ತುಳು ಸುದ್ದಿ

ಬಪ್ಪನಾಡ್ ಡ್ ಭಾರಿ ಗೌಜಿಡ್ ನಡತ್ಂಡ್ ದೇವೆರೆನ ಪಗೆಲ್ ತೇರ್ ಉಚ್ಚಯ, ಸಾರ ಸಾರ ಭಕ್ತೆರೆಗ್ ಅನ್ನ ಪ್ರಸಾದ ಸೇವೆ

ಮುಲ್ಕಿ ಸೀಮೆದ ಒರ್ಂಬ ಮಾಗಣೆದ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನದ ಜಾತ್ರೆದ ನಿಲೆಟ್ಟ್ ಸನಿಯಾರ ಶ್ರೀ ದೇವೆರೆನ ಪಗೆಲ್ ತೇರ್ ಉಚ್ಚಯ, ಅನ್ನ ಪ್ರಸಾದ ಸೇವೆ ಗೌಜಿಡ್ ನಡತ್ಂಡ್.

ಧಾರ್ಮಿಕ ಲೇಸ್ ದ ಲೆಕ್ಕೊಡು ಕ್ಷೇತ್ರದ ತಂತ್ರಿಲಾಯಿನ ಶಿಬರೂರು ಗೋಪಾಲಕೃಷ್ಣ ತಂತ್ರಿಲು, ಅರ್ಚಕೆರ್ ಶ್ರೀಪತಿ ಉಪಾಧ್ಯಾಯ, ನರಸಿಂಹ ಭಟ್ರೆನ ಮುತಾಲಿಕೆಡ್ ಇಸೇಸ ಪ್ರಾರ್ತನೆ ನಡತ್ ದ್ ಶ್ರೀ ದೇವೆರೆನ ಬಲಿ ಉಚ್ಚಯ, ಪಗೆಲ್ ತೇರ್ ಉಚ್ಚಯ, ಪ್ರಸಾದ ವಿತರಣೆ, ಪಲ್ಲಪೂಜೆ, ಅನ್ನ ಪ್ರಸಾದ ಸೇವೆ ನಡತ್ಂಡ್.

ಈ ಪೊರ್ತುಡು ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ, ಧರ್ಮದರ್ಶಿಲು ಡಾ. ಹರಿಕೃಷ್ಣ ಪುನರೂರು, ಕ್ಷೇತ್ರದ ಅನುವಂಶಿಕ ಮೊಕ್ತೇಸರೆರ್ ದುಗ್ಗಣ್ಣ ಸಾವಂತ ಅರಸೆರ್, ಆಡಳಿತ ಮೊಕ್ತೇಸರೆರ್ ಮನೋಹರ ಶೆಟ್ಟಿ, ಕಾರ್ಯನಿರ್ವಹಣಾಧಿಕಾರಿ ಜಯಮ್ಮ, ಶಿವಶಂಕರ್, ವೆಂಕಟೇಶ್ ಹೆಬ್ಬಾರ್, ಮುಲ್ಕಿ ಶ್ರೀ ವೆಂಕಟರಮಣ ದೇವಸ್ಥಾನದ ಮೊಕ್ತೇಸರೆರ್ ಅತುಲ್ ಕುಡ್ವ, ದೇವಪ್ರಸಾದ್ ಪುನರೂರು, ಸುಭಾಷ್ ಶೆಟ್ಟಿ, ಸತೀಶ್ ಅಂಚನ್, ಸುನಿಲ್ ಆಳ್ವ, ಮೋಹನ್ ಕೋಟ್ಯಾನ್, ಗೋಪಾಲಕೃಷ್ಣ ಭಟ್, ವಿದ್ವಾನ್ ನಾಗೇಶ್ ಬಪ್ಪನಾಡು ಪಾಲ್ ಪಡೆದಿತ್ತೆರ್.

ಕ್ಷೇತ್ರಡ್ ರಾತ್ರೆ ಮಲ್ಲಿಗೆ ಪ್ರಿಯೆ ಶ್ರೀದೇವಿನ ಶಯನೋಚ್ಚಯ, ಮಾ.31 ಕ್ಕ್ ಮಲ್ಲ ತೇರ್ ಉಚ್ಚಯ ನಡಪರೆ ಉಂಡು.

