ಎಂಪಿ ವೋಟುಗು ನಾಮಪತ್ರ ಸಂದಾಯೆರೆ ಇನಿ ಅಕೇರಿ ದಿನ . ದಕ್ಷಿಣ ಕನ್ನಡಡ್ ಜಿಜೆಪಿ ಅಭ್ಯರ್ಥಿ ಕ್ಯಾಪ್ಟನ್ ಬ್ರಿಜೇಶ್ ಚೌಟೆರ್ ಇನಿ ತನ್ನ ಉಮೇದುವಾರಿಕೆ ಸಂದಾಯೆರೆ ಜಿಲ್ಲಾಧಿಕಾರಿ ಕಚೇರಿಗ್ ಪೋವೊಂದು ಉಲ್ಲೆರ್.
ಇನಿ ಬೊಲ್ಪುಗು ಬಂಟ್ಸ್ ಹಾಸ್ಟೆಲ್ ದ ಬಿಜೆಪಿ ಚುನಾವಣಾ ಕಚೇರಿರ್ದ್ ಬೃಹತ್ ಪಾದಯಾತ್ರೆ ಆಯೋಜನೆ ಮಲ್ತ್ ದಿತ್ತೆರ್.
ಈ ಲೇಸ್ ಡ್ ಮಸ್ತ್ ಸಂಖ್ಯೆಡ್ ಬಿಜೆಪಿ ನಾಯಕೆರ್, ಮುಖಂಡೆರ್, ಪಕ್ಷದ ಕಾರ್ಯಕರ್ತೆರ್ ಪಾಲ್ ಪಡೆದಿತ್ತೆರ್.
ಟೌನ್ ಹಾಲ್ ಡ್ ಸಭಾ ಲೇಸ್ ದ ಬೊಕ್ಕ ಜಿಲ್ಲಾಧಿಕಾರಿ ಕಚೇರಿಗ್ ಪೋದು ನಾಮಪತ್ರ ಸಂದಾಯೆರೆ ಉಲ್ಲೆರ್.
ಕುಡ್ಲ: ದಕ್ಷಿಣ ಕನ್ನಡ ಲೋಕಸಭಾ ಕ್ಷೇತ್ರದ ಅಭ್ಯರ್ಥಿ ಪದ್ಮರಾಜ್ ಅರ್.ಪೂಜಾರಿ ಮೇರ್ ದ.ಕ ಜಿಲ್ಲಾಧಿಕಾರಿ ಕಚೇರಿಡ್ ನಾಮಪತ್ರ ಸಂದಾಯೆರ್.
ನಾಮಪತ್ರ ಸಂದಾವುನ ದುಂಬು ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಎದುರುರ್ದ್ ಎ.ಬಿ.ಶೆಟ್ಟಿ ಸರ್ಕಲ್ ಮುಟ್ಟ ಆಯೋಜನೆ ಮಲ್ತಿನ ಮೆರವಣಿಗೆಗ್ ಕೇಂದ್ರದ ಮಾಜಿ ಸಚಿವೆರ್ ಜನಾರ್ದನ ಪೂಜಾರಿ ಚಾಲನೆ ಕೊರಿಯೆರ್. ಸಾರ ಸಾರ ಸಂಖ್ಯೆ ಡ್ ಜನಕುಲು ಮೆರವಣಿಗೆಡ್ ಪಾಲ್ ಪಡೆದಿತ್ತೆರ್.
ಜಿಲ್ಲಾಧಿಕಾರಿ ಬೊಕ್ಕ ಜಿಲ್ಲಾ ಚುನಾವಣಾಧಿಕಾರಿ ಮುಲೈ ಮುಗಿಲನ್ ಮೇರ್ ನಾಮಪತ್ರ ಸ್ವೀಕಾರ ಮಲ್ತೆರ್.
ಈ ಪೊರ್ತುಡು ದ.ಕ ಜಿಲ್ಲಾ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್, ಕಾಂಗ್ರೆಸ್ ಜಿಲ್ಲಾ ಉಸ್ತುವಾರಿ ಬಿ.ರಮಾನಾಥ ರೈ, ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆರ್ ಹರೀಶ್ ಕುಮಾರ್, ವಿಧಾನ ಪರಿಷತ್ ಸದಸ್ಯೆರ್ ಬಿ.ಕೆ.ಹರಿಪ್ರಸಾದ್, ಮಂಜುನಾಥ ಭಂಡಾರಿ, ಮಾಜಿ ಶಾಸಕೆರ್ ಅಭಯಚಂದ್ರ ಜೈನ್, ಜೆ.ಆರ್.ಲೋಬೋ, ಇನಾಯತ್ ಅಲಿ ಪಾಲ್ ಪಡೆದಿತ್ತೆರ್.
ಕುಡ್ಲ: ಲೋಕಸಭೆ ವೋಟುದ ಕಾಂಗ್ರೆಸ್ ಅಭ್ಯರ್ಥಿ ಪದ್ಮರಾಜ್ ಆರ್. ಮೆರೆನ ನಾಮಪತ್ರ ಸಂದಾವುನ ಅಟ್ಟಣೆಗಾದ್ ಆಯೋಜನೆ ಆಯಿನ ಮೆರವಣಿಗೆಗ್ ಕೇಂದ್ರದ ಮಾಜಿ ಸಚಿವೆರ್ ಜನಾರ್ದನ ಪೂಜಾರಿ ಚಾಲನೆ ಕೊರಿಯೆರ್.
ಬುದಾರ ಬೊಲ್ಪುಗು ಶರವು ಶ್ರೀ ಮಹಾಗಣಪತಿ ದೇವಸ್ಥಾನ, ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನ, ಕಂಕನಾಡಿ ಶ್ರೀ ಬ್ತಹ್ಮಬೈದರ್ಕಳ ಗರೋಡಿಗ್ ಪೋದು ಇಸೇಸ ಪ್ರಾರ್ತನೆ ಸಂದಾಯೆರ್. ಬೊಕ್ಕ ಕುದ್ರೋಳಿ ಶ್ರೀ ಗೋಕರ್ಣನಾಥೇಶ್ವರ ದೇವಸ್ಥಾನಗ್ ಬತ್ತ್ ದ್ ಇಸೇಸ ಅರ್ಚನೆ ಸಂದಾಯಿನ ಬೊಕ್ಕ ಮೆರವಣಿಗೆಗ್ ಚಾಲನೆ ಕೊರಿಯೆರ್.
