ಪುತ್ತೂರ್ದ ಸುದ್ದಿ | Puttur News

ಮಾಜಿ ಉಪ ಮುಖ್ಯ ಮಂತ್ರಿ ಕೆ.ಎಸ್ ಈಶ್ವರಪ್ಪ ಸುಬ್ರಹ್ಮಣ್ಯ ದೇವಸ್ಥಾನಗ್ ಭೇಟಿ

ಸುಬ್ರಹ್ಮಣ್ಯ: ಮಾಜಿ ಉಪಮುಖ್ಯಮಂತ್ರಿ ಕೆ. ಎಸ್ ಈಶ್ವರಪ್ಪ ಡಿ.11 ತಾನಿ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ಸ್ವಾಮಿ ದೇವಸ್ಥಾನಗ್ ಭೇಟಿ ಕೊರಿಯೆರ್.

ಕುಟುಂಬ ಸಮೇತ ಬತ್ತಿನ ಅಕುಲು ದೇವರ ದರ್ಶನ ಪಡೆದ್ ಪೂಜೆ ಸಲ್ಲಿಸಾಯೆರ್. ಈ ಪೊರ್ತುಡು ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನದ ಸ್ವಚ್ಛತಾ ಕಾರ್ಯಗ್ ಚಾಲನೆ ಕೊರಿಯೆರ್ . ವ್ಯವಸ್ಥಾಪನಾ ಸಮಿತಿದಕುಲು, ಕಾರ್ಯನಿರ್ವಹಣಾಧಿಕಾರಿ ಇತ್ತೆರ್.

ಬೊಕ್ಕ ದೇವಸ್ಥಾನ, ಸಂಘಟನೆದ ಸಹಕಾರಡ್ ಸ್ವಚ್ಚತಾ ಕಾರ್ಯ ನಡತ್ಂಡ್.

ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ಚಂಪಾಷಷ್ಠಿಗ್ ಗರ್ದ್ ಡ್ ನಡತೊಂದು ಉಂಡು ತಯಾರಿ…!

ಸುಬ್ರಹ್ಮಣ್ಯ: ಕುಕ್ಕೆಶ್ರೀ ಸುಬ್ರಹ್ಮಣ್ಯಡ್ ವಾರ್ಷಿಕ ಚಂಪಾ ಷಷ್ಠಿ ಮಹೋತ್ಸವ ಡಿ.9 ಶನಿವಾರ ಮೂಲಮೃತಿಕ ಪ್ರಸಾದ ದೆತ್ತ್ ವಿತರಣೆ ಆಪಿನ ಒಟ್ಟಿಗೆ ಸುರು ಆವರೆ ಉಂಡು.

ಡಿ. 24 ತಾನಿ ಕೊಪ್ಪರಿಗೆ ಏರಾವುನ ಮುಖೆನ ರಾತ್ರೆ ನೀರ್ ಬಂಡಿ ಉತ್ಸವ ಬೊಕ್ಕ ದೈವದ ನಡಾವಳಿ ನಡತ್ತ್ ದ್ ಜಾತ್ರೆ ಸಂಪನ್ನ ಆವೆರೆ ಉಂಡು ಪಂದ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ವ್ಯವಸ್ಥಾಪನ ಸಮಿತಿದ ಗುರ್ಕಾರ್ಲು ಮೋಹನ್ ರಾಮ್ ಸುಳ್ಳಿ ಪತ್ರಿಕಾಗೋಷ್ಠಿಡ್ ತೆರಿಪಾದೆರ್.

ಈ ಸರ್ತಿ ಜಾತ್ರೋತ್ಸವಗ್ ಕರೆ ಕಾಣಿಕೆ ಸಲ್ಲಿಸಾವುನ ಬಗ್ಗೆ ಸುಳ್ಯ ಪುತ್ತೂರು ಬೊಕ್ಕ ಕಡಬ ತಾಲೂಕುದ ದೇವಸ್ಥಾನಲೆಗ್ ಸುತ್ತೋಲೆ ಕಡಪುರ್ದ್ ಅಂಚನೆ ಹೊರೆ ಕಾಣಿಕೆ ಕನವೆರೆ ಅವ್ವೇ ದಿನ ನಿಗದಿ ಮಲ್ತ್ ದೆರ್. ಸ್ಥಳೀಯ ಸಾರ್ವಜನಿಕೆರೆಗ್ಲ ಹೊರ ಕಾಣಿಕೆ ಸಮರ್ಪಣೆ ಮಲ್ಪೆರೆ ಅವಕಾಶ ಉಂಡು ಪಂದ್ ತೆರಿಪಾದೆರ್.

