ಬೊಲ್ತೆರ್: ರಾಜ್ಯಡ್ 211 ಇನ್ಸ್ ಪೆಕ್ಟರ್ ನಕ್ಲೆನ್ ರಾಜ್ಯ ಸರಕಾರ ವರ್ಗಾವಣೆ ಮಲ್ತ್ ಆದೇಶ ಕೊರ್ತುಂಡು.
ಬೊಲ್ತೇರ್ ಪೊಲೀಸ್ ಠಾಣೆದ ಸರ್ಕಲ್ ಇನ್ಸ್ ಪೆಕ್ಟರ್ ಆದ್ ನಾಗೇಶ್ ಕದ್ರಿ ಅರೆನ್ ವರ್ಗಾವಣೆ ಮಲ್ತ್ ಆದೇಶ ಕೊರ್ತೆರ್.
ಕೊಡಗು ಜಿಲ್ಲೆಡ್ ಡಿ.ಸಿ.ಆರ್.ಬಿ ಡ್ ಬೆಲೆ ಮಲ್ತೊಂದಿತ್ತಿನ ನಾಗೇಶ್ ಕದ್ರಿ ಇತ್ತೆ ಶಿವಕುಮಾರ್ ಬೆಲೆ ಮಲ್ತೊಂದಿತ್ತಿನ ಜಾಗೆಗ್ ವರ್ಗಾವಣೆ ಆತೆರ್.
ಸಂತೆಕಟ್ಟೆ: ಕರ್ನಾಟಕ ವಿಧಾನ ಸಭಾಧ್ಯಕ್ಷೆರ್ ಯು.ಟಿ ಖಾದರ್ ಮೆರೆಗ್ ಬೆಳ್ತಂಗಡಿ ಕಾಂಗ್ರೆಸ್ ಪಕ್ಷದ ವತಿರ್ದ್ ಸ್ವಾಗತ ಮಲ್ತೆರ್. ಧರ್ಮಸ್ಥಳದ ಕಾರ್ಯಕ್ರಮಗ್ ಪೋಪಿನ ಪೊರ್ತುಡು ಯು.ಟಿ ಖಾದರ್ ಸಂತೆಕಟ್ಟೆದ ಅಯ್ಯಪ್ಪ ಮಂದಿರದ ಕೈತಲ್ ಕಾಂಗ್ರೆಸ್ದ ಮುಖಂಡೆರ್ ಸ್ವಾಗತ್ ಮಲ್ತ್ ಅಭಿನಂದನೆ ಮಲ್ತೆರ್.
ಈ ಪೊರ್ತುಡು ಬೆಳ್ತಂಗಡಿ ಬ್ಲಾಕ್ ಕಾಂಗ್ರೆಸ್ ದ ನಗರಾಧ್ಯಕ್ಷೆರ್ ಸತೀಶ್ ಕಾಶಿಪಟ್ಣ, ಗ್ರಾಮೀಣ ಅಧ್ಯಕ್ಷೆರ್ ನಾಗೇಶ್ ಕುಮಾರ್ ಗೌಡ, ಕಾಂಗ್ರೆಸ್ದ ನಾಯಕೆರಾಯಿನ ಧರಣೇಂದ್ರ ಕುಮಾರ್, ಯು.ಕೆ ಹನೀಫ್, ಹಸನಬ್ಬ ಚಾರ್ಮಾಡಿ, ಪ್ರವೀಣ್ ಫೆರ್ನಾಂಡಿಸ್, ರಮಾನಂದ ಸಾಲಿಯಾನ್, ಧನಂಜಯ್ ರಾವ್, ತ್ರಿವಿಕ್ರಮ್, ಸಿರಾಜ್, ತನುಷ್ ಶೆಟ್ಟಿ, ತೇಜಸ್, ರಾಜೇಶ್ ಸವಣಾಲ್, ಯತೀಶ್ ಯಕ್ಷ, ನವೀನ್ ಗೌಡ, ಅಯಾಜ್, ರಜತ್, ಯಶೋಧರ ಚಾರ್ಮಾಡಿ , ಮನೋಹರ್ ಇಳಂತಿಲ ಇತ್ತೆರ್.
