ಉಡುಪಿದ ಸುದ್ದಿ | Udupi News

ಅ.15: ಮಾರ್ನೆಮಿದ ಲೆಕ್ಕೊಡು ನವಶಕ್ತಿ ವೈಭವ ವೇಷ-ಭೂಷಣ, ನೃತ್ಯ ರೂಪಕ ಪಂತೊ

ಒಡಿಪು: ಕಾಪು ಶ್ರೀ ಹೊಸ ಮಾರಿಗುಡಿ ದೇವಲ್ಯದ ಅಭಿವೃದ್ಧಿ ಸಮಿತಿದ ಮುತಾಲಿಕೆಡ್ ಮಾರ್ನೆಮಿ ಉಚ್ಚಯದ ಲೆಕ್ಕೊಡು ನವಶಕ್ತಿ ವೈಭವ ವೇಷ-ಭೂಷಣ /ನೃತ್ಯ ರೂಪಕ ಪಂತೊ ಅ.15 ಐತಾರ ಬೊಲ್ಪುಗು 9 ಗಂಟೆಗ್ ದೇವಲ್ಯದ ನವದುರ್ಗಾ ಮಂಟಪಡ್ ಉದಿಪನ ಆಯೆರೆ ಉಂಡು.

ಈ ಪಂತೊದ ನಿಯಮಲು:

•ಪಾಲ್ ಪಡೆಪುನ ಕೂಟಡ್ 9 ಜನ ಸ್ಪರ್ಧಿಲು ಕಡ್ಡಾಯವಾದ್ ಇಪ್ಪೊಡು.
•ಮಾರ್ನೆಮಿ ವೈಭವ ಇಪ್ಪುನ ನವ ದುರ್ಗೆಯೆರೆನ ಪಾತ್ರ ಮಲ್ಪರೆ ಮಾತ್ರ ಅವಕಾಶ.
•ಅಕ್ಲೆಗ್ ಬೋಡಾಯಿನ ವೇಷ-ಭೂಷಣ, ಪರಿಕರನ್ ಅಕುಲೇ ಕನವೊಡು.
•ತೂ ಅತ್ತ್ಂಡ ಒವ್ವೇ ತೊಂದರೆ ಆಪಿನ ಸೊತ್ತುಲೆನ್ ಗಲಸರೆ ಇಜ್ಜಿ.
•ಪಾಲ್ ಪಡೆಪುನ ಕೂಟದಕುಲು ತನ್ನ ಕೂಟದ 9 ಜನತ್ತ ಪುದರ್ ನ್ ದುಂಬೇ ಬರೆಪಾವೊಡು.
•ನವದುರ್ಗಾ ವೈಭವ ಇಪ್ಪುನ ವೇಷ-ಭೂಷಣ, ನೃತ್ಯ-ರೂಪಕ ಬೊಕ್ಕ ಆಟದ ವೇಷಗ್ ಮಾತ್ರ ಅವಕಾಶ ಉಂಡು.
•ಒವ್ವೇ ಧಾರ್ಮಿಕ ಭಾವನೆ, ವಿಚಾರ ಬೊಕ್ಕ ನಂಬಿಕೆಗ್ ಅಪಹಾಸ್ಯ ಮಲ್ಪುನಂಚಿನ ಚಟುವಟಿಕೆಗ್ ಅವಕಾಶ ಇಜ್ಜಿ.
•ಪಾಲ್ ಪಡೆಪುನ ಕೂಟಗ್ 8 + 1 ನಿಮಿಷ ಮಾತ್ರ ಅವಕಾಶ.
•ಪಾಲ್ ಪಡೆಪುನ ಮಾತ ಕೂಟದಕಲೆಗ್ ನೆಂಪು ಕಾಣಿಕೆ ಸ್ಮರಣಿಕೆ ಬೊಕ್ಕ ಅಮ್ಮನ ಅನುಗ್ರಹ ಪ್ರಸಾದ ಬೊಕ್ಕ ಸುರುತ್ತ, ರಡ್ಡನೇ, ಮೂಜಿನೇ ತಾನ ಪಡೆಯಿನ ಕೂಟಲೆಗ್ ನಗದು ಇನಾಮುನ್ ಕೊರ್ದು ಮಾನಾದಿಗೆ ಮಲ್ಪರೆ ಉಂಡು.
•ಪಾಲ್ ಪಡೆಪುನ ಕೂಟಲು ದೇವಲ್ಯದ ಅಭಿವೃದ್ಧಿ ಸಮಿತಿದ ಕಚೇರಿ ಡ್ ಅತ್ತಂಯಡ ದೂರವಾಣಿ ಮುಖೇನ ಸಂಪರ್ಕ ಮಲ್ತ್ ದ್ ನೊಂದಣಿ ಮಲ್ಪೊಲಿ.
•ಪಾಲ್ ಪಡೆಪುನ ಕೂಟಲು ಅಕ್ಟೋಬರ್ 9 ತ್ತೊಲಯಿ ಕೂಟದ ಪುದರ್ ನ್ ನೊಂದಣಿ ಮಲ್ಪೊಡು.
•ಸಂಘಟಕೆರೆನ /ತೀರ್ಪುಗಾರೆರೆನ ತೀರ್ಮಾನವೇ ಅಕೇರಿ.
•ಎಚ್ಚದ ಪೊಲಬುಗಾದ್ 9481550999 ನಂಬರ್ ಸಂಪರ್ಕ ಮಲ್ಪೊಲಿ

