ಕಾರ್ಲದ ಸುದ್ದಿ Karkala News

ಕಂಬುಲೊಡು ನನ ಸೈರನ್‌ ಸಿಸ್ಟಮ್!

ಕಂಬುಲೊಡು ಎರುಕುಲೆನ್ ಕರೆಕ್ ಜಪ್ಪಾನಗ ಶಿಸ್ತ್ ಪಾಲನೆ ಮಲ್ಪರೆ ಈ ಸರ್ತಿರ್ದ್ ಸೈರನ್ ಪಾಡ್ದ್ ಎಚ್ಚೆರ್ಗೆ ಕೊರ್ಪಿನ ಕ್ರಮ ಸುರುವಾಪುಂಡು ಪನ್ದ್ ಜಿಲ್ಲಾ ಕಂಬುಲ ಸಮಿತಿದ ಅಧ್ಯಕ್ಷೆರ್ ಡಾ| ದೇವಿಪ್ರಸಾದ್ ಶೆಟ್ಟಿ ಬೆಳಪು ಪನ್ತೆರ್.

ಜಿಲ್ಲಾ ಕಂಬುಲ ಸಮಿತಿದ ಮುತಾಲಿಕೆಡ್ ಬೆದ್ರಡ್ ಐತಾರ ನಡತಿನ ತೀರ್ಪುಗಾರೆರ್ನ ಸಭೆಟ್ ಈ ಪಾತೆರ ಆರ್ ಪನ್ಡೆರ್. ಸರಕಾರದ ಮಾರ್ಗಸೂಚಿದಲೆಕ್ಕ ಕಂಬುಲೊನು 24 ಗಂಟೆದ ಉಲಯಿ ಮುಗಿಪರೆ ಬೋಡಾಪಿನ ನಿರ್ದೇಶನೊಲೆನ್ ಮಲ್ತೊಂದ. ಸೈರನ್ ಪಾಡಿ ಬೊಕ್ಕಲಾ ಎರುಕುಲೆನ್ ಜಪುಡಾಯಿಜಿಡ ಬೇತೆ ಎರುಕುಲೆಗ್ ಅವಕಾಶ ಕೊರ್ಪುಂಡು. ತೀರ್ಪುಗಾರೆರ್ ಒವ್ವೇ ಒತ್ತಡ ಪೋಡಿಗೆ ದಾಂತೆ ಬೇಲೆ ಮಲ್ಪುನ ವ್ಯವಸ್ಥೆ ಮಲ್ಪುಂಡು ಪನ್ದ್ ಪನ್ಡೆರ್.

ಕರಂಬಾರು ರಕ್ತದಾನ ಶಿಬಿರ

ಬಜಪೆ : ಪ್ರಾಥಮಿಕ ಅರೋಗ್ಯ ಕೇಂದ್ರ ಬೋಂದೆಲ್, ಹಳೆ ವಿದ್ಯಾರ್ಥಿ ಸಂಘ ಕರಂಬಾರು(ರಿ.), ಶ್ರೀನಿವಾಸ್ ಮೆಡಿಕಲ್ ಕಾಲೇಜು, ರೋಟರಿ ಕ್ಲಬ್ ಡೌನ್ ಟೌನ್ ಕುಡ್ಲ ಮೊಕ್ಲೆನ ಒಟ್ಟು ಸೇರಿಗೆಡ್ ರಕ್ತದಾನ ಶಿಬಿರ ಕರಂಬಾರು ಸರಕಾರಿ ಶಾಲಾ ಸಭಾಂಗಣಡ್ ನಡತ್ಂ‌ಡ್.

