Mon. Nov 23rd, 2026

ಕುಡ್ಲದ ಸುದ್ದಿ | Mangalore News

ಮಂಗಳೂರು ದಸರಾ ಇತಿಹಾಸಡ್ ಪೊಸ ಮೈಲ್‌ಕಲ್ಲ್

₹67 ಕೋಟಿ ವೆಚ್ಚದ ಭೂಗತ ಕೇಬಲ್ ಯೋಜನೆಗೆ ಮಂಜೂರಾತಿ

ಕುಡ್ಲ : ವಿಶ್ವವಿಖ್ಯಾತ ಮಂಗಳೂರು ದಸರಾ ಮಹೋತ್ಸವದ ಮೆರವಣಿಗೆಗ್ ಕೆಲವು ವರ್ಷರ್ದಿಂಚಿ ಅಡ್ಡ ಆವೊಂದಿತ್ತಿನ ತಾಂತ್ರಿಕ ಸವಾಲ್‌ಗ್ ಇತ್ತೆ ಶಾಶ್ವತ ಪರಿಹಾರ ತಿಕ್ಕೊಂದುಂಡು.
ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಆಡಳಿತ ಮಂಡಳಿದ ಮಸ್ತ್ ವರ್ಷರ್ದಿಂಚಿದ ಪ್ರಯತ್ನದ ಫಲವಾದ್, ದಸರಾ ಮೆರವಣಿಗೆ ಮಾರ್ಗಡ್ ಅಡ್ಡ ಆವೊಂದಿತ್ತಿನ ಕರೆಂಟ್ ವೈರ್‌ಲೆನ್ ದೆತ್ತ್ ‌ದ ನೆಲತ್ತಡಿಟ್(ಭೂಗತ) ಕೇಬಲ್ ಪಾಡುನ 67 ಕೋಟಿ ರೂಪಾಯಿ ವೆಚ್ಚದ ಬೃಹತ್ ಯೋಜನೆಗ್ ರಾಜ್ಯ ಸರ್ಕಾರ ಮಂಜೂರಾತಿ ಕೊರ್ತುಂಡು.
​ಪ್ರತಿ ವರ್ಷ ಮಂಗಳೂರು ದಸರಾ ಮೆರವಣಿಗೆದ ಸಂದರ್ಭಡ್ ಸಾಲ್ ಸಾಲಾದ್ ಪೋಪಿನ ಎತ್ತರದ ಸ್ತಬ್ಧಚಿತ್ರ ಬೊಕ್ಕ ತೇರ್ ಗ್ ಮಾರ್ಗದ ಮಿತ್ತ್‌ಡ್ ಇತ್ತಿನ ವಿದ್ಯುತ್ ತಂತಿಲು ಮಲ್ಲ ಸಮಸ್ಯೆ ಆದಿತ್ತ್ಂಡ್. ಸುರಕ್ಷತೆದ ದೃಷ್ಟಿಡ್ ಮೆರವಣಿಗೆದ ಪೊರ್ತುಡು ಕೆಲವು ಕಡೆಟ್ ಕರೆಂಟ್ ಸಂಪರ್ಕ ದೆಪ್ಪೊಡಿತ್ತ್ಂಡ್‌.ಉಂದೆರ್ದ್ ಜನಕ್ಲೆಗ್ ಬೊಕ್ಕ ಬೇರದಕ್ಲೆಗ್ ಬಾರಿ ತೊಂದರೆ ಆದಿತ್ತ್ಂಡ್. ಈ ಗಂಭೀರ ಸಮಸ್ಯೆನ್ ತೂಯಿನ ಕುದ್ರೋಳಿ ಕ್ಷೇತ್ರದ ಆಡಳಿತ ಮಂಡಳಿ, ವಿಧಾನಸಭೆ ಸ್ಪೀಕರ್ ಯು.ಟಿ.ಖಾದರ್ ಮೂಲಕ ಸರ್ಕಾರಗ್ ವಿಶೇಷ ಮನವಿ ಕೊರ್ದಿತ್ತ್ಂಡ್.
ಈ ಸಮಸ್ಯೆದ ಗಂಭೀರತೆನ್ ಅರ್ತ ಮಲ್ತೊಂಡಿನ ಯು.ಟಿ. ಖಾದರ್, ಉಂದೆನ್ ಕೇವಲ ಒಂಜಿ ಧಾರ್ಮಿಕ ಕಾರ್ಯಕ್ರಮಂದ್ ತೂವಂದೆ ಕುಡ್ಲದ ಘನತೆದ ಪ್ರಶ್ನೆ ಪಂದ್ ಸ್ವೀಕಾರ ಮಲ್ತ್‌ದ್, ಇಂಧನ ಸಚಿವೆರ್‌ನ ಒಟ್ಟುಗು ಸತತ ಸಂಪರ್ಕ ಮಲ್ತ್‌ದ್, ಬೃಹತ್ ಯೋಜನೆಗೆ ಅನುಮೋದನೆ ಕೊರ್ಪಾವುನೆಟ್ ಆರ್ ಮಲ್ಲ ಬೇಲೆ ಮಲ್ದೆರ್. ಟೆಂಡರ್ ಪ್ರಕ್ರಿಯೆನ್ ತಡ ಮಲ್ಪಂದೆ ಪೂರ್ಣ ಮಲ್ತ್‌ದ್ ಬೇಲೆ ಸುರು ಮಲ್ಪರೆ ಹಸಿರು ನಿಶಾನೆ ತೊಜಪಾವುನ ಮುಕೇನ ಅರೆನ ‘ಕಾರ್ಯದಕ್ಷತೆ’ನ್ ಕುಡೊರ ಸಾಬೀತು ಮಲ್ದೆರ್” ಪಂದ್ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್ ಆರ್. ಪೂಜಾರಿ ತೆರಿಪಾದೆರ್.
ಈ ಐತಿಹಾಸಿಕ ಯೋಜನೆದ ಜಾರಿಗ್ ಸಹಕಾರ ಮಲ್ದಿನ ಮುಖ್ಯಮಂತ್ರಿ ಸಿದ್ದರಾಮಯ್ಯೆರ್, ಉಪಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್, ವಿಧಾನಸಭೆ ಸ್ಪೀಕರ್ ಯು.ಟಿ. ಖಾದರ್, ಇಂಧನ ಸಚಿವೆರ್ ಕೆ.ಜೆ. ಜಾರ್ಜ್, ಜಿಲ್ಲಾ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್, ಎಂಎಲ್‌ಸಿ ಮಂಜುನಾಥ ಭಂಡಾರಿ, ಮೆಸ್ಕಾಂ ಅಧ್ಯಕ್ಷೆರ್ ಹರೀಶ್ ಕುಮಾರ್ ಮೊಕ್ಲೆಗ್ ಮಾತ ಕೃತಜ್ಞತೆ ಸಂದಾದೆರ್.


“” ಭೂಗತ ಕೇಬಲ್ ಯೋಜನೆರ್ದಾದ್ ನನ ದುಂಬುದ ದಿನೊಟ್ಟು ವಿದ್ಯುತ್ ಆಘಾತದ ಪೋಡಿಗೆ ದಾಂತೆ ದಸರಾ ಮೆರವಣಿಗೆ ಸುಗಮವಾದ್ ಪೋವರೆ ಉಂಡು. ಮರಿಯಲೊಡು ಮರ ಬೂರ್ದು ವಿದ್ಯುತ್ ವ್ಯತ್ಯಯ ಆಪಿನ ಸಮಸ್ಯೆಗ್‌ಲ ಪರಿಹಾರ ಆಪುಂಡು. ಈ ಮಹತ್ವದ ಕಾಮಗಾರಿ ಬೇಗೊಡೇ ಸುರು ಆವರೆ ಉಂಡು””

