ಬೊಲ್ತೆರ್ ಸುದ್ದಿ | Belthangady News

ದೇವೆರೆ ಪಾದ ಸೇರಿಯೆರ್ ಸಹಕಾರಿ ಧುರೀಣೆರ್, ಜಿ.ಪಂ. ಮಾಜಿ ಒತ್ತು ಗುರ್ಕಾರೆ ನಿರಂಜನ ಬಾವಂತಬೆಟ್ಟು

ತಣ್ಣೀರುಪಂತ ಗ್ರಾಮದ ಬಾವಂತಬೆಟ್ಟು ನಿವಾಸಿ ಹಿರಿಯ ಸಹಕಾರಿ ಧುರೀಣ, ಸಹಕಾರ ರತ್ನ ನಿರಂಜನ ಬಾವಂತಬೆಟ್ಟು (75ವ) ಮೇರ್ ಫೆ.12 ಕ್ಕ್ ದೇವೆರೆ ಪಾದೊ ಸೇರಿಯೆರ್.

ಮೇರ್ 1973 ರ್ದ್ ಸಹಕಾರಿ ಕ್ಷೇತ್ರಡ್ ಉಲ್ಲೆರ್. ಕಣಿಯೂರು ಜಿಲ್ಲಾ ಪಂಚಾಯತ್ ಸದಸ್ಯೆರಾದ್, ಜಿಲ್ಲಾ ಪಂಚಾಯತ್ ಒತ್ತು ಗುರ್ಕಾರೆಯಾದ್ ಸೇವೆ ಸಂದಾದೆರ್. ಬೊಕ್ಕ ತಣ್ಣೀರುಪಂತ ಹಾಲು ಉತ್ಪಾದಕರ ಸಹಕಾರಿ ಸಂಘದ ಸ್ಥಾಪಕ ಗುರ್ಕಾರೆಯಾದ್ ಸುಮಾರ್ 38 ವರ್ಷೊದಿಂಚ ಸೇವೆ ಸಂದಾದೆರ್. ಡಿಸಿಸಿ ಬ್ಯಾಂಕ್ ದ ನಿರ್ದೇಶಕೆರಾದ್ಲ ಸೇವೆ ಸಂದಾದೆರ್.

ಮೆರೆಗ್ ಬೊಡೆದಿ ಅರುಣ, ಜೋಕುಲು ಪವಿತ್ರ, ಚೈತ್ರ ಬೊಕ್ಕ ಕುಟುಂಬ ವರ್ಗದಕುಲು ಉಲ್ಲೆರ್.

ಧರ್ಮಸ್ಥಳ ನನ ಪ್ಲಾಸ್ಟಿಕ್ ಇಜ್ಜಾಂದಿನ ಗ್ರಾಮ: ಸಚಿವೆರ್ ಈಶ್ವರ ಖಂಡ್ರೆ ಘೋಷಣೆ

ಉಜಿರೆ: ಸುಂದರ, ಪ್ರಶಾಂತ, ಪ್ರಾಕೃತಿಕ ಪರಿಸರಡ್ ಕಣ್ಮನ ಸೆಳೆಯೊಂದು ಇಪ್ಪುನ ನಾಡ್ ದ ಖ್ಯಾತ ಸರ್ವಧರ್ಮ ಸಮನ್ವಯ ಕೇಂದ್ರವಾಯಿನ ಧರ್ಮಸ್ಥಳಗ್ ದಿನಾಲ ಸಾರ ಸಾರ ಭಕ್ತಾದಿಲು ಶ್ರದ್ಧೆ, ಭಕ್ತಿದೊಟ್ಟಿಗೆ ಬತ್ತ್ ದ್ ಸೇವೆ ಮಲ್ಪುವೆರ್. ಪಶ್ಚಿಮ ಘಟ್ಟ ಪರ್ವತ ಶ್ರೇಣಿದ ಮಸ್ತ್ ಸುದೆತ ಉಗಮ ಸ್ಥಾನ ಆತ್ಂಡ್.

