ಕಾರ್ಲದ ಸುದ್ದಿ Karkala News

ಜೈ ತುಲುನಾಡ್ ಸಂಘಟನೆ ನಡಪಾಯಿನ ತುಲು ಲಿಪಿ ಪರೀಕ್ಷೆಡ್ ಸಾಧನೆ ಮಲ್ತಿನ ಸೌಜನ್ಯ, ರಶ್ಮಿತಾ

ಜೈ ತುಲುನಾಡ್(ರಿ.) ಸಂಘಟನೆ ತುಲು ಲಿಪಿ ಕಲ್ಪಾವುನ ಉದ್ದೇಶಡ್ ನಡಪಾಯಿನ ಈದು -ತುಲು ಲಿಪಿ ಅಭಿಯಾನ ಆಫ್ ಲೈನ್ ತರಗತಿಡ್ ಪಾಲ್ ಪಡೆದ್ ಕುಮಾರಿ ಸೌಜನ್ಯ ಬೊಕ್ಕ ಕುಮಾರಿ ರಶ್ಮಿತಾ 100 ಕ್ 100 ಅಂಕ ಪಡೆದ್ ವಿಶೇಷ ಸಾಧನೆ ಮಲ್ತ್‌ದೆರ್. ಕರಿನ ಆಗಸ್ಟ್ ಸಪ್ಟೆಂಬರ್ ತಿಂಗೊಲುಡ್ ನಡತ್ತಿನ ತುಲುಲಿಪಿ ತರಗತಿಡ್ ಸುಮಾರ್ ರಡ್ಡ್ ತಿಂಗೊಲು ನಡತಿನ ತರಗತಿಡ್ ಮೂಜಿ ಶಿಕ್ಷಕೆರ್ ತುಲು ವರ್ಣಮಾಲೆ, ಕಾಗುಣಿತ ಬೊಕ್ಕ ಅಂಕೆಲೆನ್ ಕಲ್ಪಾದ್ ಕೊರಿಯೆರ್.

ನೆತ್ತ ಒಟ್ಟಿಗೆ ತುಲು ಲಿಪಿತ ಮಹತ್ವ ಬೊಕ್ಕ ತುಲುನಾಡ್ ದ ಪರ್ಮೆದ ಹೋರಾಟಗಾರೆರ್ನ ಮಾಹಿತಿನ್ ಕೊರಿಯೆರ್. ಅಕ್ಟೋಬರ್ 8 ದಾನಿ ನಡತಿನ ಪರೀಕ್ಷೆದ ಫಲಿತಾಂಶ ಅ. 24 ಕ್ಕ್ ಪ್ರಕಟ ಆಂಡ್. ನೆಟ್ಟ್ ಕುಮಾರಿ ಸೌಜನ್ಯ ಬೊಕ್ಕ ಕುಮಾರಿ ರಶ್ಮಿತಾ ನೂದೆಕ್ ನೂದು ಅಂಕ ಪಡೆದ್ ಸುರುತ ತಾನೋ ಪಡೆತೆರ್. ರಡ್ಡನೆ ತಾನೋ 99 ಅಂಕ ಪಡೆನ ಗ್ರೀಷ್ಮ, ಧನ್ಯಶ್ರೀ ಪಡೆತೆರ್, 98 ಮಾರ್ಕ್ಸ್ ದೆತ್ತ್ ದ್ ಮೂಜನೇ ತಾನೋ ಶ್ರೀನಿಧಿ, ನಿಧಿಕ್ಷಾ ಪಡೆಯೊಂದೆರ್.

ನಿವೃತ್ತ ಪೊಲೀಸ್ ಅಧಿಕಾರಿ ಕೆ.ಎನ್ ಕೋಟ್ಯಾನ್ ರೆಗ್ ಮಾನಾದಿಗೆ

ಮುಲ್ಕಿ : ನಿವೃತ್ತ ಪೊಲೀಸ್ ಅಧಿಕಾರಿ, ಕೆ.ಎನ್.ಕೋಟ್ಯಾನ್ ಅತಿಕಾರಿಬೆಟ್ಟು ಮೆರೆಗ್ ಹೊಸ ಅಂಗಣ ಪತ್ರಿಕೆದ ತಿಂಗಳ ಬೆಳಕು ಲೇಸ್ ಡ್ ಸನಿವಾರ ಮಾನಾದಿಗೆ ಮಲ್ತೆರ್. ಲೇಸ್ ದ ಗುರ್ಕಾರ್ಮೆ ಒಯಿಸ್ ದಿನ ಧರ್ಮದರ್ಶಿ ಹರಿಕೃಷ್ಣ ಪುನರೂರು ಎಡ್ಡೆಪ್ಪುದ ಮದಿಪು ಮದಿತೆರ್.

