ಬೆಂಗ್ಲೂರ್: 24 ಜನ ಶಾಸಕೆರ್ ಪೊಸ ಸಚಿವೆರಾದ್ ಎಲ್ಲೆ (ಮೇ27) ಬೊಲ್ಪುಗು ರಾಜಭವನಡ್ ಪ್ರಮಾಣ ವಚನ ಸ್ವೀಕಾರ ಮಲ್ಪೆರೆ ಉಲ್ಲೆರ್.
ಸರ್ಕಾರದ ಬಿನ್ನಾಪುದ ಮಿತ್ತ್ ಪ್ರಮಾಣ ವಚನ (ಪದಗ್ರಹಣ) ಲೇಸ್ ಗ್ ರಾಜ್ಯಪಾಲೆರ್ ಒಪ್ಪಿಗೆ ಕೊರ್ತೆರ್. ಆಯಿನಾತ್ ಬೇಗಡೇ ಕಾಂಗ್ರೆಸ್ ದ 24 ಜನ ಪೊಸ ಸಚಿವೆರೆನ ಪಟ್ಟಿ ಬುಡುಗಡೆ ಆವೆರೆ ಉಂಡು.
ರಾಜ್ಯಡ್ ಮೇ29 ರ್ದ್ ಪ್ರಾಥಮಿಕ ಶಾಲೆ ಸುರು ಆವೆರೆ ಉಂಡು.
ಇಂಚಾದ್ ಶಾಲೆಡ್ ಖಾಲಿ ಇಪ್ಪುನ 27ಸಾರ ಶಿಕ್ಷಕೆರೆನ ಬೇಲೆಗ್ ತಾತ್ಕಾಲಿಕ ಶಿಕ್ಷಕೆರೆನ್ ನೇಮಕ ಮಲ್ಪೆರೆ ರಾಜ್ಯ ಶೈಕ್ಷಣಿಕ ಇಲಾಖೆ ದುಂಬಾತ್ಂಡ್. ಆದ್ಯತೆದ ಮಿತ್ತ್ ತಾತ್ಕಾಲಿಕ ಶಿಕ್ಷಕೆರೆನ ನೇಮಕಾತಿಗ್ ಜಿಲ್ಲಾ ಉಪನಿರ್ದೇಶಕೆರ್ ತಾಲೂಕುದಲೆಕ್ಕ ಬೇಲೆದ ಕುಡೊರ ಹಂಚಿಕೆ ಮೇ26 (ಇನಿ) ತ್ತ ಉಲಯಿ ಮಲ್ಪೊಡು ಪಂದ್ ಆದೇಶ ಕೊರ್ತುಂಡು. ತಾತ್ಕಾಲಿಕ ಶಿಕ್ಷಕೆರಾದ್ ಆಯ್ಕೆ ಆಯಿನಕ್ಲೆಗ್ ತಿಂಗೊಲ್ ಗ್ 10 ಸಾರ ರೂ. ಸಂಬಳ ತಿಕ್ಕುಂಡು.
ಡೆಲ್ಲಿ: ಉಬರ್ ಕಂಪನಿ ಜೂನ್ ತಿಂಗೊಲ್ ರ್ದ್ ಬೆಂಗ್ಲೂರ್ ಡ್ ಇ.ವಿ. ಕ್ಯಾಬ್ ಸೇವೆನ್ ಸುರು ಮಲ್ಪೆರೆ ಉಂಡು.
ಉಂದು ಸುರು ಆಯಿನ ಬೊಕ್ಕ ಉಬರ್ ಗ್ರಾಹಕೆರ್, ಕ್ಯಾಬ್ ಸೇವೆ ಪಡೆಪುನ ಪೊರ್ತುಡು ಇ.ವಿ. ಕ್ಯಾಬ್ ಬೋಡು ಪಂದ್ ಬೇಡಿಕೆ ಸಂದಾಯೆರೆ ಅವಕಾಶ ಉಂಡು.
