ಕಾರ್ಲದ ಸುದ್ದಿ Karkala News

ಮಿಯ್ಯಾರು ಲವ-ಕುಶ ಜೋಡುಕರೆ ಕಂಬುಲಡ್ ಗೆಂದಿನ ಎರ್ಲೆನ ಪೊಲಬು

ಕಾರ್ಲ: ಮಿಯ್ಯಾರು ಕಂಬುಲ ಸಮಿತಿ ಬೊಕ್ಕ ನವೋದಯ ಗ್ರಾಮ ವಿಕಾಸ ಚಾರಿಟೇಬಲ್ ಟ್ರಸ್ಟ್ ಕುಡ್ಲ ಉಂದೆತ್ತ ಮುತಾಲಿಕೆಡ್ 19ನೇ ವರ್ಷದ ಮಿಯ್ಯಾರು ಲವ-ಕುಶ ಜೋಡುಕರೆ ಬಯಲು ಕಂಬುಲ ಇನಿ (ಜ.10) ಕಾಂಡೆ ಮುಗಿತಲ ಆಂಡ್.

ಕಂಬುಲ ಕೂಟಡ್ ಒಟ್ಟು 264 ಜತೆ ಎರುಕುಲು ಪಾಲ್ ಪಡೆದ್ ಮಿಯ್ಯಾರು ಕಂಬುಲ ಪೊಸ ದಾಖಲೆಗ್ ಸಾಕ್ಷಿ ಆಂಡ್.

ಗೆಂದಿನಕಲೆನ ಪೊಲಬು:
ಕನೆ ಪಲಯಿ:
ಸುರುತ: ಕಾಂತಾರ ಬೇಲಾಡಿಬಾವ ಅಶೋಕ್ ಶೆಟ್ಟಿ
ಪಲಯಿ ಮುಟ್ಟಿನಾರ್: ತೆಕ್ಕಟ್ಟೆ ಸುಧೀರ್ ದೇವಾಡಿಗ
ರಡ್ಡನೇ: ಬಾರ್ಕೂರು ಶಾಂತಾರಾಮ ಶೆಟ್ಟಿ
ಪಲಯಿ ಮುಟ್ಟಿನಾರ್: ಬೈಂದೂರು ಭರತ್

ಅಡ್ಡ ಪಲಯಿ:
ಸುರುತ: ನಾರಾವಿ ಯುವರಾಜ್ ಜೈನ್
ಪಲಯಿ ಮುಟ್ಟಿನಾರ್: ಭಟ್ಕಳ್ ಹರೀಶ್
ರಡ್ಡನೇ: ಹಂಕರ್‌ಜಾಲು ಶ್ರೀನಿವಾಸ ಭಿರ್ಮಣ್ಣ ಶೆಟ್ಟಿ
ಪಲಯಿ ಮುಟ್ಟಿನಾರ್: ತೆಕ್ಕಟ್ಟೆ ಸುಧೀರ್ ದೇವಾಡಿಗ

ಬಲ್ಲ್‌ದ ಮಲ್ಲ:
ಸುರುತ: ನಂದಳಿಕೆ ಶ್ರೀಕಾಂತ್ ಭಟ್ ಎ
ಗಿಡತಿನಾರ್: ಪಟ್ಟೆ ಗುರುಚರಣ್
ರಡ್ಡನೇ: ಕಾರ್ಲ ಜೀವನ್‌ದಾಸ್ ಅಡ್ಯಂತಾಯ ಎ
ಗಿಡತಿನಾರ್: ಮಿಜಾರು ಅಶ್ವಥಪುರ ಶ್ರೀನಿವಾಸ್ ಗೌಡ

