ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಮಧುರಗಾನ ಸರಣಿ ಲೇಸ್ ನ.30 ಗುರುವಾರ ಬಯ್ಯಗ್ 6.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಸೌಮ್ಯ ಡಿ ಅಚಾರ್ಯ ಪಡುಬೆಳ್ಳೆ ಪಾಲ್ ಪಡೆಯೆರೆ ಉಲ್ಲೆರ್. ಡಿ.1 ಮಧ್ಯಾಹ್ನ 2.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಫ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಕುಡ್ಲ: ಕುಡ್ಲ ಮಹಾನಗರ ಪಾಲಿಕೆದ 60 ವಾರ್ಡ್‌‌ಲೆಡ್ ಕಜವು ಇಲಬರಿ ಮಲ್ತೊಂದಿತ್ತಿನ ಆ್ಯಂಟನಿ ಸಂಸ್ಥೆದ ಪಗತೆಗ್ ಇತ್ತೆ ಮಹಾನಗರ ಪಾಲಿಕೆ ಸ್ವತಃ ಕಜವು ಇಲಬರಿ ಮನ್ಪುನ ಯೋಜನೆ ಪಾಡೊಂದುಂಡು. ಆಂಡ ಕಜವು ಇಲಬರಿ ಗಾಡಿಲೆಗ್ ಚಾಲನೆ ಕೊರ್ದು ಮೂಜಿ ತಿಂಗೊಲಾಂಡಲಾ ಗಾಡಿಲು ಮಾತ್ರ ಉಂತಿನವುಲೇ ಉಲ್ಲ. ಕೇಂದ್ರ ಸರಕಾರೊದ ಸ್ವಚ್ಛ ಭಾರತ್ ಮಿಷನ್‌ದ ಅಡಿಟ್ ಕುಡ್ಲ ಪಾಲಿಕೆ ಗಾಡಿಲೆನ್ ಗೆತೊಂದಿತ್ತ್‌ದ್, 107 ಎಲ್ಯ ವೆಹಿಕಲ್, 30 ಟಿಪ್ಪರ್, 16 ಕಾಂಪ್ಯಾಕ್ಟರ್ ಒಟ್ಟು 153 ಗಾಡಿಲು ಉಲ್ಲ. ಉದಿಪನ ಆಯಿ ಬೊಕ್ಕ ಪಂಡ ಕರಿನ ಮೂಜಿ ತಿಂಗೊಲುರ್ದು ಪೇಂಟೆದ ಮಣ್ಣಗುಡ್ಡೆ ಬೊಕ್ಕ ಬೈಕಂಪಾಡಿಡ್ ಗಾಡಿಲೆನ್ ಉಂತಾದೆರ್.
ಕೆಲ ಗಾಡಿಲೆಗ್ ಇತ್ತೆನೇ ಎಲ್ಯ ಮಟ್ಟ್‌ಡ್ ಮಣ್ಣ್ ಪತ್ತ್‌ದ್ಂಡ್. ಗಾಡಿಲೆನ್ ಪಾಲಿಕೆನೇ ಕಾಸ್ ಪಾಡ್ದ್ ಗೆತೊಂದಿತ್ತ್‌ದ್, ಆಂಡ ನೆತ್ತ ಡ್ರೈವರ್, ಲೋಡರ್ ಬೇಲೆ, ವರ್ಕ್‌ಶಾಪ್ ಬೊಕ್ಕ 3 ವರ್ಷೊದ ಮೈಂಟೆನೆನ್ಸ್‌ಗ್ ಟೆಂಡರ್ ಲೆಪ್ಪುಂಡು. ಇತ್ತೆ ಆ್ಯಂಟನಿ ಸಂಸ್ಥೆಡ್ ಬೇಲೆ ಮಲ್ತೊಂದಿತ್ತಿನ ಪೌರಕಾರ್ಮಿಕೆರೆನ್ ನೇಮಕ ಮಲ್ತೊನೊಡು ಒಟ್ಟುಗು ಎಚ್ಚಿನ ಬೇಲೆಲೆಗ್ ಬೋಡಾಪಿನ ಕಾರ್ಮಿಕೆರೆನ್ ನೇಮಕ ಮಲ್ತೊನೊಡಾತೆ. ಈ ಪ್ರಕ್ರಿಯೆಲು ಕಡೆಸ್ಸಿನೆರ್ದಾವರ ನನಲಾ ಆ್ಯಂಟನಿ ಸಂಸ್ಥೆನೇ ಕೋವು ವಿಲೇವಾರಿ ಮಲ್ತೊಂದುಂಡು. ಇಂಚೆನೇ ದುಂಬರಿಂಡ ಮೈದಾನೊಡು ಉಂತುದುಪ್ಪುನ ಕೋಟಿಗಟ್ಲೆ ರೂಪಾಯಿ ಕಾಸ್ ಕೊರ್ದು ಗೆತೊಂದಿನ ಕಜವು ಇಲಬರಿ ಗಾಡಿಲು ದೊಂಬು, ಬರ್ಸೊರ್ದಾವರ ಗಲಸೆರಾವಂದಿಲೆಕ ಆಪಿನೆಕ್ ದುಂಬು ಅವೆನ್ ಬೇಲೆಗ್ ಜಪ್ಪಾವೊಡು. ಇಜಿಂಡ ಗಾಡಿಲೆನ ಟಯರ್, ಬ್ಯಾಟರಿ, ಇಂಜಿನ್ ಇಂಚ ಒಂಜೊಂಜೇ ತೆಟ್ಟ್‌ದ್ ಕುಡೊರ ಸರ್ವೀಸ್ ಮನ್ಪಾವುನೆತೊಟ್ಟುಗು ಪಾಲಿಕೆದ ಕುಡ ಒಂತೆ ಕಾಸ್‌ನ್ ಬೊಲ್ಲಗ್ ಬುಡ್ಲೆಕ ಆಪಿನ ಪರಿಸ್ಥಿತಿ ಉಂಡಾವು. ಆಯಿನಾತ್ ಬೇಗ ಉಂತುದಿನ ಗಾಡಿಲೆನ್ ಬೇಲೆಗ್ ಜಪ್ಪಾದ್ ಪಾಲಿಕೆದ ಕಾಸ್ ವ್ಯರ್ಥ ಆವಂದಿಲೆಕ ಕ್ರಮ ಗೆತೊನೊಡು.
ಕುಂದಾಪುರ: ಕುಂದಾಪುರ ಉಪ ಅರಣ್ಯ ಸಂರಕ್ಷಣಾಧಿಕಾರಿ ಅರೆನ ಕಚೇರಿದ ಮಿತ್ತ್ ಒಡಿಪು ಲೋಕಾಯುಕ್ತ ಇಲಾಖೆ ಬುಧವಾರ ಬಯ್ಯಗ್ ದಾಳಿ ಮಲ್ತ್‌ದೆರ್.
ಕುಂದಾಪುರ ಉಪ ವಿಭಾಗದ ಉಪ ಅರಣ್ಯ ಸಂರಕ್ಷಣಾಧಿಕಾರಿನ ಕಚೇರಿಡ್‌ ಬೇಲೆ ಮಲ್ತೊಂದು ಇಪ್ಪುನ ಕ್ಲರ್ಕ್ ಮಂಜು ಪೂಜಾರಿ ಪನ್ಪುನಾರ್ 20,000 ರೂಪಾಯಿ ಲಂಚಕ್ಕೆ ಬೇಡಿಕೆ ದೀದ್‌ ಇತ್ತೆರ್. ಈ ಹಿನ್ನೆಲೆಡ್ ಬುಧವಾರ ಲಂಚ ದೆತೊನ್ನಗ ರೆಡ್‌ ಹ್ಯಾಂಡ್ ಆದ್ ಲೋಕಾಯುಕ್ತ ಪೊಲೀಸೆರೆನ ಬಲೆಕ್ಕ್‌ ಬೂರ್ದೆರ್.