ಬಿನ್ನೆರಾದ್ ಉದ್ಯಮಿ ಶಶಿಧರ ಕೋಟ್ಯಾನ್, ಹಳೆಯಂಗಡಿ ಬಂಕಿ ನಾಯ್ಕೆರ್ ಗಂಗಾಧರ ಅಮೀನ್, ಅತಿಕಾರಿಬೆಟ್ಟು ಪಂಚಾಯಿತಿ ಉಪಾಧ್ಯಕ್ಷೆರ್ ಮನೋಹರ ಕೋಟ್ಯಾನ್ ಮಿತ್ತರ್ಮೆಡ್ ಇತ್ತೆರ್. ಹಿಂದೂ ಯುವ ಸೇನೆ ಮುಲ್ಕಿ ಎಗ್ಗೆದ ಅಧ್ಯಕ್ಷೆರ್ ದಿನೇಶ್ ಕೊಲ್ನಾಡು, ಉಪಾಧ್ಯಕ್ಷೆರ್ ಸತೀಶ್ ಬಂಗೇರ ಚಿತ್ರಾಪು, ಸಮಾಜಸೇವಕೆರಾಯಿನ ಅಬ್ದುಲ್ ರಜಾಕ್, ಜಾನ್ ಕ್ವಾಡ್ರಸ್ ಸುರಭಿ, ಮುಲ್ಕಿ ಬಿಲ್ಲವ ಸಂಘದ ಅಧ್ಯಕ್ಷೆರ್ ಪ್ರಕಾಶ್ ಸುವರ್ಣ, ಮಾಜಿ ಅಧ್ಯಕ್ಷೆರ್ ರಮೇಶ್ ಅಮೀನ್ ಕೊಕ್ಕರಕಲ್, ಯದೀಶ್ ಅಮೀನ್ ಮೊಕುಲು ಮಾತ ಇತ್ತೆರ್.

ಸಾಧು ಪೂಜಾರಿ ಮಟ್ಟು ಮೇರ್ ಕೆ.ಎಂ. ಕೋಟ್ಯಾನ್ ಮೆರೆನ್ ಪೊಲಬು ಮಲ್ತ್ ಕೊರಿಯೆರ್. ವಾಸು ಪೂಜಾರಿ ಚಿತ್ರಾಪು ದೇವೆರೆನ್ ಸುಗಿತೆರ್. ವಿಜಯಕುಮಾರ್ ಕುಬೆವೂರು ಸನ್ಮಾನ ಪತ್ರ ಓದಿಯೆರ್. ರವಿಚಂದ್ರ ನಿರೂಪಣೆ ಮಲ್ತೆರ್.

ಮುಲ್ಕಿ : ಸುಸೈಡ್ ಕೇಸ್‌ದ ತನಿಖೆ ಮಲ್ಪುನಗ ಒಂತೆಡೇ ರೈಲ್‌ದ ಅಡಿಕ್ ಬೂರುನ ತತ್ತ್ ಒರಿನ ಪೋಲೀಸೆರ್!

ಮುಲ್ಕಿದ ಕುಬೇರ್‌ದ ರೈಲ್ವೇ ಓವರ್ ಬ್ರಿಡ್ಜ್‌ದಲ್ಪ ರೈಲ್‌ದ ಅಡಿಕ್ ಬೂರ್ದು ಒರಿ ಆತ್ಮಹತ್ಯೆ ಮಲ್ದಿತ್ತೆರ್. ಉಂದೆತ ತನಿಖೆ ಮಲ್ಪರೆ ಸ್ಪಾಟ್‌ಗ್ ಪೋಯಿನ ಮುಲ್ಕಿ ಸ್ಟೇಷನ್‌ದ ನಾಲ್ ಪೋಲೀಸೆರ್ ಒಂತೆಡೇ ರೈಲ್ ರ್ದ್ ಬಚಾವಾತೆರ್.