ಬಲ್ಲ್‌ದ ಎಲ್ಯ:
ಸುರುತ: ಮಿಯ್ಯಾರು ಹಿಣಪಾಡಿ ಜಿನರಾಜ್ ಪಡಿವಾಳ್ ಬಿ.
ಗಿಡತಿನಾರ್: ಭಟ್ಕಳ ಶಂಕರ್
ರಡ್ಡನೇ: ನಕ್ರೆ ಮಹೋದರದ ಇಶಾನಿ ನಾರಾಯಣ ಭಂಡಾರಿ
ಗಿಡತಿನಾರ್: ಪಣಪೀಲು ಪ್ರವೀಣ್ ಕೋಟ್ಯಾನ್

ನಾಯೆರ್ ಮಲ್ಲ:
ಸುರುತ: ಮುಡಾರು ರಾಮೇರಗುತ್ತು ಹಾರ್ದಿಕ್ ಹರ್ಷವರ್ಧನ್ ಪಡಿವಾಳ್ ಎ
ಗಿಡತಿನಾರ್: ಬೈಂದೂರ್ ವಿವೇಕ್
ರಡ್ಡನೇ: ನಲ್ಲೂರು ಮೇಗಿನಮನೆ ಆಶಿಕ್ ದಿವಾಕರ ಶೆಟ್ಟಿ ಬಿ.
ಗಿಡತಿನಾರ್: ನಕ್ರೆ ಪವನ್ ಮಡಿವಾಳ್

ನಾಯೆರ್ ಎಲ್ಯ:
ಸುರುತ: ಮುನಿಯಾಲು ಉದಯ ಕುಮಾರ್ ಶೆಟ್ಟಿ
ಗಿಡತಿನಾರ್: ಪಟ್ಟೆ ಗುರುಚರಣ್
ರಡ್ಡನೇ: ಪಣೋಲಿಬೈಲ್ ಭಂಡಾರದ ಇಲ್ಲ್‌ದ ಶಿವಾನಂದ ಕುಲಾಲ್
ಗಿಡತಿನಾರ್: ಪಣಪೀಲು ಪ್ರವೀಣ್ ಕೋಟ್ಯಾನ್

ಬಿಗ್‌ಬಾಸ್ ದ ಗೌರವೊನು ತುಳು ಪಿಚ್ಚರ್‌ದ ಎಡ್ಡೆಗಾದ್ ಗಲಸುವೆ: ರೂಪೇಶ್ ಶೆಟ್ಟಿ

ಬಿಗ್‌ಬಾಸ್ ಸೀಸನ್ 9 ದ ವಿನ್ನರ್ ಪನ್ಪಿನವು ಮಾತ್ರ ಯನ್ನ ಸಾಧನೆ. ಬಿಗ್‌ಬಾಸ್‌ಡ್ ತಿಕಿನ ಪುದರ್‌ನ್, ಗೌರವೊನು ಯಾನ್ ದುಂಬುದ ದಿನಟ್ಟ್ ತುಳು ಚಿತ್ರರಂಗೊದ ಎಡ್ಡೆಪ್ಪುಗು ಗಲಸುವೆ ಪಂದ್ ಬಿಗ್‌ಬಾಸ್ ಸೀಸನ್ 9 ದ ವಿನ್ನರ್ ರೂಪೇಶ್ ಶೆಟ್ಟಿ ಪಂತೆರ್.

ತುಳು ಸಿನಿಮಾ ಕ್ಷೇತ್ರೊಡು ಅಂಚೆನೆ ರಿಯಾಲಿಟಿ ಷೋತ್ತ ಪೊರ್ತುಡು ತುಳುನಾಡ್‌ದ ಜನಕುಲು ಯಂಕ್ ಮಸ್ತ್ ಸಕಾಯ ಮಲ್ತ್‌ದೆರ್ ಪಂದ್ ಆರ್ ಪಂಡೆರ್.