ಸ್ಥಳೀಯ ಶಾಲಾ ಕಾಲೇಜ್ ಅತ್ತಂದೆ 1035 ಸ್ವಯಂಸೇವಕೆರೆನ ಅರ್ಜಿ ಕೂಡ ಬೈದ್ಂಡ್. ಲಕ್ಷ ದೀಪೋತ್ಸವದಾನಿ ಒಂಜಿ ಲಕ್ಷ ಹಣತೆನ್ ಪೊತ್ತಾವೆರೆ ಸಿದ್ದತೆಲ ಆವೊಂದು ಉಂಡು. ಅಂಚನೆ 139 ಭಜನಾ ತಂಡಲು ಪುದರ್ ನ್ ನೋಂದಣಿ ಮಲ್ತ್ ದೆರ್.

ಭಕ್ತಾದಿಲೆಗ್ ಪಾರ್ಕಿಂಗ್ ವ್ಯವಸ್ಥೆ, ಶೌಚಾಲಯ ವ್ಯವಸ್ಥೆ ಬೊಕ್ಕ ಆರೋಗ್ಯ ಚಿಕಿತ್ಸಾ ವ್ಯವಸ್ಥೆ 24 ಗಂಟೆಲ ಸೇವೆ ಕೊರ್ಪುನ ವ್ಯವಸ್ಥೆ ಉಂಡು ಪಂದ್ ತೆರಿಪಾದೆರ್.

ಪತ್ರಿಕಾಗೋಷ್ಠಿಡ್ ವ್ಯವಸ್ಥಾಪನ ಸಮಿತಿದ ಸದಸ್ಯೆರ್ ಪ್ರಸನ್ನ ದರ್ಬೆ, ವನಜ ವಿ ಭಟ್, ಶೋಭಾ ಗಿರಿಧರ್ ಬೊಕ್ಕ ಲೋಕೇಶ್ ಮುಂಡೋಕಜೆ ಇತ್ತೆರ್.

ಡಿ.9: ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಡ್ ದೇವೆರ್ನ ದರ್ಶನ ಇಜ್ಜಿ

ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಡ್ 2023-24 ನೇ ಸಾಲ್ ದ ವಾರ್ಷಿಕ ಜಾತ್ರಾ ಮಹೋತ್ಸವದ ಪ್ರಯುಕ್ತ ಡಿ.9 ತಾನಿ ಶನಿವಾರ “ಮೂಲಮೃತಿಕಾ”ಪ್ರಸಾದ ದೆಪ್ಪುನ ಕಾರ್ಯಕ್ರಮ ಇಪ್ಪುನೆದಾತ್ರ, ಭಕ್ತಾದಿಲೆಗ್ ಕಾಂಡೆರ್ದ್ ಮದ್ಯಾಹ್ನ 2.00 ಗಂಟೆ ಮುಟ್ಟ ಶ್ರೀ ದೇವೆರ್ನ ದರ್ಶನ ಬೊಕ್ಕ ಸೇವೆಗ್ ಅವಕಾಶ ಇಪ್ಪುಜಿ. ಅಂಚಾದ್ ಮಾತ ಭಕ್ತಾದಿಲು ಸಹಕಾರ ಕೊರೊಡು ಪಂದ್ ಪ್ರಕಟನೆಡ್ ತೆರಿಪಾದೆರ್.

