ಬೊಲ್ತೆರ್ ಸುದ್ದಿ | Belthangady News

ವೇಣೂರು: ಭಗವಾನ್ ಬಾಹುಬಲಿ ಸ್ವಾಮಿ ಮಹಾ ಮಸ್ತಕಾಭಿಷೇಕ ಮಹೋತ್ಸವದ ಮನವಿ ಪತ್ರ ಬುಡುಗಡೆ

ವೇಣೂರು: ದಿಗಂಬರ ಜೈನ ತೀರ್ಥಕ್ಷೇತ್ರ ಸಮಿತಿ ವೇಣೂರು ದ.ಕ ಬೊಕ್ಕ ವೇಣೂರು ಭಗವಾನ್ ಬಾಹುಬಲಿ ಸ್ವಾಮಿ ಮಹಾ ಮಸ್ತಕಾಭಿಷೇಕ ಮಹೋತ್ಸವ-2024 ನೆತ್ತ ಒಟ್ಟು ಸೇರಿಗೆಡ್ 2024 ಪೆ.22 ರ್ದ್ ಮಾರ್ಚ್ 1 ಮುಟ್ಟ ವೇಣೂರು ಭಗವಾನ್ ಬಾಹುಬಲಿ ಸ್ವಾಮಿ ಮಹಾಮಸ್ತಕಾಭಿಷೇಕ ಮಹೋತ್ಸವದ ಮನವಿ ಪತ್ರ ಬುಡುಗಡೆನ್ ಸೆ.25 ಐತಾರ ಕಾರ್ಲ ಶ್ರೀ ಜೈನಮಠ ದಾನಶಾಲಾ ಪರಮಪೂಜ್ಯ ‘ಧ್ಯಾನಯೋಗಿ’ ‘ರಾಜಗುರು’ ಸ್ವಸ್ತಿಶ್ರೀ ಲಲಿತಕೀರ್ತಿ ಭಟ್ಟಾರಕ ಪಟ್ಟಾಚಾರ್ಯವರ್ಯ ಮಹಾ ಸ್ವಾಮೀಜಿ ಬುಡುಗಡೆ ಮಲ್ತ್‌ದ್ ಆಶೀರ್ವಚನ ಕೊರಿಯೆರ್.

ಅರುವ ಅರಮನೆ, ಮಹಾಮಸ್ತಕಾಭಿಷೇಕ ಮಹೋತ್ಸವದ ಕಾರ್ಯಾಧ್ಯಕ್ಷೆರ್ ತಿಮ್ಮಣ್ಣರಸೆರಾಯಿನ ಡಾ. ಪದ್ಮಪ್ರಸಾದ್ ಅಜಿಲೆರ್, ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ಮಹಾಮಸ್ತಕಾಭಿಷೇಕ ಸಮಿತಿದ ಪ್ರಧಾನ ಕಾಯದರ್ಶಿ ವಿ. ಪ್ರವೀಣ ಕುಮಾರ್‌ ಇಂದ್ರ, ಪೆರಿಂಜೆ ರಾಜ್ಯಗುತ್ತು ಜಯರಾಜ್‌ ಕಂಬಳಿ ಮೊಕುಲು ಈ ಪೊರ್ತುಡು ಪಾಲ್ ಪಡೆದಿತ್ತೆರ್.

ವಿಷ ದೆತೊಂದು ಆತ್ಮಹತ್ಯೆ ಮಲ್ತೊನ್ನ ಜವನೆ

ಬೋಲ್ತೆರ್:ವಿಷ ದೆತೊಂದು ಆತ್ಮಹತ್ಯೆಗ್ ಪ್ರಯತ್ನ ಮಲ್ತ್ ಆಸ್ಪತ್ರೆಡ್ ಇತ್ತಿನ ಯುವಕೆ ಮರ್ದ್ ತಾಗಂದೆ ತೀರ್ ಪೋಯಿನ ಘಟನೆ ನಡತ್ಂಡ್.

