ತುಳು ಸುದ್ದಿ

ಎ.2: ಬೊಲ್ತೇರ್ ಮಂಡಲ ಬಿಜೆಪಿ ಪದುಕೆರೆನ ಪದಗ್ರಹಣ, ಕಾರ್ಯಕರ್ತೆರೆನ ಸಮಾವೇಶ

ಭಾರತೀಯ ಜನತಾ ಪಾರ್ಟಿ ಬೊಲ್ತೇರ್ ಮಂಡಲದ ಮಂಡಲ ಪದುಕೆರೆನ, ಬೇತೆ ಬೇತೆ ಮೋರ್ಚಾ, ಮಹಾಶಕ್ತಿ ಕೇಂದ್ರ, ಶಕ್ತಿಕೇಂದ್ರ ಬೊಕ್ಕ ಬೂತ್ ಸಮಿತಿ ಪದುಕೆರೆನ ಪದಗ್ರಹಣ ಬೊಕ್ಕ ಕಾರ್ಯಕರ್ತೆರೆನ ಸಮಾವೇಶ ಎಲ್ಲೆ (ಎ.2) ಬೊಲ್ಪುಗು 10 ಗಂಟೆಗ್ ಗುರುವಾಯನಕೆರೆ ಕಿನ್ಯಮ್ಮ ಯಾನೆ ಗುಣವತಿಯಮ್ಮ ಸಭಾಭವನಡ್ ನಡಪರೆ ಉಂಡು.

ಈ ಲೇಸ್ ಡ್ ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಮಂಗಳೂರು ಲೋಕಸಭಾ ಬಿಜೆಪಿ ಅಭ್ಯರ್ಥಿ ಕ್ಯಾಪ್ಟನ್ ಬ್ರಿಜೇಶ್ ಚೌಟ, ರಾಜ್ಯ ಬಿಜೆಪಿ ಯುವಮೋರ್ಚಾ ಪ್ರಧಾನ ಕಾರ್ಯದರ್ಶಿ ಶಾಸಕೆರ್ ಹರೀಶ್ ಪೂಂಜ, ವಿಧಾನಪರಿಷತ್ ಸದಸ್ಯೆರ್ ಪ್ರತಾಪಸಿಂಹ ನಾಯಕ್, ಬಿಜೆಪಿ ಜಿಲ್ಲಾಧ್ಯಕ್ಷೆರ್ ಸತೀಶ್ ಕುಂಪಲ ಸೇರಿನಂಚೆನೆ ರಾಜ್ಯ ಬೊಕ್ಕ ಜಿಲ್ಲೆದ ಪ್ರಮುಖೆರ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಬಿಜೆಪಿ ಮಂಡಲಾಧ್ಯಕ್ಷೆರ್ ಶ್ರೀನಿವಾಸ್ ರಾವ್, ಪ್ರಧಾನ ಕಾರ್ಯದರ್ಶಿ ಜಯಾನಂದ ಗೌಡ, ಪ್ರಶಾಂತ್ ಪಾರೆಂಕಿ ಪ್ರಕಟಣೆಡ್ ತೆರಿಪಾದೆರ್.

ಕಮರ್ಷಿಯಲ್ ಗ್ಯಾಸ್ ಗ್ ಸಿಲಿಂಡರ್ ಗ್ 30.50 ರೂ. ಕಮ್ಮಿ

ಪೊಸ ಹಣಕಾಸು ವರ್ಷದ ಸುರುತ್ತ ದಿನನೇ ದೇಶಡ್ ಇನಿರ್ದ್ 19 ಕೆಜಿದ ಎಲ್ ಪಿಜಿ ಸಿಲಿಂಡರ್ ಕಿರಯ 30.50 ರೂ. ಕಮ್ಮಿ ಆತ್ಂಡ್.

ಕರ್ನಾಟಕಡ್ 19 ಕೆಜಿ ಎಲ್ ಪಿಜಿ ಸಿಲಿಂಡರ್ 1821.50 ರೂ. ಗ್ ತಿಕ್ಕುಂಡು. ಸುರುಕು 1851 ರೂ. ಇತ್ತ್ಂಡ್.

ನನ ಗೃಹಬಳಕೆದ ಸಿಲಿಂಡರ್ ಕಿರಯಡ್ ಒವ್ವೇ ಬದಲಾವಣೆ ಆತಿಜಿ.‌ ಇತ್ತೆ ರಾಜ್ಯಡ್ ಗೃಹಬಳಕೆದ ಎಲ್ ಪಿಜಿ ಸಿಲಿಂಡರ್ ಕಿರಯ 807.5 ರೂ. ಉಂಡು.

ದೊಂಬುದ ಪೆಟ್ಟ್ ಗ್ 2 ಜನ ತೀರ್ ಪೋಯೆರ್!

