ಕುಡ್ಲದ ಸುದ್ದಿ | Mangalore News

ವೋಟುದ ಪ್ರಚಾರಗ್ ತುಳುನಾಡ್‌ ದ 6 ಜನ ಸೆಲೆಬ್ರಿಟಿನಕ್ಲೆನ ಆಯ್ಕೆ

ಕುಡ್ಲ: ರಾಜ್ಯ ವಿಧಾನಸಭೆ ವೋಟು ಮೇ 10 ಕ್ಕ್ ನಡಪರೆ ಉಂಡು. ಕರಿನ ವರ್ಷ ನಡತಿನ ವೋಟುಡ್ ಮಸ್ತ್ ಜನ ಚುನಾವಣಾ ಪಕ್ರಿಯೆಡ್ ಪಾಲ್ ಪಡೆಯಂದೆ ದೂರ ಒರಿದಿತ್ತೆರ್. ಈ ರೀತಿ ದೂರ ಒರಿಯುನ ಮತದಾರೆರೆನ್ ಒಯ್ಪುನ ಸಲುವಾದ್ ದ.ಕ.ಜಿಲ್ಲಾ ಸ್ವೀಪ್ ಸಮಿತಿ ಜಿಲ್ಲೆದ ಪ್ರಮುಖ 6 ಜನನ್ ಐಕಾನ್ ಆದ್ ಆಯ್ಕೆ ಮಲ್ತ್‌ದೆರ್.

ಒಂದು ಮೊಟ್ಟೆಯ ಕಥೆ ಪುಗರ್ತೆದ ರಾಜ್ ಬಿ ಶೆಟ್ಟಿ, ಪದ್ಮಶ್ರೀ ಹರೇಕಳ ಹಾಜಬ್ಬ, ಭಾಗವತೆರ್ ಸತೀಶ್ ಶೆಟ್ಟಿ ಪಟ್ಲ, ವಿಕಲ ಚೇತನ ಸಬಿತ ಮೋನಿಸ್, ನಿರೂಪಕಿ ಅನುಶ್ರೀ ಬೊಕ್ಕ ನಟಿ ಸಂಗೀತ ಶೃಂಗೇರಿ ಮೊಕುಲೆನ್ ಮತದಾನ ಜಾಗೃತಿದ ಐಕಾನ್ ಆದ್ ಆಯ್ಕೆ ಮಲ್ತ್‌ದೆರ್.

ಉಳ್ಳಾಲ: ಜೋರುಡು ಹಾರ್ನ್ ಪಾಡುನ ಗಾಡಿದಕ್ಲೆನ ಮಿತ್ತ್ 3 ದಿನಟ್ಟ್ 130 ಕೇಸ್

ಉಳ್ಳಾಲ: ಮಸ್ತ್ ಶಬ್ದ ಬರೊಂದಿತ್ತಿನ ಹಾರ್ನ್‌ನ್ ಗಲಸೊಂದಿತ್ತಿನ ಗಾಡಿಲೆನ್ ತಡೆದಿನ ಕುಡ್ಲ ದಕ್ಷಿಣ ಸಂಚಾರಿ ಠಾಣಾ ಪೊಲೇಸೆರ್ ಮೂಜಿ ದಿನಟ್ಟ್ ಒಟ್ಟು 130 ಗಾಡಿದ ಹಾರ್ನ್ ದೆತ್ತ್‌ದ್ ಕೇಸ್ ದಾಖಲ್ ಮಲ್ತ್‌ದೆರ್.

