ಕುಡ್ಲದ ಸುದ್ದಿ | Mangalore News

ತುಳು ಭವನಡ್ 360 ಲಕ್ಷ ರೂ. ಅನುದಾನದ ಕಾಮಗಾರಿಲೆನ ಉದಿಪನ

ಕರ್ನಾಟಕ ಗಡಿ ಪ್ರದೇಶ ಅಭಿವೃದ್ಧಿ ಪ್ರಾಧಿಕಾರದ ರೂ. 360 ಲಕ್ಷ ಅನುದಾನರ್ದ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ತುಳುಭವನಡ್ ನಿರ್ಮಾಣ ಆಯಿನ ಹೆಚ್ಚುವರಿ ಕಾಮಗಾರಿದ ಉದಿಪನ ಲೇಸ್ ಮಾ.24 ಸುಕ್ರಾರ ನಡತ್ಂಡ್. ಕರ್ನಾಟಕ ಗಡಿ ಪ್ರದೇಶ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷೆರ್ ಸಿ. ಸೋಮಶೇಖರ ಲೇಸ್ ಉದಿಪನ ಮಲ್ತೆರ್.

ಅಯಿರ್ದ್ ಬೊಕ್ಕ ಪಾತೆರಿನ ಆರ್, 1994 ಟ್ ತುಳು ಸಾಹಿತ್ಯ ಅಕಾಡೆಮಿ ಸುರು ಆಂಡ್. ಸುಮಾರ್ 3 ದಶಕದ ಇತಿಹಾಸ ಇಪ್ಪುನ ಅಕಾಡೆಮಿದ ಒರ ಪಿರ ತಿರ್ಗ್‌ದ್ ತೂನಗ ಇತ್ತೆದ ತುಳು ಅಕಾಡೆಮಿ ಎಡ್ಡೆ ಉಂಡು. ಪೊರ್ಲುದ ಕಟ್ವಾನೊ ಉಂಡು. ದ್ರಾವಿಡ ಭಾಷೆಡ್ ಒಂಜಾಯಿನ ತುಳು ಭಾಷೆ ಇತ್ತೆ ಜಗತ್ತ್‌ನೇ ಪಸೆರ್ದ್ಂಡ್. ವಿಜಯನಗರದ ಕಾಲಡ್ ಇತ್ತಿನ ತುಳು ಶಾಸನನ್ ಇತ್ತೆ ನಮ ಬಾರ್ಕೂರ್‌ದ ಸುತ್ತಲ ತೂಯರೆ ತಿಕ್ಕುಂಡು. ಜಗತ್ತ್‌ಡ್ ಇತ್ತೆ 2 ಕೋಟಿರ್ದ್‌ಲ ಎಚ್ಚದ ಜನ ತುಳು ಪಾತೆರುನಕುಲು ಉಲ್ಲೆರ್. ಮುಲ್ಪದ ಜನಕುಲು ತುಳು ಭಾಷೆನ್ ಮೋಕೆ ಮಲ್ತ್‌ದ್ ಪಾತೆರುವೆರ್. ಅಂಚಾದ್ ಇನೀ ಈ ತುಳುಭವನ ನಿರ್ಮಾಣ ಆಯರೆ ಸಾಧ್ಯ ಆಂಡ್ ಪಂದ್ ಪಂಡೆರ್.

ಕುಡ್ಲ ದಕ್ಷಿಣ ವಿಧಾನಸಭಾ ಕ್ಷೇತ್ರದ ಶಾಸಕೆರ್ ಡಿ. ವೇದವ್ಯಾಸ ಕಾಮತ್ ಪಾತೆರ್ದ್, ಪ್ರತಿ ಒಂಜಿ ತುಳುನಾಡ್‌ದ ಜನಕ್ಲೆನ ಭಾವನೆ ತುಳು ಭಾಷೆ 8ನೇ ಪರಿಚ್ಛೇದಗ್ ಸೇರೊಡು. ಈ ಭಾಷೆಗ್ ಸರಿಯಾಯಿನ ಸ್ಥಾನಮಾನ ತಿಕ್ಕೊಡು ಪನ್ಪಿನವು. ಉಂದೆಕ್ಕ್ ಮಸ್ತ್ ಪೊರ್ಂಬಾಟಲ ನಡತ್ಂಡ್. ದುಂಬುದ ಸರ್ಕಾರ ಉಪ್ಪುನಗ ಈ ಇಚಾರ ಸೊನ್ನೆಯಾದ್ ಇತ್ತ್ಂಡ. ಆಂಡ ಅವೆನ್ ಶೇ.50 ದಾತ್ ಮಿತ್ತ್ ಕನಯರೆ ಎಂಕುಲು ಪ್ರಯತ್ನ ಮಲ್ತ್‌ದ. ಈ ವಿಷಯಡ್ ನಮ ಪ್ರಯತ್ನ ಬೊಕ್ಕ ಪರಿಶ್ರಮ ಪಾಡ್ದ. ಆಂಡ ಸರ್ಕಾರದ ವ್ಯವಸ್ಥೆಡ್ ಬೇತೆ ಬೇತೆ ರೀತಿಡ್ ಅಡೆ ತಡೆ ಇತ್ತ್ಂಡಲ ತುಳುನ್ ನಮ ಈತ್ ಮಿತ್ತ್ ಕನಯರೆ ಪ್ರಯತ್ನ ಮಲ್ತ್‌ದ. ಅಂಚಾದ್ ನಮ್ಮ ಪ್ರಯತ್ನ, ಪರಿಶ್ರಮ ಇತ್ತಿನೆಡ್ದಾವರ ತುಳು ಭಾಷೆ ಆಯಿನಾತ್ ಬೇಗ 8ನೇ ಪರಿಚ್ಚೇದಗ್ ಸೇರುಂಡು ಪನ್ಪಿನ ಭರವಸೆನ್ ಕೊರಿಯೆರ್.