ರಾಜ್ಯಡ್ ದೊಂಬುದ ತಾಪಮಾನ ಎಚ್ಚಾವೊಂದುಂಡು. ಉಷ್ಣ ಗಾಳಿಗ್ ರಡ್ಡ್ ಜನ ತೀರ್ ಪೋತೆರ್ ಪಂದ್ ಸಂಶಯ ಬೈದ್ಂಡ್.

ರಾಯಚೂರು ಜಿಲ್ಲೆ ಮಾನ್ವಿ ತಾಲೂಕ್ ದ ಶ್ರೀಶೈಲಗ್ ಪಾದೆಯಾತ್ರೆದ ಮುಕೇನ ಪೋವೊಂದು ಇತ್ತಿನ ಬಾಗಲಕೋಟೆ ಚಿಮ್ಮುಡ್ ಗ್ರಾಮದ ಶ್ರೀಶೈಲ (21) ತೀರ್ ಪೋತೆರ್.

ಅಂಚೆನೆ ಆಳಂದ ತಾಲೂಕ್ ದ ದಣ್ಣೂರು ಗ್ರಾಮಡ್ ಐತಾರದಾನಿ ಕೂಲಿ ಕೆಲಸ ಮಲ್ತೊಂದು ಇಪ್ಪುನ ಬುರ್ದು ಶರಣಪ್ಪ ಸಮಗಾರ (42) ತೀರ್ ಪೋತೆರ್. ಮರಣೋತ್ತರ ಪರೀಕ್ಷೆದ ಬೊಕ್ಕ ನಿಜಾಂಶ ಗೊತ್ತಾವೊಡಾತೆ.

ನಾಪತ್ತೆ ಆಯಿನ ಬಂಟ್ವಾಳದ ಗ್ರಾಮ ಪಂಚಾಯತಿ ಕಾರ್ಯದರ್ಶಿ ಪುನ ಆದ್ ಪತ್ತೆ

ವೋಟುದ ಕೆಲಸಗ್ ನಿಯೋಜನೆಯಾದಿತ್ತ್ ದ್ ಬೊಕ್ಕ ನಾಪತ್ತೆ ಆಯಿನ ಬಂಟ್ವಾಳದ ಅಮ್ಮಾಡಿ ಗ್ರಾಮ ಪಂಚಾಯತ್ ಕಾರ್ಯದರ್ಶಿ ಲಕ್ಷ್ಮೀನಾರಾಯಣ ಪುನ ಆದ್ ಪತ್ತೆ ಆತೆರ್.

ಧರ್ಮಸ್ಥಳ ಕೈತಲ್ದ ಪಟ್ರಮೆ ತುದೆಟ್ಟ್ ಐತಾರ ಮೆರೆನ ಪುನ ಪತ್ತೆ ಆತ್ಂಡ್. ಮಡಂತ್ಯಾರ್ ಮಾಲಾಡಿ ಗ್ರಾಮದ ವಿದ್ಯಾನಗರ ನಿವಾಸಿ, 6 ವರ್ಷೊದಿಂಚ ಬಂಟ್ವಾಳ ತಾಲೂಕ್ ಅಮ್ಮಾಡಿ ಗ್ರಾಮ ಪಂಚಾಯತ್ ಡ್ ಕಾರ್ಯದರ್ಶಿಯಾದ್ ಕೆಲಸ ಮಲ್ತೊಂದು ಇತ್ತಿನ ಲಕ್ಷ್ಮೀನಾರಾಯಣ (52) ಮಾ.27 ಕ್ಕ್ ಬೊಲ್ಪುಗು ಕೆಲಸಗ್ ಪೋಪೆ ಪಂದ್ ಪೋತಿನಾರ್ ನಾಪತ್ತೆ ಆದಿತ್ತೆರ್. ಪಟ್ರಮೆ ಸಂಕದಲ್ಪ ಮೆರೆನ ಬೈಕ್ ತಿಕ್ ದಿತ್ತ್ಂಡ್.

ರೇಡಿಯೊ ಮಣಿಪಾಲಡ್ ಯೋಗ ಸುಯೋಗ ಸರಣೆ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 53ನೇ ಸಂಚಿಕೆ ಎ.1 ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಂಡ್.

ಈ ಲೇಸ್ ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನಡ್ ಯೋಗ ಶಿಕ್ಷಕೆರಾಯಿನ ಆರ್ ಶಿವಕುಮಾರ್ ಪಾಲ್ ಪಡೆಯೆರ್. ಎ.2 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು‌.

ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಫ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ಕಾಲೇಜ್ ಗ್ ನ್ಯಾಕ್ ರ್ದ್ “ಎ”ಗ್ರೇಡ್ ಮಾನ್ಯತೆ

ಸುಬ್ರಹ್ಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಅಧೀನಗ್ ಸೇರಿನ ಕುಕ್ಕೆ ಶ್ರೀ ಸುಬ್ರಹ್ಮಣ್ಯೇಶ್ವರ ಕಾಲೇಜ್ ಗ್ 2024ನೇ ಸಾಲ್ ಡ್ ರಾಷ್ಟ್ರೀಯ ಮೌಲ್ಯಮಾಪನ ಬೊಕ್ಕ ಮಾನ್ಯತೆ (ನ್ಯಾಕ್) ಕೂಟರ್ದ್ ಎ ಗ್ರೇಡ್ ಪಡೆತ್ಂಡ್.

ವಿಶ್ವವಿದ್ಯಾನಿಲಯ ಧನಸಹಾಯ ಆಯೋಗದ ನಿಯಮಾನಸಾರವಾದ್ ಉನ್ನತ ಶಿಕ್ಷಣ ಸಂಸ್ಥೆಲು ಪ್ರತಿ ಐನ್ ವರ್ಷಗೊರ ಗುಣಮಟ್ಟ ಮೌಲ್ಯಮಾಪನ ಮಲ್ಪುನೇ ಕಡ್ಡಾಯ ಆತ್ಂಡ್.

ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ಕಾಲೇಜ್ ಕರಿನ ರಡ್ಡ್ ಸರ್ತಿ ನ್ಯಾಕ್ ಮೌಲ್ಯಮಾಪನ ಮಲ್ತ್ ದ್ ” ಬಿ” ಗ್ರೇಡ್ ಪಡೆದಿತ್ತ್ಂಡ್. ಇತ್ತೆ ಮೂಜಿನೇ ಸಲದ ಮೌಲ್ಯಮಾಪನಡ್ “ಎ” ಗ್ರೇಡ್ ಬೈದ್ಂಡ್.

ಇತ್ತೆ ಶ್ರೀ ದೇವಸ್ಥಾನದ ಕಾರ್ಯನಿರ್ವಹಣಾಧಿಕಾರಿ ಡಾ.ನಿಂಗಯ್ಯ ಕಾರ್ಯದರ್ಶಿಯಾದ್ ಡಾ. ದಿನೇಶ್ ಪಿಟಿ ಪ್ರಾಂಶುಪಾಲೆರಾದ್ ಕೆಲಸ ಮಲ್ತೊಂದು ಉಲ್ಲೆರ್.

ಮಾತಾ ತಾಲೂಕುಡುಲ ಪ್ರಿಯದರ್ಶಿನಿ ಕೋ-ಆಪರೇಟಿವ್ ಸೊಸೈಟಿದ ಶಾಖೆ ಉದಿಪನ ಆವಡ್ : ಡಾ|ಎಂ.ಎನ್.ರಾಜೇಂದ್ರ ಕುಮಾರ್

ಕಿನ್ನಿಗೋಳಿಡ್ ಪ್ರಿಯದರ್ಶಿನಿ ಕೋ-ಆಪರೇಟಿವ್ ಸೊಸೈಟಿದ 3ನೇ ಶಾಖೆ ಉದಿಪನ

ಕಿನ್ನಿಗೋಳಿ: ವಾಣಿಜ್ಯ ಬ್ಯಾಂಕ್ ಲೆಡ್ ನಮ್ಮ ನಾಡ್ ದ ಬಾಷೆ, ಸಂಸ್ಕೃತಿ ತೆರಿಯಂದಿನ ಸಿಬ್ಬಂದಿಲೇ ದಿಂಜಿದ್ ಪೋತೆರ್. ಜನಸಾಮಾನ್ಯೆರೆಗ್ ಅಕ್ಲೆರ್ದ್ ಎಡ್ಡೆ ಸೇವೆ ತಿಕೊಂದಿಜ್ಜಿ. ಆಂಡ ಸಹಕಾರಿ ಕ್ಷೇತ್ರದ ಬ್ಯಾಂಕ್ ಲೆಡ್ ಎಡ್ಡೆ ಮನಸ್ ದ ಸಿಬ್ಬಂದಿಲು ಎಡ್ಡೆ ರೀತಿದ ಸೇವೆ ಕೊರೊಂದುಲ್ಲೆರ್. ಸೊಸೈಟಿದ ಅಧ್ಯಕ್ಷೆರ್, ನಿರ್ದೇಶಕೆರ್ ಬೊಕ್ಕ ಸಿಬ್ಬಂದಿಲೆನ ಶ್ರಮತ್ತ ಫಲವಾದ್ ಸೊಸೈಟಿ ಲಾಭೊಡ್ ನಡತೊಂದು ಪನ್ಪಿನವು ಭಾರಿ ಸಂತೋಷದ ಸಂಗತಿ. ರಡ್ಡ್ ಜಿಲ್ಲೆದ ಮಾತಾ ತಾಲೂಕುಡುಲ ಪ್ರಿಯದರ್ಶಿನಿ ಕೋ-ಆಪರೇಟಿವ್ ಸೊಸೈಟಿದ ಶಾಖೆಲು ಉದಿಪನ ಆವೊಡು ಪಂದ್ ಕರ್ನಾಟಕ ರಾಜ್ಯ ಸಹಕಾರ ಮಹಾಮಂಡಲದ ಅಧ್ಯಕ್ಷೆರ್ ಡಾ|ಎಂ.ಎನ್.ರಾಜೇಂದ್ರ ಕುಮಾರ್ ಪಂಡೆರ್.