ಕಾರ್ಯಕ್ರಮದ ಅಧ್ಯಕ್ಷತೆನ್ ಹಳೆ ವಿದ್ಯಾರ್ಥಿ ಸಂಘದ ಅಧ್ಯಕ್ಷೆರ್ ಸತೀಶ್ ದೇವಾಡಿಗ ವಹಿಸ್ ದ್ ಇತ್ತೆರ್. ಕಾರ್ಯಕ್ರಮನ್ ರೋಟರಿ ಕ್ಲಬ್ ಡೌನ್ ಟೌನ್ ಕುಡ್ಲದ ಗುರ್ಕಾರ್ಲು ಗಣೇಶ್ ಪ್ರಭು ಉದಿಪನ ಮಲ್ತೆರ್.

ಪ್ರಾಥಮಿಕ ಅರೋಗ್ಯ ಕೇಂದ್ರ ಬೋಂದೆಲ್ ದ ಆರೋಗ್ಯಧಿಕಾರಿ ಡಾ.ಸವಿತಾ ಎಸ್. ಜಿ ರಕ್ತದಾನದ ಮಹತ್ವದ ಬಗ್ಗೆ ಪಾತೆರ್ದ್, ರಕ್ತದಾನ ಶ್ರೇಷ್ಠ ದಾನ, ಮಾತೆರ್ಲ ರಕ್ತದಾನ ಮಲ್ತ್ ದ್ ಜೀವ ದಾನ ಮಲ್ಪುಲೆ. ರಕ್ತದಾನ ಮಲ್ಪುನೆರ್ದ್ ಅರೋಗ್ಯಗ್ ಎಡ್ಡೆ. ಕರಂಬಾರು ಶಾಲಾಭಿವೃದ್ಧಿಡ್ ಹಳೆ ವಿದ್ಯಾರ್ಥಿ ಸಂಘದ ಪಾತ್ರ ಮಹತ್ತರವಾಯಿನ ಪಂದ್ ಪಂಡೆರ್.

ಮಲ್ಲ ಬಿನ್ನೆರಾದ್ ರೋಟರಿ ಕ್ಲಬ್ ಡೌನ್ ಟೌನ್ ಕುಡ್ಲ ನೆತ್ತ ಕಾರ್ಯದರ್ಶಿ ಉಮೇಶ್ ಗಟ್ಟಿ, ಶ್ರೀನಿವಾಸ್ ಮೆಡಿಕಲ್ ಕಾಲೇಜ್ ದ ಮೈಕ್ರೋ ಬಯಲಾಜಿದ ಮುಖ್ಯಸ್ಥೆರ್ ಡಾI ಪವನ್ ಚಂದ್, ಶ್ರೀನಿವಾಸ್ ಆಸ್ಪತ್ರೆದ ಬ್ಲಡ್ ಬ್ಯಾಂಕ್ ದ ಮೆಡಿಕಲ್ ಆಫೀಸರ್ ಡಾI ಮಧುಕರ್, ಕರಂಬಾರು ಶಾಲಾ ಮುಖ್ಯ ಶಿಕ್ಷಕಿ ಉಷಾಕಿರಣ,ಕರಂಬಾರು ಶ್ರೀ ಮಹಾಲಕ್ಷ್ಮಿ ದೇವಸ್ಥಾನದ ಗುರ್ಕಾರ್ಲು ಲಕ್ಷ್ಮಣ್ ಬಂಗೇರ, ಕೆಂಜಾರು ಶ್ರೀ ದೇವಿ ಭಜನಾ ಮಂದಿರದ ಗುರ್ಕಾರ್ಲು ಶೇಖರ್ ಪೂಜಾರಿ, ಕರಂಬಾರು ಕೆಂಜಾರು ಯುವವಾಹಿನಿದ ಗುರ್ಕಾರ್ಲು ಭರತೇಶ್ ಪೂಜಾರಿ, ಮರವೂರು ನವಶಕ್ತಿ ಸೇವಾ ಸಂಘದ ಗುರ್ಕಾರ್ಲು ಉಮೇಶ್ ಶೆಟ್ಟಿ, ಕರಂಬಾರು ತುಳುನಾಡ ತುಳುವೆರ ತುಡರ್ ಫ್ರೆಂಡ್ಸ್ ದ ಗುರ್ಕಾರ್ಲು ಸುಧೀರ್ ಪೂಜಾರಿ, ಸ್ವಸ್ತಿಕ್ ಫ್ರೆಂಡ್ಸ್ ದ ಗುರ್ಕಾರ್ಲು ಶಿವಪ್ರಸಾದ್ ಪೂಜಾರಿ ಈ ಪೊರ್ತುಡು ಇತ್ತೆರ್.

