ಪುತ್ತೂರ್ದ ಸುದ್ದಿ | Puttur News

ಸುಬ್ರಹ್ಮಣ್ಯ ಲಯನ್ಸ್ ಕ್ಲಬ್ ಗ್ ಪ್ರಾಂತೀಯ ಗುರ್ಕಾರ್ಲು ಭೇಟಿ

ಸುಬ್ರಹ್ಮಣ್ಯ : ದೀನ ದಲಿತರ ಬೊಕ್ಕ ಬಡವೆರ್ನ ಮೋನೆಡ್ ತೆಲಿಕೆನ್ ಕನಪುನ ನಮ್ಮ ಅಂತರಾಷ್ಟ್ರೀಯ ಲಯನ್ಸ್ ದ ಉದ್ದೇಶದೊಟ್ಟಿಗೆ ಬಡವೆರ್ನ ಸೇವೆನ್ ನಿರಂತರವಾದ್ ದುಂಬುಕೊನೊಕ, ಅಂಚೆನೆ ಪಾತೆರ ಬರಂದಿನ ಪ್ರಾಣಿ ಪಕ್ಷಿಲೆದ ಮನಸ್ಸ್ ಅರ್ಥ ಮಲ್ತೊಂದು ಐಕ್ಲೆಗ್ ಬೋಡಾಯಿನ ತಿನಸ್ ಲೆನ್ ಸುಲಭಡ್ ತಿಕ್ಕುನಂಚಿನ ಬೀಜ ಬಿತ್ತನೆ ಬೊಕ್ಕ ಪರ್ದ್ ದ ಗಿಡಲೆನ್ ಎಚ್ಚ ನಡ್ಪುನ ಕಾರ್ಯಕ್ರಮನ್ ದಿಯೊನುಗ ಪಂದ್ ಅಂತರಾಷ್ಟ್ರೀಯ ಲಯನ್ಸ್ ಜಿಲ್ಲೆದ 317 ಡಿ ಪ್ರಾಂತೀಯ ಗುರ್ಕಾರ್ಲು ಲಯನ್ ರೇಣುಕಾ ಸದಾನಂದ ಜಾಕೆ ಪಂಡೆರ್.

ಮೇರ್ ಕುಕ್ಕೆ ಸುಬ್ರಹ್ಮಣ್ಯ ಲಯನ್ಸ್ ಕ್ಲಬ್ ಗ್ ಸುಕ್ರವಾರ ಅಧಿಕೃತ ಭೇಟಿ ಕೊರ್ನ ಸಂದರ್ಭಡ್ ಐನೇಕಿಡ್ ನಡತ್ತಿನ ಲೇಸ್ ಡ್ ಪಾತೆರಿಯೆರ್. ಲೇಸ್ ದ ಗುರ್ಕಾರ್ಮೆನ್ ಕುಕ್ಕೆ ಸುಬ್ರಹ್ಮಣ್ಯ ಲಯನ್ಸ್ ಕ್ಲಬ್ ದ ಗುರ್ಕಾರ್ಲು ರಾಮಚಂದ್ರ ಪಳಂಗಾಯ ವಹಿಸ್ ದ್ ಇತ್ತೆರ್.

ವೇದಿಕೆಡ್ ಲಯನ್ಸ್ ಪ್ರಾಂತೀಯದ ಸುರುತ ಸದಸ್ಯೆರ್ ಸದಾನಂದ ಜಾಕೆ, ಲಯನ್ಸ್ ಪ್ರಾಂತೀಯ ಅಂಬ್ಯಾಸಿಡರ್ ಪ್ರೊ. ಬಾಲಚಂದ್ರಗೌಡ, ಪ್ರಾಂತೀಯ ಕೋ-ಆರ್ಡಿನೇಟರ್  ಪ್ರಕಾಶ್ ಡಿಸೋಜ, ವಲಯ ಗುರ್ಕಾರ್ಲು ಲಿಜೊ ಜೋಸ್, ವಲಯ ಕೊಆರ್ಡಿನೇಟರ್ ಬೊಕ್ಕ ಕುಕ್ಕೆ ಸುಬ್ರಹ್ಮಣ್ಯ ಲಯನ್ಸ್ ಕ್ಲಬ್ ಸ್ಥಾಪಕ ಗುರ್ಕಾರ್ಲು ಪ್ರೊ. ರಂಗಯ್ಯ ಶೆಟ್ಟಿಗಾರ್, ಅಂಚನೆ ಸಂಪಾಜೆ, ಸುಳ್ಯ, ಪಂಜ ,ಕಡಬ ,ಬೆಳ್ಳಾರೆ, ಬೊಕ್ಕ ಗುತ್ತಿಗಾರು ಲಯನ್ಸ್ ಕ್ಲಬ್ ದ ಗುರ್ಕಾರ್ಲು ಇತ್ತೆರ್.