ಆರ್ ಕಿನ್ನಿಗೋಳಿದ ಬೆತ್ಲೆಹೆಮ್ ಸ್ಟಾರ್ ಕಾಂಪ್ಲೆಕ್ಸ್ ಡ್ ಪ್ರಿಯದರ್ಶಿನಿ ಕೊಆಪರೇಟಿವ್ ಸೊಸೈಟಿದ ಮೂಜಿನೇ ಶಾಖೆನ್ ಮಾ.31(ಐತಾರ) ಉದಿಪನ ಮಲ್ತ್‌ದ್ ಪಾತೆರಿಯೆರ್.

ಪ್ರಿಯದರ್ಶಿನಿ ಸೊಸೈಟಿದ ಅಧ್ಯಕ್ಷೆರ್ ಎಚ್. ವಸಂತ ಬೆರ್ನಾಡ್ ಪ್ರಾಸ್ತಾವಿಕವಾದ್ ಪಾತೆರ್ದ್, ಎಚ್. ನಾರಾಯಣ ಸನಿಲ್ ಬೊಕ್ಕ ಪಂಜದ ಗುತ್ತು ಶಾಂತರಾಮ ಶೆಟ್ಟಿ ಮೊಕ್ಲೆನ ಪ್ರೇರಣೆಡ್ ಹಳೆಯಂಗಡಿಡ್ ಸುರು ಆಯಿನ ಪ್ರಿಯದರ್ಶಿನಿ ಕೋ-ಆಪರೇಟಿವ್ ಸೊಸೈಟಿ, ಮಾಜಿ ಸಚಿವೆರ್ ಕೆ.ಅಭಯಚಂದ್ರ ಜೈನ್ ಮೆರೆನ ಮಾರ್ಗದರ್ಶನಡ್ ಎಡ್ಡೆ ರೀತಿಡ್ ನಡತೊಂದು ಇತ್ತ್ ದ್ 2023-24ನೇ ವರ್ಷಡ್ 195 ಕೋಟಿ ರೂಪಾಯಿದ ವೈವಾಟ್‌ ದ ಸಾಧನೆ ಮಲ್ದ್ಂಡ್. ಹಳೆಯಂಗಡಿಡ್ ಪ್ರಧಾನ ಕಚೇರಿ ಇತ್ತ್ ದ್ ಪಡ್ಡೆದ್ರಡ್ ಸುರೂತ್ತ ಶಾಖೆ ಉದಿಪನ ಆಂಡ್. ಇತ್ತೆ ತನ್ನ ಮೂಜನೇ ಶಾಖೆನ್ ಕಿನ್ನಿಗೋಳಿಡ್ ಉದಿಪನ ಮಲ್ತೊಂದುಲ್ಲ ಪಂದ್ ಬತ್ತಿನ ಬಿನ್ನೆರೆನ್ ಸ್ವಾಗತ ಮಲ್ತೆರ್.

ಕಿನ್ನಿಗೋಳಿ ಶಾಖೆನ್ ಕಾಂಡೆ ಡಾ| ಎಂ. ಎನ್. ರಾಜೇಂದ್ರ ಕುಮಾರ್ ಉದಿಪನ ಮಲ್ತೆರ್. ಮುಲ್ಕಿ ಸೀಮೆ ಅರಸೆರ್ ಎಂ. ದುಗ್ಗಣ್ಣ ಸಾವಂತೆರ್ ಅಧ್ಯಕ್ಷತೆ ವಹಿಸ್ ದಿತ್ತೆರ್. ನವರಸ ರಾಜೆ ಪುಗರ್ತೆದ ನಟೆ ಭೋಜರಾಜ್ ವಾಮಂಜೂರು ಎಡ್ಡೆಪ್ಪು ಬಯಕಿಯೆರ್.

