Sat. Nov 21st, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಸುರತ್ಕಲ್ ಟೋಲ್ ದಲ್ಪ ಇನಿರ್ದ್ ನ.3 ಮುಟ್ಟ 144 ಸೆಕ್ಷನ್

ಸುರತ್ಕಲ್: ಸುರತ್ಕಲ್ ಠಾಣೆ ವ್ಯಾಪ್ತಿದ ಟೋಲ್ ಸುತ್ತಲ 200 ಮೀಟರ್ ವ್ಯಾಪ್ತಿಡ್ ಸೆಕ್ಷನ್ 144 ತ ಪ್ರಕಾರ ಇನಿರ್ದ್ ನ.3 ಮುಟ್ಟ ನಿಷೇಧಾಜ್ಞೆ ಜಾರಿ ಮಲ್ತ್ ದ್ ಪೊಲೀಸ್ ಆಯುಕ್ತೆರ್ ಶಶಿಕುಮಾರ್ ಆದೇಶ ಕೊರ್ತೆರ್.

ಇನಿ ಬೊಲ್ಪುಗು 6ರ್ದ್ ನ.3 ಬಯ್ಯಗ್ 6 ಗಂಟೆ ಮುಟ್ಟ ಸುರತ್ಕಲ್ ಪೊಲೀಸ್ ಠಾಣೆದ ಟೋಲ್ ಪ್ಲಾಜಾದ ಸುತ್ತಲ ಕಾನೂನುದ ವ್ಯವಸ್ಥೆನ್ ಕಾಪಾಡುನ ಬೊಕ್ಕ ಸಾರ್ವಜನಿಕೆರೆನ ಸುರಕ್ಷತೆದ ದೃಷ್ಟಿಡ್ ಬೊಕ್ಕ ಟೋಲ್ ಗೇಟ್ ಗ್ ರಕ್ಷಣೆ ಕೊರ್ಪುನ ದೃಷ್ಟಿರ್ದ್ ಸೆಕ್ಷನ್ ಜಾರಿ ಆತ್ಂಡ್ ಪಂದ್ ಕಮಿಷನರ್ ಪಂಡೆರ್. ಸೆಕ್ಷನ್ ಜಾರಿಡ್ ಇಪ್ಪುನ ಜಾಗೆಡ್ 5ರ್ದ್ ಹೆಚ್ಚ ಜನತ ಗುಂಪು ಸೇರುನು, ಘೋಷಣೆ ಪಡುನೆ, ಭಿತ್ತಿ ಪತ್ರ ಪ್ರದರ್ಶನ ಮಲ್ಪುನು, ಶಸ್ತ್ರಲೆನ್ ಕೊನೊಪುನು, ಪಟಾಕಿ ಪುಡಪುನ,ಮೆರವಣಿಗೆ, ಜಾಥಾ, ಮಾರ್ಗಗ್ ಅಡ್ಡ ಕಟ್ಟುನೆಕ್ಕ್ ಅವಕಾಶ ಇಜ್ಜಿ ಪಂದ್ ಕುಡ್ಲ ಪೊಲೀಸ್ ಆಯುಕ್ತೆರ್ ಶಶಿಕುಮಾರ್ ತೆರಿಪಾದೆರ್.

ಮಾತ ರಾಜ್ಯಡ್ ಬೇಗಡೇ ಎನ್‌ಐಎ ಕಚೇರಿ: ಅಮಿತ್ ಶಾ

ದೆಲ್ಲಿ: 2024ತ್ತ ಉಲಯಿ ಮಾತ ರಾಜ್ಯಡ್ ಎನ್‌ಐಎ ಕಚೇರಿ ಓಪನ್ ಆಯರೆ ಉಂಡು ಪಂದ್ ಕೇಂದ್ರ ಗೃಹ ಸಚಿವೆರ್ ಅಮಿತ್ ಶಾ ಪಂಡೆರ್.

ಹರಿಯಾಣದ ಬೋಂದ್ಸಿ ಪನ್ಪಿನಲ್ಪ ಪೊಲೀಸ್ ಹೌಸಿಂಗ್ ಕಟ್ವಾನೊನು ಉದಿಪನ ಮಲ್ತ್‌ದ್ ಪಾತೆರಿನ ಆರ್, ಎನ್‌ಐಎ ವಿರುದ್ಧ ನಮ ಸರಿಯಾಯಿನ ಕ್ರಮನ್ ದೆತೊಂದ. ಎನ್‌ಜಿಒ ಲೆನ ದುರ್ಬಳಕೆನ್ ತಡೆಯೊನರೆ ವಿದೇಶಿ ದೇಣಿಗೆ ನಿಯಂತ್ರಣ ಕಾಯ್ದೆಗ್ ತಿದ್ದುಪಡಿ ಕನತ್ತ ಪಂದ್ ಗೃಹ ಸಚಿವೆರ್ ಅಮಿತ್ ಶಾ ಪಂಡೆರ್.