ಸೋಣಂದೂರು ಮುಂಡಾಡಿ ನಿವಾಸಿ ಪ್ರಶಾಂತ್
ತೀರ್ ಪೋಯಿನ ಜವನೆ ಪಂದ್ ತೆರಿದ್ ಬೈದ್ಂಡ್.

ಸೆ.18 ದಾನಿ ವಿಷ ದೆತೊಂದು ಆತ್ಮಹತ್ಯೆಗ್ ಪ್ರಯತ್ನ ಮಲ್ತಿಪ್ಪುನಗ ಇಲ್ಲದಕುಲು ಆಸ್ಪತ್ರೆಗ್ ದಾಖಲ್ ಮಲ್ತ್ ಇತ್ತೆರ್. ಆಂಡ ಚಿಕಿತ್ಸೆ ಫಲಕಾರಿ ಆವಂದೆ ಜವನೆ ತೀರ್ ಪೋತೆರ್. ಪುಂಜಾಲ್ ಕಟ್ಟೆ ಸ್ಟೇಷನ್ ಡ್ ಕೇಸ್ ದಾಖಲಾತ್ಂಡ್.

ನಾರಾವಿ ವಲಯ ಮಟ್ಟದ ತ್ರೋಬಾಲ್ ಪಂದ್ಯಾಟ

ದ.ಕ ಜಿಲ್ಲಾ ಪಂಚಾಯತ್ ಹಿರಿಯ ಪ್ರಾಥಮಿಕ ಶಾಲೆ ಕರಂಬಾರು ಮೂಲು ಸೆ.19 ದಾನಿ ನಾರಾವಿ ವಲಯ ಮಟ್ಟದ ತ್ರೋಬಾಲ್ ಪಂದ್ಯಾಟನ್ ಶಿರ್ಲಾಲು ಗ್ರಾಮ ಪಂಚಾಯತ್ ದ ಗುರ್ಕಾರ್ದಿ ಉಷಾ ಎಂ ಶೆಟ್ಟಿ, ಉದಿಪನ ಮಲ್ತೆರ್.

ಲೇಸ್ ದ ಗುರ್ಕಾಮೆನ್ ಶಾಲಾಭಿವೃದ್ಧಿ ಸಮಿತಿದ ಗುರ್ಕಾರೆ ಪುಷ್ಪರಾಜ್ ಎಂ.ಕೆ ವಹಿಸ್ ದ್ ಇತ್ತೆರ್. ಕಾರ್ಯಕ್ರಮಡ್ ನಾರಾವಿ ವಲಯ ನೋಡಲ್ ದೈಹಿಕ ಶಿಕ್ಷಕೆರಾಯಿನ ಕೃಷ್ಣಪ್ಪ ಪೂಜಾರಿ, ಶಾಲಾಭಿವೃದ್ಧಿ ಸಮಿತಿಯ ಉಪಾಧ್ಯಕ್ಷೆರಾಯಿನ ವಿಜಯಾ, ತಾಲೂಕು ದೈಹಿಕ ಶಿಕ್ಷಕರ ಸಂಘದ ಗುರ್ಕಾರೆರ್ ರವಿರಾಜ್ ಗೌಡ, ಗುರುವಾಯನಕೆರೆ ಸಿ ಆರ್ ಪಿ ರಾಜೇಶ್, ಪೆರೋಡಿತ್ತಾಯಕಟ್ಟೆ ನಾರಾವಿ ಕ್ಲಸ್ಟರ್ ದ ಸಿ. ಆರ್. ಪಿ.ಕಿರಣ್ ಕುಮಾರ್ ಕೆ.ಯಸ್.ನಿವೃತ ಮುಖ್ಯೋಪಾಧ್ಯಾಯೆರಾಯಿನ ಪ್ರೇಮಾವತಿ ಭಟ್, ಶಾಲಾ ಮುಖ್ಯೋಪಾಧ್ಯಾಯೆರಾಯಿನ ರಮೇಶ್ ಛವಾಣ್, ಶಾಲಾ ಶಿಕ್ಷಕಿ ಸಾವಿತ್ರಿ ಇತ್ತೆರ್.