ಐತಾರ 8:30ಗ್ 26 ವರ್ಸದ ವಿಶ್ಲೇಷ್ ಪನ್ಪಿನ ಆನ್ ರೈಲ್‌ದ ಅಡಿಕ್ ಬೂರ್ದು ಆತ್ಮಹತ್ಯೆ ಮಲ್ದಿತ್ತೆ. ಉಂದೆತ ಬಗೆಟ್ ಎಎಸ್ಐ ಸಂಜೀವ, ಚಂದ್ರಶೇಖರ್, ಶಂಕರ್ ಬೊಕ್ಕ ಬಸವರಾಜ್ ಮೇರ್ ಸ್ಪಾಟ್‌ಗ್ ಪೋದು ಜಡ್ತೆ ಮಲ್ತೊಂದಿಪ್ಪುನಗ ಒರಾನೆ ಪಟ್ಟೆಡ್ ರೈಲ್ ಪೋತುಂಡು. ಅಲ್ಪ ಅಂಚಿಂಚಿ ತೆಲಾರೆ ಜಾಗ ದಾಂತಿನೆರ್ದಾವರ ನಾಲ್ ಜನಲಾ ತಿರ್ತ್ ಲಾಗಿಗ್ ಜೀವ ಒರಿತೊಂದೆರ್.

ರೆಂಜಾಳ ಶಾಲೆಡ್ ಜೈ ತುಲುನಾಡ್ ಸಂಘಟನೆ ವತಿರ್ದ್ ನಡತಿನ ತುಳು ಲಿಪಿ ಪರೀಕ್ಷೆಡ್‌ ಸುರುತ್ತ ತಾನೊ ಪಡೆನ ಅಶ್ರಿತಾ

ತುಳು ಲಿಪಿನ್‌ ಗಲಸ್‌ದ್ ತುಳು ಭಾಷೆನ್‌ ಕಲ್ಪಾವುನ ಜೈ ತುಲುನಾಡ್ ಸಂಘಟನೆದ ತುಲು ಲಿಪಿ ಕಲಿಕೆದ ಮೂಲ ಉದ್ದೇಶ. ಈ ನಿಟ್ಟ್‌ಡ್ ನಡಪಾಯಿನ ಬಲೆ ತುಲು ಲಿಪಿ ಕಲ್ಪುಗ ಅಭಿಯಾನ – ರೆಂಜಾಳ ತುಲು ಲಿಪಿ ಆಫ್ಲೈನ್ ತರಗತಿಡ್ ಪಾಲ್‌ ಪಡೆದ್‌ ಬೊಕ್ಕ ನಡತ್ತಿನ ಪರೀಕ್ಷೆಡ್ ಕುಮಾರಿ ಅಶ್ರಿತಾ ವಿಶೇಷ ಸಾಧನೆ ಮಲ್ತ್‌ದೆರ್.‌

ಕರಿನ ಸೆಪ್ಟೆಂಬರ್ -ಅಕ್ಟೋಬರ್ ತಿಂಗೊಲುಡ್ ನಡತ್ತಿನ ತುಲು ಲಿಪಿ ತರಗತಿಡ್ ಸುಮಾರು 2 ತಿಂಗೊಲುದ ಸಮಯ ನಡತ್ತಿನ ತರಗತಿಡ್ ರಡ್ಡ್ ಶಿಕ್ಷಕೆರ್ ತುಲು ವರ್ಣಮಾಲೆ, ಕಾಗುಣಿತ, ಬೊಕ್ಕ ಅಂಕೆದ ಪಾಠನ್‌ ಪಂದ್‌ ಕೊರೊಂದು ಇತ್ತೆರ್. ಬೊಕ್ಕ ಶಬ್ದಲು, ವಾಕ್ಯ ರಚನೆ, ತುಳುರ್ದ್ ಕನ್ನಡಗ್‌ ಬರೆಪುನ, ಕನ್ನಡರ್ದ್ ತುಲು ಭಾಷೆದ ಲಿಪಿನ್ ಬರೆಪುನೆನ್ ಶಿಕ್ಷಕೆರ್‌ ಪಂದ್‌ ಕೊರೊಂದು ಇತ್ತೆರ್.