ಸುಬ್ರಹ್ಮಣ್ಯಡ್ ನೇಜಿ ನಾಟಿದ ಪ್ರಾತ್ಯಕ್ಷಿಕೆ

ಕುಕ್ಕೆ ಶ್ರೀ ಸುಬ್ರಹ್ಮಣೇಶ್ವರ ಮಹಾವಿದ್ಯಾಲಯದ ವಾಣಿಜ್ಯ ಬೊಕ್ಕ ಉದ್ಯಮಾಡಳಿತ ವಿಭಾಗ, ಐಕ್ಯೂಎಸಿ ಘಟಕ ಆಶ್ರಯಡ್ ನೇಜಿ ಬೇಸಾಯ ರಕ್ಷಣೆ ಮಲ್ಪುನೆಟ್ಟ್ ಯುವಜನತೆದ ಪಾತ್ರ ಕಾರ್ಯಕ್ರಮದ ಅಂಗವಾದ್ ನೇಜಿ ನಾಟಿ ಕಾರ್ಯಕ್ರಮ ಬೊಕ್ಕ ಪ್ರಾತ್ಯಕ್ಷಿಕೆ ಕಂದ್ರಪ್ಪಾಡಿ ಪ್ರೀತಮ್ ಮುಂಡೋಡಿ ಅರೆನ ಕಂಡಡ್ ನಡತ್ಂಡ್.

ವಿದ್ಯಾರ್ಥಿಲು ಕಾಲಿ ಶೈಕ್ಷಣಿಕ ಪಠ್ಯದ ವಿಚಾರದ ಬಗ್ಗೆ ಚರ್ಚೆ ಮಲ್ಪುನ ಒಟ್ಟಿಗೆ ಪಠ್ಯೇತರ ವಿಚಾರನ್ ಕಲ್ಪೊಡು ಪನ್ಪುನ ಉದ್ದೇಶಡ್ ಈ ಕಾರ್ಯಕ್ರಮ ಆಯೋಜನೆ ಮಲ್ತ್, ಇಂಚಿಪಗ್ ಕಂಡಲು ತೂವೆರೆನೆ ತಿಕ್ಕುಜಿ, ಕೃಷಿತ ಬಗ್ಗೆ ಮಾಹಿತಿ ಇತ್ತೆದ ಜೋಕುಲೆಗ್ಲ ಇಜ್ಜಿ. ಕೃಷಿತ ಬಗ್ಗೆ ತೆರಿಪಾಯೆರೆ ಅಂಚನೆ ಆಸಕ್ತಿ ಬರಿಯೆರೆ ನೇಜಿ ನಾಟಿ ಕಾರ್ಯಕ್ರಮ ಹಮ್ಮಿ ಮಲ್ತ ಪಂದ್ ಕಾರ್ಯಕ್ರಮದ ಸಂಘಟಕೆರ್ ತೆರಿಪಾಯೆರ್.

ಕಾಲೇಜ್ ದ ಸುರುತ ಬಿ. ಕಾಂ ಎ ಬೊಕ್ಕ ಬಿ.ಕಾಂ ಬಿ ವಿಭಾಗದ ಮಾತ ವಿದ್ಯಾರ್ಥಿಲು ನೇಜಿ ನಾಟಿ ಕಾರ್ಯಡ್ ಪಾಲ್ ಪಡೆದಿತ್ತೆರ್. ಪ್ರಾಂಶುಪಾಲೆರ್ ಡಾ। ದಿನೇಶ ಪಿ.ಟಿ ಬೊಕ್ಕ ಐಕ್ಯೂಎಸಿ ಘಟಕ ಸಂಯೋಜಕಿ ಲತಾ ಬಿ.ಟಿ ಅರೆನ ಮಾರ್ಗದರ್ಶನಡ್ ನಡತ್ತಿನ ಕಾರ್ಯಕ್ರಮಡ್ ಉಪನ್ಯಾಸಕೆರ್ ರಾಮನಾಥ್ ಎ, ರಮ್ಯ ಎಂ ಇತ್ತೆರ್.

