Sat. Nov 21st, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಮುಲ್ಕಿ ಬಿಲ್ಲವ ಸಂಘದ ಅಧ್ಯಕ್ಷೆರಾದ್ ಪತ್ರಕರ್ತೆರ್ ಪ್ರಕಾಶ್ ಸುವರ್ಣ ಆಯ್ಕೆ

ಮುಲ್ಕಿ: ದ.ಕ. ಜಿಲ್ಲಾ ಪ್ರಶಸ್ತಿ ಪಡೆದಿನ ಬಿಲ್ಲವ ಸಮಾಜ ಸೇವಾ ಸಂಘ (ರಿ) ಮುಲ್ಕಿ ನೆತ್ತ 2022-24 ನೇ ಸಾಲ್ ದ ಅಧ್ಯಕ್ಷೆರಾದ್ ಪತ್ರಕರ್ತೆರ್ ಪ್ರಕಾಶ್ ಸುವರ್ಣ (ವಿಕ್ಕಿ) ಆಯ್ಕೆ ಆತೆರ್.

1987 ನೇ ಇಸ್ವಿಡ್ ಡ್ ವಿಕ್ಕಿ ವಿಡಿಯೋ ಸಂಸ್ಥೆ ಸುರು ಮಲ್ತ್ ದ್ ಬೊಕ್ಕ ಕೇಬಲ್ ಬಿಸಿನೆಸ್ ಸುರು ಮಲ್ದಿನ ಮೇರ್ ಇತ್ತೆ ಕನ್ನಡ ಪ್ರಭ ಪತ್ರಿಕೆದ ಮುಲ್ಕಿ ತಾಲೂಕು ವರದಿಗಾರೆರಾದ್ ಸೇವೆ ಮಲ್ತೊಂದುಲ್ಲೆರ್. ನೆರ್ದ್ ದುಂಬು ಆರ್ ಮುಲ್ಕಿ ಬಿಲ್ಲವ ಸಂಘದ ಕೋಶಾಧಿಕಾರಿ ಆದಿತ್ತೆರ್.
ಅವ್ವತ್ತಾಂದೆ ಮುಲ್ಕಿ ತಾಲೂಕು ಕಾರ್ಯನಿರತ ಪತ್ರಕರ್ತೆರೆನ ಪ್ರಧಾನ ಕಾರ್ಯದರ್ಶಿ ಆದ್, ಕೊಳಚಿ ಕಂಬುಲ ಜಾರಂದಾಯ ದೇವಲ್ಯದ ಅಧ್ಯಕ್ಷೆರಾದ್ ಸೇವೆ ಮಲ್ತೊಂದುಲ್ಲೆರ್.
ನೆರ್ದ್ ದುಂಬು ಮುಲ್ಕಿ ಲಯನ್ಸ್ ಕ್ಲಬ್, ಲಯನ್ಸ್ ವಲಯಾಧ್ಯಕ್ಷೆರ್, ಮುಲ್ಕಿ ಶಾಂಭವಿ ಜೇಸಿ ಅಧ್ಯಕ್ಷೆರಾದ್, ಮಾನಿಷ್ ಕ್ರಿಕೆಟ್ ಕ್ಲಬ್ ಅಧ್ಯಕ್ಷೆರಾದ್,ಮುಲ್ಕಿ ವಲಯ ಪತ್ರಕರ್ತೆರೆ ಸಂಘದ ಅಧ್ಯಕ್ಷೆರಾದ್ ಸೇವೆ ಮಲ್ದೆರ್.
ಮುಲ್ಕಿ ಬಿಲ್ಲವ ಸಂಘದ ಉಪಾಧ್ಯಕ್ಷೆರಾದ್ ಶಶೀಂದ್ರ ಎಂ. ಸಾಲ್ಯಾನ್ ಬೊಕ್ಕ ನರೇಂದ್ರ ಕೆರೆಕಾಡು,ಪ್ರಧಾನ ಕಾರ್ಯದರ್ಶಿಯಾದ್ ಜಯಕುಮಾರ್ ಕುಬೆವೂರು, ಜತೆ ಕಾರ್ಯದರ್ಶಿಲಾದ್ ವಾಮನ ಕೋಟ್ಯಾನ್ ನಡಿಕುದ್ರು ಬೊಕ್ಕ ಜಯ ಸಿ. ಪೂಜಾರಿ ಮಾನಂಪಾಡಿ ಆಯ್ಕೆ ಆತೆರ್. ಕೋಶಾಧಿಕಾರಿಲಾದ್ ಕಮಲಾಕ್ಷ ಬಡಗುಹಿತ್ಲು
ಸಹ ಕೋಶಾಧಿಕಾರಿಯಾದ್ ಇಂದಿರಾ ಸಿ. ಅಮೀನ್ ಆಯ್ಕೆ ಆತೆರ್.