ಫ್ಲಿಪ್‌ಕಾರ್ಟ್‌ಡ್ ಆರ್ಡರ್ ಮಲ್ದಿನಿ ಲ್ಯಾಪ್‌ಟಾಪ್ ; ಪಾರ್ಸೆಲ್ಡ್ ಬತ್ತಿನವ್ ಮಲ್ಲ ಕಲ್ಲ್..!!

ಕುಡ್ಲ: ಫ್ಲಿಪ್‌ಕಾರ್ಟ್‌ಡ್ ಲ್ಯಾಪ್‌ಟಾಪ್ ಆರ್ಡರ್ ಮಲ್ತಿನ ಜನಕ್ಕ್ ಮಲ್ಲ ಕಲ್ಲ್ ಬೊಕ್ಕ ಬೇತೆ ತ್ಯಾಜ್ಯ ವಸ್ತುಲು ಬತ್ತಿನ ಘಟನೆ ಕುಡ್ಲಡ್ ನಡತ್ಂಡ್.

ಚಿನ್ಮಯ ರಮಣ ಪನ್ಪಿನಾರ್ ಈ ವಿಷಯನ್ ಟ್ವಿಟರ್‌ಡ್ ಶೇರ್ ಮಲ್ತ್‌ದಿತ್ತ್‌ದ್, ಬಾಕ್ಸ್ ದೆಪ್ಪುನ ವಿಡಿಯೋನ್‌ಲ ಪಾಡ್ದೆರ್. ಉಂದೆಟ್ಟ್ ಮಲ್ಲ ಕಲ್ಲ್ ಬೊಕ್ಕ ಬೇತೆ ತ್ಯಾಜ್ಯ ವಸ್ತುಲು ಇತ್ತ್ಂಡ್. ಅಂಚನೆ ಫಿಪ್‌ಕಾರ್ಟ್ ಜವಾಬ್ದಾರಿನ್ ವಹಿಸೊಂದಿತ್ತ್‌ದ್, ಕಾಸ್‌ನ್ ಪಿರ ಪಾಡ್ದೆರ್ ಪಂದ್ ಪಂತೆರ್.

ಅ.30ಗ್ ಶ್ರೀ ಸಾಯಿ ಪರಿವಾರ್ ಟ್ರಸ್ಟ್ (ರಿ.) ತೊಕ್ಕೊಟ್ಟು ಮುತಾಲಿಕೆಡ್ “ದೀಪಾವಳಿ ಕುಟುಂಬ ಮಿಲನ” ಲೇಸ್

ದ.ಕ.ಜಿಲ್ಲಾ ಕನ್ನಡ ರಾಜ್ಯೋತ್ಸವ ಪ್ರಶಸ್ತಿ ಪಡೆಯಿನ ಸಂಸ್ಥೆ ಶ್ರೀ ಸಾಯಿ ಪರಿವಾರ್ ಟ್ರಸ್ಟ್ (ರಿ.) ತೊಕ್ಕೊಟ್ಟು ಮುತಾಲಿಕೆಡ್ “ದೀಪಾವಳಿ ಕುಟುಂಬ ಮಿಲನ” ಲೇಸ್ ಅಕ್ಟೋಬರ್ 30 ತಾರೀಕ್ ಐತಾರದಾನಿ ಮಿತ್ತಗೆಲದ ಕುತ್ತಾರು ಡೆಕ್ಕನ್ ರೆಸಾರ್ಟ್‌ಡ್ ನಡಪರೆ ಉಂಡು.

ಪಿಲಾರ್ ಮೇಗಿನ ಇಲ್ಲ್‌ದ ಮೀನಾಕ್ಷಿ ಸೀತಾರಾಮ ಶೆಟ್ಟಿ ಲೇಸ್‌ ಉದಿಪನ ಮಲ್ಪರೆ ಉಲ್ಲೆರ್. ನೋಟರಿ, ವಕೀಲೆರ್ ಕವಿತ ಮುರುಗೇಶ್ ತುಡರ್ ಪರ್ಬದ ಸಂದೇಶನ್ ಪನಿಯರೆ ಉಲ್ಲೆರ್. ಕುಡ್ಲ ಮಾಯಾ ಗ್ರೂಪ್‌ದ ಪಾಲುದಾರೆರ್ ಹರೀಶ್ ಕಾಮತ್ ಲೇಸ್‌ದ ಗುರ್ಕಾರ್ಮೆ ವಹಿಸೊನರೆ ಉಲ್ಲೆರ್. ಅಂಚನೆ ಈ ಲೇಸ್‌ಡ್ ಬೇತೆ ಬೇತೆ ರೀತಿದ ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಉಂಡು.

ಉಳ್ಳಾಲ : ಬೊಡಿದಿನ್ ಕೆರ್ದ್, ತಾನ್ ಲ ಸೈತಿನ ಸಂಸಯದ ಕಂಡನಿ!

