ಮುನಿಯಾಲ್ ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಲ್ಯಡ್ ಕಾರ್ತಿಕ ತಿಂಗೊಲ್ದ ಪಕ್ಷಿ ಜಾಗರಣ ಪೂಜೆ ಮುಗಿತಲ ಆಂಡ್.
ಸಾರ ದೀಪದ ಅಲಂಕಾರಡ್ ದೇವೆರೆನ ಗರ್ಭಗುಡಿ ಮೆನ್ಕೊಂದು ಇತ್ತ್ಂಡ್. ಬೊಲ್ಪುಗು 5 ಗಂಟೆಗ್ ಸಾಮೂಹಿಕ ಸುಪ್ರಭಾತ ಪಠಣರ್ದ್ ಸುರು ಆದ್ ಊರುದ ಪ್ರತೀ ಇಲ್ಲಲ್ ರ್ದ್ ಸುಮಾರ್ 60 ನೀಲಾಂಜನ ಆರತಿರ್ದ್ ಪೂಜೆದ ವಿಧಿ ವಿಧಾನ ನಡತ್ಂಡ್. ಅತ್ತಂದೆ ಊರುದ ಸಮಸ್ತ ಭಕ್ತೆರೆರ್ದ್ ಭಜನೆ ನಡತ್ಂಡ್.
ಕುಡ್ಲ ತುಳು ಕೂಟ (ರಿ.) ದ ಮುತಾಲಿಕೆಡ್ ನ.18 ಸನಿಯಾರ ಮಧ್ಯಾಹ್ನ ಸುರತ್ಕಲ್ ವಿದ್ಯಾದಾಯಿನಿ ಪ್ರೌಢಶಾಲೆಡ್ ತುಳುವೆರೆ ತುಡರ ಪರ್ಬೊ ದೀಪೊಲಿ-ಬಲ್ಯೇಂದ್ರೆ ನಡತ್ಂಡ್.
ಈ ಲೇಸ್ ನ್ ಅಗರಿ ಎಂಟರ್ ಪ್ರೈಸಸ್ ರಾಘವೇಂದ್ರ ರಾವ್ ಅಗರಿ ತುಡರ್ ಅರ್ಲಾದ್ ಉದಿಪನ ಮಲ್ತೆರ್. ಕುಡ್ಲ ತುಳುಕೂಟ (ರಿ.) ದ ಗುರ್ಕಾರೆ ಮರೋಳಿ ಬಿ. ದಾಮೋದರ ನಿಸರ್ಗ ಲೇಸ್ ದ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್. ಸುರತ್ಕಲ್ ಪ.ಪೂ ಕಾಲೇಜ್ ಗೋವಿಂದದಾಸ ಕಾಲೇಜ್ ದ ಉಪನ್ಯಾಸಕೆರ್ ವೆಂಕಟರಮಣ ಭಟ್ ಪೊಲಬು ಕೊರಿಯೆರ್.
ಮಲ್ಲ ಬಿನ್ನೆರಾದ್ ಎಂಜೆಎಫ್ ಜನರಲ್ ಮ್ಯಾನೇಜರ್, ಸನ್ನಿಧೀಸ್ ಹೋಟೆಲ್ಸ್ ದ ಭಾಸ್ಕರ್ ಸಾಲ್ಯಾನ್, ಸುರತ್ಕಲ್ ವಿದ್ಯಾದಾಯಿನಿ ಪ್ರೌಢಶಾಲೆದ ಸಂಚಾಲಕೆರ್ ಸುಧಾಕರ ರಾವ್ ಪೇಜಾವರ, ಮುಖ್ಯ ಶಿಕ್ಷಕೆರ್ ಬಾಲಚಂದ್ರ ಕೆ, ಪಾಲ್ ಪಡೆದಿತ್ತೆರ್. ಅಂಚೆನೆ ಸಾಂಸ್ಕೃತಿಕ ಲೇಸ್, ಹರಿದಾಸೆರ್ ತೋನ್ಸೆ ಪುಷ್ಪಳ ಕುಮಾರ್ ಮೆರೆನ ತುಳು ಭಾವಗೀತೆ ಪದರಂಗಿತೊ ನಡತ್ಂಡ್.
