕದ ಗುರ್ಕಾರ್ಲು ಸುರೇಶ್ ಶೆಟ್ಟಿ ಲಾಯಿಲ ತೆರಿಪಾದೆರ್. ನ.28 ತಾನಿ ಲಯನ್ಸ್ ಭವನಡ್ ನಡತ್ತಿನ ಪತ್ರಿಕಾಗೋಷ್ಠಿಡ್ ಪಾತೆರಿಯೆರ್.

ವೈಭವದ ಮೆರವಣಿಗೆ-ಪ್ರಶಸ್ತಿ ಪ್ರದಾನ- ಗೌರವ ಸನ್ಮಾನ: ಬಯ್ಯ 5 ಗಂಟೆರ್ದ್ ಉಜಿರೆ ಓಶಿಯನ್ ಪರ್ಲ್ ರ್ದ್ ಶ್ರೀ ಜನಾರ್ಧನ ಸ್ವಾಮಿ ದೇವಸ್ಥಾನ ರಥಬೀದಿ ಮುಟ್ಟ ಭಜನಾ ತಂಡಲು, ಚೆಂಡೆ, ಬ್ಯಾಂಡ್, ಕೊಂಬು, ಸ್ಯಾಕ್ಸೋಫೋನ್, ಆಕರ್ಷಕ ಪಟಾಕಿ, ಬೇತೆ ಬೇತೆ ವೇಷಭೂಷಣದೊಟ್ಟಿಗೆ ವೈಭವದ ಮೆರವಣಿಗೆ ನಡಪೆರೆ ಉಂಡು. ವಿಶೇಷ ಖಾದ್ಯಲೆನ ಭೋಜನ, ಯಕ್ಷಗಾನ ಕ್ಷೇತ್ರದ ಭಾಗವತೆರ್ ಮೋಹನ್ ಬೈಪಡಿತ್ತಾಯ ಬೊಕ್ಕ ಪ್ರಜ್ವಲ್ ಕುಮಾರ್ ಗುರುವಾಯನಕೆರೆ, ಕೃಷಿ ಕ್ಷೇತ್ರದ ಬಿ.ಕೆ.ದೇವರಾವದ ಅಮೈ ಮಿತ್ತಬಾಗಿಲು ಮೊಕ್ಲೆಗ್ ಯಕ್ಷ ಸಂಭ್ರಮ-2023ರ ಪ್ರಶಸ್ತಿ ಪ್ರದಾನ ನಡಪೆರೆ ಉಂಡು. ಶ್ರೀ ಲಕ್ಷ್ಮೀ ಗ್ರೂಪ್ ಉಜಿರೆದ ಮೋಹನ್ ಕುಮಾರ್, ಭರತ್ ಕುಮಾರ್ ಉಜಿರೆ, ಅರ್ಚನಾ ರಾಜೇಶ್ ಪೈ ಉಜಿರೆ ಮೊಕ್ಲೆಗ್ಲ ಈ ಪೊರ್ತುಡು ಮಾನಾದಿಗೆ ನಡಪೆರೆ ಉಂಡು.