ಮಾಜಿ ಸಚಿವೆರ್ ಕೆ. ಅಭಯಚಂದ್ರ ಮೇರ್ ದೀಪ ಅರ್ಲಾದ್ ಸೊಸೈಟಿ ಅಭಿವೃದ್ಧಿ ಆದ್ 50 ಶಾಖೆಲೆನ್ ಉದಿಪನ ಆಪಿಲೆಕ ಆವಡ್ ಪಂಡೆರ್. ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ಎಂ ರೈ ಪ್ರಿಯದರ್ಶಿನಿ ಸ್ವಸಹಾಯ ಗುಂಪುಗು ಚಾಲನೆ ಕೊರ್ದು ಮಾತೆರ್ನಲ ಸಹಕಾರೊಡು ಸೊಸೈಟಿದ 50 ಅತ್ತ್ 100 ಶಾಖೆ ಆಪಿನಾತ್ ಅಭಿವೃದ್ಧಿ ಆವಡ್ ಪಂಡೆರ್.

ಕಿನ್ನಿಗೋಳಿ ಕೊಸೆಸಾಂವ್ ಅಮ್ಮ ಚರ್ಚ್ ದ ಧರ್ಮಗುರು ಫಾ| ಫಾವುಸ್ತಿನ್ ಲುಕಾಸ್ ಲೋಬೋ
ಅಮೃತ ನಗದು ಪತ್ರ ಠೇವಣಿ ಬುಡುಗಡೆ ಮಲ್ತೆರ್.

ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳಿದ ನಿರ್ದೇಶಕೆರ್ ಡಾ|ಐಕಳಬಾವ ದೇವಿ ಪ್ರಸಾದ್ ಶೆಟ್ಟಿ ಮೇರ್ ಉಳಿತಾಯ ಖಾತೆದ ಪಾಸ್‌ಬುಕ್ ವಿತರಣೆ ಮಲ್ತೆರ್.

ಮಾಸಿಕ ಠೇವಣಿ ಪತ್ರ ಬಿಡುಗಡೆನ್ ಸಿ.ಎಸ್.ಐ ಅಮ್ಮನ್ ಮೆಮೊರಿಯಲ್ ಚರ್ಚ್ ಹಳೆಯಂಗಡಿ ಉಂದೆತ್ತ ಸಭಾಪಾಲಕೆರ್ ರೆ| ಅಮೃತ್ ರಾಜ್ ಖೋಡೆ ಬಿಡುಗಡೆ ಮಲ್ತೆರ್. ಸುರುತ್ತ ವೆಹಿಕಲ್ ಲೋನ್ ಪತ್ರನ್ ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಬಿ. ಸೂರ್‍ಯ ಕುಮಾರ್ ಉದಿಪನ ಮಲ್ತೆರ್.

ನಿತ್ಯನಿಧಿ ಪಾಸ್‌ಬುಕ್ ವಿತರಣೆನ್ ಲಯನ್ ಜಿಲ್ಲಾ ಗವರ್ನರ್ – 317D, ಲಯನ್ ಡಾ|ಮೆಲ್ವಿನ್ ಡಿಸೋಜ PMJF ಮಲ್ತೆರ್.

ಮಲ್ಲ ಬಿನ್ನೆರಾದ್ ಇನ್ನರ್ ವಿಲ್ ಕ್ಲಬ್ ಕಿನ್ನಿಗೋಳಿ ಉಂದೆತ್ತ ಅಧ್ಯಕ್ಷೆರ್ ಸವಿತಾ ಶೆಟ್ಟಿ, ಖಲಿರಿಯಾ ಜುಮ್ಮಾ ಮಸೀದಿ ಗುತ್ತಕಾಡು ಉಂದೆತ್ತ ಅಧ್ಯಕ್ಷೆರ್ ಅಬೂಬಕ್ಕರ್, ಕಿನ್ನಿಗೋಳಿ ಧರ್ಮ ಕೇಂದ್ರ – ಪಾಲನಾ ಮಂಡಳಿ ಉಪಾಧ್ಯಕ್ಷೆರ್ ವಿಲಿಯಂ ಡಿಸೋಜ, ಎ.ಪಿ.ಎಮ್.ಸಿ ಮಾಜಿ ಅಧ್ಯಕ್ಷೆರ್ ಪ್ರಮೋದ್ ಕುಮಾರ್, ಜಿಲ್ಲಾ ಪಂಚಾಯತ್ ಮಾಜಿ ಸದಸ್ಯೆರ್ ಶೈಲಾ ಸಿಕ್ವೇರಾ, ಕಿನ್ನಿಗೋಳಿ ಗ್ರಾಮ ಪಂಚಾಯತ್‌ದ ಮಾಜಿ ಅಧ್ಯಕ್ಷೆರ್ ಟಿ. ಎಚ್ ಮಯ್ಯದ್ದಿ, ದ.ಕ. ಜಿಲ್ಲಾ ಉತ್ತಮ ಶಿಕ್ಷಕಿ ಪ್ರಶಸ್ತಿ ಪುರಸ್ಕೃತೆರ್ ಎಕ್ಕಾರ್ ಶಾಲೆದ ಶಿಕ್ಷಕಿ ಜಯಂತಿ, ಶ್ರೀ ಕಾಳಿಕಾಂಬ ಜ್ಯುವೆಲರ್ಸ್‌ದ ಮಾಲಕೆರ್ ಯೋಗೀಶ್ ಆಚಾರ್‍ಯ, ಬೆತ್ಲೇಮ್ ಸ್ಟಾರ್ ಕಾಂಪ್ಲೆಕ್ಸ್‌ದ ಮಾಲಕೆರ್ ಕೆ. ದೀಪಕ್ ಎ. ರೊಡ್ರಿಗಸ್, ಕಚೇರಿದ ಮಾಲೀಕೆರ್ ಗೋಪಾಲಕೃಷ್ಣ ಮೊಕುಲು ಪಾಲ್ ಪಡೆದಿತ್ತೆರ್.