ರಾಕೇಶ್ ಕುಂದರ್ ಲೇಸ್ ದ ಸುದಾರಿಕೆ ಮಲ್ತ್, ನವೀನ್ ಚಂದ್ರ ಸಾಲ್ಯಾನ್ ಬತ್ತಿ ಬಿನ್ನೆರೆನ್ ಎದ್ಕೊಂಡೆರ್, ಪ್ರವೀಣ್ ಆಚಾರ್ಯ ಸೊಲ್ಮೆ ಸಂದಾಯ ಮಲ್ತೆರ್.

ಬೋಂದೆಲ್ ಆರೋಗ್ಯ ಕೇಂದ್ರರ್ದ್ ಸಾಂಕ್ರಾಮಿಕ ಅತ್ತಂದ್ ನ ರೋಗದ ಬಗ್ಗೆ, ಅಯುಷ್ಮಾನ್ ಭಾರತ್ ವಿಷಯದ ಬಗ್ಗೆ ಕ್ಯಾಂಪ್ ಡ್ ತೆರಿಪಾಯೆರ್.

ಪೆದ್ದಿನ ಅಪ್ಪೆನೇ ಕೆರ್ನ ಮಗೆ ಅರೆಸ್ಟ್..! ಸತ್ಯಾಂಶ ಬಾಯಿ ಬುಡ್ನ ಮಗೆ!!

ಪೆದ್ದಿನ ಅಪ್ಪೆನೇ ಮಗೆ ಅತ್ಯಾಚಾರ ಮಲ್ಪರೆ ಬನ್ನಗ ವಿರೋಧ ಮಲ್ತಿನೆಕ್ಕ್ ಅಪ್ಪೆನ್ ಕೈಕಾರ್ ಕಟ್ ದ್ ಕೆರ್ದ್ ಪಾಡ್ದಿನ ಘಟನೆ ಮುಲ್ಕಿ ತಾಲೂಕ್ ದ ಕೊಂಡೇಲ ಗ್ರಾಮಡ್ ವರದಿ ಆತ್ಂಡ್.

ಇಡೀ ಮನುಷ್ಯ ಸಮಾಜನೇ ತರೆತಗ್ಗಾವುನ ಬೇಲೆ ಉಂದು. ಅತ್ಯಾಚಾರಗ್ ವಿರೋಧ ಮಲ್ತಿನೆಕ್ಕ್ ಅಪ್ಪೆನೆ ಮಗೆ ಕೆರ್ದ್ ಪಾಡ್ದೆ.

ಅಪ್ಪೆನ್ ಕೈಕಾರ್ ಕಟ್ ದ್ ಕೆರ್ದ್ ಇಲ್ಲಗ್ ಬೀಗ ಪಾಡ್ದ್ ಪರಾರಿ ಆತಿನ ಆರೋಪಿನ್ ಬಜಪೆ ಪೊಲೀಸೆರ್ ಅರೆಸ್ಟ್ ಮಲ್ದೆರ್. ಇತ್ತೆ ಆರೋಪಿ ಸತ್ಯೊನು ಬಾಯಿ ಬುಡ್ತೆ.