ಗೊಂಬೆ ಬಳಗ, ಚೆಂಡೆ, ಕೊಂಬುದೊಟ್ಟಿಗೆ ಮೆರವಣಿಗೆಡ್ ಕಾರ್ಯಕರ್ತೆರ್ ಪಜ್ಜೆ ಪಾಡಿಯೆರ್. ಓಪನ್ ಗಾಡಿಡ್ ಅಭ್ಯರ್ಥಿ ಪದ್ಮರಾಜ್ ಆರ್. ಮೆರವಣಿಗೆಡ್ ತುಳುನಾಡ ಕೊಡಿ ರಾರಾಜಿಸಾವೊಂದು ಇತ್ತ್ಂಡ್. ಕಾಂಗ್ರೆಸ್ ಕೊಡಿತ್ತೊಟ್ಟಿಗೆ ಕಾರ್ಯಕರ್ತೆರೆನ ಘೋಷಣೆ, ನಡಿಗೆಗ್ ವೇಗ ಕೊರೊಂದು ಇತ್ತ್ಂಡ್.
ಸುರತ್ಕಲ್: ಶಿಬರೂರು ಶ್ರೀ ಕೊಡಮಣಿತ್ತಾಯ ದೈವಸ್ಥಾನಡ್ ಎ.22 ತಾರೀಕ್ ರ್ದ್ ಸುರುವಾಪಿನ ಬ್ರಹ್ಮಕಲಶೋತ್ಸವ ಬೊಕ್ಕ ನಾಗಮಂಡಲ ಉಚ್ಚಯದ ಲೇಸ್ ಗ್ ದೊಂಪ ಪಾಡುನ ಚಪ್ಪರ ಮುರ್ತದ ಲೇಸ್ ನ್ ಧಾರ್ಮಿಕ ಮುಂದಾಳು ಶೆಡ್ಡೆ ಮಂಜುನಾಥ ಭಂಡಾರಿ ಮೇರ್ ಮಲ್ತೆರ್.
ಕ್ಷೇತ್ರದ ತಂತ್ರಿಲಾಯಿನ ವೇದಮೂರ್ತಿ ವೇದವ್ಯಾಸ ತಂತ್ರಿಲು ದೈವದ ನಡೆಟ್ಟ್ ಪ್ರಾರ್ತನೆ ಮಲ್ತಿ ಬೊಕ್ಕ ದೊಂಪ ಮೂರ್ತದ ಪೂಜಾ ವಿಧಿಕ್ಲೆನ್ ಮಲ್ತೆರ್.
ಶಿಬರೂರು ಶ್ರೀ ಉಳ್ಳಾಯ ಬೊಕ್ಕ ಕೊಡಮಣಿತ್ತಾಯ ದೈವಸ್ಥಾನಡ್ ಎ.26ಕ್ಕ್ ಬ್ರಹ್ಮಕುಂಭಾಭಿಷೇಕ ಬೊಕ್ಕ ನಾಗಮಂಡಲ ನಡಪರೆ ಉಂಡು. ಬೊಕ್ಕ ಎ.30 ಮುಟ್ಟ ವಿಶೇಷ ಜಾತ್ರಾ ಮಹೋತ್ಸವ ನಡಪರೆ ಉಂಡು.
ಈ ಪೊರ್ತುಡು ತಿಬಾರಗುತ್ತು ಗುತ್ತಿನಾರ್ ಉಮೇಶ್ ಎನ್ ಶೆಟ್ಟಿ, ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಪ್ರಭಾಕರ ಎಸ್ ಶೆಟ್ಟಿ ಕೋಂಜಾಲಗುತ್ತು , ಕುಡುಂಬೂರುಗುತ್ತು ಜಯರಾಮ ಶೆಟ್ಟಿ, ಜೀರ್ಣೋದ್ಧಾರ ಮತ್ತು ಬ್ರಹ್ಮಕಲಶೋತ್ಸವ ಸಮಿತಿದ ಕಾರ್ಯಾಧ್ಯಕ್ಷೆರ್ ಪ್ರದ್ಯುಮ್ನ ರಾವ್ ಕೈಯೂರುಗುತ್ತು, ಬ್ರಹ್ಮಕಲಶೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ, ಮೊಕ್ತೇಸರೆರ್ ಎಂ ಮಧುಕರ ಅಮೀನ್, ಪ್ರಧಾನ ಸಂಚಾಲಕೆರ್ ಸುಬ್ರಹ್ಮಣ್ಯ ಪ್ರಸಾದ್ ಕೋರ್ಯಾರು, ತುಕಾರಾಮ ಶೆಟ್ಟಿ ಪರ್ಲಬೈಲ್ ಗುತ್ತು, ಶಿವಾನಂದ ಶೆಟ್ಟಿ ಪಡುಮನೆ, ಸೂರಿಂಜೆ ಪಂಚಾಯತ್ ಅಧ್ಯಕ್ಷೆರ್ ಗೀತಾ ಶೆಟ್ಟಿ, ಪುರಂದರ ಎಂ ಶೆಟ್ಟಿ , ಕಾಂತಪ್ಪ ಸಾಲಿಯಾನ್, ದಿವಾಕರ ಸಾಮಾನಿ ಚೇಳಾರ್ ಗುತ್ತು, ಸ್ವಾಗತ ಸಮಿತಿದ ಜಿತೇಂದ್ರ ಶೆಟ್ಟಿ ಕೋರ್ಯಾರುಗುತ್ತು, ಸ್ವಯಂಸೇವಕ ಸಮಿತಿದ ಗಿರೀಶ್ ಶೆಟ್ಟಿ ಪಡುಮನೆ, ಪ್ರಚಾರ ಬೊಕ್ಕ ಅಮಂತ್ರಣ ಸಮಿತಿದ ವಿನೀತ್ ಶೆಟ್ಟಿ ಕೊರ್ಯಾರು ಹೊಸಮನೆ, ಅನ್ನ ಸಂತರ್ಪಣೆ ಸಮಿತಿದ ಕಾರ್ಯಾಧ್ಯಕ್ಷೆರ್ ಸುರೇಂದ್ರ ಶೆಟ್ಟಿ ದೇಂದೊಟ್ಟು, ಮಾಧ್ಯಮ ಸಮಿತಿದ ಅಧ್ಯಕ್ಷೆರ್ ಬಾಳ ಜಗನ್ನಾಥ ಶೆಟ್ಟಿ, ಮಾತೃ ಸಮಿತಿದ ಪ್ರಧಾನ ಕಾರ್ಯದರ್ಶಿ ಆಶಾ ಶೆಟ್ಟಿ ಪಡುಮನೆ, ಸಾಂಸ್ಕ್ರತಿಕ ಸಮಿತಿದ ವಿಜೇಶ್ ಶೆಟ್ಟಿ, ಅನ್ನಸಂತರ್ಪಣೆ ಸಮಿತಿದ ಜಗದೀಶ್ ಶೆಟ್ಟಿ, ಉಗ್ರಾಣ ಸಮಿತಿದ ದಯಾನಂದ ದೇವಾಡಿಗ, ಹೊರೆಕಾಣಿಕೆ ಸಮಿತಿದ ಬಾಲಕೃಷ್ಣ ಕುಲಾಲ್, ಆರೋಗ್ಯ, ನೈರ್ಮಲ್ಯ ಸಮಿತಿದ ಸುಜಾತ ಶೆಟ್ಟಿ, ಪ್ರಸಾದ ವಿತರಣಾ ಸಮಿತಿದ ಸುಧಾಕರ ಶೆಟ್ಟಿ ಶಿಬರೂರುಗುತ್ತು, ಗಾಡಿ ಪಾರ್ಕಿಂಗ್ ಸಮಿತಿದ ದಿನಕರ ಕೈಯೂರು, ಅಲಂಕಾರ ಸಮಿತಿದ ಭುವನೇಶ್ ಆಚಾರ್ಯ, ವಸತಿ ಸಮಿತಿದ ಸಂದೀಪ್ ಶೆಟ್ಟಿ, ಮಾತೃ ಸಮಿತಿದ ಅಧ್ಯಕ್ಷೆರ್ ಶ್ಯಾಮಲ ಪ್ರಭಾಕರ ಶೆಟ್ಟಿ ಶಿಬರೂರುಗುತ್ತು, ಸಂಚಾಲಕಿ ಸುಷ್ಮಾ ಯು ಶೆಟ್ಟಿ ಶಿಬರೂರುಗುತ್ತು, ಅರ್ಥಿಕ ಸಮಿತಿದ ಪ್ರವೀಣ್ ಶೆಟ್ಟಿ ಮೊಕುಲು ಮಾತ ಇತ್ತೆರ್.
ಬೊಂಬೈ ಶ್ರೀ ಸಸಿಹಿತ್ಲು ಭಗವತೀ ತೀಯಾ ಸಂಘದ 69ನೇ ವರ್ಷದ ಮಹಾಪೂಜೆ ಎ.13 ಸನಿಯಾರ ಭಾಂಡುಪ್ ತ್ರಿಮೂರ್ತಿ ನಾಟ್ಯ ಮಂದಿರಡ್ ನಡಪರೆ ಉಂಡು.
ಆನಿ ಬೊಲ್ಪುಗು ಗಣಹೋಮ, ಬಯ್ಯಗ್ ಕಲಶ ಪ್ರತಿಷ್ಠೆ, ಅಲಂಕಾರ ಪೂಜೆ, ಅರಶಿನ ಕುಂಕುಮ, ಭಜನೆ ರಾತ್ರೆ ಧಾರ್ಮಿಕ ಸಭಾ ಲೇಸ್, ಸನ್ಮಾನ, ಬಲಿ ಉಚ್ಚಯ, ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ತೀರ್ಥ ಪ್ರಸಾದ ದೆತೊಂದು, ಶ್ರೀ ಭಗವತೀ ಅಮ್ಮನ ಕೃಪೆಗ್ ಪಾತ್ರರಾವೊಡು ಪಂದ್ ಬೊಂಬೈ ಶ್ರೀ ಸಸಿಹಿತ್ಲು ಭಗವತೀ ತೀಯಾ ಸಂಘದ ಪದುಕೆರ್, ಸರ್ವಸದಸ್ಯೆರ್ ಬೊಕ್ಕ ಮಹಿಳಾ ವಿಭಾಗದಕುಲು ಲೆಪ್ಪೋಲೆಡ್ ತೆರಿಪಾದೆರ್.
ಮಸ್ತ್ ಸಂಖ್ಯೆಡ್ ದೇವಸ್ಥಾನಲು ನಮ್ಮ ದೇಶಡ್ ಉಂಡು, ಒಂಜೊಂಜಿ ದೇವಸ್ಥಾನಗ್ ಒಂಜೊಂಜಿ ವಿಶೇಷತೆ, ಪ್ರತೀತಿ ಉಂಡು. ಕೆಲವು ದೇವಸ್ಥಾನಲು ವಿಜ್ಞಾನಗ್ ಸವಾಲ್ ನ್ ಪಾಡುನಂಚಿನ ಪವಾಡನ್ ಮಲ್ಪುಂಡು. ಇಂಚಿನ ಇಸೇಸ ದೇವಸ್ಥಾನಲೆಡ ಉತ್ತರ ಪ್ರದೇಶದ ಕಾನ್ಪುರದ ಜಗನ್ನಾಥ ದೇವಸ್ಥಾನಲ ಒಂಜಿ.