ಉಳ್ಳಾಲ: ಬೊಡೆದಿನ ಮಿತ್ತ್ ಸಂಸಯ ದೀವೊಂದಿನ ಕಂಡನಿ ಒರಿ ಬೊಡೆದಿನ್ ಕೆರ್ದ್, ತಾನ್ ಲ ತೋಟದ ಮರಕ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತಿನ ಘಟನೆ ಉಳ್ಳಾಲ ಠಾಣೆ ವ್ಯಾಪ್ತಿದ ಪಿಲಾರು ಪಂಜಂದಾಯ ದೇವಲ್ಯದ ಕೈತಲ್ ನಡತ್ಂಡ್.


ಪಿಲಾರು ನಿವಾಸಿ ಶೋಭಾ ಪೂಜಾರಿ(45) ಬೊಕ್ಕ ಮೇರೆನ ಕಂಡನಿ ಶಿವಾನಂದ ಪೂಜಾರಿ (55) ತೀರ್ ಪೋಯಿನಕುಲು. ಇನಿ ಮಧ್ಯಾಹ್ನದ ಪೊರ್ತುಡು ಮೇರೆನ ಮಲ್ಲ ಮಗೆ ಕಾರ್ತಿಕ್ ಅಪ್ಪೆಗ್ ಫೋನ್ ಮಲ್ಪುನಗ ಫೋನ್ ದೆಪ್ಪಂದಿನ ಕಾರಣ ಕೈತಲ್ ದ ಇನ್ನೂರು ಗುತ್ತು ಇಲ್ಲಲ್ ದಕುಲೆಡ ಪೋನ್ ಮಲ್ತ್ ದ್ ತೆರಿಪಾದೆರ್. ಕೈತಲ್ ಇಲ್ಲದಾರ್ ಬತ್ತ್ ದ್ ತೂನಗ ಶೋಭಾ ಬೆಡ್ ರೂಮ್ ದ ಮಂಚಡ್ ಪುಣ ಆದಿತ್ತೆರ್. ಕೂಡ್ಲೆ ಆರ್ ಕೈತಲ್ದಕ್ಲೆಗ್ ವಿಷಯ ತೆರಿಪಾಯೆರ್. ಅವ್ವತ್ತಾಂದೆ ಕೈತಲ್ ದ ತೋಟಡ್ ಮರಕ್ ಶಿವಾನಂದ ಮೇರ್ ಲ ಬಲ್ಲ್ ದೆತ್ತೊನವು ತೋಜಿದ್ ಬೈದ್ಂಡ್. ಶಿವಾನಂದ ಪೂಜಾರಿ ಪೈಂಟರ್ ಕೆಲಸ ಮಲ್ತೊಂದು ಇತ್ತೆರ್. ಮೇರ್ ಬೊಡೆದಿ ಮಿತ್ತ್ ಏಪಲ ಸಂಶಯ ಪಡೊಂದು ಇತ್ತೆರ್. ಅವ್ವತ್ತಂದೆ ನೆರೆಕರೆದಕಲೆಡಲ ಪೊಕ್ಕಡೆ ಗಲಾಟೆ ಮಲ್ತೊಂದು ಇತ್ತೆರ್ ಪಂದ್ ಸ್ಥಳೀಯೆರ್ ತೆರಿಪಾದೆರ್. ಮೇರೆನ ಎಲ್ಯ ಮಗಲ್ ಕಾವ್ಯ ರಡ್ಡ್ ವರ್ಷದ ಪಿರವು ಮದಿಮೆ ಆತೆರ್. ಮಲ್ಲ ಮಗೆ ಕಾರ್ತಿಕ್ ಖಾಸಗಿ ಸಂಸ್ಥೆಡ್ ಬೇಲೆಡ್ ಉಲ್ಲೆರ್.
ಉಳ್ಳಾಲ ಪೊಲೀಸೆರ್ ಜಾಗೆಗ್ ಬತ್ತ್ ದ್ ಪರಿಶೀಲನೆ ನಡಪಾದೆರ್, ರಡ್ಡ್ ಪುಣಕ್ಲೆನ್ ಮರಣೋತ್ತರ ಪರೀಕ್ಷೆ ಮಲ್ಪಾದೆರ್.

ನ.7 : ಒಡಿಪು ಜಿಲ್ಲೆಗ್ ಅಯೋಧ್ಯಾ ದಿಗ್ವಿಜಯ ರಥ ಯಾತ್ರೆ ಪ್ರವೇಶ

ಒಡಿಪು : ಸಂತ ಸಮಿತಿದ ಮುತಾಲಿಕೆಡ್ ಪಿದಾಡುನ ಅಯೋಧ್ಯೆ ಪ್ರಭು ಶ್ರೀ ರಾಮಚಂದ್ರ ದೇವೆರ್ನ ದಿಗ್ವಿಜಯ ಯಾತ್ರೆ ನ. 7 ತಾರೀಕ್ ಗ್ ಒಡಿಪು ಜಿಲ್ಲೆಗ್ ಪ್ರವೇಶ ಆವರೆ ಉಂಡು ಪಂದ್ ಅಯೋಧ್ಯಾ ಪ್ರಭು ಶ್ರೀ ರಾಮಚಂದ್ರ ದಿಗ್ವಿಜಯ ಯಾತ್ರೆ ಸಮಿತಿ, ಒಡಿಪು ನೆತ್ತ ಪ್ರಧಾನ ಕಾರ್ಯದರ್ಶಿ ವಿಜಯ ಕೊಡವೂರು ತೆರಿಪಾಯೆರ್.