ದ.ಕ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಬ್ರಿಜೇಶ್ ಚೌಟೆರ್ನ ಆಸ್ತಿ ಎತ್?

ಕುಡ್ಲ: ದಕ್ಷಿಣ ಕನ್ನಡ ಲೋಕಸಭೆ ಬಿಜೆಪಿ ಅಭ್ಯರ್ಥಿ ಬ್ರಿಜೇಶ್ ಚೌಟ ಸಾಂಕೇತಿಕವಾದ್ ಕೋಡೆ ನಾಮಪತ್ರ ಸಂದಾದೆರ್. ಏಪ್ರಿಲ್ 4 ಕ್ಕ್ ಅಧಿಕೃತವಾದ್ ನಾಮಪತ್ರ ಸಂದಾಯೆರೆ ಉಲ್ಲೆರ್. ಇನಿ ಸಂದಾಯಿನ ನಾಮಪತ್ರ ಅಫಿಡವಿಟ್‌ಡ್ ಲಕ್ಷಾಧಿಪತಿ ಪಂದ್ ಘೋಷಣೆ ಮಲ್ದೆರ್.

ಬ್ರಿಜೇಶ್ ಚೌಟ ಆಸ್ತಿ ಪೊಲಬು ಇಂಚ ಉಂಡು:

•ಸ್ಥಿರ ಬೊಕ್ಕ ಚರಾಸ್ತಿ ಒಟ್ಟು ಬಿಲೆ 70,81,365 ಲಕ್ಷ ರೂ.
•ಸ್ಥಿರ ಆಸ್ತಿದ ಒಟ್ಟು ಬಿಲೆ 27,31,365 ಲಕ್ಷ ರೂ.
•ಚರಾಸ್ತಿದ ಒಟ್ಟು ಬಿಲೆ 43,50,000 ಲಕ್ಷ ರೂ.
ಒಟ್ಟು 9,62,010 ರೂ. ದ ಇನ್ನೋವಾ ಕಾರ್ ಗಾದ್ ಸಾಲ ಮಲ್ದೆರ್.

ಬಿಎಸ್ಸಿ ಶಿಕ್ಷಣದೊಟ್ಟಿಗೆ ಐಐಎಂನ್ ಇಂದೋರ್​ಡ್ ಬ್ಯುಸಿನೆಸ್ ಮ್ಯಾನೇಜ್ಮೆಂಟ್ ಡಿಫೆನ್ಸ್ ಆಫೀಸರ್ ಸರ್ಟಿಫಿಕೇಟ್ ಕೋರ್ಸ್ ಮಲ್ದೆರ್. ಅವಿವಾಹಿತರಾಯಿನ ಮೇರ್ 42 ವರ್ಷ ಆತ್ಂಡ್.

ಬ್ರಿಜೇಶ್‌ ಚೌಟ ಏರ್?

ಕುಡ್ಲದ ರಥಬೀದಿಡ್ ಇಪ್ಪುನ ಕ್ಯಾಪ್ಟನ್ ಬೃಜೇಶ್ ಚೌಟ ಕಾಲೇಜ್ ದಿನಟ್ಟ್ ಎನ್ ಸಿಸಿಡ್ ಇತ್ತೆರ್. ಮಂಗಳೂರು ವಿವಿಡ್ ಎಡ್ಡೆ ಕೆಡೆಟ್ ಪನ್ಪುನ ಪುಗರ್ತೆನ್ ಪಡೆದಿತ್ತೆರ್. ಕುಡ್ಲದ ಸೇಂಟ್ ಅಲೋಶಿಯಸ್ ಕಾಲೇಜ್ ಡ್ ವಿಜ್ಞಾನ ಪದವಿನ್ ಪಡೆಯಿನ ಮೇರ್ ಇಂದೋರ್‌ದ ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಮ್ಯಾನೇಜ್‌ಮೆಂಟ್‌ರ್ದ್ ಆಡಳಿತ ವ್ಯವಹಾರ ನಿರ್ವಹಣೆಡ್ ಸ್ನಾತಕೋತ್ತರ ಪದವಿನ್ ಪಡೆತೆರ್‌.

