Sat. Nov 21st, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ತಾಜ್‌ಮಹಲ್ ದ 22 ಕೋಣೆದ ಬಾಕಿಲ್ ದೆಪ್ಪೊಡು ಪನ್ಪಿನ ಅರ್ಜಿನ್ ಕೈ ಬುಡಿನ ಸುಪ್ರೀಂ ಕೋರ್ಟ್

ದೆಲ್ಲಿ: ತಾಜ್‌ಮಹಲ್‌ದ ಪರಪೋಕುನು ತೆರಿಯೊನುನ ಸಲುವಾದ್ ಸ್ಮಾರಕದ ಜಾಗೆಡ್ 22 ಕೋಣೆನ್ ಓಪನ್ ಮಲ್ಪುನ ಬಗೆಟ್ ತನಿಖೆ ಮಲ್ಪರೆ ಪಂದ್‌ದಿತ್ತೆರ್. ಆಂಡ ಈ ಬಿನ್ನಾಪುನ್ ಸುಪ್ರೀಂ ಕೋರ್ಟ್ ಸುಕ್ರಾರದಾನಿ ನೂಕ್‌ದ್ ಪಾಡ್ದ್ಂಡ್.

ನ್ಯಾಯಮೂರ್ತಿಲಾಯಿನ ಎಂ.ಆರ್. ಶಾ ಬೊಕ್ಕ ಎಂ.ಎಂ.ಸುಂದ್ರೇಶ್ ಮೆರೆನ ಪೀಠ ಅರ್ಜಿನ್ ಅಲಹಾಬಾದ್ ಹೈಕೋರ್ಟ್ ಆದೇಶಡ್ ನೂಕ್‌ದ್ ಪಾಡ್ದೆರ್.

ಬಂಟ್ವಾಳ ಮಣಿಹಳ್ಳ ಅ್ಯಕ್ಸಿಡೆಂಟ್: ವಿಟ್ಲ ಮೆಸ್ಕಾಂದ ಎಇಇ ತೀರ್ ಪೋಯೆರ್

ಬಂಟ್ವಾಳ: ಇನಿ ಕಾಂಡೆ ಮಣಿಹಳ್ಳಡ್ ನಡತಿನ ಘಟನೆಡ್ ಮಸ್ತ್ ಪೆಟ್ಟಾಯಿನ ವಿಟ್ಲ ಮೆಸ್ಕಾಂದ ಎಇಇ ಚಿಕಿತ್ಸೆ ಸಮ ಆವಂದೇ ತೀರ್ ಪೋಯೆರ್. ಮೆಸ್ಕಾಂ ಇಲಾಖೆದ ಎಇಇ ಪ್ರವೀಣ್ ತೀರ್ ಪೋಯಿನಾರ್.

ಬಂಟ್ವಾಳ ಪುರಸಭಾ ವ್ಯಾಪ್ತಿದ ಮಣಿಹಳ್ಳ ಪನ್ಪಿನಲ್ಪ ರಡ್ಡ್ ಕಾರ್ ಬೊಕ್ಕ ಬಸ್‌ದ ನಡುಟ್ಟ್ ಅಪಘಾತ ನಡತ್‌ದಿತ್ತ್ಂಡ್. ಮಸ್ತ್ ಪೆಟ್ಟಾತಿನ ಮೆರೆನ್ ಕುಡ್ಲ ಖಾಸಗಿ ಆಸ್ಪತ್ರೆಗ್ ದಾಖಲ್ ಮಲ್ತ್‌ದಿತ್ತೆರ್. ಚಿಕಿತ್ಸೆ ಸಮ ಆವಂದೇ ತೀರ್ ಪೋಯೆರ್‌ಪಂದ್ ತೆರಿದ್ ಬೈದ್ಂಡ್.