ಪತ್ರಿಕಾಗೋಷ್ಠಿಡ್ ಪಾತೆರ್ನ ಆರ್, ಅಕ್ಟೋಬರ್‌ 5ನೇ ತಾರೀಕ್ ದಾನಿ ಯೋಗಿ ಆದಿತ್ಯ ನಾಥೆರ್ ರಥ ಯಾತ್ರೆಗ್ ಚಾಲನೆ ಕೊರ್ತೆರ್. 60 ದಿನೊಟ್ಟು 27 ರಾಜ್ಯೊಡು 15,000 ಕಿ.ಮೀ. ಸಂಚಾರ ಮಲ್ಪುನ ಈ ರಥಯಾತ್ರೆ ಹಿಂದೂ ಸಮಾಜನ್ ಜಾಗೃತಿ ಪುಟ್ಟಾವುನ ಉದ್ದೇಶ ಅಂಚೆನೆ ರಾಮರಾಜ್ಯ ನಿರ್ಮಾಣದ ಕಲ್ಪನೆದೊಟ್ಟುಗು ನ.7 ಕ್ಕ್ ಒಡಿಪು ಜಿಲ್ಲೆಗ್ ಪ್ರವೇಶ ಆವರೆ ಉಂಡು ಪಂಡೆರ್.

ಈ ದಿಗ್ವಿಜಯ ಯಾತ್ರೆನ್ ಸ್ವಾಗತ ಮಲ್ಪುನ ನಿಲೆಟ್ಟ್ ಜಿಲ್ಲೆದ ಪ್ರಮುಖರೆನ್ ಒಟ್ಟು ಮಲ್ತೊಂದು ಸ್ವಾಗತ ಸಮಿತಿ ರಚನೆ ಆತ್ಂಡ್. ನ.7 ಕ್ಕ್ ಭಕ್ತಿಪೂರ್ವಕವಾದ್ ಅಯೋಧ್ಯೆ ಪ್ರಭು ಶ್ರೀ ರಾಮಚಂದ್ರ ರಥಯಾತ್ರೆನ್ ಸ್ವಾಗತ ಮಲ್ಪರೆಗ್ ಪೂರ್ವ ತಯಾರಿ ಬಾರೀ ಪೊರ್ಲುಡ್ ನಡತೊಂದುಂಡು. ಜಿಲ್ಲೆದ ಬೇತೆ ಬೇತೆ ಧಾರ್ಮಿಕ ಕೇಂದ್ರೊಲು, ಸಂಘಸಂಸ್ಥೆಲೆಡ್ ಪೂರ್ವಭಾವಿ ಸಭೆ ನಡತ್ ದಿತ್ತ್ ದ್, ಸಮಸ್ತ ಹಿಂದೂ ಬಾಂಧವೆರ್ ಈ ಕಾರ್ಯಕ್ರಮಡ್ ಪಾಲ್ ಪಡೆಯರೆಗ್ ಉಮೇದ್ ಡುಲ್ಲೆರ್.

ಆನಿ ಕಾಂಡೆ 9 ಗಂಟೆಗ್ ದಿಗ್ವಿಜಯ ರಥಯಾತ್ರೆ ಒಡಿಪುಗು ಬರ್ರೆ ಉಂಡು‌ . ಕಾಂಡೆ 10 ಗಂಟೆಗ್ ಸಂತೆಕಟ್ಟೆ ಜಂಕ್ಷನ್ ಡ್ ಪೂರ್ಣಕುಂಭದ ಸ್ವಾಗತ ಬೊಕ್ಕ ಧಾರ್ಮಿಕ ಸಭಾಕಾರ್ಯಕ್ರಮ ನಡಪರೆಗುಂಡು .ಈ ಸಭಾ ಕಾರ್ಯಕ್ರಮಡ್ ಸಂತ ಸಮಿತಿದ ರಾಷ್ಟ್ರೀಯ ಅಧ್ಯಕ್ಷೆರಾಯಿನ ಶ್ರೀ ಶ್ರೀ ಶ್ರೀ ಶಕ್ತಿ ಶಾಂತಾನಂದ ಸ್ವಾಮೀಜಿ ಬೊಕ್ಕ ಪೇಜಾವರ ಮಠದ ಮಠಾಧೀಶೆರ್,ರಾಮಮಂದಿರದ ವಿಶ್ವಸ್ಥೆರ್ ಆಯಿನ ಶ್ರೀ ಶ್ರೀ ಶ್ರೀ ವಿಶ್ವಪ್ರಸನ್ನ ತೀರ್ಥೆರ್ ಪಾಲ್ ಪಡೆದ್ ಆಶೀರ್ವಚನ ಕೊರ್ರೆಗುಲ್ಲೆರ್. ಅಂಚೆನೇ ನಾಡ್ ದ ಗಣ್ಯಾತಿಗಣ್ಯೆರ್ ಉಪ್ಪುವೆರ್. ಧಾರ್ಮಿಕ ಸಭಾ ಕಾರ್ಯಕ್ರಮಡ್ ಬೊಕ್ಕ ಅಯೋಧ್ಯೆಡ್ದ್ ದಿಗ್ವಿಜಯ ರಥಯಾತ್ರೆಡ್ ಬರ್ಪಿನ ಶ್ರೀರಾಮನ ವಿಗ್ರಹಗ್ ಪೇರ್ ದ ಅಭಿಷೇಕ ಮಲ್ಪರೆ ಭಕ್ತಾಭಿಮಾನಿಲೆಗ್ ಅವಕಾಶ ಉಪ್ಪುಂಡು.

