ಪ್ರಧಾನ ಮಂತ್ರಿ ನರೇಂದ್ರ ಮೋದಿ ವಿಕಾಸ್ ಭಾರತ್ ಸಂಕಲ್ಪ ಯಾತ್ರೆದ ಫಲಾನುಭವಿಲೆನೊಟ್ಟಿಗೆ ಇನಿ ಬೊಲ್ಪುಗು ವಿಡಿಯೋ ಕಾನ್ಫರೆನ್ಸಿಂಗ್ ಮುಖೇನ ಪಾತೆರಿಯೆರೆ ಉಲ್ಲೆರ್.
ಅತ್ತಂದೆ ಮಹಿಳಾ ಕಿಸಾನ್ ಡ್ರೋನ್ ಕೇಂದ್ರನ್ ಪ್ರಧಾನಿ ಉದಿಪನ ಮಲ್ಪುವೆರ್. ಉಂದು ಮಹಿಳಾ ಸ್ವಸಹಾಯ ಗುಂಪುಲೆಗ್ ಡ್ರೋನ್ ನ್ ಕೊರ್ಪುಂಡು. ನೆತ್ತ ಅಡಿಟ್ಟ್ ನನದ 3 ವರ್ಷಡ್ ಈ ಗುಂಪುಲೆಗ್ 15 ಸಾರ ಡ್ರೋನ್ ನ್ ಕೊರ್ಪುಂಡು. ಪೊಂಜೋವುನಕ್ಲೆಗ್ ಡ್ರೋನ್ ರಾಪಾಯೆರೆ, ಗಲಸೆರೆ ಬೋಡಾಯಿನ ತರಬೇತಿನ್ ಕೊರ್ಪುಂಡು.
ನವೆಂಬರ್ 24ತ ರಾತ್ರೆ ಪುತ್ತೂರು ಬಸ್‌ ಉಂತಡೆಡ್ ಇತ್ತಿನ ಸಂತ್ರಸ್ತೆದಿ ಪೊಂಜೊವುಗು ಪರ್ಪಿ ನೀರ್‌ಗ್ ಗಂಗಸರ ಪಾಡ್ದ್ ಕೊರ್ತಿನ ಆರೋಪಿ, ಆಲೆನ್ ಏರ್ಲಾ ಇಜ್ಜಂದಿನ ಜಾಗೆಗ್ ಲೆತೊಂದು ಪೋದು ಅತ್ಯಾಚಾರ ಮಲ್ತ್‌ದೆ ಪಂದ್ ಒಯಿಲ್ ದಾಕಲಾದಿತ್ತ್ಂಡ್.
ಪುತ್ತೂರು ಆರ್ಯಾಪು ಗ್ರಾಮೊದ ಸಂಶುದ್ದೀನ್ ಆಸ್ಗರ್ ಅಲಿ (23) ಕೈದಾತಿನ ಆರೋಪಿ. ಪ್ರಕರಣೊದ ಜಡ್ತೆ ಮಲ್ತ್‌ದ್, ಆರೋಪಿನ್ ಅಂಗಾರೆ ಅರೆಸ್ಟ್ ಮಲ್ತ್‌ದ್, ಬುಧವಾರ ಕೋರ್ಟ್‌ಗ್ ಹಾಜಿರ್ ಮಲ್ತ್‌ದ ಪಂದ್ ಪೊಲೀಸೆರ್ ತೆರಿಪಾದೆರ್.
ಶಾಲಾ ಶಿಕ್ಷಣ ಬೊಕ್ಕ ಸಾಕ್ಷರತಾ ಇಲಾಖೆ, ದಕ್ಷಿಣ ಕನ್ನಡ ಜಿಲ್ಲಾ ಪಂಚಾಯತ್ ಸಹಕಾರಿ (ಫಿಶರೀಸ್) ಹಿರಿಯ ಪ್ರಾಥಮಿಕ ಶಾಲೆ ಕುಳಾಯಿ ಬೊಕ್ಕ ಹಳೆ ವಿದ್ಯಾರ್ಥಿ ಸಂಘದ ಒಟ್ಟುಸೇರಿಗೆಡ್ ಪ್ರತಿಭಾ-ಪುರಸ್ಕಾರ ಬೊಕ್ಕ ವಾರ್ಷಿಕ ಉಚ್ಚಯ ಲೇಸ್ ಡಿ.16 ಸನಿಯಾರ ನಡಪರೆ ಉಂಡು.
