ರಪಕ್ಕ ಸುದ್ದಿ Flash News

ತುಳು ಲಿಪಿ ಕಲ್ಪಾರ್ತಿಲೆಗ್ ತುಳುಲಿಪಿ ಪರೀಕ್ಷೆ

29/11/2020 ದಾನಿ ಕಲ್ಪಾದಿಲು ಆಯಿನ ಉಷಾ ಎನ್. ಪೂಜಾರಿ, ಉಜ್ವಲ ಎನ್. ಪೂಜಾರಿ, ರಾಜೇಶ್ ಪೂಜಾರಿ ತುಳುವೆ, ದೀಪಶ್ರೀ ಪೂಜಾರಿ, ವಿಜಯ್ ವಿಕ್ಕಿ ಪೂಜಾರಿ, ಮೆಕ್ಲೆನ ಉಮೇದ್ಗಾರಿಕೆಡ್ ತುಳು ಲಿಪಿ ಕಲ್ಪಾರ್ತಿಲೆಗ್ ತುಳುಲಿಪಿ ಪರೀಕ್ಷೆ ನಡತುಂಡು.

ಉಚಿತ ತುಳುಲಿಪಿ ಕಾರ್ಯಗಾರೊಡು ಪಾಲ್ ಪಡೆತಿನ ಮಲ್ಲಕುಲು, ಎಲ್ಯಕುಲು, ಜೋಕುಲು, ಪ್ರಾಯದಕುಲು, ಬಾರಿ ಪೊರ್ಲುಡೆ ಪರೀಕ್ಷೆ ಬರೆಯೆರ್, ತನ್ಕುಲೆನ ಉದ್ಯೋಗ, ಶಿಕ್ಷಣದ ನಡುಟು ಧರ್ಮರ್ಥವಾದ್ ತುಳುಲಿಪಿನ್ ಮಾತೆರ್ಲ ಕಲ್ಪೊಡು ಪನ್ಪಿನ ಉದ್ದೇಶಡು ತುಳುವಪ್ಪೆನ ಚಾಕಿರಿ ಮಲ್ತೊಂದು ಉಪ್ಪುನ ಕಲ್ಪಾದಿಲು ಉಷಾ ಎನ್. ಪೂಜಾರಿ, ರಾಜೇಶ್ ಪೂಜಾರಿ ತುಳುವೆ, ದೀಪಶ್ರೀ ಪೂಜಾರಿ, ತೂವೋನೆರೆ ಇತ್ತೆರ್.
ಕಲ್ಪರೆಗ್ ಪ್ರಾಯ ಅಡ್ಡ ಬರ್ಪುಜಿ ಪನರೆ ಸಾಕ್ಷಿಯಾದ್ ಸರ್ವೋತ್ತಮ್ ಪೂಜಾರಿ ಬೊಕ್ಕ ಜಯಂತಿ ಎಂ ಬಂಗೇರ ಟೀಚರ್ ಮೊಕುಲು ಪರೀಕ್ಷೆ ಬರೆಯೆರ್. ಬಾಲೆ ನಿವೇದ ದೇವೆರ್ನ ಸುಗಿಪುದೊಟ್ಟುಗು ಪರೀಕ್ಷೆ ಶುರುವಾವಡ್ ಪಂಡೆರ್.

ಮಲ್ಪೆ ಬಿರುವೆರೆ ಸಂಘದ ಪ್ರಧಾನ ಕಾರ್ಯದರ್ಶಿ ಸುನಿಲ್ ದಾಸ್ ಎಂ, ಬೊಕ್ಕ ಮಲ್ಪೆ ಬಿಲ್ಲವ ಸಂಘದ ಗುರ್ಕಾರ್ಲು ಆಶಾ ಜಗದೀಶ್ ಬಂಗೇರ ಬೊಕ್ಕ ಹರೀಶ್ ಪೂಜಾರಿ ಕೊಪ್ಪಲ್ ತೋಟ ಚಂದ್ರಶೇಖರ ಪೂಜಾರಿ ಈ ಲೇಸ್ ಡ್ ಪಾಲ್ ಪಡೆದಿತ್ತೆರ್.

ಅಟಿಲ್ದ ಬೇಲೆದಕ್ಲೆನ್ ತಾತ್ಸಾರ ಮಲ್ಪರೆ ಬಲ್ಲಿ: ಹರಿಕೃಷ್ಣ ಪುನರೂರು – ಪಾಕ ಪ್ರವೀಣೆ ಪಾವಂಜೆ ವೆಂಕಟೇಶ್ ಭಟ್ರೆಗ್ ಹೊಸ ಅಂಗಣದ ಮಾನಾದಿಗೆ

ಬ್ರಹ್ಮಕಲಶ, ನಾಗಮಂಡಲ ಇಂಚಿನ ಮಲ್ಲ ಮಲ್ಲ ಲೇಸ್ಡ್ ಸಾರ ಸಾರ ಜನತ್ತ ಅಟಿಲ್ ಮಲ್ತ್ ಪಾಡುನವು ಸುಲಭದ ಬೇಲೆ ಅತ್ತ್ ಅಟಿಲ್ ಮಲ್ಪುನವುಲಾ ಒಂಜಿ ವಿದ್ಯೆ. ಅಟಿಲ್ ಮಲ್ಪುನಕಲೆನ್ ಏರ್ಲ ತಾತ್ಸಾರ ಮಲ್ಪರೆ ಬಲ್ಲಿ. ಅಕಲೆನ್ ಸಮಾಜೊಡು ಗೊತ್ತು ಮಲ್ತ್‌ದ್ ಮಾನಾದಿಗೆ ಮಲ್ಪೊಡು ಪಂಡ್ ದ್ ಕನ್ನಡ ಸಾಹಿತ್ಯ ಪರಿಷತ್‌ದ ದುಂಬದು ಗುರ್ಕಾರ್ಲು ಧರ್ಮದರ್ಶಿ ಹರಿಕೃಷ್ಣ ಪುನರೂರು ಪಂಡೆರ್ .

