ಕುಡ್ಲದ ಸುದ್ದಿ | Mangalore News

ಬಿಗ್‌ಬಾಸ್‌ಡ್ ಗೆಂದಿನ ರೂಪೇಶ್ ಶೆಟ್ರೆಗ್ ಕುಡ್ಲದ ಪೊಲೀಸೆರೆರ್ದ್ ಮಾನಾದಿಗೆ

ಕುಡ್ಲ: ಬಿಗ್‌ಬಾಸ್ ರಿಯಾಲಿಟಿ ಶೋ ಟ್ಟ್ ಗೆಂದಿನ ರೂಪೇಶ್ ಶೆಟ್ಟಿ ಮೆರೆಗ್ ಕುಡ್ಲ ಪೊಲೀಸ್ ಕಮಿಷನರ್ ಕಚೇರಿಡ್ ಮಾನಾದಿಗೆ ಮಲ್ತೆರ್.

ಪಾಂಡೇಶ್ವರದ ಪೊಲೀಸ್ ಕಮಿಷನರ್ ಕಚೇರಿಡ್ ಪೊಲೀಸ್ ಕಮಿಷನರ್ ಎನ್. ಶಶಿಕುಮಾರ್ ಮುತಾಲಿಕೆಡ್ ಮಾನಾದಿಗೆ ಮಲ್ತೆರ್. ಈ ಪೊರ್ತುಡು ಪೆರಿಯ ಪೊಲೀಸ್ ಅಧಿಕಾರಿಲು ಇತ್ತೆರ್.

ಪಣೋಲಿಬೈಲ್ ಡ್ ಜ.9-16 ಮುಟ್ಟ ಅಗೆಲ್ ಸೇವೆ ಬೊಕ್ಕ ಕೋಲ ಸೇವೆ ಇಜ್ಜಿ

ಬಂಟ್ವಾಳ: ಸಜೀಪಮೂಡ ಗ್ರಾಮದ ಕಾರ್ಣಿಕ ಕ್ಷೇತ್ರ ಪಣೋಲಿಬೈಲು ಶ್ರೀ ಕಲ್ಲುರ್ಟಿ ದೈವಸ್ಥಾನಡ್ ಜ.9-16 ಮುಟ್ಟ ಅಗೆಲ್ ಸೇವೆ ಬೊಕ್ಕ ಕೋಲ ಸೇವೆ ಇಪ್ಪುಜಿ ಪಂದ್ ಕ್ಷೇತ್ರ ಪ್ರಕಟಣೆಡ್ ತೆರಿಪಾದೆರ್.

ಸಜೀಪ ಮಾಗಣೆ ಶ್ರೀ ಉಳ್ಳಾಲ್ತಿ ಅಮ್ಮ ಮೆರೆನ ವಾರ್ಷಿಕ ಪುದ್ದಾರ್ ಮೆಚ್ಚಿ ಜಾತ್ರೆ ಇಪ್ಪುನೆಡ್ದಾವರ ಕ್ಷೇತ್ರಡ್ ಅಗೆಲ್ ಸೇವೆ ಬೊಕ್ಕ ಕೋಲ ಸೇವೆ ಇಪ್ಪುಜಿ.

ದಕ್ಷಿಣ ಕನ್ನಡ ಜಿಲ್ಲೆಡ್ ಉಂಡು 17,37,688 ವೋಟು

ಕುಡ್ಲ: ದಕ್ಷಿಣ ಕನ್ನಡ ಜಿಲ್ಲೆದ 8 ವಿಧಾನಸಭಾ ಕ್ಷೇತ್ರದ ಕಡೆತ್ತ ಮತದಾರೆರ್‍ನ ಪಟ್ಟಿನ್ ಪ್ರಕಟಣೆ ಮಲ್ತ್‌ದ ಪಂದ್ ದ.ಕ.ಜಿಲ್ಲಾಧಿಕಾರಿ ರವಿಕುಮಾರ್ ಎಂ.ಆರ್ ತೆರಿಪಾಯೆರ್.

ಪೇಂಟೆದ ಜಿಲ್ಲಾಧಿಕಾರಿ ಕಚೇರಿಡ್ ಪಾತೆರಿನ ಆರ್, ಜಿಲ್ಲೆಡ್ 23,57,852 ಜನಸಂಖ್ಯೆ ಇತ್ತ್‌ದ್ ಅವೆಟ್ಟ್ 17,37,688 ಮತದಾರೆರ್ ಉಲ್ಲೆರ್. ಉಂದೆಟ್ಟ್ 8,50,552 ಆಂಜೋವುಲು ಬೊಕ್ಕ 8,87,060 ಪೊಂಜೋವುಲು ಅಂಚನೆ 76 ಮಂಗಳಮುಖಿಯೆರ್ ಉಲ್ಲೆರ್ ಪಂದ್ ಪಂಡೆರ್.