ಕಟಪಾಡಿ-ಅರಸಿನ ಕಟ್ಟೆದ ಮಾರ್ಗ ಸರಿ ಮಲ್ಪರೆ ಒಡಿಪು ತುಳುನಾಡ ರಕ್ಷಣಾ ವೇದಿಕೆದ ಆಗ್ರಹ

ಒಡಿಪು: ಕಟಪಾಡಿರ್ದ್ ಅರಸಿನ ಕಟ್ಟೆ ಪೋಪಿನ ಮಾರ್ಗಡ್ ಉಂಡು. ಈ ಮಾರ್ಗದ ರಡ್ಡ್ ಬರಿಟ್ಟ್ ಗಾಡಿಲು ಎದುರು ಬದುರಾಂಡ ಒವು ಅಡ್ಡ ಗಾಡಿ ಬೂರುಂಡಾ ಪನ್ಪಿನ ಪೋಡಿಗೆ ಆಪುಂಡು. ಡಾಂಬರ್‌ ಮಾರ್ಗದ ಬರಿಟ್ಟ್ ಅವೆತೊ ಪ್ರಮಾಣದ ಕಚ್ಚಾ ಮಾರ್ಗದ ಮಣ್ಣ್ ಪೋದು ಗುಂಡಿ ಆತ್ಂಡ್. ನೆನ್ ಸರಿ ಮಲ್ಪುನ ಬೇಲೆ ನನಲ ಆತಿಜಿ. ಅತ್ತಂದೆ ಈ ಜಾಗೆಡ್ ಸುಮಾರ್ ಆಕ್ಸಿಡೆಂಟ್ ಆದ್, ಸೈತಿನ ಘಟನೆಲ ಉಂಡು. ಗಾಡಿ ಸವಾರೆರ್ ತನ್ನ ಜುವದ ಪೋಡಿಗೆಡೇ ಪೋವೊಡಾಪುಂಡು. ಪ್ರತಿ ದಿನಲ ಒಂಜತ್ಂಡ ಒಂಜಿ ಆಕ್ಸಿಡೆಂಟ್ ಘಟನೆಲು ನಡತೊಂದು ಉಂಡು. ಸಾರ್ವಜನಿಕೆರೆನ ದೂರುದ ಬಗೆಟ್ಟ್ ಜಾಗೆಗ್ ಭೇಟಿ ಕೊರ್ದು, ತುಳುನಾಡ ರಕ್ಷಣಾ ವೇದಿಕೆ ಕೇಂದ್ರೀಯ ಅಧ್ಯಕ್ಷೆರ್, ಸಂಬಂಧ ಪಟ್ಟಿನ ಇಲಾಖೆ ಅಧಿಕಾರಿಲು ಕೂಡ್ಲೆ ಮಾರ್ಗ ದುರಸ್ತಿ ಕಾರ್ಯಗ್ ದುಂಬಾವೊಡು ಪಂದ್ ಅಗ್ರಹ ಮಲ್ತೆರ್. ಇಜ್ಜಿಂಡ ನನದ ದಿನಟ್ಟ್ ಪ್ರತಿಭಟನೆ ಮಲ್ಪುನ ಅನಿವಾರ್ಯ ಆಪುಂಡು ಪಂದ್ ಎಚ್ಚರಿಕೆ ಕೊರಿಯೆರ್. ಜನಕ್ಲೆನ ಪ್ರಾಣದೊಟ್ಟಿಗೆ ಗೊಬ್ಬುನೆನ್ ತೂವೊಂದು ಮನಿಪಂದೆ ಇಪ್ಪೆರೆ ಸಾಧ್ಯ ಇಜ್ಜಿ ಪಂದ್ ಒಡಿಪು ತುಳುನಾಡ ರಕ್ಷಣಾ ವೇದಿಕೆ ಮುಖಂಡೆರ್ ಆಗ್ರಹ ಮಲ್ತೆರ್.