ಆರ್‌ ಪದ್ಮರಾಜ್,
ಕೋಶಾಧಿಕಾರಿಲು
ಶ್ರೀ ಗೋಕರ್ಣನಾಥ ಕ್ಷೇತ್ರ, ಕುಡ್ಲ

ಮೇ 30 : 11 ನೇ ವರ್ಷದ ಪಟ್ಲ ಸಂಭ್ರಮ 2026

ಡಾ| ಆಳ್ವೆರೆಗ್ ಯಕ್ಷಧ್ರುವ ಮಹಾ ಪೋಷಕ ಪ್ರಶಸ್ತಿ, ಪೊಲ್ಯ ಮೆರೆಗ್ ಯಕ್ಷಧ್ರುವ ಪಟ್ಲ ಪ್ರಶಸ್ತಿ

ಕುಡ್ಲ : ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ (ರಿ) ಮಂಗಳೂರು ನೆತ್ತ 11 ನೇ ವರ್ಷದ ಪಟ್ಲ ಸಂಭ್ರಮ 2026 ಕಾರ್ಯಕ್ರಮ ಮೇ 30 ಶನಿವಾರ ಅಡ್ಯಾರ್ ಕೈತಲ್‌ದ ಅಡ್ಯಾರ್ ಗಾರ್ಡನ್‌ಡ್ ನಡಪರೆ ಉಂಡು. ಯಕ್ಷಧ್ರುವ ಪಟ್ಲ ಸಂಭ್ರಮ 2026 ಕಾರ್ಯಕ್ರಮನ್ ಪಾವಂಜೆ ನಾಗವೃಜ ಕ್ಷೇತ್ರದ ಧರ್ಮದರ್ಶಿ ಡಾ. ಯಾಜಿ ನಿರಂಜನ ಭಟ್ ಉದುಪನ ಮಲ್ಪುವೆರ್ ಪಂದ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ‌ದ ಪಟ್ಲ ಸತೀಶ್ ಶೆಟ್ಟಿ ತೆರಿಪಾಯೆರ್.
ಆರ್ ಕುಡ್ಲದ ಪತ್ತ್‌ಮುಡಿ ಹೋಟೆಲ್‌ದ ಚಾವಡಿಡ್ ಶುಕ್ರವಾರ ನಡತಿನ ಪತ್ರಿಕಾಗೋಷ್ಠಿಡ್ ಈ ಮಾಹಿತಿ ಕೊರಿಯೆರ್.
ಆನಿ ಕಾಂಡೆ 8.30ಕ್ಕ್ ಚೌಕಿ ಪೂಜೆ ಆದ್ ಅಬ್ಬರ ತಾಳ,ಭರತ ನಾಟ್ಯ ಪ್ರದರ್ಶನ, 11 ಗಂಟೆರ್ದ್ ಸಭಾ ಕಾರ್ಯಕ್ರಮ, ಮಧ್ಯಾಹ್ನ 1.30 ಗಂಟೆರ್ದ್ ನಾಗವೃಜ ಕ್ಷೇತ್ರ ಪಾವಂಜೆದ ಶ್ರೀ ವಾಣಿ ಶಾಲಾ ವಿದ್ಯಾರ್ಥಿಲೆರ್ದ್ ಯೋಗ ಪ್ರದರ್ಶನ, ಮಧ್ಯಾಹ್ನ 2 ಗಂಟೆರ್ದ್ ಮಹಿಳಾ ಯಕ್ಷಗಾನ, ಬಯ್ಯಡ್ ಯಕ್ಷಗಾನ ಹಾಸ್ಯ ವೈಭವ ನಡಪರೆ ಉಂಡು ಪಂದ್ ತೆರಿಪಾಯೆರ್.
ಸಭಾ ಕಾರ್ಯಕ್ರಮ
ಕಾಂಡೆ 11 ಗಂಟೆಗ್ ಸಭಾ ಕಾರ್ಯಕ್ರಮಟ್ ಎಡನೀರು ಮಠದ ಶ್ರೀ ಸಚ್ಚಿದಾನಂದ ಭಾರತೀ ಸ್ವಾಮೀಲು, ಒಡಿಯೂರು ಕ್ಷೇತ್ರದ ಶ್ರೀ ಗುರುದೇವಾನಂದ ಸ್ವಾಮಿಲು ಆಶೀರ್ವಚನ ಮಲ್ಪುವೆರ್. ಡಾ. ಸದಾಶಿವ ಶೆಟ್ಟಿ ಕನ್ಯಾನ ಗುರ್ಕಾರ್ಮೆ ವಹಿಸೊನ್ವೆರ್. ಎಂಆರ್ ಜಿ ಗ್ರೂಪ್ ಕಂಪನೀಸ್‌ದ ಚೇರ್ಮನ್ ಡಾ ಕೆ ಪ್ರಕಾಶ್ ಶೆಟ್ಟಿ ಲೇಸ್ ಉದಿಪನ ಮಲ್ಪುವೆರ್.
ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ 11 ವರ್ಷಡ್ 16 ಕೋಟಿ ಮೌಲ್ಯದ ಸೇವಾ ಕಾರ್ಯನ್ ಮಲ್ದ್ಂಡ್ ಪಂದ್ ತೆರಿಪಾಯೆರ್.
ಪಟ್ಲ ಪ್ರಶಸ್ತಿ: ಪ್ರತಿವರ್ಷಲ ಖ್ಯಾತ 8 ಕಲಾವಿದೆರೆಗ್ ತಲಾ 1 ಲಕ್ಷ ರೂ. ನಗದು, ಬೊಳ್ಳಿ ಪದಕ ಬೊಕ್ಕ ಸನ್ಮಾನ ಫಲಕ ಕೊರ್ದು ಗೌರವ ಮಲ್ದ್ಂಡ್.
ಪಟ್ಲ ಯಕ್ಷಾಶ್ರಯ : 56 ಇಲ್ಲ್ ಕಟ್‌ದ್ ಫಲಾನುಭವಿಲೆಗ್ ಕೊರ್ತುಂಡು. ನನ 60 ಇಲ್ಲ್ ರೆಡಿ ಆವೊಂದುಂಡು ಪಂಡೆರ್.
ಇಲ್ಲ್ ರಿಪೇರಿಗ್ ಸಕಾಯ : 210 ಕಲಾವಿದೆರೆಗ್ ಇಲ್ಲ್ ರಿಪೇರಿಗ್ ತಲಾ 25,000 ರೂ. ಪಟ್‌ದ್ಂಡ್.
ಗೌರವಧನ ಸಕಾಯ : ಅಶಕ್ತ 175 ಕಲಾವಿದೆರೆಗ್ ತಲಾ 50,000 ಸಾವಿರ ರೂ. ಪಟ್‌ದ್ಂಡ್.
ಅಪಘಾತ ವಿಮೆ ಯೋಜನೆ : ಪ್ರತಿವರ್ಷ ಸುಮಾರ್ 2,450 ಕಲಾವಿದೆರೆಗ್ ಗೆ 60,000 ರೂ. ಮುಟ್ಟ ಚಿಕಿತ್ಸಾ ವೆಚ್ಚ ಬೊಕ್ಕ ಆಕಸ್ಮಿಕ ಮರಣದ ಸಂದರ್ಭಡ್ ಕುಟುಂಬಗ್ 10 ಲಕ್ಷ ರೂ. ಪರಿಹಾರ ಕೊರೊಂದುಂಡು.
ಯಕ್ಷಧ್ರುವ ಪಟ್ಲ ಫೌಂಡೇಶನ್ ಡೇ
ಯಕ್ಷಧ್ರುವ ಪಟ್ಲ ಫೌಂಡೇಶನ್ ಭಾರತೀಯ ಯಕ್ಷಗಾನ ಕಲೆನ್ ಜಾಗತಿಕ ಮಟ್ಟಡ್ ಪ್ರಸಾರ ಮಲ್ಪುನ ನಿಲೆಟ್ಟ್ ಅಮೇರಿಕಾಡ್ ಐತಿಹಾಸಿಕ ಮೈಲಿಗಲ್ಲು ಸ್ಥಾಪನೆ ಮಲ್ದ್ಂಡ್.ಅರಿಜೋನಾದ ಮೇಯರ್ ಕೋರೆ ವುಡ್ಸ್ ಮೇರ್ ಜುಲೈ 27ನ್ “Yakshadhruva Patla Foundation Day” ಪಂದ್ ಘೋಷಣೆ ಮಲ್ದೆರ್.ಅಂಚೆನೆ ಬ್ರೂಕ್ ಫೀಲ್ಡ್ ಸಿಟಿಟ್ಟ್ ಅಲ್ತ ಮೇಯರ್ ಸ್ಟೀವನ್ ವಿ. ಪೋಂಟೊ ಮೇರ್ ಅಗಸ್ಟ್ 18ನ್ ‘Yakshadhruva Patla Foundation Day” ಪಂದ್ ಘೋಷಣೆ ಮಲ್ದೆರ್.
ಯಕ್ಷಧ್ರುವ ಯಕ್ಷ ಶಿಕ್ಷಣ
ಯಕ್ಷಗಾನ ಲೋಕಗ್ ಪೊಸ ಚೇತನ ದಿಂಜಾದ್ ಪೊಸ ಪೀಳಿಗೆನ್ ತಯಾರ್ ಮಲ್ಪುನ ನಿಲೆಟ್ಟ್, ಯಕ್ಷಧ್ರುವ ಯಕ್ಷಶಿಕ್ಷಣ ಯೋಜನೆ ಸುರು ಮಲ್ತ್‌ದ್ ಇತ್ತೆ
ದಕ್ಷಿಣ ಕನ್ನಡ, ಉಡುಪಿ, ಶಿವಮೊಗ್ಗ ಬೊಕ್ಕ ಚಿಕ್ಕಮಗಳೂರು ಜಿಲ್ಲೆದ 89 ಶಾಲೆದ ಸುಮಾರ್ 13,248 ವಿದ್ಯಾರ್ಥಿಲು ಯಕ್ಷಗಾನ ಶಿಕ್ಷಣ ಪಡೆಯೊಂದುಲ್ಲೆರ್ ಪಂದ್ ಪಟ್ಲ ಸತೀಶ್ ಶೆಟ್ಟಿ ತೆರಿಪಾಯೆರ್.
ಈ ಪೊರ್ತುಡು ಯಕ್ಷ ಧ್ರುವ ಪಟ್ಲ ಫೌಂಡೇಶನ್ 2026 ಪೋಸ್ಟರ್‌ನ್ ಬಿನ್ನೆರ್ ಗಣ್ಯೆರ್ ಅನಾವರಣ ಮಲ್ತೆರ್.