ಠಾಣಾಧಿಕಾರಿ ರಮೇಶ್ ಹಾನಾಪುರ ಮುತಾಲಿಕೆಡ್ ಪೊಲೀಸೆರ್‍ನ ಕೂಟ ತಲಪಾಡಿಡ್ ತಪಾಸಣೆ ಮಲ್ತ್‌ದ್ ಕ್ರಮ ದೆತೊಂದೆರ್. ಟ್ರಕ್‌ಲೆಡ್ ಮಸ್ತ್ ಶಬ್ದ ಬರೊಂದಿತ್ತಿನ ಹಾರ್ನ್‌ಲೆನ್ ಗಲಸೊಂದಿತ್ತಿನ ಬಗೆಟ್ಟ್ ಸಾರ್ವಜನಿಕೆರ್ದ್ ದೂರು ಬರೊಂದಿತ್ತ್ಂಡ್. ಮಾ.31 ಜೆಡ್ದ್ ಎ.3 ಮುಟ್ಟ ತಪಾಸಣೆ ಮಲ್ತಿನ ಪೊಲೀಸೆರ್ ಕೇಸ್ ದಾಖಲ್ ಮಲ್ತ್‌ದೆರ್.

ಇಂಟರ್‌ನೆಟ್ ಇಜ್ಜಿ ಪಂದ್ ಆತ್ಮಹತ್ಯೆ ಮಲ್ತೊನಿನ 13 ವರ್ಷದ ಆಣ್

ಆನ್‌ಲೈನ್ ಗೇಮ್ ಗೊಬ್ಬರೆ ಇಂಟರ್‌ನೆಟ್ ಇಜ್ಜಿ ಪನ್ಪಿನ ಕಾರಣಗ್ 8 ನೇ ಕ್ಲಾಸ್‌ದ ಕಲ್ಪಾರ್ಥಿ ಆತ್ಮಹತ್ಯೆ ಮಲ್ತೊನಿನ ಘಟನೆ ತಮಿಳ್‌ನಾಡ್‌ಡ್ ನಡತ್ಂಡ್.

ಆಣ್ ತನ್ನ ಪೋಷಕೆರ್‍ನ ಮೊಬೈಲ್‌ನ್ ಗಲಸ್‌ದ್ ಆನ್‌ಲೈನ್ ಗೇಮ್‌ಡ್ ಮಸ್ತ್ ಪೊರ್ತು ಕಲೆವೊಂದಿತ್ತೆ. ಮಸ್ತ್ ಪೊರ್ತು ಗೇಮ್ ಗೊಬ್ಬುವೆ ಪಂದ್ ಇಲ್ಲದಕುಲು ಮೊಬೈಲ್‌ಗ್ ಇಂಟರ್‌ನೆಟ್ ಪಾಡ್ದಿಜ್ಜಾಂಡ್‌. ಈ ಕಾರಣಗ್ ಆಣ್ ಆತ್ಮಹತ್ಯೆ ಮಲ್ತ್‌ದೆ ಪಂದ್ ತೆರಿದ್ ಬೈದ್ಂಡ್.

ತುಳು ಭಾಷೆನ್ ಬಿಜೆಪಿದ ಪ್ರಣಾಳಿಕೆಡ್ ಸೇರಾವರೆ ಪ್ರಯತ್ನ ಬರ್ಪೆ: ಡಾ.ಬಿ.ಆರ್.ಶೆಟ್ಟಿ

ಧರ್ಮಸ್ಥಳದ ಡಾ.ಡಿ ವೀರೇಂದ್ರ ಹೆಗ್ಗಡೆರ್‍ನ ಆಶೀರ್ವಾದ ಇತ್ತ್ಂಡ ಮೋಹನ್ ಆಳ್ವೆರ್‍ನ ಪರಿಶ್ರಮ ಇತ್ತ್ಂಡ ತುಳುನಾಡ್‌ದ ಶಾಸಕೆರ್‍ನ ಬೆರಿಬಲ ಇತ್ತ್ಂಡ ತುಳು ಭಾಷೆ ರಾಜ್ಯದ ಅಧಿಕೃತ ಭಾಷೆ ಆಪುಂಡು ಪಂದ್ ಡಾ. ಬಿ.ಆರ್.ಶೆಟ್ಟಿ ಪಂಡೆರ್.