ಗಟಾರ ಕ್ಲೀನ್ ಮಲ್ಪುನಗ ಉಸುಲು ಕಟ್ಟ್ ದ್ ತೀರ್ ಪೋಯೆರ್ ಮೂಜಿ ಜನ

ಬೊಂಬೈ: ಗಟಾರ ಕ್ಲೀನ್ ಮಲ್ತೊಂದು ಇಪ್ಪುನಗ ಮೂಜಿ ಜನ ಬೇಲೆದಕುಲು ಉಸುಲು ಕಟ್ಟ್ ದ್ ತೀರ್ ಪೋಯಿನ ಘಟನೆ ಪುಣೆಯ ವಾಘೋಲಿದ ರೆಸಿಡೆನ್ಶಿಯಲ್ ಸೊಸೈಟಿಡ್ ನಡತ್ಂಡ್.


ಈ ಘಟನೆಡ್ ನಿತಿನ್ ಪ್ರಭಾರ್ ಗೊಂಡ (45), ಗಣೇಶ್ ಭಲೇರಾವ್ (28) ಬೊಕ್ಕ ಸತೀಶ್‌ಕುಮಾರ್ ಚೌಧರಿ ತೀರ್ ಪೋತೆರ್. ಇನಿ ಬೊಲ್ಪುಗು 6 ಗಂಟೆಗ್ ಮೂಜಿ ಕಾರ್ಮಿಕೆರ್ ಗಟಾರದ ಉಲಯಿ ಜತ್ತಿನಕುಲು ಒಂಜಿ ಗಂಟೆ ಆಂಡಲ ಪಿದಯಿ ಬರಂದಿನೆನ್ ತೂಯಿನ ಕೈತಲ್ ದಕುಲು ಪೊಲೀಸ್ ಗ್ ಬೊಕ್ಕ ಅಗ್ನಿಶಾಮಕ ದಳಗ್ ತೆರಿಪಾದೆರ್. ವಿಷಯ ತೆರಿದ್ ಜಾಗೆಗ್ ಬತ್ತಿನ
ಅಗ್ನಿಶಾಮಕ ದಳತ ಸಿಬ್ಬಂದಿಲು ಮೂಜಿ ಜನ ಕಾರ್ಮಿಕೆರೆನ ಪುಣನ್ ಚರಂಡಿರ್ದ್ ಪಿದಯಿ ದೆತ್ತೆರ್.

ಬೇತೆ ಪೊಣ್ಣಡ ಪಾತೆರ್ನೆಕ್ ಪೊಣ್ಣುಲೆನ ನಡುಟ್ಟು ಗಲಾಟೆ

ದಾವಣಗೆರೆ: ಲಾಸಿ ಬೊಕ್ಕ ಸ್ನೇಹಾ ಪನ್ಪಿನ ರಡ್ಡ್ ಜನ ದೋಸ್ತಿಲೆನ ನಡುಟ್ಟು ಒರ್ತಿ ಕುಡೊಂಜಿ ಪೊಣ್ಣಡ ಪಾತೆರ್ನೆಕ್ಕ್ ಗಲಾಟೆ ಆದ್, ಲಾಸಿ ಸ್ನೇಹಾನ ಮೋನೆಗ್ ಬ್ಲೇಡ್‌‌ರ್ದ್ ಪೆಟ್ಟ್ ಮಲ್ತಿನ ಘಟನೆ ದಾವಣಗೆರೆತ ಶಾಂತಿನಗರಡ್ ನಡತ್ಂಡ್.


ಈ ಬಗೆಟ್ ಲಾಸಿನ ಮಿತ್ತ್ ವಿದ್ಯಾನಗರ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್. ವಿದ್ಯಾನಗರ ಪೊಲೀಸೆರ್ ಲಾಸಿನ್ ವಶಕ್ಕ್ ದೆತೊಂದೆರ್.

ಚಿತ್ರ ನಟೆ ಚೇತನ್ ನ ಮಿತ್ತ್ ಧಾರವಾಡಡ್ ಲ ಕೇಸ್ ದಾಖಲ್

ಧಾರವಾಡ: ಕಾಂತಾರಾ ಪಿಕ್ಚರ್ ಡ್ ಇತ್ತಿನ ಭೂತಕೋಲ ಆಚರಣೆ ವಿಚಾರವಾದ್ ಚಿತ್ರನಟೆ ಚೇತನ್, ಭೂತಕೋಲ ಹಿಂದೂ ಸಂಸ್ಕೃತಿ ಅತ್ತ್ ಪಂದ್ ಹೇಳಿಕೆ ಕೊರ್ದು ಇತ್ತೆರ್. ಇತ್ತೆ ಮೇರೆನ ಮಿತ್ತ್ ರಡ್ಡನೇ ಕೇಸ್ ದಾಖಲ್ ಆತ್ಂಡ್.