ಡಾ.ಆಳ್ವ, ಪೊಲ್ಯೆರೆಗ್ ಪ್ರಶಸ್ತಿ
ಪಟ್ಲ ಫೌಂಡೇಶನ್ ಟ್ರಸ್ಟ್ ಪ್ರಧಾನ ಸಂಚಾಲಕೆರಾಯಿನ ಉದ್ಯಮಿ ಶಶಿಧರ ಬಿ ಶೆಟ್ಟಿ ಬರೋಡಾ ಮೆರೆನ ಮಾರ್ಗದರ್ಶನದಲ್ಲಿ
11 ನೇ ವರ್ಷದ ಪಟ್ಲ ಸಂಭ್ರಮದಲ್ಲಿ ಡಾ. ಎಂ. ಮೋಹನ್ ಆಳ್ವ ಮೆರೆಗ್ 2026 ತ್ತ ಯಕ್ಷಧ್ರುವ ಮಹಾಪೋಷಕ ಪ್ರಶಸ್ತಿ ಪ್ರದಾನ ಮಲ್ಪರೆ ಉಂಡು.
2026 ರ ಸಾಲಿನ ಪಟ್ಲ ಪ್ರಶಸ್ತಿನ್ ಪೊಲ್ಯ ಲಕ್ಷ್ಮೀನಾರಾಯಣ ಶೆಟ್ಟಿ ಮೆರೆಗ್ ಕೊರಿಯೆರ್ ಉಂಡು ಪಂದ್ ಪಂಡೆರ್.

ರೋಹನ್ ಕಾರ್ಪೊರೇಷನ್- ರೇನ್ ಮೇಕರ್ಸ್ ವರ್ಕ್‌ಸ್ಪೇಸ್ ಸಂಯುಕ್ತ ಒಕ್ಕೂಟ ಸ್ಥಾಪನೆಗ್ ಚಾಲನೆ

ಕುಡ್ಲ : ಕರಾವಳಿಡ್ ವಾಣಿಜ್ಯ ಚಟುವಟಿಕೆಗ್ ಪೊಸ ಆಯಾಮ ಕೊರ್ಪಿನ ನಿಲೆಟ್ಟ್ ರೋಹನ್ ಕಾರ್ಪೊರೇಷನ್ ಬೊಕ್ಕ ‘ರೇನ್ ಮೇಕರ್ಸ್ ವರ್ಕ್‌ಸ್ಪೇಸ್’ ನಡುಟ್ಟು ಕಾರ್ಯಾಲಯ (Work Space) ಸ್ಥಾಪನೆ ಮಲ್ಪರೆ ಸಂಯುಕ್ತ ಒಕ್ಕೂಟ (Joint Venture) ಒಪ್ಪಂದಗ್ ದಸ್ಕತ್ ಪಾಡಿಯೆರ್.
ಈ ಅಗ್ರಿಮೆಂಟ್‌ದ ಪ್ರಕಾರ ರೋಹನ್ ಸ್ಕ್ವೇರ್ ಕಟ್ವಾಣದ 4ನೇ ಮಾಲಿಗೆಡ್ ಅತ್ಯಾಧುನಿಕ ವರ್ಕ್‌ಸ್ಪೇಸ್ ಆಯಿನಾತ್ ಬೇಗ ಸುರು ಆವರೆ ಉಂಡು.
ಈ ಪೊರ್ತುಡು ರೋಹನ್ ಕಾರ್ಪೊರೇಷನ್‌ ವ್ಯವಸ್ಥಾಪಕ ನಿರ್ದೇಶಕೆರ್ ಡಾ. ರೋಹನ್ ಮೊಂತೆರೋ, ನಿರ್ದೇಶಕೆರ್ ಡಿಯೋನ್ ಮೊಂತೆರೋ ಮೊಕುಲು ರೇನ್ ಮೇಕರ್ಸ್ ವರ್ಕ್‌ಸ್ಪೇಸ್‌ದ ವ್ಯವಸ್ಥಾಪಕ ನಿರ್ದೇಶಕೆರ್ ಪಾಣೀಶ್ ರಾವ್ ಬೊಕ್ಕ ಪ್ರತಿನಿಧಿಲಾಯಿನ ಶ್ರೀಕರ್ ಮೊಕ್ಲೆನ ಒಟ್ಟುಗು ಅಗ್ರಿಮೆಂಟ್ ‌ಗ್ ಸಹಿ ಪಾಡಿಯೆರ್. ಈ ಒಕ್ಕೂಟ ಕುಡ್ಲದ ಉದ್ಯಮ ವಲಯಗ್ ಪೊಸ ಅವಕಾಶಲೆನ್ ಕನತ್ ಕೊರಿಯರೆ ಉಂಡು.
“ಯುವ ಉದ್ಯಮಿಲೆಗ್ ಎಡ್ಡೆ ವೇದಿಕೆ”
ಈ ಸಂದರ್ಭಡ್ ಪಾತೆರ್ನ ಡಾ. ರೋಹನ್ ಮೊಂತೆರೋ, “ಕುಡ್ಲ ಇನಿ ದಕ್ಷಿಣ ಭಾರತದ ಪ್ರಮುಖ ಉದ್ಯಮ ಕೇಂದ್ರದ ಸಾಲ್‌ಗ್ ಸೇರ್ಪಡೆ ಆವೊಂದುಂಡು. ಮೂಲು ಆಧುನಿಕ ಬೊಕ್ಕ ನವೀನ ಕಾರ್ಯಾಲಯ ಸೌಲಭ್ಯಲೆನ್ ಪರಿಚಯ ಮಲ್ಪುನ ಮುಕೇನ ಕೈತಲ್ದ ಪ್ರತಿಭೆಲೆಗ್ ಪ್ರೋತ್ಸಾಹ ಮಲ್ಪುನು ಎಂಕ್ಲೆನ ಬದ್ಧತೆ ಆದುಂಡು. ರೇನ್ ಮೇಕರ್ಸ್ ವರ್ಕ್‌ಸ್ಪೇಸ್‌ದ ಒಟ್ಡುಗು ಈ ಪಾಲುದಾರಿಕೆ ಸ್ಟಾರ್ಟ್‌ಅಪ್‌ ಮಲ್ಪುನಕ್ಲೆಗ್ ಬೊಕ್ಕ ಯುವ ಉದ್ಯಮಿಲೆಗ್ ಬೋಡಾಪಿನ ವೃತ್ತಿಪರ ವಾತಾವರಣ ಒದಗಾದ್ ಕೊರ್ರೆ ಉಂಡು” ಪಂದ್ ತೆರಿಪಾಯೆರ್.
“ಸೃಜನಶೀಲ ಬೊಕ್ಕ ಸಹಕಾರಿ ವಾತಾವರಣ”