ದೇವೆರೆ ಪಾದ ಸೇರಿಯೆರ್ ಸಾಹಿತಿ, ಪತ್ರಕರ್ತೆರ್ ಶೇಖರ್ ಅಜೆಕಾರ್

ಕಾರ್ಲ: ಸಾಹಿತಿ, ಲೇಖಕೆರ್, ಪತ್ರಕರ್ತೆರ್ ಶೇಖರ್ ಅಜೆಕಾರ್(54) ಮೇರ್ ಇನಿ (ಅ.31) ಕಾಂಡೆ ಹಾರ್ಟ್‌ ಆಟ್ಯಾಕ್‌ಡ್ ದೇವೆರೆ ಪಾದ ಸೇರಿಯೆರ್. ಶೇಖರ್ ಅಜೆಕಾರ್ 22 ಪುಸ್ತಕ ಬರೆತೆರ್. ಮಕ್ಕಳ ಸಾಹಿತ್ಯ ಸಮ್ಮೇಳನನ್ ಸಂಘಟಿಸಾದ್ ಸಾಹಿತ್ಯ ಕ್ಷೇತ್ರಗ್ ಕೊಡುಗೆನ್‌ ಕೊರ್ತೆರ್.

ಶೇಖರ್ ಕುಂದಪ್ರಭ ವಾರಪತ್ರಿಕೆಡ್ ಬರಹಗಾರೆರಾದ್ ತನ್ನ ವೃತ್ತಿ ಸುರು ಮಲ್ತೆರ್.‌ ಮುಂಬೈದ ‘ಕರ್ನಾಟಕ ಮಲ್ಲ’, ಜನವಾಹಿನಿ, ದೈಜಿವರ್ಲ್ಡ್, ಕನ್ನಡಪ್ರಭ ಬೊಕ್ಕ ಉಷಾ ಕಿರಣಡ್‌ಲ ಸೇವೆ ಸಲ್ಲಿಸಾದೆರ್. 10 ವರ್ಷದ ಕಾಲ ಪತ್ರಕರ್ತರ ವೇದಿಕೆ ಬೆಂಗಳೂರ್‌ದ ಒಡಿಪು ಶಾಖೆದ ಉಪಾಧ್ಯಕ್ಷೆರ್‌ ಆದಿತ್ತೆರ್.

ಒಡಿಪು ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ, ರಾಷ್ಟ್ರೀಯ ಬಸವಶ್ರೀ ಅವಾರ್ಡ್ 2018, ಅಮಂತ್ರಣ ಪ್ರಶಸ್ತಿ 2019, ಕೃಷಿ ಬಂಧು 2019, ರಾಷ್ಟ್ರೀಯ ಸಂಗೊಳ್ಳಿ ರಾಯಣ್ಣ ಪ್ರಶಸ್ತಿ, ಒಡಿಪು ಜಿಲ್ಲಾ ಕನ್ನಡ ಸಾಹಿತ್ಯ ಪ್ರಶಸ್ತಿ 2019, ವಿಶ್ವ ದರ್ಶನ ಸಾಹಿತ್ಯ ಪ್ರಶಸ್ತಿ 2019, ಶಿಖಾ ಭಾರತ ಪ್ರಶಸ್ತಿ ಮೇರೆಗ್‌ ತಿಕ್ ದ್‌ಂಡ್.