ಆಯಿಬೊಕ್ಕ ಸಂತೆಕಟ್ಟೆಡ್ದ್ ಉಚ್ಚಿಲ ಮಹಾಲಕ್ಷ್ಮೀ ದೇವಸ್ಥಾನ ಮುಟ್ಟ ವಾಹನ ಜಾಥಾದ ಮುಖೇನ ಯಾತ್ರೆ ಸಮಾಪನ ಆವರೆಗುಂಡು ಪಂದ್ ಆರ್ ತೆರಿಪಾಯೆರ್.
ಉಚ್ಚಿಲ ಮಹಾಲಕ್ಷ್ಮೀ ದೇವಸ್ಥಾನಡ್ ನಾಡೋಜ ಡಾ.ಜಿ.ಶಂಕರ್ ಮೆರೆನ ಸಹಕಾರಡ್ದ್ ಅನ್ನ ಪ್ರಸಾದದ ವ್ಯವಸ್ಥೆ ಮಲ್ದೆರ್. ಅಯೋಧ್ಯೆಡ್ ರಾಮಮಂದಿರದ ನಿರ್ಮಾಣ ಆವೊಡು ಪನ್ಪಿನ ಹಿಂದೂಲೆನ ಮಲ್ಲ ಕನ ನಿಜ ಆವರೆಗುಪ್ಪುನ ಈ ಒಂಜಿ ಸುಸಂದರ್ಭಡ್ ಉಡುಪಿದ ಭಕ್ತಾಭಿಮಾನಿಲೆಗ್ ಅಯೋಧ್ಯೆಗ್ ಪೋದ್ ರಾಮನ ಸೇವೆನ್ ಮಲ್ಪರೆಗಾಯಿಜಿಡಲಾ ಅಯೋಧ್ಯೆಡ್ದ್ ಬರ್ಪಿನ ಈ ದಿಗ್ವಿಜಯ ರಥಯಾತ್ರೆಡ್ ಪಾಲ್ ಪಡೆದ್ ಪುನೀತೆರಾಪಿನ ಅವಕಾಶ ಸಿಕ್ಕುದುಂಡ್.ಈ ಅವಕಾಶನ್ ಮಾತೆರ್ಲಾ ಸದುಪಯೋಗ ಮಲ್ಪೊಡು ಪಂದ್ ಬಿನ್ನಾಪು ಮಲ್ತೆರ್.

ಪತ್ರಿಕಾ ಗೋಷ್ಠಿಡ್ ಅಧ್ಯಕ್ಷೆರ್ ಆನಂದ ಶೆಟ್ಟಿ ಪ್ರಧಾನ ಕಾರ್ಯದರ್ಶಿ ವಿಜಯ ಕೊಡವೂರು, ಉಪಾಧ್ಯಕ್ಷೆರ್ ಮನೋಹರ್ ಶೆಟ್ಟಿ ತೋನ್ಸೆ ಮಹಿಳಾ ಪ್ರಮುಖೆರ್
ತಾರಾ ಉಮೇಶ್ ಆಚಾರ್ಯ, ರಾಮ ಪೂಜಾರಿ ಸಂತೆಕಟ್ಟೆ ಇತ್ತೆರ್.

ಪ್ರತಿಭಾ ಕುಳಾಯಿ ಮೆರೆಗ್ ಬೊಡ್ಚಾಂದಿನ ಪೋಸ್ಟ್‌ ಪಾಡ್ದಿನ ಕೇಸ್ ದ 2 ನೇ ಆರೋಪಿ ಕೋರ್ಟುಗು ಸರೆಂಡರ್

ಕುಡ್ಲ: ಸಾಮಾಜಿಕ ಕಾರ್ಯಕರ್ತೆರ್ ಅಂಚನೆ ಕಾಂಗ್ರೆಸ್ ದ ನಾಯಕಿ ಪ್ರತಿಭಾ ಕುಳಾಯಿ ಮೆರೆನ ವಿರುದ್ಧ ಸೋಶಿಯಲ್ ಮೀಡಿಯಾಡ್ ಬೊಡ್ಚಾಂದಿನ ಪೋಸ್ಟ್‌ ಪಾಡ್ದಿನ ಕೇಸ್ ದ 2 ನೇ ಆರೋಪಿ ಗುರುವಾರದಾನಿ ಕೋರ್ಟುಗು ಶರಣಾತೆರ್.