ಉಂದುವೆ ಪೊರ್ತುಡು ಗುತ್ತಿಗಾರು ಸೈಂಟ್ ಮೇರಿ ಬ್ರೆಜೆಂಟ್ಸ್ ಶಾಲೆ ಮುಟ್ಟ 30,000 ರೂಪಾಯಿ ಬಿಲೆತ್ತ ಸೀರೆನ್ ಉಚಿತವಾದ್ ಕೊರಿಯೆರ್. ಪ್ರಾಂತೀಯ ಕ್ರೀಡಾ ಕೂಟಗ್ ಲಯನ್ಸ್ ಸದಸ್ಯೆರ್‌ಗ್ ಟೀ ಶರ್ಟ್ ನ್ ಉಚಿತವಾದ್ ಉಂದುವೆ ಪೊರ್ತುಡು ಕೊರಿಯೆರ್. ‌

ಇಂಚಿಪಗ್ ಕುಡ್ಲಡ್ ನಡತ್ತಿನ ಸಾಂಸ್ಕೃತಿಕ ಕಾರ್ಯಕ್ರಮಡ್ ಪಾಲ್ ಪಡೆದ್ ಪದ್ಯದ ಪಂತೊಡ್ ಸುರುತ ಇನಾಮು ಪಡೆನ ಸತೀಶ ಕೂಜುಗೋಡು,  ಪವನ್ ದಂಪತಿಲೆನ್ ಮಾನಾದಿಗೆ ಮಲ್ತೆರ್. ಲಯನ್ಸ್ ಕ್ಲಬ್ ಗುರ್ಕಾರ್ಲು ರಾಮಚಂದ್ರ ಪಾಳಂಗಾಯ ಎದ್ಕೊಂಡೆರ್. ಪ್ರಾಂತೀಯ ಗುರ್ಕಾರ್ಲೆನ ಪರಿಚಯನ್ ಅಶೋಕ್ ಕುಮಾರ್ ಮೂಲೆ ಮಜಲು ವಾಚನ ಮಲ್ತೆರ್. ಕಾರ್ಯದರ್ಶಿ  ಸತೀಶ ಕೂಜುಗೋಡು ವರದಿ ಮಂಡನೆ ಮಲ್ತೆರ್. ವಿಮಲ ರಂಗಯ್ಯ ಸೊಲ್ಮೆ ಸಂದಾಯ ಮಲ್ತೆರ್.

ಪುತ್ತೂರುಡು ತಲವಾರ್ ತೋಜಾಯಿನ 2 ಜನ ಅಪ್ರಾಪ್ತೆರ್ ಸೇರ್ದ್ 9 ಜನತ್ತ ಮಿತ್ತ್ ಕೇಸ್‌

ಪುತ್ತೂರು : ಮುಕ್ರಂಪಾಡಿಡ್ ತಲ್ವಾರ್ ತೋಜಾಯಿನ ನಡಕೆದ ರಡ್ಡ್‌ ಜನ ಅಪ್ರಾಪ್ತೆರ್‌ ಸೇರ್ದ್ 9 ಜನತ್ತ ಮಿತ್ತ್ ಕೇಸ್ ದಾಖಲಾತ್‌ಂಡ್.‌

ಆರೋಪಿಲಾಯಿನ ಪುತ್ತೂರು ಶಾಂತಿಗೋಡು ಗ್ರಾಮದ ದಿನೇಶ ಪಂಜಿಗ (38), ನರಿಮೊಗರು ಗ್ರಾಮದ ಭವಿತ್ (19), ಪುತ್ತೂರು ಬೊಳ್ವಾರು ನಿವಾಸಿ ಮನ್ವಿತ್ (19), ಆರ್ಯಾಪು ಗ್ರಾಮದ ಜಯಪ್ರಕಾಶ (18), ಚಿಕ್ಕಮುಡ್ನೂರು ಗ್ರಾಮದ ಚರಣ್ (23), ಬನ್ನೂರು ಗ್ರಾಮದ ಮನೀಶ (23), ವಿನೀತ್ (19) ಬೊಕ್ಕ ರಡ್ಡ್‌ ಜನ ಅಪ್ರಾಪ್ತೆರೆನ್ ಪೊಲೀಸೆರ್ ವಶಕ್ಕ್ ಪಡೆಯೊಂದೆರ್. ಈ ಬಗೆಟ್ಟ್ ಪುತ್ತೂರು ನಗರ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಮಲ್ತ್ ದ್ ತನಿಖೆ ಮಲ್ತೊಂದು ಉಲ್ಲೆರ್.