ಭಾರತ್ ಗೌರವ್ ರೈಲ್‌ಡ್ ವಿಷಪೂರಿತ ತಿನಸ್‌ ತಿಂದ್ 90 ಜನ ಪ್ರಯಾಣಿಕೆರ್ ಆಸ್ಪತ್ರೆಗ್ ದಾಖಲಾಯಿನ ಘಟನೆ ನಡತ್‌ಂಡ್. ಭಾರತ್ ಗೌರವ್ ವಿಶೇಷ ರೈಲ್‌ಡ್ ಚೆನ್ನೈರ್ದ್ ಪ್ರಯಾಣ ಮಲ್ತೊಂದು ಇತ್ತಿನ ಸುಮಾರು 90 ಪ್ರಯಾಣಿಕೆರ್ ಮಧ್ಯರಾತ್ರೆ ಪುಣೆ ರೈಲ್ವೆ ನಿಲ್ದಾಣಗ್‌ ಮುಟ್ಟುನೆರ್ದ್‌ ದುಂಬು ಬಂಜಿ ಬೇನೆ ಬೊಕ್ಕ ಬೇತೆ ಸಮಸ್ಯೆಲ ತೋಜಿದ್‌ ಬೈದ್‌ಂಡ್.
ಮಸ್ತ್ ಪ್ರಯಾಣಿಕೆರ್ ಕಕ್ಕುನ ಬೊಕ್ಕ ಭೇದಿಡ್ ಬಳಲೊಂದು ಇತ್ತೆರ್. ರೂಬಿ ಹಾಲ್ ಕ್ಲಿನಿಕ್ ರೈಲ್ವೆ ಆಸ್ಪತ್ರೆ ಬೊಕ್ಕ ಸಾಸೂನ್ ಜನರಲ್ ಆಸ್ಪತ್ರೆದ ಡಾಕ್ಟರ್‌ ನಕುಲು ಒಟ್ಟು 99 ರೋಗಿಲೆನ್ ಪರೀಕ್ಷೆ ಮಲ್ತ್ ಮಾತ ರೋಗಿಲೆನ ಆರೋಗ್ಯ ಸ್ಥಿರ ಆದ್ ಉಂಡು ಪಂದ್ ತೆರಿಪಾದೆರ್.
ಬೆಂಗಳೂರು: ಆಸೆ ಧಾರಾವಾಹಿ ಶೂಟಿಂಗ್ ಪೊರ್ತುಡು ಅವಘಡ ಆದ್ ನಟ ಮಂಡ್ಯ ರಮೇಶ್ ಆಸ್ಪತ್ರೆಗ್ ದಾಖಲಾತೆರ್‌ ಪಂದ್ ತೆರಿದ್‌ ಬೈದ್‌ಂಡ್.
ಬೆಂಗಳೂರುದ ರಾಜರಾಜೇಶ್ವರಿ ನಗರದ ಕಲ್ಲ್ ಕ್ವಾರಿಡ್ ಚಿತ್ರೀಕರಣ ಆವೊಂದು ಇತ್ತಿನ ಪೊರ್ತುಡು ರಮೇಶ್ ಕಾರ್‌ ಜಾರ್ದ್‌ ಬೂರ್ದೆರ್. ಅಪಗನೆ ಅರೆನ್ ಆಸ್ಪತ್ರೆಗ್ ದಾಖಲ್‌ ಮಲ್ತ್‌ದೆರ್.
ಬೋಲ್ತೆರ್: ದಾಸವರೇಣ್ಯ ಕನಕದಾಸ ಜಯಂತಿನ್ ತಾಲೂಕು ಆಡಳಿತ ಸೌಧ ಸಭಾಂಗಣಡ್ ನ.30 ತಾನಿ ಆಚರಣೆ ಮಲ್ತೆರ್. ವಿಧಾನ ಪರಿಷತ್ ಶಾಸಕೆರ್ ಪ್ರತಾಪ್ ಸಿಂಹ ನಾಯಕ್ ಕಾರ್ಯಕ್ರಮದ ಉದಿಪನ ಮಲ್ತ್, ಭಾರತದ ಆತ್ಮವೇ ಆಧ್ಯಾತ್ಮ, ದಾಸ ಸಾಹಿತ್ಯದ ಮೂಲಕ ಸಮಾಜಗ್ ಆಧ್ಯಾತ್ಮದ ಸಂದೇಶ ಕೊರ್ನ ಕನಕದಾಸೆರ್ ದಾಸ ಪರಂಪರೆಡ್ ಶ್ರೇಷ್ಠ ಆತೆರ್‌ ಪಂದ್ ಪಂಡೆರ್.