ಏಷ್ಯನ್ ಅರಬ್ ಚೇಂಬರ್ ಆಫ್ ಕಾಮರ್ಸ್ ದ ಟ್ರೇಡ್ ಕಮಿಷನರ್ ಆದ್ ಮುಕ್ಕ ಸೀಫುಡ್ಸ್ ದ ಧಣಿ ಮುಹಮ್ಮದ್ ಹಾರಿಸ್ ನೇಮಕ

ಮುಲ್ಕಿ: ಕಡಲ ಉತ್ಪತ್ತಿದ ತೆನಸ್ (ಸೀಫುಡ್ಸ್ )ದ ಕ್ಷೇತ್ರೊಡು ಪೊಸ ಪೊಸ ತಂತ್ರಜ್ಞಾನ ಗಲಸ್ ದ್ ಪುಗರ್ತೆ ಪಡೆದಿನ ಉದ್ಯಮಿ, ಮುಕ್ಕ ಸೀಫುಡ್ಸ್ ಕಂಪೆನಿ ಆಡಳಿತ ನಿರ್ದೇಶಕೆರ್ ಕೆ. ಮುಹಮ್ಮದ್ ಹಾರಿಸ್ ಮೇರ್ ಏಷ್ಯನ್ ಅರಬ್ ಚೇಂಬರ್ ಆಫ್ ಕಾಮರ್ಸ್(ಎಎಸಿಸಿ) ದ ಟ್ರೇಡ್ ಕಮಿಷನರ್ ಆದ್ ನೇಮಕ ಆತೆರ್.

ದೋಹಾಡ್ ಕೇಂದ್ರ ಕಚೇರಿ ಉಪ್ಪುನ ಎಎಸಿಸಿದ ಅಧ್ಯಕ್ಷೆರ್ ಸಾದ್ ಅಲ್ ದಬ್ಬಾಗ್ ಮೇರ್, ಹಾರಿಸ್ ಮೆರೆನ ಸೀಫುಡ್ ಎಕ್ಸ್ ಪೋರ್ಟ್ ದ ಸಾಧನೆಗ್ ಬಿಲೆ ಕೊರ್ದು ಕರ್ನಾಟಕ ದ ಟ್ರೇಡ್ ಕಮಿಷನರ್ ಆದ್ ಆಯ್ಕೆ ಮಲ್ದೆರ್.

ಕೆ.ಮುಹಮ್ಮದ್ ಹಾರಿಸ್ ಮೇರ್ ಕುಡ್ಲದ‌ ಪ್ರತಿಷ್ಠಿತ ಮುಕ್ಕ ಸೀಫುಡ್ಸ್ ಎಕ್ಸ್ ಪೋರ್ಟ್ ದ ಆಡಳಿತ ನಿರ್ದೇಶಕೆರ್. ಅಂಚೆನೆ ಇಂಟರ್ ನ್ಯಾಷನಲ್ ಲಾಜಿಸ್ಟಿಕ್ಸ್ ಕಂಪೆನಿ ಶಿಪ್ ವೇವ್ಸ್ ದ ಸಹ ಸ್ಥಾಪಕೆರ್.

ವಿಶ್ವ ಮಟ್ಟೊಡು ಆಮದು ಬೊಕ್ಕ ರಫ್ತು ಕ್ಷೇತ್ರಡ್ ಕ್ಲೌಡ್ ಬೊಕ್ಕ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ತಂತ್ರಜ್ಞಾನ ಗಲಸ್ ದ್ ಯಶಸ್ವಿ ಆತೆರ್.