ಬಪ್ಪನಾಡು ಲಯನ್ಸ್ ಕ್ಲಬ್ ಇನ್ಸ್ ಪೈರ್ ವತಿರ್ದ್ ಪ್ರತಿಭಾ ಪುರಸ್ಕಾರ

ವಿದ್ಯಾರ್ಥಿಲೆಗ್ ಪ್ರತಿಭಾ ಪುರಸ್ಕಾರ ಮಲ್ಪುನ ಉದ್ದೇಶ ದುಂಬುದ ಪೀಳಿಗೆದ ಪ್ರತಿಭಾವಂತ ವಿದ್ಯಾರ್ಥಿಲೆಗ್ ವಿಶೇಷವಾದ್ ಜವಾಬ್ದಾರಿನ್ ವಹಿಸುನ. ಜೋಕ್ಲೆನ ಸಾಧನೆಗ್ ಪ್ರೋತ್ಸಾಹ ಕೊರೊಂದು ದುಂಬಗ್ ಅಕುಲ್ ಸಾಮಾಜಿಕವಾದ್ ಬೇತೆಕ್ಲೆಗ್ ನೆರವಾಪುನ ಜವಬ್ದಾರಿನ್ ಕೊರೊಂದು ಉಲ್ಲ. ಬರೀ ವಿದ್ಯೆ ಇತ್ತ್ಂಡ ಯಾವುಜಿ ಎಡ್ಡೆ ನಡಕೆ, ಸಂಸ್ಕಾರ, ವಿವೇಕಲ ಇಪ್ಪೊಡು. ವಿದ್ಯಾರ್ಥಿಲು ತನ್ನ ನೆಚ್ಚಿನ ಪಠ್ಯೇತರ ಕ್ಷೇತ್ರಡ್ ಬೇತೆಕ್ಲೆಗ್ ಮಾದರಿ ಆಪುನಂಚ ಸಾಧಕೆರ್ ಆವೊಡು ಬೊಕ್ಕ ಸೇವಾ ಮನೋಭಾವ, ಕಷ್ಟಡ್ ಇಪ್ಪುನಕ್ಲೆಗ್ ಸಹಾಯ ಹಸ್ತ ಚಾಚುನ ಮನೋಭಾವನ್ ಬುಲೆಪಾವೊಡು ಪಂದ್ ಶ್ರೀ ಶಾರದಾ ಸೊಸೈಟಿದ ಅಧ್ಯಕ್ಷೆರ್ ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು ಪಂಡೆರ್.‌

ಮೇರ್ ಲಯನ್ಸ್ ಕ್ಲಬ್ ಬಪ್ಪನಾಡು ಇನ್ಸ್ ಪೈರ್ ವತಿರ್ದ್ ಶ್ರೀ ಶಾರದಾ ಸೆಂಟ್ರಲ್ ಸ್ಕೂಲ್ ಶಿಮಂತೂರ್ದ ವಿದ್ಯಾರ್ಥಿಲೆಗ್ ಆಯೋಜನೆ ಮಲ್ತಿನ ಪ್ರತಿಭಾ ಪುರಸ್ಕಾರ ಕಾರ್ಯಕ್ರಮಡ್ ಅಧ್ಯಕ್ಷತೆ ವಹಿಸ್ ದ್ ಪಾತೆರಿಯೆರ್. ಮುಖ್ಯ ಅತಿಥಿಯಾದ್ ಲ. ವೆಂಕಟೇಶ್ ಹೆಬ್ಬಾರ್ ಪಾಲ್ ಪಡೆದ್, ಪೋಷಕೆರ್ ಜೋಕ್ಲೆಗ್ ಸರ್ವಸ್ವನ್ ಧಾರೆ ಆದ್ ಕೊರ್ಪೆರ್. ಅವೆಕ್ಕ್ ತಕ್ಕಂತೆ ಜೋಕುಲು ಪೋಷಕರೆಗ್ ಬೊಕ್ಕ ಊರುಗು ಕೀರ್ತಿ ಕನಪುನಂಚ ಸಾಧನೆನ್ ಮಲ್ಪೊಡು. ಶಿಕ್ಷಣದೊಟ್ಟಿಗೆ ಬೇತೆ ಚಟುವಟಿಕೆಗ್ ಒತ್ತು ಕೊರ್ಪುನ ಬೇಲೆನ್ ವಿದ್ಯಾರ್ಥಿಲು ಮಲ್ಪೊಡು ಪಂದ್ ಶುಭ ಹಾರೈಸಾಯೆರ್.