ವಾಟ್ಸ್ಯಾಪ್ ಸರ್ವರ್ ಡೌನ್

ದಿಲ್ಲಿ : ಭಾರತ ಸೇರ್ದ್ ಜಗತ್ತ್ ದ ಸುಮಾರ್ ಕಡೆಟ್ ವಾಟ್ಸ್ ಆ್ಯಪ್ ದ ಸರ್ವರ್ ಡೌನ್ ಆತ್ಂಡ್.

ನೇರ್ದಾವೆರ ಮೆಸೇಜ್ ಮಲ್ಪರೆ ಗಲಸುನಕುಲು ಬಂಗ ಬತ್ತೆರ್. ಮಧ್ಯಾಹ್ನ 12.30 ರ್ದ್ ಈ ಸಮಸ್ಯೆ ಸುರು ಆತ್ಂಡ್. ಭಾರತಡ್ ಶೇ.69ದಾತ್ ಜನಕುಲು ಈ ವಾಟ್ಸ್ ಆ್ಯಪ್ ಡೌನ್ ಬಗೆಟ್ ದೂರುದೆರ್. ಆಂಡ ಈ ಬಗೆಟ್ ವಾಟ್ಸ್ ಆ್ಯಪ್ ಒವ್ವೇ ಪ್ರತಿಕ್ರಿಯೆ ಕೊರ್ತಿಜಿ.

ಎಐಸಿಸಿ ಅಧ್ಯಕ್ಷೆರಾದ್ ಮಲ್ಲಿಕಾರ್ಜುನ ಖರ್ಗೆ ಎಲ್ಲೆ ಅಧಿಕಾರ ದೆತೊನರೆ

ದಿಲ್ಲಿ: ಕಾಂಗ್ರೆಸ್ ಅಧ್ಯಕ್ಷೆರ್ನ ಜಾಗೆಗ್ ನಡತಿನ ವೋಟುಡು ಆಯ್ಕೆ ಆಯಿನ ಹಿರಿಯ ನಾಯಕೆರ್ ಮಲ್ಲಿಕಾರ್ಜುನ ಖರ್ಗೆ ಎಲ್ಲೆ ಅಧಿಕಾರ ಸ್ವೀಕಾರ ಮಲ್ಪೆರೆ ಉಲ್ಲೆರ್.


ಮಾಜಿ ಮುಖ್ಯಮಂತ್ರಿ ಸಿದ್ಧರಾಮಯ್ಯ ಸೇರ್ದ್ ಸುಮಾರ್ ಕಾಂಗ್ರೆಸ್ ನಾಯಕೆರ್ ಲೇಸ್ ಡ್ ಪಾಲ್ ಪಡೆವರೆ ಉಲ್ಲೆರ್. ಉಂದುವೇ ಸುರುತ ಸರ್ತಿ ಗಾಂಧಿ ಪರಿವಾರ ಅತ್ತಂದಿನ ನಾಯಕೆರ್ ಒರಿ ಕಾಂಗ್ರೆಸ್ ಅಧ್ಯಕ್ಷೆರಾದ್ ಅಧಿಕಾರ ದೆತೊನೊಂದುಲ್ಲೆರ್.