ಭಾರತ ದೇಶೋಡೇ ಸುರೂತ್ತ ಸರ್ತಿ ಸ್ಟೀಮ್ ಸ್ಟೆರಿಲೈಸ್ ಡ್ (ಸೀಕ್ ಬರಂದಿನ) ಫಿಶ್ ಮೀಲ್ ಕಂಪೆನಿ ಸ್ಥಾಪನೆ ಮಲ್ತ್ ದ್ ಬೇತೆ ಬೇತೆ ಕಡೆಟ್ಟ್ 8 ಘಟಕಲೆನ್ ಸ್ಥಾಪನೆ ಮಲ್ದೆರ್. ಇತ್ತೆ ಮುಕ್ಕ ಸೀಫುಡ್ಸ್ ಕಂಪೆನಿ ಜಗತ್ತ್ ದ ಮಾಮಲ್ಲ‌ ಕಂಪೆನಿಯಾದ್ ಬುಳೆದ್ ವರ್ಷೊಗು 600 ಕೋಟಿ ರೂ. ವೈವಾಟ್ ಮಲ್ಪುಂಡು.

ಸಾಮಾಜಿಕ ಸೇವಾ ಕ್ಷೇತ್ರೊಡುಲ ಸಕ್ರಿಯವಾದ್ ಸೇವೆ ಮಲ್ತೊಂದುಪ್ಪುನ ಹಾರಿಸ್ , ಮಲ್ಲ ಮಲ್ಲ ಸಮಾಜ ಸೇವಾ ಸಂಸ್ಥೆಲು ಅಂಚೆನೆ ವಾಣಿಜ್ಯ ಸಂಘಟನೆಲೆಡ್ ಗೌರವದ ಸ್ಥಾನೊಡು ಉಲ್ಲೆರ್.

Mukka Seafoods proprietor Muhammad Harries has been appointed as trade commissioner of Asian Arab Chamber of Commerce

Mulki: Entrepreneur Muhammad Harries has niched a place for himself in the field of sea food manufacturing and storage with his innovative technique and enterprise.

Mukka Seafoods company of which he is the MD isreputed for its seafood products.
He has now been appointed as the trade commissioner of Asian Arab Chamber of Commerce.

The AACOC with headquarters at Doha has Saad Al Dabba as it’s president. Appreciating Harries achivement in the field of sea foods export he has been appointed as Trade commissioner for Karnataka. Muhammad Harries is also co founder of Ship Waves an international logistics company.

He has also pioneered successfully the use of cloud technology and artificial intelligence in the field of exports and imports on an international level. He is the first person to introduce steam sterilised fish mill company in India with eight units set up all over India.Mukka seafoods has a turnover of 600 crores .

He is also well known for his social work and is in a honorary postion of many social service and commercial associations.

ಕಂಬುಲದ ಉಸೇನ್ ಬೋಲ್ಟ್ ಶ್ರೀನಿವಾಸ ಗೌಡ ಇತ್ತೆ ಬಂಗಾರ್‌ದ ಮಾಡೆಲ್

ಕುಡ್ಲ: ಕಂಬುಲ ಕ್ಷೇತ್ರದ ಉಸೇನ್ ಬೋಲ್ಟ್ ಪುಗರ್ತೆದ ಶ್ರೀನಿವಾಸ ಗೌಡ ಇತ್ತೆ ಮಾಡೆಲಿಂಗ್ ಕ್ಷೇತ್ರಡ್ ಮಿನ್ಕೊಂದುಲ್ಲೆರ್.

ತುಳುನಾಡ್‌ದ್ ಪಚ್ಚೆ ಪಜಿರ್‌ದ ಪರಿಸರಡ್ ಬಲ್ಪುನ ಎರುಕ್ಲೆನ ಒಟ್ಟುಗು ಬಂಗಾರ್ ಪಾಡ್ದ್ ತೆಲ್ತೊಂದು ಉಂತಿನ ಶ್ರೀನಿವಾಸ ಗೌಡ ಮೆರೆನ ಮಲ್ಲ ಮಲ್ಲ ಪ್ಲೆಕ್ಸ್‌ಲು ತುಳುನಾಡ್‌ಡ್ ತೋಜಿದ್ ಬರೊಂದು ಉಂಡು. ಉಂದು ಆಭರಣ ಜ್ಯುವೆಲ್ಲರ್ಸ್ ದಕ್ಲೆನ ಜಾಹಿರಾತುಗಾದ್ ಕೊರ್ತಿನ ಫ್ಲೆಕ್ಸ್ ಆದ್ ಉಂಡು.