ರೇನ್ ಮೇಕರ್ಸ್ ವರ್ಕ್‌ ಸ್ಪೇಸ್ ‌ದ ವ್ಯವಸ್ಥಾಪಕ ನಿರ್ದೇಶಕೆರ್ ಪಾಣೀಶ್ ರಾವ್ ಪಾತೆರ್ದ್, “ಕುಡ್ಲ ಭಾರಿ ಬಿರ್ಸ್‌ಡ್ ವಾಣಿಜ್ಯ ನಗರವಾದ್ ಬುಲೆವೊಂದುಂಡು. ನಮ್ಮ ಸಹಕಾರ ಈ ಕಾರ್ಯಾಲಯ ಮುಲ್ತ ಪೊಸ ಪೀಳಿಗೆದ ಉದ್ಯಮಿಲೆಗ್ ಕ್ರಿಯೇಟಿವ್, ಸಹಕಾರಿ ಬೊಕ್ಕ ಪ್ರೇರಣಾದಾಯಕ ವಾತಾವರಣವನ್ನು ನಿರ್ಮಾಣ ಮಲ್ಪರೆ ಉಂಡು. ಪರಸ್ಪರ ನೆಟ್‌ವರ್ಕಿಂಗ್, ಜ್ಞಾನನ್ ಪಟ್ಟೊನುನು ಬೊಕ್ಕ ಬೆಳವಣಿಗೆಗ್ ಉಂದು ಉತ್ತಮ ವೇದಿಕೆ ಆಪುಂಡು,” ಪಂದ್ ಪಂಡೆರ್.
ಸ್ಟಾರ್ಟ್‌ಅಪ್‌ಗ್ ಬೆರಿಬಲ
ಈ ಯೋಜನೆದ ಮುಕೇನ ಕುಡ್ಲದ ಸ್ಟಾರ್ಟ್‌ಅಪ್ ಪರಿಸರಗ್ ಪೊಸ ಉಮೇದ್ ತಿಕ್ಕೊಡು. ಎಲ್ಯ ಬೊಕ್ಕ ಮಧ್ಯಮ ಉದ್ಯಮದಕುಲು, ಫ್ರೀಲಾನ್ಸರ್‌ ಅಂಚೆನೆ ನವೋದ್ಯಮಿಲೆಗ್ ಕೈಕ್ ತಿಕ್ಕುನ ರೇಟ್‌ಡ್ ಗುಣಮಟ್ಟದ ಕಾರ್ಯಾಲಯ ಸೌಲಭ್ಯ ತಿಕ್ಕುಂಡು. ನನ ದುಂಬುದ ದಿನಕ್ಲೆಡ್ ಕರಾವಳಿದ ವ್ಯಾಪಾರ ಬೊಕ್ಕ ಉದ್ಯಮ ಚಟುವಟಿಕೆಲು ನನಾತ್ ಚೈತನ್ಯಶೀಲ ಆಪಿನ ನಿರೀಕ್ಷೆ ಉಂಡು.

“ತುಲುನಾಡ್ದ ಗುತ್ತುಲು” ಬರವು ಪಂತೊದ ಫಲಿತಾಂಶ

    ಪ್ರಶಾಂತ್ ಆಚಾರ್ಯ                     ಹಂಸರಾಗ ಶೆಟ್ಟಿ

ತುಲುವೆರೆ ಕಲ ಟ್ರಸ್ಟ್(ರಿ.) “ತುಲುನಾಡ್ದ ಗುತ್ತುಲು” ಬಗೆಟ್ಟ್ ಏರ್ಪಾಡ್ ಮಲ್ದಿನ ಬರವು ಪಂತೊಡು ಪ್ರಶಾಂತ್ ಆಚಾರ್ಯ ಸುರುತ್ತ ಇನಾಮು, ಹಂಸರಾಗ ಶೆಟ್ಟಿ ರಡ್ಡನೇ ಇನಾಮು ಪಡೆತೆರ್. ತುಲುವೆರೆ ಕಲತ್ತ ಮೂಜನೇ ವಾರ್ಷಿಕೋತ್ಸವಡ್ ಇನಾಮು ಪಟ್ಟರೆ ಉಂಡು. ರಾಜೇಶ್ ಶೆಟ್ಟಿ ದೋಟ ತೀರ್ಪುಗಾರೆರಾದಿತ್ತೆರ್ ಪಂದ್ ಪ್ರಕಟಣೆಡ್ ತೆರಿಪಾದೆರ್ .

“ತುಲುವೆರೆ ಕಲ” ಜೋಕ್ಲೆನ ಕಬಿತೆ, ಕತೆ ಪಂತದ ಇನಾಮು

ದಿವ್ಯಾ ರೈ ಪೆರುವಾಜೆ   ಪೆರ್ಮುಖ ಸುಬ್ರಹ್ಮಣ್ಯ ಭಟ್   ಶಾರದಾ ತುಳುನಾಡ್

ಕುಡ್ಲ : ತುಲುವೆರೆ ಕಲ ಟ್ರಸ್ಟ್(ರಿ.) ಮಂಗಳೂರು ಉಂದೆತ್ತ ಮೂಜನೇ ವರ್ಷದ ಉಚ್ಚಯದ ನಿಲೆಟ್ಟ್ ಅಟ್ಟಣೆ ಮಲ್ದಿನ ಜೋಕ್ಲೆನ ತುಳು ಕಬಿತೆ ಪಂತೊಡು ದಿವ್ಯಾ ರೈ ಪೆರುವಾಜೆ ಸುರುತ್ತ ಇನಾಮು, ಪೆರ್ಮುಖ ಸುಬ್ರಹ್ಮಣ್ಯ ರಡ್ಡನೇ ಇನಾಮು, ಶಾರದಾ ತುಳುನಾಡ್ ಮೂಜನೇ ಇನಾಮು ಪಡೆತೆರ್.

  ಬನಶ್ರೀ ಅವಿನಾಶ್        ಪ. ರಾಮಕೃಷ್ಣ ಶಾಸ್ತ್ರಿ    ಸವಿತಾ ಯಸ್ ಭಟ್ ಅಡ್ವಾಯಿ

ತುಳು ಜೋಕ್ಲೆನ ಕತೆ ಬರೆಪಿನ ಪಂತೊಡು ಬನಶ್ರೀ ಅವಿನಾಶ್ ಸುರುತ್ತ ಇನಾಮು, ಪ.ರಾಮಕೃಷ್ಣ ಶಾಸ್ತ್ರಿ ರಡ್ಡನೇ ಇನಾಮು, ಸವಿತಾ ಎಸ್.ಭಟ್ ಅಡ್ವಾಯಿ ಮೂಜಿನೇ ಇನಾಮು ಪಡೆತೆರ್. ಕವಿ ಬೊಕ್ಕ ಸಾಹಿತಿಲಾಯಿನ ನಾರಾಯಣ ರೈ ಕುಕ್ಕುವಳ್ಳಿ ಅಂಚೆನೆ ರಘು ಇಡ್ಕಿದು ಪಂತೊದ ತೀರ್ಪುಗಾರೆರಾದಿತ್ತೆರ್. ಮೇ 31 ಕ್ಕ್ ನಡಪುನ ತುಲುವೆರೆ ಕಲ ವರ್ಷದ ಉಚ್ಚಯೊಡು ಸಮಾರಂಭಡ್ ಇನಾಮು ಪಟ್ಟುವ ಪಂದ್ ಟ್ರಸ್ಟ್ ದ ಅಧ್ಯಕ್ಷೆರ್ ಗೀತಾ ಲಕ್ಷ್ಮೀಶ್ ಪ್ರಕಟಣೆಡ್ ತೆರಿಪಾದೆರ್.

