ಆರೋಗ್ಯಗ್ ಎಡ್ಡೆ ಪಂದ್ ಎಚ್ಚಾದ್ ಪಚ್ಚೆ ಸೊಪ್ಪು ತಿಂದ್ಂಡ ಅನಾರೋಗ್ಯ ಬರ್ಪುಂಡು ಪಂದ್ ಬೆಂಗ್ಲೂರ್ ದ ವಿಜ್ಞಾನಿಲು ಎಚ್ಚರಿಕೆ ಕೊರ್ತೆರ್.
ಇಂಚಿಪ್ಪ ಸುಮಾರ್ ರೀತಿದ ಪಚ್ಚೆ ಸೊಪ್ಪುನ್ ಪರೀಕ್ಷೆ ಮಲ್ಪುನಗ, ಸೊಪ್ಪುಡು ಲೋಹದ ಸಾಂದ್ರತೆ ಎಚ್ಚ ಇಪ್ಪುನವು ಗೊತ್ತಾತ್ತ್ಂಡ್. ಸಾಮಾನ್ಯವಾದ್ KG ಸೊಪ್ಪುಡು 425.5mg ಲೋಹ ಇಪ್ಪುಂಡು. ಆಂಡ ಇಂಚಿಪ್ಪದ ಸೊಪ್ಪುಡು 514.05mg ಲೋಹ ಪತ್ತೆ ಆತ್ಂಡ್. ಅಂಚಾದ್ ಸಾವಯವ ಕೃಷಿ ಪದ್ದತಿಡ್ ಬುಲೆಪಾಯಿನ ಸೊಪ್ಪುನ್ ತಿನಿಯೆರೆ ಸಲಹೆ ಕೊರ್ತೆರ್.
ಮಲ್ಲ ಪುದರ್ದ ಗಾಯಕೆ ಒರಿ ತಾಲ್ಯೆ ತುಚ್ಚಿದ್ ತೀರ್ಪೋಯಿನ ವಿಚಿತ್ರ ನಡಕೆ ನಡತ್ ದ್ಂಡ್. ಬ್ರೆಜಿಲ್ ದ ಸಿಂಗರ್ ಡಾರ್ಲಿನ್ ಮೊರೈಸ್ (28) ತಾಲ್ಯೆ ತುಚ್ಚಿದ್ ತೀರ್ಪೋತೆರ್. ಚಾಲ್ಯೆ ತುಚ್ಚಿದ್ ಆಸ್ಪತ್ರೆಡ್ ಮರ್ದ್ ಮಲ್ತ್ ಇತ್ತೆರ್.
ಬೊಕ್ಕ ಆರೋಗ್ಯಡ್ ಸುಧಾರಿಸಾದ್ ಡಿಸ್ಚಾರ್ಜ್ ಆದಿತ್ತೆರ್. ಡಾರ್ಲಿನ್ ಮೊರೈಸ್ ಇಲ್ಲಗ್ ಬತ್ತಿ ಬೊಕ್ಕ ಸುಸ್ತ್ ಆದಿತ್ತ್ಂಡ್. ಸೈಪುನೆರ್ದ್ ದುಂಬು ಅರೆನ ದೇಹದ ಬಣ್ಣ ಬದಲ್ ಆದಿತ್ತ್ಂಡ್ ಪಂದ್ ಅರೆನ ಬುಡೆದಿ ತೆರಿಪಾದೆರ್.
ಶಬರಿಮಲೆ ಅಯ್ಯಪ್ಪಸ್ವಾಮಿ ಸನ್ನಿಧಿಡ್ 18 ಮೊಟ್ಟು ಉಂಡು. ನೆತ್ತ ಪುದರ್ ಇಂಚ ಉಂಡು.
1.ಅಣಿಮಾ, 2.ಲಘಿಮಾ, 3.ಮಹಿಮಾ , 4.ಈಶ್ವತ, 5.ವಶ್ಯತ, 6.ಪ್ರಾಕಾಮ್ಯ, 7.ಬುದ್ಧಿ, 8.ಇಚ್ಛಾ, 9.ಪ್ರಾಪ್ತಿ, 10.ಸರ್ವಕಾಮ, 11.ಸರ್ವ ಸಂಪತ್ಕರ, 12.ಸರ್ವ ಪ್ರಿಯಕರ, 13.ಅರ್ವಾ ಸಾವುದ ಪರಿಹಾರ, 16.ಸರ್ವವಿಘ್ನ ನಿವಾರಣ, 17.ಸರ್ವಾಂಗ ಸುಂದರ, 18.ಸರ್ವ ಸೌಭಾಗ್ಯದಾಯಕ
ಹಾಸನ: ಯಾನ್ ಓಟುದ ರಾಜಕಾರಣಡ್ ಇಪ್ಪುಜಿ ಪಂದ್ ತೀರ್ಮಾನ ಮಲ್ದೆ ಪಂದ್ ಮಾಜಿ ಮುಖ್ಯಮಂತ್ರಿ ಡಿ.ವಿ ಸದಾನಂದ ಗೌಡ ಮೇರ್ ನಿವೃತ್ತಿ ಘೋಷಣೆ ಮಲ್ದೆರ್.
