ಕಾರ್ಲದ ಸುದ್ದಿ Karkala News

ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನಡ್ ಶರನ್ನವರಾತ್ರಿ ಉಚ್ಚಯ

ಮುಲ್ಕಿ : ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನಡ್ ಪ್ರತಿ ವರ್ಷದಂಚನೆ ಈ ವರ್ಷಲ ಶರನ್ನವರಾತ್ರಿ ಉಚ್ಚಯ ಸೆ.26 ರ್ದ್ ಅ.5 ಮುಟ ನಡಪರೆ ಉಂಡು.

ಈ ಉಚ್ಚಯಡ್ ದಿನೊಲ ದೇವೆರೆಗ್ ಬೊಲ್ಪುಗು 9 ಗಂಟೆರ್ದ್ ಚಂಡಿಕಾಯಾಗ ಮಧ್ಯಾಹ್ನ ಮಹಾಪೂಜೆ ಬೊಕ್ಕ ಕತ್ತಲೆ 8 ಗಂಟೆರ್ದ್ ವಿಶೇಷಪೂಜೆ, ರಂಗಪೂಜೆ, ಸುವಾಸಿನಿ ಪೂಜೆ ಬೊಕ್ಕ ದಿನೊಲ ಬಯ್ಯಗ್ 5.30ರ್ದ್ 9 ಗಂಟೆ ಮುಟ್ಟ ಸಾಂಸ್ಕೃತಿಕ ಕಾರ್ಯಕ್ರಮ ನಡಪುಂಡು.

ಮಲ್ಲ ಬಿನ್ನೆರಾದ್ ಶಾಸಕೆರ್ ಉಮಾನಾಥ ಕೋಟ್ಯಾನ್, ಭುವನಾಭಿರಾಮ ಧಾರ್ಮಿಕ ಪರಿಷತ್ ಸದಸ್ಯೆರ್, ಮುಲ್ಕಿ ನಗರಪಂಚಾಯ್ ಅಧ್ಯಕ್ಷೆರ್ ಸುಭಾಶ್ ಶೆಟ್ಟಿ , ಶ್ರೀ ಸತ್ಯದೇವತೆ ದೈವಸ್ಥಾನ ಅಳದಂಗಡಿ ಆಡಳಿತದಾರೆರ್ ಶಿವಪ್ರಸಾದ್ ಅಜಿಲ ಉದಿಪನ ಮಲ್ಪರೆ ಉಲ್ಲೆರ್.

ಮಾತೆರ್ಲಾ ಕ್ಷೇತ್ರೊಗು ಬತ್ತ್ ದ್ ದೇವಿನ ಕೃಪೆಗೆ ಪಾತ್ರರಾವೊಡ್ ಪಂದ್ ದುಗ್ಗಣ್ಣ ಸಾವಂತರು ಅನುವಂಶಿಕ ಮೊಕ್ತೇಸೆರ್,ಎನ್.ಎಸ್ ಮನೋಹರ ಶೆಟ್ಟಿ ಅನುವಂಶಿಕ ಬೊಕ್ಕ ಆಡಳಿತ ಮೊಕ್ತೇಸರೆರ್, ಜಯಮ್ಮ ಪಿ ಕಾರ್ಯನಿರ್ವಹಣ ಅಧಿಕಾರಿ, ಬೊಕ್ಕ ತಂತ್ರಿಲು, ಅರ್ಚಕೆರ್,ಬೊಕ್ಕ ಸಿಬ್ಬಂದಿ ವರ್ಗದಕುಲ್ ಲೆಪ್ಪೋಲೆಡ್ ತೆರಿಪಾದೆರ್.

ಮಳಲಿ ಪಲ್ಲಿದ ವಿವಾದ: ಸೆ. 27ಕ್ಕ್ ತೀರ್ಪು

ಕುಡ್ಲ : ಮಳಲಿ ಪಲ್ಲಿದ ವಿವಾದಗ್ ಸಂಬಂಧ ಪಟ್ಟ್ ನ ಸುಮಾರ್ ಅರ್ಜಿದ ವಿಚಾರಣೆ ಮಲ್ತೊಂದು ಇಪ್ಪುನ ಪೇಂಟೆದ ಮೂಜಿನೇ ಸಿವಿಲ್ ಕೋರ್ಟು ಸೆ.27ಕ್ಕ್ ತೀರ್ಪು ಕೊರಿಯೆರೆ ಉಂಡು.

ಈ ಕೇಸ್ ದ ಮೂಲ ಅರ್ಜಿನ್ ತೂಯೆರೆ, ವಿಚಾರಣೆ ಮಲ್ಪುನ ನ್ಯಾಯಾಲಯದ ಅಧಿಕಾರ ವ್ಯಾಪ್ತಿ ಸೇರ್ದ್ ಬೊಕ್ಕ ನ್ಯಾಯಾಲಯ ಆದೇಶ ಕೊರ್ಪುಂಡು.