ಸುಬ್ರಹ್ಮಣ್ಯಡ್ ವಾಲಿಬಾಲ್ ಪಂದ್ಯಾಟ ಉದಿಪನ

ಸುಬ್ರಹ್ಮಣ್ಯ: ಕುಕ್ಕೆ ಫ್ರೆಂಡ್ಸ್ ಸುಬ್ರಹ್ಮಣ್ಯ ಬೊಕ್ಕ ಕಡಬ ತಾಲೂಕು ವಾಲಿಬಾಲ್ ಅಸೋಸಿಯೇಷನ್ ನೆತ್ತ ಒಟ್ಟು ಸೇರಿಗೆಡ್ ಆಹ್ವಾನಿತ ಆಜಿ ತಂಡದ ಲೀಗ್ ಮಾದರಿದ ರಾತ್ರೆ ಪಗೆಲ್ ಆಂಜೊಕ್ಲೆನ ವಾಲಿಬಾಲ್ ಪಂದ್ಯಾಟ ಶನಿವಾರ ಕಾಶಿಕಟ್ಟೆ ಕೈತಲ್‌ದ ಗ್ರೌಂಡ್‌ಡ್‌ ನಡತ್‌ಂಡ್. ವಾಲಿಬಾಲ್ ಪಂದ್ಯಾಟದ ಗುರ್ಕಾರ್ಮೆನ್ ಕುಕ್ಕೆ ಶ್ರೀ ಫ್ರೆಂಡ್ಸ್ ಸುಬ್ರಹ್ಮಣ್ಯದ ಗುರ್ಕಾರ್ಲು ಭವಿಷ್ಯ ವಹಿಸ್‌ದ್‌ ಇತ್ತೆರ್.

ಪಂದ್ಯಾಟದ ಉದಿಪನನ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ವ್ಯವಸ್ಥಾಪನ ಸಮಿತಿದ ಸದಸ್ಯೆರ್ ಶ್ರೀ ವತ್ಸ ತುಡರ್‌ ಅರ್ಲಾವುನ ಮುಖೆನ ಉದಿಪನ ಮಲ್ತೆರ್.‌ ಮಲ್ಲ ಬಿನ್ನೆರಾದ್ ಕಡಬ ತಾಲೂಕು, ವಾಲಿಬಾಲ್ ಅಸೋಸಿಯೇಷನ್ ಗುರ್ಕಾರ್ಲು ಲಕ್ಷ್ಮೀ ನಾರಾಯಣ ರಾವ್ ರಾಮಕುಂಜ, ಸುಬ್ರಹ್ಮಣ್ಯ ಗ್ರಾಮ ಪಂಚಾಯಿತಿ ಉಪಾಧ್ಯಕ್ಷೆರ್ ಎಚ್ಎಲ್ ವೆಂಕಟೇಶ್, ತಾಲೂಕು ಪಂಚಾಯತ್ ನಿಕಟ ಪೂರ್ವ ಸದಸ್ಯೆರ್ ಅಶೋಕ್ ನೇ ಕ್ರಾಜೆ, ಉದ್ಯಮಿ ಬೊಕ್ಕ ಗ್ರಾಮ ಪಂಚಾಯತ್ ಸದಸ್ಯೆರ್ ಹರೀಶ್ ಹಿಂಜಾಡಿ, ಸಮಾಜ ಸೇವಕೆರ್ ಡಾl ರವಿ ಕಕ್ಕೆ ಪದವು ,ಸರಕಾರಿ ಮಾದರಿ ಹಿರಿಯ ಪ್ರಾಥಮಿಕ ಶಾಲೆ, ಮುಖ್ಯೋಪಾಧ್ಯಾಯೆರ್ ಮಾಧವ ಎಂ ಇತ್ತೆರ್.

ಲೀಗ್ ಮಾದರಿದ ಪಂದ್ಯಾಟಡ್ ಪ್ರಶಾಂತ ಸ್ಪೋರ್ಟ್ಸ್ ಕ್ಲಬ್, ತತ್ವಿಕ ಫ್ರೆಂಡ್ಸ್ ಸುಬ್ರಹ್ಮಣ್ಯ, ಬೆಳ್ಳಿ ಫ್ರೆಂಡ್ಸ್ ಸುಬ್ರಹ್ಮಣ್ಯ ,ಮಂಗಳ ಬಾರ್ ಅಂಡ್ ರೆಸ್ಟೋರೆಂಟ್ ಹರಿಹರ ಪಳ್ಳೆತಡ್ಕ, ಪ್ರಕೃತಿ ವಾರಿಯರ್ಸ್ ಹರಿಹರ ಪಳ್ಳತಡ್ಕ, ಶ್ರೀ ರಕ್ಷಾ ಸುಬ್ರಹ್ಮಣ್ಯ ತಂಡಲು ಪಾಲ್‌ ಪಡೆದಿತ್ತೆರ್. ಕುಕ್ಕೆ ಫ್ರೆಂಡ್ಸ್ ಸುಬ್ರಹ್ಮಣ್ಯ ನೆತ್ತ ಕಾರ್ಯದರ್ಶಿ ರಶಿನ್ ಸುಬ್ರಮಣ್ಯ ಬತ್ತಿ ಬಿನ್ನೆರೆನ್‌ ಎದ್ಕೊಂಡೆರ್. ಪ್ರಾಥಮಿಕ ಬೊಕ್ಕ ಪ್ರೌಢಶಾಲೆದ ವಿದ್ಯಾರ್ಥಿಲು ಪ್ರಾರ್ಥನೆ ಮಲ್ತೆರ್. ವಿಶ್ರಾಂತ ಉಪನ್ಯಾಸಕೆರ್ ವಿಶ್ವನಾಥ ನಡು ತೋಟ ಲೇಸ್‌ದ ಸುದಾರಿಕೆ ಮಲ್ತೆರ್.