ಮೇರೆನ ಮಿತ್ತ್ ಕೋಡೆ ಒಡಿಪು ಜಿಲ್ಲೆದ ಕಾರ್ಲ ಪೊಲೀಸ್ ಠಾಣೆಡ್ ಹಿಂದೂ ಜಾಗರಣಾ ವೇದಿಕೆದ ಕಾರ್ಯಕರ್ತೆರ್ ದೂರು ಕೊರ್ದು ಇತ್ತೆರ್. ಇನಿ ಧಾರವಾಡದ ಉಪನಗರ ಠಾಣೆಡ್ ಹಿಂದೂ ಜಾಗರಣಾ ವೇದಿಕೆ ಕಾರ್ಯಕರ್ತೆರ್ ದೂರು ದಾಖಲ್ ಮಲ್ದೆರ್. “ಚೇತನ್ ಭಾರತದ ಪ್ರಜೆನೇ ಅತ್ತ್. ಮುಲ್ಪ ಬತ್ತ್ ದ್ ಹಿಂದೂ ಧರ್ಮನ್ ರಡ್ಡ್ ಮಲ್ಪುನ ಬೇಲೆ ಮಲ್ತೊಂದು ಉಲ್ಲೆರ್. ಇಂಚಾದ್ ಕೂಡ್ಲೆ ಮೇರೆನ್ ಬಂಧನ ಮಲ್ಪೊಡು” ಪಂದ್ ಒತ್ತಾಯ ಮಲ್ದೆರ್.

ಟಿ20 ವಿಶ್ವಕಪ್: ತರೆಗ್ ಚೆಂಡ್ ಹಾಕ್ ದ್ ಆಸ್ಪತ್ರೆ ಸೇರಿನ ಪಾಕಿಸ್ತಾನದ ಬ್ಯಾಟ್ಸ್‌ಮನ್

ಮೆಲ್ಬರ್ನ್: ಆಸ್ಟ್ರೇಲಿಯಡ್ ನಡತೊಂದು ಇಪ್ಪುನ ಟಿ20 ವಿಶ್ವಕಪ್‌ಡ್ ಭಾರತ ಬೊಕ್ಕ ಪಾಕಿಸ್ತಾನ ಅ. 23ದಾನಿ ಮೆಲ್ಬರ್ನ್ ಮೈದಾನಡ್ ಗೊಬ್ಬೆರೆ ಉಲ್ಲೆರ್.


ಈ ಗೊಬ್ಬು ನಡಪುನ ದುಂಬೇ, ಪಾಕಿಸ್ತಾನದ ಬ್ಯಾಟ್ಸ್‌ಮನ್ ಆಸ್ಪತ್ರೆಗ್ ಸೇರ್ದೆರ್. ಪಾಕಿಸ್ತಾನ ಟೀಮ್ ದಕುಲು ನೆಟ್ ಪ್ರಾಕ್ಟೀಸ್ ಮಲ್ತೊಂದು ಇಪ್ಪುನ ಪೊರ್ತುಡು ಮೊಹಮ್ಮದ್ ನವಾಜ್ ಹಾಕಿನ ಚೆಂಡೊಂಜಿ ಮಸೂದ್ ತರೆಕ್ಕ್ ಹಾಕ್ದ್ಂಡ್. ನೆರ್ದ್ ಪೆಟ್ಟಾಯಿನ ಎಡತ ಕೈ ಗೊಬ್ಬುನ ಮಸೂದ್ ಕೂಡ್ಲೆ ನೆಲಕ್ ಬೂರ್ದೆರ್. ಸುಮಾರ್ ಐನೆರ್ದ್ ಏಳ್ ನಿಮಿಷ ನೆಲತ ಮಿತ್ತೆ ಬೂರ್ದು ಇತ್ತಿನ ಮೇರೆನ್ ಬೊಕ್ಕ ಆಸ್ಪತ್ರೆಗ್ ದಾಖಲ್ ಮಲ್ಪೆರೆ ಆತ್ಂಡ್. ನನದ ಹೆಚ್ಚಿನ ಮಾಹಿತಿ ಮಸೂದ್ ಆಸ್ಪತ್ರೆರ್ದ್ ಪಿದಯಿ ಬತ್ತಿ ಬೊಕ್ಕನೇ ಗೊತ್ತಾವೊಡಾತೆ.