ಈ ಸೇವೆ ಬೆಂಗ್ಲೂರ್ ಮಾತ್ರ ಅತ್ತಂದೆ ಬೊಂಬೈ ಬೊಕ್ಕ ಡೆಲ್ಲಿಡ್ ಸುರು ಆಪುಂಡು. ದುಂಬದ ದಿನಟ್ ನೆನ್ ಹಂತ ಹಂತವಾದ್ ಬೇತೆ ಬೇತೆ ಪೇಂಟೆಡ್ ಸುರು ಮಲ್ಪೆರೆ ಉಂಡು ಪಂದ್ ಉಬರ್ ಇಂಡಿಯಾ ಬೊಕ್ಕ ದಕ್ಷಿಣ ಏಷ್ಯಾ ಅಧ್ಯಕ್ಷೆರ್ ಪ್ರಭಜೀತ್ ಸಿಂಗ್ ಪಂತೆರ್.
ಇ.ವಿ.ಡ್ ಚಾರ್ಜಿಂಗ್ ಸೌಲಭ್ಯ ಕೊರಿಯೆರೆ ಜಿಯೊ-ಬಿಪಿ ಬೊಕ್ಕ ಜಿಎಂಆರ್ ಗ್ರೀನ್ ದೊಟ್ಟಿಗೆ ಒಪ್ಪಂದ ಮಲ್ದ್ಂಡ್. ಉಬರ್ ಪಾಲ್ ಗ್ ಪ್ರಮುಖ ಆಯಿನ 7 ಪೇಂಟೆಡ್ ಒಟ್ಟು 25 ಸಾರ ಇ.ವಿ. ಸೇವೆನ್ ಮುಕ್ತ ಮಲ್ಪೆರೆ ಉಂಡು.
ಕುಡ್ಲ: ಫೈಸಲ್‌ ಪೇಂಟೆದ ನೇತ್ರಾವತಿ ತುದೆ ಬರಿಟ್ಟ್ ಕಲ್ವ ತಾದಿಡ್ ಪೊಯ್ಯೆ ದೆತ್ತೊಂದು ಇತ್ತಿನ ಬಗ್ಗೆ ತಿಕಿನ ಪೊಲಬುದ ಮಿತ್ತ್ ಕಂಕನಾಡಿ ನಗರ ಠಾಣೆ ಪೊಲೀಸೆರ್ ಜಾಗೆಗ್ ರೈಡ್ ಮಲ್ತ್ ದ್ 10 ಲೋಡ್‌ ಪೊಯ್ಯೆ, ಒಂಜಿ ಜೆಸಿಬಿನ್ ವಶಕ್ಕ್ ಪಡೆತೆರ್.
ಈ ಘಟನೆ ಕೋಡೆ ರಾತ್ರೆ 3 ಗಂಟೆಗ್ ಕಂಕನಾಡಿ ನಗರ ಪೊಲೀಸ್‌ ಠಾಣೆದ ಪೊಲೀಸ್‌ ಉಪನಿರೀಕ್ಷಕಿ ಜ್ಯೋತಿ ಎನ್‌.ಎ. ಮೇರ್ ರೌಂಡ್ಸ್‌ಡ್ ಇಪ್ಪುನಗ ನಡತ್ಂಡ್.
ವಶಕ್ಕ್ ಪಡೆಯಿನ ಸೊತ್ತುದ ಬಿಲೆ ಸುಮಾರ್ 3.70 ಲಕ್ಷ ರೂ. ಪಂದ್ ಅಂದಾಜ್ ಮಲ್ಪೊಲಿ. ಈ ಬಗೆಟ್ ಕಂಕನಾಡಿ ನಗರ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಕುಡ್ಲ: ಉತ್ಥಾನ ಬಳಗ ಸೇವಾ ಟ್ರಸ್ಟ್ (ರಿ) ನೆತ್ತ ಮುತಾಲಿಕೆಡ್ ದಾಸರ ಭಜನೆ (ನಲಿಕೆ) ಪಂತೊ ಮೇ28 ಐತಾರ ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯದ ಚಾವಡಿಡ್ ನಡಪರೆ ಉಂಡು.
