ರಪಕ್ಕ ಸುದ್ದಿ Flash News

Tulu Koota Mangalore – Ratnavarma Heggade Award 2022-23 announced ದೀಪಕ್ ಕೋಟ್ಯಾನ್, ಪರಮಾನಂದ ಸಾಲ್ಯಾನ್, ಅಕ್ಷರ ಶೆಟ್ಟಿ ಮೊಕ್ಲೆನ ನಾಟಕ ಬೂಕುಲೆಗ್ ರತ್ನವರ್ಮ ಹೆಗ್ಗಡೆ ಪ್ರಶಸ್ತಿ

ಕುಡ್ಲ: ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ| ಡಿ. ವೀರೆಂದ್ರ ಹೆಗ್ಗಡೆ ಮೆರೆನ ಮುತಾಲಿಕೆಡ್ ತುಳುಕೂಟ ಕುಡ್ಲ ಕೊರ್ಪಿನಂಚಿತ್ತಿನ 2022-23 ನೇ ವರ್ಷದ ರತ್ನವರ್ಮ ಹೆಗ್ಗಡೆ ಪ್ರಶಸ್ತಿ ಪ್ರಕಟನೆ ಮಲ್ತ್‌ದೆರ್.

ಸುರುತ್ತ ಇನಾಮುನ್ ದೀಪಕ್ ಎಸ್. ಕೋಟ್ಯಾನ್ ಕುತ್ತೆತ್ತೂರು (ಮಾಯದಪ್ಪೆ ಮಾಯಂದಾಲ್), ರಡ್ಡನೇ ಇನಾಮುನು ಪರಮಾನಂದ ಸಾಲಿಯಾನ್ ಸಸಿಹಿತ್ಲು (ಪುರ್ಸೆ ಬಿರ್ಸೆ ಶ್ರೀ ರಾಮೆ), ಮೂಜನೇ ಇನಾಮುನು ಅಕ್ಷರ ಆರ್. ಶೆಟ್ಟಿ ಪಡಂಗಡಿ (ಪೆರ್ಗ) ಮೊಕುಲು ಗೆಂದ್ ದೆರ್.

ಪೊಸ ನಾಟಕ ಕೃತಿಗ್ ಪ್ರತೀ ವರ್ಷ ಸುರುತ್ತ, ರಡ್ಡನೇ, ಮೂಜನೇ ಪ್ರಶಸ್ತಿನ್ ಡಾ| ಹೆಗ್ಗಡೆರ್ ಅರೆನ ಅಮ್ಮೆರ್ನ ನೆಂಪುಗಾದ್ ಕರಿನ 46 ವರ್ಷರ್ದ್ ಕೊರೊಂದು ಬರೊಂದುಲ್ಲೆರ್. ಪ್ರಶಸ್ತಿದ ಇನಾಮು ಕ್ರಮವಾದ್ 10 ಸಾರ ರೂಪಾಯಿ, 8 ಸಾರ ರೂಪಾಯಿ ಬೊಕ್ಕ 6 ಸಾರ ರೂಪಾಯಿ ತಿಕ್ಕುಂಡು. ಪತ್ರಕರ್ತೆರ್ ಮನೋಹರ್ ಪ್ರಸಾದ್, ತುಳು ಕನ್ನಡ ಸಾಹಿತಿ ಮುದ್ದು ಮೂಡುಬೆಳ್ಳೆ ಅಂಚನೆ ರಂಗಕರ್ಮಿ ವಿ.ಜಿ.ಪಾಲ್ ಮೊಕುಲೆನ ಸಮಿತಿ ಪ್ರಶಸ್ತಿಗ್ ಕೃತಿಲೆನ್ ಆಯ್ಕೆ ಮಲ್ತ್‌ದೆರ್.