ಹೊಸ ಅಂಗಣ ಪತ್ರಿಕೆರ್ದ್ ಮುಲ್ಕಿಡ್ ಶನಿಯಾರ ನಡತಿನ ಹೊಸ ಅಂಗಣ ಪತ್ರಿಕೆದ ಇಸೇಸ ಸಂಚಿಕೆ ಬುಡುಗಡೆ ಬೊಕ್ಕ ಕಟೀಲ್ದ ಬ್ರಹ್ಮಕಲಶೊಡು ಲಕ್ಷಗಟ್ಟಲೆ ಜನಕ್ಲೆಗ್ ಅಟಿಲ್ ಮಲ್ತ್ ಪಾರ್ದಿನ ಮಾಮಲ್ಲ ಪಾಕ ಪ್ರವೀಣೆ ಪಾವಂಜೆ ವೆಂಕಟೇಶ್ ಭಟ್ರೆನ ಮಾನಾದಿಗೆ ಲೇಸ್ಡ್ ಆರ್ ಗುರ್ಕಾರ್ಲೆನ ಕುರ್ಸುಡು ಕುಲ್ದು ಆರ್ ಪಾತೆರ್ಯೆರ್.

ಮಲ್ಲ ಬಿನ್ನೆರಾದ್ ಕೆನರಾ ಬ್ಯಾಂಕ್ದ ನಿವೃತ್ತ ಮ್ಯಾನೇಜರ್ ಸತೀಶ್ ಭಂಡಾರಿ, ಮುಲ್ಕಿ ನಗರ ಪಂಚಾಯ್ತಿದ   ಪದುಕೆರ್ ಪುತ್ತು ಬಾವ , ಬಪ್ಪನಾಡು ಯುವಕ ವೃಂದದ ಗುರ್ಕಾರ್ಲು ಕೃಷ್ಣ ಶೆಟ್ಟಿ ಕುಬೆವೂರು, ಮುಲ್ಕಿ ರೋಟರಿ ಕ್ಲಬ್ ಗುರ್ಕಾರ್ಲು ಅಶೋಕ್ ಕುಮಾರ್ ಶೆಟ್ಟಿ, ವಾಸು ಪೂಜಾರಿ ಚಿತ್ರಾಪು ಮೊಕುಲು ಮಾತಾ ಬತ್ತಿತ್ತೆರ್.

ನೆರ್ದ್ ದುಂಬು ಹೊಸ ಅಂಗಣ ಸತ್ತಿರದ ರುದ್ರ ನರಸಿಂಹ ದೇವರ್ನ ಪ್ರತಿಷ್ಟಾ ಪುಣ್ಣಮೆದ ವಿಶೇಷ ಸಂಚಿಕೆ ಬುಡುಗಡೆ ಮಲ್ತೆರ್.

ಅಟಿಲ್ದ ಮಲ್ಪ ಕಾಂಟ್ಯಾಕ್ಟರ್, ಕ್ರೀಡಾಪಟು,ಪಿಲಿ ನಲಿಕೆದ ತೀರ್ಪುಗಾರೆರ್ ಆತೇ ಅತ್ತಂದೆ ಕಲಾವಿದೆರಾಯಿನ ಪಾವಂಜೆ ವೆಂಕಟೇಶ್ ಭಟ್ರೆನ್ ಬಿನ್ನೆರ್ ಸಾಲ್ ಪೊದೆತ್ ದ್ ಪೂತ್ತ ಮಾಲೆ ಪಾರ್ದ್ ಮಾನದಿಗೆ ಮಲ್ತೆರ್.

ಹೊಸ ಅಂಗಣದ ಸಂಪಾದಕೆರ್ ಡಾ.ಹರಿಶ್ಚಂದ್ರ ಸಾಲ್ಯಾನ್ ಮಾತರೆನ್ಲಾ ಎದ್ಕೊಂಡೆರ್. ರಾಷ್ಟ್ರೀಯ ಬಿಲ್ಲವ ಮಹಾಮಂಡಲದ ಮಲ್ಲ
ಕಾರ್ಯಂತೆರ್ ವಿಜಯಕುಮಾರ್ ಕುಬೆವೂರು ಮಾನದಿಗೆ ಪತ್ರ ಓದುದು ಪಂಡೆರ್.ವಾಮನ ಕೋಟ್ಯಾನ್ ನಡಿಕುದ್ರು ಸೊಲ್ಮೆ ಸಂದೈತ ಮಲ್ತೆರ್.ರವಿಚಂದ್ರ ಲೇಸ್ ನಡಪಾದ್ ಕೊರಿಯೆರ್.