ಕುಡ್ಲದ ಸುದ್ದಿ | Mangalore News

ಇಂಟರ್‌ನೆಟ್ ಇಜ್ಜಿ ಪಂದ್ ಆತ್ಮಹತ್ಯೆ ಮಲ್ತೊನಿನ 13 ವರ್ಷದ ಆಣ್

ಆನ್‌ಲೈನ್ ಗೇಮ್ ಗೊಬ್ಬರೆ ಇಂಟರ್‌ನೆಟ್ ಇಜ್ಜಿ ಪನ್ಪಿನ ಕಾರಣಗ್ 8 ನೇ ಕ್ಲಾಸ್‌ದ ಕಲ್ಪಾರ್ಥಿ ಆತ್ಮಹತ್ಯೆ ಮಲ್ತೊನಿನ ಘಟನೆ ತಮಿಳ್‌ನಾಡ್‌ಡ್ ನಡತ್ಂಡ್.

ಆಣ್ ತನ್ನ ಪೋಷಕೆರ್‍ನ ಮೊಬೈಲ್‌ನ್ ಗಲಸ್‌ದ್ ಆನ್‌ಲೈನ್ ಗೇಮ್‌ಡ್ ಮಸ್ತ್ ಪೊರ್ತು ಕಲೆವೊಂದಿತ್ತೆ. ಮಸ್ತ್ ಪೊರ್ತು ಗೇಮ್ ಗೊಬ್ಬುವೆ ಪಂದ್ ಇಲ್ಲದಕುಲು ಮೊಬೈಲ್‌ಗ್ ಇಂಟರ್‌ನೆಟ್ ಪಾಡ್ದಿಜ್ಜಾಂಡ್‌. ಈ ಕಾರಣಗ್ ಆಣ್ ಆತ್ಮಹತ್ಯೆ ಮಲ್ತ್‌ದೆ ಪಂದ್ ತೆರಿದ್ ಬೈದ್ಂಡ್.

ತುಳು ಭಾಷೆನ್ ಬಿಜೆಪಿದ ಪ್ರಣಾಳಿಕೆಡ್ ಸೇರಾವರೆ ಪ್ರಯತ್ನ ಬರ್ಪೆ: ಡಾ.ಬಿ.ಆರ್.ಶೆಟ್ಟಿ

ಧರ್ಮಸ್ಥಳದ ಡಾ.ಡಿ ವೀರೇಂದ್ರ ಹೆಗ್ಗಡೆರ್‍ನ ಆಶೀರ್ವಾದ ಇತ್ತ್ಂಡ ಮೋಹನ್ ಆಳ್ವೆರ್‍ನ ಪರಿಶ್ರಮ ಇತ್ತ್ಂಡ ತುಳುನಾಡ್‌ದ ಶಾಸಕೆರ್‍ನ ಬೆರಿಬಲ ಇತ್ತ್ಂಡ ತುಳು ಭಾಷೆ ರಾಜ್ಯದ ಅಧಿಕೃತ ಭಾಷೆ ಆಪುಂಡು ಪಂದ್ ಡಾ. ಬಿ.ಆರ್.ಶೆಟ್ಟಿ ಪಂಡೆರ್.