ಈ ದೇವಸ್ಥಾನ ಪ್ರತೀ ವರ್ಷಲ ಈ ಭಾಗದ ಜನಕ್ಲೆಗ್ ಬರ್ಸದ ಮುನ್ಸೂಚನೆನ್ ಕೊರ್ಪುಂಡು. ಅಂಚ ಪಂದ್ ಈ ದೇವಸ್ಥಾನಡ್ ಒವ್ವೇ ಹವಾಮಾನ ತಜ್ಞೆರ್ ಇಜ್ಜೆರ್. ಆಂಡ ಬರ್ಸದ ಮುನ್ಸೂಚನೆ ತಿಕುನೇ ಗರ್ಭಗುಡಿತ್ತ ಒಂಜಿ ಕಲ್ಲ್ ರ್ದ್. ಕಾನ್ಪುರ ಪೇಂಟೆರ್ದ್ ಸುಮಾರ್ 120 ಕಿಲೋ ಮೀಟರ್ ದೂರದ ಬೆಹ್ತಾ ಬುರ್ಜುಗ್ ಡ್ ಪನ್ಪಿನ ಜಾಗೆಡ್ ಜಗನ್ನಾಥ ದೇವಸ್ಥಾನ ಉಂಡು.
ಪಶ್ಚಿಮ ಬಂಗಾಳ ಬೊಕ್ಕ ಒಡಿಶಾದ ದೇವಸ್ಥಾನಡ್ ತೋಜುನ ಪ್ಯಾರಾಬೋಲಿಕ್ ಗುಮ್ಮಟರ್ದ್ ಇಪ್ಪುನ ಈ ದೇವಸ್ಥಾನಗ್ ವಿಶೇಷತೆ ಉಂಡು.
ಜಗನ್ನಾಥ ದೇವಸ್ಥಾನದ ಛಾವಣಿ ಈ ವರ್ಷ ಎಂಚ ಬರ್ಸ ಬರ್ಪುಂಡು ಪನ್ಪುನೆತ್ತ ವಿವರಣೆ ಕೊರ್ಪುಂಡು. ಬರ್ಸ ಬರ್ಪುನ ಸುಮಾರ್ ಒಂಜಿ ವಾರದ ದುಂಬು ಮುಲ್ಪೊಂಜಿ ಅಚ್ಚರಿ ನಡಪುಂಡು. ಗರ್ಭಗುಡಿತ್ತ ಮಿತ್ತ್ ಇಪ್ಪುನ ಮೇಲ್ಛಾವಣಿ ತೇವವಾದ್ ಅವೆರ್ದ್ ಒಂಜೊಂಜಿ ಪನಿ ನೀರ್ ತಿರ್ತ್ ಬೂರುಂಡು.
ಈ ಪನಿ ಏತ್ ಮಲ್ಲ ಮಟ್ಟ್ ಡ್ ಬೂರುಂಡು, ಆತ್ ಪ್ರಮಾಣಡ್ ಬರ್ಸ ಬರ್ಪುಂಡು ಪನ್ಪುನವು ಮುಲ್ಪದ ಜನಕ್ಲೆನ ನಂಬಿಕೆ. ಆ ಊರುದ ಜನ ದೇವಸ್ಥಾನಡ್ ಬೂರುನ ಬರ್ಸದ ಪನಿನ್ ತೂದು ಕೃಷಿ ಮಲ್ಪುವೆರ್. ಇಡೇ ಮುಟ್ಟ ಈ ದೇವಸ್ಥಾನ ಕೊರ್ನ ಬರ್ಸದ ಮುನ್ಸೂಚನೆ ಸುಳ್ಳು ಆತಿಜಿ. ಒಂಜಿ ಕಲ್ಲ್ ರ್ದ್ ನಿರ್ಮಾಣ ಆಯಿನ ದೇವಸ್ಥಾನ ಉಂದಾತ್ಂಡ್.
ವರ್ಕಾಡಿ: 1600 ವರ್ಷ ಪಿರಾಕ್ ದ ಶ್ರೀ ಕಾವಿ ಸುಬ್ರಹ್ಮಣ್ಯ ದೇವಸ್ಥಾನದ ನವೀಕರಣ, ಅಷ್ಠಬಂಧ ಬ್ರಹ್ಮಕಲಶೋತ್ಸವದ ಮಲ್ಲ ಉಚ್ಚಯ ಮಾರ್ಚಿ 29 ತಾರಿಕ್ ಡ್ದ್ ಎಪ್ರಿಲ್ 5 ತಾರೀಕ್ ಮುಟ್ಟ ಬೇತೆ ಬೇತೆ ಧಾರ್ಮಿಕ ವಿಧಿ ವಿಧಾನೊಡು ಗೌಜಿಡ್ ನಡತೊಂದುಂಡು.
ಬ್ರಹ್ಮಕಲಶೋತ್ಸವದ ರಡ್ಡನೇ ದಿನತ್ತ ಲೇಸ್ ಮಾರ್ಚಿ 30 ಗು ಧಾರ್ಮಿಕ ಸಭೆ ಮಾಣಿಲ ಶ್ರೀ ಧಾಮದ ಶ್ರೀ ಮಹಾಲಕ್ಷ್ಮಿ ಕ್ಷೇತ್ರದ ಶ್ರೀ ಮೋಹನದಾಸ ಸ್ವಾಮೀಜಿಲೆನ ದಿವ್ಯ ಉಪಸ್ಥಿತಿಡ್ ಉದಿಪನ ಮಲ್ತ್ ದ್ ಆಶೀರ್ವಚನ ಮಲ್ತೆರ್.
ವಿಶ್ವ ಶಾಂತಿಗಾದ್ ಪ್ರಾರ್ಥನೆ ಮಲ್ತೊಂದು ಸ್ವಾರ್ಥದ ಪರಮಾವದಿಡ್ದಾದ್ ರಾಕ್ಷಸೀಯ ಕೃತ್ಯದ ಪರಿಣಾಮ ಇನಿ ಮನುಷ್ಯನ ಬದ್ ಕ್ ಸಮತೋಲನ ತತ್ತ್ ದ್ ನಿತ್ಯ ಚಿಂತಡುಪ್ಪುಲೆಕ್ಕ ಆತ್ ನ ದುರ್ದೈವ. ದೇವೆರೆನ ಸೃಷ್ಟಿಡ್ ಮಾನವ ಜನ್ಮನೇ ಶ್ರೇಷ್ಠ. ಕಲಿಯುಗೊಡು ಮನುಷ್ಯ ಜಾತಿಗ್ ಬೆಲೆ ತಿಕ್ಕಂದಿನಂಚಿನ ಅವ್ಯವಸ್ಥೆದ ಕಾಲೊಡು ನಿತ್ಯ ಪೋಡಿದ್ ಬದುಕುನ ಕಾಲ. ಇಂದೆಕ್ಕ್ ಪೂರ ಅತಿರೇಕದ ರಾಜಕೀಯ ಅವ್ಯವಸ್ಥೆನೇ ಮುಖ್ಯ ಕಾರಣ. ವ್ಯವಸ್ಥೆ ಅವ್ಯವಸ್ಥೆ ಆವಂದಿಲೆಕ್ಕ ಸತ್ಯ ಧರ್ಮೊಡು ನಡತ್ಂಡ ಮಾತ್ರ ಮಾನವ ಜನ್ಮಸಾರ್ಥಕಂದ್ ಮಾಣಿಲ ಶ್ರೀ ತೆರಿಪಾಯೆರ್.