ಆರೋಪಿ ಕೆ.ಆರ್ ಶೆಟ್ಟಿ ಇನಿ ತನ್ನ ವಕೀಲೆರ್‍ನ ಮುಖೇನ ಕೋರ್ಟ್‌ಗ್ ಹಾಜರಾದಿತ್ತೆರ್. ಕೇಸ್‌ದ ವಿಚಾರಣೆ ನಡಪಾಯಿನ ನ್ಯಾಯಾಧೀಶೆರ್ ಅರೋಪಿನ್ ಕಸ್ಟಡಿಗ್ ಕೊರಿಯೆರ್.

ಭಾರತ ಗೆಂದ್ ಡ್ ನೆದರ್ಲ್ಯಾಂಡ್ಸ್ ಸೋತುಂಡು

ನೆದರ್ಲ್ಯಾಂಡ್ ವಿರುದ್ಧ ಟೀಮ್ ಇಂಡಿಯಾ 56 ರನ್ ಮಲ್ತ್‌ದ್ ಗೆಂದ್‌ದ್ಂಡ್. ಈ ಮುಖೇನ ಗ್ರೂಪ್-2 ಟ್ಟ್ ಎಡ್ಡೆ ತಾನೊಗು ಟೀಮ್ ಇಂಡಿಯಾ ಕಾರ್ ದೀತ್ಂಡ್.

ಟಾಸ್ ಗೆಂದ್‌ದ್ ಸುರುತ್ತ ಬ್ಯಾಟಿಂಗ್ ಮಲ್ತಿನ ಟೀಮ್ ಇಂಡಿಯಾ ರೋಹಿತ್ ಶರ್ಮಾ, ಕೊಹ್ಲಿ ಬೊಕ್ಕ ಸೂರ್ಯಕುಮಾರ್ ಅರ್ಧ ಶತಕರ್ದ್ 180 ರನ್ ದ ಟಾರ್ಗೆಟ್ ಕೊರ್ದಿತ್ಂಡ್. ಈ ಗುರಿನ್ ಬೆನ್ನ್ ಪತ್ತಿನ ನೆದರ್ಲ್ಯಾಂಡ್, 123/9(20) ರನ್ ಮಲ್ತ್‌ದ್ ಸೋತ್ಂಡ್. ಭಾರತದ ಪರ ಭುವಿ, ಅಶ್ವಿನ್, ಅರ್ಶದೀಪ್ ಬೊಕ್ಕ ಅಕ್ಷರ್ ರಡ್ಡ್ ವಿಕೆಟ್ ಪಡೆಯೊಂದು ಮೆನ್ಕಿಯೆರ್.

ಸುಬ್ರಮಣ್ಯ ರೈಲ್ವೆ ನಿಲ್ದಾಣೊಡು ಓವರ್ ಬ್ರಿಡ್ಜ್ ಕಟ್ಟಾವರೆ ಕೇಂದ್ರ ರೈಲ್ವೆ ಮಂತ್ರಿಲೆಗ್ ಹಕ್ಕೊತ್ತಾಯ

ಶ್ರೀ ಕ್ಷೇತ್ರ ಕುಕ್ಕೆ ಸುಬ್ರಹ್ಮಣ್ಯ ಬೊಕ್ಕ ಶ್ರೀ ಕ್ಷೇತ್ರ ಧರ್ಮಸ್ಥಳೊಗು ಪೋಪಿನ ಭಕ್ತೆರ್ ದಿನ ದಿನೊಡ್ದ್ ಹೆಚ್ಚಾವುದುಲ್ಲೆರ್. ಅಂಚೆನೇ ಸಾವಿರೊಡ್ದ್ ಲ ಮಿತ್ತ್ ಭಕ್ತೆರ್ನಕಲು ಕುಂದಾಪುರ,ಭಟ್ಕಳ, ಹೆಬ್ರಿ,ಕಾರ್ಕಳ, ಒಡಿಪು,ಮುಲ್ಕಿ,ಕುಡ್ಲ,ಬೆಂಗಳೂರು ,ಮಂಡ್ಯ, ಹಾಸನ, ಸಕಲೇಶಪುರ,ಮೈಸೂರು ಕಡೆಟ್ ಇಂಚ ಬೇತೆ ಬೇತೆ ಊರುಡ್ದ್ ರೈಲ್ ಡೇ ಪ್ರಯಾಣ ಮಲ್ತೊಂದುಲ್ಲೆರ್. ಉಂದೆರ್ದ್ ಕೇಂದ್ರ ಸರಕಾರೊಗ್ ಲಾಭ ಅತ್ತಂದೆ ನಷ್ಟ ದಾಲ ಇಜ್ಜಿ ಪಂಡ್ದ್ ಕೆಲವು ಪ್ರಯಾಣಿಕೆರೆನ ಅಭಿಪ್ರಾಯ.