ಪರಿಸರ ನಾಶರ್ದ್ ಭೂಕಂಪ, ಬರ, ನೆರೆ, ಪ್ರಾಕೃತಿಕ ವಿಕೋಪ ಆವೊಂದು ಉಂಡು. ಪ್ಲಾಸ್ಟಿಕ್ ಬಳಕೆ ಬೊಕ್ಕ ಪ್ಲಾಸ್ಟಿಕ್ ತ್ಯಾಜ್ಯ ನಮ್ಮ ಆರೋಗ್ಯ ಬೊಕ್ಕ ಪರಿಸರಗ್ ಹಾನಿಕಾರ. ಇಂಚಿನ ಪವಿತ್ರ ಕ್ಷೇತ್ರಡ್ ಪ್ಲಾಸ್ಟಿಕ್ ಬಳಕೆ ಸಂಪೂರ್ಣ ನಿಷೇಧಿಸಾದ್ ಧರ್ಮಸ್ಥಳ ರಾಜ್ಯಡ್ ಸ್ವಚ್ಚ, ಸುಂದರ ಗ್ರಾಮವಾದ್ ಮಾದರಿಯಾದ್ ಬುಲೆವಡ್. ಇಡೀ ರಾಜ್ಯನೇ ಪ್ಲಾಸ್ಟಿಕ್ ಬಳಕೆ ಮುಕ್ತ ರಾಜ್ಯ ಆವೊಡು ಪಂದ್ ಅರಣ್ಯ ಬೊಕ್ಕ ಪರಿಸರ ಖಾತೆ ಸಚಿವೆರ್ ಈಶ್ವರ ಖಂಡ್ರೆ ಪಂಡೆರ್. ಆರ್ ಸೋಮವಾರ ಧರ್ಮಸ್ಥಳದ ಪ್ರವಚನ ಮಂಟಪಡ್ ನಡತ್ತಿನ ಸರಳ ಸಮಾರಂಭಡ್ ಧರ್ಮಸ್ಥಳ ಗ್ರಾಮನ್ ಪ್ಲಾಸ್ಟಿಕ್ ಬಳಕೆ ಮುಕ್ತ ಗ್ರಾಮವಾದ್ ಘೋಷಣೆ ಮಲ್ತ್ ಪಾತೆರಿಯೆರ್.

ಪ್ಲಾಸ್ಟಿಕ್ ಮಾರುನ ಬೊಕ್ಕ ದೆತೊನ್ನ ಬೊಕ್ಕ ಗಲಸುನ ನಿಷೇಧ ಮಲ್ಪೊಡು. ಯಾತ್ರಿಕೆರ್, ನೇತ್ರಾವತಿ ತುದೆಟ್ಟ್ ಪ್ಲಾಸ್ಟಿಕ್ ಬೊಕ್ಕ ಬೇತೆ ತ್ಯಾಜ್ಯಲೆನ್ ದಕ್ಕರೆ ಬಲ್ಲಿ ಪಂಡೆರ್. ಧರ್ಮಸ್ಥಳದ ವತಿರ್ದ್ ಬೀದರ್ ಜಿಲ್ಲೆಡ್ ಹೈನುಗಾರಿಕೆ, ಬೊಕ್ಕ ಮಹಿಳಾ ಸಬಲೀಕರಣಗ್ ಹೆಗ್ಗಡೆರ್ ಕೊರ್ನ ಸಹಕಾರನ್ ಕೃತಜ್ಞತೆದೊಟ್ಟಿಗೆ ಸ್ಮರಿಸಾಯೆರ್. ಗುರ್ಕಾಮೆನ್ ವಹಿಸಾಯಿನ ಧರ್ಮಾಧಿಕಾರಿ ಡಿ. ವೀರೆಂದ್ರ ಹೆಗ್ಗಡೆರ್ ಪಾತೆರ್ದ್ ಧರ್ಮಸ್ಥಳಡ್ ಪ್ಲಾಸ್ಟಿಕ್ ತ್ಯಾಜ್ಯ ನಿವಾರಣೆಗಾದ್ ಒಂಜಿ ವಾರದುಲಾಯಿ ರಡ್ಡ್ ಪೊಸ ಯಂತ್ರಲೆನ್ ದೆತೊಂದು ತ್ಯಾಜ್ಯ ಸಂಗ್ರಹ ಮಲ್ಪುವ. ಪ್ಲಾಸ್ಟಿಕ್ ತ್ಯಾಜ್ಯನ್ ರೋಡ್ ದುರಸ್ತಿಗ್ ಮರುಬಳಕೆ ಮಲ್ಪುವ ಪಂದ್ ಪಂಡೆರ್. ವಿದೇಶಡ್ ಮಾತೆರ್ಲ ಸ್ವಚ್ಚತೆಗ್ ಆಧ್ಯತೆ ಕೊರ್ಪುನಂಚ ನಮ್ಮಲ್ಪಲ ಸ್ವಚ್ಚತೆದ ಬಗ್ಗೆ ಅರಿವು, ಜಾಗೃತಿ, ಮೂಡಿಸಾವೊಡು. ಪ್ರತಿಯೊರಿಲ ವಾರಡ್ ರಡ್ಡ್ ದಿನ ಶನಿವಾರ ಬೊಕ್ಕ ಐತಾರ ಇಲ್ಲ್ ಬೊಕ್ಕ ಪರಿಸರ ಸ್ವಚ್ಚ ಮಲ್ಪೊಡು ಪಂದ್ ಪಂಡೆರ್.