ಉಜಿರೆ ಗ್ರಾ.ಪಂ ದ 4 ನೇ ವಾರ್ಡ್ ದ ಉಪಚುನಾವಣೆಡ್ ಕಾಂಗ್ರೆಸ್ ಬೆಂಬಲಿತ ಅನಿಲ್ ಡಿಸೋಜ 491 ವೋಟ್ ಡ್ ಗೆಂದ್ ದೆರ್.
ಬಿಜೆಪಿ ಬೆಂಬಿಲತ ರಮೇಶ್ ಶೆಟ್ಟಿ 162 ವೋಟ್ ಪಡೆಯೊಂದೆರ್. ಒಟ್ಟು 1174 ಡ್ 683 ಜನ ವೋಟ್ ಪಾಡ್ ದೆರ್.
ಬೊಲ್ತೆರ್: ಕುದುರೆಮುಖ ವನ್ಯಜೀವಿ ವಲಯಡ್ ಇಪ್ಪುನ ಮಲ್ಲ ಮಲ್ಲ ಜಲಪಾತಲೆನ್ ತೂವರೆ ಪ್ರವಾಸಿಗೆರ್ ಪೋಪಿನೆನ್ ಸರ್ಕಾರ ನಿಷೇಧ ಮಲ್ತ್ ದ್ಂಡ್.
ಈ ಆದೇಶ ಕೂಡ್ಲೆ ಜಾರಿಗೆ ಬೈದ್ಂಡ್.
ಜಲಪಾತದ ಪೊಗ್ಗು ಬಾಕಿಲ್ಡೇ ಎಚ್ಚೆರ್ಗೆದ ಬೋರ್ಡ್ ಪಾಡರೆ ಉಪ ಅರಣ್ಯ ಸಂರಕ್ಷಣಾಧಿಕಾರಿಲು ಇಲಾಖೆದ ಅಧಿಕಾರಿಲೆಗ್ ಸೂಚನೆ ಕೊರ್ತೆರ್. ಬೊಕ್ಕ ಆ ಜಾಗೆಡ್ ಪಾರ ಕಾಪರೆ ಜನ ದೀದ್ ಪ್ರವಾಸಿಗೆರ್ ಪೋವಂದಿಲೆಕ ಕ್ರಮ ದೆತೊನಿಯೆರೆ ಆದೇಶ ಕೊರ್ತೆರ್.
ಬೊಲ್ತೇರ್ (ಬೆಳ್ತಂಗಡಿ) ಬ್ಲಾಕ್ ಕಾಂಗ್ರೆಸ್ ಪಕ್ಷದ ನಗರ ಬೊಕ್ಕ ಗ್ರಾಮೀಣ ಸಮಿತಿದ ಅಧ್ಯಕ್ಷೆರೆಗ್ ಗೇಟ್ ಪಾಸ್ ಕೊರ್ದು ಪೊಸ ಅಧ್ಯಕ್ಷೆರನ್ ಕೆಪಿಸಿಸಿ ದ ಅಧ್ಯಕ್ಷೆರ್ ಡಿ.ಕೆ ಶಿವಕುಮಾರ್ ನೇಮಕ ಮಲ್ತ್ ದ್ ಆದೇಶ ಕೊರ್ತೆರ್.