ಶ್ರೀ ಶನೀಶ್ವರ ಕ್ಷೇತ್ರ ಕಣಿಯೂರು ಮಂಜೇಶ್ವರದ ವೇದ ಮೂರ್ತಿ ಶ್ರೀ ಶ್ರೀ ಕೃಷ್ಣ ಭಟ್ ಆರೆನ ಪ್ರವಚನೊಡು ಬ್ರಹ್ಮ ಕಲಶದಂಚಿನ ಪುಣ್ಯ ಕಾರ್ಯೊಡು ಪಾಲ್ ಪಡೆಂಡ ಪುಣ್ಯಪ್ರಾಪ್ತಿ ಆಪುಂಡು. ನಂಕ್ ಸ್ಪರ್ಷ ಶಕ್ತಿ ಬತ್ತ್ ದ್. ಕಷ್ಟದ ಸಮಯೊಡು ನಂಕ್ ಒವುವೇ ವಿಘ್ನ ಇಜ್ಜಂದೆ ನಡೆಪೆರೆ ದೇವೆರೆನ ಆಶೀರ್ವಾದ ಉಪ್ಪುಂಡು ಅಂಚಾದ್ ಸದಾ ನಮನ್ ಕಾಪುವೆರ್ಂದ್ ತೆರಿಪಾಯೆರ್.
ಆನಿದ ಧಾರ್ಮಿಕ ಸಭೆತ್ತ ಗುರ್ಕಾರ್ಮೆ ವಹಿಸ್ ದಿತ್ತಿನ ಬೆಂಗಳೂರುದ ತುಳುವೆರೆ ಚಾವಡಿದ ಗೌರವ ಅಧ್ಯಕ್ಷೆರಾಯಿನ ಪುರುಷೋತ್ತಮ್ ಚೇಂಡ್ಲಾ ಮೇರ್, ಪಾತೆರೊಂದು ನಮ್ಮ ಸಮಾಜದ ತಪ್ಪುನು ತಿದ್ದ್ ದ್, ಬದ್ಕ್ ಗ್ ಸಾದಿ ತೋಜಾವುನಿ ಊರುದ ಪುಣ್ಯಕ್ಷೇತ್ರ ದೇವಸ್ಥಾನ. ಊರುಡೊಂಜಿ ದೇವಸ್ಥಾನ ಇತ್ತ್ಂಡ ಇಡೀ ಊರೇ ಸತ್ಯ ಧರ್ಮದ ನೆಲೆಟ್ಟ್ ಶಾಂತಿದ ನೆಲೆಕಟ್ಟ್ ಡ್ ಪೊರ್ಲಡು ನಡಪೆರೆ ದುಂಬುದ ಜೀವನೊಗು ಬೊಲ್ಪುದ ಸಾದಿ ತೋಜಾವುಂಡು. ನಮ್ಮ ಕಲೆ ಸಂಸ್ಕ್ರತಿ ನ್ , ನಾಗಾರಾಧನೆ, ಭೂತಾರಾಧನೆ, ಯಕ್ಷಗಾನ, ಕಂಬುಲ ಇಂಚ ಬೇತೆ ಬೇತೆ ಧಾರ್ಮಿಕ ಆಚರಣೆದ ನೆಲೆನ್ ನಮ್ಮ ದುಂಬುದ ಜನಾಂಗೊಗು ತೆರಿಪಾದ್, ಒರಿಪಾವುನ ಮಾಮಲ್ಲ ಜವಾಬ್ದಾರಿ ನಂಕುಂಡು. ಇನಿ ಶ್ರೀ ಕ್ಷೇತ್ರ ವರ್ಕಾಡಿಡ್ ನಡತೊಂದುಪ್ಪುನ ಮಾಮಲ್ಲ ಉಚ್ವಯಲ ನಂಕ್ ಸಾಕ್ಷಿಯಾದುಂಡು.
ಅಂಚೆನೆ ಈ ವರ್ಕಾಡಿ ಕ್ಷೇತ್ರೊಡು ನಡಪುನ ಬ್ರಹ್ಮಕಲಶೋತ್ಸವದ ಪುಣ್ಯಕಾರ್ಯದ ರಥೊನು ಒಯಿಪುನ ಕೆಲಸೊಗು ನಮ ಮಾತೆರ್ಲ ಕೈ ಜೋಡಿಸಾಯೆರೆ ದೇವೆರ್ ಸರ್ವ ಶಕ್ತಿ ಕೊರಡ್ಂದ್ ಎಡ್ಡೆಪು ಬಯಕಿಯೆರ್.
ಸುರುಕಾದ್ ನಾಗರಾಜ್ ರಾವ್ ವರ್ಕಾಡಿ ಧರ್ಮಸಭೆಕ್ಕ್ ಬತ್ತಿನ ಸ್ವಾಮೀಜಿಯೆರೆನ್ ಬೊಕ್ಕ ಗಣ್ಣೆರೆನ್ ಮೋಕೆಡ್ ಎದ್ಕೊನ್ಯೆರ್.