ಡಿ.16: ಪಟ್ಲಡ್ಕ ಕೊರಗಜ್ಜ ದೈವಸ್ಥಾನಡ್‌ ಪರಕೆದ ಕೋಲ

ಕಡಬ: ಶ್ರೀ ಗಡಿಯಾಡಿ ಆದಿಮೊಗೇರ್ಕಳ ಸ್ವಾಮಿ ಕೊರಗಜ್ಜ ಬೊಕ್ಕ ಪರಿವಾರ ದೈವದ ದೈವಸ್ಥಾನ ಪಟ್ಲಡ್ಕ ಕೊಕ್ಕಡ ಮೂಲು ಬೊಂಬೈದ ಲೀಲಾ ಬೊಕ್ಕ ಜೋಕ್ಲೆನ ಸೇವಾರ್ಥವಾದ್‌ ಡಿ.16 ತಾನಿ ಕಾಂಡೆ 7 ಗಂಟೆಗ್‌ ಕೊರಗಜ್ಜಗ್‌ ಪರಕೆದ ಕೋಲ ನಡಪೆರೆ ಉಂಡು.

ಅಂಚನೆ ಪ್ರತಿ ತಿಂಗೊಲುದ ಸಂಕ್ರಾಂದಿದಾನಿ ಶ್ರೀ ಕ್ಷೇತ್ರಡ್‌ ಕೊರಗಜ್ಜಗ್‌ ಪರಕೆದ ಅಗೇಲ್‌ ಸೇವೆ ನಡಪುಂಡು. ಮಾತ ಭಕ್ತಾದಿಲು ಹೆಚ್ಚಿನ ಸಂಖ್ಯೆಡ್‌ ಪಾಲ್‌ ಪಡೆದ್‌, ಗಂಧ ಪ್ರಸಾದ ಸ್ವೀಕಾರ ಮಲ್ಪೊಡು ಪಂದ್‌ ಲೆಪ್ಪೋಲೆಡ್‌ ತೆರಿಪಾದೆರ್.

ಜನವರಿಡ್‌ ಮೂಜನೇ ವರ್ಷದ ಆಲಂಕಾರು ಪ್ರೀಮಿಯರ್‌ ಲೀಗ್‌ ಸುರು

ಪುತ್ತೂರು: ಕ್ರಿಕೆಡ್‌ ಗೊಬ್ಬು ಆಯೋಜನೆ ಮಲ್ತ್‌ ಲಾಭಾಂಶನ್‌ ಸಮಾಜಮುಖಿ ಕಾರ್ಯಗ್‌ ಗಲಸುನ ಮೂಲಕ ಮಾತೆರ್ನ ಪ್ರಶಂಸೆಗ್‌ ಪಾತ್ರರಾಯಿನ ಆಲಂಕಾರ್‌ದ ಸೂಪರ್‌ ಸ್ಟ್ರೈಕರ್ಸ್‌ರ್ದ್‌ ದುಂಬುದ ಜನವರಿ ತಿಂಗೊಲುಡು ಮೂಜನೇ ವರ್ಷದ ಆಲಂಕಾರು ಪ್ರೀಮಿಯಂ ಲೀಗ್‌ ಕ್ರಿಕೆಟ್‌ ಗೊಬ್ಬು ನಡಪೆರೆ ಉಂಡು.