ಕೆಪಿಸಿಸಿ ಪಧಾನ ಕಾರ್ಯದರ್ಶಿ ರಕ್ಷಿತ್ ಶಿವರಾಂ, ಕುಡ್ಲದ ಸಿ.ಎಫ್.ಸಿ.ವಿ ಕರಿಕಾಳನ್, ಕೆ.ಎಸ್.ಡಿ.ಸಿ ಕಮಲಾ ಕರಿಕಾಳನ್, ಡಿ.ಎಫ್,ಒ ಅಂಥೋನಿ, ಎಸ್ ಮರಿಯಪ್ಪ, ಎ.ಸಿ.ಎಫ್ ಶ್ರೀಧರ್ ಬೋಲ್ತೆರ್, ವಲಯ ಅರಣ್ಯಾಧಿಕಾರಿ ಮೋಹನ್ ಕುಮಾರ್, ಉಬಾರ್ ವಲಯ ಅರಣ್ಯಾಧಿಕಾರಿ ಮೋಹನ್ ಕುಮಾರ್, ಉಬಾರ್ ವಲಯ ಅರಣ್ಯಾಧಿಕಾರಿ ಜಯಪ್ರಕಾಶ್ ಕೆ.ಕೆ ಧರ್ಮಸ್ಥಳ ಗ್ರಾಮ ಪಂಚಾಯತಿ ಅಧ್ಯಕ್ಷೆ ವಿಮಲಾ, ಉಪಾಧ್ಯಕ್ಷೆರ್ ಶ್ರೀನಿವಾಸ ರಾವ್ ಇತ್ತೆರ್.