ಈ ಪೊರ್ತುಡು ಕೇಂದ್ರೀಯ ಮಂಡಳಿ ಅಧ್ಯಕ್ಷೆರೆನೊಟ್ಟಿಗೆ ಒಡಿಪು ಜಿಲ್ಲಾ ವೀಕ್ಷಕೆರ್ ಫ್ರಾಂಕಿ ಡಿಸೋಜಾ, ಪ್ರಶಾಂತ್ ಭಟ್ ಕಡಬ, ಮಹಿಳಾ ಘಟಕ ಅಧ್ಯಕ್ಷೆರ್ ಶೋಭಾ ಪಾಂಗಳ, ಸಲಹೆಗಾರೆರ್ ಸುಧಾಕರ ಅಮೀನ್, ಉಪಾಧ್ಯಕ್ಷೆರ್ ಜಯರಾಮ ಪೂಜಾರಿ, ಯುವ ಘಟಕ ತತ್ವ ರಾಹುಲ್ ಸುನಂದ ಟೀಚರ್, ವಿಜಯಲಕ್ಷ್ಮಿ, ಗುಣವತಿ, ಶಾಂಭವಿ, ನಂದನ, ಗುಲಾಬಿ, ಸುಮತಿ, ಲಕ್ಷ್ಮಿ, ರೇಣುಕಾ, ಶೋನ್ ಡಿಸೋಜ, ಗೈಟನ್ ಡಿಸೋಜ, ಮಹಿಳಾ ಘಟಕ ಪ್ರಧಾನ ಕಾರ್ಯದರ್ಶಿ ನಾಗಲಕ್ಷ್ಮಿ ಪಾಲ್ ಪಡೆದಿತ್ತೆರ್.

ಅ.10: ಒಡಿಪುದ ಎಮ್ ಜಿ.ಎಂ ಕಾಲೇಜ್ ಮೈದಾನಡ್ ಹಿಂದೂ ಸಮಾಜೋತ್ಸವ

ವಿಶ್ವ ಹಿಂದು ಪರಿಷದ್ ಬಜರಂಗದಳ ಒಡಿಪು ಜಿಲ್ಲೆದ ದುಂಬಾತ್ತಿಗೆಡ್ ಅ.10 ಅಂಗಾರೆ ಒಡಿಪುದ ಎಮ್ ಜಿ.ಎಂ ಕಾಲೇಜ್ ಮೈದಾನಡ್ ಹಿಂದೂ ಸಮಾಜೋತ್ಸವ ನಡಪರೆ ಉಂಡು.