ಪವಮಾನ ಯಾಗದ ಯಾಗ ಮಂಟಪ ಮುಹೂರ್ತ

ಹಳೆಯಂಗಡಿ : ಮುಲ್ಕಿ ಸೀಮೆದ ಅರಸೆರ್ ಸಿರಿ ದುಗ್ಗಣ್ಣ ಸಾವಂತೆರ್‌ನ ಶುಭಾಶೀರ್ವಾದೊಡು ಪ್ರಾಣ ಪ್ರತಿಷ್ಠಾನದ ಆಶ್ರಯೊಡು ಮೇ 2 ಶನಿವಾರ ಪಡುಪಣಂಬೂರು ಅರಮನೆ ಮೈದಾನಡ್ ನಡಪರೆ ಉಪ್ಪುನ “ಪವಮಾನ ಯಾಗ 2026” ನೆತ್ತ ಯಾಗ ಮಂಟಪ ನಿರ್ಮಾಣೊಗು ಏ.20 ಐತಾರ ಕಾಂಡೆ ಮುರ್ತ ನಡತ್ಂಡ್.
ಶ್ರೀರಾಮ್ ಸೇವಾ ಮಂಡಲಿ ಕಾರ್ನಾಡು ನೆತ್ತ ಅಧ್ಯಕ್ಷೆರ್ ಭಾಸ್ಕರ್ ಮೇರ್ ಮಂಟಪ ಮುಹೂರ್ತ ಮಲ್ತೆರ್.
ಪ್ರಾಣ ಪ್ರತಿಷ್ಠಾನದ ಮಾರ್ಗದರ್ಶಕೆರ್ ಯೋಗಿ ಪಿ.ಜಿ., ಯೋಗಾಚಾರ್ಯ ವಿನೋದ್, ಸಂಸ್ಥೆದ ಟ್ರಸ್ಟಿಲಾಯಿನ ರಂಜಿತ್ ಬಜ್ಪೆ, ಗಣೇಶ್ ಮೂಲ್ಕಿ,
ವಿನೋದ್ ಸಾಲ್ಯಾನ್ ಬೆಳ್ಳಾಯರು,
ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಸೇವಾ ಪ್ರತಿನಿಧಿ ಸವಿತ ಬೆಳ್ಳಾಯರು, ಗೋಪಾಲಕೃಷ್ಣ ಹಳೆಯಂಗಡಿ ಮೊಕುಲು ಮಾತ ಇತ್ತೆರ್.

ಎ.28-ಮೇ.3: ಕೊಡಿಪಾಡಿ ಶ್ರೀ ಕೊಡಮಣಿತ್ತಾಯ ಶ್ರೀ ಬ್ರಹ್ಮಬೈರ್ದೆಲೆನ ಗರಡಿಡ್ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ, ಕಾಲಾವಧಿ ಜಾತ್ರೆ

ಕುಡ್ಲ: ಕೊಡಿಪಾಡಿ ಶ್ರೀ ಕೊಡಮಣಿತ್ತಾಯ ಶ್ರೀ ಬ್ರಹ್ಮಬೈರ್ದೆಲೆನ ಗರಡಿಡ್ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ ಬೊಕ್ಕ ಕಾಲಾವಧಿ ಜಾತ್ರೆ ಎ.28 ರ್ದ್ ಮೇ.3 ಮುಟ್ಟ ನಡಪರೆ ಉಂಡು.

ಈ ಲೇಸ್ ಶ್ರೀ ಕ್ಷೇತ್ರದ ತಂತ್ರಿಲು ಮಿಜಾರ್ ಪೂಮಾವರಗುತ್ತು ದಿನೇಶ್ ಪೆಜತ್ತಾಯ ಮೆರೆನ ಮುತಾಲಿಕೆಡ್ ನಡಪುಂಡು.

ಎ.2 ಗುರುವಾರ ಬೊಲ್ಪುಗು ಚಪ್ಪರ ಮೂರ್ತ ನಡತ್ಂಡ್.

ಎ.26 ಐತಾರ ಬೊಲ್ಪುಗು ಆಶ್ಲೇಷಾ ಬಲಿ, ಅನ್ನಸಂತರ್ಪಣೆ ರಾತ್ರೆ ಶ್ರೀ ಬ್ರಹ್ಮಲಿಂಗೇಶ್ವರ ದೇವೆರೆಗ್ ರಂಗಪೂಜೆ, ಅನ್ನಸಂತರ್ಪಣೆ ನಡಪರೆ ಉಂಡು.

ಎ.27 ಸೋಮಾರ ಬಯ್ಯಗ್ ಶ್ರೀ ದೇವಿ ಮಹಾತ್ಮೆ ಆಟ ನಡಪರೆ ಉಂಡು.

ಎ.28 ಅಂಗಾರೆ ಬೊಲ್ಪುಗು ಪ್ರಾರ್ತನೆ, ತೋರಣ ಮೂರ್ತ, ಶ್ರೀ ಗಣಪತಿ ಹೋಮ, ನವಗ್ರಹ ಶಾಂತಿ ಹೋಮ, ಉಗ್ರಾಣ ಮೂರ್ತ, ಮಧ್ಯಾಹ್ನ ಪುದೆಕಾಣಿಕೆ ಮೆರವಣಿಗೆ ಬಯ್ಯಗ್ ವಾಸ್ತುಹೋಮ, ವಾಸ್ತುಪೂಜೆ, ವಾಸ್ತುಬಲಿ, ರಾತ್ರೆ ಧಾರ್ಮಿಕ ಸಭಾ ಲೇಸ್ ಬೊಕ್ಕ ಒಂತೆ ಲೇಟಾಂಡ್…ಅಂಡಲ! ತುಳು ನಾಟಕ ನಡಪರೆ ಉಂಡು.

ಎ.29 ಬುದಾರ ಬೊಲ್ಪುಗು ಶ್ರೀದುರ್ಗಾ ಹೋಮ, ಮಂಡಲಪೂಜೆ, ಭಜನೆ, ಬಯ್ಯಗ್ ಕ್ಷೇತ್ರ ಪುರಾಣ ಮಂಜರಿ ಭಕ್ತಿ ಭಾವದ ನೃತ್ಯ ಸಂಗಮ, ಪ್ರಧಾನ ಹೋಮ, ದುರ್ಗಾನಮಸ್ಕಾರ ಪೂಜೆ, ರಾತ್ರೆ ಧಾರ್ಮಿಕ ಸಭಾ ಲೇಸ್ ಬೊಕ್ಕ ತುಳುನಾಡ ಸಂಸ್ಕೃತಿ ತುಳು ಬದ್ಕ್ ದ ಅನಾವರಣ ಲೇಸ್ ನಡಪರೆ ಉಂಡು.

ಎ.30 ಗುರುವಾರ ಬೊಲ್ಪುಗು ಶ್ರೀ ಗಣಪತಿ ಹವನ, ಕೊಡಿ ಪ್ರತಿಷ್ಠೆ, ಶಿಖರ ಕಲಶ ಪ್ರತಿಷ್ಠೆ, ಪ್ರತಿಷ್ಠಾ ಹೋಮ, ಪವಮಾನ ಹೋಮ, ಶ್ರೀ ಕ್ಷೇತ್ರದ ಧರ್ಮದೈವೊಲೆನ ಪುನರ್ ಪ್ರತಿಷ್ಠೆ, ಬ್ರಹ್ಮಕಲಶಾಭಿಷೇಕ, ಪ್ರಸನ್ನ ಪೂಜೆ, ಶ್ರೀ ಧರ್ಮದೈವೊಲೆನ ದರ್ಶನ ಸೇವೆ, ಪಲ್ಲಪೂಜೆ, ಮಧ್ಯಾಹ್ನ ಅನ್ನಸಂತರ್ಪಣೆ, ಭಜನೆ, ಯಕ್ಷ ಹಾಸ್ಯ ವೈಭವ ಯಕ್ಷ ತೆಲಿಕೆ ಬಯ್ಯಗ್ ನವರಸ ನಾಟ್ಯಲಾಸ್ಯ ಸಾಂಸ್ಕೃತಿಕ ಲೇಸ್, ಬೊಕ್ಕ ಕೊಡಿ ಏರುಂಡು. ಅವೆರ್ದ್ ಬೊಕ್ಕ ತುಡರ ಬಲಿ, ಅನ್ನಸಂತರ್ಪಣೆ, ರಾತ್ರೆ ಧಾರ್ಮಿಕ ಸಭಾ ಲೇಸ್, ವೈವಿಧ್ಯಮಯ ನೃತ್ಯ ಪ್ರದರ್ಶನ ಬೊಕ್ಕ ಕೊಲ್ಲೂರು ಶ್ರೀ ಮೂಕಾಂಬಿಕಾ ನೃತ್ಯಗಾಥೆ ನಡಪರೆ ಉಂಡು.