ಉಬಾರ್ : ಪರ್ತಿನ ಅಮಲ್ ಡ್ ಬಸ್ ಕ್ ಕಲ್ಲ್ ದಕ್ಕ್ ದ್ ಗ್ಲಾಸ್ ಪೊಡಿ ಮಲ್ತಿನ ಕೂಲಿ ಬೇಲೆದಾಯೆ

ಉಬಾರ್ : ಪರ್ತಿನ ಅಮಲ್ ಡ್ ಇತ್ತಿನ ಪ್ರಯಾಣಿಕೆ ಒರಿ ತಾನ್ ಎನ್ನಿನ ಜಾಗೆಗ್ ಕೆಎಸ್‌ಆರ್‌ಟಿಸಿ ಬಸ್ಸ್ ನ್ ಉಂತಾಯಿಜೆರ್ ಪನ್ಪುನ ಕಾರಣಗ್ ಬೆಚ್ಚ ಆದ್ ಬಸ್ ತ ಗ್ಲಾಸ್ ಗ್ ಕಲ್ಲ್ ದಕ್ ದ್ ಪೊಡಿ ಮಲ್ತಿನ ಘಟನೆ ಅ. 24 ದಾನಿ ಉಬಾರ್ ಡ್ ನಡತ್ಂಡ್.


ರಾಜ್ಯ ಮಾರ್ಗದ ವಿಸ್ತರಣೆ ಕಾಮಗಾರಿಡ್ ಕೆಲಸ ಮಲ್ತೊಂದಿತ್ತಿನ ಕೂಲಿ ಕಾರ್ಮಿಕೆ ಒರಿ ಕಲ್ಲ್ ದಕ್ ದಿನಾಯೆ ಪಂದ್ ತೆರಿದ್ ಬೈದ್ಂಡ್. ಕಲ್ಲ್ ದಕ್ಕಿನ ಆರೋಪಿನ್ ಪೋಲಿಸ್ ಗ್ ಕೊರ್ತೆರ್.

“ಕಾಂತಾರ” ರಾಜ್ಯಡ್ ಮಸ್ತ್ ಜನ ತೂಯಿನ ಪಿಕ್ಚರ್ ಪನ್ಪಿನ ದಾಖಲೆ

ಸಿನಿಮಾ ಲೋಕೊಡು ಪೊಸ ಟ್ರೆಂಡದ ಪುಟ್ಟಾಯಿನ ಪಿಕ್ಚರ್ ಕಾಂತಾರ. ಹೊಂಬಾಳೆ ಫಿಲಮ್ಸ್ ನಿರ್ಮಾಣದ ಕಾಂತಾರ ಪೊಸ ಪೊಸ ದಾಖಲೆನ್ ಮಲ್ತೊಂದು ಉಂಡು.

ಪಿಕ್ಚರ್ ಬುಡುಗಡೆ ಆದ್ 25 ನೇ ದಿನಕ್ ರಾಜ್ಯಡ್ 77 ಲಕ್ಷ ಜನ ತೂತೆರ್. ಉಂದು ಕರ್ನಾಟಕಡ್ ಮಸ್ತ್ ಜನ ತೂಯಿನ ಕನ್ನಡ ಪಿಕ್ಚರ್ ಪನ್ಪುನ ದಾಖಲೆ ಆತ್ಂಡ್. ನಟೆ ರಿಷಬ್ ಶೆಟ್ಟಿ, ನಿರ್ದೇಶಕೆರಾದ್ ಕಾಂತಾರನ್ ನಿರ್ದೇಶನ ಮಲ್ದೆರ್. ಉಂದೆಕ್ಕ್ ಭಾರತ ಮಾತ್ರ ಅತ್ತಂದೆ ಪಿದಯಿ ದೇಸೊಡ್ಲಾ ಎಡ್ಡೆ ಅಭಿಪ್ರಾಯ ಬೈದ್ಂಡ್.