ಎ.15 ಕ್ಕ್ ಪ್ರಶಸ್ತಿ ಪಟ್ಟುನ ಲೇಸ್: 
ಎ.15 ಕ್ಕ್ ಶ್ರೀ ಮಂಗಳಾದೇವಿ ದೇವಲ್ಯದ ಜಾಗೆಡ್ ತುಳುಕೂಟ ಆಚರಣೆ ಮಲ್ಪುನ ಬಿಸುಪರ್ಬ ಲೇಸ್‌ಡ್ ಬಿನ್ನೆರ್‍ನ ಸಮ್ಮುಖಡ್ ಪ್ರಶಸ್ತಿ ಕೊರಿಯರೆ ಉಲ್ಲೆರ್ ಪಂದ್ ಅಧ್ಯಕ್ಷೆರ್ ಬಿ.ದಾಮೋದರ ನಿಸರ್ಗ ಬೊಕ್ಕ ಪ್ರಧಾನ ಕಾರ್ಯದರ್ಶಿ ವರ್ಕಾಡಿ ರವಿ ಅಲೆವೂರು ಪ್ರಕಟನೆಡ್ ತೆರಿಪಾದೆರ್.

Tulu Koota Mangalore — Ratnavarma Heggade Award 2022-23 announced

The Ratnavarma Heggade Award is given by Tulu Koota Mangalore under the leadership of Veerendra Heggade, Dharmasthala . The award is given to new drama work written in the course of the year. The award has been given from the past 46 years.

The first prize was given to Deepak S Kotian, Kathetooru ( Mayadappe Mayandalu) ; the second prize goes to Paramananda Salian , Sasihitlu ( Purshe Birshe Sri Rame ) and the third place by Akshar R Shetty ( Perga). The award presentation will be on April 15 th.

Mangalore: Geetha Lakshmish’s “Pergada Siri ” poetry compilation released ಗೀತಾ ಲಕ್ಷ್ಮೀಶ್ ಬರೆತಿನ “ಪೆರ್ಗದ ಸಿರಿ” ಕಬಿತೆ ಬುಡುಗಡೆ ಲೇಸ್

ಕುಡ್ಲ: ತುಳು ಬಾಷೆಡ್ ಸಾಹಿತ್ಯ ಕೃಷಿ ಮಲ್ತಿನ ಕೆದಂಬಾಡಿ ಜತ್ತಪ್ಪ ರೈ, ಅಮೃತ ಸೋಮೇಶ್ವರ, ಡಾ.ಬಿ.ಎ.ವಿವೇಕ ರೈ ಮೊಕ್ಲೆನಂಚಿತ್ತಿನ ಪೆರಿಯ ಸಾಹಿತಿಲು ಬರೆಪುನೆರ್ದ್ ಪಿರ ಒರಿವೊಂದಿಪ್ಪುನ ಪೊರ್ತುಡು ಗೀತಾ ಲಕ್ಷ್ಮೀಶ ಮೆರೆನಂಚಿತ್ತಿನ ಕಿರಿಯೆರ್ ಸಾಧನೆ ಮಲ್ತೊಂದಿಪ್ಪುನೆನ್ ತೂನಗ ಬರೆಪುನ ಕಲಟ್ಟ್ ಪೊಸ ತೆಗ್ ಲ್ ಪುಟ್ಟೊಂದುಂಡು ಪನ್ಪಿನವು ಪೆರ್ಮೆದ ಸಂಗತಿ ಪಂದ್ ತುಳು ಜನಪದ ವಿದ್ವಾಂಸೆರ್ ಡಾ.ಗಣೇಶ್ ಅಮೀನ್ ಸಂಕಮಾರ್ ಪಂಡೆರ್.

ಆರ್ ಕುಡ್ಲದ ಕೆನರಾ ಕಾಲೇಜಿದ ಚಾವಡಿಡ್ ಐತಾರ ನಡತಿನ ಲೇಸ್ ಡ್ ಗೀತಾ ಲಕ್ಷ್ಮೀಶ್ ಮೇರ್ ತುಳು ಬೊಕ್ಕ ಕನ್ನಡ ಲಿಪಿಟ್ಟ್ ಬರೆತಿನ “ಪೆರ್ಗದ ಸಿರಿ” ಕಬಿತೆದ ಗೊಂಚಿಲ್ ನ್ ಬುಡುಗಡೆ ಮಲ್ತ್‌ದ್ ಪಾತೆರಿಯೆರ್.