ಅಕಾಡೆಮಿದ ಮಾಜಿ ಗುರ್ಕಾರ್ಲು ದಯಾನಂದ ಕತ್ತಲ್‌ಸಾರ್ ಪಾತೆರ್ದ್, ಕೊರೋನದಂಚಿನ ಬಂಗದ ಪೊರ್ತುಡುಲ ಸಚಿವೆರ್ ಸಿ.ಟಿ ರವಿ ಮೇರ್ ಕರ್ನಾಟಕ ಗಡಿ ಪ್ರದೇಶ ಅಭಿವೃದ್ಧಿ ಪ್ರಾಧಿಕಾರದ ಮುಕೇನ ತುಳುಭವನದ ಬಾಕಿ ಬೇಲೆಗ್ 360 ಲಕ್ಷ ಅನುದಾನನ್ ಕೊರಿಯೆರ್. ಸಿ.ಟಿ ರವಿ ಮೇರ್ ಉಂದೆಕ್ಕಾದ್ ಕೊರಿನ ಬೆರಿಬಲ ಮಲ್ಲ. ಉಂದೆಕ್ಕಾದ್ ಯಾನ್ ಮಾತ್ರ ಅತ್ತಂದೆ ಮಸ್ತ್ ಜನ ಬಂಗ ಬೈದೆರ್. ಇತ್ತೆ ತುಳುಭವನದ ಬಾಕಿ ಬೇಲೆಲ ಉದಿಪನ ಆತ್ಂಡ್. ಭಾರೀ ಸಂತೋಷ ಆವೊಂದುಂಡು ಪಂಡೆರ್.

ಈ ಪೊರ್ತುಡು ಕುಡ್ಲ ಮಹಾನಗರ ಪಾಲಿಕೆದ ಮೇಯರ್ ಜಯಾನಂದ ಅಂಚನ್, ಪೂರ್ಣಿಮಾ, ಸುಧೀರ್ ಕಲ್ಲೂರ್, ಕಾರ್ಪೋರೇಟರ್ ರಾಧಾಕೃಷ್ಣ ಇತ್ತೆರ್.

ತುಳು ಅಧಿಕೃತದ ಮೋಹನ್ ಆಳ್ವೆರ್‍ನ ವರದಿನ್ ಕೂಡ್ಲೆ ಜಾರಿಗೆ ಕನಲೆ: ತುಳು ಸಂಘಟನೆಲೆನ ಒಕ್ಕೂಟರ್ದ್ ಬರವುದ ಪಲವೆ ಪ್ರದರ್ಶನ

ತುಳುವೆರೆರ್ದ್ ಓಟು ದೆತೊಂದಿನಕುಲು ತುಳುಕ್ಕಾದ್ ದಾಲ ಬೆನೊಂದಿಜ್ಜೆರ್. ಅಂಚಾದಿಪ್ಪುನಗ ಈ ಅಧಿಕೃತದ ಮಲ್ಪುನ ಬೇಲೆನ್ ಭಾರೀ ನಿಧಾನವಾದ್ ತುಳುತ್ತ ಬೇಲೆ ಮಲ್ಪುವೆ ಮಲ್ಪುವೆ ಪಂದ್ ಇದ ಮುಟ್ಟಲ ಮಲ್ತಿದ್‌ಜೆರ್. ಅಂಚಾದ್ ತುಳು ಭಾಷೆನ್ ರಾಜ್ಯದ ಅಧಿಕೃತ ಭಾಷೆ ಮಲ್ಪುನ ನಿಲೆಟ್ ತುಳು ಸಂಘಟನೆದಕುಲು ಪೊರ್ಂಬಾಟ ಮಲ್ತೆರ್.

ಭಾರತಗ್ ಬತ್ತಿನ ಎಲ್ವನ್ ಬೊಕ್ಕ ಫ್ರೆಡ್ಡಿ ಚಿಟ್ಟೆ ಪಿಲಿಲು

ಭೋಪಾಲ್: ಮಧ್ಯಪ್ರದೇಶದ ಕುನೋ ರಾಷ್ಟ್ರೀಯ ಉದ್ಯಾನವನಗ್ ಎಲ್ಟನ್ ಬೊಕ್ಕ ಫ್ರೆಡ್ಡಿ ಪನ್ಪಿನ ಪುದರ್‌ದ ರಡ್ಡ್ ಆಣ್ ಚಿಟ್ಟೆ ಪಿಲಿಕುಲು ಬತ್ತಿತ್ತ್‌ದ್, ಅವೆನ್ ಫ್ರೀ ರೇಂಜಿಂಗ್ ಪ್ರದೇಶಡ್ ಬುಡ್ತೆರ್.