ಹಾಸನಡ್ ಸುದ್ದಿಗಾರೆರೆಡ ಪಾತೆರ್ದ್ ಮೇರ್, 30 ವರ್ಷ ಎನ್ನ ಪಕ್ಷ ಎಂಕ್ ಮಾತಲ ಕೊರ್ತುಂಡು. ಯಡಿಯೂರಪ್ಪ ಬುಡ್ನ ಎಂಕ್ಲೆನ ಪಕ್ಷಡ್ ಯಾನೇ ನಂಬರ್ ಒನ್ ಫಲಾನುಭವಿ. 10 ವರ್ಷ ಎಂಎಲ್ಎ, 20 ವರ್ಷ ಎಂಪಿ, 1 ವರ್ಷ ಮುಖ್ಯಮಂತ್ರಿ, ಒಂಜರೆ ವರ್ಷ ವಿರೋಧ ಪಕ್ಷದ ನಾಯಕೆಯಾದ್, 5 ವರ್ಷ ವಿಧಾನಸಭೆಟ್ಟ್ ವಿರೋಧ ಪಕ್ಷದ ಉಪನಾಯಕೆಯಾದ್, ನಾಲರೆ ವರ್ಷ ಪಕ್ಷದ ರಾಜ್ಯಾಧ್ಯಕ್ಷೆರಾದಿತ್ತೆ. ಅತ್ತಂದೆ ಕೇಂದ್ರಡ್ 7 ವರ್ಷ ನರೇಂದ್ರ ಮೋದಿನೊಟ್ಟಿಗೆ ಕ್ಯಾಬಿನೆಟ್ ಮಂತ್ರಿ ಆದ್ ಸಂತೋಷ ಪಡೆಯೆ. ಆತ್ ಇತ್ತ್ ದ್ ಲ ಕುಷಿ ಪಡೆಯಂದಿನಾಯೆ ರಾಜಕಾರಣಿಯೇ ಅತ್ತ್. ಆಯನ್ ಸ್ವಾರ್ಥಿ ಪಂದ್ ಎನ್ನಿವೆ ಪಂದ್ ಪಂಡೆರ್.
ಮಾತ ರಾಜಕೀಯ ಪಕ್ಷಡ್ ಯಾನ್ ಸತ್ಯಹರಿಶ್ಚಂದ್ರ ಪಂದ್ ಪಂಡಲ 10 ಪರ್ಸೆಂಟ್ ಜನ ಅಧಿಕಾರಗಾದ್ ಜಂಪ್ ಮಲ್ಪುನಕುಲು ಉಲ್ಲೆರ್. ಬಿಜೆಪಿ ಅಧಿಕಾರಗ್ ಬತ್ತ್ಂಡ ಕೂಡ್ಲೆ ಬಿಜೆಪಿ, ಕಾಂಗ್ರೆಸ್ ಅಧಿಕಾರಗ್ ಬತ್ತ್ಂಡ ಕೂಡ್ಲೆ ಬಿಜೆಪಿರ್ದ್ ಕಾಂಗ್ರೆಸ್ ದಾಲ ಇಜ್ಜಂದಿನ ಜೆಡಿಎಸ್ ಅಧಿಕಾರಗ್ ಬತ್ತ್ಂಡ ಕೂಡ್ಲೆ ಅಕ್ಲೆನೊಟ್ಟಿಗೆ, ಈ ರೀತಿ ಪೋಪುನಕುಲು ಮತ ಪೊಲಿಟಿಕಲ್ ಪಾರ್ಟಿಡ್ ಉಲ್ಲೆರ್ ಪಂದ್ ಪಂಡೆರ್.
ಬೊಂಬೈ: ಚಾಂಡಿವಲಿ ಮಹಾದಾ ಕಾಲೊನಿ ಸಾಕಿನಾಕಾ ಶ್ರೀ ಮಹಾಕಾಳಿ ಸೇವಾ ಸಮಿತಿದ 8ನೇ ವರ್ಷದ ಲೆಕ್ಕೊಡು ಮಹಾಕಾಳಿ ಪೂಜೆ ಬೊಕ್ಕ ದರ್ಶನ ನ.26 ಐತಾರ ನಡಪರೆ ಉಂಡು.