ತುಳು ಲಿಪಿ ಕಲ್ತ್‌ದ್, ಇಷ್ಟ ಇತ್ತಿನಕ್ಲೆಗ್ ಆ ಲಿಪಿನ್ ಕಲ್ಪಾವೊಂದು ತಾನ್ ಬರೆಯಿನ ಕಬಿತೆನ್ ತುಳು ಅಂಚನೆ ಕನ್ನಡ ಲಿಪಿಟ್ಟ್ ಸಾಹಿತಿ ಗೀತಾ ಲಕ್ಷ್ಮೀಶ್ ಪ್ರಕಟನೆ ಮಲ್ತ್‌ದೆರ್. ಉಂದೆತ್ತ ಪ್ರಯೋಜನ ದಾದ ಪಂಡ ಒಂಜಿ ಕಡೆ ತುಳು ಕಲ್ಪರೆ ಸುಲಭ ಆಂಡ ನನೊಂಜಿ ಕಡೆಟ್ಟ್ ಕಬಿತೆನ್ ತುಳುಟ್ ಅರ್ಥ ಮಲ್ತೊನರೆ ಸುಲಭ ಆಪುಂಡು ಪಂದ್ ಪಂಡೆರ್.

ಈ ಕಬಿತೆಡ್ ಬೇಜಾರ್, ನಲಿಕೆ, ಬೇನೆ, ತೆಲಿಕೆ, ಮಣ್ಣ್‌ದ ವಾಸನೆ, ಕುಟುಮದ ಒಡನಾಟ, ಅವಿಭಕ್ತ ಕುಟುಮದ ವಿಚಾರದ ಬಗೆಟ್ ಚಿತ್ರಣ ಉಂಡು. 20 ಪನಿ ಕಬಿತೆಲು ಉಂಡು ಪಂದ್ ಡಾ.ಗಣೇಶ ಅಮೀನ್ ಸಂಕಮಾರ್ ಪಂಡೆರ್.

ಈ ಪೊರ್ತುಡು ಯುನಿವರ್ಸಿಟಿ ಕಾಲೇಜಿದ ಕನ್ನಡ ವಿಭಾಗದ ಮುಖ್ಯಸ್ಥೆರ್ ಡಾ.ಮಾಧವ ಎಂ.ಕೆ, “ತುಳುವೆರೆ ಕಲ” ಕೂಟನ್ ಉದಿಪನ ಮಲ್ತೆರ್. ಎಂಆರ್‌ಪಿಎಲ್‌ದ ಪ್ರಬಂಧಕಿ ವೀಣಾ ಟಿ.ಶೆಟ್ಟಿ ಲೇಸ್‌ಗ್ ಚಾಲನೆ ಕೊರಿಯೆರ್. ಮಸ್ತ್ ಜನ ಬಿನ್ನೆರ್ ಲೇಸ್‌ಡ್ ಪಾಲ್ ಪಡೆದಿತ್ತೆರ್.

Mangalore: Geetha Lakshmish’s “Pergada Siri ” poetry compilation released

Mangalore: One of the budding Tulu litterateur Geeta Lakshmish is now a name to reckon with; in the field of Tulu literature. At a program organised at Canara college Mangalore a poetry work written by her in Tulu and kannada script “Pergada Siri” was released. Speaking on the occasion she said that it was possible to understand Tulu language better as it was scripted in both kannada and Tulu.

The poetry compilation of 20 poems included poetry depicting a host of emotions and family culture of Tulunadu. Dr Madhav MK head of the department of Kannada at University college inaugrated “Tuluvara Kala” association.Dr Ganesh Amin Vidwan in Tulu folk literature introduced the work to the gathering.