ಈ ಬಗೆಟ್ ಟ್ವೀಟ್ ಮಲ್ತಿನ ಕುನೋ ರಾಷ್ಟ್ರೀಯ ಉದ್ಯಾನವನ, ರಡ್ಡ್ ಚಿಟ್ಟೆ ಪಿಲಿಲು ಆರೋಗ್ಯವಾದ್ ಹುಷಾರ್ ಇತ್ತ್‌ದ್, ಮಾ.13 ಕ್ಕ್ ಆಣ್ ಚೀತಾ ಒಬಾನ್ ಬೊಕ್ಕ ಪೊಣ್ಣ್ ಚೀತಾ ಆಶಾ, 24 ಗಂಟೆಡ್ ಜಿಂಕೆನ್ ಬೇಟೆ ಮಲ್ತಿತ್ತ್ಂಡ್. ನನ 24 ಗಂಟೆಗ್ ರಡ್ಡ್ ಚಿಟ್ಟೆ ಪಿಲಿಲು ಬೇಟೆಗ್ ಪಂದ್ ಪಿದಡ್ದಿತ್ತ್‌ದ್, ರಡ್ಡ್‌ಲ ಕಾಡ್‌ದ ಪರಿಸರಗ್ ಹೊಂದ್‌ದ್ಂಡ್ ಪಂದ್ ಶಿಯೋಪುರ ಡಿಎಫ್‌ಒ ಪ್ರಕಾಶ್ ಕುಮಾರ್ ವರ್ಮಾ ತೆರಿಪಾದೆರ್.

ಶ್ರೀ ಜಾರಂದಾಯ, ವೈದ್ಯನಾಥ, ಧೂಮಾವತಿ ಅಂಚನೆ ಪರಿವಾರ ದೈವದ ದೈವಸ್ಥಾನಡ್ ವರ್ಷಾವಧಿ ನೇಮೋಚ್ಚಯ

ಕುಡ್ಲ: ನೀರುಮಾರ್ಗದ ಶ್ರೀ ಜಾರಂದಾಯ, ವೈದ್ಯನಾಥ, ಧೂಮಾವತಿ ಅಂಚನೆ ಪರಿವಾರ ದೈವದ ದೈವಸ್ಥಾನ ಸಮಿತಿ (ರಿ.) ನೀರುಮಾರ್ಗ ಕುಂಪ್ಲೊಟ್ಟುಡು ಮಾ.25-27 ಮುಟ್ಟ ವರ್ಷಾವಧಿ ನೇಮೋಚ್ಚಯ ನಡಪರೆ ಉಂಡು.

ಮಾ.22 ಕ್ಕ್ ಕುಕ್ಕುಟ ಶೃಂಗ ಮೂರ್ತ ಆದ್ 24 ಕ್ಕ್ ನೀರುಮಾರ್ಗ ಜಂಕ್ಷನ್‌ರ್ದ್ ಕುಂಪ್ಲೊಟ್ಟು ದೈವಸ್ಥಾನ ಮುಟ್ಟ ಪುದೆಕಾಣಿಕೆದ ಮೆರವಣಿಗೆ ಬರಿಯರೆ ಉಂಡು. ಮಾ.25 ಕ್ಕ್ ಕಾಂಡೆ 8.30 ಗಂಟೆಗ್ ಬೊಳ್ಮಾರಗುತ್ತುರ್ದ್ ನಡಿಗುತ್ತು ನಟ್ಟೀಲು ಆದ್ ಕುಂಪ್ಲೊಟ್ಟು ದೈವಸ್ಥಾನಡ್ ಭಂಡಾರ ಬತ್ತ್‌ದ್ ಕೊಡಿ ಏರ್ರ್‍ಅ ಉಂಡು. ರಾತ್ರೆ 10.30 ಗಂಟೆಗ್ ಶ್ರೀ ಜಾರಂದಾಯ ಬಂಟ-ದೈವಲೆನ ನೇಮ, ಗಗ್ಗರದಿಚ್ಚಿಲು, ಹೋಮ, ಮಾಣಿಚ್ಚಿಲು, ನೇಮದಿಚ್ಚಿಲು, ಬಂಡಿಗದ್ದೆದ ಸವಾರಿ, ಕೋರ್‍ದಬ್ಬು ದೈವದ ಭೇಟಿ ಅಂಚನೆ ಪ್ರಸಾದ ಕೊರ್ಪಿನ ಲೇಸ್ ನಡಪರೆ ಉಂಡು.

ಮಾ.26 ಕ್ಕ್ ರಾತ್ರೆ 7 ಗಂಟೆರ್ದ್ ಶ್ರೀ ಮಹಿಷಂದಾಯ ನೇಮ, ವೈದ್ಯನಾಥ, ಧೂಮಾವತಿ ಬಂಟ, ಬಬ್ಬರ್ಯ ನೇಮ ನಡಪರೆ ಉಂಡು. ಮಾ.27 ಕ್ಕ್ ಕೊಡಿ ಜಪ್ಪರೆ ಉಂಡು.

ಕುಕ್ಕರ್ ಬಾಂಬ್ ಸಂತ್ರಸ್ತೆರ್ ಪುರುಷೋತ್ತಮ ಪೂಜಾರ್ಲೆನ ಇಲ್ಲ್ ಗ್ ಪೊಸ ದೇಖಿ ಕೊರಿನ “ಗುರುಬೆಳದಿಂಗಳು”

ಕುಡ್ಲ: ಆಟೋ ರಿಕ್ಷಾಡ್ ಕುಕ್ಕರ್ ಬಾಂಬ್ ಪುಡಾದ್ ಮಸ್ತ್ ಪೆಟ್ಟಾದ್ ಆಸ್ಪತ್ರೆಗ್ ದಾಖಲ್ ಆಯಿನ ಉಜ್ಜೋಡಿ ನಿವಾಸಿ ಪುರುಷೋತ್ತಮ ಪೂಜಾರಿ ಮೆರೆನ ಇಲ್ಲ್ ಕಟ್ಟುನ ಕನ ಕಡೆಕ್ಕ್‌ಲ ನನಸ್ ಆಂಡ್.

