ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಅಡ್ಯಾರ್ ಗಾರ್ಡನ್ ಡ್ ಮೇ 27 ಯಕ್ಷಗಾನ ಸ್ಪರ್ಧೆ,ಮೇ 28 ಯಕ್ಷಧ್ರುವ ಪಟ್ಲ ಸಂಭ್ರಮ 2023

ಕುಡ್ಲ: ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ (ರಿ) ಮಂಗಳೂರು ನೆತ್ತ ಮುತಾಲಿಕೆಡ್ ಮೇ 27 ಶನಿವಾರ ಹೈಸ್ಕೂಲ್ ಬೊಕ್ಕ ಕಾಲೇಜ್ ವಿದ್ಯಾರ್ಥಿಲೆಗ್ ಯಕ್ಷಗಾನ ಸ್ಪರ್ಧೆ ಅಂಚೆನೆ ಮೇ 28 ಐತಾರ ಯಕ್ಷಧ್ರುವ ಪಟ್ಲ ಸಂಭ್ರಮ 2023 ಅಡ್ಯಾರ್ ದ ಅಡ್ಯಾರ್ ಗಾರ್ಡನ್ ಡ್ ನಡಪರೆ ಉಂಡು ಪಂದ್ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ಟಿ ತೆರಿಪಾಯೆರ್.

ಪ್ರೆಸ್ ಕ್ಲಬ್ ಡ್ ಗುರುವಾರ ನಡತಿನ ಸುದ್ದಿಗೋಷ್ಠಿಡ್ ಪಾತೆರಿನ ಆರ್, ಕನ್ಯಾನ ಸದಾಶಿವ ಶೆಟ್ರೆನ ಅಧ್ಯಕ್ಷತೆಡ್ ಯಕ್ಷಧ್ರುವ ಪಟ್ಲ ಸಂಭ್ರಮ ನಡಪರೆ ಉಂಡು. ಬಲಿಪ ನಾರಾಯಣ ಭಾಗವತ ವೇದಿಕೆಡ್ ಮೇ 28 ಬೊಲ್ಪುಗು 8 ಗಂಟೆರ್ದ್ ಚೌಕಿ ಪೂಜೆ, ಬೊಕ್ಕ ಅಡ್ಯಾರ್ ಕಟ್ಟೆರ್ದ್ ಸಂಭ್ರಮಾಧ್ಯಕ್ಷೆರ್ನ ಮೆರವಣಿಗೆ ನಡಪರೆ ಉಂಡು. 9.30 ಗು ಪಟ್ಲ ಸಂಭ್ರಮ ಉದಿಪನ ಆವರೆ ಉಂಡು ಪಂಡೆರ್. ಒಡಿಪು ಪೇಜಾರ ಮಠತ್ತ ಶ್ರೀ ವಿಶ್ವಪ್ರಸನ್ನ ತೀರ್ಥ ಸ್ವಾಮಿಲು, ಎಡನೀರು ಮಠತ್ತ ಸಚ್ಚಿದಾನಂದ ಭಾರತೀ ಸ್ವಾಮೀಜಿ, ಶ್ರೀ ಕ್ಷೇತ್ರ ಮಾಣಿಲದ ಮೋಹನದಾಸ ಸ್ವಾಮೀಜಿ, ಬಾರ್ಕೂರು ಸಂಸ್ಥಾನದ ವಿಶ್ವಸಂತೋಷ ಭಾರತಿ ಸ್ವಾಮೀಜಿ, ಒಡಿಯೂರು ಕ್ಷೇತ್ರದ ಶ್ರೀ ಗುರುದೇವಾನಂದ ಸ್ವಾಮೀಜಿ ಸಾನಿಧ್ಯ ವಹಿಸೊನ್ವೆರ್. ಕಟೀಲು ಶ್ರೀ ಲಕ್ಷ್ಮೀನಾರಾಯಣ ಅಸ್ರಣ್ಣ, ಪಾವಂಜೆ ಕ್ಷೇತ್ರದ ಧರ್ಮದರ್ಶಿ ಡಾ. ಯಾಜಿ ನಿರಂಜನ ಭಟ್ ಆಶೀರ್ವಚನ ಮಲ್ಪುವೆರ್. ಕನ್ಯಾನ ಸದಾಶಿವ ಶೆಟ್ಟಿ ಸಭೆತ್ತ ಗುರ್ಕಾರ್ಮೆ ಒಯಿಸೊನ್ವೆರ್.