ಸಂಪ್ರದಾಯದ ಒರುಟ್ಟು ಸುರುವಾಂಡ್ ಮುಲ್ಕಿ ಸೀಮೆದ ಅರಸು ಕಂಬುಲ

ಪಡುಪಣಂಬೂರು: ತುಳುನಾಡ್ ದ ಮಾಮಲ್ಲ ಆಚರಣೆ ಆದುಪ್ಪುನ ಕಂಬುಲೊಗು ಪ್ರಾಣಿ ದಯಾ ಸಂಘದಕುಲು ಒವ್ವೇ ರೀತಿದ ಅಡ್ಡಿ ಮಲ್ಪಂದೆ ನಮ್ಮ ಸಂಸ್ಕೃತಿ, ಸಂಪ್ರದಾಯದ ಕಂಬುಲ ಸಾಂಗವಾದ್ ನಡಪರೆ ಅವಕಾಶ ಮಲ್ತ್ ಕೊರೊಡು ಪಂದ್ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಅನುವಂಶಿಕ ಮೊಕ್ತೇಸರೆರ್ ಮನೋಹರ ಶೆಟ್ಟಿ ಪಂಡೆರ್.

ಮುಲ್ಕಿ ಅರಸು ಕಂಬುಲದ ಉದಿಪನ ಮಲ್ತ್ ದ್ ಬೊಕ್ಕ ನಡತಿನ ಸಭಾ ಕಾರ್ಯಕ್ರಮೊಡು ಪಾತೆರಿಯೆರ್.

ತುಳುನಾಡ್ ದ ಪರಂಪರೆ ನಿರಂತರವಾದ್ ನಡತೊಂದುಪ್ಪಡ್ ಪಂದ್ ಕೊಲೆಕಾಡಿ ವೇದಮೂರ್ತಿ ವಾದಿರಾಜ ಉಪಾಧ್ಯಾಯೆರ್ ಪಂಡೆರ್.

ಬಪ್ಪನಾಡ್ ಕ್ಷೇತ್ರದ ಅರ್ಚಕೆರ್ ನರಸಿಂಹ ಭಟ್, ಪ್ರಸಾದ್ ಭಟ್, ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಭುವನಾಭಿರಾಮ ಉಡುಪ, ಸಸಿಹಿತ್ಲು ಭಗವತಿ ಕ್ಷೇತ್ರದ ಅಪ್ಪು ಯಾನೆ ಶ್ರೀನಿವಾಸ ಪೂಜಾರಿ, ಉಳೆಪಾಡಿ ಕ್ಷೇತ್ರದ ಧರ್ಮದರ್ಶಿ ಮೋಹನ್ ದಾಸ್ ಸುರತ್ಕಲ್, ಧರ್ಮಗುರು ವಿನಯ ಲಾಲ್ ಬಂಗೇರ, ಕದಿಕೆ ಮಸೀದಿದ ಖತೀಬೆರ್ ಪಿ.ಎ.ಅಬ್ದುಲ್ ಜೈನಿ ಮೊಕುಲು ಮಾತ ಇತ್ತೆರ್.