ಬೊಲ್ತೇರ್ ನಗರ ಸಮಿತಿದ ಅಧ್ಯಕ್ಷೆರ್ ಶೈಲೇಶ್ ಕುಮಾರ್ ಅರೆನ್ ಬದಲ್ಗ್ ಕಾಶಿಪಟ್ಣ ಗ್ರಾ.ಪಂ ಮಾಜಿ ಅಧ್ಯಕ್ಷೆರ್, ಪೆರಾಡಿ ಸೇವಾ ಸಹಕಾರಿ ಬ್ಯಾಂಕ್ದ ಅಧ್ಯಕ್ಷೆರ್ ಸತೀಶ್ ಕೆ ಕಾಶಿಪಟ್ಣ ಮೆರೆನ್ ಆಯ್ಕೆ ಮಲ್ತ್ ದೆರ್.
ಗ್ರಾಮೀಣ ಸಮಿತಿದ ಅಧ್ಯಕ್ಷೆರ್ ರಂಜನ್ ಜಿ ಗೌಡ ಅರೆನ ಬದಲ್ಗ್ ಲಾಯಿಲ ಬಯೋಫ್ಯುಯಲ್ ಎನರ್ಜಿ ಸೌಹಾರ್ದ ಕೋ-ಆಪರೇಟಿವ್ ಸೊಸೈಟಿ(ಲಿ) ಅಧ್ಯಕ್ಷೆರ್, ಶ್ರೀ ಸ್ವಾಮಿಪ್ರಸಾದ್ ಅಸೋಸಿಯೆಟ್ಸ್ ದ ಮಾಲಕೆರ್ ಕೆ.ಎಂ ನಾಗೇಶ್ ಕುಮಾರ್ ಗೌಡ ಮೆರೆನ್ ಕೆಪಿಸಿಸಿ ನೇಮಕ ಮಲ್ತ್ ದ್ಂಡ್.
ತುಳುನಾಡ್ ದ ದೇವ ಕಲೆ ಆಯಿನ ಯಕ್ಷಗಾನದ ಚಿಕ್ಕ ಮೇಳಗ್ ಒಂಜಿ ಶಿಸ್ತ್ ದ ಚೌಕಟ್ಟ್ ಪಾಡುನ ನಿಲೆಟ್ಟ್ ಇಂಚೊಗು ಬಂಟ್ವಾಳ ನಡತಿನ ತುರ್ತು ಸಭೆಟ್ಟ್
ತೆಂಕುತಿಟ್ಟು ಚಿಕ್ಕ ಮೇಳದ ಒಕ್ಕೂಟ ರಚನೆ ಆತ್ಂಡ್.
ಉಂದೆತ್ತ ಸಂಚಾಲಕೆರಾದ್ ಸರಪಾಡಿ ಅಶೋಕ್ ಶೆಟ್ರ್, ಗೌರವ ಸಲಹೆಗಾರೆರಾದ್ ದಿವಾಕರ ದಾಸ್ ಕಾವಳಕಟ್ಟೆ ಬೊಕ್ಕ ಕುಮಾರ್ ಮಾಲೇಮಾರ್ ಅಂಚನೆ ಕಾರ್ಯದರ್ಶಿಲಾ ದ್ ಕಡಬ ದಿನೇಶ್ ರೈ ಅಜತ್ ಬೈದೆರ್.