ನೆತ್ತ ಉದಿಪನ ಲೇಸ್ ಬೊಲ್ಪುಗು ನಡಪರೆ ಉಂಡು. ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯದ ಅನುವಂಶಿಕ ಮೊಕ್ತೇಸರೆರ್ ಶ್ರೀನಿವಾಸ ಯಾನೆ ಅಪ್ಪು ಪೂಜಾರಿ ತುಡರ್ ಅರ್ಲಾವೆರೆ ಉಲ್ಲೆರ್. ಬೊಕ್ಕ ಮಧ್ಯಾಹ್ನ ಅನ್ನಸಂತರ್ಪಣೆ, ಬಯ್ಯಗ್ ಸಮಾರೋಪ ಸಮಾರಂಭ ಲೇಸ್ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಕಾಂಗ್ರೆಸ್‌ದ ಪೆರಿಯ ಕಾರ್ಯಕರ್ತೆ, ತುಳು ಬಾಷೆ, ಸಾಹಿತ್ಯಗ್ ಪ್ರಮಾಣಿಕವಾದ್ ಪುಗೆಲ್ ಕೊರ್ದು ತುಳು ಅಪ್ಪೆನ ಚಾಕಿರಿ ಮಲ್ದಿನ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಅಧ್ಯಕ್ಷೆರ್, ಅಖಿಲಭಾರತ ತುಳು ಒಕ್ಕೂಟದ ಅಧ್ಯಕ್ಷೆರ್ ಎ.ಚಂದ್ರಶೇಖರ್ ಭಂಡಾರಿ ಬೊಕ್ಕ ಅಖಿಲಭಾರತ ತುಳು ಒಕ್ಕೂಟದ ಪನವುದ ಪಾಲವೆರ್ ಚಂದ್ರಹಾಸ್ ದೇವಾಡಿಗ ಮೇರೆಗ್ ಟೈಮ್ಸ್ ಆಫ್ ಕುಡ್ಲ ಕಚೇರಿಡ್ ಗುರುವಾರ ಮಾನಾದಿಗೆ ನಡತ್ಂಡ್.
ಮಾನಾದಿಗೆ ದೆತೊಂದು ಪಾತೆರಿನ ಎ.ಸಿ. ಭಂಡಾರಿ ಮೇರ್, ಟೈಮ್ಸ್ ಆಫ್ ಕುಡ್ಲದಕ್ಲೆಗ್ ತುಳುತ್ತ ಮಿತ್ತ್ ಇಪ್ಪುನ ಮೋಕೆನ್ ತೂನಗ ಯಂಕೇ ಆಶ್ಚರ್ಯ ಆಪುಂಡು. ತುಳು ಪೇಪರ್ ನಡಪಾಯರೆ ಏತ್ ಬಂಗ ಉಂಡು ಪಂದ್ ಯಂಕ್ ಗೊತ್ತ್ಂಡು. ತುಳು ಭಾಷೆ ಸಂಸ್ಕೃತಿದ ಮಿತ್ತ್ ಇಪ್ಪುನ ಅಭಿಮಾನ ಅಂಚನೆ ಈ ಸೇವೆ ಮಲ್ಪುನೆನ್ ತೂನಗ ಭಾರೀ ಕುಷಿ ಆಪುಂಡು.ಎಂಕ್ ಲ ತುಳು ಅಪ್ಪೆನ ಸೇವೆಮ್ ನನಾತ್ ಕಾಲ ಮಲ್ಪುನ ಅವಕಾಶ ಒದಗ್ ದ್ ಬರಡ್ ಪಂದ್ ಪಂಡೆರ್.