ಆನಿ ಬಯ್ಯಗ್ ಸಭಾ ಲೇಸ್, ಶಾಲೆದ ಜೋಕುಲೆರ್ದ್ ಬೊಕ್ಕ ಹಳೆ ವಿದ್ಯಾರ್ಥಿಲೆರ್ದ್ ನೃತ್ಯ ಲೇಸ್ ಬೊಕ್ಕ ಹಳೆ ವಿದ್ಯಾರ್ಥಿ ಸಂಘದ ಮುತಾಲಿಕೆಡ್ ನಮ್ಮ ಟಿವಿ ಬಲೆ ಬುಲಿಪಾಲೆ ಪ್ರಶಸ್ತಿ ಗೆಂದಿನ ನವರಸ ಕಲಾವಿದೆರ್ ಸುರತ್ಕಲ್ ಅಭಿನಯದ ನಿರೆಲ್ ನಾಟಕ ನಡಪರೆ ಉಂಡು ಪಂದ್ ಹಳೆ ವಿದ್ಯಾರ್ಥಿ ಸಂಘದ ಗುರ್ಕಾರೆ ಮಾಧವ ಸುವರ್ಣ, ಶಾಲಾಭಿವೃದ್ಧಿ ಸಮಿತಿದ ಗುರ್ಕಾರೆ ಮಂಜುಳಾ, ಕುಳಾಯಿ ಸಹಕಾರಿ ಫಿಶರೀಸ್ ಹಿರಿಯ ಪ್ರಾಥಮಿಕ ಶಾಲೆದ ಮುಖ್ಯ ಶಿಕ್ಷಕಿ ಶೋಭ, ಶಿಕ್ಷಕ ವೃಂದ ಬೊಕ್ಕ ಕಲ್ಪಾರ್ಥಿಲು ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ : ದೇಶನ್ ಒಟ್ಟು ಸೇರ್ಸಾವುನ ಕೆಲಸ ಬಿಜೆಪಿ ಮಲ್ತ್ಂಡ, ಕಾಂಗ್ರೆಸ್ ಏಪದಲೆನೇ ತನ್ನ ಸ್ವಾರ್ಥಕ್ಕಾದ್ ದೇಶನ್ ಬೇತೆ ಬೇತೆ ಮಲ್ಪುನ ಕೆಲಸನ್ ಮಲ್ತೊಂದು ಉಂಡು. ಬಿಹಾರ ಡ್ ಸಾರ್ವಜನಿಕ ರಜೆತ್ತ ವಿಷಯಡ್ ಆಯಿನ ವಿವಾದ I.N.D.I.A ಮೈತ್ರಿ ಕೂಟದ ಜಿಹಾದಿ ಮನಸ್ಥಿತಿನ್ ಜಗತ್ತ್ ಗ್ ತೂಪಾವೊಂದುಂಡು ಪಂದ್ ಶಾಸಕೆರ್ ವೇದವ್ಯಾಸ್‌ ಕಾಮತ್ ಮೇರ್ ಬೆಚ್ಚ ಆತೆರ್.