ಯಕ್ಷಗಾನದ ಪುದರ್ಡ್ ಮರಿಯಲಡ್ ಪಿದಡುನಂಚಿತ್ತಿನ ಚಿಕ್ಕಮೇಳಲು ತುಳುನಾಡ್ಡ್ ಮಸ್ತ್ ಉಲ್ಲ. ಆಂಡ ಕೆಲವು ಕಲಾವಿದೆರ್ ಅತ್ತಂದಿನಕುಲು ಚಿಕ್ಕಮೇಳ ಮಲ್ತ್ದ್ ಕಲೆಕ್ಕ್ ಅಪಚಾರ ಆಪಿಲೆಕ್ಕ ಯಕ್ಷಗಾನ ಪ್ರದರ್ಶನ ಮಲ್ತಿನವು ಹಿಂದೂ ಸಂಘಟನೆದ ಮುಖಂಡೆರೆಗ್ ಬೊಕ್ಕ ಯಕ್ಷಗಾನದ ಅಭಿಮಾನಿಲೆಗ್ ಬೇಜಾರ್ ಆದ್ ಆಕ್ರೋಶಗ್ ಕಾರಣ ಆದಿತ್ತ್ಂಡ್. ಈ ನಿಲೆಟ್ ಚಿಕ್ಕಮೇಳಲೆನ್ ನಿಷೇಧ ಮಲ್ಪೊಡೆ ಪನ್ಪಿನ ವ್ಯವಸ್ಥೆಗ್ ಕೆಲವೆರ್ ಪ್ರಯತ್ನ ಮಲ್ತೊಂದಿಪ್ಪುನ ಪೊರ್ತುಡು, ಚಿಕ್ಕಮೇಳ ಅಗತ್ಯ ಬೋಡು. ಅವು ಒಂಜಾತ್ ಕಲಾವಿದೆರೆಗ್ ನುಪ್ಪುದ ಪಡಿ ಕೊರ್ಪುಂಡು. ಚಿಕ್ಕಮೇಳನ್ ನಂಬುದು ಮಸ್ತ್ ಕಲಾವಿದೆರ್ ಜೀವನ ಮಲ್ತೊಂದುಲ್ಲೆರ್ ಪನ್ಪಿನ ನಿಲೆಟ್ ಅವೆನ್ ಒರಿಪಾವುನಂಚಿನ ಪ್ರಯತ್ನಗ್ ತುರ್ತು ಸಭೆನ್ ಸರಪಾಡಿ ಅಶೋಕ್ ಶೆಟ್ಟಿ ಮೆರೆನ ಮುತಾಲಿಕೆಡ್ ಬೊಕ್ಕ ತೆಂಕುತಿಟ್ಟು ಚಿಕ್ಕಮೇಳದ ಮಾತ ಸಂಚಾಲೆಕೆರ್ ಪಾಲ್ ದೆತೊಂದು ಅಯಿತ್ತ ಬಗೆಟ್ ಒಂಜಿ ಚರ್ಚೆ ಮಲ್ಪೊಡು.
ಈ ಸಮಾಲೋಚನೆ ಮಲ್ತ್ದ್ ಚಿಕ್ಕಮೇಳಗ್ಲ ರೂಪುರೇಷೆ ತಯಾರ್ ಮಲ್ಪೊಡು. ಅಯಿಕ್ಕ್ ಒಂಜಾತ್ ನಿಬಂಧನೆಲೆನ್ ಮಲ್ತ್ದ್ ಗೌರವಯುತವಾದ್ ಚಿಕ್ಕಮೇಳಲು ತಿರ್ಗಾಟ ಮಲ್ಪೊಡು ಪನ್ಪಿನ ನಿಲೆಟ್ ಜುಲೈ 19 ಗ್ ಬಿ.ಸಿ ರೋಡ್ದ ಸ್ಪರ್ಶ ಕಲಾ ಮಂದಿರಡ್ ಸಭೆ ನಡತ್ಂಡ್. ಈ ಸಭೆಟ್ ಸುಮಾರ್ 25 ನೆರ್ದ್ ಎಚ್ಚದ ತೆಂಕುತಿಟ್ಟು ಚಿಕ್ಕಮೇಳದ ಸಂಚಾಲೆಕೆರ್ ಬೊಕ್ಕ ಕಲಾವಿದೆರ್ ಪಾಲ್ ಪಡೆದ್ ಇತ್ತೆರ್.