ಗುರುಬೆಳದಿಂಗಳು ಸೇವಾ ಸಂಸ್ಥೆ ಮುತಾಲಿಕೆಡ್ 6 ಲಕ್ಷ ರೂಪಾಯಿ ಕಾಸ್‌ಡ್ ಪುನರ್ ನಿರ್ಮಾಣ ಮಲ್ತಿನ ಇಲ್ಲ್‌ನ್ ಯುಗಾದಿದಾನಿ ಹಸ್ತಾಂತರ ಮಲ್ತೆರ್.

ಬ್ರಹ್ಮಶ್ರೀ ನಾರಾಯಣ ಗುರುಕ್ಲೆನ ಭಾವಚಿತ್ರನ್ ಪಾಡ್ದ್ ಅಯಿಕ್ಕ್ ಪೂಮಾಲೆ ಪಾಡ್ದ್ ತುಡರ್ ಅರ್ಲಾಯೆರ್. ಇಲ್ಲದ ಪುದರ್ ಪಲವೆನ್ ಅನಾವರಣ ಮಲ್ಪುನ ಮುಕೇನ ಸೈಂಟ್ ಆಂಟನಿ ಆಶ್ರಮದ ಫಾದರ್ ಜೆ ಬಿ ಕ್ರಾಸ್ತಾ ಶುಭ ಹಾರೈಸಾದ್ ಸಮಾಜ ಸೇವಾ ಸಂಘಟನೆದ ಕಾರ್ಯಗ್ ಎಡ್ಡೆಪ್ಪುನು ಬಯಕ್ಯೆರ್.

ಗುರುಬೆಳದಿಂಗಳು ಸೇವಾ ಸಂಸ್ಥೆದ ಅಧ್ಯಕ್ಷೆರ್ ಆರ್ ಪದ್ಮರಾಜ್ ಸೇವಾ ಸಂಘಟನೆದ ಬಗೆಟ್ ವಿವರಣೆ ಕೊರಿಯೆರ್. ನಾರಾಯಣ ಗುರುಕ್ಲೆನ ಪ್ರೇರಣೆದಲೆಕ ಈ ಬೇಲೆ ಆತ್ಂಡ್. ಇನಿ ನಮ್ಮ ಸಂಘಟನೆ ಬಡವೆರ್‍ನ ಕಣ್ಣ ನೀರ ಪನಿನ್ ಒಚ್ಚುನ ಬೇಲೆನ್ ಮಲ್ತೊಂದು ಬರೊಂದುಂಡು ಪಂದ್ ಪಂಡೆರ್.

ಮಲ್ಲ ಬಿನ್ನೆರಾದ್ ಮಾಜಿ ರಾಜ್ಯ ಸಭಾ ಸದಸ್ಯೆರ್ ಬಿ ಇಬ್ರಾಹಿಂ, ದೇವೇಂದ್ರ ಪೂಜಾರಿ, ಮೋಹನ್ ನೆಕ್ಕರೆ ಮಾರ್, ಇಂಡಿಯಾನಾ ಆಸ್ಪತ್ರೆದ ಡಾ ಯೂಸುಫ್ ಕುಂಬ್ಳೆ, ರೋಹನ್ ಕಾರ್ಪೋರೇಶನ್ ಎಂಡಿ ರೋಹನ್ ಮೊಂತೆರೋ, ಸತ್ಯಜಿತ್ ಸುರತ್ಕಲ್, ಕಾರ್ಪೊರೇಟರ್ ಪ್ರವೀಣ್ ಚಂದ್ರ ಆಳ್ವ, ಡಿ.ಕೆ ಅಶೋಕ್, ರಾಜೇಶ್ ಬಿ ಮೊಕಯಲು ಮಾತ ಲೇಸ್‌ಡ್ ಪಾಲ್ ಪಡೆದಿತ್ತೆರ್. ಈ ಪೊರ್ತುಡು ಇಲ್ಲದ ಯಜಮಾನೆರ್ ಪುರುಷೋತ್ತಮ ಪೂಜಾರ್ಲು ಬೊಕ್ಕ ಅರೆನ ಬೊಡೆದಿ ಜೋಕುಲು ಇತ್ತೆರ್. ಇಲ್ಲದ ಬೇಲೆಗ್ ಬೆನ್ತಿನಕ್ಲೆನ್ ಈ ಪೊರ್ತುಡು ಮಾನಾದಿಗೆ ಮಲ್ತೆರ್.

“ತುಳು ಭಾಷೆನ್ ಅಧಿಕೃತ ಮಲ್ತಿಜಿಂಡ ನಿಕುಲು ಬರೊಡ್ಚಿ, ಎಂಕುಲು ಓಟು ಪಾಡುಜ ಅಭಿಯಾನ”: ಚಂದ್ರಹಾಸ ದೇವಾಡಿಗ