ಶಿವಮೊಗ್ಗ : ದಿ.ಹರ್ಷನ ಕುಟುಂಬದ ಸದಸ್ಯೆರೆಗ್ ಕೊಲೆ ಬೆದರಿಕೆ

ಶಿವಮೊಗ್ಗ: ಗಾಡಿ ಲಗಾಡಿ ಮಲ್ತಿನ ಆರೋಪದ ಮಿತ್ತ್ ದಿ. ಹರ್ಷನ ಪಲಿ ಅಶ್ವಿನಿ ಸೇರ್ದ್ ಕೆಲವೆರೆನ ವಿರುದ್ಧ ಕೇಸ್ ದಾಖಲ್ ಆಯಿನ ಪೊರ್ತುಡೇ, ಬಚ್ಚಾಲಿಲು ಜೂವ ಬೆದರಿಕೆ ಪಾಡ್ದೆರ್, ಎಂಕಲೆಗ್ ರಕ್ಷಣೆ ಬೋಡು ಪಂದ್ ಹರ್ಷನ ಪಲಿ ಅಶ್ವಿನಿ ದೂರು ಕೊರ್ನ ಘಟನೆ ನಡತ್ಂಡ್.

ರಾತ್ರೆ 11:15 ತ್ತ ಪೊರ್ತುಡು 2 ಬೈಕ್ ಡ್ 6 ಜನ ಜವನೆರ್ ತಲ್ವಾರ್ ಪತೊಂದು, ಹರ್ಷನ್ ದೆತ್ತಿನ ಯಾವಂದಾ, ನಿಕಲೆನ್ಲಾ ದೆಪ್ಪೊಡ? ನಿಕಲೆನ್ಲಾ ಪೊಕ್ಕಡೆ ಬುಡುಪುಜ ಪಂದ್ ಬೆದರಿಕೆ ಪಾಡ್ದೆರ್, ಬೊಕ್ಕ ಕಲ್ಲ್ ದಕ್ಕಿನೆರ್ದಾವರ ಪ್ರಕಾಶ್ (25) ಮೇರೆಗ್ ಪೆಟ್ಟಾತ್ಂಡ್. ಮೇರೆನ್ ಮೆಗ್ಗಾನ್ ಆಸ್ಪತ್ರೆಗ್ ದಾಖಲ್ ಮಲ್ತ್ ದ್ ಚಿಕಿತ್ಸೆ ಕೊರೊಂದು ಉಂಡು. ಈ ಘಟನೆದ ಬಗೆಟ್ ಜಾಗೆಗ್ ಬತ್ತಿನ ಎಸ್ ಪಿ ಮಿಥುನ್ ಕುಮಾರ್ ತನಿಖೆ ಸುರು ಮಲ್ದೆರ್.

ಹಿಂದು ಜಾಗರಣ ವೇದಿಕೆ ಕಡೇಶಿವಾಲಯ, ಶ್ರೀರಾಮ ಭಜನಾ ಮಂದಿರ ಪ್ರತಾಪನಗರ ಒಟ್ಟು ಸೇರಿಗೆಡ್ ತುಡರ್ ಪರ್ಬದ ಕ್ರೀಡಾಕೂಟ ಪಂತೊ

ಹಿಂದು ಜಾಗರಣ ವೇದಿಕೆ ಕಡೇಶಿವಾಲಯ ಶ್ರೀರಾಮ ಭಜನಾ ಮಂದಿರ ಪ್ರತಾಪನಗರದ ಒಟ್ಟು ಸೇರಿಗೆಡ್ ತುಡರ್ ಪರ್ಬದ ಕ್ರೀಡಾಕೂಟ ಪಂತೊ ಅ.23 ಐತಾರದಾನಿ ಶ್ರೀರಾಮ ಭಜನಾ ಮಂದಿರ ಪ್ರತಾಪನಗರ ಕಡೇಶಿವಾಲಯಡ್ ನಡತ್ಂಡ್.