ಶಾಲೆಗ್ ವಸ್ತು ರೂಪಡ್ ಸ್ಮಾರ್ಟ್ ಟಿವಿ ಕೊರ್ನ ಸುನಂದಾ ಬೊಕ್ಕ ವಿಶ್ವನಾಥ ದೇವಾಡಿಗ, ಅಂಚನೆ ಜೋಕ್ಲೆಗ್ ಐಡಿ, ಬೆಲ್ಟ್,ಟೈ, ಕೊರ್ನ ಸಂತೋಷ್ ಹೆಗ್ಡೆ ಮೆರ್ನ ಅಮ್ಮ ವಸಂತಿ ಹೆಗ್ಡೆ ಮೊಕ್ಲೆನ್ ಈ ಪೊರ್ತುಡು ಮನಾದಿಗೆ ಮಲ್ತೆರ್.

ಅಂಚನೆ ಶಾಲೆರ್ದ್ ವರ್ಗಾವಣೆ ಆಯಿನ, ದೈಹಿಕ ಶಿಕ್ಷಕೆರಾಯಿನ ಕೃಷ್ಣಪ್ಪ ಪೂಜಾರಿ ಬೊಕ್ಕ ಶಿಕ್ಷಕಿ ಜುಬೇದ, ಬಿಸಿ ಊಟದ ನೌಕರೆರಾಯಿನ ಗೀತಾ ದೇವಾಡಿಗ ಮೊಕ್ಲೆನ್ ಈ ಪೊರ್ತುಡು ಮಾನಾದಿಗೆ ಮಲ್ತೆರ್.

ಲೇಸ್ ನ್ ದೀಪಾಶ್ರೀ ಸುಧಾರಿಕೆ ಮಲ್ತ್, ಅತಿಥಿ ಶಿಕ್ಷಕೆರಾಯಿನ ಸದಾಶಿವ ವರದಿ ವಾಚನ ಮಲ್ತೆರ್.

ಶಾಲಾಭಿವೃದ್ಧಿ ಸಮಿತುದ ಸರ್ವ ಸದಸ್ಯೆರ್ ಬೊಕ್ಕ್ ಬಿಸಿ ಊಟ ನೌಕರೆರ್, ಅಂಗನವಾಡಿ ಕಾರ್ಯಕರ್ತೆಯೆರ್, ಆರೋಗ್ಯ ಸಹಾಯಕಿಯೆರ್, ಆಶಾ ಕಾರ್ಯಕರ್ತೆಯೆರ್ ಇತ್ತೆರ್. ಅತಿಥಿ ಶಿಕ್ಷಕಿಯಾಯಿನ ರಾಜೇಶ್ವರಿ ಸೊಲ್ಮೆ ಸಂದಾಯ ಮಲ್ತೆರ್.

ಬೋಲ್ತೆರ್ ಗೃಹರಕ್ಷಕದಳ ಘಟಕಾಧಿಕಾರಿ ಜಯಾನಂದೆರೆಗ್ ಮುಖ್ಯಮಂತ್ರಿಲೆರ್ದ್ ಬಂಗಾರ್ದ ಪದಕ

ಬೋಲ್ತೆರ್: ಬೋಲ್ತೆರ್ ಗೃಹರಕ್ಷಕ ದಳತ ಘಟಕಾಧಿಕಾರಿ ಸೇವೆ ಸಲ್ಲಿಸಾದ್ ಅಂಚನೆ ಬೇತೆ ಬೇತೆ ಚಟುವಟಿಕೆಡ್ ಸಕ್ರೀಯವಾದ್ ಸಾಧನೆ ಮಲ್ತಿನ ಜಯನಂದ ಲಾಯಿಲ ಮೆರ್ 2021, 2022, 2023 ನೇ ಸಾಲ್ ದ ಮುಖ್ಯ ಮಂತ್ರಿ ಬಂಗಾರ್ದ ಪದಕಗ್ ಆಯ್ಕೆ ಆತೆರ್.