ತುಳು ಭಾಷೆನ್ ಬಿಜೆಪಿದ ಪ್ರಣಾಳಿಕೆಡ್ ಸೇರ್ಸಾವೋಡು ಪನ್ಪಿನ ನಿಲೆಟ್ ಪಾತೆರಿನ ಆರ್, ಎಂಕುಲು ಕಿನ್ಯರ್ದಿಂಚಿಲ ತುಳುವೆರ್ ಪನ್ಪಿನ ಪೆರ್ಮೆ. ತುಳುವೆರೆನ ಒಂಜಿ ಸ್ವಭಾವ ಎಡ್ಡೆ ಪನ್ನಗ ನಮಕ್ಕ್ ಅಗ್ಗಡ್ ತಿಕ್ಕ್ಂಡ ಒವ್‌ಲ ಬೊಡ್ಚಿ. ಕಡಲ್‌ಗ್ ಲಾಗಿದ್ ಅಯಿಟ್ಟ್ ಮುತ್ತು ಕನವೊಡು. ಅವೆನ್ ಮಾರೋಡು. ಅಂಚಿತ್ತಿನಕುಲು ನಮ್ಮ ತುಳುವೆರ್. ಅಂಚಾದ್ ತುಳುವೆರ್ ಯೋಗ್ಯೆರ್. ಒಲು ಪೋಂಡಾಲ ತುಳುವೆರ್ ಸಾಧನೆ ಮಲ್ತೊಂದು ಬರ್ಪಿನಕುಲು. ಯಾನೇ ಅಯಿಕ್ ಉದಾಹರಣೆ ಪಂದ್ ಪನ್ಪೆ. ಅಬುದಾಬಿಗ್ ದಾಲ ಇಜ್ಜಂದೆ ಪೋದು ಅಲ್ಪ ಆಸ್ಪತ್ರೆ ಮಲ್ತ್‌ದ್ ಸಾರರ್ದ್‌ಲ ಎಚ್ಚದ ಜನಕ್ಲೆಗ್ ಬೇಲೆ ಕೊರ್ತೆ. ಯಾನ್ ತುಳುವೆ ಪಂದ್ ಪನಿಯರೆ ಪೆರ್ಮೆ ಆಪುಂಡು ಪಂದ್ ಪಂಡೆರ್.

ಕರ್ನಾಟಕ ಸರ್ಕಾರಲು ಅಂಚನೆ ತುಳುನಾಡ್‌ದ ಮಾತ ಶಾಸಕೆರ್‌ನಕುಲು ತುಳು ಭಾಷೆನ್ ರಾಜ್ಯದ ಅಧಿಕೃತ ಭಾಷೆ ಮಲ್ಪೊಡು. ತುಳು ಭಾಷೆ ತುಳುನಾಡ್‌ದ ಸಿರಿಯಾದ್ ಬುಳೆಯೊಡು. ಮಾತ ಶಾಸಕೆರ್‌ನಕುಲು ನೆಕ್ಕ್ ಸಾಕಾರ ಮಲ್ಪೊಡು.

ಕನ್ನಡ ಬೊಕ್ಕ ಸಂಸ್ಕೃತಿ ಸಚಿವೆರ್ ಸುನೀಲ್ ಕುಮಾರ್ ತುಳು ಭಾಷೆನ್ ಒರಿಪಾವುಲೆಕ್ಕ ಮಲ್ಪೊಡು. ತುಳು ಭಾಷೆಗ್ ಪ್ರಾಮುಖ್ಯತೆ ಕೊರೋಡು. ಎಂಪಿ ಆಯಿನ ನಳಿನ್ ಕುಮಾರ್ ಕಟೀಲ್ ತುಳುತ್ತಾರ್ ಆಯಿನೆಡ್ದಾವರ ಆರ್ ಉಂದೆಕ್ಕ್ ಮಸ್ತ್ ಪ್ರೋತ್ಸಾಹ ಕೊರ್ಪೆರ್ ಎನ್ನುವೆ ಪಂದ್ ಪಂಡೆರ್.