ಮಂದಿರದ ಹಿರಿಯ ಕಾರ್ಯಕರ್ತೆರ್ ಶಂಕರ ಶೆಟ್ಟಿಗಾರ್ ತುಡರ್ ಅರ್ಲಾವುನ ಮುಖೇನ ಲೇಸ್ ನ್ ಉದಿಪನ ಮಲ್ತೆರ್. ಅಯಿರ್ದ್ ಬೊಕ್ಕ ಬಲ್ಲ್ ಒಯಿಪುನ ಗೊಬ್ಬು, ಲಗೋರಿ, ಖೋ ಖೋ ಗೊಬ್ಬುಲೆದ ಪಂತೊ ಬೊಕ್ಕ ಬಯ್ಯಗ್ ಧಾರ್ಮಿಕ ಸಭಾ ಕಾರ್ಯಕ್ರಮ ನಡತ್ಂಡ್. ಈ ಸಭೆಟ್ ಧಾರ್ಮಿಕ ಭಾಷಣಕಾರೆ ಪ್ರಥ್ವೀಶ ಧರ್ಮಸ್ಥಳ ಪಾತೆರ್ದ್, ಸಂಘಟನೆದ ಕಾರಣರ್ದ್ ಇನಿ ಸಮಾಜ ಒಂಜಾವೊಂಡಾತ್ಂಡ್. ಲವ್ ಜಿಹಾದ್, ನಕ್ಸಲ್, ಮತಾಂತರ ಈ ರೀತಿದ ಮಾತಾ ಸಮಸ್ಯೆಲೆನ್ ಇನಿ ಹಿಂದೂ ಸಮಾಜ ಎದುರಿಸಾವೊಂದು ಉಂಡು. ನಮ ಮುಖ್ಯವಾದ್ ಸಜ್ಜನ ಶಕ್ತಿದ ನಿರ್ಮಾಣ ಆವೊಡು, ಸಜ್ಜನ ಶಕ್ತಿದ ಮುಖೇನ ಸಮಾಜದ ಮಾತಾ ಕೆಡುಕುಲೆನ್ ನಿವಾರಣೆ ಮಲ್ತ್ ದ್, ಸಾಮಾಜಿಕ ಸಮಾನತೆನ್ ನಮ ತೂವೊಡು ಪನ್ಪುನ ಪಾತೆರೊನು ಪಂಡೆರ್. 

ಈ ಪೊರ್ತುಡು ಪಂತೊಡು ಗೆಂದಿನಕ್ಲೆಗ್ ಹಿಂದೂ ಜಾಗರಣ ವೇದಿಕೆದ ಪ್ರಮುಖ್ ಮನೋಜ್ ಪೆರ್ನೆ ಇನಾಮುನ್ ಪಟ್ಟಿಯೆರ್. ಯೋಧೆರ್ ಪ್ರಶಾಂತ್ ಶೆಟ್ಟಿ ತೋಟ ಬುಕ್ಕ ಸಂಘಟನೆಲೆದ ಮಾತಾ ಸದಸ್ಯೆರ್, ಗ್ರಾಮಸ್ದೆರ್ ಪಾಲ್ ಪಡೆದಿತ್ತೆರ್.
ಗೂಡು ದೀಪ ಪಂತೊಗು ಉಂದುವೇ ತೇದಿ 30 ಗ್ ಮುಗಿತಲ ನಡಪರೆ ಉಂಡು. ಈ ಪಂತೊಡು ಪಾಲ್ ಪಡೆಪಿನಕುಲು ಇಲ್ಲಡ್ ಮಲ್ತಿನ ಗೂಡುದೀಪನ್ ಸಂಘಟಕೆರೆಗ್ ಕಡಪುಡಾದ್ ಕೊರ್ಪಿನ ವ್ಯವಸ್ಥೆ ಮನ್ಪೊಡು ಪಂದ್ ಅಕುಲು ತೆರಿಪಾದೆರ್.