ಬೋಲ್ತೆರ್ ತಾಲೂಕುದ ಗೃಹ ರಕ್ಷಕ ದಳಟ್ ಘಟಕಾಧಿಕಾರಿಯಾದ್ ಕರಿನ 33 ವರ್ಷರ್ದ್ ಸೇವೆ ಮಲ್ತೊಂದು ಇಪ್ಪುನ ಮೆರೆನ್ ಪರಿಗಣಿಸಾದ್ ಮುಖ್ಯಮಂತ್ರಿ ಬಂಗಾರ್ದ ಪದಕ ಕೊರ್ದ್ ಗೌರವಿಸಾದೆರ್. ಸೆ.22 ದಾನಿ ಬೆಂಗ್ಲೂರುದ ಆರ್.ಎ ಮುಂಡ್ಕೂರು ಅಗ್ನಿಶಾಮಕ ಬೊಕ್ಕ ತುರ್ತು ಸೇವೆದ ತರಬೇತಿ ಅಕಾಡೆಮಿ ಬನ್ನೇರುಘಟ್ಟಡ್ ನಡತ್ತಿನ ಲೇಸ್ ಡ್ ಗೃಹ ಸಚಿವೆರಾಯಿನ ಡಾ. ಪರಮೇಶ್ವರ್ ಪ್ರಶಸ್ತಿ ಪ್ರಧಾನ ಮಲ್ತೆರ್.

ಬೋಲ್ತೆರ್ ಡ್ ಎಚ್ಚ ಆಯಿನ ಕಾಡಾನೆ ದಾಳಿ | ಕ್ರಮ ದೆತೊನಿಯೆರೆ ರಕ್ಷಿತ್ ಶಿವರಾಂ ಉಸ್ತುವಾರಿ ಸಚಿವೆರೆಗ್ ಮನವಿ

ಬೋಲ್ತೆರ್ ತಾಲೂಕು ಡ್ ಕಾಡಾನೆ ಧಾಳಿ ಮಲ್ತ್ ದ್ ಕೃಷಿ ನಾಶ ಮಲ್ತೊಂದು ಉಂಡು, ಈ ಬಗೆಟ್ ಕ್ರಮ ದೆತೊನೊಡು ಪಂದ್ ಒತ್ತಾಯ ಮಲ್ತ್ ಜಿಲ್ಲಾ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್ ಮೆರೆಗ್ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ರಕ್ಷಿತ್ ಶಿವರಾಂ ಸೆ.20 ದಾನಿ ಮನವಿ ಸಲ್ಲಿಸಾಯೆರ್.

ಬೋಲ್ತೆರ್ ತಾಲೂಕುದ ಧರ್ಮಸ್ಥಳ, ಶಿಬಾಜೆ, ಮುಂಡಾಜೆ, ಕಡಿರುದ್ಯಾವರ, ಮಿತ್ತಬಾಗಿಲು, ಮಲವಂತಿಗೆ, ಚಾರ್ಮಾಡಿ, ನೆರಿಯ, ಪುದೆವೆಟ್ಟು ಗ್ರಾಮದ ರೈತೆರ್ ಕಾಡಾನೆ ಧಾಳಿ ರ್ದ್ ಲಕ್ಷಾಂತರ ರೂ ಕೃಷಿ ನಷ್ಟನ್ ಅನುಭವಿಸಾದೆರ್.