ಯುಪಿಎಸ್ಸಿ ಮುಕೇನ ಡಿಫೆನ್ಸ್ ಪರೀಕ್ಷೆ ಬರೆದ್ ಪಾಸಾಯಿನ ಮೇರ್ ಚೆನ್ನೈಡ್ ಆಫೀಸರ್ಸ್ ಟ್ರೈನಿಂಗ್ ಅಕಾಡೆಮಿಡ್ ತರಬೇತಿ ಪಡೆದ್ ಭಾರತೀಯ ಭೂಸೇನೆಗ್ ಸೇರ್ದಿತ್ತೆರ್. ಪುಗರ್ತೆದ ಏಳ್ಮನೇ ಗೋರ್ಖಾ ರೈಫಲ್ಸ್ 7ನೇ ಬೆಟಾಲಿಯನ್ ಡ್ ಉತ್ತರ ಭಾರತ ಬೊಕ್ಕ ಈಶಾನ್ಯ ರಾಜ್ಯಲೆಡ್ ಸೇವೆ ಸಂದಾದ್ ಕ್ಯಾಪ್ಟನ್ ಕೆಲಸನ್ ಸೇರ್ದಿತ್ತೆರ್.

ರೇಡಿಯೊ ಮಣಿಪಾಲಡ್ ‘ಸಂಗೀತ ಪಾಠ’ ಸರಣಿ ಲೇಸ್

ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪಾದ್ ಕೊರ್ಪುನ ‘ಕಾವ್ಯಗಾನ -ಸಂಗೀತ ಪಾಠ’ ಲೇಸ್ ದ 53ನೇ ಸಂಚಿಕೆ ಮಾ.29 ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ವಿದ್ಯಾರ್ಥಿನಿಯಾದ್ ಬೇಬಿ ಅನಘ ಪಾಲ್ ಪಡೆಯೆರೆ ಉಲ್ಲೆರ್. ಮಾ.30 ಸನಿಯಾರ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಯುವಶಕ್ತಿ ಸೇವಾಪಥದ ರಡ್ಡನೇ ವರ್ಷದ ಉಚ್ಚಯ “ಸೇವಾ ಸಂಭ್ರಮ” ಆಚರಣೆ

ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಡ್ ಸಮಾಜ ಸೇವಾಕಾರ್ಯಡ್ ನಿರಂತರ ಸ್ಪಂದನೆ ಮಲ್ತೊಂದು ಇಪ್ಪುನ ಯುವಶಕ್ತಿ ಸೇವಾಪಥ ತನ್ನ ರಡ್ಡನೇ ವರ್ಷದ ಉಚ್ಚಯನ್ “ಸೇವಾ ಸಂಭ್ರಮ” ಪನ್ಪಿನ ಪೊಸ ಪರಿಕಲ್ಪನೆದ ಮುಕೇನ ಕಟ್ಟದ ಪಡ್ಪು ಅರುಣೋದಯ ಸಭಾಭವನಡ್ ಆಚರಣೆ ಮಲ್ತ್ಂಡ್.

ಸಮಾಜ ಬಂಧುಲೆರ್ದ್ ನಿಧಿ ಸಂಗ್ರಹ ಮಲ್ತ್ ದ್ ಜಿಲ್ಲೆದ ಬೇತೆ ಬೇತೆ ಭಾಗದ ಒಟ್ಟು 11 ಜನ ಅನಾರೋಗ್ಯ ಪೀಡಿತ ಫಲಾನುಭವಿಲೆಗ್ 4 ಲಕ್ಷ ರೂ.ದ ಆರ್ಥಿಕ ಸಹಕಾರ ಕೊರ್ಪುನೆತ್ತ ಮುಕೇನ ಯುವಶಕ್ತಿ ಸೇವಾಪಥದ ಆಶಕ್ತ ಸಮಾಜ ಬೊಕ್ಕ ಅಶಕ್ತ ಸಮಾಜದ ನಡುತ್ತ ಕೊಂಡಿ ಆತೆರ್.