ತುಳುನಾಡ್ ಬೊಕ್ಕ ತುಳು ಭಾಷೆಗ್ ಆವೊಂದಿಪ್ಪುನ ಅವಮಾನ ಕೋಡೆ ಇನಿತ್ತ ಅತ್ತ್. ತುಳುನಾಡ್‌ರ್ದ್ ಪೋಯಿನ ಮಾತ ಜನಪ್ರತಿನಿಧಿಲು ಬಜೀ ಸುಳ್ಳು ಭರವಸೆನ್ ಮಾತ್ರ ಕೊರ್ತೆರ್. ತುಳುವೆರೆನ ಆಸೆನ್ ನನಲ ಈಡೇರಿಸಾದ್ ಜೆರ್. ಇಂಚಿಪ್ಪಗ್ ತುರ್ತಾದ್ ಕರ್ನಾಟಕ ಸರಕಾರ ತುಳುನ್ ಅಧಿಕೃತ ಭಾಷೆ ಪಂದ್ ಘೋಷಿಸಾಯರೆ ಸಮಿತಿ ಮಲ್ತ್‌ದ್ ವರದಿ ಮಂಡನೆ ಮಲ್ತ್‌ದಿತ್ತೆರ್. ಆಂಡ ಸರ್ಕಾರ ಇದ ಮುಟ್ಟ ಒವ್ವೇ ಪ್ರತಿಕ್ರಿಯೆನ್ ಕೊರ್ತಿಜಿ. ನನ ಕೆಲ ದಿನ ಮಾತ್ರ ಇಪ್ಪುನ ಇತ್ತೆದ ಸರ್ಕಾರ ತುಳು ಭಾಷೆನ್ ಅಧಿಕೃತ ಮಲ್ತಿಜಿಂಡ ತುಳುನಾಡೊರ್ಮೆ ನೋಟಾ (ಏರೆಗ್ಲ ಇಜ್ಜಿ) ಓಟು ಪಾಡುವ ಪಂದ್ ಬೆದ್ರ ತುಳುಕೂಟದ ಬೊಕ್ಕ ಅಖಿಲ ಭಾರತ ತುಳು ಒಕ್ಕೂಟದ ಪಣವುದ ಪಾಲವೆರ್ ಚಂದ್ರಹಾಸ ದೇವಾಡಿಗ ಪಂಡೆರ್.

ಆರ್ ಬೇತೆ ಬೇತೆ ತುಳು ಸಂಘಟನೆಲು ಕುಡ್ಲಡ್ ಬುಧಾರ ಅಟ್ಟನೆ ಮಲ್ತಿನ “ನಿಕಲು ಬರೋರ್ಚಿ ಯೆಂಕ್ಲು ಓಟು ಪಾಡುಜ” ಅಭಿಯಾನದ ಪೂರ್ವಭಾವಿ ಸಭೆಟ್ಟ್ ಪಾತೆರಿಯೆರ್.

ತುಳುನಾಡ ರಕ್ಷಣಾ ವೇದಿಕೆದ ಅಧ್ಯಕ್ಷೆರಾಯಿನ ಯೋಗೀಶ್ ಶೆಟ್ಟಿ ಜಪ್ಪು ಮೇರ್ ಪಾತೆರ್ದ್, ತುಳುವೆರೆಗ್ ಆಪಿನ ಈ ಅನ್ಯಾಯನ್ ಸಹಿಸರೆ ಆಪುಜಿ. ಇತ್ತೆಲ ನಮ ಆಯ್ಕೆ ಮಲ್ತಿನ ಜನಪ್ರತಿನಿಧಿಲೆಗ್ ಬೊಕ್ಕ ಸರಕಾರಗ್ ನಮ್ಮ ಬಗೆಟ್ ನಿರ್ಲಕ್ಷ ಮಲ್ತ್ಂಡ ತುಳುನಾಡ್‌ದ ಪ್ರತಿ ಗ್ರಾಮಡ್‌ಲ ಓಟುದ ಬಹಿಷ್ಕಾರ ಅಭಿಯಾನನ್ ಮಲ್ಪುನವು ಅನಿವಾರ್ಯ ಆಪುಂಡು ಪಂದ್ ಎಚ್ಚೆರ್ಗೆ ಕೊರಿಯೆರ್.

ಕಾರ್ಯಕ್ರಮಗ್ ತುಳು ಕೂಟ ಬೆದ್ರ, ತುಳುನಾಡ ರಕ್ಷಣಾ ವೇದಿಕೆ, ತುಳು ವರ್ಲ್ಡ್ ಮಂಗಳೂರು, ನಮ್ಮ ತುಳುನಾಡು ಟ್ರಸ್ಟ್, ತುಳುವೆರೆ ಆಯನ ಕೂಟ ಕುಡ್ಲ, ನಮ ತುಳುವೆರ್ ಇಂಚಿತ್ತಿನ ಸಂಘಟನೆಲು ಬೆಂಬಲ ಕೊರ್ದು ಸಭೆಟ್ ಪಾಲ್ ಪಡೆದಿತ್ತೆರ್.

ಸಭೆಟ್ ಕೆ. ಲಕ್ಷ್ಮೀನಾರಾಯಣ ರೈ ಹರೇಕಳ, ಜ್ಯೋತಿಕಾ ಜೈನ್, ಶಮೀನಾ ಆಳ್ವ, ಮಂಜುನಾಥ ಅಡಪ, ಜಿವಿಎಸ್ ಉಳ್ಳಾಲ್, ರಾಜೇಶ ಹೆಗ್ಡೆ ಪೊಳಲಿ, ಕ್ಲಿಟಸ್ ಲೋಬೊ, ಪ್ರಶಾಂತ್ ಭಟ್ ಕಡಬ,ಗೀತಾ ಜೆ ಹೆಗಡೆ, ಭಾರತಿ ರೈ, ಯಶು ಪಕ್ಕಳ ತಲಪಾಡಿ, ಸುರೇಶ್ ಕೋಟ್ಯಾನ್, ರೂಪೇಶ್ ರೈ, ಹರಿಚಂದ್ರ ಕೋಟೆ ಕಾರ್, ವಿಜೇತ್ ಕುಡ್ಲ, ಶಾಲಿನಿ ರೈ, ವೀಣಾ ಜೆ ಶೆಟ್ಟಿ, ಕುಸುಮ ಆರ್ ಶೆಟ್ಟಿ, ರೋಶನ್ ಡಿಸೋಜ, ಶಾರದಾ ಶೆಟ್ಟಿ, ಹರೀಶ್ ಶೆಟ್ಟಿ ಶಕ್ತಿನಗರ, ವಿಕಾಸ್ ಕುಡ್ಲ, ಪ್ರಜ್ವಲ್ ಆಳ್ವ, ಸುಮತಿ ಎಸ್ ಹೆಗಡೆ, ಕವಿತಾ ಮೊಕುಲು ತನ್ನ ಅಭಿಪ್ರಾಯನ್ ಪಂಡೆರ್.
ಮಾರ್ಚ್ 24ಕ್ಕ್ ಹೋಟೆಲ್ ವುಡ್ ಲ್ಯಾಂಡ್ಸ್‌ಡ್ ಈ ಬಗೆಟ್ ಪತ್ರಿಕಾಗೋಷ್ಠಿ ಲೆಪ್ಪರೆ ತೀರ್ಮಾನ ಮಲ್ತೆರ್. ಡಾ. ರಾಜೇಶ್ ಕೃಷ್ಣ ಆಳ್ವ ಮೇರ್ ಪ್ರಾಸ್ತಾವಿಕವಾದ್ ಪಾತೆರ್ದ್ ದುಂಬುದ ಕಾರ್ಯಕ್ರಮದ ಬಗೆಟ್ ಪಂಡೆರ್.