ಕಾರ್ಯಕ್ರಮದ ಗುರ್ಕಾರ್ಮೆನ್ ಯಕ್ಷಧ್ರುವ ಪಟ್ಲ ಘಟಕದ ಗೌರವಾಧ್ಯಕ್ಷೆರ್ ಶಶಿಧರ್ ಶೆಟ್ಟಿ ಬರೋಡ ವಹಿಸೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಜಮ್ಮು ಕಾಶ್ಮೀರ ಸರ್ಕಾರದ ಪ್ರಿನ್ಸಿಪಲ್ ಸೆಕ್ರೆಟರಿ ಆಫ್ ಪವರ್ ಡಿಪಾರ್ಟ್ಮೆಂಟ್ ಹಿರಿಯಡ್ಕ ರಾಜೇಶ್ ಪ್ರಸಾದ್, ವಿವೇಕಾನಂದ ವಿದ್ಯಾವರ್ಧಕ ಸಂಘ ಪುತ್ತೂರುದ ಡಾ.ಪ್ರಭಾಕರ್ ಭಟ್ ಕಲ್ಲಡ್ಕ, ಬೆದ್ರ ಆಳ್ವಾಸ್ ಶಿಕ್ಷಣ ಸಂಸ್ಥೆದ ಡಾ.ಎಂ.ಮೋಹನ್ ಆಳ್ವ, ಶ್ರೀ ಜನಾರ್ಧನ ಸ್ವಾಮಿ ದೇವಸ್ಥಾನದ ಆನುವಂಶಿಕ ಆಡಳಿತ ಮೋಕ್ತೇಸರೆರ್ ಶರತ್‌ಕೃಷ್ಣ ಪಡುವೆಟ್ನಾಯ, ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ಟಿ ಬೊಕ್ಕ ಉಜಿರೆ ಗ್ರಾ.ಪಂ. ಅಧ್ಯಕ್ಷೆ ಉಷಾಕಿರಣ್ ಕಾರಂತ್ ಪಾಲ್ ಪಡೆಯೆರೆ ಉಲ್ಲೆರ್. ಪತ್ರಿಕಾಗೋಷ್ಠಿಡ್ ಕೋಶಾಧಿಕಾರಿ ಆದರ್ಶ ಜೈನ್ ಗುರುವಾಯನಕೆರೆ, ಸಂಚಾಲಕೆರ್ ಕಿರಣ್ ಕುಮಾರ್ ಜೈನ್‌ಪೇಟೆ ಬೊಕ್ಕ ಸಹ ಸಂಚಾಲಕೆರ್ ತುಕರಾಮ್ ಬಿ. ಬೋಲ್ತೆರ್ ಇತ್ತೆರ್.

ಡಿ.2: ತೆಂಕಕಾರಂದೂರುಡು ಮ್ಯಾಟ್‌ ಕಬಡ್ಡಿದ ಗೊಬ್ಬು

ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ ಬೊಕ್ಕ ದೋಸ್ತಿಲೆನ ಕೂಟ ಕಾಪಿನಡ್ಕ ತೆಂಕಕಾರಂದೂರು ಗ್ರಾಮ ನೆತ್ತ ರಜತ ಮಹೋತ್ಸವದ ಪ್ರಯುಕ್ತ ಸಾಂಸ್ಕೃತಿಕ ಕಾರ್ಯಕ್ರಮ, ಬೋಲ್ತೆರ್‌ ತಾಲೂಕು ಅಮೆಚೂರು ಕಬಡ್ಡಿ ಅಸೋಸಿಯೇಶನ್‌ ನೆತ್ತ ಒಟ್ಟು ಸೇರಿಗೆಡ್‌ 65 ಕೆಜಿ ವಿಭಾಗದ ರಾತ್ರೆ ಪಗೆಲ್ ಮುಕ್ತ ಮ್ಯಾಟ್‌ ಕಬಡ್ಡಿ ಗೊಬ್ಬು ಡಿ.2 ತಾನಿ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆದ ಅಂಗನೊಡು ನಡಪೆರೆ ಉಂಡು.

ಡಿ.2 ತಾನಿ ಕಾಂಡೆ ಕೊಡಿ ಏರಾದ್, ಲಘು ಉಪಹಾರ, ಸಭಾ ಕಾರ್ಯಕ್ರಮ ನಡಪೆರೆ ಉಂಡು. ಬಯ್ಯ 4 ಗಂಟೆರ್ದ್‌ 6.30 ಮುಟ್ಟ ಊರುದ ಅಂಗನವಾಡಿ ಜೋಕ್ಲೆರ್ದ್‌ ಬೊಕ್ಕ ಶಾಲಾ ಜೋಕ್ಲೆರ್ದ್‌ ಸಾಂಸ್ಕೃತಿಕ ವೈಭವ ನಡಪೆರೆ ಉಂಡು. 6.30 ರ್ದ್‌ 9 ಗಂಟೆ ಮುಟ್ಟ ಸಭಾಕಾರ್ಯಕ್ರಮ, 9 ರ್ದ್‌ 10.30ಮುಟ್ಟ ಕುಶಲ್ದ ಕುರ್ಲರಿ ಹಾಸ್ಯ ಕಾರ್ಯಕ್ರಮ ನಡಪೆರೆ ಉಂಡು. 10.30 ರ್ದ್‌ ಬೊಕ್ಕ ಕಬಡ್ಡಿ ಪಂದ್ಯಾಟ ನಡಪೆರೆ ಉಂಡು.