ಈ ಪೊರ್ತುಡು ಸೊಸೈಟಿದ ಉಪಾಧ್ಯಕ್ಷೆರ್ ಪ್ರತಿಭಾ ಕುಳಾಯಿ, ನಿರ್ದೇಶಕೆರ್ ಡಾ|ಗಣೇಶ್ ಅಮೀನ್ ಸಂಕಮಾರ್,ಧನಂಜಯ ಮಟ್ಟು, ಗೌತಮ್ ಜೈನ್, ಶರತ್ ಶೆಟ್ಟಿ ಪಂಚವಟಿ, ಉಮಾನಾಥ್ ಜೆ ಶೆಟ್ಟಿಗಾರ್,ಜೈಕೃಷ್ಣ ಕೋಟ್ಯಾನ್, ಗಣೇಶ್ ಪ್ರಸಾದ್ ದೇವಾಡಿಗ, ಧನ್ ರಾಜ್ ಕೋಟ್ಯಾನ್, ಮಿರ್ಜಾ ಅಹಮ್ಮದ್, ಶೆರಿಲ್ ಅಯೋನ ಐಮನ್, ಹರೀಶ್ ಎನ್ ಪುತ್ರನ್, ತನುಜಾ ಶೆಟ್ಟಿ, ವಿಜಯ ಕುಮಾರ್ ಸನಿಲ್, ನವೀನ್ ಸಾಲ್ಯಾನ್, ಸಂದೀಪ್ ಇತ್ತೆರ್.

ಸೊಸೈಟಿದ ಸಿಇಒ ಸುದರ್ಶನ್ ಸೊಲ್ಮೆ ಸಂದಾಯೆರ್. ಪ್ರಕಾಶ್ ಆಚಾರ್ಯ ಕಿನ್ನಿಗೋಳಿ ಬೊಕ್ಕ ಅಕ್ಷತಾ ಶೆಟ್ಟಿ ನಿರೂಪಣೆ ಮಲ್ತೆರ್.

ಭಾರತೀಯ ಬೀಚ್ ಕುಸ್ತಿ ಸಂಘದ ಗುರ್ಕಾರೆ ಆದ್ ಬೆಳ್ಳಿಪಾಡಿ ಗುಣರಂಜನ್ ಶೆಟ್ಟಿ ಆಯ್ಕೆ

ಬೆಂಗಳೂರು: ಕರ್ನಾಟಕ ಕುಸ್ತಿ ಸಂಘದ ಗುರ್ಕಾರೆ ಬಿ.ಗುಣರಂಜನ್ ಶೆಟ್ಟಿ ಮೆರೆನ್ ಭಾರತೀಯ ಬೀಚ್ ಕುಸ್ತಿ ಸಂಘದ ಗುರ್ಕಾರೆ ಆದ್ ಆಯ್ಕೆ ಮಂತೆರ್. ನೋಯ್ಡಾಡ್ ಇಂಚಪ್ಪ ನಡತಿನ ಭಾರತೀಯ ಕುಸ್ತಿ ಸಂಘದ ವಿಶೇಷ ಸಾಮಾನ್ಯ ಸಭೆಟ್ ನಿರ್ಣಯ ಆದ್ ಭಾರತೀಯ ಬೀಚ್ ಕುಸ್ತಿ ಸಂಘದ ಗುರ್ಕಾಲ್ ಆದ್ ಆಯ್ಕೆ ಆಯೆರ್. ಕರಿನ ಸರ್ತಿ ನಡೆತಿನ ಚುನಾವಣೆಡ್ ಭಾರತೀಯ ಕುಸ್ತಿ ಸಂಘದ ಜೊತೆ ಕಾರ್ಯದರ್ಶಿಯಾದ್ ಇತ್ತೆರ್.

