ಕಾರ್ಲದ ಸುದ್ದಿ Karkala News

ಕಾರ್ಲ: ಜವನೆ ನಾಪತ್ತೆ…!

ಕಾರ್ಲ : ನಿಟ್ಟೆ ಗ್ರಾಮದ ಅಖಿಲೇಶ್ (25) ನಾಪತ್ತೆ ಆಯಿನ ಕೇಸ್ ಕಾರ್ಲ ಗ್ರಾಮಾಂತರ ಪೊಲೀಸ್ ಠಾಣೆಡ್ ದಾಖಲಾತ್‌ಂಡ್.‌ ಅ.9 ದಾನಿ ಕಾಂಡೆ 6.3೦ ಕ್ಕ್ ಇಲ್ಲರ್ದ್‌ ಒಂಜಿ ಬ್ಯಾಗ್‌ನ್‌ ಪತೊಂದು ಪೋಯಿನಾಯೆ ವಾಪಾಸ್‌ ಇಲ್ಲಗ್‌ ಬರಂದೆ, ಸಂಬಂಧಿಕೆರ್ನ ಇಲ್ಲಗ್‌ಲ ಪೋವಂದೆ ನಾಪತ್ತೆ ಆತೆ ಪಂದ್‌ ಪೊಪ್ಪ ರಾಮಚಂದ್ರ ದೂರು ದಾಖಲ್‌ ಮಲ್ತ್‌ದೆರ್.

ಅ.15 ಕಿನ್ನಿಗೋಳಿಡ್ ಉಚಿತ ಯಕ್ಷಗಾನ ಬಣ್ಣಗಾರಿಕೆ ತರಬೇತಿ ಶಿಬಿರ

ಕಿನ್ನಿಗೋಳಿ: ರಾಜರತ್ನಪುರದ ಯಕ್ಷ ಕೌಸ್ತುಭ ಯಕ್ಷಗಾನ ತರಬೇತಿ ಕೇಂದ್ರದ ನಾಲನೇ ವರ್ಷದ ವಾರ್ಷಿಕೋತ್ಸವದ ಅಂಗವಾದ್ ಅ.15 ದಾನಿ ಕಾಂಡೆ 9 ರ್ದ್ ರಾಜರತ್ನಪುರದ ಸರಾಫ್ ಅಣ್ಣಯ್ಯಾಚಾರ್ಯ ಸಭಾಭವನಡ್ ಬಣ್ಣದ ಮನೆ ಪನ್ಪಿನ ಶೀರ್ಷಿಕೆೆಡ್ ಉಚಿತ ತೆಂಕುತಿಟ್ಟು ಯಕ್ಷಗಾನ ಬಣ್ಣಗಾರಿಕೆ ತರಬೇತಿ ಶಿಬಿರದ ಉದಿಪನ ನಡಪರೆ ಉಂಡು.
ಶ್ರೀ ಕ್ಷೇತ್ರ ಕಟೀಲ್ ಪ್ರಧಾನ ಅರ್ಚಕೆರ್ ಕೆ. ಲಕ್ಷ್ಮೀ ನಾರಾಯಣ ಅಸ್ರಣ್ಣೆರ್ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಕಿನ್ನಿಗೋಳಿದ ಯುಗಪುರುಷದ ಕೆ. ಭುವನಾಭಿರಾಮ ಉಡುಪ, ಉದ್ಯಮಿ ಪೃಥ್ವಿರಾಜ್ ಆಚಾರ್ಯ, ಯಕ್ಷಗಾನ ಕಲಾವಿದೆರ್ ಗಣೇಶ್ ಚಂದ್ರಮಂಡಲ, ಕಿನ್ನಿಗೋಳಿ ಮೋಹಿನಿ ಕಲಾ ಸಂಪದದ ಗಂಗಾಧರ ಡಿ ಶೆಟ್ಟಿಗಾರ್, ಯಕ್ಷಗಾನ ಕಲಾವಿದೆರ್ ಬಾಲಕೃಷ್ಣ ಮಿಜಾರ್, ಶಶಿಧರ್ ಪಂಜ, ದುರ್ಗಾಪ್ರಸಾದ್ ಕಟೀಲ್ ಪಾಲ್ ಪಡೆಯೆರೆ ಉಲ್ಲೆರ್. ಸಾಂಸ್ಕೃತಿಕ ಕಾರ್ಯಕ್ರಮ ಅಂಗವಾದ್ ಯಕ್ಷಮಿತ್ರರು ಪಂಜಿನಡ್ಕ ಬೊಕ್ಕ ಜಿಲ್ಲೆದ ಪುಗಾರ್ತೆದ ಅತಿಥಿ ಕಲಾವಿದೆರ್ನ ಕೂಡುವಳಿಕೆಡ್ ಯಕ್ಷ ನಾಟ್ಯ ಹಾಸ್ಯ ವೈಭವ ನಡಪರೆ ಉಂಡು. ಕನ್ನಡಿ, ಬಣ್ಣ ಒರೆಸುನ ಕುಂಟು ಶಿಬಿರಾರ್ಥಿಲು ಕನವೊಡ್. ಒರಿನ ಮಾತ ವಸ್ತ್ ಲೆನ್ ಸಂಸ್ಥೆ ವತಿರ್ದ್ ಕೊರ್ಪೆರ್.