ಈ ಸಭೆಟ್ಟ್ ಚಿಕ್ಕಮೇಳ ಮಲ್ಪುನಗ ಎಂಚ ಇಪ್ಪೊಡು, ವಾ ವ್ಯಾಪ್ತಿಡ್ ತಿರ್ಗಾಟ ಮಲ್ಪುನಗ ಕಲಾವಿದೆರೆಡ ದಾದ ಪೂರ ಇಪ್ಪೊಡು ಪನ್ಪಿನ ವಿಷಯಡ್ ಚರ್ಚೆ ಆಂಡ್. ಉಂದು ತುರ್ತು ಸಭೆ ಆತಿನೆಡ್ದಾವರ ಎಚ್ಚದ ಚಿಕ್ಕಮೇಳದ ಯಜಮಾನೆರೆಗ್ ಬೊಕ್ಕ ಕಲಾವಿದೆರೆಗ್ ಬರಿಯರೆ ಆಯಿಜಿ. ಉಂದೆತ್ತ ಬಗೆಟ್ ನನಾತ್ ಚರ್ಚೆ ಮಲ್ಪರೆ ಜುಲೈ 27 ಕ್ಕ್ ಗುರುವಾರ ಬಿ.ಸಿ ರೋಡ್ದ ಸ್ಪರ್ಶ ಕಲಾಮಂದಿರಡ್ ಸಭೆ ಲೆತ್ತ್ದ್ಂಡ್. ಈ ಸಭೆಕ್ಕ್ ತೆಂಕುತಿಟ್ಟು ಚಿಕ್ಕಮೇಳದ ಮಾತ ವ್ಯವಸ್ಥಾಪಕೆರ್, ಸಂಚಾಲಕೆರ್ ಬೊಕ್ಕ ಪ್ರತಿನಿಧಿಕುಲು ಕಡ್ಡಾಯವಾದ್ ಪಾಲ್ ಪಡೆಯೊಡು ಪಂದ್ ಕಾರ್ಯದರ್ಶಿ ಯಕ್ಷಬೊಳ್ಳಿ ಕಡಬ ದಿನೇಶ್ ರೈ ತೆರಿಪಾದೆರ್.
ಚಿಕ್ಕಮೇಳ ತಿರ್ಗಾಟದ ನಿಯಮಲು:
# ಚಿಕ್ಕಮೇಳಲು ವಾ ದೇವಲ್ಯರ್ದ್ ಪಿದಡುಂಡ ಆ ದೇವಲ್ಯದ ಅನುಮತಿ ಬೋಡು.
# ಚಿಕ್ಕಮೇಳಡ್ ತಿರ್ಗಾಟ ಮಲ್ಪುನ ಕಲಾವಿದೆರ್ ವಾ ಮೇಳದಕುಲ, ಆ ಮೇಳದ ಅನುಮತಿ ಪತ್ರ
# ವಾ ಊರುಗು ತಿರ್ಗಾಟ ಮಲ್ಪುವೆರಾ ಆ ಊರುಗ್ ಸಂಬಂಧಪಟ್ಟಿನ ಗ್ರಾಮ ಪಂಚಾಯತ್ದ ಅನುಮತಿ ಪತ್ರ
# ಆಯಾ ಊರುದ ಪೊಲೀಸ್ ಠಾಣೆದ ಅನುಮತಿ ಪತ್ರನ್ ದೆತೊಂದು ತಿರ್ಗಾಟ ಮಲ್ಪೊಡು.
ಪೂಜ್ಯ ಡಾ.ಡಿ. ವೀರೇಂದ್ರ ಹೆಗ್ಗಡೆರ್ ಬೊಕ್ಕ ಮಾತೃಶ್ರೀ ಹೇಮಾವತಿ ವಿ. ಹೆಗ್ಗಡೆರೆನ ಯೋಚನೆದಂಚ ಉಜಿರೆ ಎಸ್.ಡಿ.ಎಂ ಮಲ್ಟಿ-ಸ್ಪೆಷಾಲಿಟಿ ಆಸ್ಪತ್ರೆಡ್ ಸುರು ಆಯಿನ ದಂತ ಚಿಕಿತ್ಸಾ ಕೇಂದ್ರದ ಸುರುತ್ತ ವರ್ಷದ ವರ್ಷಾಚರಣೆನ್ ಜುಲೈ 11 ಕ್ಕ್ ಆಚರಣೆ ಮಲ್ತೆರ್.