ಇತ್ತೆ ಯಾನ್ ದಾಯೆ ಪನೊಂದುಲ್ಲೆ ಪಂಡ ದ.ಕ.ಜಿಲ್ಲೆ, ಉಡುಪಿ ಜಿಲ್ಲೆಡ್ ತುಳುವೆರ್ ಶಾಸಕೆರೆ,ಸಂಸದೆರ್,ಕೇಂದ್ರ ಬೊಕ್ಕ ರಾಜ್ಯ ಸರ್ಕಾರೊಡ್ ತುಳುನಾಡುದ ಪೆರ್ಮೆದ ಶಾಸಕರೆಗ್ ,ಸಂಸದರೆಗ್ ಮಂತ್ರಿ ಪದವಿ ಇತ್ತ್ಂಡ ಲ ಜನ ಸಾಮಾನ್ಯರೆಗ್ ಅವಶ್ಯಕವಾದ್ ಬೊಡಾಯಿನ ಮೂಲ ಸೌಕರ್ಯ ಮಲ್ಪರೆ ದಾಯೆಗ್ ಕೇಂದ್ರದ ರೈಲ್ವೆ ಇಲಾಖೆದ ಅಧಿಕಾರಿಲೆಡ ಪಾತೆರುಜೆರ್..? ಪಂಡ್ದ್ ಮಲ್ಲ ಪ್ರಶ್ನೆಯಾದೇ ಒರಿದುಂಡು.

ಸೆಪ್ಟಂಬರ್ 29ನೇ,2022, ತಾರೀಕ್ ದಾನಿ ಸುಬ್ರಹ್ಮಣ್ಯ ರೈಲ್ವೆ ನಿಲ್ದಾಣೊಡು ಬೆಂಗಳೂರುಗು ಪೋಪಿನ ರೈಲ್ ಗ್ ಕಾತೊಂದುಪ್ಪುನಗ ಸುಬ್ರಹ್ಮಣ್ಯ ರೈಲ್ವೆ ನಿಲ್ದಾಣೊಡು ತೂಯಿನೊಂಜಿ ಘಟನೆ ಮನಸ್ಸ್ ಗ್ ಮಸ್ತ್ ಬೇಜಾರ್ ಆಂಡ್. ಸುಮಾರು 70 ವರ್ಷ ಪ್ರಾಯೊದ ಒಂಜಿ ಅಜ್ಜಿ ಸುಬ್ರಮಣ್ಯ ರೈಲ್ವೆ ನಿಲ್ದಾಣದ ಬರಿಟ್ ಇತ್ತಿನ ರೈಲ್ವೆ ಪಟ್ಟೆ ಗ್ ಮೆಲ್ಲ ಜತ್ತ್ ದ್ ಪೊಣ್ಣು ಪೊಂಜೊವುನ ಸಕಾಯ ದೆತೊಂದು ಕಾರವಾರ ಎಕ್ಸ್ ಪ್ರೆಸ್ ರೈಲ್ ಕುಡ್ಲದಂಚಿ ಪೋಪಿನ ರೈಲ್ ಗ್ ಕ್ರಾಸ್ ಮಲ್ತೊಂದುಲ್ಲೆರ್. ಅಂಚೆನೇ ರೈಲ್ವೆದ ಬಾಕಿಲುದುಲಾಯಿ ಪೋಯೆರೆ ಮಸ್ತ್ ಬಂಗ ಬತ್ತೆರ್. ಒಂಜಿ ಕಡೆಟ್ ಕಾನೂನು ಪನ್ಪುಂಡು ರೈಲೆ ಪಟ್ಟೆಡ್ ನಿಲ್ಥಾಣದಲ್ಪ ಕಡತ್ತ್ಂಡ ಮಲ್ಲ ಅಪರಾಧ ಪಂಡ್ದ್. ಆಂಡ ಆ ಪೊರ್ತುಗು ಪ್ರಾಯೊದ ಅಜ್ಜಿ ರೈಲ್ವೆ ಪಟ್ಟೆ ಕ್ರಾಸ್ ಮಲ್ಪೊಡಾಯಿನನೇ ಪರಿಸ್ಥಿತಿ..! ದಾಯೆ ಪಂಡ ಸುಬ್ರಹ್ಮಣ್ಯ ರೈಲ್ವೆ ನಿಲ್ದಾಣೊಡ್ ಪ್ರಯಾಣಿಕರೆಗ್ ಇಂಚಿಡ್ದ್ ಅಂಚಿ ,ಅಂಚಿಡ್ದ್ ಇಂಚಿ ಕ್ರಾಸಿಂಗ್ ಮಲ್ಪರೆ ಕಾಲು ಸೇತುವೆ (railway foot over bridge) ಉಪ್ಪಂದಿನನೇ ಒಂಜಿ ಆಶ್ಚರ್ಯ.ಇಂದೊಂಜಿ ಎಲ್ಯ ಉದಾರ್ಮೆ ಆಂಡಲ ಏತೋ ಪ್ರಯಾಣಿಕೆರ್ ಪ್ರತಿನಿತ್ಯಲ ಇಂಚ ಕಷ್ಟ ಬರೊಂದುಲ್ಲೆರ್ ಪಂಡ್ದ್ ಅಲ್ಪ ತೂಯಿನಕಲೆಗ್ ಮಾತ್ರ ಗೊತ್ತು. ಸರಕಾರ ಅಭಿವೃದ್ಧಿಗೋಸ್ಕರ ಏತೆತೋ ಕೋಟಿಗಟ್ಟಲೆ ಪಣವು ಖರ್ಚು ಮಲ್ಪುನಗ ಪ್ರಯಾಣಿಕರೆನ ಸುರಕ್ಷತೆಗೋಸ್ಕರ ಸುಬ್ರಮಣ್ಯ ರೈಲ್ವೆ ನಿಲ್ದಾಣೊಡ್ ಕಾಲು ಸೇತುವೆ ದಾಯೆ ಕಟ್ಟರೇ ಬಲ್ಲಿ.? ಅಂಚಾದ್ ಸುಬ್ರಹ್ಮಣ್ಯ ರೈಲ್ವೆ ನಿಲ್ದಾಣೊಡ್ ಆಯಿನಾತ್ ಬೇಗ ಕಾಲು ಸೇತುವೆ(Railway Foot over bridge) ಮಲ್ಪೊಡ್ಂದ್ ಸಂಬಂಧ ಪಟ್ಟಿನ ರೈಲ್ವೆ ಅಧಿಕಾರಿಲೆಡ್, ಮಾನ್ಯ ಕೇಂದ್ರ ರೈಲ್ವೆ ಮಂತ್ರಿಲೆಡ ನಮ್ಮ ದೇಶದ ಪೆರ್ಮೆದ ಪುಗರ್ತೆದ ಮಾನ್ಯ ಪ್ರಧಾನ ಮಂತ್ರಿಲೆನ ತುರ್ತು ಆದೇಶೊಡ್ದ್ ರೈಲುಡ್ ಪೋಪಿನ ಪ್ರಯಾಣಿಕರೆಗ್ ಅನುಕೂಲ ಆಪಿನ ಉದ್ದೇಶೊಡು ಕಾಲು ಸೇತುವೆದ ನಿರ್ಮಾಣ ಆವರೆ ಅಧಿಕೃತ ಆದೇಶ ಮಲ್ಪುಲೆ ಪಂಡ್ದ್ (railway foot over bridge) ಹಕ್ಕೊತ್ತಾಯ ಮಲ್ತೊಂದುಲ್ಲ.