ಯುವಶಕ್ತಿ ರಕ್ತನಿಧಿತ್ತ 10 ಸಾರ ಯುನಿಟ್ ನೆತ್ತೆರ್ ದ ಪೂರೈಕೆದ ಸಾರ್ಥಕತೆನ್ ಈ ಕ್ಷಣ ಕುಸಿ ಪಡೆಯೆರ್. ಹಿಂದೂ ಯುವಸೇನೆದ ಅಂಬ್ಯುಲೆನ್ಸ್‌ಡ್ ನಿರಂತರ ಸೇವೆ ಮಲ್ತೊಂದು ಇಪ್ಪುನ ಆಪದ್ಬಾಂಧವ ಚಾಲಕ ರಘು ಮೆರೆನ್ ಬೊಕ್ಕ ನಿರಂತರ ಸಮಾಜ ಸೇವೆ ಮಲ್ಪುನ ಮಂಗಳೂರು ಪರಿಸರದ ಯುವ ಕಾರ್ಪೋರೇಟರ್ ಗಣೇಶ ಕುಲಾಲ್ ಮೆರೆನ್ ಸಂಸ್ಥೆದ ಮುತಾಲಿಕೆಡ್ ಮಾನಾದಿಗೆ ಮಲ್ತೆರ್. ಲೇಸ್ ದ ಗುರ್ಕಾರ್ಮೆನ್ ಪ್ರಗತಿಪರ ಕೃಷಿಕೆರ್ ವಾಸು ಪೂಜಾರಿ ಒಯಿಸ್ ದಿತ್ತೆರ್.

ಬಿನ್ನೆರೆನ್ ತೆಂಕ ಕಜೆಕಾರ್ ಪಂಚಾಯಿತಿ ಸದಸ್ಯೆರ್ ಸತೀಶ್ ಪೂಜಾರಿ ಕಜೆಕಾರ್, ಪ್ರಗತಿಪರ ಕೃಷಿಕೆರ್ ರೂಪೇಶ್ ಪೂಜಾರಿ ಬಡೆಕೊಟ್ಟು, ಅರುಣೋದಯ ಭಜನಾ ಮಂದಿರದ ಅಧ್ಯಕ್ಷೆರ್ ಹೊನ್ನಪ್ಪ ಪೂಜಾರಿ ಮುದಲಾಡಿ ಬೊಕ್ಕ ಶಿವ ಛತ್ರಪತಿ ಸಂಸ್ಥೆದ ಸುನೀಲ್ ಬಡೆಕೊಟ್ಟು ಪಾಲ್ ಪಡೆದ್ ಸೇವಾ ಸಂಭ್ರಮಗ್ ಸಾಕ್ಷಿಯಾದ್ ಎಡ್ಡೆಪ್ಪು ಬಯಕಿಯೆರ್.

ಹಿಂಜಾವೇ ಪ್ರಮುಖೆರ್ ದಾಮೋದರ ನೆತ್ತರಕೆರೆ ಮುಖ್ಯ ಭಾಷಣ ಮಲ್ತೆರ್.
ಸೇವಾಪಥ ನಡತ್ ಬತ್ತಿನ ಸಿಂಹಾವಲೋಕನನ್ ತಿಲಕ್ ಮುಂಡಾಲ ಮಂಡಿಸಾಯೆರ್. ದಿನೇಶ್ ಬಡೆಕೊಟ್ಟು ಪ್ರಾಸ್ತವಿಕ ಪಾತೆರಿಯೆರ್.
ಪ್ರಕಾಶ್ ಮುಂಡಾಲ ಎದ್ಕೊನಿಯೆರ್. ವಿಜಿತ್ ಸಂಪೋಳಿ ಸೊಲ್ಮೆ ಸಂದಾಯೆರ್. ದೇವದಾಸ್ ಅಬುರ ಲೇಸ್ ದ ಸುಧಾರಿಕೆ ಮಲ್ತೆರ್.