ಕರಿನ ರಡ್ಡ್‌ ವರ್ಷರ್ದ್‌ ಕ್ರಿಕೆಟ್‌ ಗೊಬ್ಬು ಆಯೋಜನೆ ಮಲ್ತ್‌ ಗೊಬ್ಬುಡು ತಿಕ್ಕಿನ ಲಾಬಾಂಶನ್‌ ಬಡಪತ್ತ್ ದಕ್ಲೆಗ್ ಇಲ್ಲ್‌ ಕಟ್ಟೆರೆ, ಕ್ಯಾನ್ಸರ್‌ ಇಂಚಿನ ಅನಾರೋಗ್ಯ ಪೀಡಿತೆರೆಗ್‌ ನೆರವು ಕೊರ್ಪುನ ಸೂಪರ್‌ ಸ್ಟ್ರೈಕರ್ಸ್‌ ಬಳಗದಕುಲು ಈ ಸರ್ತಿ ಮೂಜನೆ ಸೀಸನ್‌ ಎಪಿಎಲ್‌-2023 ಆಯೋಜನೆ ಮಲ್ತ್‌ ಈ ಸರ್ತಿಲ ಬಡಪತ್ತ್ ದಕ್ಲೆಗ್‌ ಆರ್ಥಿಕ ಸಕಾಯ ಮಲ್ಪೆರೆ ಉಲ್ಲೆರ್.‌ ಜನವರಿ 20 ಬೊಕ್ಕ 21 ತಾನಿ ಆಲಂಕಾರು ದುರ್ಗಾಂಬಾ ಸಾರ್ವಜನಿಕ ಮೈದಾನಡ್‌ ಆಜಿ ತಂಡೊಲೆನ ಲೀಗ್‌ ಮಾದರಿದ ಕ್ರಿಕೆಟ್‌ ಗೊಬ್ಬು ನಡಪೆರೆ ಉಂಡು.

ಡಿಸೆಂಬರ್‌ 24 ತಾನಿ ಆಲಂಕಾರು ಸಿ.ಎ ಬ್ಯಾಂಕ್‌ ಕೈತಲ್‌ ಗೊಬ್ಬುನಕ್ಲೆನ ಹರಾಜ್‌ ನಡಪೆರೆ ಉಂಡು. ಗೊಬ್ಬುಡು ಸುರುತ ಇನಾಮು 33 ಸಾವಿರ ಪನವು ಬೊಕ್ಕ ಟ್ರೋಫಿ, ರಡ್ಡನೇ ಇನಾಮು 22 ಸಾವಿರ ಪನವು ಬೊಕ್ಕ ಟ್ರೋಫಿ. ಸಮಾಜಮುಖಿ ಕಾರ್ಯಗಾದ್‌ ನಡಪುನ ಈ ಗೊಬ್ಬು ಪ್ರಯೋಜಕೆರಾಯೆರೆ, ಗೊಬ್ಬುಡು ನೇರ ಪ್ರಸಾರಡ್‌ ಜಾಹೀರಾರು ಕೊರ್ಪುನಕುಲು 8722276957 ಸಂಖ್ಯೆಗ್ ಸಂಪರ್ಕ ಮಲ್ಪೊಲಿ ಪಂದ್‌ ಪ್ರಕಟನೆಡ್‌ ತೆರಿಪಾದೆರ್.‌

ಪುತ್ತೂರು: ಪೊಂಜೊವುಗು ಗಂಗಸರ ಪರ್ಪಾದ್ ಅತ್ಯಾಚಾರ: ಆರೋಪಿ ಅರೆಸ್ಟ್

ನವೆಂಬರ್ 24ತ ರಾತ್ರೆ ಪುತ್ತೂರು ಬಸ್‌ ಉಂತಡೆಡ್ ಇತ್ತಿನ ಸಂತ್ರಸ್ತೆದಿ ಪೊಂಜೊವುಗು ಪರ್ಪಿ ನೀರ್‌ಗ್ ಗಂಗಸರ ಪಾಡ್ದ್ ಕೊರ್ತಿನ ಆರೋಪಿ, ಆಲೆನ್ ಏರ್ಲಾ ಇಜ್ಜಂದಿನ ಜಾಗೆಗ್ ಲೆತೊಂದು ಪೋದು ಅತ್ಯಾಚಾರ ಮಲ್ತ್‌ದೆ ಪಂದ್ ಒಯಿಲ್ ದಾಕಲಾದಿತ್ತ್ಂಡ್.