ಮಾ.19 ಗ್ ಹಳೆಯಂಗಡಿಡ್ ಬೇತೆ ಬೇತೆ ಉತ್ಪನ್ನದ ಪ್ರದರ್ಶನ ಬೊಕ್ಕ ಮಾರಾಟ ಮೇಳ

ಹಳೆಯಂಗಡಿ: ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋಟ್ಸ್ ಕ್ಲಬ್ (ರಿ.) ಮೊಕ್ಲೆನ ಪೊಂಜೋವುಲೆನ ಕಾರ್ಯಕಾರಿ ಸಮಿತಿದ ಮುತಾಲಿಕೆಡ್ ವಿಶ್ವ ಪೊಂಜೋವುಲೆನ ದಿನಾಚರಣೆದ ಲೆಕ್ಕೊಡು ಬೇತೆ ಬೇತೆ ಉತ್ಪನ್ನದ ಪ್ರದರ್ಶನ ಬೊಕ್ಕ ಮಾರಾಟ ಮೇಳ ಮಾ.19 ತಾರೀಕ್ ಐತಾರದಾನಿ ಕಾಂಡೆ 9-5 ಗಂಟೆ ಮುಟ್ಟ ತೋಕೂರು ಸ್ಪೋಟ್ಸ್ ಕ್ಲಬ್ ಚಾವಡಿಡ್ ನಡಪರೆ ಉಂಡು.

ಭಾರತ ಸರ್ಕಾರ ಯುವ ಕಾರ್ಯ ಬೊಕ್ಕ ಕ್ರೀಡಾ ಸಚಿವಾಲಯ ನೆಹರು ಯುವ ಕೇಂದ್ರ, ಕುಡ್ಲ ಯುವ ಸಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆ, ಕುಡ್ಲ ಜಿಲ್ಲಾಡಳಿತ, ದ.ಕ.ಜಿಲ್ಲಾ ಪಂಚಾಯತ್ ಗ್ರಾಮ ಪಂಚಾಯತ್ ಪಡುಪಣಂಬೂರು ತಾಲೂಕು ಬೊಕ್ಕ ಜಿಲ್ಲಾ ಯುವ ಜನ ಒಕ್ಕೂಟ, ದ.ಕ.ಜಿಲ್ಲೆ ಮೊಕ್ಲೆನ ಮಾರ್ಗದರ್ಶನಡ್ ಈ ಲೇಸ್ ನಡಪರೆ ಉಂಡು.

ಕುಡ್ಲ: ಕೆಂಜಾರು ಶ್ರೀ ರಾಮಾಂಜನೇಯ ದೇವಲ್ಯಡ್ ಪುನಃ ಪ್ರತಿಷ್ಠೆ ಅಂಚನೆ ಬ್ರಹ್ಮಕಲಶಾಭಿಷೇಕ

ಕುಡ್ಲ: ಪೇಜಾವರ ಮಾಗಣೆದ ಕೆಂಜಾರು ಶ್ರೀ ರಾಮಾಂಜನೇಯ ದೇವಲ್ಯಡ್ ಶ್ರೀ ರಾಮಾಂಜನೇಯ ದೇವೆರ್‍ನ ಪುನಃ ಪ್ರತಿಷ್ಠೆ ಅಂಚನೆ ಬ್ರಹ್ಮಕಲಶಾಭಿಷೇಕ ಮಾ.27-30 ಮುಟ್ಟ ನಡಪರೆ ಉಂಡು.

ಮಾ.30 ಕ್ಕ್ ಪುಲ್ಯಕಾಂಡೆ 6.43 ತ್ತ ಮೀನ ಲಗ್ನ ಮುಹೂರ್ತಡ್ ರಾಮಾಂಜನೇಯ ದೇವೆರೆಗ್ ಬ್ರಹ್ಮಕಲಶಾಭಿಷೇಕ ನಡಪರೆ ಉಂಡು. ಈ ಲೇಸ್‌ಗ್ ಮಾತ ಭಕ್ತೆರ್ ಬತ್ತ್‌ದ್ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ದೇವಲ್ಯದ ಆಡಳಿತ ಸಮಿತಿದ ಸರ್ವ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

Tulu teaching class started in Mumbai ಬೊಂಬಾಯಿಡ್ ಸುರುವಾಂಡ್ ತುಳು ಕಲ್ಪಾವುನ ಕಜ್ಜಕೊಟ್ಯ