ಕಾಡಾನೆನ್ ನಿಯಂತ್ರಣ ಮಲ್ಪೆರೆ ಅರಣ್ಯ ಇಲಾಖೆಗೆ ಸರ್ಕಾರ ನಿರ್ದೇಶನ ಕೊರೊಡು. ಬೊಕ್ಕ ಆ್ಯಂಟಿ ಡಿಪ್ರೆಡೇಷನ್ ಕ್ಯಾಂಪನ್ನು (Anti depredation camp) ರಚಿಸಾದ್ ಸಿಬ್ಬಂದಿನ್ ನೇಮಕ ಮಲ್ತ್ ಗಸ್ತು ತಿರ್ಗೆರೆ ಗಾಡಿದ ವ್ಯವಸ್ಥೆನ್ ಮಲ್ಪೊಡು ಪಂದ್ ಸಚಿವೆರೆಗ್ ರಕ್ಷಿತ್ ಶಿವರಾಂ ವಿವರಣೆ ಕೊರಿಯೆರ್. ಈ ಪೊರ್ತುಡು ಜಿಲ್ಲಾಧಿಕಾರಿ ಮುಲ್ಲೈ ಮುಹಿಲನ್ ಇತ್ತೆರ್.

ಬಾಹುಬಲಿ ಸ್ವಾಮಿ ಮಹಾ ಮಸ್ತಕಾಭಿಷೇಕ ಮಹೋತ್ಸವದ ಪೂರ್ವಭಾವಿ ಸಭೆತ ಮನವಿ ಪತ್ರ ಬುಡುಗಡೆ

ವೇಣೂರು: ದಿಗಂಬರ ಜೈನ ತೀರ್ಥಕ್ಷೇತ್ರ ಸಮಿತಿ ವೇಣೂರು ದ.ಕ ಬೊಕ್ಕ ವೇಣೂರು ಭಗವಾನ್ ಬಾಹುಬಲಿ ಸ್ವಾಮಿ ಮಹಾ ಮಸ್ತಕಾಭಿಷೇಕ ಮಹೋತ್ಸವ-2024 ನೆತ್ತ ಒಟ್ಟು ಸೇರಿಗೆಡ್ 2024 ಪೆ.22 ರ್ದ್ ಮಾರ್ಚ್ 1 ಮುಟ ವೇಣೂರು ಭಗವಾನ್ ಬಾಹುಬಲಿ ಸ್ವಾಮಿ ಮಹಾಮಸ್ತಕಾಭಿಷೇಕ ಮಹೋತ್ಸವದ ಪೂರ್ವಭಾವಿ ಸಭೆತ ಮನವಿ ಪತ್ರ ಬುಡುಗಡೆ ಸಮಾರಂಭ ಬೆದ್ರದ ಜೈನಮಠದ ಪರಮಪೂಜ್ಯ “ಭಾರತಭೂಷಣ ಡಾ| ಸ್ವಸ್ತಿಶ್ರೀ ಚಾರುಕೀರ್ತಿ ಭಟ್ಟಾರಕ ಪಂಡಿತಾಚಾರ್ಯವರ್ಯ ಮಹಾಸ್ವಾಮೀಜಿನ ಶುಭಾಶೀರ್ವಾದದ ಒಟ್ಟಿಗೆ ಸೆ.24 ಐತಾರ ಬಾಹುಬಲಿ ಸಭಾಭವನಡ್ ನಡಪೆರೆ ಉಂಡು.