ಕಂದಾಯ ನಿರೀಕ್ಷಕೆರ್ ಪವಾಡಪ್ಪ ಕನಕದಾಸರ ಜೀವನದ ಬಗ್ಗೆ ಪಾತೆರಿಯೆರ್. ತಹಶೀಲ್ದಾರ್ ಪೃಥ್ವಿ ಸಾನಿಕಮ್ ಗುರ್ಕಾರ್ಮೆನ್‌ ವಹಿಸಾದ್‌ ಕನಕದಾಸರ ಸಾಹಿತ್ಯ ಸಮಾಜ ಸುಧಾರಣೆಗ್ ಮಾರ್ಗದರ್ಶನ ಆತ್ಂಡ್ ಪಂದ್ ಪಂಡೆರ್. ತಾ.ಪಂ. ಕಾರ್ಯನಿರ್ವಹಣಾಧಿಕಾರಿ ಕುಸುಮಾಧರ್ ಈ ಪೊರ್ತುಡು ಇತ್ತೆರ್. ತಾಲೂಕು ಪಂಚಾಯತ್ ಸಂಯೋಜಕೆರ್ ಜಯಾನಂದ ಲಾಯಿಲ ಬತ್ತಿನ ಬಿನ್ನೆರೆನ್‌ ಎದ್ಕೊಂದು, ಸೊಲ್ಮೆ ಸಂದಾಯ ಮಲ್ತೆರ್.
ಪೆರ್ಡೂರು: ಅಲಂಗಾರು, ಪೆರ್ಡೂರು ಶ್ರೀ ಬ್ರಹ್ಮಬೈದರ್ಕಳ ಗರಡಿಡ್ ಕಾಯಿದ ಪೂಜೆ ಡಿ.1 ಸುಕ್ರಾರ ನಡಪರೆ ಉಂಡು.
ರಾತ್ರೆ ಶ್ರೀ ನೀಲಾವರ ಮೇಳದಕ್ಲೆರ್ದ್ ಪೊಸ ಪ್ರಸಂಗದ ಆಟ ನಡಪರೆ ಉಂಡು.
ಕರಿನ ವರ್ಷೊದಿಂಚ ಆಫ್ರಿಕನ್, ಪಂಜಿಜ್ವರ ಇಪ್ಪುನೆರ್ದಾವರ ಕರ್ನಾಟಕಡ್ ಪಂಜಿಲೆನ ಬುಲೆವಣಿಗೆ ಕಮ್ಮಿ ಆತ್ಂಡ್.
ಪಂಜಿ ಸಾಂಕುನ ರೈತೆರ್ ನೆರ್ದ್ ಮಸ್ತ್ ಸಂಕಷ್ಟಡ್ ಉಲ್ಲೆರ್. ಪಂಜಿ ಮಾಸದ ಮಾರ್ಕೆಟ್ ಡ್ ಪಂಜಿಲೆನ ಸಂಖ್ಯೆ ಕಮ್ಮಿ ತೋಜೊಂದು ಉಂಡು. ಸಾಂಕುನ ಬಿಲೆ ಎಚ್ಚ ಆತ್ಂಡ್. ಇಂಚಾದ್ ಕುಡ್ಲ, ಪುತ್ತೂರ್, ಸುಳ್ಯ ಜಿಲ್ಲೆ ಇಡೀ ಪಂಜಿ ಮಾಸದ ಬಿಲೆ ಎಚ್ಚಾತ್ಂಡ್. ಕೆಜಿಗ್ 280 ರೂ. ಹೋಲ್ ಸೇಲ್ ಗ್ 250 ರೂ. ಬೊಕ್ಕ ಜೀವದ ಪಂಜಿಗ್ 30 ದ ಲೆಕ್ಕ ಉಂಡು.