ಸಿಎ ದಿವಾಕರ್ ರಾವ್ ಕಟೀಲು ಕಾರ್ಯಕ್ರಮ ಉದಿಪನ ಮಲ್ಪುವೆರ್. ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ಟಿ, ಪ್ರಧಾನ ಸಂಚಾಲಕೆರಾಯಿನ ಐಕಳ ಹರೀಶ್ ಶೆಟ್ಟಿ ಬೊಕ್ಕ ಶಶಿಧರ ಶೆಟ್ಟಿ ಬರೋಡ ಮೊಕ್ಲೆನ ಮಾರ್ಗದರ್ಶನಡ್ ಸಮಾಜದ ಗಣ್ಯೆರ್ ಮಲ್ಲ ಬಿನ್ನೆರಾದ್ ಬರ್ಪೆರ್.

ಲೇಸ್ ಡ್ ಆರೋಗ್ಯ ಶಿಬಿರ ಉದಿಪನ, ರಕ್ತದಾನ ಶಿಬಿರ ಉದಿಪನ ಆವರೆ ಉಂಡು.

ಯಕ್ಷಗಾನ ಸಪ್ತಸ್ವರ

ಬೊಲ್ಪುಗು 11 ಗಂಟೆರ್ದ್ ಯಕ್ಷಗಾನ ಸಪ್ತಸ್ವರ- ಪುತ್ತಿಗೆ, ಅಮ್ಮಣ್ಣಾಯ, ರಾಘವೇಂದ್ರ ಮಯ್ಯ, ಬಲಿಪ, ಕನ್ನಡಿಕಟ್ಟೆ, ಜನ್ಸಾಲೆ, ಕಕ್ಕೆಪದವು, ಉಪಾಧ್ಯಾಯ, ಬೊಳಿಂಜಡ್ಕ, ಪದ್ಯಾಣ, ಸುನಿಲ್, ಸುಜನ್, ಹಾಲಾಡಿ ಮುತಾಲಿಕೆಡ್ ಉಜಿರೆ ಅಶೋಕ್ ಭಟ್ ನಿರೂಪಣೆಡ್ ಕಾರ್ಯಕ್ರಮ ನಡಪರೆ ಉಂಡು. ಮಧ್ಯಾಹ್ನ 2.30 ರ್ದು ಯಕ್ಷಗಾನ ತಾಳಮದ್ದಲೆ, ಬಯ್ಯಡ್ 4 ರ್ದ್ ಮಹಿಳಾ ಯಕ್ಷಗಾನ ನಡಪರೆ ಉಂಡು.

ಯಕ್ಷಧ್ರುವ ಪಟ್ಲ ಪ್ರಶಸ್ತಿ
ಈ ಸರ್ತಿ ಪ್ರೊ. ಎಮ್ ಎಲ್ ಸಾಮಗ ಮೆರೆಗ್ ಯಕ್ಷಧ್ರುವ ಪಟ್ಲ ಪ್ರಶಸ್ತಿ 2023 ಪಟ್ಟರೆ ಉಂಡು.

ಗೌರವಾರ್ಪಣೆ

ಈ ಪೊರ್ತುಡು ಟ್ರಸ್ಟ್ ದ ಮಹಾಪೋಷಕೆರ್ ಎಂಆರ್ ಜಿ ಗ್ರೂಪ್ ದ ಚೇರ್ ಮನ್ ಪ್ರಕಾಶ್ ಶೆಟ್ಟಿ, ಆಶಾ ಪ್ರಕಾಶ್ ಶೆಟ್ಟಿ ದಂಪತಿಲೆಗ್ ಗೌರವಾರ್ಪಣೆ ನಡಪರೆ ಉಂಡು.