ಬಂಟರ ಯಾನೆ ನಾಡವರ ಸಮುದಾಯೊನು 2 ಎ ವರ್ಗೊಗು ಸೇರ್ಸಾವರೆ ಮಾತೃ ಸಂಘ ಬಿನ್ನಯ

ಕುಡ್ಲ : ಬಂಟರ ಯಾನೆ ನಾಡವರ ಸಮುದಾಯದ ಹೆಚ್ಚಿನಕುಲು ಸ್ಥಿತಿವಂತೆರಾದಿತ್ತೆರ್ಡಲ ಶೇ. 40 ಜನ ಭಾರಿ ಕಷ್ಟದ ಜೀವನ ನಡಪಾವೊಂದುಲ್ಲೆರ್. ಅಂಚಾದ್ ಈ ಸಮುದಾಯೊನು ಸರ್ಕಾರ ಮೀಸಲಾತಿ ಪಟ್ಟಿಡ್ ಪ್ರವರ್ಗ 3 ರ್ದ್ ದೆತ್ತ್ ದ್ ಪ್ರವರ್ಗ 2 ಎ ಗ್ ಸೇರ್ಸಾವೊಡು, ಬಂಟರ ಅಭಿವೃದ್ಧಿ ನಿಗಮ ಸ್ಥಾಪನೆ ಮಲ್ತ್ ದ್ 500 ಕೋಟಿ ಅನುದಾನ ದೀವೊಡು. ಉಂದೆನ್ ವಿಧಾನಸಭೆ ವೋಟುದ ನೀತಿ ಸಂಹಿತೆ ಜಾರಿ ಆವೊಡ್ಡ ಘೋಷಣೆ ಮಲ್ತ್ ದ್ ಕಾನೂನುಬದ್ಧ ಮಲ್ಪೊಡು ಪಂದ್ ಬಂಟರ ಯಾನೆ ನಾಡವರ ಮಾತೃ ಸಂಘದ ಗುರ್ಕಾರ್ಲು ಮಾಲಾಡಿ ಅಜಿತ್ ಕುಮಾರ್ ರೈ ಒತ್ತಾಯ ಮಲ್ತೆರ್.

ಆರ್ ಬಂಟ್ಸ್ ಹಾಸ್ಟೆಲ್ ದ ಅಮೃತೋತ್ಸವ ಭವನದ ಚಾವಡಿಡ್ ಅಂಗಾರೆ ನಡತಿನ ಸುದ್ದಿಗೋಷ್ಠಿಡ್ ಪಾತೆರಿಯೆರ್.

ಬಂಟೆರ್ ಬೊಕ್ಕ ನಾಡವೆರ್ ಒಂಜೇ, ಬೇತೆ ಅತ್ತ್. ಬಂಟೆರ್ ಏಪಲ ಜಾತಿವಾದಿಲು ಅತ್ತ್, ಆಂಡ ಜಾತಿ ವ್ಯವಸ್ಥೆ ನ್ ಬುಡ್ರೆಲ ಆಪುಜಿ. ಸರ್ಕಾರದ ಮೀಸಲಾತಿ ವರ್ಗೀಕರಣೊಡು ಎಂಕಲ್ನ ಸಮಾಜೊಗು ಭಾರಿ ನಷ್ಟ ಆತ್ಂಡ್. ಅಂಚಾದ್ ಬಂಟ ಸಮಾಜದ ರಕ್ಷಣೆಗಾದ್ ಎಂಕುಲು ಮೀಸಲಾತಿನ್ ಪ್ರವರ್ಗ 2ಎ ಗ್ ಬದಲ್ ಮಲ್ಪರೆ ಕರಿನ 60 ವರ್ಷೊರ್ದಿಂಚಿಲ ಬೇಡಿಕೆ ದೀವೊಂದಿತ್ತ. ಆಂಡಲ ಅವು ಇನಿ ಮುಟ್ಟಲ ಆತಿಜಿ.ಇತ್ತೆ ಎಂಕುಲು ಅನಿವಾರ್ಯ ವಾದ್ ಅಂಚೆನೆ ಒತ್ತಾಯ ಪೂರ್ವಕವಾದ್ ಕೆಲವು ಬೇಡಿಕೆನ್ ದೀವೊಂದುಲ್ಲ ಪಂಡೆರ್.