ಈ ಕಾರ್ಯಕ್ರಮಡ್ ಕರಾಟೆಡ್ ರಾಜ್ಯ ಬೊಕ್ಕ ಜಿಲ್ಲಾಮಟ್ಟಡ್ ಪ್ರಶಸ್ತಿ ಪಡೆನ ಸಂಸ್ಥೆದ ವಿದ್ಯಾರ್ಥಿಲಾಯಿನ ತನುಶ್ರೀ ಕೋಟ್ಯಾನ್, ಇಶಿತ್ ಶೆಟ್ಟಿಗಾರ್, ಪ್ರತೀಕ್ ಭಟ್, ಅನ್ವಿತಾ, ಖುಷಿ ಬೊಕ್ಕ ಅಮಿತ್ ಮೊಕ್ಲೆನ್ ಈ ಪೊರ್ತುಡು ಮಾನಾದಿಗೆ ಮಲ್ತೆರ್. ಅಂಚನೆ ಸಂಸ್ಥೆದ ಕರಾಟೆ ತರಬೇತಿದಾರೆರ್ ನಾಗರಾಜ್ ಕುಲಾಲ್ ಮೆರೆಗ್ಲ ಮಾನಾದಿಗೆ ಮಲ್ತೆರ್. ಲೇಸ್ ಡ್ ಶ್ರೀ ಶಾರದಾ ಸೊಸೈಟಿದ ಕೋಶಾಧಿಕಾರಿಲಾಯಿನ ಕೊ. ಭುವನಾಭಿರಾಮ ಉಡುಪ, ಶಾಲಾ ಸಂಚಾಲಕೆರ್ ದೇವಪ್ರಸಾದ್ ಪುನರೂರು ಇತ್ತೆರ್. ಲಯನ್ಸ್ ಕ್ಲಬ್ ಬಪ್ಪನಾಡು ಇನ್ಸ್ಪೈರ್ ನೆತ್ತ ಅಧ್ಯಕ್ಷೆರ್ ಲ. ಸುಧೀರ್ ಬಾಳಿಗ ಪ್ರಾಸ್ತಾವಿಕವಾದ್ ಪಾತೆರ್ದ್ ಎದ್ಕೊಂಡೆರ್. ಶಾಲಾ ಪ್ರಾಂಶುಪಾಲೆರ್ ಜಿತೇಂದ್ರ ವಿ ರಾವ್ ಸೊಲ್ಮೆ ಸಂದಾಯ ಮಲ್ತೆರ್. ಸಹ ಶಿಕ್ಷಕಿ ಹೇಮಲತಾ ಕಾರ್ಯಕ್ರಮ ಸುದಾರಿಕೆ ಮಲ್ತೆರ್.

ಕಟೀಲು: ಅಪ್ಪೆನ್‌ ಕೆರ್ನ ಮಗೆ; ಆರೋಪಿ ಅರೆಸ್ಟ್‌

ಕುಡ್ಲ : ಕಿನ್ನಿಗೋಳಿ ಪಟ್ಟಣ ಪಂಚಾಯತ್‌ ವ್ಯಾಪ್ತಿದ ಕಟೀಲು ಕೈತಲ್‌ದ ಕೊಂಡೇಲ ಗ್ರಾಮದ ದುರ್ಗಾ ನಗರದಲ್ಪ ಪೊಂಜೊವ್‌ ಒರ್ತಿ ತೀರ್‌ಪೋದ್, ಕೆರ್ನ ಆರೋಪದ ಮಿತ್ತ್‌ ಪೊಂಜೊವ್‌ನ ಮಗನ್‌ ಬಜಪೆ ಪೊಲೀಸೆರ್‌ ಅರೆಸ್ಟ್‌ ಮಲ್ತ್‌ದೆರ್. ತೀರ್‌ಪೋಯಿನ ಪೊಂಜೊವ್ ರತ್ನ ಶೆಟ್ಟಿ (60) ಪಂದ್‌ ಗುರುತಿಸಾದೆರ್.‌