ಕಕ್ಕುಂಜೆ ಕುಟುಂಬದ ಹಿರಿಯೆರ್ ಸರೋಜಿನಿ ಶೆಟ್ಟಿ ನನ ನೆಂಪು ಮಾತ್ರ

ಒಡಿಪು ಶಿವಳ್ಳಿ ಪಡುಪೆರಂಪಳ್ಳಿದ ಕಕ್ಕುಂಜೆ ಇಲ್ಲದ ಕೃಷಿಕೆರ್, ದೈವ ದೇವೆರೆನ್ ಆರಾಧನೆ ಮಲ್ಪುನ ಅನುವಂಶಿಕ ಆಡಳಿತದ ಮೊಕ್ತೇಸೆರೆನ ಕುಟುಂಬದ ಹಿರಿಯೆರ್ ಸರೋಜಿನಿ ಶೆಟ್ಟಿ (91) ಅ.19 ದಾನಿ ದೇವೆರೆ ಪಾದ ಸೇರ್ದೆರ್.

ಮೇರೆನ ಆತ್ಮ ಗ್ ಆ ದೇವೆರ್ ಶಾಂತಿ ಕೊರಡ್ ಪಂದ್ ಊರುದ, ಪರವೂರುದ ಗಣ್ಯೆರ್, ನಾಗರಿಕೆರ್, ಕುಟುಂಬದ ಅಕುಲು ದೇವೆರೆಡ ಸುಗಿತೊಂದೆರ್. ಮೇರೆಗ್ 6 ಆನ್ ಜೋಕುಲು ಬೊಕ್ಕ 3 ಪೊಣ್ಣು ಜೋಕುಲು ಉಲ್ಲೆರ್.

ಧರ್ಮಸ್ಥಳದ ಧರ್ಮಾಧಿಕಾರಿ ವೀರೇಂದ್ರ ಹೆಗ್ಗಡೆರೆನ ಪಟ್ಟಾಭಿಷೇಕದ 55ನೇ ವರ್ಧಂತಿ ಉಚ್ಚಯ

ಧರ್ಮಸ್ಥಳ: ಧರ್ಮಸ್ಥಳದ ಧರ್ಮಾಧಿಕಾರಿ ಡಾ. ಡಿ. ವೀರೇಂದ್ರ ಹೆಗ್ಗಡೆ ಮೇರೆನ ಪಟ್ಟಾಭಿಷೇಕದ 55 ನೇ ವರ್ಧಂತಿ ಉಚ್ಚಯ ಶ್ರೀ ಕ್ಷೇತ್ರ ಧರ್ಮಸ್ಥಳಡ್ ನಡತ್ಂಡ್.


ವಿಧಾನಸಭೆ ಸ್ಪೀಕರ್ ವಿಶ್ವೇಶ್ವರ ಹೆಗಡೆ ಕಾಗೇರಿ ಈ ಲೇಸ್ ಡ್ ಪಾಲ್ ಪಡೆದ್ ಎಡ್ಡೆಪ್ಪು ಬಯಕಿಯೆರ್.
ಈ ಪೊರ್ತುಡು ಹೇಮಾವತಿ ವಿ. ಹೆಗ್ಗಡೆ, ಬೊಲ್ತೇರ್ ಶಾಸಕೆರ್ ಹರೀಶ್ ಪೂಂಜ ಬೊಕ್ಕ ವಿಧಾನ ಪರಿಷತ್ ಸದಸ್ಯೆರ್ ಕೆ. ಪ್ರತಾಪಸಿಂಹ ನಾಯಕ್ ಇತ್ತೆರ್. ಲೇಸ್ ರ್ದ್ ಬೊಕ್ಕ ಸ್ಪೀಕರ್ ವಿಶ್ವೇಶ್ವರ ಹೆಗಡೆ ಕಾಗೇರಿ ಮೇರ್ ಮಂಜುನಾಥೇಶ್ವರ ಸ್ವಾಮಿನ ದರ್ಶನ ಮಲ್ತ್ ದ್ ಇಸೇಸ ಪೂಜೆ ಸಂದಾಯೆರ್.