ಇತ್ತೆ ಶಬರಿಮಲೆತ್ತ ಬೆಟ್ಟಲೆಡ್ ಅಯ್ಯಪ್ಪನ ನಾಮಸ್ಮರಣೆನೆ ಕೇನೊಂದು ಉಂಡು. ಆಂಡ ಅಲ್ಪದ ಅಯ್ಯಪ್ಪ ದೇವಲ್ಯಗ್ ಪೋಯೆರೆ 18 ಬೆಟ್ಟನ್ ದಾಟೊಡು. ಅವೆರ್ದ್ ಬೊಕ್ಕನೇ ಅಯ್ಯಪ್ಪನ ದರ್ಶನ ಆಪುಂಡು.
ಆ 18 ಬೆಟ್ಟದ ಪುದರ್ ಇಂಚ ಉಂಡು:
ಪೊನ್ನಂಬಲಮೇಡ್, ಗೌಡವಾಮಲ, ನಾಗಮಲ, ಸುಂದರಮಲ, ಚಿತ್ತಂಬಲಮಲ, ದೈಲದುಮಲ, ಶ್ರೀಪಾದಮಲ, ಖಾಲಿಗಿಮಲ, ಮಾತಂಗಮಲ, ದೇವರಮಲ, ನೀಲಕಲ್ ಮಾಳ, ದಳಪರ ಮಾಳ, ನೀಲಿಮಲ, ಕರಿಮಲ, ಪುಟ್ಟುಶೇರಿಮಲ, ಕಲೈಕಟ್ಟಿ ಮಾಳ, ಇಂಜಪ್ಪರ ಮಾಳ ಬೊಕ್ಕ ಶಬರಿಮಲೆ.
ಕೇರಳದ ಬೇತೆ ಬೇತೆ ಭಾಗಡ್ ಬರ್ಸ ಬರೊಂದು ಉಂಡು. ಅಂಚೆನೆ ಶಬರಿಮಲೆಟ್ಟ್ ಭಾರೀ ಬರ್ಸ ಬರೊಂದು ಇಪ್ಪುರ್ನೆದಾವೆರ ರೆಡ್ ಅಲರ್ಟ್ ಘೋಷಣೆ ಆತ್ಂಡ್.
ಅತ್ತಂದೆ ನೀಲಕಲ್ ರ್ದ್ ಪಂಪೈಗ್ ಪೋಪುನ ಮಾರ್ಗಡ್ ಗುಡ್ಡೆ ಜರಿದ್ ಆ ಮಾರ್ಗಡ್ ಸಂಚಾರ ಮಲ್ಪೆರೆ ಆವೊಂದು ಇಜ್ಜಿ. ಅಂಗಾರೆ ಬೊಕ್ಕ ಬುಧಾರ ಬತ್ತಿನ ಭಾರೀ ಬರ್ಸದಾವೆರ ಶಬರಿಮಲೆ ಯಾತ್ರಿಲು ಪರದಾಡುಲೆಕ್ಕ ಆತ್ಂಡ್.
ಕಾರ್ಲದ ಜಯಂತಿನಗರ ಶ್ರೀ ರಾಮ ಮಂದಿರಡ್ ನ.24 ಕ್ಕ್ ತುಳಸಿ ಪೂಜೆ ನಡಪರೆ ಉಂಡು.
ಭಕ್ತಾದಿಲು ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಶ್ರೀ ರಾಮ ಪರಿವಾರ ದೇವೆರೆನ ಅನುಗ್ರಹಗ್ ಪಾತ್ರರಾವೊಡು ಪಂದ್ ಕಾರ್ಲ ಶ್ರೀ ರಾಮ ಮಂದಿರದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
2023 ತ್ತ ವಿಶ್ವಕಪ್ ಪ್ಲೇಯರ್ ಆಫ್ ದಿ ಟೂರ್ನಮೆಂಟ್ ಪ್ರಶಸ್ತಿಗ್ ವಿರಾಟ್ ಕೊಹ್ಲಿ ಪಾತ್ರರಾತೆರ್.
ಒಟ್ಟು 11 ಮ್ಯಾಚ್ ಗೊಬ್ಬಿನ ಕಿಂಗ್ ಕೊಹ್ಲಿ 3 ಶತಕ ಬೊಕ್ಕ 6 ಅರ್ಧಶತಕದ ನೆರವುರ್ದ್ 765 ರನ್ ಮಲ್ದೆರ್. ಇನಿತ್ತ ಫೈನಲ್ ಮ್ಯಾಚ್ ಡ್ 63 ಬಾಲ್ ಡ್ ವಿರಾಟ್ 54 ರನ್ ಮಲ್ದೆರ್. ಬಿಸಿಸಿಐ ಗುರ್ಕಾರೆ ರೋಜರ್ ಬಿನ್ನಿ ಮೇರ್ ಕೊಹ್ಲಿಗ್ ಪ್ಲೇಯರ್ ಆಫ್ ದಿ ಟೂರ್ನಮೆಂಟ್ ಪ್ರಶಸ್ತಿ ಕೊರ್ತೆರ್.