ನೆರಿಯಡ್ ಕಾರ್‌ದ ಮಿತ್ತ್ ಆನೆ ದಾಳಿ : ಕೆಲವೆರೆಗ್ ಗಾಯ, ಕಾರ್ ಜಖಂ‌

ಬೋಲ್ತೆರ್: ತಾಲೂಕುದ ನೆರಿಯ ಪೋಸ್ಟ್ ಆಫೀಸ್ ಕೈತಲ್‌ಡ್ ಕಾರ್‌ದ ಮಿತ್ತ್ ಕಾಡಾನೆ ದಾಳಿ ಮಲ್ತಿನ ನಡಕೆ ನಡತ್‌ಂಡ್.‌ ಆಜಿ ಜನ ಇತ್ತಿನ ಆಲ್ಟೋ ಕಾರ್‌ದ ಮಿತ್ತ್ ಕಾಡಾನೆ ದಾಳಿ ಮಲ್ತ್‌ದ್, ಕೆಲವೆರೆಗ್ ಗಾಯ ಆದ್ ಕಾರ್‌ ಪೂರ್ತಿ ಜಖಂ ಆತ್‌ಂಡ್‌ ಪಂದ್‌ ತೆರಿದ್‌ ಬೈದ್‌ಂಡ್.

ಪೆಟ್ಟ್ ಆಯಿನಕ್ಲೆನ್ ಕೂಡ್ಲೆ ಸ್ಥಳೀಯ ಆಸ್ಪತ್ರೆಗ್ ಚಿಕಿತ್ಸೆಗ್‌ ಪಂದ್‌ ಲೆತೊಂದು ಪೋತೆರ್.

ಟೀಮ್ ದೇವರಗುಡ್ಡೆ ವತಿರ್ದ್ ಜೋಕ್ಲೆನ ದಿನಾಚರಣೆ, ಅಂಗನವಾಡಿಗ್ ಚೇರ್ ವಿತರಣೆ

ಕಲ್ಮಂಜ: ಕಲ್ಮಂಜ ಗ್ರಾಮದ ಪಜಿರಡ್ಕ- ಮದ್ಮಲ್ ಕಟ್ಟೆ ಅಂಗನವಾಡಿ ಕೇಂದ್ರಗ್ ಮಕ್ಕಳ ದಿನಾಚರಣೆ ಪ್ರಯುಕ್ತ ಟೀಮ್ ದೇವರಗುಡ್ಡೆ ವತಿರ್ದ್ ನ.25 ಶನಿವಾರ ಚೇರ್ ವಿತರಣೆ ಮಲ್ತೆರ್. 15-20 ಜೋಕುಲು ಇಪ್ಪುನ ಅಂಗನವಾಡಿ ಕೇಂದ್ರಡ್ ಮಸ್ತ್ ಮೂಲ ಸೌಕರ್ಯ ಇಜ್ಜಾಂದೆ, ಬೊಕ್ಕ ಬರ್ಸದ ಕಾಲಡ್ ನೀರ್ ಸೇರೊಂದು ಇಪ್ಪುಂಡು. ಸ್ಥಿತಿ ಈ ಅಂಚನೆ ಅಂಗನವಾಡಿ ಕೇಂದ್ರಗ್ ಪೊಸ ಕಟ್ವಾನದ ಬೇಡಿಕೆ ಮಸ್ತ್ ವರ್ಷರ್ದ್ ಕೇಂದ್ ಬರೊಂದು ಉಂಡು.