ಮುಖೇಶ್ ಅಂಬಾನಿನ ಫೆರಾರಿ ಕಾರ್ ಅಪಘಾತ

ಬೊಂಬೈ: ರಿಲಯನ್ಸ್ ಮುಖ್ಯಸ್ಥೆರ್ ಮುಖೇಶ್ ಅಂಬಾನಿನ ಲಕ್ಸುರಿ ಫೆರಾರಿ SF90 ಕಾರ್ ಬೊಂಬೈದ ಬಾಂದ್ರಾ ವರ್ಲಿ ಸೀ ಲಿಂಕ್ ದ ಡಿವೈಡರ್‌ಗ್ ಗುದ್ದುದು ನಕ್ಕೆ ಆತ್ಂಡ್.

ಫೆರಾರಿ ಕಾರ್ ಮಸ್ತ್ ಬೀಸ ಪೋವೊಂದು ಇತ್ತಿರ್ನೆದಾವರ ಕಾರ್ ದ ನಿಯಂತ್ರಣ ತತ್ತ್ ದ್ ಗುದ್ದುಂಡು ಪಂದ್ ಅಲ್ಪ ಇತ್ತಿನಕುಲು ಪಂತೆರ್.
ಕಾರ್ ಡ್ ಇತ್ತಿನಕುಲೆನ ಗುರ್ತ ನನಲ ಪತ್ತೆ ಆತಿಜಿ. ಕಾರ್ ಡ್ ಮುಖೇಶ್ ಅಂಬಾನಿನ ಮರ್ಮಾಲ್ ಇತ್ತೆರ್ ಪಂದ್ ತೆರಿದ್ ಬೈದ್ಂಡ್. ಈ ಕಾರ್ ದ ಪಿರವುಡೆ ಬರೊಂದು ಇತ್ತಿನ ಬೆಂಗಾವಲು ಕಾರ್ ದ ಸಿಬ್ಬಂದಿ ಕೂಡ್ಲೆ ಕಾರ್ ಡ್ ಇತ್ತಿನಕ್ಲೆನ್ ಕಾರ್ ರ್ದ್ ಪಿದಯಿ ದೆತ್ತ್ ದ್ ಬೇತೆ ಕಾರ್ ಡ್ ಲೆತೊಂದು ಪೋತೆರ್ ಪಂದ್ ತೆರಿದ್ ಬೈದ್ಂಡ್. ಈ ಘಟನೆದ ಜಾಗೆಗ್ ಬತ್ತಿನ ಪೊಲೀಸೆರ್ ಲಗಾಡಿ ಪೋಯಿನ ಕಾರ್ ನ್ ಕೊನೊತೆರ್. ರಾತ್ರೆ ಮಲ್ಲ ಫ್ಯಾಷನ್ ಡಿಸೈನರ್ ಮನೀಶ್ ಮಲ್ಹೋತ್ರಾ ಮೇರೆನ ಇಲ್ಲಲ್ ನಡತಿನ ತುಡರ್ ಪರ್ಬದ ಲೇಸ್ ಡ್ ಮುಖೇಶ್ ಅಂಬಾನಿನ ಮರ್ಮಾಲ್ ಶ್ಲೋಕಾ ಅಂಬಾನಿ ಬೊಕ್ಕ ರಾಧಿಕಾ ಮರ್ಚೆಂಟ್ ಪಾಲ್ ಪಡೆದಿತ್ತೆರ್ ಪಂದ್ ಮಾಹಿತಿ ಉಂಡು. ಮೊಕುಲು ಲೇಸ್ ಮುಗಿತ್ ದ್ ವಾಪಸ್ ಪೋನಗ ಈ ಕಾರ್ ಡ್ ಪೋತೆರ್ ಪಂದ್ ತೆರಿದ್ ಬೈದ್ಂಡ್. ಆ್ಯಕ್ಸಿಡೆಂಟ್ ಆಯಿನ ಫೆರಾರಿ SF90 ಕಾರ್ ದ ಮೂಲ ಬಿಲೆ 8 ಕೋಟಿ ರೂ. ಆದುಂಡು.

You Missed