ಯುವಶಕ್ತಿ ಬಂಧುಲು ತನ್ನ ಶುಭ ಸಂಭ್ರಮಡ್ ಸಮಾಜಗ್ ಒಂಜಿ ಪಾಲ್ ಪನ್ಪುಲೆಕ್ಕ ಅರ್ಪಣೆ ಮಲ್ತಿನ ಶುಭನಿಧಿಡ್ 3ನೇ ಯೋಜನೆದ ಮುಕೇನ 45,000/- ಬಿಲೆತ್ತ ಶುದ್ದ ಪರ್ಪಿನ ನೀರ್ ದ ಘಟಕನ್ ಕೈತಲ್ದ ಮಣಿನಾಲ್ಕೂರು ಸರ್ಕಾರಿ ಶಾಲೆಗ್ ಕೊರಿಯೆರ್.

ಅಂಚೆನೆ ಏಪಲ ಒಟ್ಟಿಗೆ ಇಪ್ಪುನ ಮಾತ ಮಿತ್ರ ಸಂಸ್ಥೆಲೆಗ್ ಅಭಿನಂದನೆ ಸಂದಾಯೆರ್.
ಯುವಶಕ್ತಿ ಕಡೇಶಿವಾಲಯ (ರಿ.) ದ ಮುತಾಲಿಕೆಡ್ ಆಯೋಜನೆ ಮಲ್ತಿನ ಜೈಶ್ರೀರಾಮ್ ಪಂತೊಡು ಗೆಂದಿನಕ್ಲೆಗ್ ಇನಾಮು ಪಟ್ಟಿಯೆರ್‌. ಯುವಶಕ್ತಿ ಸೇವಾಪಥರ್ದ್ ಇಡೇ ಮುಟ್ಟ 61 ಲಕ್ಷ ಸಮಾಜಗ್ ಸಮರ್ಪಣೆ ಆತ್ಂಡ್. ಮಾತೃಸಂಸ್ಥೆ ಯುವಶಕ್ತಿ ಕಡೇಶಿವಾಲಯರ್ದ್ 17 ಲಕ್ಷ ಸಮಾಜದ ಅಶಕ್ತೆರೆಗ್ ಅರ್ಪಣೆ ಮಲ್ತೆರ್. ಈ ಲೇಸ್ ಡ್ ಯುವಶಕ್ತಿದ ಮಾತ ಸದಸ್ಯೆರ್ ಪಾಲ್ ಪಡೆದಿತ್ತೆರ್.

ಬಪ್ಪನಾಡ್ ಡ್ ಎಲ್ಲೆ ಪಗೆಲ್ ತೇರ್, ಎಲ್ಲೆಂಜಿ ಜಾತ್ರೆ

ಮುಲ್ಕಿ: ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನಡ್ ವರ್ಷಾವಧಿ ಜಾತ್ರೆ ಮಾ.30 ಬೊಕ್ಕ 31ಕ್ಕ್ ನಡಪರೆ ಉಂಡು.

ಮಾ.30 ಸನಿವಾರ ಪಗೆಲ್ ತೇರ್ ಉಚ್ಚಯ, ಸಾರ್ವಜನಿಕ ಅನ್ನಸಂತರ್ಪಣೆ ಉಚ್ಚಯ ಬಲಿ, ದೇವಿನ ಶಯನದ ಉಚ್ಚಯ ನಡಪರೆ ಉಂಡು. ಮಾ.31ಐತಾರ ಬೊಲ್ಪು ಮೂಡುನಗ ಗರ್ಭಗುಡಿತ್ತ ಬಾಕಿಲ್ ದೆಪ್ಪರೆ (ಕವಾಟೋದ್ಘಾಟನೆ), ಆದ್ ಶಯನದ ಮಲ್ಲಿಗೆ ಪ್ರಸಾದ ಪಟ್ಟುವೆರ್.