ನೆಕ್ಕ್ ಮಾತೆರ್ಲ ಸಹಕಾರ ಕೊರೊಡು ಪಂದ್ ಪಂಡೆರ್. ಕಾರ್ಯಕ್ರಮಡ್ ಬಾಲವಿಕಾಸ ಸಮಿತಿದ ಗುರ್ಕಾರ್ಲು ರೇಖಾ, ಆಶಾ ಕಾರ್ಯಕರ್ತೆ ವಿಜಯಾ, ಅಂಗನವಾಡಿ ಕಾರ್ಯಕರ್ತೆ ಜಯಶ್ರೀ, ಸಹಾಯಕಿ ಶ್ರೀದೇವಿ, ಟೀಮ್ ದೇವರಗುಡ್ಡೆದ ಹರೀಶ್ ಗೌಡ, ಸಚಿನ್ ಗೌಡ ಕಲ್ಮಂಜ, ಶಿವಪ್ರಸಾದ್, ಸಂಧ್ಯಾ, ಪುಷ್ಪಾವತಿ ಬೊಕ್ಕ ಪೋಷಕೆರ್ ಇತ್ತೆರ್.

ದೋಸ್ತಿನ ಬುಡೆದಿನ ಮೊಬೈಲ್‌ ಕಂಡ್‌ದ್‌ ದುಡ್ಡು ಟ್ರಾನ್ಸ್‌ಫರ್ !!

ಬೋಲ್ತೆರ್: ಪೊಂಜೊವ್‌ ಒರ್ತಿನ ಮೊಬೈಲ್‌ ಕಂಡ್‌ದ್ ಅವೆರ್ದ್‌ ಕಾಸ್‌ ಟ್ರಾನ್ಸ್‌ಪರ್‌ ಮಲ್ತೊಂದು ಮೋಸ ಮಲ್ತಿನ ಘಟನೆ ಬೋಲ್ತೆರ್‌ಡ್‌ ನಡತ್‌ಂಡ್. ಅಭಿದಾ ಬಾನು, ಬೋಲ್ತೆರ್‌ದ ಕುವೆಟ್ಟು ನಿವಾಸಿ ದೂರು ಕೊರ್ತೆರ್. ಸಿದ್ದಿಕ್‌ ಬೊಕ್ಕ ಬೇತೆಕ್ಲೆನ ಮಿತ್ತ್‌ ಕೇಸ್‌ ದಾಖಲಾತ್‌ಂಡ್. ಈ ಘಟನೆ ನ.9 ದಾನಿ ನಡತ್‌ಂಡ್. 

ಪೊಂಜೊವ್‌ ಇಲ್ಲಲ್‌ ಇಜ್ಜಂದಿನ ಟೈಮ್‌ ತೂದು ಪರಿಚಯದ ಸಿದ್ದಿಕ್‌ ಪೊಂಜೊವ್‌ನ ಇಲ್ಲಲ್‌ ಮೊಬೈಲ್‌ ಕಂಡ್‌ದ್ ಫೋನ್‌ ಪೇ ಮುಖಾತರ ಅಕೌಂಟ್‌ರ್ದ್ 64 ಸಾವಿರ ಕಾಸ್‌ದ ಪೈಕಿ 34 ಸಾವಿರ ಜಾಫರ್‌ಗ್, 25 ಸಾವಿರ ಮಹಮ್ಮದ್‌ಗ್‌ ಬೊಕ್ಕ 🤔2000 ರೂ. ಸಿರಾಜ್‌ಗ್ ವರ್ಗಾವಣೆ ಮಲ್ತ್‌ದೆ. ಮೊಕುಲು ಮಾತ ಕಂಡನಿನ ಫ್ರೆಂಡ್ಸ್‌ ಆದ್‌ ಕಾಸ್‌ ವಾಪಸ್‌ ಕೊರುವೆರ್‌ ಪಂದ್‌ ಇಡೆ ಮುಟ್ಟ ಕಾತ್‌ದೆರ್.‌ ಆಂಡ ಕಾಸ್‌ ಕೊರಂದಿನ ಕಾರಣ ಬೋಲ್ತೆರ್‌ ಸ್ಟೇಷನ್‌ಗ್‌ ಕೇಸ್‌ನ್‌ ಕೊರ್ತೆರ್.‌ ನೆತ್ತ ಪ್ರಕಾರ ಕೇಸ್‌ ದಾಖಲ್‌ ಮಲ್ತೊಂದು ತನಿಖೆ ಮಲ್ತೊಂದು ಉಲ್ಲೆರ್.