ಕಲಾ ಗೌರವ
2023ತ್ತ ಯಕ್ಷಧ್ರುವ ಕಲಾ ಗೌರವೊಗು ಬೇತೆ ಬೇತೆ ಕ್ಷೇತ್ರದ 20 ಪ್ರಕಾರದ ಸಾಧಕೆರೆನ್ ಗುರ್ತಿಸಾದ್ಂಡ್. ವೈದಿಕ ಕ್ಷೇತ್ರಡ್ ಕುಡುಪು ನರಸಿಂಹ ತಂತ್ರಿಲು, ಮಾಧ್ಯಮ ಕ್ಷೇತ್ರಡ್ ಮನೋಹರ್ ಪ್ರಸಾದ್, ಭಾರತೀಯ ಸೇನೆ- ಬ್ರಿಗೇಡಿಯರ್ ಐಎನ್ ರೈ, ಕಲಾ ಸಂಘಟನೆ- ಕಲಾರಂಗ ಉಡುಪಿ ಕನ್ನಡ ಸಂಘ ಬಹೈರೆನ್ (ವಿದೇಶ), ಶಾಸ್ತ್ರೀಯ ಸಂಗೀತ – ವಿದ್ವಾನ್ ಯೋಗೀಶ್ ಶರ್ಮ ಬಳ್ಳಪದವು, ಹರಿಕಥೆ- ಮಹಾಬಲ ಶೆಟ್ಟಿ, ರಂಗಭೂಮಿ-ಚಲನಚಿತ್ರ- ತಮ್ಮಲಕ್ಷ್ಮಣ, ಭರತನಾಟ್ಯ : ನಾಟ್ಯಾಚಾರ್ಯ ಉಳ್ಳಾಲ ಮೋಹನ್ ಕುಮಾರ್, ಕಂಬುಲ- ಭಾಸ್ಕರ ಕೋಟ್ಯಾನ್ ಕೊಳಕೆ ಇರ್ವತ್ತೂರು, ಯಕ್ಷಗಾನ- ಕೊಳ್ತಿಗೆ ನಾರಾಯಣ ಗೌಡ, ಡಿ ಮನೋಹರ್ ಕುಮಾರ್, ಮಹಾಬಲ ದೇವಾಡಿಗ ಕಮಲಶಿಲೆ, ರಘುರಾಮ‌ ಮಡಿವಾಳ ಮಂದಾರ್ತಿ, ಹವ್ಯಾಸಿ – ಶಂಭುಶರ್ಮ ವಿಟ್ಲ, ಶಿವರಾಮ ಪಣಂಬೂರು, ಮಹಿಳೆ ವಿಭಾಗಡ್ ಲೀಲಾವತಿ ಬೈಪಡಿತ್ತಾಯ, ದೈವಾರಾದನೆ ಕ್ಷೇತ್ರಡ್ ಬಾಚಕೆರೆ ದೇಜಪ್ಪ ಪರವ, ಜಾದೂ: ಕುದ್ರೋಳಿ ಗಣೇಶ್, ಚಿತ್ರಕಲೆ: ದಯಾನಂದ್, ದಯಾ ಆಟ್ಸ್೯, ಭಜನೆ: ಶಿವಪ್ಪ ಆಚಾರ್ಯ ಮೊಕುಲು ಪಟ್ಲ ಕಲಾ ಗೌರವ ಪ್ರಶಸ್ತಿ ದೆತೊನರೆ ಉಲ್ಲೆರ್.

ಮರಣೋತ್ತರ ಗೌರವ
ದೈವ ನರ್ತಕೆರ್ ಕಾಂತು ಅಜಿಲ ಎಡಮೊಗರು, ಗುರು ದಪ್ಪ ಕಟೀಲು ಮೇಳದ ಕಲಾವಿದೆ ಗುರುವಪ್ಪ ಬಾಯಾರ್ ಬೊಕ್ಕ ಜಗದೀಶ ನಲ್ಕ, ಬಡಗುತಿಟ್ಟುದ ಸಾಧು ಕೊಟ್ಟಾರಿ ಕುಟುಂಬಗ್ ಮರಣೋತ್ತರ ಗೌರವ ತಲಾ ಒಂಜಿ ಲಕ್ಷ ರೂಪಾಯಿ ಕೊರಿಯರೆ ಉಂಡು.

ಸಿನಿಮಾ ನಟೆರ್

ಲೇಸ್ ಡ್ ಸಿನಿಮಾ ನಟೆ ಕಿಚ್ಚ ಸುದೀಪ್, ಕಾಂತಾರ ಸಿನಿಮಾದ ರಿಷಬ್ ಶೆಟ್ಟಿ ಬೊಕ್ಕ ಬೇತೆ ಕಲಾವಿದೆರ್ ಪಾಲ್ ಪಡೆಯರೆ ಉಲ್ಲೆರ್. ರಾತ್ರೆ 8 ಗಂಟೆರ್ದ್ “ಯಕ್ಷಧ್ರುವ ಕಲಾ ವೈಭವ” ಅಪೂರ್ವ ಪ್ರತಿಭೆಲೆನ ಸ್ಪರ್ಧೆ ಬೊಕ್ಕ ಪ್ರದರ್ಶನ ನಡಪರೆ ಉಂಡು.