ಬಿಹಾರದ ಶಿಕ್ಷಣ ಇಲಾಖೆ ಘೋಷಣೆ ಮಲ್ತಿನ 2024 ತ್ತ ಸಾರ್ವಜನಿಕ ರಜೆತ್ತ ಪಟ್ಟಿಡ್ ಹಿಂದೂಲೆನ ಶ್ರೀ ಕೃಷ್ಣಜನ್ಮಾಷ್ಟಮಿ, ರಕ್ಷಾ ಬಂಧನ, ರಾಮನವಮಿ, ಶಿವರಾತ್ರಿ, ವಸಂತ ಪಂಚಮಿ, ಜೀವಿತ ಪುತ್ರಿಕಾ ಪರ್ಬಗ್ ಕೊರೊಂದು ಇತ್ತಿನ ರಜೆನ್ ಕ್ಯಾನ್ಸಲ್ ಮಲ್ದ್ಂಡ್. ಇಸ್ಲಾಂ ಪರ್ಬಲೆಗ್ ಎಚ್ಚದ ರಜೆನ್ ಘೋಷಣೆ ಮಲ್ದ್ಂಡ್. ಉರ್ದು ಶಾಲೆಲು ಸೇರಿನಂಚೆನೆ ಮುಸ್ಲಿಂ ಪ್ರಾಬಲ್ಯ ಇಪ್ಪುನ ಸರ್ಕಾರಿ ಶಾಲೆಗ್ ಐತಾರದ ಬದಲ್ ಸುಕ್ರಾರ ವಾರದ ರಜೆನ್ ಘೋಷಣೆ ಮಲ್ದ್ಂಡ್. ಆ ಮುಖೇನ ಮುಸ್ಲಿಮೆರೆಗಾದ್ ಸರ್ಕಾರಿ ವಾರದ ರಜೆನ್ ಬದಲ್ ಮಲ್ತಿನ ದೇಶದ ಸುರುತ್ತ ರಾಜ್ಯ ಬಿಹಾರ ಆತ್ಂಡ್. ನೆರ್ದ್ ದುಂಬು ಬಜಿ ಮೆಚ್ಚಾವುನ ರಾಜಕೀಯಗಾದ್ ಕಾಶ್ಮೀರಗ್ ಆರ್ಟಿಕಲ್ 370 ಮುಖೇನ ತಾನಮಾನ ಕೊರ್ದು, ಪ್ರತ್ಯೇಕತಾವಾದಗ್, ಭಯೋತ್ಪಾದನೆಗ್, ಅಶಾಂತಿಗ್ ಕಾಂಗ್ರೆಸ್ ಕಾರಣ ಆದಿತ್ತ್ಂಡ್. ಆ ಸಮಸ್ಯೆನ್ ಸರಿ ಮಲ್ಪರೆ ಪ್ರಧಾನಿ ನರೇಂದ್ರ ಮೋದಿಯೆರೇ ಬರೊಡಾಂಡ್. ಇತ್ತೆ ಬಿಹಾರಡ್ ತನ್ನ ಮೈತ್ರಿ ಕೂಟದ ಜೆಡಿಯು ಪಕ್ಷದ ಮುಖೇನ ಅಂಚಿನನೇ ಸಮಸ್ಯೆನ್ ಸೃಷ್ಟಿ ಮಲ್ತ್ ದ್ ಭವಿಷ್ಯಡ್ ದೇಶದೊಲಯಿ ಕುಡ ಅಶಾಂತಿ, ಅಭದ್ರತೆನ್ ಸುರು ಮಲ್ತೊಂದು ಉಂಡು. ಇತ್ತೆನೇ ನೆನ್ ಉಂತಾಯಿಜಿಂಡ ಕಾಂಗ್ರೆಸ್ ಪಕ್ಷ ನನದ ದಿನಟ್ಟ್ ರಾಜ್ಯಡ್ ಇಂಚಿನನೇ ನಿಯಮನ್ ಜಾರಿಗ್ ಕನಪುನೆಟ್ಟ್ ಅಚ್ಚರಿ ಇಜ್ಜಿ. ಇಡೀ ದೇಶದ ವಾ ರಾಜ್ಯಡ್ಲಾ ಇಜ್ಜಂದಿನ ನಿರ್ಧಾರನ್ ಬಿಹಾರಡ್ ಮಾತ್ರ ಕನಯೆರೆ ಮೊಘಲ್‌ ಕಾಲದ ಮನಸ್ಥಿತಿದಕ್ಲೆರ್ದ್ ಮಾತ್ರ ಸಾಧ್ಯ ಪಂದ್ ಶಾಸಕೆರ್ ಕಾಮತ್ ಆರೋಪ ಮಲ್ದೆರ್ .