ಬಂಟ್ವಾಳ: ತುಡರ್ ಪರ್ಬದ ಲೆಕ್ಕೊಡು ಪೆರಾಜೆ ಶ್ರೀ ವಿಷ್ಣು ಸ್ಪೋರ್ಟ್ಸ್ ಕ್ಲಬ್ ದ ಮುತಾಲಿಕೆಡ್ ಪೆರಾಜೆ ಯುವಕ ಮಂಡಲ (ರಿ.) ದ ಒಟ್ಟುಸೇರಿಗೆಡ್ 5ನೇ ವರ್ಷದ ಕಬಡ್ಡಿ ಅಂಕಣ ಪೂಜೆ ಬೊಕ್ಕ ಲೆತ್ತಿನ ಗೊಬ್ಬುಗಾರೆರೆನ ಕಬಡ್ಡಿ ಮ್ಯಾಚ್ ನಡತ್ಂಡ್.
ಈ ಲೇಸ್ ಗ್ ಬಿನ್ನೆರಾದ್ ಗ್ರಾಮ ಪಂಚಾಯತ್ ಗುರ್ಕಾರೆ, ಯುವಕ ಮಂಡಲ ಪೆರಾಜೆದ ಮಾಜಿ ಗುರ್ಕಾರೆ ಕುಶಾಲ ಎಂ.ಪೆರಾಜೆ, ಸಂತ ಫಿಲೋಮಿನಾ ಕಾಲೇಜ್ ದ ಕಬಡ್ಡಿ ಕೋಚ್, ಮಾಣಿಶ್ರೀ ಮಾಣಿ ಕೂಟದ ಮಾಜಿ ಆಟಗಾರೆ ಹಬೀಬ್ ಮಾಣಿ, ತನ್ಯಾ ಮೋಟಾರ್ಸ್ ತೊಕ್ಕೊಟ್ಟುದ ಮಾಲಕೆರ್, ಮಾಜಿ ಯುನಿವರ್ಸಿಟಿ ಕಬಡ್ಡಿ ಆಟಗಾರೆ ಗೌತಮ್, ಪೆರಾಜೆ ಗ್ರಾಮ ಪಂಚಾಯತ್ ಸದಸ್ಯೆರ್ ರಾಜರಾಮ್ ಭಟ್ ಕಾಡೂರು ಬೊಕ್ಕ ಯುವಕ ಮಂಡಲ ಪೆರಾಜೆ, ಶ್ರೀ ವಿಷ್ಣು ಸ್ಪೋರ್ಟ್ಸ್ ಕ್ಲಬ್, ಯಂಗ್ ಸ್ಕ್ವಾಡ್ ಪೆರಾಜೆದ ಮತ ಪದುಕೆರ್ ಬೊಕ್ಕ ಸದಸ್ಯೆರ್ ಪಾಲ್ ಪಡೆದಿತ್ತೆರ್. ಈ ಲೇಸ್ ದ ಬೊಕ್ಕ ಬೆಡಿಮರ್ದ್ ಪ್ರದರ್ಶನ, ಚೀಪೆತಿಂಡಿ ಪಟ್ಟಿಯೆರ್.
ಅಂಬಲಪಾಡಿ ಮಹಾಕಾಳಿ ಮಾರ್ಗ, ಶ್ರೀ ವಿಠೋಬ ಭಜನಾ ಮಂದಿರ ಪರಿಸರದ ನಿವಾಸಿ, ಅಂಬಲಪಾಡಿ ಶ್ರೀ ಮಹಾಕಾಳಿ ಜನರಲ್ ಸ್ಟೋರ್ ದ ಸಂಸ್ಥಾಪಕೆರ್ ಜಗನ್ನಾಥ ಪೂಜಾರಿ (78 ವರ್ಷ) ಮೇರ್ ಹುಷಾರ್ ದಾಂತೆ ಒಡಿಪುದ ಖಾಸಗಿ ಆಸ್ಪತ್ರೆಡ್ (ನ.15) ತೀರ್ ಪೋಯೆರ್.