ತುಳು ಭಾಷೆನ್ ಬಿಜೆಪಿದ ಪ್ರಣಾಳಿಕೆಡ್ ಸೇರ್ಸಾವೋಡು ಪನ್ಪಿನ ನಿಲೆಟ್ ಪಾತೆರಿನ ಆರ್, ಎಂಕುಲು ಕಿನ್ಯರ್ದಿಂಚಿಲ ತುಳುವೆರ್ ಪನ್ಪಿನ ಪೆರ್ಮೆ. ತುಳುವೆರೆನ ಒಂಜಿ ಸ್ವಭಾವ ಎಡ್ಡೆ ಪನ್ನಗ ನಮಕ್ಕ್ ಅಗ್ಗಡ್ ತಿಕ್ಕ್ಂಡ ಒವ್‌ಲ ಬೊಡ್ಚಿ. ಕಡಲ್‌ಗ್ ಲಾಗಿದ್ ಅಯಿಟ್ಟ್ ಮುತ್ತು ಕನವೊಡು. ಅವೆನ್ ಮಾರೋಡು. ಅಂಚಿತ್ತಿನಕುಲು ನಮ್ಮ ತುಳುವೆರ್. ಅಂಚಾದ್ ತುಳುವೆರ್ ಯೋಗ್ಯೆರ್. ಒಲು ಪೋಂಡಾಲ ತುಳುವೆರ್ ಸಾಧನೆ ಮಲ್ತೊಂದು ಬರ್ಪಿನಕುಲು. ಯಾನೇ ಅಯಿಕ್ ಉದಾಹರಣೆ ಪಂದ್ ಪನ್ಪೆ. ಅಬುದಾಬಿಗ್ ದಾಲ ಇಜ್ಜಂದೆ ಪೋದು ಅಲ್ಪ ಆಸ್ಪತ್ರೆ ಮಲ್ತ್‌ದ್ ಸಾರರ್ದ್‌ಲ ಎಚ್ಚದ ಜನಕ್ಲೆಗ್ ಬೇಲೆ ಕೊರ್ತೆ. ಯಾನ್ ತುಳುವೆ ಪಂದ್ ಪನಿಯರೆ ಪೆರ್ಮೆ ಆಪುಂಡು ಪಂದ್ ಪಂಡೆರ್.

ಕರ್ನಾಟಕ ಸರ್ಕಾರಲು ಅಂಚನೆ ತುಳುನಾಡ್‌ದ ಮಾತ ಶಾಸಕೆರ್‌ನಕುಲು ತುಳು ಭಾಷೆನ್ ರಾಜ್ಯದ ಅಧಿಕೃತ ಭಾಷೆ ಮಲ್ಪೊಡು. ತುಳು ಭಾಷೆ ತುಳುನಾಡ್‌ದ ಸಿರಿಯಾದ್ ಬುಳೆಯೊಡು. ಮಾತ ಶಾಸಕೆರ್‌ನಕುಲು ನೆಕ್ಕ್ ಸಾಕಾರ ಮಲ್ಪೊಡು.

ಕನ್ನಡ ಬೊಕ್ಕ ಸಂಸ್ಕೃತಿ ಸಚಿವೆರ್ ಸುನೀಲ್ ಕುಮಾರ್ ತುಳು ಭಾಷೆನ್ ಒರಿಪಾವುಲೆಕ್ಕ ಮಲ್ಪೊಡು. ತುಳು ಭಾಷೆಗ್ ಪ್ರಾಮುಖ್ಯತೆ ಕೊರೋಡು. ಎಂಪಿ ಆಯಿನ ನಳಿನ್ ಕುಮಾರ್ ಕಟೀಲ್ ತುಳುತ್ತಾರ್ ಆಯಿನೆಡ್ದಾವರ ಆರ್ ಉಂದೆಕ್ಕ್ ಮಸ್ತ್ ಪ್ರೋತ್ಸಾಹ ಕೊರ್ಪೆರ್ ಎನ್ನುವೆ ಪಂದ್ ಪಂಡೆರ್.

ಕಿನ್ನಿಗೋಳಿ: ಜ್ವರ ಬತ್ತ್‌ದ್ ತೀರ್ ಪೋಯಿನ 10ನೇ ಕ್ಲಾಸ್‌ದ ಕಲ್ಪಾರ್ಥಿ

ಕಿನ್ನಿಗೋಳಿ: ಕಿನ್ನಿಗೋಳಿದ ಪಕ್ಷಿಕೆರೆ ಕೈತಲ್ ಆಣ್ ಒರಿ ಜ್ವರ ಬತ್ತ್‌ದ್ ತೀರ್ ಪೋಯಿನ ಘಟನೆ ನಡತ್ಂಡ್.

