ಕುಡ್ಲದ ಸುದ್ದಿ | Mangalore News

ತುಳುನಾಡ ಕೈಲಾಸ ಪಾವಂಜೆ ಕ್ಷೇತ್ರಗ್ ಬ್ರಹ್ಮಕಲಶೋಚ್ಚಯದ ಗೌಜಿ

ಮುಲ್ಕಿ: ತುಳುನಾಡ್‌ಡ್ ದೈವೊಲೆನ್ ನಂಬುನ ಜನಕುಲು ಆತೇ ಭಕ್ತಿಡ್ ದೇವೆರೆನ್‌ಲ ಆರಾಧನೆ ಮಲ್ಪುವೆರ್. ಪರಪೋಕು ಇಪ್ಪುನ ಪುಗರ್ತೆದ ದೇವಲ್ಯದ ಬಗೆಟ್ ತೂವೊಂದು ಪೋಂಡ ತುಳುನಾಡ್‌ದ ಕೈಲಾಸ ಪಂದೇ ಜನಕ್ಲೆನ ಮನಸ್ಸ್‌ಡ್ ನೆಲೆಯಾತಿನ ಮುಲ್ಕಿ ತಾಲೂಕುದ ಪಾವಂಜೆ ಶ್ರೀ ಮಹಾಲಿಂಗೇಶ್ವರ ದೇವಲ್ಯಲ ಒಂಜಿ. ಅಂಚಿನ ಪೊರ್ಲುದ ದೇವಲ್ಯಗ್ ಇತ್ತೆ ಬ್ರಹ್ಮಕಲಶೋಚ್ಚಯದ ಗೌಜಿ.

ಪಾವಂಜೆದ ನಾಲ್ ಚೌಕ ಗ್ರಾಮದ ಪರಪೋಕು ಇಪ್ಪುನ ಶ್ರೀ ಮಹಾಲಿಗೇಶ್ವರ ಮಹಾಗಣಪತಿ ದೇವಲ್ಯಡ್ ಪೊಸ ಧ್ವಜಸ್ತಂಭಗ್ ತೈಲಾಧಿವಾಸ ನಡತ್ಂಡ್. ಬ್ರಹ್ಮಕಲಶೋಚ್ಚಯದ ಪೂರ್ವಭಾವಿಯಾದ್ ಧಾರ್ಮಿಕ ಕಾರ್ಯಕ್ರಮಲು, ದೇವಲ್ಯದ ಜೀರ್ಣೋದ್ಧಾರ ಕಾರ್ಯ ಭಾರೀ ಬಿರ್ಸ್‌ಡ್ ಆವೊಂದುಂಡು. 12 ವರ್ಷಗೊರ ಅಷ್ಟಬಂಧ ಬ್ರಹ್ಮಕಲಶಾಭಿಷೇಕ ಆವೊಡು ಪನ್ಪಿನ ವಾಡಿಕೆ.

ಆಂಡ ಈ ದೇವಲ್ಯ ಕರಿನ 21 ವರ್ಷರ್ದ್ ಬೊಕ್ಕ ಬ್ರಹ್ಮಕಲಶೋಚ್ಚಯ ಆವೊಂದುಂಡು. ಸುಮಾರು 6 ಕೋಟಿ ರೂಪಾಯಿ ಕಾಸ್‌ಡ್ ಬೇತೆ ಬೇತೆ ಜೀರ್ಣೋದ್ಧಾರದ ಬೇಲೆ ನಡತೊಂದು ಉಂಡು.

ಶ್ರೀ ಗಣಪತಿ ದೇವೆರೆನ ಎದುರು ಮಂಟಪ ನವೀಕರಣ ಧ್ವಜಸ್ತಂಭ ಬೊಕ್ಕ ಅವೆಕ್ಕ್ ತಾಮ್ರದ ಪೊದಿಕೆ ಸೇವಾ ಕೌಂಟರ್, ಪಾಕಶಾಲೆ ಬೊಕ್ಕ ಭೋಜನಶಾಲೆ, ಶ್ರೀ ರಕ್ತೇಶ್ವರಿ ಗುಡಿತ್ತ ಪುನರ್ ನಿರ್ಮಾಣ, ನಾಗನಕಟ್ಟೆ, ವಸಂತ ಮಂಟಪ, ದೇವಲ್ಯದ ಪೂರ್ವದ ಗೋಪುರ, ಇಂಚಿನ ಬೇಲೆ ಆಯರೆ ಉಂಡು.

ಸಮಿತಿದ ಪ್ರಮುಖೆರ್ ತೆರಿಪಾದಿಲೆಕ್ಕ 2023ತ್ತ ಜನವರಿ 19-21 ಮುಟ್ಟ ಬ್ರಹ್ಮಕಲಶೋಚ್ಚಯದ ನಡಪರೆ ತೀರ್ಮಾನ ಮಲ್ತ್‌ದಿತ್ತ್‌ದ್, ಪೂರ್ವಭಾವಿ ಬೇಲೆಲು ಭಾರೀ ಬೇಗಡ್ ನಡತೊಂದು ಉಂಡು.