ಕಾರ್ಲ ಶ್ರೀ ಜೈನಮಠ ದಾನಶಾಲಾ ಪರಮಪೂಜ್ಯ ಧ್ಯಾನಯೋಗಿ ರಾಜಗುರು ಸ್ವಸ್ತಿಶ್ರೀ ಲಲಿತಕೀರ್ತಿ ಭಟ್ಟಾರಕ ಪಟ್ಟಾಚಾರ್ಯವರ್ಯ ಮಹಾಸ್ವಾಮೀಜಿ ಪಾವನಸಾನಿಧ್ಯ ಬೊಕ್ಕ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಪದ್ಮವಿಭೂಷಣ ರಾಜರ್ಷಿ ಡಾ|ಡಿ. ವೀರೇಂದ್ರ ಹೆಗ್ಗಡೆ ಧರ್ಮಾಧಿಕಾರಿಲು, ಧರ್ಮಸ್ಥಳ ಮೇರ್ ಸಭಾಧ್ಯಕ್ಷತೆ ಬೊಕ್ಕ ಮನವಿ ಪತ್ರ ಬುಡುಗಡೆ ಮಲ್ಪೆರೆ ಉಲ್ಲೆರ್. ಅಂಚನೆ ಅರ್ವ ಅರಮನೆ, ಮಹಾಮಸ್ತಕಾಭಿಷೇಕ ಮಹೋತ್ಸವದ ಕಾರ್ಯಧ್ಯಕ್ಷೆರ್ ತಿಮ್ಮಣ್ಣರಸೆರಾಯಿನ ಡಾ. ಪದ್ಮಪ್ರಸಾದ್ ಅಜಿಲೆರ್ ಈ ಪೊರ್ತುಡು ಪಾಲ್ ಪಡೆಯೆರೆ ಉಲ್ಲೆರ್.

ಬಳಂಜ ಬ್ರಹ್ಮಶ್ರೀ ನಾರಾಯಣ ಗುರು ಸೇವಾ ಸಮಿತಿದ ಗುರ್ಕಾರೆರಾದ್ ಸಂತೋಷ್ ಪಿ ಕೋಟ್ಯಾನ್ ಬಳಂಜ ಆಯ್ಕೆ

ಬಳಂಜ: ಬ್ರಹ್ಮಶ್ರೀ ನಾರಾಯಣ ಗುರು ಸೇವಾ ಸಮಿತಿ ಬಳಂಜ,ಯುವ ಬಿಲ್ಲವ ವೇದಿಕೆ ಬೊಕ್ಕ ಮಹಿಳಾ ಬಿಲ್ಲವ ವೇದಿಕೆ ಬಳಂಜ,ನಾಲ್ಕೂರು,ತೆಂಕಕಾರಂದೂರು ನೆತ್ತ ಆಡಳಿತ ಮಂಡಳಿದ ಪೊಸ ಗುರ್ಕಾರೆ ಆದ್ ಸಂತೋಷ್ ಪಿ ಕೋಟ್ಯಾನ್ ಬಳಂಜ ಆಯ್ಕೆ ಆತೆರ್.

ಒಂಜೆ ಜಾತಿ, ಒಂಜೆ ಮತ, ಒಂಜೆ ದೇವೆರ್ ಪನ್ಪಿನ ಬ್ರಹ್ಮಶ್ರೀ ನಾರಾಯಣ ಗುರುಕುಲ್ ನ ತತ್ವ ಸಂದೇಶನ್ ಪಾಲಿಸಾದ್ ಬರೊಂದು ಇಪ್ಪುನ ಸುಮಾರ್ 44 ವರ್ಷದ ಪರಂಪರೆ ಇಪ್ಪುನ ಬಳಂಜ ಬ್ರಹ್ಮಶ್ರೀ ನಾರಾಯಣ ಗುರು ಸೇವಾ ಸಮಿತಿದ ಗೌರವಾಧ್ಯಕ್ಷೆರ್ ಹೆಚ್.ಧರ್ಣಪ್ಪ ಪೂಜಾರಿ ಬೊಕ್ಕ ಗೌರವ ಮಾರ್ಗದರ್ಶಕೆರ್ ಕೆ.ವಸಂತ ಸಾಲಿಯಾನ್ ಬೊಕ್ಕ ಮಾಜಿ ಗುರ್ಕಾರ್ಲೆನ ಮಾರ್ಗದರ್ಶನಡ್ ,ಸಮಿತಿ ಸದಸ್ಯರೆರ್ನ ಸಹಕಾರ ದೊಟ್ಟಿಗೆ ನಡತೊಂದು ಉಂಡು.