ನ.12-13 : ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನಡ್ ಬಲಿ ಪಿದಡರೆ, ಸಾಮೂಹಿಕ ಗೋಪೂಜೆ

ಪುತ್ತೂರು: ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನಡ್ ಕರಿನ ಪತ್ತನಾಜೆದಾನಿ ವಿರಾಮ ಕೊರ್ದಿತ್ತಿನ ಶ್ರೀ ದೇವೆರ್ನ ಬಲಿ ಉತ್ಸವ ತುಡರ್‌ ಪರ್ಬದಾನಿ ಪಿರ ಸುರು ಆವರೆ ಉಂಡು.

ನ.12 ಐತಾರ ರಾತ್ರೆ 7.30ಕ್ಕ್ ಶ್ರೀ ದೇವೆರ್ನ ಬಲಿ ಪಿದಾಡ್ದ್, ತುಡರ್‌ ಪರ್ಬ, ನ.13 ದಾನಿ ಬಯ್ಯಗ್ 5ಕ್ಕ್ ಸಾಮೂಹಿಕ ಗೋಪೂಜೆ ನಡಪೆರೆ ಉಂಡು. ಗೋಪೂಜೆ ಮಲ್ಪುನಕ್ಲೆಗ್ ಅವಕಾಶ ಉಂಡು, ಪೂಜೆ ಮಲ್ಪುನಕುಲ್ ಬಯ್ಯ 4.30ಕ್ಕ್‌ ಗೋಶಾಲೆಡ್ ಸಂಕಲ್ಪ ಮಲ್ತ್‌ದ್ ಪೂಜೆಡ್‌ ಪಾಲ್‌ ಪಡೆಯೊಲಿ. ಭಕ್ತಾದಿಗಳು ಎಚ್ಚಿನ ಸಂಖ್ಯೆಡ್ ಪಾಲ್‌ ಪಡೆದ್ ಶ್ರೀ ದೇವೆರ್ನ ಪ್ರಸಾದ ಸ್ವೀಕಾರ ಮಲ್ಪೊಡು ಪಂದ್ ದೇವಸ್ಥಾನದ ಪ್ರಕಟಣೆಡ್‌ ತೆರಿಪಾದೆರ್.

ಅಂತರ್‌ ವಿಶ್ವವಿದ್ಯಾಲಯ ಮಟ್ಟದ ಕಬಡ್ಡಿಗ್ ಶ್ರವಣ್‌ ಗೌಡ ಆಯ್ಕೆ‌

ಬೆಂಗಳೂರು ಆಚಾರ್ಯ ಶಿಕ್ಷಣ ಸಂಸ್ಥೆಡ್‌ ಸುರುತ ವರ್ಷದ ಎಂಬಿಎ ಕಲ್ತೊಂದು ಇಪ್ಪುನ ಶ್ರವಣ್‌ ಗೌಡ ಬೆಳಗಾವಿದ ತಾಂತ್ರಿಕ ವಿಶ್ವ ವಿದ್ಯಾನಿಲಯದ ಕಬಡ್ಡಿ ತಂಡಗ್ ಆಯ್ಕೆಯಾತೆರ್.‌ ಮೇರ್ ಎಸ್ಐಟಿ ತುಮಕೂರುಡ್ ನಡತ್ತಿನ ಆಯ್ಕೆ ಶಿಬಿರಡ್ ಅತ್ಯುತ್ತುಮ ಸಾಧನೆ ಮಲ್ತ್‌ದ್ ತಂಡಡ್ ಸ್ಥಾನ ಪಡೆಯೊಂದೆರ್.