ರಾತ್ರೆ ದೇವೆರ್ನ ಬಲಿ ಆಯಿ ಬೊಕ್ಕ ಸಸಿಹಿತ್ಲು ಶ್ರೀ ಭಗವತಿ ದೇವಿ ಬೊಕ್ಕ ಸಪರಿವಾರ ದೈವೊಲೆನ ಉಪಸ್ಥಿತಿಟ್ಟ್ ಮಲ್ಲ ತೇರ್ ಉಚ್ಚಯ ನಡಪರೆ ಉಂಡು. ಅಯಿರ್ದ್ ಬೊಕ್ಕ ಪೆಜಮಾಡಿದ ಚಂದ್ರಸಾನುಭೋಗರ ಕುದ್ರುದ ಕೆರೆಟ್ಟ್ ಜಳಕದ ಬಲಿ ಆದ್ ದೇವಿನ ಎದುರು ತೂಟೆದಾರ ನಡತ್ ದ್ ಚಂದ್ರಮಂಡಲ ತೇರ್ ದ ಬಲಿ ನಡಪರೆ ಉಂಡು. ಬೊಕ್ಕ ಕೊಡಿ ಜಾವರೆ ಉಂಡು.

ಎ.1 ಸೋಮಾರ ದೇವಿಗ್ ಹಣ್ಣುಕಾಯಿ ಸಮರ್ಪಣೆ, ಸಂಪ್ರೋಕ್ಷಣೆ ನಡಪರೆ ಉಂಡು. ಎ.4 ಕ್ಕ್ ಶ್ರೀ ಜಾರಂದಾಯ ದೈವೊದ ನೇಮ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ತೀರ್ಥ ಗಂಧ ಪ್ರಸಾದ ದೆತೊಂದು ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಮುಲ್ಕಿ ಅರಮನೆತ್ತ ಅನುವಂಶಿಕ ಮೊಕ್ತೇಸರೆರ್ ದುಗ್ಗಣ್ಣ ಸಾವಂತೆರ್, ಅನುವಂಶಿಕ ಬೊಕ್ಕ ಆಡಳಿತ ಮೊಕ್ತೇಸರೆರ್ ಎನ್ ಎಸ್ ಮನೋಹರ ಶೆಟ್ಟಿ, ಕಾರ್ಯನಿರ್ವಾಹಣಾಧಿಕಾರಿ ಜಯಮ್ಮ ಪಿ ಲೆಪ್ಪೋಲೆಡ್ ತೆರಿಪಾದೆರ್.

ಎ.19: ಒಮಾನ್ ಬಿಲ್ಲವಾಸ್ 15ನೇ ವರ್ಷದ ಉಚ್ಚಯ, ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ಆಟ

ಒಮಾನ್ ಬಿಲ್ಲವಾಸ್ ಕೂಟದ 15ನೇ ವರ್ಷದ ವಾರ್ಷಿಕ ಉಚ್ಚಯ ಎ.19 ಸುಕ್ರಾರ ಮಸ್ಕತ್ ದ ರೂವಿ ಅಲ್ ಫಲಾಜ್ ಹೋಟೆಲ್ ದ ಗ್ರ್ಯಾಂಡ್ ಹಾಲ್ ಡ್ ನಡಪರೆ ಉಂಡು.

ಈ ಲೇಸ್ ದ ಲೆಕ್ಕೊಡು ಬೊಲ್ಪುರ್ದ್ ಮಧ್ಯಾಹ್ನ ಮುಟ್ಟ ಬೇತೆ ಬೇತೆ ಸಾಂಸ್ಕೃತಿಕ ಮನೋರಂಜನಾ ಲೇಸ್, ಮಧ್ಯಾಹ್ನ ಶ್ರೀ ಗೆಜ್ಜೆಗಿರಿ ಮೇಳದಕ್ಲೆರ್ದ್ ಕ್ಷೇತ್ರದ ಸ್ಥಳ ಪುರಾಣ ಆಧಾರಿತ ಕಾರಣಿಕನ್ ತೂಪಾವುನ, ನವರಸ ಭರಿತ ತುಳು ಯಕ್ಷಗಾನ ಪ್ರಸಂಗ “ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ” ಆಟದ 225ನೇ ಪ್ರಯೋಗದ ಪ್ರದರ್ಶನ ನಡಪರೆ ಉಂಡು.