ಚಂದ್ರಹಾಸ್ ದೇವಾಡಿಗ ಮೇರ್ ಪಾತೆರ್ದ್ ಟೈಮ್ಸ್ ಆಫ್ ಕುಡ್ಲ ಸಂಸ್ಥೆ ನನಾತ್ ಎಡ್ಡೆಂತಿನ ಬೇಲೆ ಮಲ್ಪಡ್ ಪಂದ್ ಎಡ್ಡೆಪ್ಪುನು ಬಯಕ್ಯೆರ್. ಈ ಪೊರ್ತುಡು ಟೈಮ್ಸ್ ಆಫ್ ಕುಡ್ಲ ಸಂಸ್ಥೆದ ಮುಖ್ಯಸ್ಥೆರ್ ಬೊಕ್ಕ ಸಿಬ್ಬಂದಿ ಕೂಟದಕುಲು ಇತ್ತೆರ್.
ಬಂಟ್ವಾಳ: ಪೊಸತಾದ್ ನಿರ್ಮಾಣ ಆವೆರೆ ಇಪ್ಪುನ ಮಾಣಿಗುತ್ತು ಶ್ರೀ ಉಳ್ಳಾಲ್ತಿ, ಬೆಮ್ಮೆರ್, ಗುಡ್ಡೆಚಾಮುಂಡಿ, ಪಂಜುರ್ಲಿ ಮಲೆಕೊರತಿ ದೈವೊಲೆನ ಧರ್ಮಚಾವಡಿಗ್ ಕೆಸರ್ ಕಲ್ಲ್ ಪಾಡುನ ಲೇಸ್ ಅರ್ಚಕೆರ್ ಪಳನೀರು ಅನಂತ ಭಟ್ರೆನ ಪೌರೋಹಿತ್ಯಡ್ ವೈದಿಕ ವಿಧಿವಿಧಾನದೊಟ್ಟಿಗೆ ನಡತ್ಂಡ್.
ಪಿರಾಕ್ ದ ಕಾಲರ್ದಿಂಚಲ ಇತಿಹಾಸ ಇಪ್ಪುನ ಒರ್ತಿ ಉಳ್ಲಾಲ್ತಿ ಮೂಜಿ ದೈವೊಲು ಪನ್ಪುನ ಪರಂಪರೆ ಇಪ್ಪುನ ಮಾಣಿ ಗ್ರಾಮಡ್ ಉಳ್ಳಾಲ್ತಿಗ್ ವರ್ಷಾವಧಿ ಒಂಜಿ ಮೆಚ್ಚಿ ಜಾತ್ರೆ ಆಂಡ, ದೈವೊಲೆಗ್ ವರ್ಷಡ್ 7 ಕಡೆಟ್ ನೇಮ ನಡಪುಂಡು. ಗ್ರಾಮದ ಈ ಮತ ಸೇವೆಗ್ ಮಾಣಿಗುತ್ತು ಭಂಡಾರದ ಇಲ್ಲಲ್ ರ್ದ್ ಭಂಡಾರ ಪೋಪುನವು ರೂಢಿ ಆತ್ಂಡ್.
ಪರತ್ ಚಾವಡಿಗ್ ಸುಮಾರ್ ವರ್ಷ ಕರಿದ್ ಅಜೀರ್ಣಾವಸ್ಥೆಡ್ ಇಪ್ಪುನಗ, 20 ವರ್ಷದ ಪಿರವು ಪೊಸ ಚಾವಡಿನ್ ಎಲ್ಯ ಮಲ್ತ್ ದ್ ನಿರ್ಮಾಣ ಮಲ್ತೆರ್. ಆಂಡ ಪ್ರಶ್ನಾಚಿಂತನೆಡ್ ಬೊಕ್ಕ ದೈವೊದ ನುಡಿಟ್ಟ್ ತೂಜಿದ್ ಬತ್ತಿನ ಪ್ರಕಾರ ಚಾವಡಿನ್ ಪೊಸತಾದ್ ದುಂಬುದ ಸಂಪ್ರದಾಯದಂಚೆನೆ ನಿರ್ಮಾಣ ಮಲ್ಪುನ ಉದ್ದೇಶರ್ದ್ ನಿರ್ಮಾಣ ಮಲ್ಪೆರೆ ಗುತ್ತುದಕುಲು ಬೊಕ್ಕ ಗ್ರಾಮಸ್ಥೆರ್ ದುಂಬಾತ್ತೆರ್.