ಆಂದ್ರಪ್ರದೇಶದ ಕಾಕಿನಾಡ್‌ದ ಜವಹರ್‌ ಲಾಲ್‌ ನೆಹರು ತಾಂತ್ರಿಕ ವಿಶ್ವ ವಿದ್ಯಾಲಯಡ್ ನ.9 ರ್ದ್ 12 ಮುಟ್ಟ ನಡಪುನ ದಕ್ಷಿಣ ವಲಯ ಅಂತರ್‌ ವಿಶ್ವವಿದ್ಯಾಲಯ ಮಟ್ಟದ ಕಬಡ್ಡಿ ಕ್ರೀಡಾ ಕೂಟಡ್‌ ಪಾಲ್‌ ಪಡೆಯೆರೆ ಉಲ್ಲೆರ್. ಸತತ 2ನೇ ಸರ್ತಿ ವಿಶ್ವ ವಿದ್ಯಾನಿಲಯದ ತಂಡಗ್ ಆಯ್ಕೆಯಾಯಿನ ಮೇರ್ ಶಾಂತಿಗೋಡು ಗ್ರಾಮದ ಪಾದೆ ಮೋಹನ ಗೌಡ ಬೊಕ್ಕ ನರಿಮೊಗರು ಕೃಷಿ ಪತ್ತಿನ ಸಹಕಾರಿ ಸಂಘದ ಉಪಾಧ್ಯಕ್ಷೆ ಲತಾ ಮೋಹನ್‌ ಗೌಡ ಮೊಕ್ಲೆನ ಮಗೆ.

ಪುತ್ತಿಲ ಪರಿವಾರರ್ದ್ ಮರ್ದ್‌ಗಾದ್ ಒಂಜಿ ಲಕ್ಷ ರೂ. ಚೆಕ್ ಹಸ್ತಾಂತರ

ಪುತ್ತೂರು: ಪುತ್ತಿಲ ಪರಿವಾರದ ಕೆಮ್ಮಿಂಜೆ ವಾರ್ಡ್‌ದ ಕಾರ್ಯದರ್ಶಿ ಬಾಲಕೃಷ್ಣ ಗೌಡ ಅರೆನ ಮಗೆ ಮೆದುಳುದ ಕಾಯಿಲೆ ಎದುರಾದ್ ಮರ್ದ್‌ಗ್‌ ಸುಮಾರ್ 10 ಲಕ್ಷದ ಅವಶ್ಯಕತೆ ಇತ್ತ್‌ದ್, ಪುತ್ತಿಲ ಪರಿವಾರರ್ದ್ ಒಂಜಿ ಲಕ್ಷ ರೂ. ಪನವುದ ಸಕಾಯ ಮಲ್ತೆರ್.

ಪುತ್ತಿಲ ಪರಿವಾರದ ವತಿರ್ದ್‌ ಒಂಜಿ ದಿನಟ್ ಸಂಗ್ರಹ ಮಲ್ತಿನ ಒಂಜಿ ಲಕ್ಷ ರೂಪಾಯಿದ ಚೆಕ್ಕ್‌ನ್ ಬಾಲಕೃಷ್ಣ ಗೌಡೆರೆಗ್ ಹಿಂದೂ ಮುಖಂಡೆರ್ ಅರುಣ್ ಕುಮಾರ್ ಪುತ್ತಿಲ ಕೊರಿಯೆರ್.

ಈ ಪೊರ್ತುಡು ಪುತ್ತಿಲ ಪರಿವಾರದ ಪ್ರಮುಖೆರ್‌ ಇತ್ತೆರ್.

ಪುತ್ತೂರು : ಕೆ.ಎಸ್.ಆರ್.ಟಿ.ಸಿ ಪೊಸ ಡಿಲೆಕ್ಸ್ ಬಸ್ ‘ಪಲ್ಲಕ್ಕಿʼ ಗ್ ಚಾಲನೆ ಕೊರ್ನ ಶಾಸಕೆರ್ ಅಶೋಕ್ ರೈ

ಪುತ್ತೂರು : ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮ (ಕೆಎಸ್‌ಆರ್‌ಟಿಸಿ) ರ್ದ್ ಪಲ್ಲಕ್ಕಿ ನಾನ್ ಎಸಿ ಸ್ಲಿಪರ್ ಬಸ್‌ಗ್ ನ.7 ದಾನಿ ಬಯ್ಯಗ್‌ ಪುತ್ತೂರು ಬಸ್ ಸ್ಟಾಂಡ್‌ಡ್ ಚಾಲನೆ ಕೊರಿಯೆರ್.‌ ಶಾಸಕೆರ್ ಅಶೋಕ್ ಕುಮಾರ್ ಮೇರ್ ರೈ ರಿಬ್ಬನ್ ಕಟ್ಟ್‌ ಮಲ್ತ್, ಧ್ವಜ ರಾಪಾವುನ ಮುಕೇನ ಚಾಲನೆ ಕೊರಿಯೆರ್. ಬೊಕ್ಕ ಬಸ್‌ದ ಉಲಾಯಿ ಪೋದ್ ವಿಶೇಷತೆನ್‌ ಪರಿಶೀಲನೆ ಮಲ್ತೆರ್.