ಸೇವಾ ಕಾರ್ಯ
ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ರ್ದ್ ಏಳ್ ವರ್ಷಡ್ ಸುಮಾರ್ 8.5 ಕೋಟಿ ರೂ ಕಲಾವಿದೆರೆಗ್ ಪಟ್ ದ್ಂಡ್. 5 ಕಲಾವಿದೆರೆಗ್ ತಲಾ ಒಂಜಿ ಲಕ್ಷ ಪನವುದ ಒಟ್ಟುಗು ಪಟ್ಲ ಪ್ರಶಸ್ತಿ ಕೊರ್ತುಂಡು. ಇಲ್ಲ್ ಕಟ್ಟರೆ 132 ಕಲಾವಿದೆರೆಗ್ ತಲಾ 25 ಸಾವಿರ ರೂ. ಪಟ್ ದ್ಂಡ್. 145 ಅಶಕ್ತ ಕಲಾವಿದೆರೆಗ್ ತಲಾ 50 ಸಾರ ರೂ. ವಿತರಣೆ, ಪ್ರಾದೇಶಿಕ ಘಟಕ ವ್ಯಾಪ್ತಿದ 350 ಕಲಾವಿದೆರೆಗ್ ತಮ್ಮನ, ಗೌರವ ಧನ, ಅಪಘಾತ ವಿಮಾ ಯೋಜನೆಡ್ ಪ್ರತಿ ವರ್ಷ 950 ಕಲಾವಿದೆರ್ ಪುದರ್ ನೋಂದಣಿ ಮಲ್ದೆರ್ ಪಂದ್ ಆರ್ ತೆರಿಪಾಯೆರ್.

ಸಂಘಟನಾ ಕಾರ್ಯದರ್ಶಿ ಕದ್ರಿ ನವನೀತ ಶೆಟ್ಟಿ ಮೇರ್ ಪಾತೆರ್ದ್, ಹೈಸ್ಕೂಲ್ ಬೊಕ್ಕ ಕಾಲೇಜು ವಿಭಾಗಡ್ ಯಕ್ಷಗಾನ ಸ್ಪರ್ಧೆ ನಡಪರೆ ಉಂಡು. ಕಾಲೇಜಿ ವಿಭಾಗಡ್ 23 ತಂಡ ಹೈಸ್ಕೂಲ್ ವಿಭಾಗಡ್ 12 ತಂಡ ನೋಂದಣಿ ಮಲ್ದ್ಂಡ್ ಪಂಡೆರ್.

ಪತ್ರಿಕಾಗೋಷ್ಠಿಡ್ ಟ್ರಸ್ಟ್ ದ ಪ್ರಧಾನ ಕಾರ್ಯದರ್ಶಿ ಪುರುಷೋತ್ತಮ ಭಂಡಾರಿ ಅಡ್ಯಾರ್, ಕೋಶಾಧಿಕಾರಿ CA ಸುದೇಶ್ ಕುಮಾರ್ ರೈ , ಉಪಾಧ್ಯಕ್ಷೆರ್ ಡಾ ಮನು ರಾವ್, ಪ್ರದೀಪ್ ಆಳ್ವ ಕದ್ರಿ ಇತ್ತೆರ್.

ಇಂದಿರಾ ಕ್ಯಾಂಟಿನ್ ಗ್ ಜೀವಕಳೆ

ಕಾಂಗ್ರೆಸ್ ಸರ್ಕಾರ ಬತ್ತಿ ಬೊಕ್ಕ ಇಂದಿರಾ ಕ್ಯಾಂಟಿನ್‌ಗ್ ಪೊಸ ದೇಖಿ ಬೈದ್ಂಡ್. ಬಿಜೆಪಿ ಸರ್ಕಾರದ ಪೊರ್ತುಡು ಕಾಸ್ ಬುಡುಗಡೆ ಆವಂದೆ ಇಂದಿರಾ ಕ್ಯಾಂಟಿನ್ ಸಮಸ್ಯೆನ್ ಎದುರಿಸಾವೊಂದು ಇತ್ತ್ಂಡ್.