ಈ ಪಾಠ ಮುಗಿನ ಬೊಕ್ಕ ಅ. 8 ದಾನಿ ಜೈ ತುಲುನಾಡ್ ಸಂಘಟನೆ ಮುಖಾಂತರ ಪರೀಕ್ಷೆ ನಡಪಾದ್‌ ಇತ್ತೆರ್. ಈ ಪರೀಕ್ಷೆದ ಫಲಿತಾಂಶ ಅಕ್ಟೋಬರ್ 24 ದಾನಿ ಪ್ರಕಟ ಆತ್‌ಂಡ್. ಕುಮಾರಿ ಅಶ್ರಿತಾ 100ಕ್ಕ್ 100ಅಂಕ ಪಡೆದ್ ಸುರುತ ಸ್ಥಾನ ಪಡೆಯೊಂದೆರ್.‌ ರಡ್ಡನೇ ಸ್ಥಾನ 99 ಅಂಕ, ಸೌಮ್ಯಾ, ಶಿಲ್ಪಾ, ರೋಹಿಣಿ, ಸುಪ್ರಿಯಾ, ಮೂಜನೆ ಸ್ಥಾನ 98 ಅಂಕ ಶಾಶ್ವತಿ ಶೆಟ್ಟಿ, ತ್ರಿಷಾ ಆರ್ ಶೆಟ್ಟಿ ಪಡೆತೆರ್.

ಕಿನ್ನಿಗೋಳಿ: ಶಾರದೋತ್ಸವ ವಿಸರ್ಜನಾ ಮೆರವಣಿಗೆಡ್ ಮುಸ್ಲಿಮ್ ಕಮಿಟಿರ್ದ್ ಸೌಹಾರ್ದತೆ‌

ಮುಲ್ಕಿ:ಕಿನ್ನಿಗೋಳಿ ಸಾರ್ವಜನಿಕ ಶ್ರೀ ಶಾರದಾ ಮಾತೆನ ಭವ್ಯ ಮೆರವಣಿಗೆಡ್ ಮುಸ್ಲಿಂ ಕಮಿಟಿ ವತಿರ್ದ್ ಮೆರವಣಿಗೆಡ್‌ ಪಾಲ್‌ ಪಡೆನ ಭಕ್ತರೆಗ್‌ ಜ್ಯೂಸ್‌ ಬೊಕ್ಕ ಲಾಡ್‌ ಕೊರ್ದ್‌ ಸೌಹಾರ್ದತೆನ್‌ ತೊಜಿಪಾದೆರ್.

ಕಿನ್ನಿಗೋಳಿ ಶಾರದೋತ್ಸವ ಸಮಿತಿ ಮುತಾಲಿಕೆಡ್‌ ಎನ್ಮನೆ ವರ್ಷದ ಶ್ರೀ ಶಾರದಾ ಮೂರ್ತಿದ ಭವ್ಯ ವಿಸರ್ಜನಾ ಕಾರ್ಯಕ್ರಮಡ್ ಭಾರೀ ಸಂಖ್ಯೆದ ಭಕ್ತಾದಿಲು ಬೊಕ್ಕ ಬೇತೆ ಬೇತೆ ವೇಷದಾರಿಲು, ಚೆಂಡವಾದನದಕ್ಲೆಗ್ ಶಿಸ್ತು ಬದ್ಧವಾದ್ ಕಿನ್ನಿಗೋಳಿ ವಲಯದ ಮುಸ್ಲಿಂ ಕಮಿಟಿದ ಸದಸ್ಯೆರ್ ಮೆರವಣಿಗೆಡ್ ಪಾಲ್‌ ಪಡೆನ ಮಾತೆರೆಗ್ಲ ಚೀಪೆತಿಂಡಿ ಬೊಕ್ಕ ಜ್ಯೂಸ್‌ ವಿತರಣೆ ಮಲ್ತೆರ್.