ಬಿ.ಗುಣರಂಜನ್ ಶೆಟ್ಟಿ ಮೇರ್ ದಕ್ಷಿಣ ಕನ್ನಡ ಜಿಲ್ಲೆದ ನಡುಮೊಗರು ಗುತ್ತು ವಿಠ್ಠಲ ಶೆಟ್ಟಿ ಬೊಕ್ಕ ಬೆಳ್ಳಿಪಾಡಿ ಉರಮಾಲ ಗುತ್ತು ಪ್ರಫುಲ್ಲ ವಿ.ಶೆಟ್ಟಿ ದಂಪತಿಲೆನ ಮೋಕೆದ ಮಗೆ.

ಡಾ.ರಮೇಶ್ ಶೆಟ್ಟಿ ಬೊಕ್ಕ ದಕ್ಷಿಣ ಭಾರತದ ಸಿನಿಮಾ ರಂಗೊಡ್ ಪುಗರ್ತೆ ಪಡೆಯಿನ ತುಳುನಾಡ ಮಣ್ಣ್ ದ ಪೆರ್ಮೆದ ಮಗಲ್ ಹೀರೊಯಿನಿ ಅನುಷ್ಕ ಶೆಟ್ಟಿ ಮೆರೆನ ಪಲಯೆ ಬಿ.ಗುಣರಂಜನ್ ಶೆಟ್ಟಿ, ಪುತ್ತೂರು ಊರುದ ಬೆಳ್ಳಿಪಾಡಿ ಮನೆತನದ ಕುಟುಂಬದಾರ್.

ಕರ್ನಾಟಕ ಕುಸ್ತಿ ಸಂಘದ ಗುರ್ಕಾರೆ ಆಯಿಬೊಕ್ಕ ಸಂಘೊಡ್ ಎಡ್ಡೆ ಎಡ್ಡೆ ಕಜ್ಜ ಮಲ್ತೊಂದುಲ್ಲೆರ್ ಬೊಕ್ಕ ಕ್ರೀಡೆಡ್ ಆಸಕ್ತಿ ಇತ್ತಿನ ಜವನೆರೆಗ್ ತರಬೇತಿ , ಕ್ರೀಡೆಗ್ ಬೋಡಾಯಿನ ಮೂಲಭೂತ ಸೌಲಭ್ಯ ಕೊರ್ದು ಕರ್ನಾಟಕ ಕುಸ್ತಿ ಪೈಲ್ವಾನೆರೆನ್ ಗೆಂದಾವರೆಗ್ ಮುಖ್ಯ ಕಾರಣಕರ್ತೆರ್ ಆತೆರ್.

ಈ ಮೂಲಕ ತುಳುನಾಡ ಮಣ್ಣುದ ಪೊರ್ಲೈಸಿರದ ಕಮ್ಮೆನೆ ಲೋಕೊರ್ಮೆಲ ಪಸರಿಸಡ್ ಪಂಡ್ದ್ ಬಿ.ಗುಣರಂಜನ್ ಶೆಟ್ಟಿ ಮೆರೆಗ್ ಟೈಮ್ಸ್ ಆಫ್ ಕುಡ್ಲ ಕೂಟದಕುಲು ಎಡ್ಡೆಪ್ಪು ಬಯಕಂದುಲ್ಲ.

-ಯಾದವ ಎಸ್ ಕಲ್ಲಾಪು, ಬೆಂಗಳೂರು

ಎ.3: ಶಿಬರೂರು ಶ್ರೀ ಕೊಡಮಣಿತ್ತಾಯ ಕ್ಷೇತ್ರಡ್ ದೊಂಪ ಮೂರ್ತ

ಸುರತ್ಕಲ್: ಶ್ರೀ ಕೊಡಮಣಿತ್ತಾಯ ಕ್ಷೇತ್ರ ಶಿಬರೂರುಡು ನಡಪುನ ಬ್ರಹ್ಮಕುಂಭಾಭಿಷೇಕ ಬೊಕ್ಕ ನಾಗಮಂಡಲ ಸೇವೆ, ಜಾತ್ರೆದ ಲೆಕ್ಕೊಡು ಎ.3 ಬುದಾರ ಬೊಲ್ಪುಗು ದೊಂಪದ ಮೂರ್ತ ನಡಪರೆ ಉಂಡು.

ಈ ಲೇಸ್ ಶ್ರೀ ಕ್ಷೇತ್ರದ ತಂತ್ರಿಲಾಯಿನ ಬ್ರಹ್ಮಶ್ರೀ ಶಿಬರೂರು ವೇದವ್ಯಾಸ ತಂತ್ರಿಲೆನ ಆಚಾರ್ಯತ್ವಡ್, ಹಿರಿಯ ಧಾರ್ಮಿಕ‌ ಮುಂದಾಳು ಶೆಡ್ಡೆ ಮಂಜುನಾಥ ಭಂಡಾರಿಲೆರ್ದ್ ನಡಪರೆ ಉಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆವೊಡು ಪಂದ್ ಶ್ರೀ ಕ್ಷೇತ್ರದ ಪ್ರಕಟಣೆ ತೆರಿಪಾದ್ಂಡ್.