2022 ಜುಲೈ 11 ಕ್ಕ್ ಹರ್ಷೇಂದ್ರ ಕುಮಾರ್ ಮೆರೆರ್ದ್ ಈ ದಂತ ಚಿಕಿತ್ಸಾ ಕೇಂದ್ರ ಉದಿಪನ ಆದಿತ್ತ್ದ್, ಇತ್ತೆ ಒಂಜಿ ವರ್ಷ ಆತಿನೆಡ್ದಾವರ ಕೇಕ್ ಕಟ್ಟ್ ಮಲ್ತ್ದ್ ವರ್ಷಾಚರಣೆ ಮಲ್ತೆರ್.
ಉಜಿರೆದ ದಂತ ಚಿಕಿತ್ಸಾ ತಜ್ಞೆರ್ ಡಾ| ದಯಾಕರನ್ ಪಾತೆರ್ದ್, ಉಜಿರೆ ಎಸ್.ಡಿ.ಎಂ ಆಸ್ಪತ್ರೆ ಎಡ್ಡೆ ಸೇವೆ ಬೊಕ್ಕ ಸ್ವಚ್ಚತೆಗ್ ಪುದರ್ ಪಡೆತ್ಂಡ್ ಪಂದ್ ಪಂಡೆರ್.
ಉಜಿರೆ ಎಸ್.ಡಿ.ಎಂ ಆಸ್ಪತ್ರೆ ಒಂಜಿ ಕುಟುಮದ ಪರಿಕಲ್ಪನೆಡ್ ಪೂಜ್ಯ ಡಾ.ಡಿ. ವೀರೇಂದ್ರ ಹೆಗ್ಗಡೆ ಮೆರೆನ ನಿರ್ದೇಶನಡ್ ವೈದ್ಯಕೀಯ ಸೇವೆ ಕೊರೊಂದಿಪ್ಪುನೆಡ್ದಾವರ ಮುಲ್ಪ ರೋಗಿಲೆಗ್ ಎಡ್ಡೆ ಸೇವೆ ಕೊರಿಯರೆ ಸಾಧ್ಯ ಆವೊಂದುಂಡು. ಎಸ್.ಡಿ.ಎಂ ಆಸ್ಪತ್ರೆದ ದಂತ ಚಿಕಿತ್ಸಾ ಕೇಂದ್ರ ಸುರುತ್ತ ವರ್ಷಡೇ 3 ಸಾರರ್ದ್ ಎಚ್ಚಗ್ ದಂತಚಿಕಿತ್ಸೆನ್ ಕೊರ್ತ್ಂಡ್ ಪಂದ್ ಆಸ್ಪತ್ರೆದ ನಿರ್ದೇಶಕೆರ್ ಎಂ. ಜನಾರ್ದನ್ ಪಂಡೆರ್.
ಈ ಪೊರ್ತುಡು ದಂತ ಚಿಕಿತ್ಸಾ ತಜ್ಞೆರ್ ಡಾ| ಮೀರಾ ಅನುಪಮ್, ವೈದ್ಯಕೀಯ ಅಧೀಕ್ಷಕೆರ್ ಡಾ| ದೇವೇಂದ್ರ ಕುಮಾರ್. ಪಿ, ವೈದ್ಯಾಧಿಕಾರಿ ಡಾ| ಸಾತ್ವಿಕ್ ಜೈನ್ ಲೇಸ್ಡ್ ಪಾಲ್ ಪಡೆದಿತ್ತೆರ್. ವಿಮಾ ವಿಭಾಗದ ಜಗನ್ನಾಥ್ ಲೇಸ್ ಸುಧಾರಿಕೆ ಮಲ್ತೆರ್.