ಮುಲ್ಕಿ: ಕಿನ್ನಿಗೋಳಿ ಐಕಳದ ಕಾಂತಾ ಬಾರೆ-ಬೂದಾಬಾರೆ ಫ್ರೆಂಡ್ಸ್ ಕ್ಲಬ್ ಆಶ್ರಯಡ್ ಸಾಮಾಜಿಕ ಸೇವಾ ಚಟುವಟಿಕೆದ ಸಹಾಯಾರ್ಥವಾದ್ ಗ್ರಾಮೀಣ ಮಟ್ಟದ ವಾಲಿಬಾಲ್ ಪಂದ್ಯಾಟ 2023 ಕಾರ್ಯಕ್ರಮ ಐಕಳ ಕಂಬುಲದ ಮಂಜೊಟ್ಟಿ ಕಂಡದ ಕೈತಲ್ ದ ಗ್ರೌಂಡ್ ಡ್ ನಡತ್ಂಡ್.
ಮುಲ್ಕಿ ಬಂಟರ ಸಂಘದ ಗುರ್ಕಾರ್ಲು ಅಶೋಕ್ ಕುಮಾರ್ ಶೆಟ್ಟಿ ಲೇಸ್ ದ ಉದಿಪನ ಮಲ್ತ್ ಪಾತೆರ್ನ ಆರ್ ಗ್ರಾಮೀಣ ಪ್ರದೇಶಡ್ ಕ್ರೀಡೆಗ್ ಪ್ರೋತ್ಸಾಹ ಕೊರ್ಪುನ ಒಟ್ಟಿಗೆ ಸಾಮಾಜಿಕ ಚಟುವಟಿಕೆದ ಮೂಲಕ ಸಮಾಜದ ಕಟ್ಟ ಕಡೆತ ವ್ಯಕ್ತಿಗ್ ಸಹಾಯ ಹಸ್ತ ಕೊರೊಂದು ಇಪ್ಪುನ ಸೇವಾ ಸಂಸ್ಥೆದ ಬೇಲೆ ಬಾರಿ ಎಡ್ಡೆ ಪಂದ್ ಪಂಡೆರ್.
ಕಾರ್ಯಕ್ರಮದ ಗುರ್ಕಾರ್ಮೆನ್ ಉದ್ಯಮಿ ಪುರುಷೋತ್ತಮ ಶೆಟ್ಟಿ ಕಿನ್ನಿಗೋಳಿ ವಹಿಸ್ ದ್ ಇತ್ತೆರ್. ಕಾರ್ಯಕ್ರಮಡ್ ಶ್ರೀ ಕ್ಷೇತ್ರ ಏಳಿಂಜೆದ ಪ್ರಧಾನ ಅರ್ಚಕೆರ್ ಗಣೇಶ್ ಭಟ್ ಆಶಿರ್ವಚನ ಕೊರಿಯೆರ್. ಚಾವಡಿಡ್ ಮಲ್ಲ ಬಿನ್ನೆರಾದ್ ಉಪನ್ಯಾಸಕೆರ್ ಸಾಯಿನಾಥ ಶೆಟ್ಟಿ , ಐಕಳ ಗ್ರಾ. ಪಂ.ಮಾಜಿ ಅಧ್ಯಕ್ಷೆ ಸುಗುಣ ಪೂಜಾರಿ, ಕಿನ್ನಿಗೋಳಿ ಲಯನ್ಸ್ ಕ್ಲಬ್ ಅಧ್ಯಕ್ಷೆ ಹಿಲ್ಡಾ ಡಿಸೋಜ, ನಿಡ್ಡೋಡಿ ಬಂಟರ ಸಂಘದ ಗುರ್ಕಾರ್ಲು ಬಿ. ಆರ್. ಪ್ರಸಾದ್, ದಯಾನಂದ ಶೆಟ್ಟಿ, ಐಕಳಬಾವ ಹೊಸಮನೆ, ಕೃಷ್ಣ ಮಾರ್ಲ, ಹರೀಶ್ ಶೆಟ್ಟಿ ತಾಮಣಿಗುತ್ತು, ದೇವಿಪ್ರಸಾದ್ ಶೆಟ್ಟಿ ಏಳಿಂಜೆ ,ಫ್ರೆಂಡ್ಸ್ ಕ್ಲಬ್ ದ ಗುರ್ಕಾರ್ಲು ತಾರಾನಾಥ ಶೆಟ್ಟಿ ಇತ್ತೆರ್. ದೇವಿದಾಸ ಶೆಟ್ಟಿ ಬಿನ್ನೆರೆನ್ ಎದ್ಕೊಂದು, ಶ್ರೀಶ ಐಕಳ ಲೇಸ್ ದ ಸುದಾರಿಕೆ ಮಲ್ತೆರ್. ಅವೆರ್ದ್ ಬೊಕ್ಕ ವಾಲಿಬಾಲ್ ಗೊಬ್ಬು ನಡತ್ಂಡ್.