ಮಲ್ಲ ಬಿನ್ನೆರಾದ್ ಜಾಗತಿಕ ಬಂಟರ ಸಂಘದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ, ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ಯುವ ನಾಯಕೆರ್ ಮಿಥುನ್ ರೈ, ವಸಂತ ಬೆರ್ನಾಡ್, ಬಿಜೆಪಿ ಜಿಲ್ಲಾಧ್ಯಕ್ಷೆರ್ ಸುದರ್ಶನ್ ಬೆದ್ರ, ಕಸ್ತೂರಿ ಪಂಜ, ಸುನಿಲ್ ಆಳ್ವ, ಗುಣಪಾಲ ಕಡಂಬ,
ಕರ್ಂಬಿತ್ತ್ ಲ್ ಚಂದ್ರಹಾಸ ಶೆಟ್ಟಿ, ಜನಾರ್ದನ ಪಡುಪಣಂಬೂರು, ಸಮಿತಿದ ಉಪಾಧ್ಯಕ್ಷೆರಾಯಿನ ಶಶೀಂದ್ರ ಸಾಲ್ಯಾನ್, ದಿನೇಶ್ ಸುವರ್ಣ ಬೆಳ್ಳಾಯರು, ಮಹೀಮ್ ಹೆಗ್ಗಡೆ, ಜತೆ ಕಾರ್ಯದರ್ಶಿ ಎಂ.ಕೆ.ಹೆಬ್ಬಾರ್ , ಶರತ್ ಶೆಟ್ಟಿ ಮೊಕುಲು ಮಾತ ಇತ್ತೆರ್. ಬಳ್ಕುಂಜೆ ಗುತ್ತು ಗುತ್ತಿನಾರ್ ರವೀಂದ್ರ ಶೆಟ್ರ್ ಅಧ್ಯಕ್ಷತೆ ಒಯಿಸ್ ದಿತ್ತೆರ್.

ಮುಲ್ಕಿ ಅರಸು ಕಂಬುಲ ಸಮಿತಿದ ಅಧ್ಯಕ್ಷೆರ್ ಕಿರಣ್ ಕುಮಾರ್ ಶೆಟ್ಟಿ ಕೊಲ್ನಾಡುಗುತ್ತು ಬಿನ್ನೆರೆನ್ ಎದ್ಕೊಂಡೆರ್. ನವೀನ್ ಎಡ್ಮೆಮಾರ್ ನಿರೂಪಣೆ ಮಲ್ತೆರ್. ಉಪಾಧ್ಯಕ್ಷೆರ್ ವಿನೋದ್ ಸಾಲ್ಯಾನ್ ಸೊಲ್ಮೆ ಸಂದಾಯೆರ್.

ಇಂಚ ಸುರುವಾಂಡ್ ಕಂಬುಲ

ಮುಲ್ಕಿ ಅರಸುಲೆ ಕಂಬುಲೊಗು ಐತಾರ ಬೊಲ್ಪುಗು ಸಂಪ್ರದಾಯಿಕವಾದ್ ಚಾಲನೆ ತಿಕ್ಂಡ್. ಜಾಗೆದ ನಾಗ ಬೆರ್ಮೆರೆಗ್ ಪೂಜೆ ಮಲ್ತ್ ದ್ ಶ್ರೀ ಚಂದ್ರನಾಥ ಸ್ವಾಮಿ ಪದ್ಮಾವತಿ ಅಮ್ಮನ ಗುಡಿಟ್ಟ್ ಪೂಜೆ ಮಲ್ತ್ ದ್ ಅಲ್ತ್ ರ್ದ್ ಪ್ರಸಾದ ಕನತ್ ದ್ ಅರಮನೆಕ್ಕ್ ಬತ್ತ್ ದ್ ಧರ್ಮಚಾವಡಿಗ್ ಬತ್ತ್ ದ್ ಅರಸೆರ್ಡ ಕಂಬುಲೊಗು ಅನು ದೆತೊಂದು ಎರು ಬಂಟ ದೈವೊಲೆನ ನಲಿಕೆ ಸಮೇತ ಚೆಂಡೆ, ವಾದ್ಯ , ಬ್ಯಾಂಡ್ , ಕೊಂಬುದ ಮೆರವಣಿಗೆ ಸಮೇತ ಕಂಬುಲದ ಪಡ್ಡಾಯಿ ಬೊಕ್ಕ ಮೂಡಾಯಿ ಕರೆಕ್ಕ್ ಪ್ರಸಾದ್ ಪಾಡ್ದ್ ಕಂಬುಲೊಗು ಚಾಲನೆ ಕೊರಿಯೆರ್. ಅವೆರ್ದ್ ಬೊಕ್ಕ ಬಪ್ಪನಾಡು ಬಡಗುಹಿತ್ಲು ದಿ.ಕಾಂತು ಪೂಜಾರಿ ಯಾನೆ ಸೇವೆಗಾರ ಮನೆತನದ ಎರ್ಲೆನ್ ಸುರೂಕ್ಕು ಕರೆಕ್ಕ್ ಜಪುಡಾದ್ ಬೊಕ್ಕ ಅರಸು ಮನೆತನದ ಎರ್ಲು ಕರೆಕ್ಕ್ ಜಪ್ಪುನ ಮುಕೇನ ಕಂಬುಲ ಸುರುವಾಂಡ್. ಮಧ್ಯಾಹ್ನ ಮುಟ್ಟ 125 ಜತೆ ಎರ್ಲು ಕಂಬುಲೊಡು ಪಾಲ್ ಪಡೆದಿತ್ತ.