ಆನಿ ಬೊಲ್ಪುಗು ಗಣಹೋಮ, ಸತ್ಯನಾರಾಯಣ ಪೂಜೆ, ಘಾಟ್ ಕೋಪರ್ ಬಿಲ್ಲವ ಸಂಘದ ಸದಸ್ಯೆರೆರ್ದ್ ಭಜನೆ ಬೊಕ್ಕ ಶ್ರೀ ಮಹಾಕಾಳಿ ದೇವಿನ ಮಹಾಪೂಜೆ, ಅಮ್ಮನ ಆವೇಶ, ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀ ಮಹಾಕಾಳಿ, ಕಾಲಭೈರವನ ಕೃಪೆಗ್ ಪಾತ್ರರಾವೊಡು ಪಂದ್ ಸಂಜೀವ, ಸೀತಾ ಪೂಜಾರಿ ಬೊಕ್ಕ ಸಮಿತಿದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಸಲ್ದ ಜವನೆರ್ ಬದ್ಯಾರು ಶಿರ್ಲಾಲು ಮುತಾಲಿಕೆಡ್ ತುಡರ್ ಪರ್ಬದ ಲೆಕ್ಕೊಡು 5ನೇ ವರ್ಷೊದ ಕೆಸರ್ ಡೊಂಜಿ ಕುಸಲ್ದ ಗೊಬ್ಬು ನ.13 ಸೋಮಾರ ನಲ್ಲಾರುಗುತ್ತು ಬಾಕಿಮಾರ್ ಕಂಡಡ್ ನಡಪರೆ ಉಂಡು.
ಈ ಲೇಸ್ ದ ಉದಿಪನನ್ ಮೋನಪ್ಪ ಮೂಲ್ಯ ನಲ್ಲಾರಗುತ್ತು ಮಲ್ಪುವೆರ್. ಲೇಸ್ ದ ಗುರ್ಕಾರ್ಮೆನ್ ಬದ್ಯಾರು ಲೋಕನಾಥೇಶ್ವರ ಭಜನಾ ಮಂಡಳಿ ಗುರ್ಕಾರೆ ಜಗನ್ನಾಥ್ ಕುಲಾಲ್ ಬೈರೊಟ್ಟು ಒಯಿಸೊನ್ವೆರ್. ಕೆಸರ್ ಕಂಡ ಕ್ರೀಡಾಕೂಟದ ಉದಿಪನನ್ ತುಳುನಾಡು ಒಕ್ಕೂಟ ಬೊಲ್ತೇರ್ ದ ಸ್ಥಾಪಕ ಗುರ್ಕಾರೆ ಶೈಲೇಶ್ RJ ಮೇರ್ ಮಲ್ಪೆರೆ ಉಲ್ಲೆರ್.
ಮಲ್ಲ ಬಿನ್ನೆರಾದ್ ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಚಿತ್ರದುರ್ಗದ ಯೋಜನಾಧಿಕಾರಿ ಪ್ರವೀಣ್ A G, ಶ್ರೀ ಲೋಕನಾಥೇಶ್ವರ ಭಜನಾ ಮಂಡಳಿ ಬದ್ಯಾರುದ ಕಾರ್ಯದರ್ಶಿ ಸದಾಶಿವ ಶಿವಗಿರಿ ಬೊಕ್ಕ ಶ್ರೀ ಲೋಕನಾಥೇಶ್ವರ ಭಜನಾ ಮಂಡಳಿ ಬದ್ಯಾರುದ ಮಾಜಿ ಗುರ್ಕಾರೆ ಸುರೇಶ್ ಮೂಲ್ಯ ಕೊಚ್ಚೊಟ್ಟು ಪಾಲ್ ಪಡೆಯೆರೆ ಉಲ್ಲೆರ್.
ಆಂಧ್ರಪ್ರದೇಶದ ತಿರುಪತಿ ತಿರುಮಲ ದೇವಲ್ಯಡ್ ನ.19 ಕ್ಕ್ ಪುಷ್ಪಯಾಗ ನಡಪರೆ ಉಂಡು.
ಬೊಲ್ಪುಗು ಸ್ನಪನತಿರುಂಜನ, ಮಧ್ಯಾಹ್ನ ರ್ದ್ ಬಯ್ಯ ಮುಟ್ಟ ಪುಷ್ಪಯಾಗ ನಡಪರೆ ಉಂಡು. ನೆಕ್ಕಾದ್ ನ.18 ಕ್ಕ್ ಅಂಕುರಾರ್ಪಣೆ ನಡಪರೆ ಉಂಡು. ಬಯ್ಯಗ್ ಸಹಸ್ರ ದೀಪಾಲಂಕಾರ ಸೇವೆದ ಬೊಕ್ಕ ಭಕ್ತೆರ್ ಮಲಯಪ್ಪಸ್ವಾಮಿನ ದರ್ಶನ ಪಡೆವೊಲಿ.