ಪುತ್ತೂರು ಆರ್ಯಾಪು ಗ್ರಾಮೊದ ಸಂಶುದ್ದೀನ್ ಆಸ್ಗರ್ ಅಲಿ (23) ಕೈದಾತಿನ ಆರೋಪಿ. ಪ್ರಕರಣೊದ ಜಡ್ತೆ ಮಲ್ತ್‌ದ್, ಆರೋಪಿನ್ ಅಂಗಾರೆ ಅರೆಸ್ಟ್ ಮಲ್ತ್‌ದ್, ಬುಧವಾರ ಕೋರ್ಟ್‌ಗ್ ಹಾಜಿರ್ ಮಲ್ತ್‌ದ ಪಂದ್ ಪೊಲೀಸೆರ್ ತೆರಿಪಾದೆರ್.

ಸುಬ್ರಹ್ಮಣ್ಯಗ್‌ ಬತ್ತಿನ ಪೊಂಜೊವ್ ಹಾರ್ಟ್‌ ಆಟ್ಯಾಕ್‌ಡ್‌ ತೀರ್‌ಪೋಯೆರ್‌

ಸುಬ್ರಹ್ಮಣ್ಯ: ಬೆಂಗಳೂರುದ ಪೊಂಜೊವ್ ಕುಕ್ಕೆ ಸುಬ್ರಹ್ಮಣ್ಯ ಕ್ಷೇತ್ರಗ್ ಬತ್ತಿನ ಪೊರ್ತುಡು ಹಾರ್ಟ್‌ ಆಟ್ಯಾಕ್‌ಡ್‌ ತೀರ್‌ಪೋಯಿನ ಘಟನೆ ವರದಿ ಆತ್‌ಂಡ್. ಬೆಂಗಳೂರುದ ಎಂ.ವಿ ಗಾರ್ಡನ್ ನಿವಾಸಿ ಶಿವಕುಮಾರ್ ಅರೆನ ಬುಡೆದಿ ಲಕ್ಷ್ಮೀ (32) ತೀರ್‌ಪೋಯಿನಾರ್.‌ ಶಿವಕುಮಾ‌ರ್ ಅರೆನ ಬುಡೆದಿ, ಜೋಕ್ಲೆನ ಒಟ್ಟಿಗೆ ಸಕಲೇಶಪುರಡ್ ನಡತ್ತಿನ ಮದಿಮೆದ ಕಾರ್ಯಕ್ರಮಕ್ಕ್‌ ಬತ್ತ್‌ ಇತ್ತೆರ್.

ಈ ಪೊರ್ತುಡು ಲಕ್ಷ್ಮೀ ಬೊಕ್ಕ ಜೋಕುಲು ಸಂಬಂಧಕ್ಲೆನ ಒಟ್ಟಿಗೆ ಧರ್ಮಸ್ಥಳಗ್‌ ಪೋದು, ಸುಬ್ರಹ್ಮಣ್ಯಗ್‌ ಬತ್ತಿತೆರ್. ರಾತ್ರೆ ಲಕ್ಷ್ಮೀಗ್‌ ತಿಗಲೆ ಬೇನೆ ಸುರು ಆದ್‌, ಅಪಗನೆ ಕಡಬ ಸರಕಾರಿ ಆಸ್ಪತ್ರೆಗ್ ಲೆತೊಂದು ಬತ್ತ್‌ದ್‌, ಬೊಕ್ಕ ಪುತ್ತೂರು ಸರಕಾರಿ ಆಸ್ಪತ್ರೆಗ್‌ ಲೆತೊಂದು ಪೋದಿತ್ತೆರ್. ಅಲ್ಪ ಡಾಕ್ಟರ್‌ ಚೆಕ್‌ ಮಲ್ತ್‌ದ್‌ ಪೊಂಜೊವ್‌ ತೀರ್‌ಪೋತೆರ್‌ ಪಂದ್‌ ತೆರಿಪಾದೆರ್.