ಬೊಕ್ಕಾತ್ ಮಾಹಿತಿಗಾದ್: 8105673707, 9353564063 ಕಾಲ್ ಮಲ್ಪೊಲಿ ಪಂದ್ ಪ್ರಕಟನೆಡ್ ತೆರಿಪಾದೆರ್.

ವಿಶ್ವ ಬಂಟರ ಸಮ್ಮೇಳನ ಬೊಕ್ಕ ಕ್ರೀಡಾಕೂಟದ ಪೂರ್ವಭಾವಿ ಸಭೆ

ಕುಡ್ಲ: ಜಾಗತಿಕ ಬಂಟರ ಸಂಘಗಳ ಒಕ್ಕೂಟ(ರಿ) ಕುಡ್ಲ ನೆತ್ತ ಮುತಾಲಿಕೆಡ್‌ ಅ.28, 29 ದಾನಿ ನಡಪುನ ವಿಶ್ವ ಬಂಟರ ಸಮ್ಮೇಳನ ಬೊಕ್ಕ ಕ್ರೀಡಾಕೂಟದ ಪೂರ್ವಭಾವಿ ಅ.14‌ ಇನಿ ಬಯ್ಯಗ್‌ 5 ಗಂಟೆಗ್ ಕಾರ್ಲದ ಕಟೀಲ್‌ ಇಂಟರ್‌ ನ್ಯಾಷನಲ್‌ ಸಭಾಂಗಣಡ್‌ ನಡಪೆರೆ ಉಂಡು.
ಜಾಗತಿಕ ಬಂಟರ ಸಂಘದ ಗುರ್ಕಾರ್ಲು ಐಕಳ ಹರೀಶ್‌ ಶೆಟ್ಟಿ, ವಿಶ್ವ ಬಂಟರ ಕ್ರೀಡಾ ಸಮಿತಿದ ಸಂಚಾಲಕೆರ್‌ ಗಿರೀಶ್‌ ಶೆಟ್ಟಿ ತೆಳ್ಳಾರ್‌ ಈ ಲೇಸ್‌ಡ್ ಪಾಲ್‌ ಪಡೆಯೆರೆ ಉಲ್ಲೆರ್.‌ ಕಾರ್ಲ-ಹೆಬ್ರಿ ತಾಲೂಕುದ ಸಮಸ್ತ ಬಂಟೆರ್‌ ಈ ಸಭೆಟ್‌ ಪಾಲ್‌ ಪಡೆಯೊಡು ಪಂದ್‌ ಲೆಪ್ಪೋಲೆಡ್‌ ತೆರಿಪಾದೆರ್.