ಆಂಡ ಇತ್ತೆ ಕಾಂಗ್ರೆಸ್ ಸರ್ಕಾರ ಅಧಿಕಾರಗ್ ಬತ್ತಿಬೊಕ್ಕ ಬೆಂಗ್ಲೂರ್‌ಡ್ 198 ವಾರ್ಡ್‌ಡ್ ಇಂದಿರಾ ಕ್ಯಾಂಟಿನ್‌ಗ್ ಕುಡ ಜೀವಕಳೆ ಬೈದ್ಂಡ್. ಒಂಜಿ ತಿಂಗೊಲ್‌ದ ಉಲಯಿ ಪೊಸ ಟೆಂಡರ್ ಆದ್ ಇಂದಿರಾ ಕ್ಯಾಂಟಿನ್ ರೀ ಓಪನ್ ಆಯರೆ ಉಂಡು. ಈ ಸರ್ತಿ ಬಗೆ ಬಗೆತ್ತ ತೆನಸ್‌ದ ಮೆನು ಉಂಡು.

ಪರಶುರಾಮ ಸೃಷ್ಟಿದ ತುಳುನಾಡ್‌ಡ್ ಇನಿ ಪತ್ತನಾಜೆ

ಪರಶುರಾಮ ದೇವೆರ್ ಸೃಷ್ಟಿ ಮಲ್ತಿನ ಕೇರಳದ ಕಾಸ್ರೋಡ್ ಜಿಲ್ಲೆರ್ದ್ ಪತ್ತ್‌ದ್ ದ.ಕ ಜಿಲ್ಲೆ ಬೊಕ್ಕ ಒಡಿಪು ಜಿಲ್ಲೆದ ಬಾರ್ಕೂರು ಮುಟ್ಟ ಇಪ್ಪುನ ತುಳುನಾಡ್‌ಡ್ ಪಿರವುರ್ದ್ ತುಳುನಾಡ್‌ದ ಕೆಲ ಸಂಪ್ರದಾಯಲು ಇತ್ತೆಲ ನಡತೊಂದು ಉಂಡು. ಅವೆಟ್ ಒಂಜಿ ಪತ್ತನಾಜೆ.

ಮೇ 25 ಇನಿರ್ದ್ ಪತ್ತನಾಜೆ ನಡತೊಂದು ಉಂಡು. ಅಂಚಾದ್ ತುಳುನಾಡ್‌ದ ಅಂಕ, ಆಯನ, ನೇಮ ಇಂಚಿತ್ತಿನ ಧಾರ್ಮಿಕ ಉಚ್ಚಯಲು ಕೈದ್ ಆಪುಂಡು. ನನ ತುಡರ್ ಪರ್ಬ ಸುರು ಆನಗ ಕುಡ ಇಂಚಿತ್ತಿನ ಆಚರಣೆಲು ನಡಪರೆ ಉಂಡು.

ಪತ್ತನಾಜೆರ್ದ್ ಬೊಕ್ಕ ನೇಮೋಚ್ಚಯದ ಗಗ್ಗರದ ಸಬ್ದ, ಆಟದ ಚೆಂಡೆದ ಸಬ್ದ, ದೈವಸ್ಥಾನಡ್ ನಡಪುನ ನೇಮೋಚ್ಚಯದ ತಾಸೆದ ಸಬ್ದ, ಕದೋನಿದ ಸಬ್ದ, ದೇವಲ್ಯದ ಜಾತ್ರಾ ಉಚ್ಚಯಡ್ ನಡಪುನ ಪಟಾಕಿದ ಸಬ್ದ ಮಾತಲ ಉಂತ್ಂಡು. ಪತ್ತನಾಜೆದಾನಿ ದೇವಲ್ಯಡ್ ವಸಂತ ಪೂಜೆ ನಡತ್ತ್‌ದ್ ಅಯಿರ್ದ್ ಬೊಕ್ಕ ದೇವೆರ್ ಗರ್ಭ ಗುಡಿತ್ತ ಉಲಯಿ ಪೋಪೆರ್. ತುಡರ್ ಪರ್ಬರ್ದ್ ಬೊಕ್ಕ ದೇವೆರ್ ಗರ್ಭಗುಡಿರ್ದ್ ಪಿದಯ್ ಬರ್ಪೆರ್. ಆಟಿ ತಿಂಗೊಲ್ ಮುಗ್ಗಿದ್ ಸೋಣ ತಿಂಗೊಲ್ ಬನ್ನಗ ಹಿಂದೂ ಸಂಪ್ರದಾಯದ ಪ್ರಕಾರ ಮಾತ ಉಚ್ಚಯ ಸುರು ಆಪುಂಡು.