ನ. 3 ಮುಟ್ಟ ಮುರುಘಾ ಸ್ವಾಮಿಲೆಗ್ ಕುಡ ಜೈಲ್

ಮುರುಘಾ ಮಠತ್ತ ಸ್ವಾಮಿಗ್ ನ್ಯಾಯಾಂಗ ಬಂಧನದ ಅವಧಿನ್ ಕುಡ ದುಂಬು ಕೊನತೆರ್. ನ್ಯಾಯಾಂಗ ಬಂಧನದ ಪೊರ್ತು ಇನಿ ಮುಗ್ಗಿನ ಕಾರಣ ಚಿತ್ರದುರ್ಗದ ಜಿಲ್ಲಾ 2ನೇ ಸೆಷನ್ಸ್ ಕೋರ್ಟ್‌ಗ್ ಹಾಜರ್ ಮಲ್ತಿತ್ತೆರ್.

ವಿಚಾರಣೆ ನಡಪಾಯಿ ಬೊಕ್ಕ ಕುಡ ಜೈಲ್‌ದ ಅವಧಿನ್ ನವೆಂಬರ್ 3 ಮುಟ್ಟ ದುಂಬು ಕೊನತೆರ್. ಪೊಣ್ಣು ಜೋಕುಲೆಗ್ ಲೈಂಗಿಕ ಉಪದ್ರ ಕೊರೊಂದಿಪ್ಪುನ ಆರೋಪಡ್ ಮೆರೆನ್ ಪೊಲೀಸೆರ್ ಅರೆಸ್ಟ್ ಮಲ್ತ್‌ದಿತ್ತೆರ್.

ಮುಲ್ಕಿ: ಲವ್ ಜಿಹಾದ್ ಕೇಸ್ ದ ಆರೋಪಿ ಅರೆಸ್ಟ್

ಮುಲ್ಕಿ: ಮುಲ್ಕಿ ಠಾಣಾ ವ್ಯಾಪ್ತಿದ ತೋಕೂರು ಕೈತಲ್ದ ಎಸ್.ಕೋಡಿಡ್ ಲವ್ ಜಿಹಾದ್ ಕೇಸ್ ಪತ್ತೆಯಾದಿತ್ತ್‌ದ್, ಹಿಂದೂ ಸಂಘಟನೆದ ದೂರ್‌ದ ಬಗೆಟ್ ಈ ಕೇಸ್‌ದ ಆರೋಪಿನ್ ಮುಲ್ಕಿ ಪೊಲೀಸೆರ್ ಅರೆಸ್ಟ್ ಮಲ್ತ್‌ದೆರ್.

ಆರೋಪಿನ್ ತೋಕೂರು ಕೈತಲ್‌ದ ಬಾಡಿಗೆ ಇಲ್ಲಡ್ ಇತ್ತಿನ ಸಮೀರ್ ಪಂದ್ ಗುರ್ತಿಸಾದೆರ್. ಆರೋಪಿ ಸಮೀರ್ ಇತ್ತೆ ಮದಿಮೆ ಆತಿನ ವಿಷಯ ತೆರಿದ್ ಬತ್ತಿತ್ತ್‌ದ್, ಹಿಂದೂ ಪೊಣ್ಣನೊಟ್ಟುಗ್ ಕರಿನ ಕೆಲವು ತಿಂಗೊಲ್‌ರ್ದಿಂಚಿ ಬಾಡಿಗೆದ ಇಲ್ಲಡ್ ಒಟ್ಟುಗು ಇತ್ತೆರ್. ಮುಲ್ಕಿ ಪೊಲೀಸೆರೆಗ್ ಉಂದೆತ್ತ ಮಾಹಿತಿ ತಿಕ್ಕ್‌ದಿತ್ತ್‌ದ್ ಆರೋಪಿನ್ ಅರೆಸ್ಟ್ ಮಲ್ತ್‌ದೆರ್. ಈ ಬಗೆಟ್ ಸರಿಯಾಯಿನ ಕ್ರಮ ದೆತೊನೊಡು ಪಂದ್ ಬಜರಂಗದಳತ್ತ ಕಾರ್ಯಕರ್ತೆರ್ ಮುಲ್ಕಿ ಪೊಲೀಸ್ ಠಾಣೆಡ್ ಪಂತೆರ್.