849 ರೂ. ಬಸ್‌ತ್ತ ಟಿಕೇಟ್. ಬೆಂಗಳೂರ್ದ್ 10 ಗಂಟೆಗ್‌ ಪಿದಡುಂಡು. ದುಂಬುದಲೆಕ ಸೀಟ್‌ನ್ ದುಂಬೆ ಬುಕ್ಕಿಂಗ್ ಮಲ್ಪೊಲಿ ನೆತ್ತ ಪ್ರಯೋಜನನ್‌ ಸಾರ್ವಜನಿಕೆರ್‌ ಪಡೆಯೊನೊಲಿ ಪಂದ್‌ ತೆರಿಪಾಯೆರ್.‌

ಈ ಪೊರ್ತುಡು ಕೆಪಿಸಿಸಿ ಸಂಯೋಜಕೆರ್ ಕಾವು ಹೇಮನಾಥ ಶೆಟ್ಟಿ, ಕಂಬಳ ಸಮಿತಿದ ಗುರ್ಕಾರ್ಲು ಚಂದ್ರಹಾಸ ಶೆಟ್ಟಿ, ಕೋಡಿಂಬಾಡಿ ಗ್ರಾ.ಪಂ ಉಪಾಧ್ಯಕ್ಷೆರ್ ಜಯಪ್ರಕಾಶ್ ಬದಿನಾರು, ರೈ ಎಸ್ಟೇಟ್ ಎಜ್ಯುಕೇಶನಲ್ ಚಾರಿಟೇಬಲ್‌ ಟ್ರಸ್ಟ್‌ದ ಕಾರ್ಯಾಧ್ಯಕ್ಷೆರ್ ಸುದೇಶ್‌ ಶೆಟ್ಟಿ, ಕೆಎಸ್‌ಆರ್‌ಟಿಸಿ ವಿಭಾಗೀಯ ಸಂಚಲನಾಧಿಕಾರಿ ಮುರಳೀಧರ ಆಚಾರ್ಯ, ವಿಭಾಗೀಯ ಯಾಂತ್ರಿಕ ಶಿಲ್ಪಿ ನಂದ ಕುಮಾರ್, ಹಿರಿಯ ಘಟಕ ವ್ಯವಸ್ಥಾಪಕೆರ್ ಇಸ್ಮಾಯಿಲ್‌, ಕಾರ್ಮಿಕ ಕಲ್ಯಾಣಾಧಿಕಾರಿ ಕೆ.ಕೆ ಸೋಮಶೇಖರ, ಸಹಾಯಕ ಲೆಕ್ಕಾಧಿಕಾರಿ ಆಶಾಲತಾ, ಸಹಾಯಕ ಆಡಳಿತಾಧಿಕಾರಿ ರೇವತಿ, ಸಹಾಯಕ ಕಾನೂನು ಅಧಿಕಾರಿ ಸೌಮ್ಯ, ಸಹಾಯಕ ಸಂಖ್ಯಾಧಿಕಾರಿ ಜ್ಯೋತಿ, ಸಿಬ್ಬಂದಿ ಅಧೀಕ್ಷಕೆರ್ ಮಹಮ್ಮದ್ ಹುಸೈನ್, ಪುತ್ತೂರು ಘಟಕದ ಲೆಕ್ಕಪತ್ರ ಅಧಿಕಾರಿ ಪೂರ್ಣೇಶ್, ಪಾರುಪತ್ತೆ ಅಧಿಕಾರಿ ರಮೇಶ್, ಸಂಚಾರ ನಿಯಂತ್ರಕೆರ್ ಕೋಚಣ್ಣ ಪೂಜಾರಿ, ಸುಬ್ರಹ್ಮಣ್ಯ ಭಟ್, ಚಂದ್ರಶೇಖರ, ಗಣೇಶ್ ಕೇಕುಣ್ಣಾಯ, ಮೇಲ್ವಿಚಾರಕೆರ್ ಅಬ್ಬಾಸ್ ಬೊಕ್ಕ ಸಿಬ್ಬಂದಿಲು ಇತ್ತೆರ್.