ಮೇರ್ ಅಂಬಲಪಾಡಿ ಬಿಲ್ಲವ ಸೇವಾ ಸಂಘದ ಹಿರಿಯ ಸದಸ್ಯೆರಾತೆರ್. ಮೆರೆಗ್ ಬೊಡೆದಿ, 2 ಆಣ್ ಜೋಕುಲು ಬೊಕ್ಕ 2 ಪೊಣ್ಣು ಜೋಕುಲು ಉಲ್ಲೆರ್.
ಬೊಂಬೈ: ಅಂಧೇರಿ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ವೃಶ್ಚಿಕ ಸಂಕ್ರಾಂತಿ ನ.17 ಸುಕ್ರಾರ ನಡಪರೆ ಉಂಡು.
ಈ ಲೇಸ್ ದ ಲೆಕ್ಕೊಡು ಬೊಲ್ಪುಗು ಉಷಾ ಪೂಜೆ, ಕೀರ್ತನೆ ಸೇವೆ, ಮಧ್ಯಾಹ್ನ ಉರ್ಲಿ ನೈವೇದ್ಯ ಸೇವೆ, ಶ್ರೀ ದೇವಿಗ್ ಮಹಾಮಂಗಳಾರತಿ, ಬೊಕ್ಕ ಪ್ರಸಾದ ಪಟ್ಟ್ ದ್, ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು. ಬಯ್ಯಗ್ ಕೀರ್ತನೆ ಸೇವೆ, ರಂಗಪೂಜೆ, ಮಹಾಮಂಗಳಾರತಿ ಬೊಕ್ಕ ತೀರ್ಥ ಪ್ರಸಾದ ಪಟ್ಟರೆ ಉಂಡು.
ಈ ಮಾತ ಪೂಜೆದ ಸೇವೆಡ್ ಮಾತೆರ್ಲಾ ಪಾಲ್ ಪಡೆದ್, ಗಂಧ ಪ್ರಸಾದ ದೆತೊಂದು ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ದೇವಲ್ಯದ ಟ್ರಸ್ಟಿ ಶ್ರೀಕಾಂತ್ ಎ.ಎಸ್ ಲೆಪ್ಪೋಲೆಡ್ ತೆರಿಪಾದೆರ್.
ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘ (ರಿ.) ಬೊಕ್ಕ ಕಟ್ಟೋಣ ಸಮಿತಿದ ಒಟ್ಟುಸೇರಿಗೆಡ್ ಪೊಸತಾದ್ ನಿರ್ಮಾಣ ಆಯಿನ ಬಿಲ್ಲವ ಭವನದ ಉದಿಪನ ಲೇಸ್ ನ.26 ಐತಾರ ಬೊಲ್ಪುಗು ನಡಪರೆ ಉಂಡು.
ಅಂಚೆನೆ ಪೊಸ ಬಿಲ್ಲವ ಭವನದ ಉದಿಪನ ಲೇಸ್ ದ ಲೆಕ್ಕೊಡು ಸಾಂಸ್ಕೃತಿಕ ಲೇಸ್ ಅವ್ವೇ ದಿನ ಬಯ್ಯಗ್ ಪೊಸ ಚಾವಡಿಡ್ ಸಂಘದ ಬೊಕ್ಕ ಯುವವಾಹಿನಿ ಘಟಕದ ಸದಸ್ಯೆರೆರ್ದ್ ಬೇತೆ ಬೇತೆ ವಿನೋದಾವಳಿ ಬೊಕ್ಕ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆದ ಪುಗರ್ತೆದ ಕಲಾವಿದೆರೆನ ಒಟ್ಟುಸೇರಿಗೆಡ್ ನಾಟಕ ಪ್ರದರ್ಶನ ನಡಪರೆ ಉಂಡು ಪಂದ್ ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘ (ರಿ.), ಕಟ್ಟೋಣ ಸಮಿತಿ, ಬೊಂಬೈ ಸಮಿತಿ, ದುಬೈ ಬೊಕ್ಕ ಮಸ್ಕತ್ ಸಮಿತಿ, ಯುವವಾಹಿನಿ (ರಿ.) ಹಳೆಯಂಗಡಿ ಘಟಕ ಲೆಪ್ಪೋಲೆಡ್ ತೆರಿಪಾದೆರ್.