ಮಂಗಳೂರು ವಿಶ್ವವಿದ್ಯಾನಿಲಯಡ್ ಬಂಟರ ಯಾನೆ ನಾಡವರ ಸಮಾಜ ಅಧ್ಯಯನ ಕೇಂದ್ರ ಸ್ಥಾಪನೆ ಮಲ್ಪೊಡು. ಬಂಟೆರ್ ಅನುವಂಶಿಕ ಮೊಕ್ತೇಸರೆರ್ ಬೊಕ್ಕ ಆಡಳ್ತೆದಾರೆರಾದುಪ್ಪುನ, ಇತ್ತೆ ಸರಕಾರದ ಅಧೀನಡ್ ಉಪ್ಪುನ ದೇವಸ್ಥಾನ, ದೈವಸ್ಥಾನಲೆನ್ ಬುಡ್ದು ಕೊರೊಡು.ಕುಡ್ಲದ ಎ.ಬಿ.ಶೆಟ್ಟಿ ಸರ್ಕಲ್ ನ್ ಸುರೂತ್ತ ಜಾಗೆಡೇ ಮಲ್ಲ ಮಲ್ತ್ ದ್ ನಿರ್ಮಾಣ ಮಲ್ಪೊಡು ಇಂಚಿನ ಬೇಡಿಕೆಲೆನ್ಲ ಸರ್ಕಾರ ಮಲ್ತ್ ಕೊರೊಡು ಪಂಡೆರ್.

ಅವ್ವತ್ತಾಂದೆ ಮಾತಾ ಸಮಾಜದ ಕಲ್ದಿನ ಅಂಚೆನೆ ಉದ್ಯೋಗ ದಾಂತಿನ ಜವನೆರೆಗ್ 5000 ರೂ. ಪಣವು, ಬಿಪಿಎಲ್ ಕಾರ್ಡ್ ದಾರೆರೆಗ್ ಬೊಕ್ಕ ಜೋಕುಲೆಗ್ ಉಚಿತ ಇನ್ಷೂರೆನ್ಸ್, ಉಚಿತ ಶಿಕ್ಷಣ ಅಂಚೆನೆ ಮದಿಮೆ ಆವಂದಿನ, 30 ವರ್ಷ ಕರಿದಿನ ಪೊಣ್ಣು ಜೋಕುಲೆಗ್ ಸಹಾಯಧನ ಕೊರೊಡು, ಕ್ಯಾನ್ಸರ್, ಹೃದಯರೋಗ, ಇಂಚಿನ ಮಲ್ಲ ಸಮಸ್ಯೆ ಇತ್ತಿನಕ್ಲೆಗ್ ಉಚಿತ ತಪಾಸಣೆ ಬೊಕ್ಕ ಚಿಕಿತ್ಸೆ, ವಿಶೇಷಚೇತನೆರೆಗ್, ಮಾನಸಿಕ ಸಮಸ್ಯೆದಕ್ಲೆಗ್ ಉಚಿತ ಚಿಕಿತ್ಸೆ, ಅನಾಥೆರೆಗ್ , ಪರಬೆರೆಗ್ ಆಶ್ರಯ ಇಂಚಿನ ಮಾತ 12 ಬೇಡಿಕೆಲೆನ್ ದುಂಬು ದೀದ್, ಆಯಿನಾತ್ ಬೇಗ ಅವೆನ್ ಸರ್ಕಾರ ಕಾರ್ಯಗತ ಮಲ್ಪೊಡು ಪಂದ್ ಬಿನ್ನಾಪು ಮಲ್ತೆರ್.

ಸುದ್ದಿಗೋಷ್ಠಿಡ್ ಬಂಟರ ಯಾನೆ ನಾಡವರ ಸಂಘದ ಕೋಶಾಧಿಕಾರಿ ಸಿಎ ರಾಮಮೋಹನ ರೈ ಬೊಕ್ಕ ಜೊತೆ ಕಾರ್ಯದರ್ಶಿ ಸಂಪಿಗೇಡಿ ಸಂಜೀವ ಶೆಟ್ರ್ ಬೊಕ್ಕ ಕುಡ್ಲ, ಒಡಿಪು, ಕುಂದಾಪುರ, ಕಾರ್ಲ , ಬೊಲ್ತೇರ್, ಪುತ್ತೂರು, ಸುಳ್ಯ ತಾಲೂಕು ಸಮಿತಿದ ಪದಾಧಿಕಾರಿಲು ಇತ್ತೆರ್.

ದೇವಲ್ಯ ಜೀರ್ಣೋದ್ಧಾರದ ಪೊರ್ತುಡು ಮದೆಕ್ಕ್ ಸೇರೊಂದುಂಡು ತುಳು ಲಿಪಿತ್ತ ಕಲ್ಲ ಬರವುದ ಶಾಸನ..!

ಕುಡ್ಲದ ಪುಗರ್ತೆದ ಪುರಾಣ ಪ್ರಸಿದ್ಧ ಶ್ರೀ ವೀರನಾರಾಯಣ ದೇವಲ್ಯಡ್ ಜೀರ್ಣೋದ್ಧಾರದ ಬೇಲೆ ಭಾರೀ ಪೊರ್ಲುಡೆ ಆವೊಂದುಂಡು. ಆಂಡ ಈ ಪೊರ್ತುಡು ಕ್ರಿ.ಶ.159ನೇ ಇಸವಿದ ಸುದ್ಧ ತುಳು ಲಿಪಿತ್ತ ಕಲ್ಲ ಬರವುದ ಶಿಲಾ ಶಾಸನ ಅಂಚನೆ ಆಯಿತೊಟ್ಟುಗು ಇತ್ತಿನ ಶಾಸನಲು ಮೂಲೆ ಸೇರ್ದ್ಂಡ್.