ರಾತ್ರೆ ಪುಲ್ಯ ಆವೊಡ್ಡ ಪರಶುರಾಮನ ಮೂರ್ತಿ ಮಾಯಿಕ!

ಕಾರ್ಲ: ಪರಶುರಾಮ ಥೀಮ್ ಪಾರ್ಕ್‌ಡ್‌ ಇತ್ತಿನ ಪರಶುರಾಮನ ಮೂರ್ತಿ ರಾತ್ರೊ ರಾತ್ರೆ ನಾಪತ್ತೆ ಆತ್‌ಂಡ್‌ ತೆರಿದ್‌ ಬೈದ್ಂಡ್.  ಈ ಮೂರ್ತಿದ ಬಗೆಟ್ಟ್‌ ಕೆಲ ದಿನರ್ದ್‌ ಚರ್ಚೆ ನಡತೊಂದು ಇತ್ತ್‌ದ್‌, ಕಂಚಿದ ಮೂರ್ತಿ ಪಂದ್‌ ಜನಕ್ಲೆಗ್‌ ಡೋಂಗಿ ಮಲ್ತ್‌ದ್‌ ಇಂಚೊಗು ಪರಶುರಾಮನ ಕೊಡಲಿದ ನಡುಟ್ಟು ಅದ್ ರ್ ಬುಡ್ದು ಜನಕ್ಕುಲ್‌ ಆತಂಕಗ್‌ ಬೂರ್ದ್‌ ಇತ್ತೆರ್.‌
ಕೋಟಿ ಕೋಟಿ ರೂಪಾಯಿ ಖರ್ಚ್‌ ಮಲ್ತ್‌ದ್‌ ಈ ಪ್ರತಿಮೆ ತಯಾರ್‌ ಮಲ್ತ್ ದಿನವು ನಷ್ಟ ಆಂಡ್ ಪಂದ್ ಜನಕುಲು ಪನೊಂದಿತ್ತೆರ್. ಇತ್ತೆ ರಾತ್ರೊ ರಾತ್ರೆ ಈ ಪ್ರತಿಮೆ ನಾಪತ್ತೆ ಆದ್‌, ನೆಟ್ಟ್‌ ವಂಚನೆ ಆತಿನ ನಿಜ ಪಂದ್‌ ಅಲ್ಪದ ಜನಕ್ಕುಲ್‌ ಬೆಚ್ಚ ಆತೆರ್. ಪರಶುರಾಮೆರ್ನ ನಿಜ ಕಂಚಿದ ಪ್ರತಿಮೆ ಆಪುನೆಟ್ಟ ಎಂಕುಲ್‌ ಪೊರ್ಂಬಾಟ ಮಲ್ಪುವ ಪಂದ್‌ ಸಾರ್ವಜನಿಕೆರ್‌ ತೆರಿಪಾದೆರ್.

ಹೆಬ್ರಿ ತಹಶೀಲ್ದಾರ್ ಪುರಂದರ್‌ ಕೆ.‌ ಟ್ರಾನ್ಸ್‌ಫರ್

 ಹೆಬ್ರಿ : ಕರಿನ ಮೂಜಿ ವರ್ಷರ್ದ್ ಹೆಬ್ರಿ ತಹಶೀಲ್ದಾರ್ ಆದ್ ಬೇಲೆ ಮಲ್ತೊಂದು ಇತ್ತಿನ ಪುರಂದರ್‌ ಕೆ. ಮೇರ್ ಹಾಸನ ಜಿಲ್ಲೆದ ಸಕಲೇಶಪುರ ತಾಲೂಕ್‌ದ ತಹಶೀಲ್ದಾರ್‌ ಆದ್ ಅ.11 ದಾನಿ ಟ್ರಾನ್ಸ್‌ಫರ್‌ ಆತೆರ್. ಮೇರ್ ಹೆಬ್ರಿ ತಾಲ್ಲೂಕ್‌ದ ರಡ್ಡನೇ ತಹಶೀಲ್ದಾರ್‌ ಆದ್ ಬೇಲೆ ಮಲ್ತೊಂದು ಇತ್ತೆರ್. ನೆರ್ದ್‌ ದುಂಬ್‌ ಕೆ. ಮಹೇಶ್ಚಂದ್ರ ತಹಶೀಲ್ದಾರ್‌ ಆದಿತ್ತೆರ್. ಪೊಸ ತಹಶೀಲ್ದಾರ್‌ನ ನೇಮಕಾತಿ ನನ ಆವೋಡಾತೆ ಪಂದ್‌ ತೆರಿದ್‌ ಬೈದ್‌ಂಡ್.