ಈ ಪೊರ್ತುಡು ಶಾಸಕೆರ್ ರಾಜೇಶ್ ನಾಯ್ಕ್, ಮಾಜಿ ಸಚಿವೆರ್ ಬಿ. ರಮಾನಾಥ ರೈ, ವಕೀಲೆರ್ ಅಶ್ವನಿ ಕುಮಾರ್ ರೈ, ಬಾಳ್ತಿಲಬೂಡು ಬೃಜೇಶ್ ಬಂಗ, ಪೂಂಜಲ್ಮಾರಗುತ್ತು ಮೋಹನ ಕುಮಾರ್ ಚೌಟ, ಪೆರಾಜೆಗುತ್ತು ಶ್ರೀಕಾಂತ್ ಆಳ್ವ, ಮಾಣಿಗುತ್ತು ನಾಗೇಶ್ ಶೆಟ್ಟಿ, ಮಾಣಿಗುತ್ತು ಸಚಿನ್ ರೈ, ಸಂತೋಷ್ ಶೆಟ್ಟಿ ಅರೆಬೆಟ್ಟು, ಜಗನ್ನಾಥ ಚೌಟ ಬದಿಗುಡ್ಡೆ, ಮಾಣಿ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಬಾಲಕೃಷ್ಣ ಆಳ್ವ ಕೊಡಾಜೆ, ಮಧುಸೂಧನ ಭಟ್ ಭರಣೀಕೆರೆ, ರಾಮಚಂದ್ರ ಪೂಜಾರಿ ಪಾದೆ, ವಿಜೇತ್ ಶೆಟ್ಟಿ ಅರೆಬೆಟ್ಟು, ರವೀಂದ್ರ ರೈ ಖಂಡಿಗ, ರವೀಂದ್ರ ರೈ ಮಂಜೊಟ್ಟಿ, ಗಣೇಶ್ ಭಟ್ ಮಕರಂದ, ಸಂದೀಪ್ ಶೆಟ್ಟಿ ಅರಿಯಡ್ಕ, ಗಂಗಾಧರ್ ರೈ ತುಂಗೆರೆಕೊಡಿ, ಅಮಿತ್ ಕುಮಾರ್ ಜೈನ್ ಕನ್ನೋಟ್ಟುಗುತ್ತು ಮೋಹನ್ ಪೈ ಮಾಣಿ ಬೊಕ್ಕ ಗ್ರಾಮಸ್ಥೆರ್ ಇತ್ತೆರ್.
ಕೇಂದ್ರ ಸರ್ಕಾರದ ಬೇತೆ ಬೇತೆ ಇಲಾಖೆಡ್ ಖಾಲಿ ಇಪ್ಪುನ 1600 ರ್ದ್ ಎಚ್ಚ ಬೇಲೆಗ್ ಅರ್ಜಿ ಪಾಡೊಲಿ.