ಪೂಜ್ಯ ಮಾಣಿಲ ಸ್ವಾಮೀಜಿಲೆನ ಉಪಸ್ಥಿತಿಡ್ ಪುರುಷೋತ್ತಮ್ ಚೇಂಡ್ಲಾ ಸಾಹಿತ್ಯೊದ ಎಸ್.ಕೆ..ಪ್ರಶಾಂತ್ ಗಾಯನದ ವರ್ಕಾಡಿ ಕ್ಷೇತ್ರಪಾಲ ತುಳು ಭಕ್ತಿದ ಸುಗಿಪು ಪದೊನು ಲೋಕಾರ್ಪಣೆ ಮಲ್ತೆರ್.
ಬಿನ್ನೆರಾದ್ ಬತ್ತಿನ ರವೀಂದ್ರನಾಥ್ ರೈ,ಸುಂದರ್ ಗಟ್ಟಿ, ಎ.ಜೆ. ಶೇಖರ್, ಕೆ.ಸಿ.ಗಟ್ಟಿ ಕೌಡೂರು ಬೆಂಗಳೂರು, ವಿಜಯಕುಮಾರ್, ಅಜಿತ್ ಪ್ರಸಾದ್ ನಾಯ್ಕ್ , ಸೋಮನಾಥ ಕಾರಂತ್, ವಿಶ್ವನಾಥ್ ಕುದೂರು, ಮೋಹನದಾಸ್, ಚಂದ್ರಶೇಖರ್ ಹೊಳ್ಳ, ಮಹಾಲಿಂಗ ಭಟ್, ವಿಜಯೇಂದ್ರ ಅಲೆವೂರಾಯ, ರಾಮಣ್ಣ ಶೆಟ್ಟಿ, ನಾರಾಯಣ ನಾವಡ, ವಿಶ್ವನಾಥ ರೈ, ಚಂದ್ರಶೇಖರ್ ಹೊಳ್ಳ ವರ್ಕಾಡಿ, ಬಾಲಕೃಷ್ಣ ಕುಂಜತ್ತೂರು ಎಡ್ಡೆಪು ಬಯಕ್ ದ್ ಪಾತೆರ್ಯೆರ್.
ಪುದರ್ ಪಡೆಯಿನ ತಂಡೊಡ್ದ್ ಭರತನಾಟ್ಯ, ಜಾನಪದ ನೃತ್ಯ ಬೊಕ್ಕ ನೃತ್ಯ ವೈಭವ ಲೇಸ್ ಪೊರ್ಲುಂಡ್ ಮೂಡ್ದ್ ಬತ್ತ್ಂಡ್.
ಕಡೇಕಾದ್ ಚಂದ್ರಕುಮಾರ್ ಬಲಿಪಗುರಿ ಧನ್ಯವಾದ ಸಮರ್ಪಣೆ ಮಲ್ತೆರ್. ವಿಕ್ರಮ್ ದತ್ತ , ಡಾ. ಶಂಕರ್ ಕೆ ಎಸ್. ಕೋಡಿ, ಪ್ರಭಾಕರ್ ರೈ ಕಲ್ಪಣೆ, ಶ್ಯಾಮ್ ಸುಂದರ್ ಲೇಸ್ ನ್ ಸುದಾರಿತ್ತ್ ದ್ ಕೊರಿಯೆರ್.
ವರದಿ: ಯಾದವ ಎಸ್ ಕಲ್ಲಾಪು
ಕಡಲಾಯೆರೆದ ಅರಬ್ಬೀ ದೇಶ ಮಸ್ಕತ್ ಡ್ ತುಳುಮಣ್ಣ್ ದ ಕಲೆ ಸಂಸ್ಕೃತಿನ್ ಜಗತ್ತ್ ಗ್ ಪರಿಚಯ ಮಲ್ತೊಂದು ತುಳು ಅಪ್ಪೆನ ಸೇವೆ ಮಲ್ತೊಂದುಪ್ಪುನ ಬಿರುವ ಜವನೆರ್, ಮಸ್ಕತ್ ಬೊಕ್ಕ ಇನ್ಸ್ಪಿರೇಷನ್ ಡಿಸೈನ್ ಮೊಕ್ಲೆನ ಮುತಾಲಿಕೆಡ್ ಕಟೀಲ್ ಮೇಳದಕ್ಲೆರ್ದ್ ಬರ್ಪಿನ ಮೇ 31 ತಾರೀಕ್ ಗ್ ಮಧ್ಯಾಹ್ನ 2 ಗಂಟೆರ್ದ್ ರಾತ್ರೆ 9 ಗಂಟೆ ಮುಟ್ಟ ಅಲ್ ಫಲಜ್ ಹೋಟೆಲ್ ರುವಿ ಚಾವಡಿಡ್ ಪಾಡುನ ರಂಗಮಂಟಪೊಡು ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ಮೇಳದ ಪುಗರ್ತೆದ ಕಲಾವಿದೆರೆರ್ದ್ “ಶ್ರೀ ದೇವಿ ಮಹಾತ್ಮೆ” ಯಕ್ಷಗಾನ ನಡಪರೆ ಉಂಡು.
ಹಿಮ್ಮೇಳಡ್ ಬಲಿಪ ಶಿವಶಂಕರ ಭಟ್, ದೇವಿಪ್ರಸಾದ್ ಆಳ್ವ, ದಯಾನಂದ ಮಿಜಾರ್, ಭಾಸ್ಕರ ಭಟ್, ರಾಂಪ್ರಕಾಶ್ ಕಲ್ಲೂರಾಯ, ಮುಮ್ಮೇಳಡ್ ಸುಣ್ಣಂಬಳ ವಿಶ್ವೇಶ್ವರ ಭಟ್, ವಿಷ್ಣು ಶರ್ಮ,ಡಾ| ವಾದಿರಾಜ ಕಲ್ಲೂರಾಯ, ರವಿರಾಜ್ ಪನೆಯಾಲ, ಅಮ್ಮುಂಜೆ ಮೋಹನ್, , ಡಾ| ಮಹೇಶ್ ಸಾಣೂರು,ಅರುಣ್ ಪೂಜಾರಿ, ಪ್ರಶಾಂತ್ ನೆಲ್ಯಾಡಿ, ಗಣೇಶ್ ಕನ್ನಡಿಕಟ್ಟೆ, ಗಣೇಶ್ ಚಂದ್ರಮಂಡಲ, ಉಮೇಶ್ ಕುಪ್ಪೆಪದವು, ಹರಿನಾರಾಯಣ ಭಟ್, ಬಾಲಕೃಷ್ಣ ಮಿಜಾರ್, ಅರಳ ಗಣೇಶ್, ಡಾ| ಶ್ರುತಕೀರ್ತಿ ಜೈನ್,ಮೋನಪ್ಪ ಮಿಜಾರ್, ಕೃಷ್ಣಪ್ರಸಾದ್, ರಕ್ಷಿತ್ ಪೂಜಾರಿ, ಸಂಜೀವ ಶಿರಂಕಲ್ಲು, ರವಿ ಮುಂಡಾಜೆ, ಪ್ರೇಮರಾಜ್ ಕೊಯಿಲ, ಅಕ್ಷಯ ಭಟ್, ನಿಖಿಲ್ ಶೆಟ್ಟಿ, ರಾಜೇಶ್ ಆಚಾರ್ಯ, ಮಾತ ಪಾಲ್ ಪಡೆಯರೆ ಉಲ್ಲೆರ್.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಬಿರುವ ಜವನೆರ್ ಮಸ್ಕತ್ ಕೂಟದಕುಲು ಲೆಪ್ಪೋಲೆಡ್ ತೆರಿಪಾದೆರ್.