ಕರಿನ 3 ವರ್ಷೊದಿಂಚ ಪಂಜಿ ಮಾಸದ ಬಿಲೆ ಎಚ್ಚಾಯಿರ್ನೆದಾವರ ಪಂಜಿ ಮಾಸ ಮಾರುನ ಅಂಗಡಿ ಮಾಲೀಕೆರ್, ಗ್ರಾಹಕೆರ್ ಸ್ಪಂದಿಸಾವೊಡು ಪಂದ್ ರೈತ ಮುಖಂಡೆರ್ ವೆಂಕಟೇಶ್ ಸುಳ್ಯ, ಆನಂದ ಈಶ್ವರಮಂಗಲ ಮೊಕುಲು ಪ್ರತಿಕೆಡ್ ತೆರಿಪಾದೆರ್.
ಮುಲ್ಕಿ ಸೀಮೆ ಅರಸು ಕಂಬುಲದ ಲೆಕ್ಕೊಡು ಮುಲ್ಕಿ ಅರಮನೆ ವೆಲ್ಫೇರ್ ಆಂಡ್ ಚಾರಿಟೇಬಲ್ ಟ್ರಸ್ಟ್ ದ ಮುತಾಲಿಕೆಡ್ ಜರ್ಸಿ ಟಿಶರ್ಟ್ ನ್ ಮುಲ್ಕಿ ಸೀಮೆ ಅರಸು ಎಂ. ದುಗ್ಗಣ್ಣ ಸಾವಂತೆರೆನ ಉಪಸ್ಥಿತಿಡ್ ಭಾರತ್ ಕೋ ಆಪರೇಟಿವ್ ಬ್ಯಾಂಕ್ ದ ಚೇರ್ ಮ್ಯಾನ್‌ ಸೂರ್ಯಕಾಂತ್ ಸುವರ್ಣ ಬುಡುಗಡೆ ಮಲ್ತೆರ್.
ಈ ಪೊರ್ತುಡು ಬೋಲಂಬಳ್ಳಿ ಶ್ರೀ ಪದ್ಮಾವತಿ ದೇವಿ ದೇವಲ್ಯದ ಧರ್ಮದರ್ಶಿಲು ಧರ್ಮರಾಜ್ ಜೈನ್, ಮುಲ್ಕಿ ಅರಮನೆತ್ತ ಆಶಾಲತಾ, ಎಂ ಗೌತಮ್ ಜೈನ್ ಪಾಲ್ ಪಡೆದಿತ್ತೆರ್.
ನನ ಸಿಮ್ ಕಾರ್ಡ್ ದೆತೊನುನ ಬೊಕ್ಕ ಮಾರಾಟ ಮಲ್ಪುನ ನಿಯಮಲು ಡಿ.1 ರ್ದ್ ಬದಲ್ ಆಪುಂಡು.
ಒಂಜೇ ಐಡಿಡ್ ಜನ ಸುಮಾರ್ ಸಿಮ್ ನ್ ದೆತೊನೊಂದು ಇತ್ತೆರ್. ಆಂಡ ಇತ್ತೆ ಒಂಜೇ ಐಡಿಡ್ ಸೀಮಿತ ಸಿಮ್ ನ್ ದೆತೊನೊಡಾಪುಂಡು. ಅಂಚೆನೆ ಸಿಮ್ ನ್ ಮಾರಾಟ ಮಲ್ಪುನ ವಿತರಕೆರ್ ತನ್ನ ಪೊಲೀಸ್ ಪರಿಶೀಲನೆ ಬೊಕ್ಕ ಬಯೋಮೆಟ್ರಿಕ್ ಪರಿಶೀಲನೆ ಮಲ್ಪೊಂಡು. ನೆನ್ ನಿರ್ಲಕ್ಷ್ಯ ಮಲ್ತ್ ದ್ ಸಿಮ್ ಮಾರಾಟ ಮಲ್ತ್ಂಡ ಅಕ್ಲೆಗ್ 10 ಲಕ್ಷ ರೂ. ಫೈನ್ ಬೊಕ್ಕ ಜೈಲ್ ಶಿಕ್ಷೆ ಕೊರ್ಪುಂಡು.