ಸಸಿಹಿತ್ಲು ಶ್ರೀ ಭಗವತೀ ತೀಯಾ ಸಂಘದ ಅಧ್ಯಕ್ಷೆರಾದ್ ಸುರೇಶ್ ಕೆ ಬಂಗೇರ ಆಯ್ಕೆ

ಸಸಿಹಿತ್ಲು ಶ್ರೀ ಭಗವತೀ ತೀಯಾ ಸಂಘದ 15ನೇ ವಾರ್ಷಿಕೋತ್ಸವದ ಪೊರ್ತುಡು ಸಂಘದ ಪೊಸ ಪದಾಧಿಕಾರಿಲೆನ ಆಯ್ಕೆ ಪ್ರಕ್ರಿಯೆ ನಡತ್‌ಂಡ್.‌

ಸಂಘದ ಗುರ್ಕಾರೆ‌ ಆದ್ ಸುರೇಶ್ ಕೆ
ಬಂಗೇರ ಒರ್ಂಬನೇ ಸರ್ತಿಗ್ ಅವಿರೋಧ ಆಯ್ಕೆ ಆಯೆರ್.

ಸಂಘದ ಗೌರವ ಗುರ್ಕಾರ್ದಿ ಆದ್ ಗೀತಾ ಪಿ ಕುಮಾರ್ ಆಯ್ಕೆ ಆಯೆರ್.

ಪ್ರಧಾನ ಕಾರ್ಯದರ್ಶಿಯಾದ್ ರಮೇಶ್ ಬಂಗೇರ ಜೊತೆ ಕಾರ್ಯದರ್ಶಿಯಾದ್ ನಿತಿನ್ ಕದಿಕೆ ಬೊಕ್ಕ ಶ್ವೇತಾ ಸುರೇಶ್ ಆಯ್ಕೆ ಆಯೆರ್.‌ ಕೋಶಾಧಿಕಾರಿಯಾದ್ ನಳಿನಿ ಬಂಗೇರ‌, ಜೊತೆ ಕೋಶಾಧಿಕಾರಿಯಾದ್ ವಿದ್ಯಾ,‌ ಸುಮಿತ್ರ, ಆಶಿಶ್ ಬಂಗೇರ, ಲೆಕ್ಕಪರಿಶೋಧಕೆರಾದ್ ಮಿಥುನ್ ಬಂಗೇರ ಬೊಕ್ಕ ಸಂಧ್ಯಾರಾಜೇಶ್, ಸಾಂಸ್ಕೃತಿಕ ಕಾರ್ಯದರ್ಶಿ ಸಂದೀಪ್ ಕೆರೆಕಾಡು, ಮಾಲತಿ ಬೊಳ್ಳೂರು, ಅಕ್ಷಯ ಸೌಮ್ಯ, ಶ್ರಾವ್ಯ ನಿತಿನ್, ಕ್ರೀಡಾ ಕಾರ್ಯದರ್ಶಿ ದೀಪಕ್ ಬಂಗೇರ ಕದಿಕೆ, ದಿನೇಶ್ ಗುಜರನ್, ಜಯಂತಿ, ಹರ್ಷ ಮೊಕುಲು ಆಯ್ಕೆ ಆಯೆರ್.