ಸಂಘದ ಉಪಾಧ್ಯಕ್ಷೆರಾ‍ದ್ ರವೀಂದ್ರ ಬಿ ಅಮೀನ್ ಮಜಲು,ಪ್ರಧಾನ ಕಾರ್ಯದರ್ಶಿಯಾದ್ ಜಗದೀಶ್ ಪೂಜಾರಿ ಬಳ್ಳಿದಡ್ಡ, ಕೋಶಾಧಿಕಾರಿಯಾದ್ ಪ್ರವೀಣ್ ಕುಮಾರ್ ಹೆಚ್‌.ಎಸ್, ಜೊತೆ ಕಾರ್ಯದರ್ಶಿಯಾದ್ ಪ್ರವೀಣ್ ಡಿ ಕೋಟ್ಯಾನ್ ದರ್ಖಾಸು ಆಯ್ಕೆ ಆತೆರ್.

ನಿರ್ದೇಶಕೆರಾದ್ ಸಂತೋಷ್ ಕುಮಾರ್ ಕಾಪಿನಡ್ಕ, ದಿನೇಶ್ ಕೋಟ್ಯಾನ್ ಕುದ್ರೋಟ್ಟು,ದಿನೇಶ್ ಪೂಜಾರಿ ಅಂತರ,ಯೋಗೀಶ್ ಪೂಜಾರಿ ಯೈಕುರಿ, ಯತೀಶ್ ವೈ.ಎಲ್ ಬಳಂಜ,ಸದಾನಂದ ಪೂಜಾರಿ ಬೊಂಟ್ರೋಟ್ಡು,ಪ್ರವೀಣ್ ಪೂಜಾರಿ ಲಾಂತ್ಯಾರು,ಜಗದೀಶ್ ಪೂಜಾರಿ ತಾರಿಪಡ್ಪು,ರಂಜಿತ್ ಪೂಜಾರಿ ಮಜಲಡ್ಡ,ರಕ್ಷಿತ್ ಪೂಜಾರಿ ಬಗ್ಯೋಟ್ಟು,ಪವನ್ ಪೂಜಾರಿ ಕಟ್ಟೆ ಆಯ್ಕೆ ಆತೆರ್.

ಚಾರ್ಮಾಡಿಡ್ 100 ಅಡಿ ಕಣಿಕ್ಕ್ ಬೂರ್ನ ಲಾರಿ….!

ಚಾರ್ಮಾಡಿ: ಚಾರ್ಮಾಡಿ ಘಾಟಿದ ಸೋಮನಕಾಡು ಜಲಪಾತದ ಕೈತಲ್ ಸೆ.15 ತಡರಾತ್ರೆ ವಿಪರೀತ ಮೈಂದ್ ದ ಕಾರಣರ್ದ್ ರೋಡ್ ತೋಜಂದೆ ನೀರ್ ದ ಬಾಟಲ್ ದಿಂಜಿನ ಲಾರಿ ರೋಡ್ ದ ಸೈಡ್ ದ ತಡೆಗೋಡೆಗ್ ಡಿಕ್ಕಿ ಹಾಕ್ ದ್ 100 ಅಡಿ ತಿರ್ತ್ ದ ಕಣಿಕ್ಕ್ ಬೂರ್ನ ಘಟನೆ ನಡತ್‌ಂಡ್.

ಪುತ್ತೂರುರ್ದ್ ಚಿತ್ರದುರ್ಗಗ್ ಲಾರಿ ಪೋವೊಂದಿತ್ತ್ಂಡ್. ಡ್ರೈ ಬೊಕ್ಕ ಕ್ಲೀನರ್ ಒಂತೆ ಒಂತೆ ಪಟ್ಟಾದ್ ಬಚಾವ್ ಆತೆರ್.