ಈ ಮಾತ ಕಾರ್ಯಕ್ರಮೊಲೆಡ್ ಕಲಾಭಿಮಾನಿಲು ಎಚ್ಚ ಸಂಖ್ಯೆಡ್ ಪಾಲ್ ಪಡೆದ್ ಯಶಸ್ವಿ ಮಲ್ಪೊಡು ಪಂದ್ ಒಮಾನ್ ಬಿಲ್ಲವಾಸ್ ಬಿನ್ನಾಪು ಮಲ್ದೆರ್.

ಮಾ.30: ಕುಡುಪು ಭಟ್ರ ಕಲ್ಲುರ್ಟಿ ದೈವಸ್ಥಾನಡ್ ಕೋಲ ಬಲಿ ಸೇವೆ

ಕುಡುಪು ಭಟ್ರ ಕಲ್ಲುರ್ಟಿ ಪಂದೇ ಪುಗರ್ತೆ ಪಡೆಯಿನ ಕಲ್ಲುರ್ಟಿ ದೈವಸ್ಥಾನಡ್ ಕುಡುಪು ಅನಂತ ಭಟ್ರೆನ ಜೋಕುಲು ಬೊಕ್ಕ ಪತ್ತ್ ಸಮಸ್ತೆರೆನ ಪರವಾದ್ ಮಾ‌.30 ಸನಿಯಾರ ರಾತ್ರೆ ಕಲ್ಲುರ್ಟಿ ಕಾಳಮ್ಮ ಕಲ್ಕುಡ ಬೊಕ್ಕ ಗುಳಿಗ ಪಂಜುರ್ಲಿ ದೈವೊಲೆಗ್ ಕೋಲ ಬಲಿ ಸೇವೆ ನಡಪರೆ ಉಂಡು.

ಅವ್ವೇ ದಿನ ಬಯ್ಯಗ್ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು. ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಕುಡುಪು ಪಿ ಅನಂತಭಟ್ರೆನ ಜೋಕುಲು ಬೊಕ್ಕ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಒರ್ಂಬ ಲಿಂಬೆಪುಳಿಕ್ಕ್ 2.3 ಲಕ್ಷ ರೂ.!

ತಮಿಳುನಾಡ್ ದ ಪುಗರ್ತೆದ ವಿಲ್ಲುಪುರಂಡ್ ಇಪ್ಪುನ ಮುರುಗನ್ ದೇವಸ್ಥಾನದ ಉಚ್ಚಯಡ್ ಗಲಸಿನ ಲಿಂಬೆಪುಳಿನ್ ಏಲಂ ಮಲ್ದೆರ್.

ಒರ್ಂಬ ದಿನ ನಡಪುನ ಈ ಉಚ್ಚಯದ ಅಕೇರಿದ ದಿನ ಪೂಜೆಗ್ ಗಲಸುನ ಲಿಂಬೆನ್ ಏಲಂ ಮಲ್ಪುವೆರ್. ಈ ಸರ್ತಿ 9 ಲಿಂಬೆ ಪುಳಿ 2.3 ಲಕ್ಷ ರೂ. ಗ್ ಏಲಂ ಆತ್ಂಡ್.

ಈ ಲಿಂಬೆಪುಳಿಕ್ಕ್ ದೇವೆರ್ನ ಶಕ್ತಿ ಉಪ್ಪುಂಡು. ಬಂಜೆತನ ನಿವಾರಣೆ ಮಲ್ಪುನ ಶಕ್ತಿ ಉಂಡು. ಬೊಕ್ಕ ಧನಾತ್ಮಕ ಶಕ್ತಿನ್ ರೂಪಿಸಾವುನ ಮಹತ್ವದ ಪಾತ್ರ ಒಯಿಸುಂಡು ಪನ್ಪಿನ ಮುಲ್ಪದ ಭಕ್ತೆರೆನ ನಂಬಿಕೆ ಆತ್ಂಡ್.