ನನ ಈ ಆದೇಶ ಕೊರ್ನ ಬೊಕ್ಕನೆ ಬೇತೆ ಬಾಕಿ ಇಪ್ಪುನ ಅರ್ಜಿಲೆನ ವಿಚಾರಣೆ ಮಲ್ಪೊಡು ಪಂದ್ ನೆರ್ದ್ ದುಂಬೇ ಹೈಕೋರ್ಟ್‌ ಆದೇಶ ಕೊರ್ದ್ ಇತ್ತ್ಂಡ್.

ಕುದ್ರೋಳಿ ಶ್ರೀ ಭಗವತೀ ಕ್ಷೇತ್ರ ಮಾರ್ನೆಮಿದ ಗೌಜಿ

ಕುಡ್ಲ : ಕುದ್ರೋಳಿ ಶ್ರೀ ಭಗವತೀ ಕ್ಷೇತ್ರ ಕೊಡಿಯಾಲ್ ಬೈಲ್ ಡ್ ಸೆ.26 ರ್ದ್ ಅ.5 ಮುಟ್ಟ ನವರಾತ್ರಿ ಉಚ್ಚಯ ನಡಪರೆ ಉಂಡು.

ಈ ಉಚ್ಚಯಡ್ ದೇವೆರೆಗ್ ಬೇತೆ ಬೇತೆ ರೀತಿದ ಪೂಜೆಲು ನಡಪುಂಡು. ಅಂಚಾದ್ ಮಾತ ಭಕ್ತೆರ್ಲಾ ಬತ್ತ್ ದ್ ದೇವೆರೆನ ಆರ್ಶೀವಾದ ಪಡೆವೊಡ್ ಪಂದ್ ಪದುಕೆರ್ ಬೊಕ್ಕ ಗುರ್ಕಾರೆ ರ್, ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್, ಯುವಜನ ಸೇವಾ ಸಮಿತಿ ಬೊಕ್ಕ ಮಹಿಳಾ ಸೇವಾ ಸಮಿತಿ, ಅಂಚನೆ ಪದಿಮೂಜಿ ಸಂಘೋಲೆನ ಅಧ್ಯಕ್ಷೆರ್,ಸರ್ವಸದಸ್ಯೆರ್ ಬೊಕ್ಕ ಶ್ರೀ ಕ್ಷೇತ್ರದ ಆಡಳಿತ ಸಮಿತಿದ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪದೆರ್.

ಸರ್ಕಾರರ್ದ್ ಚಿತ್ರಾಪುರ ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯದ ಜೀರ್ಣೋದ್ಧಾರಗ್ 2 ಕೋಟಿ ರೂ. ಬುಡುಗಡೆ

ಬೆಂಗ್ಲೂರ್: ಚಿತ್ರಾಪುರ ಶ್ರೀ ದುರ್ಗಾಪಮೇಶ್ವರಿ ದೇವಲ್ಯಡ್ ಜೀರ್ಣೋದ್ಧಾರದ ಬೇಲೆ ಆವೊಂದಿತ್ತ್ ದ್, ಸರಕಾರದ ಲೆಕ್ಕೊಡು ಅನುದಾನ ಬುಡುಗಡೆ ಮಲ್ಪರೆ ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ ಅರೆಗ್ ಸಂಸದೆರ್ ನಳಿನ್ ಕುಮಾರ್ ಕಟೀಲ್ ಅಂಚನೆ ಶಾಸಕೆರ್ ಡಾ. ಭರತ್ ಶೆಟ್ಟಿ ವೈ ಮೊಕುಲೆನ ಮುತಾಲಿಕೆಡ್ ಚಿತ್ರಾಪುರ ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯದ ಜೀರ್ಣದ್ಧಾರ ಸಮಿತಿ ಅಂಚನೆ ಬ್ರಹ್ಮಕಲಶೋತ್ಸವ ಸಮಿತಿ ನಿಯೋಗ ಬೆಂಗ್ಲೂರ್ ಡ್ ಮನವಿ ಮಲ್ತೆರ್.

ಉಂದೆಕ್ ಸ್ಪಂದಿಸಾಯಿನ ಮುಖ್ಯಮಂತ್ರಿಲು 2 ಕೋಟಿ ರೂಪಾಯಿ ಮಂಜೂರಾತಿಗ್ ಅನುಮತಿ ಕೊರಿಯೆರ್.

ಈ ಪೊರ್ತುಡು ಸಮಿತಿದ ಸಂಚಾಲಕೆರ್ ಮತ್ಸ್ಯರಾಜ್ ಉಮೇಶ್ ಟಿ.ಕರ್ಕೇರ, ಪ್ರ.ಕಾ ಗಣೇಶ್ ಹೊಸಬೆಟ್ಟು, ಕೃಷ್ಣಶೆಟ್ಟಿ, ಪುರುಷೋತ್ತಮ್ ಎನ್.ಆರ್ ಅಂಚನೆ ಪದಾಧಿಕಾರಿಲು ಇತ್ತೆರ್.