ಮುಲ್ಕಿ : ಕಿನ್ನಿಗೋಳಿ ಕೈತಲ್ ದಾಮಸ್ ಕಟ್ಟೆದ ಕಿರೆಂ ಚರ್ಚ್‌ದ ವಾರ್ಷಿಕ ಪರ್ಬದ ಮಸ್ತ್ ವರ್ಷದ ದುಂಬು ಚರ್ಚ್ ದ ಮಿತ್ತ್ ಟಿಪ್ಪು ಸುಲ್ತಾನ್ ದಾಳಿನ್ ತಪ್ಪಾಯಿನ ನೆಂಪುಗಾದ್ ಪ್ರತಿಷ್ಠಿತ ಮನೆತನದ ಮೂಜಿ ಹಿಂದೂ ಕುಟುಂಬಿಕೆರೆಗ್ ನೆಂಪುಗೋಸ್ಕರ ಕೈಸ್ತ ಬಾಂಧವೆರ್ ಮಾನಾದಿಗೆ ಮಲ್ತೆರ್.
ತಾಳಿಪಾಡಿ ಗುತ್ತು, ಏಳಿಂಜೆ ಅಂಗಡಿಗುತ್ತು, ಐಕಳ ಬಾವ ಮೂಜಿ ಗುತ್ತು ಮನೆತನದಕ್ಲೆಗ್ ಪ್ರತೀ ವರ್ಷದಂಚ ಈ ಸರ್ತಿಲ ಬಾರೆದ ಕೈಲ್, ಬಚ್ಚಿರೆ ಕೊರ್ದು ವಿಶೇಷ ಗೌರವ ಸಲ್ಲಿಸಾಯೆರ್. ತಾಳಿಪಾಡಿ ಗುತ್ತು ದಿನೇಶ್ ಭಂಡ್ರಿಯಾಲ್, ಸುಕುಮಾರ್ ಶೆಟ್ಟಿ ತಾಳಿಪಾಡಿ ಗುತ್ತು, ಜಗದೀಶ್ ಶೆಟ್ಟಿ ತಾಳಿಪಾಡಿ ಗುತ್ತು, ಏಳಿಂಜೆ ಅಂಗಡಿಗುತ್ತು ಗುತ್ತಿನಾರ್ ಬಾಲಕೃಷ್ಣ ಶೆಟ್ಟಿ, ಶಂಭು ಶೆಟ್ಟಿ, , ರಿಶಿತ್ ಶೆಟ್ಟಿ, ಐಕಳ ಬಾವ ಸುಕುಮಾರ್ ಭಂಡಾರಿ, ಜಯಪಾಲ ಶೆಟ್ಟಿ, ಭಾಸ್ಕರ್ ಶೆಟ್ಟಿ, ಅಭಿಷೇಕ್ ಶೆಟ್ಟಿ, ಮಾನಾದಿಗೆನ್ ಪಡೆಯೊಂಡೆರ್. ಪಣಿರ್ ಚರ್ಚ್ ಪ್ರಧಾನ ಧರ್ಮಗುರು ವಿಕ್ಟೆರ್ ಡಿಮೆಲೋ, ಕಿರೆಂ ಚರ್ಚ್ ಪ್ರದಾನ ಧರ್ಮಗುರು ಓಸ್ವಾಲ್ಡ್ ಮಾಂತೆರೋ, ಸಹಾಯಕ ಧರ್ಮಗುರು ಸುನೀಲ್ ಡಿಸೋಜ, ಪಾದರ್ ಮ್ಯಾಕ್ಸಿಮ್ ನೊರೋಹ್ನ, ಎಸ್.