ಮಾತೆರೆಗ್ಲಾ ಅಪ್ಪೆ ಬಾಷೆಡ್ ಒಂಜಿ ಪ್ರೀತಿ ಉಪ್ಪುನ ಸ್ವಾಭಾವಿಕ. ಅಂಚೆನೆ ನಮ್ಮ ತುಳು ಪಾತೆರುನಕುಲ್ಲಾ ನೆಡ್ದ್ ಪಿದಾಯಿಜ್ಜೆರ್. ನಮ್ಮ ಕೂಟದ ಬಲನೇ ತುಳು, ತುಳು ಇಜ್ಜಿಡ ಬಾವೆ ದೈದಿನ ಪೇರ್ದ ಲೆಕ್ಕ. ನಮ್ಮ ಕರ್ನಾಟಕದ ರಾಜ್ಯ ಬಾಷೆ ಕನ್ನಡ ಆಯಿನೆಟ್ಟಾತ್ರ ನಮ್ಮ ತುಳು ಬಾಷೆದ ಬೆಳವನಿಗೆಗ್ ಮಲ್ಲ ಪೆಟ್ಟ್ ಬೂರ್ದುಂಡು. ಆಂಡ ತುಳು ಪಾತೆರುನಕಲೆಗ್ ಈ ಪಂಚದ್ರಾವಿಡ ಬಾಷೆಡ್ ಒಂಜಾಯಿನ, ಆದಿ ಕಾಲೊಡ್ದಿಂಚಿ ಪಾತೆರೊಂದಿತ್ತಿನ ಈ ಬಾಷೆದ ಮಿತ್ತ್ ಬಾರಿ ಪ್ರೀತಿಲ ಅಭಿಮಾನಲಾ ಉಂಡು. ಒಂಜಿ ಸಮಯೊಡು ಈ ತುಳು ಬಾಷೆಗ್ ಲಿಪಿ ಉಂಡು ಇಜ್ಜಿ ಪನ್ಪಿನ ಸಂಶಯೊಡಿತ್ತ್ಂಡ್. ಆಂಡ ಇಂಚೊಗು 20-25 ವರ್ಷೊಡ್ದಿಂಚಿ, ಈ ಲಿಪಿನ್ ನಾಡ್ ಪತ್ ದ್ ಐಕ್ ಸರಿಯಾಯಿನ ರೂಪಲ ಕೊರ್ತೆರ್ ಪನರೆ ಖುಷಿಯಾಪುಂಡು.

ಈ ಕೆಲಸ ಮಲ್ದಿನೆತ್ತ ಮರ್ಯಾದಿ ಮಸ್ತ್ ಜನೊಕ್ಲೆಗ್ ಸಂದುಂಡು. ಆಂಡಲಾ ನೆಟ್ಟ್ ಎದುರುದ ಪಂತೆಡ್ ಉಂತುದಿತ್ತಿನ ಕವಿ ಪುವೆಂಪು(ಪುಂಡೂರು ವೆಂಕಟರಾಜ್ ಪುಣಿಂಚತ್ತಾಯ). ಮೇರೆಗ್ ಸಂದುಂಡು. ಪನಿಲೆಕ ತುಳುತ್ತ ಪ್ರೀತಿಡ್, ತುಳು ನಾಡ್ ಡ್ದ್ ಪಿದಯಿತ್ತಿನ  ತುಳುವೆರ್ಲಾ ಸೇರ್ದ್ ಈ ಬಾಷೆಗ್ ನಮ್ಮ ರಾಜ್ಯೊಡು ನೆಕ್ಕ್ ಆಧಿಕೃತ ಬಾಷೆ ಆದ್ ಮಾನಾದಿಗೆ ತಿಕ್ಕೊಡು ಅಂಚೆನೇ ಭಾರತ ಸಂವಿಧಾನದ 8ನೇ ಪರಿಚ್ಛೇದೊಡು ಸೇರೊಡುಂದು ಒತ್ತಾಯೊಡು ಕೆಲಸ ಮಲ್ತೊಂದುಲ್ಲೆರ್.  ಬೊಂಬಾಯಿಡ್ ತುಳು ಲಿಪಿ ಕಲ್ಪಾಯರೆ ಮಸ್ತ್ ಜನೊಕ್ಲು ಪ್ರಯತ್ನ ಮಲ್ತೊಂದುಲ್ಲೆರ್. ಆಂಡ ಇದಮುಟ್ಟ ಓಲ್ಲ ಮಂಜೆಟ್ಟಿ ಎತ್ತುಜಿ. ಆಂಡ ಈ ಸರ್ತಿ ನಮ್ಮ ಬಂಟರ ಸಂಘದ ಅಂಧೇರಿ ಬಾಂದ್ರದ ಸಮಿತಿಡ್ದ್, ಐತ್ತ ಕಾರ್ಯಾಧ್ಯಕ್ಷೆರ್ ರವೀಂದ್ರ ಶೆಟ್ರೆನ ಮುಂದಾಲುತ್ವೊಡು, ತುಳು ಲಿಪಿ ಕಲ್ದಿನ ಸಮಿತಿದ ಸಲಹೆಗಾರೆರಾಯಿನ ಡಿ ಕೆ ಶೆಟ್ರೆನ ಒಟ್ಟುಗು ಸೇರ್ದ್ ಕರಿನ ಸನಿಯಾರ ಮಾರ್ಚಿ 4 ಗ್ ತುಳು ಲಿಪಿ ಕಲ್ಪಾವುನ ಕಜ್ಜಕೊಟ್ಯಗ್ ಚಾಲನೆ ಕೊರ್ತೆರ್.