ತೀರ್‌ಪೋಯಿನ ಪೊಂಜೊವ್ ರತ್ನ ಕಟೀಲು ದುರ್ಗಾ ನಗರದ ಬಾಲಕೃಷ್ಣ ಪನ್ಪುನಾರ್ನ ಇಲ್ಲದ ಬರಿತ್ತ ಕೋಣೆಡ್ ಮಗೆ ರವಿರಾಜ್‌ ಒಟ್ಟುಗ್‌ ವಾಸ ಇತ್ತೆರ್. ಆರ್ ಗಿಡಿಗೆರೆ ಚರ್ಚ್‌ ಕೈತಲ್‌ದ ಹೋಟೆಲ್‌ಡ್‌ ಬೇಲೆ ಮಲ್ತೊಂದು ಇತ್ತೆರ್. ಶುಕ್ರವಾರ ಹುಷಾರ್‌ ದಾಂತೆ ಇತ್ತಿನೆಕ್ಕ್‌ ಬೇಲೆಗ್‌ ಪೋದು ಇಜ್ಜಾಂಡ್. ಈ ನಡುಟ್‌ ಮಗೆ ಅಪ್ಪೆ ಒಟ್ಟಿಗೆ ಇತ್ತಿನ ಕೋಣೆಗ್ ಬೀಗ ಪಾಡ್ದ್ ಪದ್ರಾಡ್ ಪಾರ್ ದಿತ್ತೆ ಪಂದ್ ಕೈತಲ್‌ದಕುಲ್‌ ತೆರಿಪಾದೆರ್.

ಐತಾರ ಕಾಂಡೆ ಇಲ್ಲದ ಕೈತಲ್‌ಡ್ ವಾಸನೆ ಬರೊಂದು ಇತ್ತಿನ ಗೊತ್ತಾದ್ ಸಂಸಯಡ್‌ ಇಲ್ಲದಕುಲ್‌ ಪೊಂಜೊವ್‌ ಇತ್ತಿನ ಕೋಣೆದ ಕಂಡಿಡ್‌ ತೂನಗ ಪೊಂಜೊವ್‌ನ ಮೋನೆಗ್‌ ಕುಂಟು ಮುಚ್ಚಿನ ಸ್ಥಿತಿಟ್‌ ಬೊಕ್ಕ ಕೈ ಕಾರ್ ಕಟ್ಟಿನ ಸ್ಥಿತಿಡ್ ಇತ್ತೆರ್, ಕೂಡ್ಲೆ ಕೈತಲ್‌ದಕುಲ್ ಬಜಪೆ ಪೊಲೀಸೆರೆಗ್ ಮಾಹಿತಿ ಕೊರ್ತೆರ್.‌‌ ಈ ನಡುಟ್ಟು ವಿಷಯ ಕೈತಲ್‌ದಕ್ಲೆಗ್ ಮಾಹಿತಿ ತೆರಿನ ಕೂಡ್ಲೆ ಮಗೆ ಜಾಗೆರ್ದ್ ಪರಾರಿಯಾವೆರೆ ಪ್ರಯತ್ನ ಮಲ್ತ್‌ದ್, ಕೂಡ್ಲೆ ಪೊಲೀಸೆರ್ ಆರೋಪಿ ರವಿರಾಜ್‌ನ್ ಸಂಶಯಾತ್ಮಕ ಕೆರ್ನ ಕೇಸ್‌ಗ್ ಸಂಬಂಧಪಟ್ಟಿನಂಚ ಹಳೆಯಂಗಡಿ ಕೈತಲ್‌ದ ಸಸಿಹಿತ್ಲುಡ್‌ ಅರೆಸ್ಟ್‌ ಮಲ್ತ್‌ದ್‌ ತನಿಖೆ ಮಲ್ತೊಂದು ಉಲ್ಲೆರ್.

ಆರೋಪಿ ಒವ್‌ ಕಾರಣಗ್ ಕೃತ್ಯ ಮಲ್ತ್‌ದೆ ಪಂದ್ ನನ ತೆರಿಯೊಡಾತೆ. ಜಾಗೆಗ್ ಶ್ವಾನ ದಳ, ಬೆರಳಚ್ಚು ತಜ್ಞೆರ್, ಕುಡ್ಲ ಎಸಿಪಿ, ಬಜಪೆ ಪೊಲೀಸೆರ್ ಭೇಟಿ ಕೊರ್ದು ತನಿಖೆ ಮಲ್ತೊಂದು ಉಲ್ಲೆರ್.