ಕುಡ್ಲ ಉತ್ತರ ವಿಧಾನಸಭಾ ಕ್ಷೇತ್ರಡ್ 2,42,186 ಬೊಕ್ಕ ಸುಳ್ಯ ವಿಧಾನಸಭಾ ಕ್ಷೇತ್ರಡ್ 2,01,976 ಮತದಾರೆರ್ ಉಲ್ಲೆರ್. 18,441 ಮತದಾರೆರೆನ್ ಪಟ್ಟಿರ್ದ್ ಬುಡ್ತ. ಒಟ್ಟು 1860 ಮತಗಟ್ಟೆಲು ಉಂಡು.

ಕುಡ್ಲ: ಸ್ಟೇಟ್‌ಬ್ಯಾಂಕ್‌ಡ್ ಬಸ್ ಗುದ್ದುದ್ ನಡತೊಂದು ಪೋವೊಂದಿತ್ತಿನ ಜನ ತೀರ್ ಪೋಯೆರ್

ಕುಡ್ಲ: ಬಸ್ ಗುದ್ದುದ್ ನಡತೊಂದು ಪೋವೊಂದಿತ್ತಿನ ಜನಕ್ಕ್ ಮಸ್ತ್ ಪೆಟ್ಟ್ ಆದ್ ತೀರ್ ಪೋಯಿನ ಘಟನೆ ಕುಡ್ಲದ ಸ್ಟೇಟ್‌ಬ್ಯಾಂಕ್ ಕೈತಲ್ ಮೀನ್ ಮಾರ್ಕೆಟ್‌ದ ಎದುರು ನಡತ್ಂಡ್.

ಬಸವರಾಜ್ (45) ತೀರ್ ಪೋಯಿನಾರ್. ಮೀನ್ ಮಾರ್ಕೆಟ್‌ದ ಎದುರು ಮಾರ್ಗ ಕಡತೊಂದು ಇಪ್ಪುನಗ ರಾವ್ ಆಂಡ್ ರಾವ್ ಸರ್ಕಲ್‌ದಂಚಿ ಪೋವೊಂದಿತ್ತಿನ ಬಸ್ ಗುದ್ದ್‌ದ್ಂಡ್. ತೊಡೆ ಬೊಕ್ಕ ಸೊಂಟಗ್ ಮಸ್ತ್ ಪೆಟ್ಟಾತಿನೆಡ್ದಾವರ ತೀರ್ ಪೋತೆರ್. ಕುಡ್ಲ ಸಂಚಾರಿ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.

ಕುದ್ರೋಳಿಡ್ ಬಿಲ್ಲವರ ಐತಿಹಾಸಿಕ ಪಾದಯಾತ್ರೆ ಸುರು

ಕುಡ್ಲ: ಬಿಲ್ಲವ, ಈಡಿಗ, ನಾಮಧಾರಿ ಸಮುದಾಯದ ಬೇತೆ ಬೇತೆ ಬೇಡಿಕೆಲೆನ್ ಈಡೇರಿಸಾಯರೆ ಬೋಡಾದ್ ರಾಜ್ಯ ಸರ್ಕಾರನ್ ಒತ್ತಾಯ ಮಲ್ಪರೆ ಗುಲ್ಬರ್ಗ ದ ಕರದಾಳು ಬ್ರಹ್ಮಶ್ರೀ ನಾರಾಯಣ ಗುರು ಶಕ್ತಿ ಪೀಠದ ಡಾ. ಪ್ರಣವಾನಂದ ಸ್ವಾಮೀಜಿ ಮೆರೆನ ಮುತಾಲಿಕೆಡ್ ನಡಪುನ 41 ದಿನತ್ತ ಐತಿಹಾಸಿಕ ಪಾದಯಾತ್ರೆ ಶ್ರೀ ಗೋಕರ್ಣನಾಥ ಕ್ಷೇತ್ರರ್ದ್ ಇನಿ (ಜ.7) ಸುರು ಆಂಡ್.