✍️ವರದಿ:ಯಾದವ‌ ಎಸ್ ಕಲ್ಲಾಪು,ಬೆಂಗಳೂರು

ಛತ್ತೀಸ್‌ಗಢ: ಇಲ್ಲದ ಮಿತ್ತ್ ಪಾಕ್ ಕೊಡಿ ರಾಪಾಯಿನ ಜನ ಅರೆಸ್ಟ್

ರಾಯ್‌ಗಢ: ಛತ್ತೀಸ್‌ಗಢದ ಸಾರಂಗಢ-ಬಿಲೈಗಢ ಜಿಲ್ಲೆಡ್ ಪಾಕಿಸ್ತಾನದ ರಾಷ್ಟ್ರ ಕೊಡಿನ್ ಇಲ್ಲದ ಮಿತ್ತ್ ರಾಪಾಯಿನ ಆರೋಪದಡಿಟ್ಟ್ 52 ವರ್ಸೊದ ಜನನ್ ಪೊಲೀಸೆರ್ ಅರೆಸ್ಟ್ ಮಲ್ತ್‌ದೆರ್.

ಫ್ರುಟ್ಸ್ ಬ್ಯಾರ ಮಲ್ತೊಂದಿತ್ತಿನ ಮುಸ್ತಾಕ್ ಖಾನ್ ಅರೆಸ್ಟ್ ಆಯಿನ ಆರೋಪಿ. ಪೊಲೀಸೆರ್ ಕೊಡಿನ್ ದೆತ್ತ್‌ದ್ ವಶಕ್ಕ್ ದೆತೊಂದೆರ್. ಮುಸ್ತಾಕ್ ಖಾನ್ ಮಿತ್ತ್ ಸರಿಯಾಯಿನ ಕ್ರಮ ದೆತೊಂದ ಪಂದ್ ಅಧಿಕಾರಿ ತೆರಿಪಾದೆರ್.

You Missed