ಕ್ಷೇತ್ರದ ಅಭಿವೃದ್ಧಿ ಆಪಿನ ಪೊರ್ತುಡು ಈ ಶಾಸನೊಲೆನ ಒಂಜಿ ಮೂಲೆಡ್ ದೀತಿನೆರ್ದಾವರ ಅವು ಅಗೌರವದ ಸ್ಥಿತಿಟ್ಟ್ ಉಂಡು ಪಂಡ್‌ದ್ ಲೋಕೊರ್ಮೆ ಸುದ್ದಿ ಆವೊಂದುಂಡು. ಆಯಿತ್ತ ಚಿತ್ರಣಲ ಇತ್ತೆ ಮಾತ ಕಡೆಟ್ಟ್‌ಲ ಪಸೆರೊಂದು ಉಂಡು.

11, 12ನೇ ಶತಮಾನೊಡು ತುಳುನಾಡ್‌ದ ಆಳುಪ ಅರಸೆರಾದಿತ್ತಿನ ಆಳುಪೇಂದ್ರ ಅರಸು ಕುಲಶೇಖರನ್ ತನ್ನ ಮಲ್ಲ ಪೇಂಟೆ ಆದ್ ಮಲ್ತ್‌ದ್ ಆಡಳಿತ ಮಲ್ತೊಂದಿತ್ತಿನ ಪೊರ್ತುಡು ಮಲ್ತಿನ ಕಲ್ಲಬರವುದ ಶಾಸನಡ್ ಸ್ಪಷ್ಟವಾದ್ 159ನೇ ಇಸವಿ ಪಂದ್ ಬರೆದಿತ್ತ್‌ದ್ ಈ ಶಾಸನ ದೇವಲ್ಯದ ಅಭಿವೃದ್ಧಿದ ಪೊರ್ತುಡು ಮೂಲೆ ಗುಂಪಾದ್ ಅಜೀರ್ಣ ವ್ಯವಸ್ಥೆಡ್ ಉಂಡು ಪಂದ್ ಜನಕುಲು ದೂರೊಂದುಲ್ಲೆರ್.
ದೇವಲ್ಯದ ಕ್ಷೇತ್ರಾಡಳಿತ ಸಮಿತಿ ಅಂಚೆನೆ ಆಯಿಕ್ಕ್ ಸಂಬಂಧಪಟ್ಟಿನಕುಲು ಈ ಕ್ಷೇತ್ರದ ಅಭಿವೃದ್ಧಿದ ಪೊರ್ತುಡು ಭಾರೀ ಪುರಾತನ ಆಯಿನ ಭಾರೀ ಇತಿಹಾಸ ಇತ್ತಿನ ಈ ಶಿಲಾ ಶಾಸನನ್ ರಕ್ಷಣೆ ಮಲ್ಪೊಡು ಪಂಡ್‌ದ್ ಸಾರ್ವಜನಿಕೆರ್‍ನ ಒತ್ತಾಯ ಕೇಂದ್ ಬರೊಂದುಂಡು.

ವಿಟ್ಲ: “ಯಾನ್ ಶಾಸಕೆ ಆಂಡ ಕ್ರಿಕೆಟ್ ಸ್ಟೇಡಿಯಂ, ಇಂಜಿನಿಯರಿಂಗ್ ಕಾಲೇಜು ನಿರ್ಮಾಣ”-ರಮಾನಾಥ ರೈ

ವಿಟ್ಲ: ಯಾನ್ ಶಾಸಕೆ ಆದ್ ಬತ್ತ್ಂಡ ಕನ್ಯಾನ ಪದವಿ ಕಾಲೇಜಿಗ್ ಪೊಸ ಕಟ್ವಾನ, ಬೆಂಜನಪದವುಡು ಜಿಲ್ಲಾ ಮಟ್ಟದ ಕ್ರೀಡಾಂಗಣನ್ 100 ಕೋಟಿಡ್ ನಿರ್ಮಾಣ, ಬಂಟ್ವಾಳ ಕ್ಷೇತ್ರಗ್ ಸರ್ಕಾರಿ ಇಂಜಿನಿಯರಿಂಗ್ ಕಾಲೇಜು, ಅಂಡರ್ ಆರ್ಮ್ ಕ್ರಿಕೆಟ್ ಸ್ಟೇಡಿಯಂ ನಿರ್ಮಾಣ ಮಲ್ಪುನವು ಖಂಡಿತ ಪಂದ್ ಮಾಜಿ ಸಚಿವೆರ್ ಬಿ. ರಮಾನಾಥ ರೈ ಪಂಡೆರ್.

ಸಾಲೆತ್ತೂರು ಶಾಲೆದ ಕೈತಲ್ ಪ್ರಜಾಧ್ವನಿ ಯಾತ್ರೆಗ್ ಚಾಲನೆ ಕೊರಿಯೆರ್. ಅಯಿರ್ದ್ ಬೊಕ್ಕ ಪಾತೆರಿನ ಆರ್, ಬಿಜೆಪಿದ ಪಿರವು ಪೋತಿನ ಜನಕ್ಲೆಗ್ ಸರಿಯಾಯಿನ ಇಚಾರ ತೆರಿಯುಂಡು. ಸಿದ್ದರಾಮಯ್ಯ ಸರ್ಕಾರ ಇಪ್ಪುನಗ ಮಾತ ಕ್ಷೇತ್ರಡ್‌ಲ ಸರಿಯಾಯಿನ ಬೇಲೆ ಆತ್ಂಡ್ ಪಂದ್ ಪಂಡೆರ್.