ಜ.8: ಬೈಲು ಮೂಡುಕರೆ ಕುಟುಮದ ಪೊಸ ಇಲ್ಲದ ಇಲ್ಲ್ ಒಕ್ಕೆಲ್

ಗುರುಪುರ: 300 ವರ್ಷದ ಪರಪೋಕು ಇಪ್ಪುನ ಬೈಲುಮೂಡುಕರೆ ಕುಟುಮದ ಪೊಸ ಇಲ್ಲದ ಇಲ್ಲ್ ಒಕ್ಕೆಲ್ ಜನವರಿ 7 ಬೊಕ್ಕ 8 ತಾರೀಕ್‌ಗ್ ಭಾರೀ ಗೌಜಿಡ್ ನಡಪರೆ ಉಂಡು.

ಈ ಬಗೆಟ್ಟ್ ಇನಿ ಬೈಲುಮೂಡುಕರೆ ಇಲ್ಲಡ್ ನಡತಿನ ಪತ್ರಿಕಾಗೋಷ್ಠಿಡ್ ಬೈಲುಮೂಡುಕರೆ ಇಲ್ಲದ ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಶೆಡ್ಯೆ ಮಂಜುನಾಥ ಭಂಡಾರಿ ಪಾತೆರ್ದ್, 300 ವರ್ಷದ ಪರಪೋಕು ಇಪ್ಪುನ ಈ ಇಲ್ಲ್‌ನ್ 17 ನೇ ಶತಮಾನಡ್ ನಿರ್ಮಾಣ ಮಲ್ತ್‌ದಿತ್ತೆರ್.

ಬೈಲು ಮೂಡುಕರೆ ಕುಟುಮ ಬಂಟ ಸಮಾಜಡ್ ಪ್ರತಿಷ್ಠಿತ ತಾನೊನು ಪಡೆಪುಂಡ್. ಈ ಕುಟುಮದಕುಲು ಸತ್ಯವಂತೆರ್, ಸಾಹಸಿಲು, ದಾನಿಲು ಅಂಚನೆ ಬೆನ್ಪುನಕುಲು ಆತೆರ್. ಮೊಕುಲು ದೈವದ ಬಗ್ಗೆ ನಂಬುದಿತ್ತ್‌ದ್ ಅಕ್ಲೆನ ಸ್ವಂತ ನಿಲೆಟ್ಟ್ ದೇವಸ್ಥಾನ, ದೈವಸ್ಥಾನ, ದೈವದ ಚಾವಡಿ, ನಾಗಬನ ಉಂದೆನ್ ಪೂರ ನಿರ್ಮಾಣ ಮಲ್ತ್‌ದ್ ಊರುದಕುಲು ಪೂಜೆ ಮಲ್ತೊಂದು ಬರೊಂದುಲ್ಲೆರ್.