ಮೇ.1 ಸುಕ್ರಾರ ಬೊಲ್ಪುಗು ಉಚ್ಚಯ ಬಲಿ, ಶ್ರೀ ಧರ್ಮರಸು ಉಳ್ಳಾಯ ನೇಮ, ಕಟ್ಟೆ ದೀಪಾರಾಧನೆ, ಕೆರೆ ದೀಪಾರಾಧನೆ, ಪಲ್ಲಪೂಜೆ, ಅನ್ನಸಂತರ್ಪಣೆ ರಾತ್ರೆ ಉಚ್ಚಯ ಬಲಿ, ಅನ್ನಸಂತರ್ಪಣೆ, ಶ್ರೀ ಕೊಡಮಣಿತ್ತಾಯ ನೇಮ, ತುಡರಬಲಿ, ಕಟ್ಟೆ ದೀಪಾರಾಧನೆ, ಕೆರೆ ದೀಪಾರಾಧನೆ, ಶ್ರೀ ಕೋರ್ದಬ್ಬು ಜುಮಾದಿ ದೈವೊಲೆನ ಭೇಟಿ, ತೂಟೆದಾರ ನಡಪರೆ ಉಂಡು.

ಮೇ.2 ಸನಿಯಾರ ರಾತ್ರೆ ಶ್ರೀ ಬೈರ್ದೆಲು ದೈವೊಲು ಗರಡಿ ಜಪ್ಪುಂಡು. ಬೊಕ್ಕ ಅನ್ನಸಂತರ್ಪಣೆ, ಉಚ್ಚಯ ಬಲಿ, ಶ್ರೀ ದೈವೊಲೆನ ತುಡಾರಬಲಿ, ಕಟ್ಟೆ ದೀಪಾರಾಧನೆ, ಕೆರೆ ದೀಪಾರಾಧನೆ, ಶ್ರೀ ಬ್ರಹ್ಮಬೈರ್ದೆಲೆನ ಮಾಯಂದಲೆ ನೇಮ ಬೊಕ್ಕ ಭೇಟಿ ನಡಪರೆ ಉಂಡು.

ಮೇ.3 ಐತಾರ‌ ಬೊಲ್ಪುಗು ಶ್ರೀ ಉಳ್ಳಾಯ ದೈವೊದ ಅವಭೃತ ಸ್ನಾನ, ಕೊಡಿ ಜಾಪುಂಡು. ಬೊಕ್ಕ ಶ್ರೀ ಕ್ಷೇತ್ರರ್ದ್ ಧರ್ಮದೈವೊಲೆನ ಭಂಡಾರ ಪೋದು, ಕೊಡಿಪಾಡಿ ಬಾಳಿಕೆ ಧರ್ಮಚಾವಡಿಗ್ ಪೋಪುಂಡು.

ಈ ಲೇಸ್ ಡ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಪಾಲ್ ಪಡೆದ್, ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ಕ್ಷೇತ್ರದ ಧರ್ಮದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಕೊಡಿಪಾಡಿ ಶ್ರೀ ಕ್ಷೇತ್ರ ಬ್ರಹ್ಮಸ್ಥಾನ ಶ್ರೀ ಕೊಡಮಣಿತ್ತಾಯ ಶ್ರೀ ಬ್ರಹ್ಮಬೈರ್ದೆಲೆನ ಗರಡಿಡ್ ದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ತೆಲಾರಗುತ್ತುದ ಇಲ್ಲಡ್ “ಉಗಾದಿ ಭಾವ ಗಾನ ಯಾನ” ಲೇಸ್

ಸುರತ್ಕಲ್ : ಕಲ್ಲ್, ಮಣ್ಣ್, ಮರ ಇಂಚ ಪ್ರಕೃತಿನೇ ದೇವರ್ ಪಂದ್ ಪೂ ಪೂಜನೆ ಮಲ್ಪರೆ ಜಗತ್ತ್‌ಗ್ ತೊಜಪಾದ್ ಕೊರ್ತಿನಕುಲು ನಮ್ಮ ತುಳುನಾಡ್‌ದ ಹಿರಿಯೆರ್ ಪಂದ್ ತುಳು ಜಾನಪದ ಕಲ್ಪಾರ್ಥಿ ವಿಜೇತ್ ಎಂ ಮಂಜನಾಡಿ ಪಂಡೆರ್.
ಆರ್ ಅಖಿಲ ಭಾರತೀಯ ಸಾಹಿತ್ಯ ಪರಿಷತ್ ಕರ್ನಾಟಕ ದಕ್ಷಿಣ ಕನ್ನಡ ಜಿಲ್ಲಾ ಸಮಿತಿ ವತಿರ್ದ್ ಕಾರಣಿಕ ಪುರುಷೆ ಅಗೊಳಿ ಮಂಜಣೆ ಪುಟ್ಟುದಿನ ತೆಲಾರಗುತ್ತುದ ಇಲ್ಲ್ “ಅಯೋಧ್ಯ” ಡ್ ಇಂಚೊಗು ನಡತಿನ “ಉಗಾದಿ ಭಾವ ಗಾನ ಯಾನ” ಲೇಸ್‌ಡ್ ಉಪನ್ಯಾಸ ಕೊರ್ದು ಪಾತೆರಿಯೆರ್. ತುಳುನಾಡ್‌ಡ್ ಪ್ರಕೃತಿ, ದೈವ, ದೇವೆರ್‌ನ ಮಿತ್ತ್‌ದ ನಂಬಿಕೆ ಜಾಸ್ತಿ . ಉಂದುವೇ ಈ ಮಣ್ಣ್‌ದ ಶಕ್ತಿ ಪಂದ್ ತೆರಿಪಾಯೆರ್. ಉಗಾದಿ ಪನ್ಪಿನವು ನಮ್ಮ ತುಳು ವರ್ಷದ ಸುರು ಪಂದ್ ಅರ್ಥ. ಉಗಾದಿದ ಈ ದಿನನ್ ನಮ್ಮ ಹಿರಿಯೆರ್ ಬಿಸು ಪರ್ಬ ಪಂದ್ ವಿಶೇಷ ರೀತಿಡ್ ಆಚರಣೆ ಮಲ್ತೊಂದು ಬೈದೆರ್ ಪಂದ್ ಪಂಡೆರ್. ಲೇಸ್‌ನ್ ಹಿರಿಯ ಜಾನಪದ ವಿದ್ವಾಂಸೆರಾಯಿನ ಡಾ. ವೈ‌.ಎನ್ ಶೆಟ್ಟಿ ಉದಿಪನ ಮಲ್ತೆರ್. ಮಿತ್ತರ್ಮೆಡ್ ಅ.ಭಾ.ಸಾ.ಪ ರಾಜ್ಯ ಕಾರ್ಯಕಾರಿಣಿ ಸದಸ್ಯೆರ್ ಶೈಲೇಶ್, ಜಿಲ್ಲಾ ಸಮಿತಿ ಸಂಚಾಲಕೆರ್ ಸುಂದರ ಶೆಟ್ಟಿ ಇಳಂತಿಲ, ದಿವಾಕರ ಸಾಮಾನಿ ತೆಲಾರಗುತ್ತು ಮೊಕುಲು ಮಾತ ಇತ್ತೆರ್. ಕಾರ್ಯಕ್ರಮದ ಅಧ್ಯಕ್ಷತೆನ್ ಅ.ಭಾ.ಸಾ.ಪ ದಕ್ಷಿಣ ಕನ್ನಡ ಜಿಲ್ಲಾ ಸಮಿತಿ ಅಧ್ಯಕ್ಷೆರ್ ವೀಣಾ ಟಿ ಶೆಟ್ಟಿ ತೆಲಾರಗುತ್ತು ವಹಿಸ್‌ದಿತ್ತೆರ್. ಸಮಿತಿದ ಕಾರ್ಯದರ್ಶಿ ಲತೇಶ್ ಬಿನ್ನೆರ್‌ನ್ ಎದ್ಕೊಂಡೆರ್ . ಗೀತಾ ಲಕ್ಷ್ಮೀಶ ಸೊಲ್ಮೆದ ನುಡಿ ಸೇಸೆ ಪಾರಾಯೆರ್. ಮಂಗಳೂರು ವಿಶ್ವವಿದ್ಯಾನಿಲಯದ ಸಂದೀಪ್ ಲೇಸ್ ಸುದಾರಿಕೆ ಮಲ್ತೆರ್.