ಏ.5 ಕ್ಕ್ ಕಾರ್ಲಡ್ ನಡಪರೆ ಇಪ್ಪುನ ಬಿಜೆಪಿ ಕಾರ್ಯಕರ್ತೆರೆನ ಸಮಾವೇಶದ ಅಟ್ಟಣೆ ಸಭೆ

ಲೋಕಸಭಾ ವೋಟುದ ಲೆಕ್ಕೊಡು ಏಪ್ರಿಲ್ 5 ಸುಕ್ರಾರ, ಕಾರ್ಲಡ್ ನಡಪರೆ ಇಪ್ಪುನ ಬೃಹತ್ ಕಾರ್ಯಕರ್ತೆರೆನ ಸಮಾವೇಶಗ್ ಅಟ್ಟಣೆಗಾದ್ ಇನಿ (ಮಾ.30) ಹೆಬ್ರಿ ಶಕ್ತಿಕೇಂದ್ರದ ಕುಚ್ಚುರು ಬೇಳಂಜೆ, ವರಂಗ ಗ್ರಾಮಲೆನ ಕಾರ್ಯಕರ್ತೆರೆನೊಟ್ಟಿಗೆ ಸಭೆ ನಡಪಾಯೆರ್.

ಒಡಿಪು ಚಿಕ್ಕಮಗಳೂರು ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಕೋಟ ಶ್ರೀನಿವಾಸ್ ಪೂಜಾರಿ ಮೇರ್ ಏಪ್ರಿಲ್ 3 ಕ್ಕ್ ಒಡಿಪುಡು ನಾಮಪತ್ರ ಸಂದಾದ್, ಒಡಿಪುದ ಕಡಿಯಾಳಿಡ್ ನಡಪುನ ಬೃಹತ್ ಕಾರ್ಯಕರ್ತೆರೆನ ಸಮಾವೇಶನ್ ಉದ್ದೇಶಿಸಾದ್ ಪಾತೆರುವೆರ್. ಈ ಲೇಸ್ ಡ್ ಸಾರರ್ದ್ ಎಚ್ಚ ಸಂಖ್ಯೆಡ್ ಕಾರ್ಲದ ಕಾರ್ಯಕರ್ತೆರ್ ಪಾಲ್ ಪಡೆಪುನ ದಿಟ್ಟಿಡ್ ಅಗತ್ಯ ವ್ಯವಸ್ಥೆಲೆನ ಬಗೆಟ್ಟ್ ಈ ಸಭೆಟ್ಟ್ ಚರ್ಚೆ ನಡತ್ಂಡ್.

ಮೂಜಿನೇ ಅವಧಿಗ್ ಕುಡೊರ ಮೋದಿನ್ ಅಧಿಕಾರಗ್ ಕನಪುನೆನೇ ನಮ್ಮ ಏಕೈಕ ಉದ್ದೇಶ, ಈ ದಿಟ್ಟಿಡ್ ಮಾತ ಕಾರ್ಯಕರ್ತೆರ್ ಒಟ್ಟಾದ್ ಕಾರ್ಯಪ್ರವೃತ್ತರಾವೊಡು ಪಂದ್ ಬಿಜೆಪಿ ಕ್ಷೇತ್ರಾಧ್ಯಕ್ಷೆರ್ ನವೀನ ನಾಯಕ್ ಕಾರ್ಯಕರ್ತೆರೆಡ ಬಿನ್ನಾಪು ಮಲ್ತೆರ್.

ಸಭೆಟ್ಟ್ ಮಂಡಲ ಬಿಜೆಪಿ ಪ್ರಧಾನ ಕಾರ್ಯದರ್ಶಿ ಸುರೇಶ ಶೆಟ್ಟಿ ಶಿವಪುರ, ಹೆಬ್ರಿ ಶಕ್ತಿಕೇಂದ್ರದ ಅಧ್ಯಕ್ಷೆರ್ ಲಕ್ಷ್ಮಿನಾರಾಯಣ್ ನಾಯಕ್, ಜಿಲ್ಲಾ ಬಿಜೆಪಿ ಯುವ ಮೋರ್ಚಾ ಉಪಾಧ್ಯಕ್ಷೆರ್ ಸುಹಾಸ್ ಶೆಟ್ಟಿ, ಜ್ಯೋತಿ ಹರೀಶ್ ಪಾಲ್ ಪಡೆದಿತ್ತೆರ್.