ಈ ಇಲ್ಲಡ್ ಕಲ್ಲ್‌ದ ಕಂಬ, ಮಣ್ಣ್‌ದ ಗೋಡೆ, ನಾಲ್ ಸುತ್ತಲ ಪಾಗಾರ, ಲ ಕೊಟ್ಯ ಉಂಡು. ಇಲ್ಲದ ಎದುರು ಮಲ್ಲ ಕೆರೆ, ನಾಲ್ ಸುತ್ತಲ ಬಾರ್ ಬುಳೆಪುನ ಕಂಡ, ನಾಗ ಬನ, ಮಾಗಣೆದ ಎದುರು ದೈವದ ತಾನೊ ಉಂಡು. ಆಯತ ಆಕಾರಡ್ ಇಪ್ಪುನ ಈ ಇಲ್ಲದ ಮಿತ್ತ ಮಾಳಿಗೆಡ್ 7 ಕೋಣೆಲು, ಚಾವಡಿಡ್ ಮಲ್ಲ ಪಿರಾಕ್‌ದ ಉಯ್ಯಾಲೆ ಉಂಡು. ಪಿರಾವುದ ಕಾಲಡ್ ರಾಜ ವಂಶಸ್ಥೆರೆನ ಇಲ್ಲಡ್ ಮಾತ್ರ ಇಂಚಿನ ಉಯ್ಯಾಲೆ ಇಪ್ಪರೆ ಸಾಧ್ಯ ಪಂದ್ ಪಂಡೆರ್.

ಜ.8 ತಾರೀಕ್‌ಗ್ ಕಾಂಡೆ 11.30 ಗ್ ಬೈಲುಮೂಡುಕರೆ ದಿ| ಚಂದ್ರಶೇಖರ ಶೆಟ್ಟಿ ವೇದಿಕೆಡ್ ಬೈಲುಮೂಡುಕರೆ ಇಲ್ಲದ ಸಾಧಕೆರೆಗ್ ಮಾನಾದಿಗೆ ಮಲ್ಪುನ ಲೇಸ್ ನಡಪರೆ ಉಂಡು. ಗುರುಪುರ ವಜ್ರದೇಹಿ ಮಠದ ರಾಜಶೇಖರಾನಂದ ಸ್ವಾಮೀಜಿ ಆಶೀರ್ವಚನ ಮಲ್ಪರೆ ಉಲ್ಲೆರ್. ಕುಡ್ಲ ಉತ್ತರ ಶಾಸಕೆರ್ ವೈ.ಭರತ್ ಶೆಟ್ಟಿ, ಆಳ್ವಾಸ್ ಎಜುಕೇಶನ್ ಫೌಂಡೇಶನ್ ದ ಡಾ| ಎಂ.ಮೋಹನ್ ಆಳ್ವ, ವಿಧಾನ ಪರಿಷತ್ ಸದಸ್ಯೆರ್ ಮಂಜುನಾಥ ಭಂಡಾರಿ, ಜಾಗತಿಕ ಬಂಟರ ಸಂಘದ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ ಸೇರಿನಂಚನೆ ಮಸ್ತ್ ಬಿನ್ನೆರ್ ಲೇಸ್‌ಡ್ ಪಾಲ್ ಪಡೆಯರೆ ಉಲ್ಲೆರ್.

ಪತ್ರಿಕಾಗೋಷ್ಠಿಡ್ ಶೆಡ್ಯೆ ಮಂಜುನಾಥ್ ಭಂಡಾರಿ ಬೈಲು ಮೂಡುಕರೆ, ಹರೀಶ್ ಶೆಟ್ಟಿ, ದೇವದಾಸ ನಾಯ್ಕ್, ಸತೀಶ್ ಆಳ್ವ, ಭುಜಂಗ ಶೆಟ್ಟಿ ಇತ್ತೆರ್.