ಕುದ್ರೋಳಿರ್ದ್ ಬೆಂಗಳೂರು ಮುಟ್ಟ 658 ಕಿ.ಮೀ. ಸಾದಿಡ್ ನಡತೊಂದು ಪೋಪಿನ ಯಾತ್ರೆಗ್ ಬಿಲ್ಲವ ಸಮುದಾಯದ ಮಹಾನ್ ನಾಯಕೆರ್, ಮಾಜಿ ಕೇಂದ್ರ ಸಚಿವೆರ್ ಬಿ. ಜನಾರ್ದನ ಪೂಜಾರಿ, ತೆಲಂಗಾಣ ಸರಕಾರದ ಅಬಕಾರಿ ಅಂಚನೆ ಪ್ರವಾಸೋದ್ಯಮ ಸಚಿವೆರ್ ಶ್ರೀನಿವಾಸ ಗೌಡ ಮೇರ್ ಚಾಲನೆ ಕೊರಿಯೆರ್.

ಆಂಧ್ರಪ್ರದೇಶ ಸರಕಾರದ ಕೃಷಿ ಸಚಿವೆರ್ ಜೋಗಿ ರಮೇಶ್, ಆಂಧ್ರಪ್ರದೇಶ ರಾಜಮುಂಡ್ರಿ ಸಂಸದೆರ್ ಮರ್ಗಣಿ ಭರತ್, ಪಿಚ್ಚರ್ ನಟೆ ಸುಮನ್ ತಲ್ವಾರ್, ಈಡಿಗ ಮುಖಂಡೆರ್, ವಿಧಾನ ಪರಿಷತ್ ಮಾಜಿ ಸದಸ್ಯೆರ್ ಎಚ್. ಆರ್. ಶ್ರೀನಾಥ್, ಬಿಜೆಪಿ ಮುಖಂಡೆರ್, ಗುಲ್ಬರ್ಗ ಜಿಲ್ಲಾ ಪಂಚಾಯತ್ ಮಾಜಿ ಅಧ್ಯಕ್ಷೆರ್ ನಿತಿನ್ ಗುತ್ತೇದಾರ್, ವಿಧಾನ ಪರಿಷತ್ ಪ್ರತಿಪಕ್ಷ ಮುಖಂಡೆರ್ ಬಿ.ಕೆ.ಹರಿಪ್ರಸಾದ್, ಕಳಚೂರಿ ಸಮಾಜ ಒಕ್ಕೂಟದ ಅಧ್ಯಕ್ಷೆರ್ ಅರ್ಚನಾ ಜೈಸ್ವಾಲ್, ಸಿಗಂಧೂರು ಶ್ರೀ ಚೌಡೇಶ್ವರಿ ಕ್ಷೇತ್ರದ ಧರ್ಮದರ್ಶಿ ಶ್ರೀ ರಾಮಪ್ಪಜ್ಜ, ಸಮಾಜದ ಮುಖಂಡೆರ್, ಕರ್ನಾಟಕ ರಾಜ್ಯ ಸಚಿವೆರ್ ಕೋಟ ಶ್ರೀನಿವಾಸ ಪೂಜಾರಿ, ವಿ.ಸುನೀಲ್ ಕುಮಾರ್, ವಸಂತ ಬಂಗೇರ , ವಿನಯ ಕುಮಾರ್ ಸೊರಕೆ, ಗೋಪಾಲ ಪೂಜಾರಿ ಬೈಂದೂರು, ಕೆ. ಹರೀಶ್ ಕುಮಾರ್, ಉಮಾನಾಥ ಕೋಟ್ಯಾನ್, ಬಿಲ್ಲವ ಮಹಾಮಂಡಲ ಅಧ್ಯಕ್ಷೆರ್ ರಾಜಶೇಖರ್ ಕೋಟ್ಯಾನ್, ಅಖಿಲ ಭಾರತ ಬಿಲ್ಲವರ ಯೂನಿಯನ್ ಅಧ್ಯಕ್ಷೆರ್ ನವೀನ್ ಡಿ.ಸುವರ್ಣ, ಮೂಡಾ ಅಧ್ಯಕ್ಷೆರ್ ರವಿಶಂಕರ ಮಿಜಾರ್, ಕುದ್ರೋಳಿ ಕ್ಷೇತ್ರದ ಅಧ್ಯಕ್ಷೆರ್ ಎಚ್. ಸಾಯಿರಾಮ್, ಯುವವಾಹಿನಿ ಅಧ್ಯಕ್ಷೆರ್ ರಾಜೇಶ್ ಬಂಟ್ವಾಳ್, ಮೂರ್ತೆದಾರ ಸೇವಾ ಸಂಘ ಅಧ್ಯಕ್ಷೆರ್ ಸಂಜೀವ ಪೂಜಾರಿ ಮಲ್ಲ ಬಿನ್ನೆರಾದ್ ಲೇಸ್‌ಡ್ ಪಾಲ್ ಪಡೆದಿತ್ತೆರ್.