ಪಕ್ಷಿಕೆರೆ ಜುಮಾ ಪಲ್ಲಿದ ಕೈತಲ್ ಇಸ್ಮಾಯಿಲ್ ಪನ್ಪಿನರೆನ ಮಗೆ 10 ನೇ ಕ್ಲಾಸ್‌ದ ಕಲ್ಪಾರ್ಥಿ(ಹಿಲಾಲ್ (16) ತೀರ್ ಪೋಯಿನ ಆಣ್. ಮೆರೆಗ್ ಕೆಲ ದಿನದ ಪಿರ ಜ್ವರ ಬತ್ತ್‌ದಿತ್ತ್‌ದ್ ಕಿನ್ನಿಗೋಳಿದ ಖಾಸಗಿ ಆಸ್ಪತ್ರೆಗ್ ದಾಖಲ್ ಮಲ್ತ್‌ದಿತ್ತೆರ್. ಆಂಡ ಎಚ್ಚದ ಚಿಕಿತ್ಸೆಗಾದ್ ಕುಡ್ಲದ ಖಾಸಗಿ ಆಸ್ಪತ್ರೆಗ್ ದಾಖಲ್ ಮಲ್ತ್‌ದ್ ಅಲ್ಪ ಐಸಿಯುಡ್ ಚಿಕಿತ್ಸೆ ಪಡೆಯೊಂದು ಇತ್ತೆರ್ ಪಂದ್ ತೆರಿದ್ ಬೈದ್ಂಡ್.

ಕುಡ್ಲ: ಲಾಡ್ಚ್‌ವೊಂಜೆಟ್ ಒಂಜೇ ಕುಟುಮದ ನಾಲ್ ಜನ ಆತ್ಮಹತ್ಯೆ

ಕುಡ್ಲ: ಪೇಂಟೆದ ಕೆ ಎಸ್ ರಾವ್ ಮಾರ್ಗದ ಲಾಡ್ಚ್‌ವೊಂಜೆಟ್ ಒಂಜೇ ಕುಟುಮದ ನಾಲ್ ಜನ ಆತ್ಮಹತ್ಯೆ ಮಲ್ತಿನ ಘಟನೆ ನಡತ್ಂಡ್.

ದೇವೇಂದ್ರ (46) ಅರೆನ ಬೊಡೆದಿ ಬೊಕ್ಕ 2 ಜೋಕುಲು ತೀರ್ ಪೋಯಿನಾರ್ ಪಂದ್ ಗುರ್ತಿಸಾದೆರ್. ಆತ್ಮಹತ್ಯೆ ಮಲ್ತಿನಕುಲು ಮೈಸೂರ್‌ದ ವಾಣಿ ವಿಲಾಸದಕುಲು ಪಂದ್ ತೆರಿದ್ ಬೈದ್ಂಡ್. ಕಾಕಜಿ ಬರೆದೀದ್ ತೀರ್ ಪೋತೆರ್. ನಾಲ್ ಜನಟ್ ಒರಿ ಬಲ್ಲ್ ಪಾಡ್ದಿನ ಸ್ಥಿತಿಟ್ ಪತ್ತೆ ಆದಿತ್ತ್‌ದ್, ಒರಿನ 3 ಜನ ಜೆತ್ತಿನ ಸ್ಥಿತಿಟ್ ಪತ್ತೆಯಾತೆರ್. ಘಟನೆ ಆಯಿನ ಜಾಗೆಗ್ ಹಿರಿಯ ಪೊಲೀಸ್ ಅಧಿಕಾರಿಲು, ಬಂದರು ಪೊಲೀಸೆರ್ ಬತ್ತ್‌ದಿತ್ತ್‌ದ್ ಪರಿಶೀಲನೆ ಮಲ್ತ್‌ದ್ ತನಿಖೆ ಸುರು ಮಲ್ತ್‌ದೆರ್.