ಬೊಕ್ಕ ಮಾಧ್ಯಮದೊಟ್ಟಿಗೆ ಪಾತೆರ್ದ್ ಬೋಲ್ತೆರ್ ತಾಲೂಕುಡು ಡೀಮ್ಡ್ ಅರಣ್ಯ 1 ಡೀಮ್ಡ್ ಅರಣ್ಯ 2 ಪನ್ಪುನ ವಿಭಾಗಲು ಉಂಡು. ಡೀಮ್ಡ್ 1 ನ್ನ್ ಬುಡಿಯೆರೆ ಸಾಧ್ಯ ಇಜ್ಜಿ. ಡೀಮ್ಡ್ 2 ಅರಣ್ಯ ವಿಭಾಗಡ್ ಮೂಜಿ ಲಕ್ಷದ ಮುಪ್ಪ ಸಾವಿರ ಹೆಕ್ಟೇರ್ ಅರಣ್ಯ ಪ್ರದೇಶ ಇತ್ತ್ ದ್ ನೆಟ್ಟ್ ಜನವಸತಿ ಬೊಕ್ಮ ಶಾಲೆ ಇತ್ತ್ಂಡ ಅಕ್ಲೆಗ್ ಪರ್ಯಾಯ ವ್ಯವಸ್ಥೆ ಮಲ್ತ್ ದ್ ಕಂದಾಯ ಇಲಾಖೆ ಬೊಕ್ಕ ಅರಣ್ಯ ಇಲಾಖೆ ಜಂಟಿಸರ್ವೆ ಬೊಕ್ಕ ಗಡಿ ಗುರುತಿಸಾದ್ ಸೂಕ್ತ ಕ್ರಮ ದೆತೊನ್ವ ಪಂದ್ ಪಂಡೆರ್. ಕಳೆಂಜಡ್ ಅರಣ್ಯ ಪ್ರದೇಶಡ್ ಕಟ್ವಾನ, ಇಲ್ಲ್ ತೆರವು ಪ್ರಕರಣದ ಬಗ್ಗೆ ತನಿಖಾ ವರದಿ ಬತ್ತಿ ಬೊಕ್ಕ ಸೂಕ್ತ ಕ್ರಮ ದೆತೊನುವ ಪಂದ್ ಸಚಿವೆರ್ ಭರವಸೆ ಕೊರಿಯೆರ್. ಕೃಷಿಗ್ ಕಾಡಾನೆಲ್ನ ಕಾಟದ ಬಗ್ಗೆ ಸಚಿವೆರ್ ಕೃಷಿ ಹಾನಿಗ್ 35 ಕೋಟಿ ಪರಿಹಾರ ಕೊರ್ತ.‌ಕಾಡಾನೆ ಕಾಟ ತಪ್ಪಾಯೆರೆ ಆನೆಕಂದಕ, ಸೋಲಾರ್ ಬೇಲಿ, ರೇಡಿಯೋ ಕಾಲರ್ ಇಂಚಿನ ಕ್ರಮಲೆನ್ ದೆತೊಂದೆರ್. ಅಂಚನೆ ಅರಣ್ಯ ಇಲಾಖೆಡ್ ಸಿಬ್ಬಂದಿ ಕೊರತೆದ ಬಗ್ಗೆ ಸೂಕ್ತ ಕ್ರಮ ದೆತೊನುವ ಪಂದ್ ಪಂಡೆರ್. ಹೆಗ್ಗಡೆರೆನ ಭೇಟಿ: ಸಚಿವೆರ್ ಈಶ್ವರ ಖಂಡ್ರೆ ಬೊಕ್ಕ ಬುಡೆದಿ ಗೀತಾ ಖಂಡ್ರೆ ಬೊಕ್ಕ ಮಗನಕುಲು ಸಾಗರ್ ಖಂಡ್ರೆ ಬೊಕ್ಕ ಗುರು ಖಂಡ್ರೆ ದೇವೆರ್ನ ದರ್ಶನ ಮಲ್ತ್ ವಿಶೇಷ ಪೂಜೆ ಸಲ್ಲಿಸಾಯೆರ್. ಬೊಕ್ಕ ಧರ್ಮಾಧಿಕಾರಿ ಡಿ.ವೀರೇಂದ್ರ ಹೆಗ್ಗಡೆರೆನ್ ಭೇಟಿ ಆದ್ ಸೌಹಾರ್ದತೆಯುತ ಮಾತುಕತೆ ಮಲ್ತ್ ದ್ ಆಶೀರ್ವಾದ ಪಡೆಯೆರ್.

ಮ್ಯೂಚುವಲ್ ಫಂಡ್ ಡ್ ಬಂಡವಾಳ ಪಾಡುನವು ಎಚ್ಚ ಸುರಕ್ಷಿತ ಬೊಕ್ಕ ಲಾಭದಾಯಕ

ಧರ್ಮಸ್ಥಳ: ಮ್ಯೂಚುವಲ್ ಫಂಡ್ ಡ್ ಬಂಡವಾಳ ಪಾಡುನೆರ್ದ್ ಬ್ಯಾಂಕ್ ರ್ದ್ ಎಚ್ಚ ಲಾಭ ತಿಕ್ಕುಂಡು. ಬೊಕ್ಕ ಅವು ಎಚ್ಚ ಸುರಕ್ಷಿತ ಆದ್ ಇಪ್ಪುಂಡು ಪಂದ್ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ| ಡಿ. ವೀರೇಂದ್ರ ಹೆಗ್ಗಡೆರ್ ಪಂಡೆರ್. ಆರ್ ಐತಾರ ಧರ್ಮಸ್ಥಳಡ್ ಬೆಂಗಳೂರುದ ಆರಾ ಆರ್ಥಿಕ ಸೇವಾ ಸಂಸ್ಥೆದ ವಿಡಿಯೋ ಬೊಕ್ಕ ಮಾಹಿತಿ ಪತ್ರ ಅನಾವರಣ ಮಲ್ತ್ ಪಾತೆರಿಯೆರ್.