ಬೋಲ್ತೆರ್: ಬೈಕ್ ಡಿವೈಡರ್‌ಗ್ ಗುದ್ದುದು ತೀರ್‌ಪೋಯಿನ ಕಲ್ಪಾರ್ಥಿ

ಬೋಲ್ತೆರ್ : ಬೈಕ್ ಕೈ ತತ್ತ್‌ದ್ ಡಿವೈಡರ್‌ಗ್ ಗುದ್ದುದು ಕಲ್ಪಾರ್ಥಿ ಒರಿ ಮಸ್ತ್ ಪೆಟ್ಟಾದ್ ತೀರ್‌ಪೋಯಿನ ಘಟನೆ ಬೋಲ್ತೆರ್‌ದ ಉಜಿರೆ ಖಾಸಗಿ ಕಾಲೇಜ್‌ ರೋಡ್‌ಡ್‌ ನಡತ್‌ಂಡ್.‌ ಉಜಿರೆದ ಖಾಸಗಿ ಕಾಲೇಜ್‌ದ ಡಿಪ್ಲೊಮಾ ಕಲ್ಪಾರ್ಥಿ, ಕಲ್ಮಂಜ ಗ್ರಾಮದ ಬಟ್ಟಾಜೆ ನಿವಾಸಿ ದೀಕ್ಷಿತ್ (20) ತೀರ್‌ಪೋಯಿನ ಕಲ್ಪಾರ್ಥಿ.

ಕಾಲೇಜ್‌ಡ್‌ ಕಾರ್ಯಕ್ರಮ ಇತ್ತಿನ ಕಾರಣ ಮದ್ಯಾಹ್ನ ವನಸ್‌ ಆದ್‌ ಪೋನಗ ಈ ಘಟನೆ ನಡತ್‌ಂಡ್.‌ ಅಪಗನೆ ಕೈತಲ್‌ದ ಆಸ್ಪತ್ರೆಗ್‌ ದಾಖಲ್‌ ಮಲ್ತೆರ್.‌ ಆಂಡ ಎಚ್ಚದ ಮರ್ದ್‌ಗಾದ್‌ ಕುಡ್ಲದ ಆಸ್ಪತ್ರೆಗ್‌ ದಾಖಲ್‌ ಮಲ್ತ್‌ ಇತ್ತೆರ್.‌ ತೆರಕ್ಕ್‌ ಜಾಸ್ತಿ ಪೆಟ್ಟ್‌ ಆಯಿನ ಕಾರಣ ಚಿಕಿತ್ಸೆ ಫಲಕಾರಿ ಆವಂದೆ ತೀರ್‌ಪೋತೆರ್.‌ ನೆತ್ತ ಬಗೆಟ್‌ ಬೋಲ್ತೆರ್‌ ಪೊಲೀಸ್‌ ಸ್ಟೇಷನ್‌ಡ್‌ ಕೇಸ್‌ ದಾಖಲಾತ್‌ಂಡ್.