ಈ ಶೌರ್ಯ ಜಾಗರಣಾ ರಥಯಾತ್ರೆ ಪಂಡಿತ್ ಧೀರೇಂದ್ರ ಕೃಷ್ಣ ಶಾಸ್ತ್ರಿಲೆನ ಮುತಾಲಿಕೆಡ್ ಮುತಾಲಿಕೆಡ್ ನಡಪರೆ ಉಂಡು. ಈ ಲೇಸ್ ಡ್ ಮಾತ ಹಿಂದೂ ಬಾಂಧವೆರ್ ಪಾಲ್ ಪಡೆವೊಡು ಪಂದ್ ವಿಶ್ವ ಹಿಂದು ಪರಿಷದ್ ಬಜರಂಗದಳ ಒಡಿಪು ಎಗ್ಗೆದ ಪದುಕೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಬಿಲ್ಲವ ಸಮಾಜದ ಹಿರಿಯೆರ್ ರಾಘವ ಎ ಸುವರ್ಣ ನನ ನೆಂಪು ಮಾತ್ರ

ಮುಲ್ಕಿದ ಕೆಎಸ್ ರಾವ್ ನಗರ ನಿವಾಸಿ ರಾಘವ ಎ ಸುವರ್ಣ (80) ಹುಷಾರ್ ದಾಂತೆ (ಸುಕ್ರಾರ) ಇನಿ ಬೊಲ್ಪುಗು ದೇವೆರೆ ಪಾದ ಸೇರಿಯೆರ್.

ಮೆರೆಗ್ ಬೊಡೆದಿ, ಒರಿ ಮಗೆ ಬೊಕ್ಕ ಮೂಜಿ ಮಗಲ್ ನಕುಲು ಉಲ್ಲೆರ್.

ಮೇರ್ ಮುಲ್ಕಿ ಕೆಎಸ್ ರಾವ್ ನಗರದ ಬಿಲ್ಲವ ಸಮಾಜ ಸೇವಾ ಸಂಘದ ಗುರ್ಕಾರೆಯಾದ್, ಮಾನಾದಿಗೆದ ಗುರ್ಕಾರೆಯಾದ್ ಸೇವೆ ಸಂದಾವೊಂದು ಇತ್ತೆರ್.

ಕರಿನ ಸುಮಾರ್ ವರ್ಷೊದ ಪಿರವು ಪುಗರ್ತೆದ ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಸದಸ್ಯೆರಾದ್, ಭಜನಾ ಮಂಡಳಿದ ಸದಸ್ಯೆರಾದ್ ಸೇವೆ ಸಂದಾದೆರ್.

ಮೆರೆನ ನಿಧನೊಗು ಶಾಸಕೆರ್ ಉಮಾನಾಥ ಕೋಟ್ಯಾನ್, ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ಮಿಥುನ್ ರೈ, ವಸಂತ ಬೆರ್ನಾಡ್, ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಗುರ್ಕಾರೆ ಪ್ರಕಾಶ್ ಸುವರ್ಣ, ಮಾಜಿ ಗುರ್ಕಾರೆರಾಯಿನ ರಮೇಶ್ ಅಮೀನ್ ಕೊಕ್ಕರಕಲ್, ಗೋಪಿನಾಥ ಪಡಂಗ, ಡಾ.ಹರಿಶ್ಚಂದ್ರ ಸಾಲ್ಯಾನ್, ಕಿಶೋರ್ ಸಾಲ್ಯಾನ್, ನರಸಿಂಹ ಪೂಜಾರಿ, ಗಿರಿಧರ ಅಮೀನ್, ಸತೀಶ್ ಕಿಲ್ಪಾಡಿ, ಕೆಎಸ್ ರಾವ್ ನಗರ ಬಿಲ್ಲವ ಸಂಘದ ಗುರ್ಕಾರೆ ಮಹಾಬಲ ಸನಿಲ್, ಉಪಾಧ್ಯಕ್ಷೆರ್ ಹರಿಶ್ಚಂದ್ರ ಕೋಟ್ಯಾನ್, ಗೌರವ ಸಲಹೆಗಾರೆರ್ ಜನಾರ್ದನ ಬಂಗೇರ ಮೊಕುಲು‌ ಮಾತ ಸಂತಾಪ ತೆರಿಪಾದೆರ್.