ಎ.ಜೆ ಆಸ್ಪತ್ರೆಡ್ ಒಂಜೇ ಪೊರ್ತುಡು ರಡ್ಡ್ ಜನಕ್ಕ್ ಅಂಗಾಂಗ ಕಸಿ ಸರ್ಜರಿ.!

ಕುಡ್ಲದ ಎ.ಜೆ ಆಸ್ಪತ್ರೆಡ್ ಅಪ್ರೂಪದ ಅಂಚನೆ ಸವಾಲ್ ಆತಿನ ಅಂಗಾಂಗ ಕಸಿ ಸರ್ಜರಿ ಯಶಸ್ವಿಯಾದ್ ನಡತ್ಂಡ್.

ಕುಡ್ಲದ ಫಾದರ್ ಮುಲ್ಲರ್ ಆಸ್ಪತ್ರೆಡ್ ಡಿಸೆಂಬರ್ 11 ಕ್ಕ್ ಮೆದುಳು ನಿಷ್ಕ್ರಿಯವಾಯಿನ ಜನತ್ತ ಅಂಗಾಂಗನ್ ಕಸಿ ಮಲ್ತ್‌ದಿತ್ತ್‌ದ್, ರಡ್ಡ್ ಕಿಡ್ನಿನ್ ಲ ಎ.ಜೆ ಆಸ್ಪತ್ರೆಗ್ ಕನತ್ತ್‌ದ್ ಅಲ್ಪದ ರೋಗಿಲೆಗ್ ಯಶಸ್ವಿಯಾದ್ ಜೋಡ್ಸಾದೆರ್.

ಕಿಡ್ನಿ ಟ್ರಾನ್ಸ್‌ಪ್ಲಾಂಟ್ ಮಲ್ಪರೆ ಒಂಜೆ ವೈದ್ಯೆರ್‍ನ ಕೂಟಗ್ 6-7 ಗಂಟೆ ದೆತೊಂದಿತ್ತ್‌ದ್, ರಡ್ಡ್ ಸರ್ಜರಿನ್ ಒಂಜೇ ಪೊರ್ತುಗು ಯಶಸ್ವಿಯಾದ್ ಮಲ್ತ್‌ದೆರ್. ಸಾಮಾನ್ಯವಾದ್ ರಡ್ಡ್ ಅಂಗಲು ಒಂಜೆ ಆಸ್ಪತ್ರೆಗ್ ಬರ್ಪಿನವು ಭಾರಿ ಕಮ್ಮಿ.

ಇಂಚಿತ್ತಿನ ಸನ್ನಿವೇಶನ್ ಎ.ಜೆ ಆಸ್ಪತ್ರೆದ ಡಾ. ಪ್ರೀತಮ್ ಶರ್ಮಾ, ಡಾ. ರೋಶನ್ ವಿ ಶೆಟ್ಟಿ, ಡಾ. ರಾಘವೇಂದ್ರ ನಾಯಕ್, ಡಾ ಹರೀಶ್ ಕಾರಂತ್, ಸೌಮ್ಯ, ಲೀಲಾವತಿ ಹೆಗ್ಡೆ, ಸವಿನಾ ರೋಶ್ನಿ, ಮಹಾಬಲ ಈ ಸವಾಲ್‌ನ್ ದೆತೊಂದು ಶಸ್ತ್ರಚಿಕಿತ್ಸೆ ಮಲ್ತಿನಕುಲು.

ರಡ್ಡ್ ರೋಗಿಲ್‌ಲ್ ಹುಷಾರ್ ಆದ್ ಇಲ್ಲಗ್ ಪೋತೆರ್. ಈ ಆಸ್ಪತ್ರೆಡ್ 2015 ನೆರ್ದ್ ಇಡೆ ಮುಟ್ಟ 41 ದಾನಿಲೆರ್ದ್ ಪಡೆಯಿನ ಅಂಗಾಂಗರ್ದ್ ಸುಮಾರ್ 150 ರೋಗಿಲು ಹುಷಾರ್ ಆತೆರ್.