ಬೋಲ್ತೆರ್:‌ ಇಲ್ಲದ ಶೆಡ್ಡ್‌ಡ್‌ ಉತಾಂದ್ ಇತ್ತಿನ ಇನೋವಾ ಕಾರ್‌ನ್‌ ಕಂಡಿನ ಕಲ್ವೆರ್…!!‌

ಬೋಲ್ತೆರ್ : ಇಲ್ಲದ ಶೆಡ್ಡ್‌ಡ್‌ ಉಂತಾದ್‌ ಇತ್ತಿನ ಇನ್ನೋವಾ ಕಾರ್‌ ಕಾಣೆ ಆಯಿನ ಘಟನೆ ಬೋಲ್ತೆರ್ ತಾಲೂಕುದ ಚಾರ್ಮಾಡಿ ಗ್ರಾಮದ ಕಕ್ಕಿಂಜೆದಲ್ಪ ನಡತ್‌ಂಡ್. ಈ ಬಗ್ಗೆ ಧರ್ಮಸ್ಥಳ ಪೊಲೀಸ್ ಠಾಣೆಡ್‌ ಕೇಸ್‌ ದಾಖಲಾತ್‌ಂಡ್. ಉಳ್ಳಾಲ ನಿವಾಸಿ ಇಸಾಕ್ ಪನ್ಪುನಾರ್ನ ಕಾರ್‌ನ್‌ ಅರೆನ ಸಂಬಂಧಿ ನೌಫಲ್ ಪನ್ಪುನಾರ್ ರಾತ್ರೆ ಕಕ್ಕಿಂಜೆ ಇಲ್ಲದ ಶೆಡ್ಡ್‌ಡ್‌ ಉಂತಾದ್‌ ಇತ್ತೆರ್.‌

ಕಾಂಡೆ ತೂನಗ ಕಾರ್‌ ಕಂಡಿನ ಬಗೆಟ್‌ ತೆರಿದ್‌ ಬೈದ್‌ಂಡ್. ಕಾರ್‌ದ ಬಿಲೆ 2.25 ಲಕ್ಷ ರೂಪಾಯಿ ಎಂದು ಅಂದಾಜ್‌ ಮಲ್ತ್‌ದೆರ್, ಕೈತಲ್‌ ಮಾತ ಕಾರ್‌ ನಾಡ್‌ಡಂಲ ಕಾರ್‌ ಪತ್ತೆ ಆವಂದಿನ ಕಾರಣ ಈ ಬಗ್ಗೆ ಧರ್ಮಸ್ಥಳ ಪೊಲೀಸ್ ಠಾಣೆಡ್‌ ಕೇಸ್‌ ದಾಖಲಾತ್‌ಂಡ್.

ವೇಣೂರು ಮಹಾಮಸ್ತಕಾಭಿಷೇಕ ಉಚ್ಚಯೊಗು ಮುಖ್ಯಮಂತ್ರಿ ಸಿದ್ದರಾಮಯ್ಯೆರೆಗ್‌ ಲೆಪ್ಪೋಲೆ

ಬೋಲ್ತೆರ್: ನನದ ಫೆಬ್ರವರಿ ತಿಂಗೊಲುಡು ವೇಣೂರುಡ್ ನಡಪೆರೆ ಇಪ್ಪುನ ಭಗವಾನ್ ಬಾಹುಬಲಿ ಸ್ವಾಮಿನ ಮಹಾಮಸ್ತಕಾಭೀಷೇಕ ಮಹೋತ್ಸವಗ್ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮೇರೆಗೆ ಅರ್ವ ಅರಮನೆತ ತಿಮ್ಮಣ್ಣರಸೆರ್ ಡಾ| ಪದ್ಮಪ್ರಸಾದ್ ಅಜಿಲೆರ್ ಲೆಪ್ಪೋಲೆನ್‌ ಕೊರಿಯೆರ್.

ಈ ಪೊರ್ತುಡು ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ವೇಣೂರು ತೀರ್ಥ ಕ್ಷೇತ್ರ ಸಮಿತಿದ ಪ್ರಧಾನ ಕಾರ್ಯದರ್ಶಿ ಪ್ರವೀಣ್ ಕುಮಾರ್ ಇಂದ್ರ ಇತ್ತೆರ್.