ಬೊಲ್ತೇರ್: ಚಾರ್ಮಾಡಿಡ್ ಲೈಸನ್ಸ್ ಇಜ್ಜಂದೆ ಕಲ್ವ ಸಾದಿಡ್ ಪೊಯ್ಯೆ ಸಾಗಾವೊಂದಿತ್ತಿನ ಲಾರಿನ್ ಧರ್ಮಸ್ಥಳ ಪೊಲೀಸೆರ್ ವಶಕ್ಕ್ ದೆತೊಂದೆರ್.
ಚಾರ್ಮಾಡಿಡ್ ಮುನೀರ್ ಪನ್ಪಿನರೆಗ್ ಸೇರಿನ ಸುಲ್ತಾನ್ ಪುದರ್ದ ಲಾರಿನ್ ಉಂತಾದ್ ತಪಾಸಣೆ ಮಲ್ಪುನಗ ಅವೆಟ್ ಸಂಬಂದಪಟ್ಟಿನ ಲೈಸನ್ಸ್ ಬೊಕ್ಕ ದಾಖಲೆನ್ ಕೆನ್ನಗ ಒವ್ವೇ ದಾಖಲೆ ಇಜ್ಜಿ ಪಂದಿತ್ತೆರ್. ಅಪಗ ಲಾರಿನ್ ವಶಕ್ಕ್ ದೆತೊನಿನ ಧರ್ಮಸ್ಥಳ ಪೊಲೀಸೆರ್ ನನದ ಕ್ರಮಗಾದ್ ಗಣಿ ಇಲಾಖೆಗ್ ವರದಿ ಸಂದಾದೆರ್.
ಬೊಲ್ತೇರ್: ಸೀರೆಡ್ ಕಟ್ಟ್ದಿನ ಜೋಕಾಲಿಡ್ ಗೊಬ್ಬೊಂದಿಪ್ಪುನಗ ಆಣ್ ಒರಿ ತಿರ್ತ್ ಬೂರ್ದು ತೀರ್ ಪೋಯಿನ ಘಟನೆ ಬೊಲ್ತೇರ್ ತಾಲೂಕ್ದ ದಿಡುಪೆಡ್ ನಡತ್ಂಡ್.
ಬೊಲ್ತೇರ್ದ ಮಲವಂತಿಗೆ ಗ್ರಾಮದ ಮಂಟಮೆ ನಿವಾಸಿ ಬಾಲಕೃಷ್ಣ ಪನ್ಪಿನರೆನ ಮಗೆ ಶ್ರೀಶ (13) ತೀರ್ ಪೋಯಿನ ಆಣ್. ಇಲ್ಲಡ್ ಏರ್ ಇಜ್ಜಂದಿನ ಪೊರ್ತುಡು ಸೀರೆಡ್ ಪಾಡ್ದಿನ ಜೋಕಾಲಿಡ್ ಗೊಬ್ಬುದೆ. ಬೊಲ್ತೇರ್ ಪೊಲೀಸ್ ಠಾಣೆದ ಸಬ್ ಇನ್ಸ್ಪೆಕ್ಟರ್ ಧನರಾಜ್ ಬೊಕ್ಕ ಸಿಬ್ಬಂದಿಲು ಜಾಗೆಗ್ ಭೇಟಿ ಕೊರ್ದು ಪರಿಶೀಲನೆ ಮಲ್ತ್ದೆರ್.
Beltangady: Boy dies after swing rope gets stuck around his neck
Beltangady: A tragic incident occurred when a young boy lost his life while playing on a swing, as the rope got entangled around his neck.
The victim, Srisha, a 14-year-old student in 8th grade and the son of Balakrishna from Mantame village in Malavantige taluk, met with this unfortunate accident.
ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ(ರಿ) ಮಡಂತ್ಯಾರು ವಲಯ ಅಖಿಲ ಜನಜಾಗೃತಿ ವೇದಿಕೆ ಬೊಲ್ತೇರ್ ಬೊಕ್ಕ ಪ್ರಥಮ ದರ್ಜೆ ಕಾಲೇಜು ಪುಂಜಾಲಕಟ್ಟೆ ಮೊಕಲೆನ ಒಟ್ಟು ಸೇರಿಗೆಡ್ ಪ್ರಥಮ ದರ್ಜೆ ಕಾಲೇಜಿಡ್ ತಾಲೂಕು ಮಟ್ಟದ ಸ್ವಾಸ್ತ್ಯ ಸಂಕಲ್ಪ ಲೇಸ್ ನಡತ್ಂಡ್. ಈ ಲೇಸ್ನ್ ಕಾಲೇಜಿದ ಪ್ರಾಂಶುಪಾಲೆರ್ ಡಾ. ಟಿ.ಕೆ. ಶರತ್ ಕುಮಾರ್ ಉದಿಪನ ಮಲ್ತೆರ್.
ಸಂಪನ್ಮೂಲ ವ್ಯಕ್ತಿಯಾದ್ ಪಾಲ್ ಪಡೆಯಿನ ಜನ ಜಾಗೃತಿ ವೇದಿಕೆದ ಪ್ರಾದೇಶಿಕ ನಿರ್ದೇಶಕೆರ್ ವಿವೇಕ್ ವಿನ್ಸೆಂಟ್ ಪಾಯಸ್ ಪಾತೆರ್ದ್ ಗಂಗಸರ ಪರ್ಪಿನವು ಬೊಕ್ಕ ಮಾದಕ ವಸ್ತುದ ಚಟರ್ದ್ ಸೀಕ್ ಬರ್ಪುಂಡು. ಆತ್ಮಹತ್ಯೆ ಇಂಚಿತ್ತಿನ ಘಟನೆಲು ಗಂಗಸರ ಪರ್ಪಿನೆರ್ದ್ ಎಚ್ಚಾದ್ ಆಪುಂಡು. ಕಲ್ಪಾರ್ಥಿಲು ಓದುನ ಪ್ರಾಯಡ್ ಸಾದಿ ತಪ್ಪರೆ ಬಲ್ಲಿ. ತನ್ನ ಬದ್ಕ್ಡ್ ಕಪ್ಪು ಚುಕ್ಕೆ ಬರಂದಿಲೆಕ ಎಚ್ಚೆರ್ಗೆ ವಹಿಸೊನೊಡು. ಕಲ್ಪಾರ್ಥಿಲು ಯಶಸ್ವಿ ಆಪಿನ ಕಾರ್ಯಡ್ ಪಾಲ್ ಪಡೆಯೊಡು ಪಂದ್ ಪಂಡೆರ್.
ಜಿಲ್ಲಾ ನಿರ್ದೇಶಕೆರ್ ಮಹಾಬಲ ಕುಲಾಲ್, ಜನ ಜಾಗೃತಿ ವಲಯದ ಅದ್ಯಕ್ಷೆರ್ ಪದ್ಮನಾಭ ಸಾಲ್ಯಾನ್, ತಾಲೂಕ್ದ ಯೋಜನಾಧಿಕಾರಿ ದಯಾನಂದ ಪೂಜಾರಿ, ಸಹಾಯಕ ಪ್ರಾಧ್ಯಾಪಕೆರ್ ಶೇಖರ್, ವಲಯ ಮೇಲ್ವಿಚಾರಕೆರ್ ವಸಂತಕುಮಾರ್, ಬಸವನಗುಡಿ ವಿಭಾಗದ ಸೇವಾಪ್ರತಿನಿಧಿ ಭಾರತಿ ಬೊಕ್ಕ ರೋಹಿಣಿ ಲೇಸ್ಡ್ ಪಾಲ್ ಪಡೆದಿತ್ತೆರ್.