ಬೆಂಗ್ಲೂರ್ SMS ಫ್ಯಾಮಿಲಿ ಅಟ್ಟಣೆ ಮಲ್ತಿನ SMS TROP HY-2023ದ ಲೆಕ್ಕೊಡು ವಾಲಿಬಾಲ್ ಬೊಕ್ಕ ತ್ರೋಬಾಲ್ ಮ್ಯಾಚ್ ಡ್ ಬಡಪತ್ತ್ ದ ಕ್ರೀಡಾಪಟುಲೆಗ್ ಉತ್ತೇಜನ ಕೊರ್ಪುನ ದಿಟ್ಟಿಡ್ ಸ್ಪಂದನ ಚಾರಿಟೇಬಲ್ ಟ್ರಸ್ಟ್ ದ ವಾಲಿಬಾಲ್ ಕೂಟ ಪಾಲ್ ಪಡೆತ್ಂಡ್.
ಬೆಂಗ್ಲೂರ್ ಸ್ಪಂದನ ಚಾರಿಟೇಬಲ್ ಟ್ರಸ್ಟ್ (ರಿ.) ಕರಿನ 5 ವರ್ಷೊದಿಂಚ ಪ್ರತಿ ಮೂಜಿ ತಿಂಗೊಲ್ ಗೊರ ಒಂಜೊಂಜೇ ಯೋಜನೆನ್ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಬಡಪತ್ತ್ ಜನಕ್ಲೆನ ಏಳಿಗೆಗಾದ್ ಎಡ್ಡೆ ಮನಸ್ಸ್ ರ್ದ್ ಬೆನೊಂದು ಉಂಡು.
ಉಪ್ಪು ಜಾಸ್ತಿ ತಿನ್ಪುನೆರ್ದ್ ಟೈಪ್-1 ಮಧುಮೇಹ ಬರ್ಪುಂಡು ಪಂದ್ ಅಮೆರಿಕದ ಲಾಸ್ ಏಂಜಲೀಸ್ ದ ಟುಲೇನ್ ವಿಶ್ವವಿದ್ಯಾಲಯ ನಡಪಾಯಿನ ಸಂಶೋಧನೆ ತೆರಿಪಾದ್ಂಡ್.
ಸುಮಾರ್ ವರ್ಷೊ ಮುಟ್ಟ ಬೇತೆ ಬೇತೆ ದೇಶದ 4 ಲಕ್ಷ ಜನನ್ ಸಮೀಕ್ಷೆ ಮಲ್ಪುನಗ ಉಂದು ಗೊತ್ತಾತ್ಂಡ್. ಉಪ್ಪು ತಿನ್ಪುನೆರ್ದ್ ಎಂಚ ಸಕ್ಕರೆ ಕಾಯಿಲೆ ಬರ್ಪುಂಡು ಪನ್ಪುನ ಬಗೆಟ್ಟ್ ಒವ್ವೇ ಸರಿಯಾಯಿನ ಕಾರಣ ಇಜ್ಜಿ. ಆಂಡ ಉಪ್ಪುರ್ದ್ ಬೊಜ್ಜು ಬೊಕ್ಕ ಚರ್ಬಿ ಎಚ್ಚಾಪುನವು ಸಕ್ಕರೆ ಸೀಕ್ ಬರಿಯೆರೆ ಕಾರಣ ಆದಿಪ್ಪು ಪಂದ್ ವರದಿ ಆತ್ಂಡ್.
ಸೋಮೇಶ್ವರ: ಕೊಲ್ಯ ಬಿಲ್ಲವ ಸೇವಾ ಸಮಾಜ ಟ್ರಸ್ಟ್ (ರಿ.) ಸಂಸ್ಥೆ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿನ್ ಪಡೆತ್ಂಡ್.
ಉಂದು ಧಾರ್ಮಿಕ ಬೊಕ್ಕ ಸಾಮಾಜಿಕ ಸೇವೆನ್ ಮಲ್ತ್ ದ್ ಗುರುತಿಸಾಯಿರ್ನೆದಾವೆರ ಈ ಪ್ರಶಸ್ತಿ ಬೈದ್ಂಡ್. ನೆತ್ತ ಗುರ್ಕಾರೆರೆಗ್, ಪದುಕೆರೆಗ್ ಬೊಕ್ಕ ಸರ್ವಸದಸ್ಯೆರೆಗ್ ಮಾತೆರೆಗ್ಲಾ ಅಭಿನಂದನೆ ಸಂದಾದೆರ್.