ಬೊಲ್ತೇರ್: ಬಂದಾರು ಗ್ರಾಮದ ಕುರಾಯ ಶ್ರೀ ಸದಾಶಿವ ದೇವಸ್ಥಾನಡ್ ಪ್ರತಿಷ್ಠೆ ಉಚ್ಚಯ ಬೊಕ್ಕ ವರ್ಷದ ಜಾತ್ರೆ ಎ.2-10 ಮುಟ್ಟ ನಡಪರೆ ಉಂಡು.
ಈ ಲೇಸ್ ಬ್ರಹ್ಮಶ್ರೀ ನೀಲೇಶ್ವರ ವಾಸುದೇವ ತಂತ್ರಿಲೆನ ದುಂಬಾತ್ತಿಗೆಡ್, ನೀಲೇಶ್ವರ ಪದ್ಮನಾಭ ತಂತ್ರಿಲೆನ ಮುತಾಲಿಕೆಡ್ ನಡಪರೆ ಉಂಡು.
ಎ.2 ಅಂಗಾರೆ (ಇನಿ) ಬೊಲ್ಪುಗು ಪ್ರತಿಷ್ಠೆ ಉಚ್ಚಯ, ಪುದೆಕಾಣಿಕೆ, ಭಜನೆ, ಮಧ್ಯಾಹ್ನ ಮಹಾಪೂಜೆ ನಡತ್ಂಡ್. ಬಯ್ಯಗ್ ದುರ್ಗಾಪೂಜೆ, ರಾತ್ರೆ ರಂಗಪೂಜೆ ನಡಪರೆ ಉಂಡು.
ಎ.3 ಬುದಾರ ಬೊಲ್ಪುಗು ಕೈಲ್ ಕಡ್ಪೆರೆ, ಮಧ್ಯಾಹ್ನ ಮಹಾಪೂಜೆ, ರಾತ್ರೆ ಕೊಡಿ ಏರಿಯೆರೆ ಉಂಡು.
ಎ.4 ಗುರುವಾರ ಬಯ್ಯಗ್ ನಿತ್ಯ ಬಲಿ ನಡಪರೆ ಉಂಡು.
ಎ.5 ಸುಕ್ರಾರ ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಭಜನೆ, ರಾತ್ರೆ ಬೈಗಣ ಬಲಿ ನಡಪರೆ ಉಂಡು.
ಎ.6 ಸನಿಯಾರ ಬೊಲ್ಪುಗು ಉಚ್ಚಯ ಬಲಿ, ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಭಜನೆ, ರಾತ್ರೆ ಕೆರೆಪೂಜೆ ನಡಪರೆ ಉಂಡು.
ಎ.7 ಐತಾರ ಬೊಲ್ಪುಗು ಉಚ್ಚಯ ಬಲಿ, ಮಧ್ಯಾಹ್ನ ಇಸೇಸ ಅಪ್ಪದ ಪೂಜೆ, ಮಹಾಪೂಜೆ, ಬಯ್ಯಗ್ ಭಜನೆ, ದುರ್ಗಾಪೂಜೆ, ರಾತ್ರೆ ಕಟ್ಟೆಪೂಜೆ ನಡಪರೆ ಉಂಡು.
ಎ.8 ಸೋಮಾರ ಬೊಲ್ಪುಗು ಬಲಿ, ದರ್ಶನ ಬಲಿ, ಬಟ್ಟಲ್ ಕಾಣಿಕೆ, ಮಧ್ಯಾಹ್ನ ಮಹಾಪೂಜೆ, ಪ್ರಸಾದ ವಿತರಣೆ, ಸಾರ್ವಜನಿಕ ಅನ್ನ ಪ್ರಸಾದ ಸೇವೆ, ಬಯ್ಯಗ್ ಭಜನೆ, ರಾತ್ರೆ ರಕ್ತೇಶ್ವರಿ ದೈವೊದ ನೇಮ, ತೇರ್ ಉಚ್ಚಯ ಬೊಕ್ಕ ಶಯನೋಚ್ಚಯ ನಡಪರೆ ಉಂಡು.
ಎ.9 ಅಂಗಾರೆ ಬೊಲ್ಪುಗು ಕವಾಟೋದ್ಘಾಟನೆ, ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಪಿಲಿಚಾಮುಂಡಿ ದೈವೊದ ನೇಮ, ಶ್ರೀ ದೇವೆರೆನ ಅವಭೃತ ಸ್ನಾನ, ಕೊಡಿ ಏರಿಯೆರೆ, ಭಜನೆ, ಕಟೀಲ್ ಮೇಳದಕ್ಲೆರ್ದ್ ದೇವಿ ಮಹಾತ್ಮೆ ಆಟ ನಡಪರೆ ಉಂಡು.