ಗೂಗಲ್‌ಗ್ 1337 ಕೋಟಿ ರೂ. ದಂಡ

ದೆಲ್ಲಿ: ಪುಗರ್ತೆದ ಟೆಕ್ ಕಂಪೆನಿ ಆಯಿನ ಗೂಗಲ್‌ಗ್ ಭಾರತದ ಸ್ಪರ್ಧಾತ್ಮಕ ಆಯೋಗ (ಸಿಸಿಐ) 1337.76 ಕೋಟಿ ರೂ. ದಂಡ ಪಾಡ್ದೆರ್.

ಆಂಡ್ರಾಯ್ಡ್ ಉತ್ಪಾದಕ ಸಂಸ್ಥೆಲೆಗ್ ಮೊಬೈಲ್‌ಡ್ ಗೂಗಲ್ ಆ್ಯಪ್‌ನ್ ಬಿಲ್ಟ್ ಇನ್ ಮಲ್ಪರೆ ಒತ್ತಾಯ ಮಲ್ತಿನೆಕ್ಕ್ ಈ ದಂಡ ಪಾಡ್ದೆರ್. ಈ ಬಗೆಟ್ ಮಸ್ತ್ ಆಂಡ್ರಾಯ್ಡ್ ಸಂಸ್ಥೆಲು ಸಿಸಿಐ ಪಜ್ಜೆ ದೀದಿತ್ತ್‌ದ್, ಮಸ್ತ್ ವರ್ಷರ್ದ್ ಈ ಬಗೆಟ್ ವಿಚಾರಣೆ ನಡತೊಂದು ಉಂಡು.

ಅರುಣಾಚಲ ಪ್ರದೇಶಡ್ ಬೂರ್ಂಡ್ ಸೇನಾ ಹೆಲಿಕಾಪ್ಟರ್

ಅರುಣಾಚಲ ಪ್ರದೇಶಡ್ ಸೇನಾ ಹೆಲಿಕಾಪ್ಟರ್ ಬೂರ್ದುಂಡು. ಅಪ್ಪರ್ ಸಿಯಾಂಗ್ ಜಿಲ್ಲೆದ ಟ್ಯೂಟಿಂಗ್ ಪ್ರಧಾನ ಕಚೇರಿರ್ದ್ 25 ಕಿ.ಮೀ ದೂರಡ್ ಇಪ್ಪುನ ಸಿಂಗಿಂಗ್ ಊರುದ ಕೈತಲ್ ಮಿಲಿಟರಿ ಹೆಲಿಕಾಫ್ಟರ್ ಬೂರ್ದುಂಡು.

ರಕ್ಷಣಾ ತಂಡದಕ್ಲೆನ್ ಜಾಗೆಗ್ ಕಡಪುಡ್‌ದೆರ್. ಘಟನೆ ಆಯಿನಡೆ ಪೋವರೆ ಮಾರ್ಗದ ವ್ಯವಸ್ಥೆ ಇಜ್ಜಿ ಪಂದ್ ಅಧಿಕಾರಿಲು ಪನೊಂದುಲ್ಲೆರ್. ಈ ಬಗೆಟ್ ಎಚ್ಚದ ಮಾಹಿತಿ ನನ ತೆರಿಯೊಡಾತೆ.

You Missed