ಆರಾ ಸೇವಾ ಸಂಸ್ಥೆ ಕರಿನ ರಡ್ಡ್ ವರ್ಷರ್ದ್ ಧರ್ಮಸ್ಥಳ ಗ್ರಾಮಾಭಿವೃದ್ದಿ ಯೋಜನೆದ ಕಾರ್ಯಕರ್ತೆರೆಗ್ ಬಂಡವಾಳ ಹೂಡಿಕೆ ಮಲ್ಪುನ ಬಗೆಟ್ ಮಾಹಿತಿ, ಮಾರ್ಗದರ್ಶನ ಕೊರೊಂದು ಸಹಕಾರ ಕೊರೊಂದು ಉಲ್ಲೆರ್. ದೀರ್ಘಾವಧಿ ಹೂಡಿಕೆರ್ದ್ ಎಚ್ಚ ಲಾಭ ಪಡೆಯೊನೊಲಿ ಪಂದ್ ಪಂಡೆರ್. ಸಾರ್ವಜನಿಕರೆಗ್ ಬೋಡಾಯಿನ ಉಪಯುಕ್ತ ಮಾಹಿತಿ ಬೊಕ್ಕ ಸಲಹೆ, ವಿಡಿಯೋ ಬೊಕ್ಕ ಮಾಹಿತಿ ಪತ್ರಡ್ ಉಂಡು. ಧರ್ಮಸ್ಥಳ ಗ್ರಾ.ಯೋ. ಕಾರ್ಯನಿರ್ವಾಹಕ ನಿರ್ದೇಶಕೆರ್ ಡಾ.ಎಲ್.ಎಚ್ ಮಂಜುನಾಥ್, ಆರಾ ಸಂಸ್ಥೆದ ನಿರ್ದೇಶಕೆರ್ ಶ್ರೀಧರ ಭಟ್, ಹಿರಿಯ ಅಧಿಕಾರಿ ಪ್ರತೀಕ್ ಓರಾ ಬೊಕ್ಕ ಉಜಿರೆ ಶಾಖೆದ ಪ್ರಬಂಧಕೆರ್ ಜನಾರ್ದನ ಪಡ್ಡಿಲ್ಲಾಯ ಈ ಪೊರ್ತುಡು ಇತ್ತೆರ್.

ಸೌತಡ್ಕ ಶ್ರೀ ಮಹಾಗಣಪತಿ ದೇವಸ್ಥಾನದ ಆಡಳಿತಾಧಿಕಾರಿಯಾದ್ ಬೋಲ್ತೆರ್ ತಹಶೀಲ್ದಾರ್ ಪೃಥ್ವಿ ಸಾನಿಕಂ ನೇಮಕ‌

ಬೋಲ್ತೆರ್ : ರಾಜ್ಯದ ಧಾರ್ಮಿಕ ದತ್ತಿ ಇಲಾಖಾ ವ್ಯಾಪ್ತಿಗ್‌ ಸಂಬಂಧಪಟ್ಟಿನ ಪ್ರವರ್ಗ ‘ಎ’ ಗ್ ಸೇರಿನ ಸೌತಡ್ಕ ಶ್ರೀ ಮಹಾಗಣಪತಿ ದೇವಸ್ಥಾನದ ರಾಜ್ಯ ಧಾರ್ಮಿಕ ಪರಿಷತ್ ನಿರ್ಣಯದ ಅನುಸಾರ ದೇವಸ್ಥಾನದ ಆಡಳಿತಾಧಿಕಾರಿಯಾದ್ ಬೋಲ್ತೆರ್ ತಹಶೀಲ್ದಾರ್ ಪೃಥ್ವಿ ಸಾನಿಕಂ‌ ಮೇರೆನ್ ಧಾರ್ಮಿಕ ದತ್ತಿ ಇಲಾಖೆಯ ಆಯುಕ್ತೆರ್ ಯತಿರಾಜ ನೇಮಿಸಾದೆರ್‌.