ಎ.10 ಬುದಾರ ಬೊಲ್ಪುಗು ಸಂಪ್ರೋಕ್ಷಣೆ, ಮಧ್ಯಾಹ್ನ ಮಹಾಪೂಜೆ ರಾತ್ರೆ ಭಜನೆ ಬೊಕ್ಕ ರಂಗಪೂಜೆ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಅಭಿವೃದ್ಧಿ ಸಮಿತಿ, ಯಕ್ಷಗಾನ ಸಮಿತಿ, ವ್ಯವಸ್ಥಾಪನಾ ಸಮಿತಿ ಬೊಕ್ಕ ಜಾತ್ರೋಚ್ಚಯ ಸಮಿತಿದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬೊಲ್ತೇರ್: ನಾವರ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನಡ್ ಅಷ್ಟಬಂಧ ಬ್ರಹ್ಮಕಲಶ ಉಚ್ಚಯ ಮಾ.31-ಎ.4 ಮುಟ್ಟ ನಡಪರೆ ಉಂಡು.
ಈ ಲೇಸ್ ಡಾ| ಡಿ ವೀರೇಂದ್ರ ಹೆಗ್ಗಡೆರೆನ ಆಶೀರ್ವಾದಡ್, ಬ್ರಹ್ಮಶ್ರೀ ನಡ್ವಂತಾಯ ಬಾಲಕೃಷ್ಣ ಪಾಂಗಾಣ್ಣಾಯ ಮೆರೆನ ಮುತಾಲಿಕೆಡ್ ನಡಪರೆ ಉಂಡು.
ಮಾ.31 ಐತಾರ ಬೊಲ್ಪುಗು ತೋರಣ ಮೂರ್ತ, ಉಗ್ರಾಣ ಮೂರ್ತ, ಬಯ್ಯಗ್ ಅಳದಂಗಡಿ ಶ್ರೀ ಸೋಮನಾಥೇಶ್ವರೀ ದೇವಸ್ಥಾನಡ್ ಸಾಮೂಹಿಕ ಪ್ರಾರ್ತನೆ, ನಲಿಕೆ ಭಜನೆ, ಕೀಲ್ ಕುದುರೆ, ಚೆಂಡೆ ವಾದ್ಯ, ಪುದೆಕಾಣಿಕೆ ಮೆರವಣಿಗೆ, ವಾಸ್ತುಪೂಜೆ, ವಾಸ್ತು ಹೋಮ, ಅನ್ನ ಪ್ರಸಾದ ಸೇವೆ, ರಾತ್ರೆ ಸಾಂಸ್ಕೃತಿಕ ವೈಭವ, ನೃತ್ಯ ವೈವಿಧ್ಯ ನಡತ್ಂಡ್.
ಎ.1 ಸೋಮಾರ ಬೊಲ್ಪುಗು ಬಿಂಬ ಶುದ್ಧಿ, ಪದಗ್ರಹಣ ಲೇಸ್, ಭಜನೆ, ಮಧ್ಯಾಹ್ನ ಕೊಳಲು ವಾದನ, ಬಯ್ಯಗ್ ಬಲಿ, ದೇವತೆಲೆನ ಪ್ರತಿಷ್ಠೆ, ಕಲಶಾಭಿಷೇಕ, ಅನ್ನ ಪ್ರಸಾದ ಸೇವೆ, ಧಾರ್ಮಿಕ ಸಭಾ ಲೇಸ್ ರಾತ್ರೆ ಮನ್ಮಥ ಸುಂದರಿ ಆಟ ನಡತ್ಂಡ್.
ಎ.2 ಅಂಗಾರೆ (ಇನಿ) ಬೊಲ್ಪುಗು ಶಾಂತಿ ಹೋಮ, ನವಗ್ರಹ ಯಾಗ, ಪ್ರಸನ್ನ ಪೂಜೆ, ದೈವ ಪ್ರತಿಷ್ಠೆ, ಪರ್ವಸೇವೆ, ಭಜನೆ ನಡತ್ಂಡ್. ಬಯ್ಯಗ್ ಅನ್ನ ಪ್ರಸಾದ ಸೇವೆ, ಧಾರ್ಮಿಕ ಸಭಾ ಲೇಸ್, ರಾತ್ರೆ ಶಾಂಭವಿ ತುಳು ನಾಟಕ ನಡಪರೆ ಉಂಡು.
ಎ.3 ಬುದಾರ ಬೊಲ್ಪುಗು ದೇವೆರೆನ ಕಲಶಾಭಿಷೇಕ, ಆಶ್ಲೇಷಾ ಬಲಿ, ಪ್ರಸನ್ನ ಪೂಜೆ, ಭಜನೆ, ಜೋಕ್ಲೆನ ಕಲರವ ಸಾಂಸ್ಕೃತಿಕ ಲೇಸ್, ಬಯ್ಯಗ್ ಅಧಿವಾಸ ಹೋಮಲು, ಅನ್ನ ಪ್ರಸಾದ ಸೇವೆ, ಧಾರ್ಮಿಕ ಸಭಾ ಲೇಸ್, ರಾತ್ರೆ ನೃತ್ಯ ಸಂಕಲ್ಪಂ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.
ಎ.4 ಗುರುವಾರ ಬೊಲ್ಪುಗು ಬ್ರಹ್ಮಕಲಶಾಭಿಷೇಕ, ಮಹಾಪೂಜೆ, ಭಜನೆ, ಅನ್ನ ಪ್ರಸಾದ ಸೇವೆ, ಧಾರ್ಮಿಕ ಸಭಾ ಲೇಸ್, ಬಯ್ಯಗ್ ಮಲ್ಲ ರಂಗಪೂಜೆ, ದೇವೆರೆನ ಉಚ್ಚಯ ಬಲಿ, ವಸಂತಕಟ್ಟೆ ಪೂಜೆ, ದೈವೊಲೆನ ಗಗ್ಗರ ಸೇವೆ, ರಾತ್ರೆ ಕಥೆ ಎಡ್ಡೆಂಡು ತುಳು ನಾಟಕ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಪಾಲ್ ಪಡೆದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ವ್ಯವಸ್ಥಾಪನಾ ಸಮಿತಿ, ಜೀರ್ಣೋದ್ಧಾರ ಸಮಿತಿ, ಬ್ರಹ್ಮಕಲಶ ಉಚ್ಚಯ ಸಮಿತಿದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