ವಿ.ಡಿ ಧರ್ಮಗುರು, ಕಿನ್ನಿಗೋಳಿ ವಲಯ ಧರ್ಮಗುರು, ಕಿರೆಂ ಚರ್ಚ್ ದ ಪಲನಾ ಮಂಡಳಿ ಉಪಾಧ್ಯಕ್ಷೆರ್ ಸ್ಟೀವನ್ ಡಿಕುನ್ನ, ಕಾರ್ಯದರ್ಶಿ ಮ್ಯಾಕ್ಸಿಮ್ ಪಿಂಟೋ, ಸರ್ವ ಸಮಿತಿ ಚಾಲಕೆರ್ ಸಂತಾನ್ ಡಿಸೋಜ ಈ ಪೊರ್ತುಡು ಇತ್ತೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಮಣಿಪಾಲ್ ಇನ್ಸ್ಟಿಟ್ಯೂಟ್ ಆಫ್ ಕಮ್ಯುನಿಕೇಶನ್ ಬೊಕ್ಕ ಕಸ್ತೂರ್ಬಾ ಆಸ್ಪತ್ರೆ ಮಣಿಪಾಲದ ಒಟ್ಟುಸೇರಿಗೆಡ್ ನ.29 ಬುಧಾರ ಬಯ್ಯಗ್ 5 ಗಂಟೆಗ್ ಆರೋಗ್ಯ ದರ್ಶನ ಸರಣಿ ಲೇಸ್ ಡ್ ಮೂತ್ರಪಿಂಡದ ಪೋಷಣೆದ ಬಗೆಟ್ಟ್ ವಿಶೇಷ ಪೊಲಬು ಪ್ರಸಾರ ಆಪುಂಡು.
ಈ ಲೇಸ್ ಡ್ ಕಸ್ತೂರ್ಬಾ ಆಸ್ಪತ್ರೆ ಮಣಿಪಾಲದ ಕ್ಲಿನಿಕಲ್ ನ್ಯೂಟ್ರಿಷಿಯನ್ ಬೊಕ್ಕ ಡಯಾಟಾಟಿಕ್ಸ್ ವಿಭಾಗಡ್ ಪಥ್ಯಾಹಾರ ತಜ್ಞೆರಾಯಿನ ಅಶ್ವಿತ ಪಾಲ್ ಪಡೆಯೆರೆ ಉಲ್ಲೆರ್. ನ.30 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ನಟೆ, ನಿರ್ದೇಶಕೆರ್ ರಿಷಬ್ ಶೆಟ್ಟಿ ಅಭಿನಯ ಮಲ್ತ್ ದ್, ನಿರ್ದೇಶನ ಮಲ್ತಿನ ಕಾಂತಾರ ಪಿಕ್ಚರ್ ಗ್ ಗೋವಾಡ್ ನಡತೊಂದು ಇಪ್ಪುನ 52ನೇ ಇಂಟರ್ ನ್ಯಾಷನಲ್ ಫಿಲ್ಮ್ ಫೆಸ್ಟಿವಲ್ ಡ್ ಎಡ್ಡೆ ಪಿಕ್ಚರ್ ಪನ್ಪುನ ಪುಗರ್ತೆನ್ ಪಡೆತೆನ್.