ಧರ್ಮಸ್ಥಳಡ್ ಭಗವಾನ್ ಬಾಹುಬಲಿ ಸ್ವಾಮಿಗ್ ಪಾದಾಭಿಷೇಕ

ಧರ್ಮಸ್ಥಳ: ದೇವೆರ್ನ ಪೂಜೆ, ಆರಾಧನೆ, ಅಭಿಷೇಕರ್ದ್ ಪಾಪದ ಕ್ಷಯವಾದ್ ಪುಣ್ಯ ಸಂಚಯ ಆಪುಂಡು ಪಂದ್ ಪೂಜ್ಯ ದಿವ್ಯಸಾಗರ ಮುನಿಮಹಾರಾಜೆರ್ ಪಂಡೆರ್.

ಆರ್ ಶುಕ್ರವಾರ ಧರ್ಮಸ್ಥಳದ ರತ್ನಗಿರಿಟ್ಟ್ ಭಗವಾನ್ ಬಾಹುಬಲಿ ಸ್ವಾಮಿ ಮೂರ್ತಿಗ್ ಪಾದಾಭಿಷೇಕದ ಪೊರ್ತುಡು ಮಂಗಲ ಪ್ರವಚನ ಕೊರಿಯೆರ್.

ಶ್ರದ್ಧಾ-ಭಕ್ತಿರ್ದ್ ದೇವೆರ್ನ ಪೂಜೆ,ಅಭಿಷೇಕ ಮಲ್ಪುನೆರ್ದ್ ಮಾತ ಸಂಕಟ ನಿವಾರಣೆಯಾದ್ ಜೀವನ ಪಾವನ ಆಪುಂಡು. ಆತ್ಮಕಲ್ಯಾಣ ಆಪುಂಡು ಸುಖ-ಶಾಂತಿ ತಿಕ್ಕುಂಡು ಪಂದ್ ಪಂಡೆರ್.

ದಿನಾಲ ವೃತ-ನಿಯಮದ ಪಾಲನೆದೊಟ್ಟಿಗೆ ದೇವೆರ್ನ ಪೂಜೆ, ಜೈನ ಮುನಿಕ್ಲೆಗ್ ಆಹಾರದಾನ ಮಲ್ತ್ಂಡ ಆತ್ಮಕಲ್ಯಾಣ ಆಪುಂಡು ಪಂದ್ ಪೂಜ್ಯ ಆದಿಸಾಗರ ಮುನಿಮಹಾರಾಜೆರ್ ಪಂಡೆರ್.

ಕಾರ್ಲದ ಜೈನಮಠದ ಪೂಜ್ಯ ಲಲಿತಕೀರ್ತಿ ಭಟ್ಟಾರಕ ಸ್ವಾಮೀಜಿ ಆಶೀರ್ವಚನ ಕೊರಿಯೆರ್.
ಪೂಜ್ಯ ನಿರ್ದೋಷ ಸಾಗರ ಮುನಿಮಹಾರಾಜೆರ್ ಮತ್ತುಕ್ಷುಲ್ಲಕ ನಿರ್ವಾಣಸಾಗರ ಮಹಾರಾಜೆರ್ ಈ ಪೊರ್ತುಡು ಇತ್ತೆರ್.

ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆ, ಹೇಮಾವತಿ ವೀ. ಹೆಗ್ಗಡೆ, ಡಿ. ಸುರೇಂದ್ರಕುಮಾರ್, ಡಿ. ಹರ್ಷೇಂದ್ರಕುಮಾರ್ ಬೊಕ್ಕ ಸುಪ್ರಿಯಾ ಹರ್ಷೇಂದ್ರಕುಮಾರ್ ಪಾದಾಭಿಷೇಕಡ್ ಪಾಲ್ ಪಡೆದಿತ್ತೆರ್.

ಭವ್ಯಅಗ್ರೋದಕ ಮೆರವಣಿಗೆದ ಬೊಕ್ಕ ರತ್ನಗಿರಿಟ್ಟ್ 216 ಕಲಶರ್ದ್ ಜಲಾಭಿಷೇಕ ಬೊಕ್ಕ ಬೊಂಡದ ನೀರ್, ಗಂಧ, ಚಂದನ, ಅಷ್ಟಗಂಧ ಮಂಗಳದ್ರವ್ಯರ್ದ್ ಪಾದಾಭಿಷೇಕ ನಡತ್ಂಡ್.