ಈ ಕಜ್ಜೊಗು ಮಲ್ಲ ಬಿನ್ನೆರಾದ್ ನಮ್ಮ ಹಿರಿಯೆರಾಯಿನ, ಬಂಟರ ಸಂಘದ ಮಾಜೀ ಅಧ್ಯಕ್ಷೆರ್ ನ್ಯಾಯವಾದಿ R C Shetty, ಉಪಾಧ್ಯಕ್ಷೆರ್ ರತ್ನಾಕರ್ ಮುಂಡ್ಕೂರ್, ಬಂಟರವಾಣಿದ ಕಾರ್ಯಾಧ್ಯಕ್ಷೆರ್ ರವೀಂದ್ರನಾಥ್ ಭಂಡಾರ್ಲು, ಮಹಿಳಾ ವಿಭಾಗದ ಕೋಶಾಧಿಕಾರಿಲು ಸುಜಾತ ಗುಣಪಾಲ, ಬಂಟರ ಸಂಘ ಬೊಂಬಾಯಿ, ಸಮಿತಿ ಸದಸ್ಯೆರ್ ಪ್ರಶಾಂತಿ ದಿವಾಕರ್, ಬೊಂಬಾಯಿ ವಿಶ್ವವಿದ್ಯಾಲಯದ ಪೆರಿಯ ಕಲ್ಪಾದಿ ಡಾ. ಪೂರ್ಣಿಮಾ ಸುಧಾಕರ್, ನಮ್ಮ ಸಮಿತಿದ ಸಂಚಾಲಕೆರಾಯಿನ ನ್ಯಾಯವಾದಿ ರಾಜಶೇಖರ್, ಉಪಾಧ್ಯಕ್ಷೆರ್ ಯಶವಂತ, ಕಾರ್ಯದರ್ಶಿ ಪ್ರಸಾದ್, ಕೋಶಾಧಿಕಾರಿ ಕರುಣಾಕರ್, ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ವಜ್ರಾಕ್ಷಿ, ಮಹಿಳಾ ವಿಭಾಗದ ಸಾಂಸ್ಕೃತಿಕ ಕಾರ್ಯಾಧ್ಯಕ್ಷೆರ್ ಅನಿತ ಉದಯ, ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ಶೋಭಾ ಅಮರ್ ಅಂಚನೆ ಸಮಿತಿದ ಮಾತಾ ಸದಸ್ಯೆರ್ ಹಾಜರಿತ್ತೆರ್.

✍️ವರದಿ : ರವೀಂದ್ರ ಶೆಟ್ಟಿ,
ಕಾರ್ಯಾಧ್ಯಕ್ಷೆರ್
ಅಂಧೇರಿ ಬಾಂದ್ರಾ ಸಮಿತಿ.