ಕಿರಿಯ ಗುಮಾಸ್ತೆ, ಕಿರಿಯ ಸಹಾಯಕ ಕಾರ್ಯದರ್ಶಿ ಬೊಕ್ಕ ದತ್ತಾಂಶ ನಮೂದಕ ಕಾರ್ಯನಿರ್ವಾಹಕ ಬೇಲೆಗ್ ಭರ್ತಿ ಮಲ್ಪೆರೆ ಸಿಬ್ಬಂದಿ ನೇಮಕಾತಿ ಆಯೋಗದ ವತಿರ್ದ್ ಕಂಬೈನ್ಡ್ ಹೈಯರ್ ಸೆಕೆಂಡರಿ (10+2) ಲೆವೆಲ್ ಪರೀಕ್ಷೆಗಾದ್ ಅರ್ಜಿ ಸಂದಾವೊಲಿ. ನೆಕ್ಕ್ ಅರ್ಜಿ ಪಾಡುನಕುಲು 18-27 ವರ್ಷದೊಲಯಿ ಇಪ್ಪೊಡು. ನೆತ್ತ ವೆಬ್‌ಸೈಟ್ https://ssc.nic.in ಅತ್ತಂಡ www.sskkr.kar.nic.in
ಕಡಬ: ತಾಲೂಕ್‌ದ ಕುದ್ಮಾರು ಗ್ರಾಮದ ಶಾಂತಿಮೊಗರು ಸಂಕದ ಮಿತ್ತ್‌ರ್ದ್ ಕುಮಾರಧಾರ ತುದೆಕ್ಕ್ ಉದ್ಯಮಿ ಒರಿ ಸೊಂಟೊಗು ಪುಗ್ಗ ಕಟ್ಟ್‌ದ್ ಲಾಗಿದ್ ತೀರ್ ಪೋಯಿನ ಘಟನೆ ನಡತ್ಂಡ್.
ಆಲಂಕಾರ್‌ಡ್ ಉದ್ಯಮಿ ಆದಿಪ್ಪುನ ಚಂದ್ರಶೇಖರ್ ಪೂಜಾರಿ (60) ತೀರ್ ಪೋಯಿನಾರ್. ಮೇರ್ ಶಾಂತಿಮೊಗರು ಸಂಕದ ಮಿತ್ತ್ ತನ್ನ ಕಾರ್‌ನ್ ಉಂತಾದ್ ಕಾಕಜಿ ಬರೆದೀದ್ ಸೊಂಟಗ್ ಪುಗ್ಗೆ ಕಟ್ಟ್‌ದ್ ತುದೆಕ್ಕ್ ಲಾಗಿದೆರ್ ಪಂದ್ ತೆರಿದ್ ಬೈದ್ಂಡ್.
ಜಾಗೆಗ್ ಬೆಳ್ಳಾರೆ ಬೊಕ್ಕ ಕಡಬ ಪೊಲೀಸೆರ್ ಬತ್ತ್‌ದ್ ಮಾಹಿತಿ ಪಡೆಯೊಂದೆರ್. ಆತ್ಮಹತ್ಯೆಗ್ ಸರಿಯಾಯಿನ ಕಾರಣ ತೆರಿದ್ ಬೈದಿಜಿ.
ಗಲೆಜ್ ನೀರ್ ಪರ್ದ್ 30 ರ್ದ್ ಎಚ್ಚ ಜನಕ್ಕ್ ಹುಷಾರ್ ಇಜ್ಜಂದೆ ಆಯಿನ ಘಟನೆ ರಾಯಚೂರುದ ರೇಕಲಮರಡಿ ಗ್ರಾಮಡ್ ನಡತ್ಂಡ್.
ಹುಷಾರ್ ಇಜ್ಜಂದೆ ಆಯಿನಕ್ಲೆನ್ ಅರಕೇರಾ, ದೇವದುರ್ಗ ಬೊಕ್ಕ ರಾಯಚೂರುದ ರಿಮ್ಸ್ ಆಸ್ಪತ್ರೆಗ್ ದಾಖಲ್ ಮಲ್ತ್ ದ್ ಚಿಕಿತ್ಸೆ ಕೊರೊಂದು ಉಲ್ಲೆರ್. ಗ್ರಾಮ ಪಂಚಾಯತಿದ ನಿರ್ಲಕ್ಷ್ಯರ್ದ್ ಈ ಘಟನೆ ನಡತ್ ದ್ಂಡ್ ಪಂದ್ ಕೈತಲ್ ದಕುಲು ಬೆಚ್ಚ ಆತೆರ್. ಗ್ರಾಮಡ್ ಆರೋಗ್ಯ ಇಲಾಖೆ ಸಿಬ್ಬಂದಿ ಇತ್ತೆ ಉಲ್ಲೆರ್.