ಎ.18-24 : ಪದವು ಕುಲಶೇಖರ ಶ್ರೀ ಶನೈಶ್ಚರ ದೇವಸ್ಥಾನಡ್ ಬಿಂಬ ಪ್ರತಿಷ್ಠೆ,ಬ್ರಹ್ಮಕಲಶ

ಕುಡ್ಲ : ಕುಲಶೇಖರದ ಪದವುಡು ಹಿಂದೂ ಯುವಸೇನೆ ಸಂಚಾಲಿತ ಧಾರ್ಮಿಕ ಶ್ರದ್ಧಾ ಕೇಂದ್ರವಾಯಿನ ಶ್ರೀ ಶನೈಶ್ಚರ ದೇವಸ್ಥಾನಡ್ ಬಿಂಬ ಪ್ರತಿಷ್ಠೆ ಬೊಕ್ಕ ಬ್ರಹ್ಮಕಲಶೋತ್ಸವ ಸಮಾರಂಭ ಎಪ್ರಿಲ್ 18- 24 ಮುಟ್ಟ ಬಾಳಂಭಟ್ ಮನೆತನದ ಜ್ಯೋತಿಷ್ಯ ವಿದ್ವಾನ್ ವೇದಮೂರ್ತಿ ಎಂ. ಗಿರಿಧರ ಭಟ್ ಅಂಚೆನೆ ವೇದಮೂರ್ತಿ ಡಾ| ಸತ್ಯಕೃಷ್ಣ ಭಟ್ ಮೊಕ್ಲೆನ ನೇತೃತ್ವಡ್ ವಿವಿಧ ವೈದಿಕ, ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮದ ಒಟ್ಟುಗು ಭಾರಿ ಶ್ರದ್ಧಾಭಕ್ತಿಡ್ ನಡಪರೆ ಉಂಡು” ಪಂದ್ ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ನಳಿನ್
ಕುಮಾರ್ ಕಟೀಲು ತೆರಿಪಾಯೆರ್.
ಶ್ರೀ ಕ್ಷೇತ್ರಡ್ ಗುರುವಾರ ನಡತಿನ ಸುದ್ದಿಗೋಷ್ಠಿಡ್ ಪಾತೆರ್ನ ಆರ್, ಹಿಂದೂ ಯುವಸೇನೆ ಪದವು ಶಾಖೆದ ಧಾರ್ಮಿಕ ವಿಭಾಗವಾದ್ ಕರಿನ ರಡ್ಡರೆ ದಶಕರ್ದಿಂಚಿ ಉಪ್ಪುನ ಶ್ರೀ ಶನೈಶ್ಚರ ಪೂಜಾ ಸಮಿತಿ (ರಿ.) 2000 ಬೊಕ್ಕ 2018 ಡ್ ಶ್ರೀ ಸಗ್ರಹ ಮಖ ಶನೈಶ್ಚರ ಮಹಾಯಾಗನ್ ವೇದಮೂರ್ತಿ ನಾರಾಯಣ ಭಟ್ ಮೆರೆನ ಮಾರ್ಗದರ್ಶನಡ್ ಮಲ್ತ್‌ದಿತ್ತ್ಂಡ್. ಈ ಯಾಗ 7 ದಿನ ನಡತ್‌ದ್ ಧಾರ್ಮಿಕ ವಲಯಡ್ ಚರಿತ್ರೆ ನಿರ್ಮಾಣ ಮಲ್ದ್ಂಡ್.2010 ನೇ ಇಸ್ವಿಡ್ ಕುಡ್ಲ ಕುಲಶೇಖರದ ಪದವು ಮೇಗಿನಮನೆ ಕೈತಲ್ 600 ಚ. ಅಡಿ ಜಾಗೆಡ್ ಶ್ರೀ ಶನೈಶ್ಚರ ಪೂಜಾ ಮಂದಿರ ನಿರ್ಮಾಣ ಮಲ್ತ್‌ದ್ ಶ್ರೀ ಶನಿದೇವೆರ್‌ನ ಆರಾಧನೆ ಆವೊಂದುಂಡು.2023 ನೇ ಇಸ್ವಿಡ್ ದೇವಸ್ಥಾನ ನಿರ್ಮಾಣ ಸಮಿತಿ ಮಲ್ತ್‌ದ್, 10 ಸೆಂಟ್ಸ್ ಜಾಗೆ ಖರೀದಿ ಮಲ್ತ್‌ದ್, ಪೊಸ ಶಿಲಾಮಯ ಶ್ರೀ ಶನೈಶ್ಚರ ದೇವಸ್ಥಾನಗ್ ಶಂಕುಸ್ಥಾಪನೆ ಆದಿತ್ತ್‌ಂಡ್.ಪ್ರಶ್ನಾಚಿಂತನೆಡ್ ತೋಜಿದ್ ಬತ್ತಿಲೆಕ ಈ ದೇವಸ್ಥಾನಡ್ ನವಗ್ರಹ ಸಹಿತ ಶ್ರೀ ಶನೈಶ್ಚರ,ಮಹಾಗಣಪತಿ ಅಂಚೆನೆ ಶ್ರೀ ದುರ್ಗಾದೇವಿನ್ ಪ್ರತಿಷ್ಠಾಪನೆ ಮಲ್ಪರೆ ಉಂಡು ಪಂದ್ ಪಂಡೆರ್.
ಬ್ರಹ್ಮಕಲಶೋತ್ಸವ ಸಮಿತಿದ ಕಾರ್ಯಾಧ್ಯಕ್ಷೆರ್, ಶಾಸಕೆರ್ ವೇದವ್ಯಾಸ ಕಾಮತ್ ಪಾತೆರ್ದ್, ಎ. 18 ಶನಿವಾರ ಸಾಮೂಹಿಕ ಪ್ರಾರ್ಥನೆ, ಉಗ್ರಾಣ ಮೂರ್ತ, ತೋರಣ ಮೂರ್ತ,ಎ.20 ಗು ಸ್ವಾಗತ ಗೋಪುರ ಉದ್ಘಾಟನೆ, 108 ತಾರಾಯಿದ ಗಣ ಯಾಗ,ಎ.22 ಕ್ಕ್ ಲಕ್ಷ್ಮೀ ನಾರಾಯಣ ಪ್ರಧಾನ ಹೋಮ ನಡಪರೆ ಉಂಡು. ಎ. 23 ಗುರುವಾರ ಗಣಪತಿ, ದುರ್ಗಾ, ನವಗ್ರಹ ಸಹಿತ ಶ್ರೀ ಶನೈಶ್ಚರ ದೇವೆರ್ನ ಬಿಂಬ ಪ್ರತಿಷ್ಠೆ, ಅಶ್ವಥ ಮರ ಪ್ರತಿಷ್ಠೆ,
ಶಿಖರ ಕಲಶ, ಪರಿಕಲಶ ಸಹಿತ ಬ್ರಹ್ಮಕಲಶಾಭಿಷೇಕ ನಡಪರೆ ಉಂಡು .ಎ. 24 ಸುಕ್ರವಾರ ಚಂಡಿಕಾ ಯಾಗ,ಸಗ್ರಹ ಶನೈಶ್ಚರ ಮಹಾಯಾಗ ನಡಪರೆ ಉಂಡು ಪಂದ್ ಪಂಡೆರ್.
ಪ್ರತಿದಿನ ಬೇತೆ ಬೇತೆ ಮಂಡಳಿರ್ದ್ ಭಜನೆ, ಅನ್ನಸಂತರ್ಪಣೆ, ಧಾರ್ಮಿಕ ಸಭೆ ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಉಂಡು.ಎ.21 ಅಂಗಾರೆ ರಾತ್ರೆ ಪಾವಂಜೆ ಮೇಳರ್ದ್ “ಛಾಯಾನಂದನ” ಯಕ್ಷಗಾನ ಬಯಲಾಟ, ಎ. 23 ಕ್ಕ್ ಶ್ರೀ ಲಲಿತೆ ಕಲಾವಿದೆರೆರ್ದ್ ‘ಶನಿ ಮಹಾತ್ಮೆ” ತುಳು ನಾಟಕ ನಡಪರೆ ಉಂಡು. ಎ.19 ಗು ಸೌದಾಮಿನಿ ರಾವ್ ಕಟಪಾಡಿ ಬಳಗರ್ದ್ ‘ನೃತ್ಯ ರಂಜಿನಿ’ ಕಾರ್ಯಕ್ರಮ, ಎ.20ಗು ವಿಧಾತ್ರಿ ಕಲಾವಿದೆರ್ ಕುಡ್ಲ (ರಿ) ಮೊಕ್ಲೆರ್ದ್ ‘ಜೈ ಹನುಮಾನ್” ಸಿನಿ ನಾಟಕ,ಎ.22 ಕ್ಕ್ ಕೈತಲ್ದ ಕಲಾವಿದೆರೆರ್ದ್ ಸಾಂಸ್ಕೃತಿಕ ವೈವಿಧ್ಯ,ಎ.24 ಕ್ಕ್ ಜಗದೀಶ್ ಕದ್ರಿ ಸಂಯೋಜನೆಡ್ “ಭಕ್ತಿಸಂಗೀತ ಲಹರಿ” ಕಾರ್ಯಕ್ರಮ ನಡಪರೆ ಉಂಡು ಪಂದ್ ಪಂಡೆರ್.
ಭವಿಷ್ಯದ ಯೋಜನೆ ಶ್ರೀ ಕ್ಷೇತ್ರಡ್ ನಡಪುನ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮಲೆಗ್ ಅನುಕೂಲ ಆಪಿಲೆಕ ಕ್ಷೇತ್ರೊಗು 20 ಸೆಂಟ್ಸ್ ಜಾಗೆದ ಅವಶ್ಯಕತೆ ಇತ್ತಿನೆರ್ದಾವರ ಭೂ ದಾನ ಯೋಜನೆ ಮುಕೇನ ನಿಧಿ ಸಂಗ್ರಹ ಅಭಿಯಾನ ಮಲ್ತ್‌ದ್ ಕುಡ್ಲಡ್ 13 ವಲಯ ಸಮಿತಿ ಅಂಚೆನೆ ಮಹೇಶ್ ಶೆಟ್ಟಿ ತೆಳ್ಳಾರ್ ಮುತಾಲಿಕೆಡ್ ಮುಂಬೈ ಸಮಿತಿನ್ ಮಲ್ತ್ ದ ಪಂದ್ ಆರ್ ತೆರಿಪಾಯೆರ್.
ಪತ್ರಿಕಾಗೋಷ್ಠಿಡ್ ಬ್ರಹ್ಮಕಲಶೋತ್ಸವ ಸಮಿತಿ ಪ್ರಧಾನ ಕಾರ್ಯದರ್ಶಿ ಭಾಸ್ಕರಚಂದ್ರ ಶೆಟ್ಟಿ,ನಿರ್ಮಾಣ ಸಮಿತಿದ ಅಧ್ಯಕ್ಷೆರ್ ಕದ್ರಿ ನವನೀತ ಶೆಟ್ಟಿ,ಶ್ರೀ ಶನೈಶ್ಚರ ಪೂಜಾ ಸಮಿತಿದ ಅಧ್ಯಕ್ಷೆರ್
ರಾಮಚಂದ್ರ ಚೌಟ,ಮಾತೃ ಮಂಡಳಿ ಅಧ್ಯಕ್ಷೆರ್ ವಿಜಯ ಅರುಣ್,ಕಾರ್ಯಾಧ್ಯಕ್ಷೆರ್ ಕಾವ್ಯ ನಟರಾಜ್, ಮೇಗಿನಮನೆ ಉಮೇಶ್ ರೈ ಮೊಕುಲು ಮಾತ ಇತ್ತೆರ್. ಕದ್ರಿ ನವನೀತ ಶೆಟ್ಟಿ ನಿರೂಪಣೆ ಮಲ್ತೆರ್.