ಸರಕಾರರ್ದ್ ಅನುದಾನ ಒದಗಿಸಾಯಿನ ಮುಖ್ಯಮಂತ್ರಿಲೆಗ್, ಸಂಸದೆರೆಗ್, ಶಾಸಕೆರೆಗ್ ಜೀರ್ಣೋದ್ಧಾರ ಸಮಿತಿ ಅಂಚನೆ ಬ್ರಹ್ಮಕಲಶೋತ್ಸವ ಸಮಿತಿದಕುಲು ಸೊಲ್ಮೆ ಸಂದೈತ ಮಲ್ತೆರ್.

ಸಚಿನ್ ಮೆರೆನ ಕಿಡ್ನಿ ಕಸಿ ಮಲ್ಪೆರೆ ಪಣವುದ ಸಕಾಯ ಮಲ್ತಿನ ಸೇವಾ ಟ್ರಸ್ಟ್

ಕಲ್ಲಡ್ಕದ ಸಚಿನ್ ನಾಗೇಶ್ ಕೊಟ್ಟಾರಿ ಮೆರೆನ ಕಿಡ್ನಿ ಕಸಿ ಮಲ್ಪೆರೆ ಪಣವುದ ಅವಶ್ಯಕತೆ ಇತ್ಂಡ್. ಈ ಸಮಯೊಡು ಕುಟುಂಬಸ್ದೆರ್ ಧಾನಿಲೆನ ಸಕಾಯ ಕೇನ್ ದ್ ಇತ್ತೆರ್.

ಉಂದೆಕ್ಕ್ ಸ್ಪಂದಿಸಾದ್ ಶ್ರೀ ಸಾಯಿ ಗಣೇಶ್ ಸೇವಾ ಟ್ರಸ್ಟ್ ಗೊಳ್ತಾ ಮಜಲ್ ಬೊಕ್ಕ ಎಂ ಆರ್ ಪಿ ಎಲ್ ಮ್ಯಾಕನಿಕಲ್ ಯಾರ್ಡ್ ಬಿಲ್ಡಂಗ್ ಮುಕುಲು ಪಣವುದ ಸಕಾಯನ್ ಮಲ್ತೆರ್. ಮೊಕುಲೆಗ್ ಸಚಿನ್ ನಾಗೇಶ್ ಕೊಟ್ಟಾರಿ ಕುಟುಂಬಸ್ದೆರ್ ಸೊಲ್ಮೆ ಸಂದೈತ ಮಲ್ತೆರ್.

2022 – 23 ನೇ ಸಾಲ್ ದ ನೀಲಾವರ ಮೇಳದ ಯಕ್ಷಗಾನ ಬಳ್ಮನೆ ಚರ್ತುಮುಖ ಬ್ರಹ್ಮ ಕ್ಷೇತ್ರ ಮಹಾತ್ಮೆ

ವಾಸ್ತುತಜ್ಞೆರ್, ಪ್ರಸಂಗಕರ್ತೆರ್, ಜ್ಯೋತಿಷ್ಯ ಚೂಡಾಮಣಿ ಪ್ರಶಸ್ತಿ ಪಡೆಯಿನ ಅಂಚನೆ ಭಾರತ ಭೂಷಣ ಅಂಚನೆ ಬಡವರತ್ನ ಪ್ರಶಸ್ತಿ ಬೊಕ್ಕ ಜೀವಮಾನ ಶ್ರೇಷ್ಠ ಸಾಧಕ ಅಂತರಾಷ್ಟ್ರೀಯ ಪ್ರಶಸ್ತಿ ಪುರಸ್ಕೃತೆರ್ ಡಾ| ರಾಜ್ ಕುಮಾರ್ ಸಕಲ ಕಲಾ ವಲ್ಲಭ ರಾಷ್ಟ್ರಪ್ರಶಸ್ತಿ ಪುರಸ್ಕೃತೆರ್ ಡಾ| ಕೆ. ಬಸವರಾಜ್ ಶೆಟ್ಟಿಗಾರ್ ಮೆರೆನ ಪುರಾಣ ಪ್ರಸಿದ್ಧವಾಯಿನ 64 ನೇ ಪ್ರಸಂಗ ಬಳ್ಮನೆ ಚರ್ತುಮುಖ ಬ್ರಹ್ಮ ಕ್ಷೇತ್ರ ಮಹಾತ್ಮೆ ಯಕ್ಷಗಾನ 2022 – 23 ನೇ ಸಾಲ್ ಡ್ ನೀಲಾವರ ಯಕ್ಷಗಾನ ಮೇಳದ ತಿರ್ಗಾಟೊಡು ಪ್ರದರ್ಶನ ಆಯರೆ ಉಂಡು.