ಜಗತ್ತ್ ದ್ ಮಾಮಲ್ಲ ಅನಕೊಂಡ ಉಚ್ಚು ಸೈತ್ಂಡ್!

ಬ್ರೆಜಿಲ್ ದ ಅಮೆಜಾನ್ ಕಾಡ್ ಡ್ ಇಂಚಿಪ್ಪ ಪತ್ತೆ ಆದಿತ್ತಿನ ಜಗತ್ತ್ ಡೇ ಮಸ್ತ್ ಮಲ್ಲ ಅನಕೊಂಡ ಉಚ್ಚು ಅನಾ ಜೂಲಿಯಾ ಸೈತ್ಂಡ್.

ಸುಮಾರ್ 26 ಅಡಿ ಉದ್ದ ಬೊಕ್ಕ 200 ಕೆಜಿ ತೂಕದ ಈ ಮಲ್ಲ ಉಚ್ಚುನ್ ಏರೋ ಗುಂಡು ಪಾಡ್ದ್ ಕೆರ್ತೆರ್ ಪಂದ್ ಸಂಶಯ ಬೈದ್ಂಡ್.

ಡಿಸ್ನಿ+ ಡ್ ಪ್ರಸಾರ ಆಪುನ ನ್ಯಾಷನಲ್ ಜಿಯಾಗ್ರಫಿಕ್ ದ ಪೋಲ್ ಟು ಪೋಲ್ ವಿತ್ ವಿಲ್ ಸ್ಮಿತ್ ಪಿಕ್ಚರ್ ದ ಶೂಟಿಂಗ್ ದ ಪೊರ್ತುಡು ಡಚ್ ಜೀವ ಶಾಸ್ತ್ರಜ್ಞೆರ್ ಡಾ. ಫ್ರೀಂಕ್ ಫೋಕ್ ಈ ಮಲ್ಲ ಉಚ್ಚುನ್ ಪತ್ತೆ ಮಲ್ತ್ ದಿತ್ತೆರ್.

ಎಲ್ಲೆ ಫಸ್ಟ್ ಪಿಯುಸಿ ಪರೀಕ್ಷೆ ರಿಸಲ್ಟ್

2023-24 ನೇ ಸಾಲ್ ದ ಫಸ್ಟ್ ಪಿಯುಸಿ ಪರೀಕ್ಷೆ ರಿಸಲ್ಟ್ ಎಲ್ಲೆ ಪ್ರಕಟ ಆಪುಂಡು.

ಕರ್ನಾಟಕ ಶಾಲಾ ಪರೀಕ್ಷಾ ಬೊಕ್ಕ ಮೌಲ್ಯಾಂಕನ ಮಂಡಳಿದ ವೆಬ್ ಸೈಟ್ karresults.nic.in ಡ್ ರಿಸಲ್ಟ್ಈ ಬೊಲ್ಪುಗು 9 ಗಂಟೆರ್ದ್ 11 ಗಂಟೆದೊಲಯಿ ಪ್ರಕಟ ಆಪುಂಡು‌.

ಮಾತ ಕಲ್ಪಾರ್ಥಿಲು ರೋಲ್ ನಂಬರ್ ಆಧರಿಸಾದ್ ತನ್ನ ಫಲಿತಾಂಶನ್ ಈ ವೆಬ್ ಸೈಟ್ ಡ್ ತೂವೊಲಿ. ರಿಸಲ್ಟ್ ನ್ ಈ ಸರ್ತಿ ಬೇಗನೇ ಪ್ರಕಟ ಮಲ್ಪೆರೆ ಮಂಡಳಿ ದುಂಬಾತ್ಂಡ್. ಅವ್ವೇ ದಿನ ಕಾಲೇಜ್ ಡ್ಲಾ ರಿಸಲ್ಟ್ ಪ್ರಕಟ ಆಪುಂಡು‌. ಕಾಲೇಜ್ ಡ್ಲಾ ವಿದ್ಯಾರ್ಥಿಲು ರಿಸಲ್ಟ್ ನ್ ತೂವೊಲಿ.