ಎ.19 ಪುದೆ ಮೆರವಣಿಗೆ
ಎ. 19 ಐತಾರ ಕಾಂಡೆ 9 ಗಂಟೆಗ್ ಶರವು ಮಹಾಗಣಪತಿ ದೇವಸ್ಥಾನಡ್ ‘ ಶ್ರೀ
ಶರವು ರಾಘವೇಂದ್ರ ಶಾಸ್ತ್ರಿಲು ಹೊರೆಕಾಣಿಕೆ ಮೆರವಣಿಗೆಗೆ ಚಾಲನೆ ಕೊರ್ರೆ ಉಲ್ಲೆರ್. ಪೊಸ ಶಿಲಾಬಿಂಬ ಸಹಿತ ದೇವಸ್ಥಾನದ ದಿನಬಳಕೆದ ಸೊತ್ತುಲು, ಬ್ರಹ್ಮಕಲಶದ ಸೊತ್ತುಲು ಪುದೆ ಮೆರವಣಿಗೆಡ್ ಬರ್ರೆ ಉಂಡು.

ಹಿಂದೂ ಯುವಸೇನೆ ಸಮಾವೇಶ
ಶಿವಾಜಿ ಮಂಟಪಡ್ ಪ್ರತಿದಿನ ಬಯ್ಯಡ್ ಧರ್ಮಸಭೆ ನಡಪರೆ ಉಂಡು. ಎ. 19 ಐತಾರ ಹಿಂದೂ ಯುವಸೇನೆದ ಸಮಾವೇಶಡ್ ಗುರುಪುರ ವಜ್ರದೇಹಿ ಮಠತ್ತ ಶ್ರೀ ರಾಜಶೇಖರಾನಂದ ಸ್ವಾಮಿಲು ಸೇರ್ದ್ ಹಿಂದೂ ಯುವಸೇನೆದ ಹಿರಿಯ ನಾಯಕೆರ್, ವಿವಿಧ ಶಾಖೆದ ಸ್ವಯಂಸೇವಕೆರ್, ಧಾರ್ಮಿಕ ಮುಖಂಡೆರ್ ಈ ಸಮಾವೇಶಡ್ ಪಾಲ್ ಪಡೆವೆರ್ ಪಂದ್ ನಳಿನ್ ಕುಮಾರ್ ತೆರಿಪಾಯೆರ್.

ಏ.17 : ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿ ಕಿನ್ನಿಗೋಳಿ ಶಾಖೆದ 2ನೇ ವರ್ಷದ ಉಚ್ಚಯ

ಮುಲ್ಕಿ : ಹಳೆಯಂಗಡಿಡ್ ಪ್ರಧಾನ ಕಚೇರಿ ಉಪ್ಪುನ ಪುಗರ್ತೆದ ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿದ ಕಿನ್ನಿಗೋಳಿ ಶಾಖೆದ 2 ನೇ ವರ್ಷದ ವಾರ್ಷಿಕ ಉಚ್ಚಯ ಏ.17 ಶುಕ್ರವಾರ ಕಾಂಡೆ 10 ಗಂಟೆಗ್ ನಡಪರೆ ಉಂಡು.
ರಡ್ಡನೇ ವಾರ್ಷಿಕ ಉಚ್ಚಯದ ಸವಿ ನೆಂಪುಗಾದ್ ಕಿನ್ನಿಗೋಳಿದ ಸೈಂಟ್ ಮೇರೀಸ್ ಸ್ಪೆಷಲ್ ಸ್ಕೂಲ್‌ದ ಕಲ್ಪಾರ್ಥಿಲೆಗ್ ಹೊಲಿಗೆ ಯಂತ್ರ ವಿತರಣೆ ಮಲ್ಪರೆ ಉಂಡು.
ಲೇಸ್‌ದ ಮಲ್ಲ ಬಿನ್ನೆರಾದ್ ಕಿನ್ನಿಗೋಳಿ ಪಟ್ಟಣ ಪಂಚಾಯತ್ ಅಧ್ಯಕ್ಷೆರ್ ಗುರುರಾಜ್ ಮಲ್ಲಿಗೆಯಂಗಡಿ, ಸದಸ್ಯೆರಾಯಿನ ಕೋಕಿಲ ಡಿ ಅಮೀನ್, ರೇಷ್ಮಾ ಮಾರ್ಟಿಸ್ ಪಾಲ್ ಪಡೆಪೆರ್ ಪಂದ್ ಸೊಸೈಟಿದ ಅಧ್ಯಕ್ಷೆರ್ ಎಚ್ ವಸಂತ ಬೆರ್ನಾಡ್, ಉಪಾಧ್ಯಕ್ಷೆರ್ ಪ್ರತಿಭಾ ಕುಳಾಯಿ ಬೊಕ್ಕ ಸಿಇಒ ಸುದರ್ಶನ್ ಪಂಜ ಪತ್ರಿಕಾ ಹೇಳಿಕೆಡ್ ತೆರಿಪಾದೆರ್.

You Missed