ಇತಿಹಾಸ ಸೃಷ್ಠಿ ಮಲ್ತಿನ ಕಾಂತಾರ ಪಿಕ್ಚರ್ ದ ಕಾಂತಾರ ಅಧ್ಯಯ-1 ತ್ತ ಮೂರ್ತ ಮಲ್ತಿನ ಬೆರಿಕ್ಕೆ ಈ ಪಿಕ್ಚರ್ ಗ್ ಫಿಲ್ಮ್ ಫೆಸ್ಟಿವಲ್ ಡ್ ಪುಗರ್ತೆದ ಸಿಲ್ವರ್ ಪಿಕಾಕ್ ಪ್ರಶಸ್ತಿ ಬೈದ್ಂಡ್. ಈ ಪಿಕ್ಚರ್ ನ್ ಹೊಂಬಾಳೆ ಫಿಲ್ಮ್ ನಿರ್ಮಾಣ ಮಲ್ದ್ಂಡ್.a
ಉಜಿರೆ: ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಕಾಲೇಜು ಉಜಿರೆದ ಪತ್ರಿಕೋದ್ಯಮ ವಿಭಾಗದ ಹೈಪರ್ ಲೋಕಲ್ ಮೀಡಿಯಾ ಕಾರ್ಯಕ್ರಮದ ಉದಿಪನ ನ.29 ತಾನಿ ಕಾಲೇಜ್‌ದ ಚಾವಡಿಡ್ ನಡತ್ಂಡ್. ಸುದ್ದಿ ಬಿಡುಗಡೆ ಪತ್ರಿಕೆದ ಸಂಪಾದಕೆರ್ ಡಾ.ಯು.ಪಿ ಶಿವಾನಂದ ಲೇಸ್‌ದ ಉದಿಪನ ಮಲ್ತೆರ್.
ವೇದಿಕೆಡ್ (MAAM) ಗುರ್ಕಾರ್ಲು ನವೀನ್ ಅಮ್ಮೆಂಬಳ , (MAAM) ಗೌರವಾನ್ವಿತ ಗುರ್ಕಾರ್ಲು ವೇಣು ಶರ್ಮ, ಪತ್ರಿಕೋದ್ಯಮ ವಿಭಾಗದ ಮುಖ್ಯಸ್ಥೆರ್ ಭಾಸ್ಕರ್ ಹೆಗ್ಡೆ, ಕಾಲೇಜು ಮುಖ್ಯೋಪಾಧ್ಯಾಯ ಡಾ.ಬಿ.ಎ. ಕುಮಾರ್ ಹೆಗ್ಡೆ ಬೊಕ್ಕ ಪತ್ರಿಕೋದ್ಯಮದ ಕಲ್ಪಾರ್ಥಿಲು ಇತ್ತೆರ್. ಶರತ್ ಹೆಗ್ಡೆ ಸೊಲ್ಮೆ ಸಂದಾಯ ಮಲ್ತೆರ್.
ಗಾಂಧಿನಗರ: ಟ್ಯಾಂಕ್‍ಡ್ ಸಂಗ್ರಹ ಮಲ್ತ್ ಇತ್ತಿನ ರಾಸಾಯನಿಕ ಪುಡಾಯಿನ ಪರಿಣಾಮ ತೂ ಪೊತ್ತುದು ಸುಮಾರು 24 ಕಾರ್ಮಿಕೆರ್ ಗಾಯ ಆಯಿನ ಘಟನೆ ಗುಜರಾತ್‍ದ ಸೂರತ್ ನಗರದ ರಾಸಾಯನಿಕ ಕಾರ್ಖಾನೆಡ್ ನಡತ್ಂಡ್.
ಸೂರತ್ ದ ಸಚಿನ್ ಜಿಐಡಿಸಿ ಕೈಗಾರಿಕಾ ಪ್ರದೇಶದಡ್‌ ಇಪ್ಪುನ ರಾಸಾಯನಿಕ ಕಾರ್ಖಾನೆಡ್ ರಾತ್ರಿ 2 ಗಂಟೆರ್ದ್ 3 ಗಂಟೆ ಸುಮಾರ್‌ಗ್ ತೂ ತೋಜಿದ್‌ ಬೈದ್ಂಡ್. ಈ ಘಟನೆಡ್ 24 ಕಾರ್ಮಿಕೆರ್ ಗಾಯ ಆದ್, ಆಸ್ಪತ್ರೆಗ್ ದಾಖಲ್‌ ಮಲ್ತ್‌ದೆರ್‌ ಪಂದ್ ತೆರಿದ್‌ ಬೈದ್ಂಡ್.
